ಉದ್ಕಾ ಥೆಂಬೊ

ಸಾಂಕೇತಿಕ್ ಇಮಾಜಿ ವ್ಹಾಪಾರುನ್ ಆಧ್ಯಾತ್ಮಿಕ್ ವಿಚಾರ್ ಕವಿತೆಂನಿ ಆಯ್ಲ್ಯಾರ್ ತಾಚೊ ಗುಂಡಾಯೆಚೊ ಅರ್ಥ್ ಕರುಯೆತಾ. ಜೆದ್ನಾಂ ಏಕ್ ಕಾಣ್ಯೆಗಾರ್, ಪದಾಂ-ಘಡ್ಪಿ ಅಸಲಿ ಕವಿತಾ ಘೆವ್ನ್ ಯೆತಾ ತರ್ ತಿ ಕವಿತಾ ಫಕತ್ ಏಕ್ ಪಾವ್ಟಿಂ ಮಾತ್ ನ್ಹಯ್, ಬಗಾರ್ ಪರತ್ ಪರತ್ ವಾಚುಂಕ್ ಮನ್ ಯೆತಾ.

ಅಪ್ರೂಪ್ ಕವಿ, ಪದಾಂ-ಘಡ್ಪಿ ಜೋನ್ ಆರ್. ಮಸ್ಕರೇನ್ಹಸ್ ಅಸಲಿಚ್ಚ್ ಏಕ್ ಕವಿತಾ ಹಾಂಗಾಸರ್ ಘೆವ್ನ್ ಆಯ್ಲಾ, ಕರೆಜ್ಮ್, ಆನಿ ಹ್ಯಾ ಕಾಳಾಕ್ ಕಾರಣ್ ಜಾಲ್ಲ್ಯಾ ಜೆಜುಚ್ಯಾ ಮೂಳ್ ತತ್ವಾಂಚೆರ್ ಎಕೊಡೊ ಆರ್ಸೊ ಧರ್ಚೆಂ ಪ್ರೇತನ್ ಹಾಂಗಾಸರ್ ಕೆಲ್ಲೆಂ ದಿಸುನ್ ಯೆತಾನಾ, ಹಾಚೊ ಸ್ವಾದ್ ಚಾಕುಂಕ್ ತುಮ್ಕಾಂಚ್ ಸೊಡ್ತಾಂ.

ಉದ್ಕಾ ಥೆಂಬೊ

ಆಳ್ವಾ ಪಾನಾರ್ ಉದ್ಕಾ ಥೆಂಬೊ

ಕಾಲ್ವಾ ರುಕಾರ್ ಜೆಜು ಉಬೊ

ಥೊಡ್ಯೊಚ್ ಘಡಿ ಥೆಂಬ್ಯಾಕ್ ಪಾನಾರ್

ನಿಮಾಣ್ಯೊ ವೊಡಿ ಜೆಜುಕ್ ಖುರ್ಸಾರ್.

ಆಳ್ವಾ ಪಾನಾರ್ ಧರ್ಣಿ ಥಾವ್ನ್ ಉಭಾರ್

ಮೆಜ್ತಾ ಅವ್ಕ್ ಥೆಂಬೊ ವಾರ್‍ಯಾರ್

ರುಕಾ ಖುರ್ಸಾರ್, ದೇವ್ ಪೂತ್ರ್ ದೊಂಗ್ರಾರ್

ಸೊಡ್ವಣ್ ದೀಂವ್ಕ್ ಮನ್ಶಾ ರುಪಾರ್

ಪಾನ್ ಹಾಲ್ತಾ, ಥೆಂಬೊ ಗಳ್ತಾ

ಧರ್ಣಿರ್ ಮಾತ್ಯೆಂತ್ ವಿಲೀನ್ ಜಾತಾ

ಪೃಥ್ವಿ ಕಾಂಪ್ತಾ, ಜೀವ್ ಉಭ್ತಾ

ಕ್ರೀಸ್ತ್ ಮನ್ಶಾಕ್ ಸಡ್ವಣ್ ದಿತಾ.!!

- ಜೋನ್ ಆರ್. ಮಸ್ಕರೇನ್ಹಸ್, ಜೆರಿಮೆರಿ [ಎಪ್ರಿಲ್, 2017]

ಜೋನ್ ಆರ್. ಮಸ್ಕರೇನ್ಹಸ್: ಮುಂಬಯಾಂತ್ಲ್ಯಾ ಜೆರಿಮೆರಿ ಫಿರ್ಗಜೆಂತ್ ಸರ್ವಾಂಕ್ ವಳ್ಕಿಚೆಂ ನಾಂವ್, ವೆವೆಗ್ಳ್ಯಾ ತಾಲೆಂತಾಂನಿ ನಾಂವ್ ವೆಲ್ಲೊ, ಕಾಣ್ಯೆಗಾರ್, ನಾಟಕಿಸ್ತ್, ನಿರ್ದೇಶಕ್, ನಟ್, ಪದಾಂ-ಘಡ್ಪಿ, ಗಾವ್ಪಿ, ಸಂಗೀತ್ ನಿರ್ದೇಶಕ್, ಅಪ್ರೂಪ್ ಕವಿ, ವಿಚಾರ್‌ವಂತ್ ಚಿಂತ್ಪಿ ತಶೆಂಚ್ ಸಮಾಜೆಚಿ ಕಾಳ್ಜಿ ಆಸ್ಚೊ ಶಿಕ್ಪಿ ಪ್ರತಿಭಾವಂತ್. ಅಪ್ರೂಪಾಯೆನ್ ತರ್‌ಯೀ ಥೊಡಿಂ ಅಪುರ್ಭಾಯೆಚಿಂ ಕವಿತಾ ಬರಂವ್ಕ್ ಸಕ್ತಾ.

ಕೋಣ್ ಶ್ರೇಷ್ಟ್