ಜೆಸ್ ಫರ್ನಾಂಡೀಸ್ ಹಾಂಚಿ ಕೊಂಕ್ಣಿ ಆಧ್ಯಾತ್ಮೀಕ್ ಕವಿತಾ
ಕೊಂಕ್ಣಿ ಆಧ್ಯಾತ್ಮೀಕ್ ಕವಿತೆಚ್ಯಾ ಮಳಾರ್ ಕವಿ ಜೆಸ್ ಫರ್ನಾಂಡೀಸ್ ಹಾಂಚೆಂ ಮ್ಹತ್ವಾಚೆಂ ಯೊಗ್ದಾನ್ ಆಸಾ. ಪಾಂಯ್ವಾಟ್, ಕಿರ್ವಂಟ್, ಮೊತ್ಯಾಂ ಆನಿ ಪಾಕ್ಳ್ಯೊ ದೊಶ್ಣಿಚ್ಯೊ, ರತನ್ ಬಾವ್ಲಿ ಹ್ಯಾ ಕವಿತಾ ಸಂಗ್ರಹಾಂತ್ಲ್ಯಾನ್ ತಶೆಂಚ್ ‘ವೊಂಟ್ ಮ್ಹಜೆಂ ಕ್ರಿಸ್ತಾಕ್ ಗಾಯ್ತಾತ್’ ಹ್ಯಾ ಮಹಾಕಾವ್ಯಾಂತ್ಲ್ಯಾನ್ ಕವಿ ಜೆಸ್ ಫರ್ನಾಂಡೀಸ್ ಹಾಂಣಿಂ ಕೊಂಕ್ಣಿ ಆಧ್ಯಾತ್ಮೀಕ್ ಕವಿತೆಚೊ ಮಳೊ ಫುಲಯ್ಲೊ.
ಅಧ್ಯಾತ್ಮ್ ಮ್ಹಳ್ಯಾರ್ ಫಕತ್ ಧರ್ಮಾಚಿ ಶಿಕವ್ಣ್ ನ್ಹಯ್. ಅಧ್ಯಾತ್ಮ್ ಧರ್ಮಾಚ್ಯಾ ಪಲ್ತಡಿ ವಚೂನ್ ಆತ್ಮೊ ಆನಿ ಪರ್ಮಾತ್ಮ್ಯಾಚ್ಯಾ ನಾತ್ಯಾಚೆರ್ ಉಜ್ವಾಡ್ ಘಾಲ್ತಾ. ಕವಿ ಜೆಸ್ ಫರ್ನಾಂಡೀಸ್ ಹಾಂಣಿ ಹೆಂ ನಾತೆಂ ವಳ್ಖಲಾಂ. ತಾಂಚ್ಯಾ ಜಿಣೆಚ್ಯಾ ಕಣಾ-ಕಣಾಂತ್ ಭರಿಲ್ಲ್ಯಾ ದೆವಾಚೆಂ ಅಸ್ತೀತ್ವ್, ತಾಂಚೊ ದೆವಾ ವೆಲೊ ಮೊಗ್ ಹಾಂಚೊ ದಿಶ್ಟಾವೊ ತಾಂಚ್ಯಾ ಜಾಯ್ತ್ಯಾ ಕವಿತಾಂನಿ ಪಳೊವಂಕ್ ಮೆಳ್ಟಾ. ದೆಖೀಕ್ ‘ತುಜಿ ಸಾವ್ಳಿ’ ಹೆ ಕವಿತೆಂತ್ ಕವಿ ಮ್ಹಣ್ಟಾ
ತುಜೊ ಮೊಗ್ ಕರೂಂಕ್
ಸಮೀಂದರ್ ಕಾಳೀಜ್ ಮ್ಹಜೆಂ
ತುಜೊ ನಿಯಾಳ್ ಕರೂಂಕ್
ಅಂತ್ರಾಳ್ ಮನ್ ಮ್ಹಜೆಂ
ಆನೀಕ್ ಮ್ಹಜ್ಯಾ ಆತ್ಮ್ಯಾ ರೂಪಾನ್
ಆಸಾ ತಿ ಸಾಯ್ಬಾ
ತುಜೀಚ್ ಸಾವ್ಳಿ
ದೆವಾಚಿ ಭಕ್ತಿ ಕರೂಂಕ್ ಮಾಗ್ಣೆಂ, ಪುಜಾ, ನಾಮ್ಜಪ್, ರೊಜಾರ್ ಹಾಂಚೆ ಪೆಲ್ಯಾನ್ ವಚೂನ್ ಎಕಾಂಮೆಕಾಂ ಖಾತೀರ್ ಮಾಯಾ, ಮೊಗ್, ದುಸ್-ಯಾಂಕ್ ಭೊಗ್ಸುಪಾಚಿ ಬುದ್ದ್ ಮನ್ಶಾಂ ಭಿತರ್ ಆಸಪ್ ಗರ್ಜೆಚಿ ಹಾಚಿ ಶಿಕವ್ಣ್ ತಾಂಚ್ಯಾ ಕವಿತಾಂನಿ ಮೆಳ್ಟಾ. ದೆಖೀಕ್ ದೀನ್-ದುಬ್ಳ್ಯಾಂಕ್ ಆದಾರ್ ಕರ್ಪಾಚಿ ತಾಂಕ್ ಕವಿ ‘ಉಮಾಳೆ’ ಕವಿತೆಂತ್ ದೆವಾ ಕಡೆನ್ ಮಾಗ್ತಾ.
ದೆವಾ! ಮ್ಹಜಿ ಎಕ್ ವ್ಹಡ್ಲಿ ಶಾಲ್ ಕರ್
ಆನಿ ಫುಟ್ಪಾಯರೆರ್ ನ್ಹಿದತ್ಲ್ಯಾಂಕ್
ಫಾಡೂನ್ ತಿ ಪಾಂಗ್ರೂಂಕ್ ದಿ
ದೆವಾ! ಮ್ಹಜಿ ಕೃಷ್ಣಾಚಿ ಮುರ್ಲಿ ಕರ್
ಗೊರ್ವಾ-ರಾಖ್ಣ್ಯಾಂಕ್ ದಿ
ರಾನಾಂ-ವನಾಂತ್ ಭೊಂವ್ತನಾ ಮನ್ ರಿಜೊವಂ ದಿ
ಸಂವ್ಸಾರಾಂತ್ ಭೌತೀಕ್ ಸುಖಾ ಫಾಟ್ಲ್ಯಾನ್ ಧಾಂವ್ತನಾ ಮನೀಸ್ ಸ್ವಾರ್ಥ್ ಆಪ್ಣಾಯತ್ ಭಾವಾರ್ಥೀಪಣ್, ಮನೀಸಪಣ್ ಶೆಣಯ್ತ್ ಚಲ್ಲಾ. ವಜ್ರಾಂಚ್ಯಾ ಲಖ್ಲಖೀತ್ ಉಜ್ವಾಡಾಕ್ ಭುಲೂನ್ ದೆವಾಚ್ಯಾ ಅಜ್ರಂವರ್ ಮೊಗಾಚೆಂ ಮೊಲ್ ಮನ್ಶಾಕ್ ಸಮ್ಜಲೆಂ ನಾ ಹಿ ಖಂತ್ ‘ಕಿರಂವ್ಟ್’ ಕವಿತಾ ಸಂಗ್ರಹಾಂತ್ಲ್ಯಾ ‘ಅಜ್ರಂವರ್’ ಕವಿತೆಂತ್ ದಿಶ್ಟಿ ಪಡ್ಟಾ.
ಆಯ್ಜ್ ಸಮಾಜಾಂತ್ ದೆವಾ ಧರ್ಮಾಚ್ಯಾ ನಾಂವಾನ್ ಸ್ವತಾಚೊ ಸ್ವಾರ್ಥ್ ಸಾದೊವ್ಪಿ ಎಕ್ ಪ್ರವೃತ್ತಿ ವಾಡತ್ ಆಸಾ. ದೆವಾ-ಧರ್ಮಾಚ್ಯಾ ನಾಂವಾನ್ ಮನ್ಶಾಂ-ಮನ್ಶಾಂ ಭಿತರ್ ಝಗ್ಡಿಂ-ಝುಜಾಂ ಪೆಟೊವ್ನ್ ಸ್ವತಾಚೊ ಸ್ವಾರ್ಥ್ ಸಾದೊವ್ಪ್ ಜಾತಾ. ಆಪ್ಲ್ಯಾ ಒಮ್ ಶಾಂತಿ, ಧರ್ಮ್, ರಂಗ್ ಆದಿ ಕವಿತಾಂತ್ಲ್ಯಾನ್ ಕವಿ ಹ್ಯಾ ಅಧ್ರ್ಮಿ ಪ್ರವೃತ್ತೀಚೆರ್ ಉಜ್ವಾಡ್ ಘಾಲ್ತಾ.
ಸುವಾರ್ಥಾ ಖಾತೀರ್ ಹಾಂಗಾಂ ವ್ಹಾಂವ್ತಾತ್ ನ್ಹಂಯೊ ರಗ್ತಾಚ್ಯೊ
ಪದ್ವೆಚ್ಯಾ ರೊಟಾ ಖಾತೀರ್ ಗಳ್ಟಾತ್ ತೊಕ್ಲ್ಯೊ ಭಕ್ತಾಂಚ್ಯೊ
ಧರ್ಮಾನಾಂವಾನ್ ಘುಸ್ಪಟ್ ಘಾಲ್ತಾಂವ್
ಮನೀಸಜಾತ್ ಜಾಲ್ಯಾ ರಾನ್ಟಿ
ದುಸ್-ಯಾಗೆಲೆ ಕಂಡೆ ಫೊಡ್ತಾಂವ್
ಆಪ್ಲ್ಯಾಗೆಲ್ಯಾ ಪೊಟಾಸಾಟಿ
ಖರೊ ಧರ್ಮ್ ಕಿತೆಂ ಹೆಂ ಕವಿ ‘ಧರ್ಮ್’ ಹೆ ಕವಿತೆಂತ್ ಪಟೊವ್ನ್ ದಿತಾ.
ಧರ್ಮಾ ನಾಂವಾನ್ ಅಧ್ರ್ಮ್ ಪರ್ಗೊಟಪಿ
ಧರ್ಮ್ ಗುರು ನಾಕಾತ್
ಆಪ್ಲ್ಯಾ ಶಬ್ದಾಂಚಿ ನಿಂದಾ ಕರ್ಪಿ
ಮ್ಹಾಜ್ನಯ್ ನಾಕಾತ್
ಮ್ಹಜ್ಯಾ ದೆವಾಕ್ ಮನ್ಶಾಚ್ಯಾ ಕಾಳ್ಜಾಂತ್
ಎಕ್ ದೆವಾರೊ ಜಾಯ್
ಮನ್ಶಾಚ್ಯಾ ಮನಾಂತ್ ಮನೀಸಪಣ್ ಜಾಯ್
ಅಧ್ಯಾತ್ಮ್ ಹೆಂ ಧರ್ಮಾಚೆಂ ವಿಸ್ತಾರೀತ್ ರೂಪ್. ತಾತೂಂತ್ ಧರ್ಮಾಚ್ಯಾ ಶಿಕವ್ಣಿ ಸಾಂಗಾಂತಾ ಮನೀಸಪಣಾಚ್ಯಾ ಶಿಕವ್ಣೀಚೊ ಸಾಂಗೊಡ್ ಆಸ್ತಾ ಹೊ ತಾಂಚ್ಯಾ ಕವಿತೆಚೊ ಸಾರ್. ದೆವ್ ಹೆಂ ಎಕ್ ನಿರ್ಗೂಣ್ ತತ್ವ್ ಜೆಂ ದೆವಾ-ಯಾಂತ್, ಆಲ್ತಾರಾಂತ್ ನ್ಹಯ್ ತರ್ ಮನ್ಶಾಚ್ಯಾ ಕಾಳ್ಜಾಂತ್ ಆಸ್ತಾ ಹಾಚೊ ಸಾಕ್ಷಾತ್ಕಾರ್ ಕವಿ ಆಪ್ಲ್ಯಾ ಕವಿತಾಂನಿ ಘಡಯ್ತಾ.
ಜೆಜು ಕ್ರಿಸ್ತಾಚೊ ಮೊಗ್ ತಶೆಂಚ್ ಕ್ರಿಸ್ತಾಚಿ ಶಿಕವ್ಣ್ ತಾಂಚ್ಯಾ ಕವಿತಾಂನಿ ಮೆಳ್ಟಾ. ‘ಆನೀಕ್ ಎಕ್ ಪೆಟಯ್ ವಾತ್’ ಹ್ಯಾ ಕವಿತೆಂತ್ ಕವಿ ವಾಚ್ಪ್ಯಾಂಕ್ ಖುರ್ಸಾಕ್ ಮೆಣ್ವಾತೀಚಿ ವಾತ್ ಪೆಟಯ್ತನಾಚ್ ಆಪ್ಲ್ಯಾ ಜಿಣೆಂತೂಯ್ ಕರ್ತವ್ಯಾಚಿ ವಾತ್ ಪೆಟೊವ್ಚಿ ಹೊ ಸಂದೆಶ್ ದಿತಾತ್.
ಕರ್ತವ್ಯಾಚೊ ಖುರೀಸ್
ಅರ್ದ್ಯಾ ವಾಟೆರಚ್ ದವ್ರುಂ ನಾಕಾ
ಜಿವಾಕ್ ಜೀವ್ ದಿವ್ಪಿ ಜಾ
ಜೀವ್ ಘೆವ್ಪಿ ಜಾವುಂ ನಾಕಾ
ಜೆಜು ಕ್ರಿಸ್ತಾನ್ ಖರ್ ಕಶ್ಟಾನ್, ಯಾತ್ನಾ ಸೊಶೀತ್ ಖುರೀಸ್ ಆಪ್ಲ್ಯಾ ಖಾಂದಾರ್ ಘೆತ್ಲೊ. ಹಾತೂಂತ್ಲ್ಯಾನ್ ಆಪ್ಲೆಂ ಕರ್ತವ್ಯ್ ಕರ್ತನಾ ಕಿತ್ಲೆಯ್ ಕಶ್ಟ್ ಸೊಂಸ್ಪಾಚೊ ಜೆಜು ಕ್ರಿಸ್ತಾನ್ ದಿಲ್ಲೊ ಸಂದೆಶ್ ಕವಿ ಕಲ್ಪಕತಾಯೆನ್ ಆಪ್ಲ್ಯಾ ಕವಿತೆಂತ್ಲ್ಯಾನ್ ದಿತಾ. ‘ಗೊಂಯ್ ಸುಟ್ಕೆ ಉಪ್ರಾಂತಚಿ ಕೊಂಕ್ಣಿ ಕವಿತಾ’ ಹ್ಯಾ ಸಂಶೊಧನಪ್ತ್ರಾಂತ್ ಡೊ.ನಂದ್ಕುಮಾರ್ ಕಾಮತ್ ಅಶೆಂ ಮ್ಹಣ್ಟಾತ್. ಜೆಸ್ ಫರ್ನಾಂಡೀಸ್ ಹಾಂಚ್ಯಾ ಕವಿತಾಂನಿ ಮೊಗಾಚಿ ಶಿಕವ್ಣ್ ದಿವ್ಪಿ ಕ್ರಿಸ್ತಿ ಧರ್ಮ್ ತತ್ವಾಂಚೊ ಕಲ್ಪಕ್ ಪ್ರಭಾವ್ ದಿಶ್ಟಿ ಪಡ್ಟಾ. ತಾಂಚ್ಯಾ ಕವಿತಾಂನಿ ಖುರೀಸ್ ಪ್ರತಿಕಾತ್ಮಕ್ ತರೆನ್ ಯೆತಾ.
ಬಾಪೂಯ್ ತುಜೊ ಅವ್ತಾರ್
ತ್ಯಾ ಕಶ್ಟವತ್ಲ್ಯಾ ಕ್ರಿಸ್ತಾಚೊ
ಆವ್ಯ್ ಮೊಗಾಚೆಂ ಲ್ಹಾರ್
ಅವ್ತಾರ್ ದೆವಾಚೆ ಮಾತೆಚೊ
‘ವೊಂಟ್ ಮ್ಹಜೆ ಕ್ರಿಸ್ತಾಕ್ ಗಾಯ್ತಾತ್’ ಹೆಂ ಮಹಾಕಾವ್ಯ್ ತಾಂಣಿಂ ರಚ್ಲಾಂ. ಹ್ಯಾ ಮಹಾಕಾವ್ಯಾಂತ್ಲ್ಯಾನ್ ಜೆಜು ಕ್ರಿಸ್ತಾಚ್ಯಾ ಪುರಾಯ್ ಜಿವಿತಾಚಿ ವಳಖ್ ಘಡಯ್ಲ್ಯಾ. ಹಾತೂಂತ್ ಜೆಜು ಕ್ರಿಸ್ತಾಚ್ಯಾ ಜಲ್ಮಾಚಿ ಸುವಾತ್, ಬೆಲೆಶಾರ್, ಜ್ಯೊಕಿ ಆನಿ ಎನಾ, ಜೆಜೂಚೊ ಜಲ್ಮ್, ಮಾರಿಯಾ ಮಾಂಯ್ಚೆಂ ಭುರ್ಗೆಂಪಣ್ ಅಶ್ಯೊ ಜೆಜು ಕ್ರಿಸ್ತಾಚ್ಯಾ ಜಿಣೆಂತ್ಲ್ಯೊ ಸಗ್ಲ್ಯೊ ಘಡ್ಣುಕೊ ಸ್ತವ್ನಾಚ್ಯಾ ರೂಪಾನ್ ಗುಥಂಲ್ಯಾತ್.
ತಾಂಚ್ಯಾ ಕವಿತಾಂನಿ ಪರ್ಮಾತ್ಮ್ಯಾಕ್ ಜಾಣೂನ್ ಘೆವ್ನ್ ತ್ಯಾ ಪರ್ಮಾತ್ಮ್ಯಾತೂಚ್ ಸಮ್ರ್ಪಣ್ ಕರ್ಪಾಚಿ ಭಾವ್ನಾ ಪಳೊವಂಕ್ ಮೆಳ್ಟಾ. ಪರ್ಮಾತ್ಮ್ಯಾಚೆಂ ನಿರಾಕಾರ್ ರೂಪ್ ಪಳೊವ್ನ್ ತಾಚ್ಯಾ ಸ್ವರೂಪಾಂತ್ ಭರ್ಸೂನ್ ವಚ್ಪಾಚೊ ಹಾವೆಸ್ ತೆ ಧರ್ತಾತ್. ಪರ್ಮಾತ್ಮ್ಯಾಚೆಂ ಹೆಂ ನಿರಾಕಾರ್ ರೂಪ್ ಜೆಸ್ಬಾಬಾಕ್ ಸೈಮಾಚ್ಯಾ ಘಟ್ಕಾಂನಿ ದಿಶ್ಟಿ ಪಡ್ಟಾ. ದೊಂಗರ್, ದರ್ಯಾ, ಫಾಂತೊಡ್, ಸುರ್ಯಾ ಹಾತೂಂತ್ ತಾಂಕಾಂ ದೆವ್ತ್ವ್ ಸಾಂಪ್ಡಟಾ. ದೆಖೀಕ್ ವೃಂದಾವನ್ ಕವಿತೆಂತ್ ಕವೀಕ್ ಸೈಮಾಚ್ಯಾ ಸುಂದ್ರತಾಯೆಂತೂಚ್ ವೃಂದಾವನಾಚೊ ಅಣ್ಭವ್ ಮೆಳ್ಟಾ ಆನಿ ಸೈಮಾಚ್ಯಾ ಮೊಗಾಂತೂಚ್ ಇಶ್ವರಿ ಪ್ರೀತ್ ಫುಲ್ತಾ.
ಕವೀಕ್ ದೆವಾಚಿ ಸಾಸಾಯ್ ಪಳೊವ್ಪಾಚೊ ಧ್ಯಾಸ್. ದೆವಾಚಿ ಸಾಸಾಯ್ ಕವಿ ವೆಗ್ವೆಗ್ಳ್ಯಾ ಗಜಾಲೀಂನಿ ಸೊದ್ತಾ....ಖರ್ಶೆತಾ. ಪೂಣ್ ನಿಮಾಣೆ ಕಡೆನ್ ದೆವಾಚಿ ಸಾಸಾಯ್ ತಾಕಾ ಸ್ವತಾಚ್ಯಾ ಕಾಳ್ಜಾಂತ್ ಸಾಂಪ್ಡಟಾ.
ಮಾಗೀರ್ ಸುರ್ಯಾಕ್ ವಿನೊಂತಿ
ಕೊರ್ಪಾ ಖಾತೀರ್ ಹಾಂವೆನ್
ಮ್ಹೊಜೆ ದೊನೂಯ್ ಹಾತ್ ಜೊಡ್ಲೆ
ಸುರ್ಯಾಚ್ ಮ್ಹೊಜ್ಯಾ ಸೊರ್ವಆಂಗಾತ್ ಭಿತರ್ ಸರ್ಲೊ
ಆನಿ ಮ್ಹಾಕಾ ಮ್ಹೊಜ್ಯಾ ಮೊನಾಚ್ಯಾ
ಮೊಂದೀರಾಂತ್ ಘೆವ್ನ್ ಗೆಲೊ
ಆನಿ ದಾಖೊಯ್ಲಿ ಥಂಯ್ ಚೊಕ್ಮೊಕೀತ್
ವೊರ್ಣಾನ್ ಕೊರಿ ನೊಜೊ ತೊಸ್ಲೆ
ಉಜ್ವಾಡಾಚಿ ಸಾಸಾಯ್
ದೆವಾಚೊ ಧ್ಯಾಸ್, ಸೊದ್ ಧೆವ್ಪಾಚ್ಯಾ ಹ್ಯಾ ಪ್ರವಾಸಾಂತ್ ಕವೀಕ್ ಆತ್ಮಸಾಕ್ಷಾತ್ಕಾರ್ ಘಡ್ಟಾ. ಸ್ವತಾ ಭಿತರ್ ಆಶಿಲ್ಲ್ಯಾ ಅಥಾಂಗ್ ಶಕ್ತೀಚಿ, ಆತ್ಮ್ಯಾಚಿ ತಾಕಾ ವಳಖ್ ಘಡ್ಟಾ. ಹೊ ಆಮ್ಚೊ ಆತ್ಮೊ ಮ್ಹಳ್ಯಾರೂಚ್ ಪರ್ಮಾತ್ಮಾ ಹೊ ಬೊಧ್ ತಾಂಚ್ಯಾ ಕವಿತಾಂನಿ ಘಡ್ಟಾ. ಅಸೊ ಆತ್ಮ್ ಸಾಕ್ಷಾತ್ಕಾರ್ ಘಡಿಲ್ಲೊ ಆತ್ಮೊ ಜಣೆಂತ್ ಆಯಿಲ್ಲ್ಯಾ ಖಂಯ್ಚ್ಯಾಚ್ ಸಂಕ್ಶ್ಟಾಕ್ ಭಿನಾ ಹೆಂ ತಾಂಚ್ಯಾ ‘ಆಸೊರ್’ ಕವಿತೆಂತ್ ಸುಂದರ್ ತರೆನ್ ಚಿತ್ರಾಯಲಾಂ.
ಮನೀಸಪಣಾಚೊ ಖೂನ್ ಕೊರ್ತೊಲ್ಯಾ
ನಿರ್ಜೊನ್ ಭೊಗ್ಭೊಗೀತ್ ಝುಜಾ ಮಳಾರ್
ಕೆಲ್ಯೊ ಮ್ಹೊಜ್ಯಾ ಜಿಣೆಚ್ಯೊ ತಿಸ್ಲ್ಯಾನ್-ತಿಸ್ಲ್ಯೊ
ಖಿಳಾಯ್ಲೊ ಜಾಯ್ತೆ ಪಾವ್ಟಿ ಮ್ಹಾಕಾ
ಒಪ್ಮಾನಾಚ್ಯಾ ಖಿಳ್ಯಾಂನಿ
ಒನಉಪಕಾರಾಚ್ಯಾ ಖುರ್ಸಾಕ್ ಆನಿ
ವ್ಹಾಂವಯ್ಲಿಂ ಮ್ಹೊಜಿ ಪೊವೀತ್ರ್
ತಾಂಬ್ಡ್ಯಾ ರೊಂಗಾಚಿ ಗಂಗಾ
ಪೂಣ್ ಎಕ್ಕೂಯ್ ಪಾವ್ಟಿ ಮ್ಹಾಕಾ
ಮೊರ್ಣ್ ಆಯ್ಲೆಂ ನಾ
ಹೆಂ ಕಾಳೀಜ್ ಮ್ಹೊಜೆಂ
ಮ್ಹೊಜ್ಯಾ ಜಿವಾ ಸೊಗೊತ್
ಸೊರ್ಮಾಪಣ್ ಕೆಲಾಂ
ಹ್ಯಾ ಜಿವಿತಾಚ್ಯಾ ಪುರ್ಸಾಕ್
ತೆನ್ನಾ ಸಾಕೂಚ್
ತೊಚ್ ಜಿಯೆತಾ ಮ್ಹೊಜ್ಯಾಂತ್
ಪ್ರೊತ್ಯೆಕ್ ಖಿಣಾಚ್ಯಾ ಖಿಣಾಕ್
ಘೊಡ್ಯೆ ತಿಂ ಮೊಡಾಂ ಆತಾಂ
ನಿರ್ಶೆಲ್ಯಾಂತ್ ಜಾವಂಯೆತಾ, ಕಾರೊಣ್
ತಾಂಚ್ಯಾ ಪ್ರೊತ್ಯೆಕಾಚೊ ಮ್ಹೊಜೆರ್
ಕೊಸ್ಲೊಚ್ ಪೊರಿಣಾಮ್ ಜಾಲೊ ನಾ
ಜೆಸ್ಬಾಬಾಚ್ಯಾ ಕವಿತಾಂನಿ ಸಕಾರಾತ್ಮಕ್ತಾ, ಮೊಗ್, ಮನೀಸಪಣ್, ಕರೂಣಾ, ಸೈಮ್, ಶಾಂತಿ, ಆತ್ಮಸಾಕ್ಷಾತ್ಕಾರ್ ಹಾಂಚ್ಯಾ ರೂಪಾನ್ ಅಧ್ಯಾತ್ಮ್ ಫುಲ್ತಾ.
ಸಂಧರ್ಭಾವಳೆರಿ:
1 ಫೆರ್ನಾಂಡೀಸ್,ಜೆಸ್, ಪಾಂಯ್ವಾಟ್, ಮಾಣೀಕ್ ಪ್ರಕಾಶನ್, ಆಮೊಣೆಂ, ಕೆಪೆಂ-ಗೊಂಯ್,1994
2 ಫೆರ್ನಾಂಡೀಸ್,ಜೆಸ್, ಕಿರಂವ್ಟ್, ಮಾಣೀಕ್ ಪ್ರಕಾಶನ್, ಆಮೊಣೆಂ, ಕೆಪೆಂ-ಗೊಂಯ್,
3 ಫೆರ್ನಾಂಡೀಸ್,ಜೆಸ್, ರತನ್ ಬಾವ್ಲಿ, ಮಾಣೀಕ್ ಪ್ರಕಾಶನ್, ಆಮೊಣೆಂ, ಕೆಪೆಂ-ಗೊಂಯ್,2017
4 ಫೆರ್ನಾಂಡೀಸ್,ಜೆಸ್, ವೊಂಟ್ ಮ್ಹಜೆ ಕ್ರಿಸ್ತಾಕ್ ಗಾಯ್ತಾತ್, ಮಾಣೀಕ್ ಪ್ರಕಾಶನ್, ಆಮೊಣೆಂ, ಕೆಪೆಂ-ಗೊಂಯ್,2022
5 ಫೆರ್ನಾಂಡೀಸ್,ಜೆಸ್, ಮೊಂತ್ಯಾಂ ಆನಿ ಪಾಕ್ಳ್ಯೊ ದೊಶ್ಣಿಚ್ಯೊ, ಮಾಣೀಕ್ ಪ್ರಕಾಶನ್, ಆಮೊಣೆಂ, ಕೆಪೆಂ-ಗೊಂಯ್,2024
(ಆಶಾವಾದಿ ಪ್ರಕಾಶನ್ ಆನಿ ಕಾರ್ಮೆಲ್ ಕೊಲೆಜಿಚ್ಯಾ ಜೊಡ್ ಪಾಲವಾಖಾಲ್, 22 ಫೆಬ್ರೆರ್ 2026 ವೆರ್, ನುವೆಂ ಗೊಂಯಾಂತ್ ’ಕಾರ್ಮೆಲ್ ಕೊಲೆಜಿಚ್ಯಾ ಸಭಾಂಗ್ಣಾಂತ್’ ಆಯೊಜಿತ್ ಕೆಲ್ಲ್ಯಾ ’ಕೊಂಕಣಿಂತ್ಲ್ಯೊ ಆಧ್ಯಾತ್ಮಿಕ್ ಕವಿತಾ’ ರಾಷ್ಟ್ರಿಯ್ ಸೆಮಿನಾರಾಂತ್ ’ರೊಮಿ ಲಿಪಿಚ್ಯಾ ಕೊಂಕಣಿಂತ್ಲ್ಯೊ ಆಧ್ಯಾತ್ಮಿಕ್ ಕವಿತಾ' ಪ್ರಕಾರಾಂತ್ ಜೆಸ್ ಫೆರ್ನಾಂಡಿಸಾಚ್ಯಾ ಕವಿತೆಂಚೆರ್ ಸಾದರ್ ಕೆಲ್ಲೆಂ ಪ್ರಪತ್ರ್)
