[ಸಂಪಾದಕೀಯ್ - 36] ಭಿತರ್ಲೊ ಕವಿ ಭಾಯ್ರ್ ತಿಳ್ತಾನಾ
’ವಲ್ಲಿ, ತುಜ್ಯಾ ಬರ್ಪಾಂನಿ ತುಂ ಸಮಾಜಿಕ್ ಕಿರ್ಕೊಳ್ ಕರ್ನೆಂಕ್ ಖಿಳಾಯ್ತಾಯ್, ಹ್ಯೇ ವಿಶಿಂ ತುಜಿ ಅಭಿಪ್ರಾಯ್ ಕಸಲಿ?’
ಹೆಂ ಪ್ರಶ್ನ್ 2018 ಇಸ್ವೆಂತ್ ಮಂಗ್ಳುರಾಂತ್ ಚಲ್ಲ್ಲ್ಯಾ ಕವಿತಾ ಫೆಸ್ತಾಂತ್ ಮ್ಹಜ್ಯೆಲಾಗಿಂ ಸಂವಾದ್ ಚಲವ್ನ್ ಆಸ್ಲ್ಲ್ಯಾ ಕವಿ ಆಂಡ್ರ್ಯೂಚೆಂ ಜಾವ್ನಾಸ್ಲೆಂ. ತಾಚೆಂ ಉತ್ತರ್ ಜಾವ್ನ್ ಹಾಂವೆಂ ದಿಲ್ಲೆಂ ಉತ್ತರ್ ಹೆಂ; ’ಸಮಾಜ್ ಮ್ಹಳ್ಯಾರ್ ಕಿತೆಂ? ಸಮಾಜ್ ಮ್ಹಳ್ಯಾರ್ ಭಾಂದ್ಪಾಂ ನ್ಹಯ್, ಸಮಾಜ್ ಮ್ಹಳ್ಯಾರ್ ತಾಂತುಂ ಜಿಯೆತೆಲಿಂ ಆಮಿ. ಆಮಿ ಮ್ಹಳ್ಯಾರ್ ಹಾಂವ್ಯೀ ತಾಂತ್ಲೊ ಎಕ್ಲೊ ಮ್ಹಳ್ಳೆಂ ಮಹತ್ವಾಚೆಂ. ದೆಕುನ್ ಸಮಾಜೆಂತ್ಲೊ ಎಕ್ಲೊ ಜಾವ್ನಾಸ್ಚ್ಯಾ ಮ್ಹಾಕಾ ಪಯ್ಲೆಂ ಮ್ಹಜ್ಯೆಭಿತರ್ ಕಾಂಟ್ಭರ್ ಕುಸ್ಡೆಂಪಣ್ ಚೆಪುನ್/ಲಿಪವ್ನ್/ಥಾಪುನ್ ಸಮಾಜೆಕ್ ಬೋಟ್ ಜೊಕುನ್ ಬುದಿ ಸಾಂಗ್ಚಿ ಬಾಳ್ಬೂದ್ ಮ್ಹಾಕಾ ತರ್ಯೀ ನಾ. ದೆಕುನ್ ಮ್ಹಜ್ಯಾ ಬರ್ಪಾಂನಿ ಹಾಂವ್ ಖಿಳಾಯ್ತಾಂ ಮ್ಹಜ್ಯೆಭಿತರ್ಲ್ಯಾ ತ್ಯಾ ಖೊಟ್ಯಾ/ಕಿರ್ಕೊಳ್ ಕರ್ನೆಂಕ್. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಸಮಾಜೆಚ್ಯಾ ಬರೆಂಪಣಾಚಿ ಸುರ್ವಾತ್ ಪಯ್ಲಿ ಜಾತಾಚ್ ’ಮ್ಹಜೆ ಥಾವ್ನ್’.
ಹೆಂ ಮ್ಹಜೆಂ ಪ್ರಾಮಾಣಿಕ್ ಚಿಂತಪ್ ಜಾವ್ನಾಸ್ಲೆಂ. ದೆಕುನ್ ಮ್ಹಜ್ಯಾ ಚಡ್ತಾವ್ ಬರ್ಪಾಂತ್ಲೊ ಗುನ್ಯಾಂವ್ಕಾರ್ ಸ್ವತಾ ಹಾಂವ್. ಆನಿ ಹೆಂ ಸ್ವ-ಪ್ರತಿಫಲಿತ್ (Reflective) ಜಾಂವ್ಕ್ ಮ್ಹಾಕಾ ಧಯ್ರ್ ತಶೆಂಚ್ ಶ್ಯಾಥಿ ಆಸಾ. ಪುಣ್ ಪ್ರಶ್ನ್ ಹೆಂ: ’ಕಿತ್ಲೆಶ್ಯಾ ಹೆರಾಂಕ್ ಹೆಂ ಧಯ್ರ್ ವಾ ಶ್ಯಾಥಿ ಆಸಾ?, ಹಾಚೆಂ ಮುಳಾವೆಂ ಕಾರಣ್ ಭೋವ್ ಸೊಂಪೆಂ; ’ತಿಂ ಹಾಸುಂಕ್ ಜಾಣಾಂತ್ ಪುಣ್ ಸೊಸುಂಕ್ ನೆಣಾಂತ್’.
’ಭಿತರ್ಲೊ ಕವಿ’ ಪುಸ್ತಕಾಚೆಂ ಬುನ್ಯಾದಿಂ ಚಿಂತಪ್ ಆಂಡ್ರ್ಯೂಚ್ಯಾ ಪ್ರಶ್ನಾಂತ್ ಉದೆಲ್ಲೆಂ. ಆಯ್ಲೆವಾರ್ ವಿಮಲಾ ವಿ. ಪೈ. ಪುರಸ್ಕಾರಾವೆಳಾರ್ ವಿಶ್ವ್ ಕೊಂಕಣಿ ಕೇಂದ್ರಾಚ್ಯಾ ಡಿಜಿಟಲ್ ಸ್ಟುಡಿಯೊಂತ್ ಬಾಬ್ ಮೆಲ್ವಿನ್ ರೊಡ್ರಿಗಸಾನ್ ಪ್ರಶ್ನ್ ಕೆಲೆಂ; ’ತುಜ್ಯಾ ಭಿತರ್ಲೊ ಕವಿ’ ಚಿಂತ್ಪಾಪ್ರಕಾರ್ ತುವೆಂ ಲಾಟ್ಯಾಂತ್ಲೆಂ ಉದಕ್ ಕಾಡ್ಲಾಂಯ್, ರುಕಾಚೆರ್ ಉಮ್ಕಳ್ಚಿಂ ಫಳಾಂ ಝಡಯ್ಲ್ಯಾಂಯ್, ರಸ್ತ್ಯಾಚೆರ್ ಚಲುನ್ ಆಸ್ಚ್ಯಾ ಪೆಟ್ಯಾಂಕ್ ಫಾಂತ್ರಾಯ್ಲಾಂಯ್, ಶಾಂತ್ ತಳ್ಯಾಂತ್ ಫಾತೊರ್ ಮಾರ್ನ್ ಲ್ಹಾರಾಂ ಉದೆಶಿಂ ಕೆಲ್ಯಾಂಯ್. ಪುಣ್ ಆತಾಂ ತುಕಾ ತೆದ್ನಾಂ ಆಯ್ಕಾನಾತ್ಲಿ ಲಾಟ್ಯಾಚಿ ಪಿಂರ್ಗೊಣ್, ರುಕಾಚಿ ದೂಕ್, ಪೆಟ್ಯಾಂಚೊ ವಿಳಾಪ್ ಆನಿ ತಳ್ಯಾಚೆ ಸುಸ್ಕಾರ್ ಆಯ್ಕತಾತ್. ಹ್ಯೇ ವಿಶಿಂ ತುಜೆ ವಿಚಾರ್ ಕಸಲೆ?’
ತಾಚೆಂ ಉತ್ತರ್ ಜಾವ್ನ್ ಮ್ಹಜೆಂ ಉತ್ತರ್ ಜಾವ್ನಾಸ್ಲೆಂ ’ವ್ಹಯ್, ಹಾಂವೆಂ ಎಕಾ ತೆಂಪಾದಿಂ ಕೆಲ್ಲ್ಯಾ ಕರ್ನೆಂಕ್ ತ್ಯಾ ವೆಳಾರ್ ಸಮ್ಜುಂಚಿ ಶ್ಯಾಥಿ ನಾತ್ಲಿ ಪುಣ್ ಆತಾಂ ಸಮ್ಜುಂಚಿ ಶ್ಯಾಥಿ ಮ್ಹಾಕಾ ಆಸಾ ಮಾತ್ರ್ ನ್ಹಯ್, ತಾಂತ್ಲ್ಯೊ ಚುಕಿ ತಿದ್ವುಂಚೆಂ ಉಗ್ತೆಂ/ಪ್ರಾಮಾಣಿಕ್ ಮನ್ ಮ್ಹಜ್ಯೆಲಾಗಿಂ ಆಸಾ... ಆನಿ ತಾಚೆಂ ಪ್ರೇತನ್ಚ್ ಭಿತರ್ಲೊ ಕವಿ’. ಪುಣ್ ಮ್ಹಜ್ಯಾ ಮತಿಂತ್ ಅಧುರೆಂ ಉರ್ಲ್ಲೆಂ ಪ್ರಶ್ನ್ ಹೆಂ ’ಕಿತ್ಲೆಶ್ಯಾಂಕ್ ಹೆಂ ಧಯ್ರ್ ವಾ ಶ್ಯಾಥಿ ಆಸಾ?’
ಸಾಹಿತ್ಯ್ ಮ್ಹಳ್ಯಾರ್ ಮತಿಕ್ ಆಯಿಲ್ಲೆಂ ಅಪ್ಲ್ಯಾ ಫಾಯ್ದ್ಯಾಕ್ ಪಡ್ತಾ ತರ್ ಅಪ್ಲ್ಯಾ ಅಂತರ್ಮನಾಕ್ ಕೊನ್ಶ್ಯಾಕ್ ಲೊಟುನ್ ತರ್ಯೀ ಬರಂವ್ಚೆಂ ಸೊಡ್ಲ್ಯಾರ್, ಅಪ್ಣಾನ್ ಬರಯಿಲ್ಲೆಂ ಅಪ್ಣಾಕ್ ಕಿತ್ಲೆಂ ಲಾಗು ಜಾತಾ ಮ್ಹಳ್ಳೆಂ ಪ್ರಾಮಾಣಿಕ್ ಪ್ರಶ್ಕ್ ಕರ್ಚೆಂ ಕಿತ್ಲೆಶ್ಯಾಂಕ್ ಸಾಧ್ಯ್? ಕೊಂಕಣಿ ಏಕ್ ಲ್ಹಾನ್ ಸಮುದಾಯ್. ಹಾಂಗಾ ಎಕಾಮೆಕಾಚ್ಯಾ ಚಿಂತ್ಪಾಕ್, ಕರ್ನೆಂಕ್ ಆನಿ ದಾಕವ್ಪಾಕ್ (ಡೋಂಗ್) ಸಮ್ಜುಂಕ್ ಕಾಂಯ್ ಮಶೀನ್ ಲ್ಯಾಂಗ್ವೇಜಾಚಿ ಗರ್ಜ್ ನಾ, ಬೂಲಿಯನ್ ಆಲ್ಜೀಬ್ರಾ ವಾ ಪಾಯ್ಥಾಗೋರಸಾಚೊ ಪ್ರಮೇಯ್ ಜಾಂವ್ ಗರ್ಜ್ ನಾ. ಲೋಕ್ ಮುಕ್ಲ್ಯಾನ್ ಉಲಯ್ನಾ ಪುಣ್ ಪಾಟ್ಲ್ಯಾನ್ ಹಾಂಚ್ಯಾ ಹಣೆಬರಪಾಚೆರ್ ಹಾಸ್ತಾ ಆನಿ ಥುಕ್ತಾ.
ಆತಾಂ ಕವಿತೆಂಚ್ಯಾ ಸಂಗ್ತೆಂಚೆರ್ ಉಲಂವ್ಚೆಂ ತರ್, ಆಯ್ಲೆವಾರ್ ಮ್ಹಜ್ಯಾ ಎಕಾ ಮಿತ್ರಾನ್ ಮ್ಹಾಕಾ ಎಕಾ ಕವಿಗೋಶ್ಟಿಕ್ ಭೋವ್ ವತ್ತಾಯೆಚೆಂ ಆಪವ್ಣೆಂ ದಿಲೆಂ. ತಾಚಿ ಜಾಪ್ ದಿತಾಸ್ತಾಂ ಹಾಂವೆಂ ಖುಶಾಲಾಯೆನ್ ಮ್ಹಳೆಂ ’ಅಳೆ ಭಾವಾ... ಹಾಂವ್ ಭಿತರ್ಲೊ ಕವಿ.... ಜಶೆಂ ಭಿತರ್ಲ್ಯೊ ಮಾದ್ರಿ ಭಾಯ್ರ್ ಯೇನಾಂತ್ ತಶೆಂಚ್ ಹಾಂವ್ ಕವಿಗೋಶ್ಟಿಂನಿ ಯೆಂವ್ಚೊ ತಿತ್ಲೊ ವ್ಹಡ್ ಕವಿ ನ್ಹಯ್....’ ಥೊಡ್ಯಾ ತೆಂಪಾನ್ ಭೋವ್ ಗಡ್ದಾಯೆಚಿ ಕವಿಗೋಶ್ಟಿ ಜಾಲಿ, ಆನಿ ಕಾಂಯ್ ಶೆಂಬೊರಾಂವಯ್ರ್ ಕವಿ ಹಾಜರ್ ಆಸ್ಲೆ, ಪುಸ್ತಕಾಚೆಂ ವಿಮೋಚನ್ ಜಾಲೆಂ, ಗಡ್ದಾಯೆಚೆಂ ಜೆವಣ್ ಆಸ್ಲೆಂ, ಆನಿ ಪಿಟ್ಕ್ಯೀ ಆಸ್ಲೆಂ ಮ್ಹಣಾಲೊ. ತಾಚೆಂ ಉತ್ತರ್ ಜಾವ್ನ್ ಹಾಂವೆಂ ಏಕ್ ಲ್ಹಾನ್ ಪ್ರಶ್ನ್ ಕೆಲೆಂ;
’ಕಿತ್ಲೆಶಿಂ ಪುಸ್ತಕಾಂ ವಿಖುನ್ ಗೆಲಿಂ?’
ವೊಡ್ಲ್ಯಾರೀ ತಾಚ್ಯಾ ತೊಂಡಾರ್ ಜೀಬ್ ನಾತ್ಲಿ.
ಮ್ಹಳ್ಯಾರ್ ಹಾಂಗಾ ಶೆಂಬೊರಾಂ ವಯ್ರ್ ಆಯಿಲ್ಲೊ ಲೋಕ್ ’ಪಿಟ್ಕಾಚ್ಯಾ, ಜೆವ್ಣಾಚ್ಯಾ ವಾ ಹೆರ್ ಕಸ್ಲ್ಯಾಯ್ ಲಬ್ದೊಣೆಕ್ ಆಯ್ಲಾಸ್ತಲೊ, ಕವಿತಾ ಬರಯ್ತೆಲಿಂ ಆಸ್ತಿತ್ ಪುಣ್ ಕಿತ್ಲೆಶಿಂ ವಾಚ್ತಾತ್ ಮ್ಹಳ್ಳೆಂ ಪ್ರಮುಕ್ ಪ್ರಶ್ನ್’. ವಾಚ್ತಾತ್ - ಹೆರಾಂಚಿಂ ಕವಿತಾ. ಕವಿತಾ ಸೊಡ್ಯಾಂ, ಕವಿತೆಚ್ಯಾ ಪುಸ್ತಕಾಚಿಂ ನಾಂವಾ ಸಯ್ತ್ ಕಳಿತ್ ನಾತ್ಲಿಂ ಭರೊನ್ ಗೆಲ್ಲ್ಯಾ ಬಜಾರಾಂತ್ ಖಂಚ್ಯಾಚೊಯ್ ಭೊಂಗೊಸ್ತೊಳ್ ಜಾತಾ ತರ್ ತೊ ಕವಿತೆಚೊ ಮ್ಹಳ್ಳೆಂ ಖಂಡಿತ್.
ಥೊಡ್ಯಾ ತೆಂಪಾದಿಂ ಮ್ಹಾಕಾ ಮಂಗ್ಳುರ್ ಥಾವ್ನ್ ಎಕ್ಲ್ಯಾ ಕವಿಚೆಂ ಫೋನ್ ಆಯ್ಲೆಂ, ವೊರಾಂ ಕಾಂಯ್ ಸಕಾಳ್ಚಿಂ 9:35 ಜಾತಿತ್. ಪಾಟಾಪಾಟ್ ಚ್ಯಾರ್-ಪಾಂಚ್ ಪಾವ್ಟಿಂ ಫೋನ್ ಆಯ್ಲೆಂ ದೆಕುನ್ ಕಾಂಯ್ ಅರ್ಜಂಟ್ ಖಬರ್ ಆಸಾಸ್ತೆಲಿ ಮ್ಹಣುನ್ ಹಾಂವೆಂ ಪಾಟಿಂ ಫೋನ್ ಕೆಲೊ. ತೊ ಯುವಕವಿ ಮ್ಹಾಕಾ ಪ್ರಶ್ನ್ ಕರ್ತಾ "ಆಶಾವಾದಿ ಪ್ರಕಾಶನಾಚ್ಯಾ ಪುಸ್ತಕಾಂಚಿಂ ನಾಂವಾ ದೀ.... ಅರ್ಜಂಟ್ ಜಾಯ್......". ಮ್ಹಾಕಾ ಮಿಸ್ತೆರ್ ಸಮ್ಜಲೊನಾ. ಅಛಾನಕ್ ಆಶಾವಾದಿ ಪ್ರಕಾಶನಾಚ್ಯಾ ಪುಸ್ತಕಾಂಚಿಂ ನಾಂವಾ ಅಶೆಂ ದರ್ವಡಾಂನ್ ವಿಚಾರ್ಚೆಂ ಪಳೆವ್ನ್. ಜಾಪ್ ದಿವಿನ್ ಏಕ್ ಪ್ರಶ್ನ್ ಕೆಲೆಂ "ಆಶಾವಾದಿ ಪ್ರಕಾಶನಾಚಿಂ ಪನ್ನಾಸ್ ಪುಸ್ತಕಾಂಚಿಂ ನಾಂವಾಂ, ಆಯ್ಲೆವಾರ್ ಪರ್ಗಟ್ ಜಾಲ್ಲ್ಯಾ ಖಂಚ್ಯಾಯ್ ಪುಸ್ತಕಾಚ್ಯಾ ಭಿತರ್ಲ್ಯಾ ಪೊರಾಚೆರ್ ಆಸಾತ್. "
ಮ್ಹಜಿಂ ಉತ್ರಾಂ ಆಯ್ಕುನ್ ತೊ ದರ್ವಡ್ಲೊ; "ಮ್ಹಜ್ಯೆಲಾಗಿಂ ಚಡ್ ವೇಳ್ ನಾ.... ಹಾಂವ್ ಆಕಾಶ್ವಾಣಿ ಮಂಗ್ಳುರ್ ರೆಕೋರ್ಡಿಂಗಾಕ್ ಆಯ್ಲಾಂ, ಧಾ ವೊರಾಂಕ್ ರೆಕೋರ್ಡಿಂಗ್, ಮ್ಹಾಕಾ ಕೊಂಕಣಿ ಪುಸ್ತಕಾಂಚೆರ್ ಉಲಂವ್ಕ್ ಆಸಾ ಆನಿ ಬಾಯ್ ಕನ್ಸೆಪ್ಟಾ ಫೆರ್ನಾಂಡಿಸಾನ್ ಮ್ಹಾಕಾ ಸಾಂಗ್ಲೆಂ ’ಹಾಂತುಂ ಆಶಾವಾದಿ ಪ್ರಕಾಶನಾಚ್ಯಾ ಪುಸ್ತಕಾಂಚಿಂ ನಾಂವಾಂ ನಾಂತ್, ದೆಕುನ್ ತುಕಾ ಫೋನ್ ಕೆಲೊ...."
ಹಿ ಅವಸ್ಥಾ ಆಮ್ಚ್ಯಾ ಕೊಂಕ್ಲೆಚಿ... (ಉಸ್ತುರೆಂ ಗೆಲ್ಲ್ಯಾಕ್ ಮಾಫ್ ಕರಾ) ಆಮ್ಚ್ಯಾ ಕೊಂಕ್ಣೆಚಿ. ಹಿ ಹಕೀಗತ್ ಆಯ್ಚಿ. ಅಸಲ್ಯಾ ಅಶೀರ್/ಆಣ್ವ್ಯಾ ಚಿಂತ್ಪಾಚೆ ಭರುನ್ ಗೆಲ್ಲ್ಯಾ ವರ್ತುಲಾಂತ್ ಕೊಣ್ ಮುಕಾರ್ ಯೆತೆಲೆ ತುಮಿಂಚ್ ಸಾಂಗಾ. ಸಾಹಿತ್ಯಾಚೊ ಖಚ್ರೊ ಕರುನ್ ಆಸ್ಚೆ ಸಾಹಿತ್ಯಾಕ್ ಉಗ್ತೊ ಬಜಾರ್ ಕರುನ್ ಅಪ್ಲ್ಯಾ ಫಾಯ್ದ್ಯಾಕ್ ಗಳ್ಸುನ್ ಆಸಾತ್.
’ಕವಿತಾ ಮ್ಹಳ್ಯಾರ್ ಕಿತೆಂ? ಕವಿತಾ ಕಶಿ ಬರಂವ್ಚಿ?’ - ಹಿಂ ಪ್ರಶ್ನಾಂ ಸಭಾರಾಂ ಮ್ಹಜ್ಯೆಲಾಗಿಂ ಕರುನ್ ಆಸಾತ್.
"ಕವಿತಾ ಮ್ಹಳ್ಯಾರ್ ಕೊಣಾಕ್ ಕಾಳ್ಜಾಚಿ ಭಾಸ್, ಆನಿ ಕೊಣಾಕ್ ಮತಿಚಿ ಭಾಸ್ (ಲೆಕಾ-ಪಾಕಾಚಿ) ಪುಣ್ ಮ್ಹಾಕಾ ತರ್ಯೀ ’ಜಿಣ್ಯೆಚ್ಯಾ ಮಿಸ್ತೆರಾಚ್ಯಾ ಗೊಂದೊಳಾಂಕ್ ಸುಟಂವ್ಕ್ ಮಜತ್ ದಿಂವ್ಚಿ ಏಕ್ ಅದ್ಭುತ್ ಸಕತ್". ಆನಿ ಹೆ ವಿಚಾರ್ ಮ್ಹಜ್ಯೆ. ಹೆಂ ಚಿಂತಪ್ ಮ್ಹಜೆಂ.
’ಆಮ್ಕಾಂ ಕವಿತಾ ಬರಂವ್ಕ್ ಉತ್ತೇಜನ್ ಮೆಳಾನಾ’
ಹೆಂ ಉತರ್ ಹಾಂವೆಂ ಸಭಾರಾಂ ಥಾವ್ನ್ ಆಯ್ಕಲಾಂ, ವಿಚಿತ್ರ್ ಮ್ಹಳ್ಯಾರ್ ಮ್ಹಜ್ಯಾಕೀ ಪ್ರಾಯೆನ್ ವ್ಹಡ್ ಆಸ್ಚ್ಯಾಂನಿ ಸಯ್ತ್ ಹೆಂ ಉತರ್ ಸಾಂಗ್ಲ್ಲೆಂ ಆಸಾ. ಪುಣ್ ಏಕ್ ಪ್ರಶ್ನ್; "ಉತ್ತೇಜನ್ ಮ್ಹಳ್ಯಾರ್ ಕಿತೆಂ?". ಎಕಾ ಥರಾಚೆಂ ಪ್ಯಾಂಪರಿಂಗ್ ಆಸುಯೆತಾ, ಜಶೆಂ ಭುರ್ಗೆಂ ಚಲುಂಕ್ ಶಿಕ್ಚ್ಯಾ ವೆಳಾರ್ ತ್ಯಾ ನೆಣ್ತುಲ್ಯಾ ಪಾವ್ಲಾಂನಿ ಉಭೆಂ ರಾವುನ್ ಲಕುನ್ ಲಕುನ್ ಮುಕಾರ್ ಮೆಟಾಂ ಕಾಡ್ತಾಸ್ತಾಂ, ಬಗ್ಲೆನ್ ರಾವುನ್ ಧಯ್ರ್ ದಿಂವ್ಚ್ಯಾ ಭುರ್ಗ್ಯಾಚ್ಯಾ ವ್ಹಡಿಲಾಂ ಪರಿಂ ಉಚಾರ್ಚೊ ಸಯ್ಲಾಪ್. ತರ್ ಸಾಹಿತ್ಯ್/ಕವಿತಾ ಮ್ಹಳ್ಯಾರ್ ಅಶೆಂಚ್ ಕಾಯ್? ತರ್ ಸಾಹಿತ್ಯಾಂತ್ ಉತ್ತೇಜನ್ ಮ್ಹಳ್ಳೊ ಸಬ್ಧ್ ಕಂಯ್ ಥಾವ್ನ್ ಆಯ್ಲೊ? ಸಾಹಿತ್ಯಾಕ್ ಪ್ರೇರಣ್ ಜೊಡ್ಯೆತ್, ಕವಿತಾಯ್ ತಶಿಚ್, ಅಪ್ಲ್ಯಾ ಅನ್ಭೋಗಾಚ್ಯಾ ಮಜತೆನ್, ಅಪ್ಲ್ಯಾ ಚಿಂತ್ಪಾಚ್ಯಾ ಶ್ಯಾಥಿಯೆಂತ್ ಕೆಲ್ಲಿ ಅಪ್ಲಿಚ್ ಅಭಿವ್ಯಕ್ತಿ. ಹೆಂ ಮುಳಾವೆಂ ಗಿನ್ಯಾನ್ ನಾಸ್ಚ್ಯಾಂನಿ ಸಾಹಿತ್ಯಾಂತ್ ಕಿತೆಂಚ್ ಕರುಂಕ್ ಸಾಧ್ಯ್ ನಾ. ಅಜೀಕ್ ವೀಸ್-ತೀಸ್ ವರ್ಸಾಧಿಂ ಎಕಾ ನವ್ಯಾ ಬರವ್ಪ್ಯಾಕ್ ಹೆರಾಂಚಿಂ ಪುಸ್ತಕಾಂ ವಾಚುಂಕ್ ಲೈಬ್ರೆರಿ ಸೊಧುನ್ ವಚುಂಕ್ ಪಡ್ತಾಲೆಂ, ಪುಣ್ ಆಯ್ಚ್ಯಾ ಕಾಳಾರ್ ವೆಗ್-ವೆಗಳಿಂ ಡಿಜಿಟಲ್ ಮಾಧ್ಯಮಾಂ ಆಸಾತ್, ಜಾಯ್ತಿ ಜಾಣ್ವಾಯ್ ಜೊಡ್ಚ್ಯೊ ವಾಟೊ ಆಸಾತ್, ಇತ್ಲ್ಯೊ ಸಗ್ಳ್ಯೊ ಉಪಲಬ್ದ್ಯೊ ಆಸುನ್ಯೀ ಆಮ್ಚೆ ಕವಿ ಚಡ್ಲ್ಯಾತ್ ಪುಣ್ ಕವಿತಾ ದೆಂವ್ಲ್ಯಾತ್. ಹಾಚೆಂ ಮೂಳ್ ಕಾರಣ್ ಸೊಂಪೆಂ;
ಆಮಿ ಪಳೆನಾಂವ್, ವಾಚಿನಾಂವ್, ಆಯ್ಕನಾಂವ್. ಪಳೆಲ್ಯಾರೀ, ವಾಚ್ಲ್ಯಾರೀ, ಆಯ್ಕಲ್ಯಾರೀ ಆಮಿ ಪಾರ್ಕಿನಾಂವ್, ಪಾರ್ಕಿಲ್ಯಾರಿ ಸಮ್ಜನಾಂವ್ ಪುಣ್ ಆಮಿ ಫಕತ್ ಬರಯ್ತಾಂವ್ ಆನಿ ವಾಟ್ಸಾಪಾಚೆರ್ ವಾ ಹೆರ್ ಸಮಾಜಿಕ್ ಮಾಧ್ಯಮಾಂನಿ ಛಾಪ್ಚೊ ಹೊರ್ಭೊಸ್ ಚಡ್ಲಾ.
ಆಮಿ ಬರವ್ಪಿ/ಕವಿ ಮ್ಹಣುನ್ ಚಿಂತೆಲ್ಯಾಂನಿ ಪಯ್ಲೆಂ ಅಪ್ಲ್ಯಾ ಮತಿಂತ್ ಆಸ್ಚ್ಯಾ ಅಶೀರ್/ಪಿಡೇಸ್ತ್ ಮನೋಗತೆಂತ್ಲೆ ಭಾಯ್ರ್ ಯೇಂವ್ಕ್ ಜಾಯ್. ಕವಿತಾ ಮ್ಹಳ್ಯಾರ್ ಬಾಂಯ್ ನ್ಹಯ್, ಕವಿತಾ ಮ್ಹಳ್ಯಾರ್ ಸಾಗೊರ್ ಮ್ಹಳ್ಳೆಂ ಸಮ್ಜುನ್ ಘೆಂವ್ಕ್ ಜಾಯ್. ಫಕತ್ ಅಪ್ಲೆಂ ವಾ ಆಪ್ಲ್ಯಾಂಚೆಂ ಮಾತ್ರ್ ವಾಸ್ಚಿ ಪಿಸಾಂಟ್ ಸವಯ್ ಸೊಡುನ್ ಹೆರಾಂಚೆಂ ವಾಚುಂಕ್ ಜಾಯ್. ಜಿತ್ಲ್ಯೆ ಮಾಪಾನ್ ಹೆಂ ಕಾಮ್ ಪ್ರಾಮಾಣಿಕ್ ರಿತಿನ್ ಎಕ್ಲೊ ಕರ್ತಾ ತಿಲೊ ಮುಕಾರ್ ತೊ ವಚುಂಕ್ ಪಾವ್ತಾ ತೆಂ ಖಂಡಿತ್.
ಪುಣ್ ಅಖೇರಿಕ್ ಏಕ್ ಅಧುರೆಂ ಪ್ರಶ್ನ್; ’ಹಾಂತುಂ ಆಮ್ಚೊ ಕಿತೆಂ ಫಾಯ್ದೊ?’
- ವಲ್ಲಿ ಕ್ವಾಡ್ರಸ್ [ಫೆಬ್ರೆರ್, 2023]
