ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 13. ಅಶಿಯೀ ಏಕ್ ಪೋಲಿಸ್ ಕೇಜ್..?
ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಎದೊಳ್ಚ್ ಅಪ್ಲಿ ಅಸ್ಮಿತಾಯ್ ರುತಾಂ ಕೆಲ್ಲೊ ಪಂಚು ಬಂಟ್ವಾಳ್ ಏಕ್ ಕಾದಂಬರಿಕಾರ್, ಕಾಣ್ಯೆಗಾರ್, ಕವಿ, ಪದಾಂ ಘಡ್ಪಿ ತಶೆಂಚ್ ಏಕ್ ವಾವ್ರಾಡಿ ಜಾವ್ನಾಸಾ. ಕಾಣಿಕ್ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಪಾಂಯ್ ತೆಂಕ್ಲ್ಲೊ ಹೊ ಆತಾಂ ’ಝೆಲೊ’ ಪತ್ರಾಚೊ ಸಂಪಾದಕ್ ಜಾವ್ನಾಸಾ. ಹಾಚಾ ಸಭಾರ್ ಮಟ್ವ್ಯಾ ಕಾಣ್ಯಾಂಕ್ ಇನಾಮಾಂ ಲಾಭ್ಲ್ಯಾಂತ್.
ಪಂಚು ಬಂಟ್ವಾಳ್
ಸಕಾಳಿಂಚಾ ಸಾಡೆ
ಪಾಂಚ್ ವೊರಾಂಕ್ಚ್ ಸೈರನಾಚೊ ವ್ಹಡ್ ಆವಾಜ್ ಕರೀತ್
’ಆಂಬುಲೆನ್ಸ್’ ಚಿಕ್ಕಹಳ್ಳೆಕ್ ಯೆತಾನಾ ಭೋವ್ ಥೊಡೆ ಆಂಬೊರ್ ಪಿಕ್ಯಾ ನಿದೆಂತ್ ಥಾವ್ನ್ ಜಾಗೆ ಜಾತಾಲೆ
ಮಾತ್ರ್. ಚಿಕ್ಕಹಳ್ಳೆಚಾ ಸೊಸಾಯ್ಟೆ ಲಾಗ್ಸಾರ್ ಸಾಲು
ಪರೊಬಾಚ್ಯಾ ನವ್ಯಾನ್ ಭಾಂದ್ಲೆಲ್ಯಾ ’ಶೊಪ್ಪಿಂಗ್ ಕೊಂಪ್ಲೆಕ್ಸಾ’
ಮುಕಾರ್ ಪೊಲಿಸ್ ವೇನಾ ಬರಾಬರ್ ಆಂಬುಲೆನ್ಸ್ಯೀ ಯೇವ್ನ್ ರಾವ್ಲೆಂ.
ಥಾಪುಡ್ತಪ್ ಶೊಪ್ಪಿಂಗ್ ಕೊಂಪ್ಲೆಕ್ಸಾಚಾ ಬಗ್ಲೆಕ್ ಬಾಲು
ಶೆಟ್ಟಿನ್ ಚಲಂವ್ಚ್ಯಾ ಹೊಟ್ಲಾಚ್ಯಾ ಬಗ್ಲೆನ್ ಉದಾಕ್ ವಚೊಂಕ್ ಕೆಲ್ಲ್ಯಾ ಖಣಿಯೆಂತ್
ಸಾಲು ಪರೊಬಾಚಾ ಕೊಂಪ್ಲೆಕ್ಸಾಚೊ ಪಾರೊತ್ ಕರ್ಚೊ ರಾಕ್ವಲಿ ’ಇನಾಸ್’ ಕಠೀಣ್
ಮಾರ್ ಜಾವ್ನ್ ಜೀವನ್ ಮರ್ಣಾಮಧೆಂ ಫಿಂರ್ಗೊನ್ ಆಸ್ಲ್ಲೊ,
ಶೆಟ್ಟಿಚ್ಯಾ ಹೊಟ್ಲಾಂತ್ ಕಾಮ್ ಕರ್ಚ್ಯಾ ಎಕಾ ಭುರ್ಗ್ಯಾನ್ ತೊ
ಫಿಂರ್ಗೊಣೆಚೊ ತಾಳೊ ಆಯ್ಕೊನ್, ತಾಣೆಂ ತಾಚಾ ಸಹವಾವ್ರಾಡ್ಯಾಂಕ್ ಕಳವ್ನ್, ಉಪ್ರಾಂತ್
ಪೊಲಿಸಾಂಕ್ ಖಬಾರ್ ದಿತಾನಾ, ಪೊಲಿಸಾಂನಿ ಆಂಬುಲೆನ್ಸಾಚಿ
ವೆವಸ್ತಾ ಕೆಲ್ಲಿ ಆನಿ ಉಟಾಉಟಿಂ ತೆ ಚಿಕ್ಕಹಳ್ಳೆಕ್ ಪಾವ್ಲ್ಲೆ.
****
ಚಿಕ್ಕಹಳ್ಳಿ ಆದಿಂ ಹಳ್ಳಿ ಆಸ್ಲ್ಲಿ ಆತಾಂ ಭೋವ್ ಚಡ್ ಸುಧ್ರೊನ್
ಶೆರಾ ಭಾಶೆನ್ಂಚ್ ಪರ್ಜಳ್ತಾ. ಸೊಸಾಯ್ಟಿ, ಸೊಸಾಯ್ಟಿ ಬಗ್ಲೆಕ್
ಮಾರೊಗ್, ಮಾರ್ಗಾ ಬಗ್ಲೆನ್ ಟೆರೆಸಾಚಿಂ ಘರಾಂ, ನವ್ಯೊ
ನವ್ಯೊ ಫೆಕ್ಟ್ರ್ಯೊ, ಕಾರ್ಖಾನೆ, ಆಂಗ್ಡಿ ಉಭ್ಯೊ ಜಾತಾನಾ ಚಿಕ್ಕಹಳ್ಳೆನ್ಯೀ
ಶೆರಾಚೆಂ ರೂಪ್ ಜೊಡ್ಲ್ಲೆಂ. ಸಾಲು ಪರೊಬ್ ಆನಿ ಬಾಲು
ಶೆಟ್ಟಿ ದೊಗೀ ಎಕಾಮೆಕಾ ಜಲ್ಮಾ ಥಾವ್ನ್ಂಚ್ ಉದ್ರಿ ಜಾವ್ನಾಸೊನ್,
ಹರ್ಯೆಕಾ ಮೆಟಾಮೆಟಾಂನಿ, ಸರ್ವ್ಯ್ ವಾಟಾಂನಿ ಎಕಾಮೆಕಾಕ್ ’ಸವಾಲ್’ ಭಾಶೆನ್ ತೆ ಬಳಿಷ್ಟ್ ಜಾಯಿತ್ತ್
ವೆತಾಲೆ.
ಎಕ್ಲೊ ತೆಲಾಚೊ ಘಾಣೊ ಘಾಲ್ತಾನಾ, ಅನ್ಯೇಕ್ಲೊ ನಾರ್ಲಾಚೊ
ಹೋಲ್ಸೆಲ್ ವಿತ್ರಾವ್ಣಿ ಕರ್ತಾಲೊ, ಎಕ್ಲೊ ಬಿಡಿ ಬ್ರಾಂಚ್ ಕರ್ತಾನಾ, ಅನ್ಯೇಕ್ಲೊ ಕಾಜುಚಿ ಫ್ಯಾಕ್ಟ್ರೆಕ್ ಜಣ್ ತಲಾಸ್ ಕರ್ತಾಲೊ. ಎಕಾಮೆಕಾ
ಮಧೆಂ ಉಗ್ತೆಂ ಝಗ್ಡೆಂ ಸದಾಂ ದಿಶ್ಟಿಕ್ ಪಡ್ತಾಲೆಂ.
ಸೊಸಾಯ್ಟೇಲಾಗ್ಸಾರ್ ಸಾಲು ಪರೊಬಾಚೆಂ ವಿಸ್ತಾರ್ ಮಾಡಾಚೆಂ ತೋಟ್
ಮಾರ್ಗಾಕ್ ಲಾಗೊನ್ ಮ್ಹಳ್ಳೆಪರಿಂ ಆಸ್ಲ್ಲೆಂ. ತಾಚೆ ಬಗ್ಲೆಕ್ಚ್
ಬಾಲುಶೆಟ್ಟಿಚೊ ಜಾಗೊ ಆಸ್ಲ್ಲೊ. ತಾಂತುನ್ ಕಾಂಯ್ ಹುಟ್ವಳ್
ನಾಸ್ತಾನಾ ಪಂಣ್ಗಿಲ್ ಪಡ್ಲ್ಲೆಂ. ಲಾಗ್ಸಾರ್ ಸೊಸಾಯ್ಟಿ
ಬ್ಯಾಂಕಾರುಪಾರ್ ವ್ಹಾಡೊನ್ ಯೆತಾನಾ ವ್ಹಡ್ಲೆಂ ಹೊಟೆಲಾಸಂಗಿಂ
ಬಾರ್ ಆನಿ ರೆಸ್ಟೋರೆಂಟ್ ಉಘಡ್ಚ್ಯಾ ಆಲೋಚನೆರ್ ತಾಣಿಂ ತಾಚ್ಯಾ ಜಾಗ್ಯಾರ್
ವಿಸ್ತಾರ್ ಭಾಂದಾಪ್ ಭಾಂದ್ಲ್ಲೆಂ.
ಎಕಾ ಕುಶಿನ್ ಸಾಲು ಪರೊಬಾಚೊ ಜಾಗೊ ತರ್ ತಾಚ್ಯಾ ಬಗ್ಲೆಕ್
ಬಾಲು ಶೆಟ್ಟಿಚೊ ಜಾಗೊ... ದೊನೀಂ ಜಾಗೆ ವಾಂಟೆ ಕರ್ಚ್ಯಾ ಖಾತಿರ್ ರಾಜಿ
ಪಂಚೆತ್ಕೆರ್ ಏಕ್ ಪಾವ್ಟಿಂ ಆಮ್ಚ್ಯಾ ಗಾಂವ್ಚ್ಯಾ ’ಎಮ್ಮೆಲ್ಲೆನ್’ ಫಾತ್ರಾಂಚೊ ದೊರೊ ಉಭಾರ್ಚೆಖಾತಿರ್ ತೀರ್ಮಾನ್
ದಿಲ್ಲೆಂ. ದೊಗೀ ಸಾಂಗಾತಾ ಖರ್ಚಾಚೆ ಪಯ್ಶೆ ವಾಂಟುನ್ ದಿಂವ್ಚ್ಯಾ ತೀರ್ಮಾನಾಸವೆಂ ಕೆಲ್ಲ್ಯಾ
ಪಂಚೆತ್ಕೆಕ್ ದೊಗೀ ಒಪ್ವಾಲ್ಲೆ ಪಯ್ಶಿಲ್ಯಾ ಎಕಾ ಕಂತ್ರಾಟ್ದಾರಾಕ್ ತೊ ದೊರೊ ಭಾಂದುಂಕ್
’ಎಮ್ಮೆಲ್ಲೆ’ನ್ ಸಾಂಗ್ಲ್ಲೆಂ. ’ಎಮ್ಮೆಲ್ಲೆಚ್ಯಾ’ ಅಧಿಕಾರಾಚಾ
ಬಳಾನ್ ಮಾತ್ರ್ ತೊ ದೊರೊ ಉಭೊ ಜಾಲ್ಲೊ. ನೈಂ ತರ್ ತೊ ದೊರೊ ಜಾತೊಚ್ಚ್
ನಾ.
ದೀಸ್ ಪಾಶಾರ್ ಜಾಲ್ಲೆಪರಿಂಚ್ ನಾರ್ಲಾಂಚೆಂ ಮೋಲ್ ಪಾತಾಳಾಕ್ ದೆಂವ್ತಾನಾ
ಸಾಂಗಾತಾ ಚಿಕ್ಕಹಳ್ಳಿ ದಿಸಾನ್ದೀಸ್ ಶೆರಾ ಭಾಶೆನ್ ವ್ಹಾಡೊನ್ ಯೆತಾನಾ
ಸಾಲು ಪರೊಬಾಕ್ಯೀ ವಿರ್ಯಾರ್ ಜಾಲ್ಲೆಂ. ಶೆಂಭೊರಾಂ ವಯ್ರ್
ವ್ಹಾಡ್ಲ್ಲೆ ಮಾಡ್ ಆಸೊನ್ಯೀ ಬರಿ ಉತ್ಪತ್ತ್ ನಾತ್ಲ್ಲಿ ಪಳೆವ್ನ್ ತೊ
ಪಿಸಾಂತುರ್ ಜಾಲ್ಲೊ. ತೆದಾಳಾ ಬೊಂಬೊಯ್ ಶೆರಾಥಾವ್ನ್ ತಾಚೊ
ಬಾಪುಲ್ ಭಾವ್ ’ಪಂಚ’ ಗಾಂವಾಕ್ ಆಯಿಲ್ಲ್ಯಾವೆಳಾರ್
ಪಂಚಾನ್ ತಾಚೆಂ ಸಗ್ಳೆಂ ಕಾರ್ಭಾರ್ ಸಾಂಗ್ಲ್ಲೆಂ ಆಯ್ಕೊನ್
ಸಾಲು ಪರೊಬ್ ವಿಜ್ಮಿತ್ ಜಾಲ್ಲೊ. ಪಂಚಾನ್ ಬೊಂಬೊಯಾಂತ್
ಸುಣ್ಯಾ ಸವಾಯ್ ಮೆಳ್ಲ್ಲ್ಯಾ ಕಾಲ್ದ್ಯಾ ಎಕ್ರ್ಯಾ ಜಾಗ್ಯಾಂತ್ ಜಯ್ತ್ ಏಕ್ ಚಾರ್
ಸಾಲಾಂಚೆಂ ಭಾಂದಾಪ್ ಭಾಂದುನ್ ಸಕಯ್ಲ್ಯಾ ಥಳಾರ್ ಚಾರ್
ಪಾಂಚ್ ಆಂಗ್ಡ್ಯೊ, ಪಯ್ಲ್ಯಾ ಮಾಳ್ಯೆರ್ ಬ್ಯಾಂಕ್ ಆನಿ ಆಫಿಸಾಂ, ತಿಸ್ರ್ಯಾ ಮಾಳಿಯೆರ್
ಬಾಡ್ಯಾಚಿಂ ಫ್ಲೇಟಾಂ, ಚೊವ್ತ್ಯಾ ಮಾಳಿಯೆರ್ ಆಪ್ಲೆಂ ಸ್ವಂತ್ ಘರ್ ತಾಣೆಂ ಭಾಂದ್ಲ್ಲೆಂ. ಭಾಡ್ಯಾಂತ್ ಆಯಿಲ್ಲ್ಯಾ
ಪೊಯ್ಶ್ಯಾಂನಿ ಪಂಚಾನ್ ಧಾರಾಳ್ ಜೊಡ್ಲ್ಲೆಂ ಸಾಲು
ಪರೊಬಾಕ್ ಸಾಂಗ್ತಾನಾ ಸಾಲುಕ್ಯೀ ಲಾಳ್ ಗಳ್ಲ್ಲಿ. ತ್ಯಾಚ್ಚ್ ಚಿಂತ್ಪಾನ್ ತಾಣೆಂ
ಬಾಲುಶೆಟ್ಟಿಚಾ ಹೊಟೆಲಾ ಬಗ್ಲೆಚ್ಯಾ ನಾರ್ಲಾಚ್ಯಾ ತೊಟಾಚ್ಯಾ ಬಗ್ಲೆಕ್
ಮ್ಹಣ್ಜೆ ಮಾರ್ಗಾಕ್ ಚಡ್ ಲಾಗಿಂ ಮ್ಹಳ್ಳೆಪರಿಂ ತೀನ್-ಚಾರ್
ಮಾಡ್ ಕಾತರ್ನ್, ಬರ್ಯಾ ಇಜ್ನೆರಾಕ್ ಧರ್ನ್ ತೀನ್ ಮಾಳಿಯೆಚೆಂ
ವ್ಹಡ್ ಜಯ್ತ್ ಬಿಲ್ಡಿಂಗ್ ಚಿಕ್ಕಹಳ್ಳೆಂತ್ ಸಾಲುಪರ್ಬುನ್ ಉಭೆಂ ಕೆಲ್ಲೆಂ.
ಬಿಲ್ಡಿಂಗಾಚ್ಯಾ ಬಗ್ಲೆಕ್ ಫಳ್ ದಿಂವ್ಚೆ ಮಾಡ್ ಆಸೊನ್ ತೆ
ಬಿಲ್ಡಿಂಗಾಕ್ ಕಾಂಯ್ ಅಡ್ಕಳ್ ಜಾಯ್ನಾಂತ್ ಮ್ಹಣ್ ಇಜ್ನೆರಾನ್
ಸಾಂಗ್ಲ್ಲ್ಯಾನ್ ಸಾಲುಕ್ಯೀ ಸಂತೊಸ್ಚ್ ಜಾಲ್ಲೊ. ತೀನ್ ಚಾರ್
ಮಾಡ್ ಗೆಲ್ಲ್ಯಾಂತ್ ತಾಕಾ ಚಡ್ ದೂಕ್ ಭಗ್ಲೆಂ ನಾ.
ಸಾಲು ಪರ್ಬುಚ್ಯಾ ತ್ಯಾ ಬಿಲ್ಡಿಂಗಾಂತ್ ಸಕಯ್ಲ್ಯಾ ಸಾಲಾಂತ್ ಏಕ್
ಹೊಟೆಲ್ ತೀನ್-ಚ್ಯಾರ್ ಆಂಗ್ಡ್ಯೊ ಭಾಂಧುನ್ ಘಾಲ್ತಾನಾ,
ಪಯ್ಲ್ಯಾ ಮಾಳ್ಯೆರ್ ಭಾಡ್ಯಾಕ್ ದಿಂವ್ಚಿಂ ಸಿಂಗಲ್ ರುಮಾಂಯಿ ಆಸಾ ಕೆಲಿಂ.
ಲಾಗ್ಶಿಲ್ಯಾ ಕೊಳಕೇಬೈಲಾಂತ್ ಇಂಜಿನಿಯರಿಂಗ್ ಕೊಲೆಜ್ ಕರ್ತಾತ್ ಮ್ಹಳ್ಳಿ ಖಬಾರ್
ಮೆಳ್ಲ್ಲಿಚ್ಚ್ ಭುರ್ಗ್ಯಾಂಖಾತಿರ್ ತಿಸ್ರ್ಯಾ ಮಾಳ್ಯೆರ್ ಏಕ್
ಹೊಸ್ಟೆಲ್ ಆನಿ ತಾಂಕಾಂ ಜೆವ್ಣಾಖಾಣಾ ಖಾತಿರ್ ವ್ಯವಸ್ತಾಯೀ ಆಸಾ ಕೆಲ್ಲಿ. ಚಿಕ್ಕಹಳ್ಳೆಂತ್
ಸರ್ವ್ ಸವ್ಲತ್ಯೊ ಸಾಂಗಾತಾ ಮೆಳ್ತಾನಾ ಇಂಜಿನಿಯರಿಂಗ್ ಶಿಕ್ಚ್ಯಾ ಭುರ್ಗ್ಯಾಂಕ್ಯೀ ಭಾಜ್ಲ್ಲೆಂ ಮೆಳ್ಳೆಂ. ಭುರ್ಗಿಂ
ಹೆಣೆಂ ಸಾಲು ಪರ್ಬುಚಾ ಹೊಸ್ಟೆಲಾಕ್ ಯೆತಾನಾ ಚಿಕ್ಕಹಳ್ಳಿ ನಿಜಾಯ್ಕೀ
ಶೆರ್ ಜಾವ್ನ್ಂಚ್ ಬದ್ಲೊನ್ ಗೆಲ್ಲೆಂ.
ಇಂಜಿನಿಯರಿಂಗ್ ಕೊಲೆಜಿಚೆಂ ಭುರ್ಗೆ ಮ್ಹಣ್ತಾನಾ ಸಾಲು ಪರೊಬಾನ್ಯೀ ತಕ್ಲಿ ಇಲ್ಲಿ ಖರ್ಚ್ ಕೆಲ್ಲಿ. ತಾಂಚಿ ರಾಕ್ವಣ್ ಕರ್ಚ್ಯಾ ಖಾತಿರ್ ಎಕಾ ರಾಕ್ವಲ್ಯಾಕ್ಯೀ ತಾಣೆಂ
ನಮ್ಯಾರ್ಲೊ. ಘಟ್ಮೂಟ್ ಜಿವಾಚೊ, ಧಡಂಗ್ ಇನಾಸ್ ನಿಜಾಯ್ಕೀ ಫಯ್ಟರ್
ಶೆಟ್ಟಿ ಭಾಶೆನ್ ಸಕ್ಟಾಂಕೀ ಪಸಂದ್ ಜಾಲ್ಲೊ. ಇನಾಸ್ಯೀ ಎಕೀನ್
ಮನಿಸ್. ವ್ಹಯ್ ಆಸ್ಲ್ಲೆಂ ವ್ಹಯ್ ಮ್ಹಣ್ಚೊ..
ನ್ಹಯ್ ಆಸ್ಲ್ಲೆಂ ನ್ಹಯ್ ಮ್ಹಣ್ಚೊ. ಶಿಸ್ತೆನ್ ಆನಿ ರೆಗ್ರೆನ್ ತಾಚೆಂ ಜೀವನ್
ಸಕ್ಟಾಂಕೀ ಮೆಚ್ವೊನ್ ಜಾಲ್ಲೆಂ. ಕಾಂಯ್ ಪಾಡ್ ಸವಯೊ, ಬಿಡಿ, ಸಿಗ್ರೆಟ್,
ಸೊರೊ ಖಂಚಾಚೊಯ್ ತೊ ಗುಲಾಮ್ ಜಾಂವ್ಕ್ ನಾತ್ಲ್ಲೊ
ಮ್ಹಣ್ಚಾಕೀ ತಾಕಾ ಕಸಲೀಯ್ ಸವಯ್ಚ್ ನಾತ್ಲ್ಲಿ
ಮ್ಹಣ್ಯೆತ್. ಇಂಜಿನಿಯರಿಂಗ್ ಕೊಲೆಜಿಚೆ ಬುರ್ಗೆ ಚಿಕ್ಕೆ ಪಾರ್ಪೊಳ್, ಘಡಾಮೊಡಿಚೆ ದೆಕುನ್ ಅಸಲೊ ಶಿಸ್ತೆಚೊ
ಮನಿಸ್ ಸಾರ್ಕೊ ಮ್ಹಣ್ ಸಕ್ಟಾಂಕೀ ಭೊಗ್ಲ್ಲೆಂ.
ಏಕ್ ಪಾವ್ಟಿಂ ಹೊಸ್ಟೆಲಾಚ್ಯಾ ಪಾಟ್ಲ್ಯಾನ್ ಆಸ್ಚ್ಯಾ ಮಾಡಾಂಚ್ಯಾ ತೊಟಾಂತ್ ಇಂಜಿನಿಯರಿಂಗಾಚೊ ಭುರ್ಗೊ
ಸಮ್ನ ತಾಚಾ ಲವ್ವರಾಕ್ ಘೆವ್ನ್ ಯೇವ್ನ್ ಮಜಾ ಮಾರ್ತಾನಾ ರಾಕ್ವಲಿ ಇನಾಸಾನ್ ಪಳೆಲ್ಲೆಂ.
ಸಮ್ನಕ್ ಜ್ಯೋರ್ ಕರ್ನ್ ತಾಣೆಂ ಧಾಂವ್ಡಾಯಿಲ್ಲೆಂ. ತೆದಾಳಾ ತ್ಯಾ
ಸಮ್ನನ್ ಇನಾಸಾಕ್ ’ಏಕ್ ಹಾತ್ ಪಳೆತಾಂ’ ಮ್ಹಣ್ ಧಮ್ಕಿ
ದಿಲ್ಲೀಯ್ ಆಸಾ. ಥೊಡೆ ಭುರ್ಗೆ ರಾತಿಚೆಂ ಗಮ್ಮತ್ ಮಾರ್ಚ್ಯಾ
ನಿಬಾನ್ ಬಗ್ಲೆಚಾ ಬಾಲುಶೆಟ್ಟಿಚಾ ಬಾರ್ ಆಂಡ್ ರೆಸ್ಟೋರೆಂಟಾಂತ್ಲೆಂ
ಪೀವನ್ ಹಾಡ್ನ್ ಹೊಸ್ಟೆಲಾಕ್ ಹಾಡ್ನ್ ಯೆತಾನಾಂಯೀ
ಸಭಾರ್ ಪಾವ್ಟಿಂ ಇನಾಸಾನ್ ಆಡಾಯಿಲ್ಲೆಂ. ತಾಂಕಾಂ ಗಮ್ಮತ್ ಕರುಂಕ್
ಸೊಡಿನಾತ್ಲ್ಲ್ಯಾಕ್ ತಾಚೆರ್ ತಾಂಕಾಂ ರಾಗ್ ಆಸ್ಲ್ಲೊ.
ಪುಣ್ ಇನಾಸ್ ಹೆಂ ಖಂಚೇಂಯಿ ತಕ್ಲೆಕ್ ಕಾಣ್ಘೆನಾತ್ಲ್ಲೊ. ತೊವೀ ಜಾಲೊ ತಾಚೆಂ ಕಾಮ್ಯೀ ಜಾಲೆಂ
ಮ್ಹಳ್ಳೆಪರಿಂ ರೆಗ್ರೆನ್ ತೊ ಆಸ್ಲ್ಲೊ.
ಆನಿ ಆಜ್.. ಅಚಾನಕ್..
ಸಕಾಳಿಂ ಫುಡೆಂಚ್ ಫಿಂರ್ಗೊಂಚಾ ಸ್ಥಿತೆರ್ ತಕ್ಲೆ ಪಾಂಯಾಂಕ್ ಕಠೀಣ್
ಮಾರ್ ಜಾವ್ನ್ ಸಾಲು ಪರೊಬಾಚಾ ಬಿಲ್ಡಿಂಗಾ ಬಗ್ಲೆಂತ್ ಆಸ್ಚಾ
ಬಾಲುಶೆಟ್ಟಿಚ್ಯಾ ಹೊಟ್ಲಾ ಬಗ್ಲೆಂತ್ಲ್ಯಾ ತ್ಯಾ ಉದ್ಕಾಚಾ ಖಣಿಯೆಂತ್ ಜೀವನ್
ಮರಣಾಮಧೆಂ ಝರ್ಕಟೊನ್ ಆಸ್ಲ್ಲೊ ಇನಾಸ್.
*******
ಉಟಾಉಟಿಂ ರಾಕ್ವಲಿ ಇನಾಸಾಕ್ ಆಸ್ಪತ್ರೆಕ್ ವ್ಹರ್ನ್ ಎಮರ್ಜೆನ್ಸಿ
ವಾರ್ಡಾಂತ್ ತಾಚಿ ಚಾಕ್ರಿ ಕರುಂಕ್ ಸುರ್ವಾತ್ ಕೆಲಿ. ರಾಕ್ವಲಿ ಇನಾಸಾಚಾ ತಕ್ಲೆಕ್ ಆನಿ
ಪಾಂಯಾಂಕ್ ಖಂಯ್ಚ್ಯಾ ಘಟ್ಟ್ ವಸ್ತುಂತ್ ಮಾರ್ಲ್ಲೆಭಾಶೆನ್
ದಿಸ್ತಾಲೆಂ. ದಾವ್ಯಾ ಪಾಂಯಾಚ್ಯಾ ಘಾಂಟಿಕಡೆ ಪಡ್ಲ್ಲ್ಯಾ
ಮ್ಹಾರಾಕ್ ಘಾಂಟಿ ಸಕಯ್ಲ್ ಪಾಂಯ್ ಉಮ್ಕಾಳ್ತಾಲೊ.
ಹಾತಾಕ್, ಬಾವ್ಳ್ಯಾಕ್, ಬೊರಿಯಾಂಕ್ ಮ್ಹಾರ್ ಜಾಲ್ಲೊ ಎಕ್ಸ್ರೇ ಕಾಡ್ತಾನಾ ಕಳ್ಳೆಂ ಕೊಣೆಂ
ಪುಣೀಂ ದುಸ್ಮಾನಾನ್ ದಾಂಡ್ಯಾ ತೊಣ್ಕ್ಯಾಂನಿ ಮಾರ್ನ್ ಘಾಲಾ
ವ ತಾಂಚೊ ರಾಗ್ ಕಾಡ್ಲಾ ಮ್ಹಣೊನ್ ಲೋಕ್ ಎಕಾಮೆಕಾ
ಮ್ಹಣ್ತಾಲೆ.
ಒಪ್ರೇಶನ್ ಜಾವ್ನ್ ಏಕ್ ಹಾಫ್ತೊ ಗೆಲ್ಯಾರೀ ಇನಾಸಾಕ್
ಮತ್ ಪಾಟಿಂ ಆಯ್ಲಿಚ್ ನಾ. ಪೊಲಿಸಾಂನಿ ಕೇಜ್ ಹಾತಿಂ ಘೆತ್ಲ್ಲಿ.
ಹ್ಯಾಚ್ ವೆಳಾರ್ ಇನಾಸಾಥಾವ್ನ್ ಜಾಂವ್, ಹೆರಾಂ ಕೊಣಾಯ್ ಥಾವ್ನ್ ಜಾಂವ್ ಕಾಂಯ್ಂಚ್
ಮಾಹೆತ್ ಮೆಳಾನಾತ್ಲ್ಲ್ಯಾನ್ ಪೊಲಿಸಾಂನಿ ತಾಂಚೆ ಸೊಧ್ನೆಚೆಂ ಕಾಮ್ ಚಾಲುಚ್ ದವರ್ಲೆಲೆಂ ಚಿಕ್ಕಹಳ್ಳೆಚಾ
ಲ್ಹಾನ್ ಲ್ಹಾನ್ ತುಂಡು ಪುಂಡು ಪೋಲಿ ಗುಂಡಾಂಕ್ಯ್ ಧರ್ನ್
ಬೆಶ್ಟಾಯಿಲ್ಲೆಂ. ಕೊಣಾಕೊಣಾಚೆರ್ ದುಭಾವ್ ಆಸಾ ತಾಂಕಾಂ
ಪುರಾ ವಿಚಾರ್ ಕೆಲ್ಲೊ ಪೊಲಿಸಾಂನಿ. ಸಮ್ನಾಕ್ಯೀ ತಾಣಿಂ ಧರ್ನ್ ತೋಂಡ್
ಸೊಡಂವ್ಚೆಂ ಪ್ರಯತ್ನ್ ಕೆಲ್ಲೆಂ. ಬಗ್ಲೆಚ್ಯಾ ಬಾರ್ ಆಂಡ್ ರೆಸ್ಟೊರೆಂಟಾಚೊ ಧನಿ
ಬಾಲು ಶೆಟ್ಟಿಕ್ಯೀ ಹ್ಯಾ ಬಾಬ್ತಿನ್ ಬಂಧೆಂತ್ ಘಾಲ್ಲೊ. ಪುಣ್ ಖಂಯ್ಚೀಯ್ ಕುರುಃ/ಸಾಕ್ಸ್
ಮೆಳಾನಾಸ್ತಾನಾ ಪೊಲಿಸ್ಯೀ ಸಲ್ವೊನ್ ಗೆಲ್ಲೆ. ತ್ಯಾ ಭಾಯ್ರ್ ಇನಾಸಾಚಿ
ಮತ್ ವೆಗ್ಗಿಂ ಪಾಟಿಂ ಯೇನಾತ್ಲ್ಲ್ಯಾನ್ ಸಗ್ಳೆಂ ಸಲ್ವಣೆಚ್ಯಾ
ವಾಟೆರ್ ಆಸ್ಲ್ಲೆ.
ಖಂಯ್ಚಾಕೀ ಇನಾಸಾಕ್ ಸಾರ್ಕಿ ಮತ್ ಆಯ್ಲ್ಯಾರ್ ಮಾತ್ರ್
ಸಗ್ಳಿ ಗಜಾಲ್ ಕಳ್ತೆಲಿ ಮ್ಹಣ್ ಅಕ್ರೇಕ್ ಪೊಲಿಸ್ ಇನ್ಸ್ಪೆಕ್ಟರಾನ್
ಹಾತ್ ಧುವ್ನ್ ಸೊಡ್ಲ್ಲೆ.
****
ಸಾದಾರ್ಣ್ ದೋನ್ ಹಾಫ್ತ್ಯಾಂ ಉಪ್ರಾಂತ್ ಇನಾಸಾಕ್ ಮತ್
ಪಾಟಿಂ ಆಯ್ಲಿ. ತೆಣೆಂ ಭಲಾಯ್ಕಿ ತಪಾಸ್ಚೊ ದಾಕ್ತೆರ್ ಎಕಾ
ವಾಟೆನ್ ಜಯ್ತೆವಂತ್ ಜಾತಾನಾ, ಹೆಣೆಂ ಪೊಲಿಸ್ ಇನ್ಸ್ಪೆಕ್ಟರ್ ಇನಾಸ್
ಮತಿರ್ ಆಯಿಲ್ಲ್ಯಾನ್ ಆನಿ ’ಹಂತಕಾ’ಂಕ್ ವೆಗಿಂ ಧರ್ಯೆತ್ ಮ್ಹಳ್ಳ್ಯಾ ಖುಶೇನ್ ಆಸ್ಲ್ಲೊ.
ದಾಕ್ತೆರಾಚ್ಯಾ ಪರಿಶ್ರಮಾನ್ ಹಾತಾಕ್, ಬೊರಿಯಾಂಕ್ ಪ್ಲಾಸ್ಟರ್ ಘಾಲ್ನ್ ಗೂಣ್ ಕರ್ಚೆಂ
ಪ್ರಯತ್ನ್ ಚಲ್ಲೆಂ. ಪುಣ್ ದಾವೊ ಪಾಂಯ್ ಗಾಂಟಿರ್ಚ್ ಉಮ್ಕಾಳ್ತಾಲೊ ದೆಕುನ್ ಗಾಂಟಿಕಡೆಚ್ಚ್ ಕಾತರ್ಜೆ
ಪಡ್ಲೊ. ಇನಾಸ್ ಪುರ್ತೊ ಹುಶಾರ್ ಜಾತಾ ಮ್ಹಣಾಸರ್ ಭದ್ರ್
ಪೊಲಿಸ್ ಪಾರೊತ್ ಆಸ್ಲ್ಲ್ಯಾನ್ ಇನಾಸಾಲಾಗಿಂ ಚಡ್ ಉಲಂವ್ಕ್, ತಾಕಾ ಮೆಳೊಂಕ್ ಕೊಣಾಯ್ಕ್ಯೀ
ಸಾಧ್ಯ್ ಜಾಲ್ಲೆಂನಾ. ಆನಿ ತಪಾಸ್ಣಿಂ ಕರ್ಚ್ಯಾ ದಾಕ್ತೆರಾನ್ ಇನ್ಸ್ಪೆಕ್ಟರಾಲಾಗಿಂ ’ಆನಿ ತಾಚೆಲಾಗಿಂ ಕಸ್ಲೀಂಯ್
ಸವಾಲಾಂ ವಿಚಾರ್ಯೆತ್’ ಮ್ಹಣೊನ್ ಕಬ್ಲಾತ್ ದಿಲ್ಲ್ಯಾಕ್ಷಣಾ
ಪೊಲಿಸ್ ಇನ್ಸ್ಪೆಕ್ಟರಾನ್ ಇನಾಸಾಚೊ ವಿಚಾರ್ ಸುರು ಕೆಲೊಚ್ಚ್.
’ತುಂ ಡ್ಯೂಟೆರ್ ಆಸ್ತಾನಾ ತುಕಾ ಕೊಣೆಂ ಪುಣೀಂ ಮಾರ್ಲೆಂಗೀ? ಯಾ ತುಕಾ ಲೊಟುನ್ ಘಾಲೆಂ? ಮಾರ್ಲ್ಲೊ ಮನಿಸ್ ಕೊಣ್ ಮ್ಹಣೊನ್ ತುಂ ವ್ಹಳೊಕ್ ಧರ್ಶಿಗೀ?.. ಆಮ್ಕಾಂ ಸಾಂಗ್ಶಿಗಿ? ಇನ್ಸ್ಪೆಕ್ಟರ್ ವಯ್ರ್ ವಯ್ರ್ ಸವಾಲಾಂ ಘಾಲೀತ್ ಗೆಲೊ ತೆವಾಂ ಇನಾಸ್ ಎಕಾಚ್ಚಾಣೆಂ ಘಳ್ಗಳ್ಯಾಂ ರಡೊಂಕ್ ಲಾಗ್ಲೊ. ಉಪ್ರಾಂತ್ ಹಳೂ ತೊ ಪುಸ್ಪುಸೊಂಕ್ ಲಾಗ್ಲೊ.
"ಹಾಂವ್ ಆಮ್ಚ್ಯಾ ಬಿಲ್ಡಿಂಗಾಚ್ಯಾ ಪಾಟಸಾಕ್ ಚಡ್ಲ್ಲೊಂ. ಪಾಟಸಾಕ್ ಲಾಗೊನ್ ಮ್ಹಳ್ಳೆಪರಿಂ ನಾರ್ಲಾಚೆ ಮಾಡ್ ಆಸಾತ್. ತಾಂತುಂ ಬರೆ ಬೊಂಡೆ ಆಸಾತ್. ಬೊಂಡೆ ಕಾಡುಂಕ್ ವೆತಾನಾ ಲಕ್ಲ್ಲೆಪರಿಂ ಜಾಲೆಂ. ಆಧಾರ್ ಚುಕೊನ್ ಸಕ್ಲಾ ಭಾಂದ್ಪಾಚ್ಯಾ ಬಗ್ಲೆಕ್ ಆಸ್ಚ್ಯಾ ದೊರ್ಯಾರ್ ಪಡ್ಲೊಂ ಜಾಯ್ಜಯ್.. ಬೊಂಡೆ ಚೊರುಂಕ್ ವಚಾನಾತ್ಲ್ಯಾರ್ ಅಶೆಂ ಜಾತೆಂನಾ ಕೊಣ್ಣಾ..." ಇನಾಸ್ ಸಾಂಗೊನ್ಂಚ್ ಆಸ್ಲ್ಲೊ.
ಇನ್ಸ್ಪೆಕ್ಟರಾನ್ ಇನಾಸಾಚಾ ಕೇಜಿಚೆಂ ಫೈಲ್ ಬಂಧ್ ಕರ್ನ್ಯೀ ಸೊಡ್ಲೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
