ಕವಿತಾकविताPoem
ಉಬೊಂಕ್ ಸಕಾನಾಸ್ಲ್ಲ್ಯಾ ಸುಕ್ಣ್ಯಾಂಕ್
’ಕೊಗುಳೆಕ್ ಗಾಂವ್ಚಿ ಕಿತ್ಲೀಯ್ ಪ್ರತಿಭಾ ಆಸುನ್ ಕಿತೆಂ ಫಾಯ್ದೊ ಜರ್ ತಿಕಾ ಆಯ್ಕತಲೊಚ್ಚ್ ನಾ ತರ್?’ ಅಜೀಕ್ ಇಕ್ರಾ ವರ್ಸಾಧಿಂ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಚ್ಯಾ ಫುಡ್ಲದ್ ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ಚೆರ್ ಪ್ರಸ್ತಾವನ್ ಉತ್ರಾಂನಿ ಬರಯಿಲ್ಲೆಂ ಏಕ್ ಉತಾರ್ ಯಾದಿಕ್ ಯೆತಾ. ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಥೊಡೆ ಕಾವ್ಯಾಳ್ ಕೊಂಬ್ಲೆ ಉದೆಲ್ಲೆ, ಕಾಂಯ್ ನವೊ ಭರ್ವಸೊ ದಿಂವ್ಚಿಂ ಭಳ್ವಂತ್ ಖುಣಾಂ ದಿಸ್ಲ್ಲಿಂ, ಪುಣ್ ವೆಳಾಕಾಳಾಚ್ಯಾ ದಾಬೆಂತ್, ಫುಡಾರಾಚ್ಯಾ ಧಾಂವ್ಣೆಂತ್ ಕೆದ್ನಾಂ, ಕಶೆಂ, ಖಂಯ್ಚರ್ ಹಿ ಕಾವ್ಯಾಳ್ ಪ್ರತಿಭಾ ಗಳೊನ್ ಗೆಲ್ಲಿಚ್ಚ್ ಕಳಾನಾಸ್ತಾನಾ ಉರ್ಲ್ಲೆ. ತಾಂತ್ಲೊ ಎಕ್ಲೊ ತಾಕೊಡೆಚೊ ನೆರಿ ನಜ್ರೆತ್ ಆಯ್ಲೆವಾರ್ ಹಳ್ತಾರ್ ಆಪ್ಲಿ ಕವಿತಾಪ್ರತಿಭೆಕ್ ಕವಿತೆರುಪಾರ್ ವ್ಹಾಳಂವ್ಕ್ ಲಾಗ್ಲ್ಲೆಂ ಪಳೆತಾನಾ ಎಕ್ ಕವಿತಾರಸಿಕ್ ಜಾವ್ನ್ ನಿಜಾಯ್ಕ್ಯೀ ಭೋವ್ ಸಂತೊಸ್ ಭಗ್ತಾ.
ಹ್ಯಾ ಸಂಸಾರಾಂತ್ ಹರ್ಯೆಕ್ ರಚನ್ ಅಪ್ಲಿ ಮುಳಾವಿ ಜವಾಭ್ದಾರಿ ಪಾಳುಂಕ್ ಮ್ಹಣ್ ಜಿಯೆತಾ. ಜೆದ್ನಾಂ ಹಿ ಮುಳಾವಿ ಜವಾಭ್ದಾರೆಚಿ ವಿಸರ್ ಪಡ್ತಾನಾ, ಕವಿ ಜಾವ್ನ್ ಜಿಯೆತಲೊ ಸೊಸುಂಕ್ ಸಕಾನಾ ಬಗಾರ್ ಚಿಂತ್ಪಾಕ್ ಕುರಾಡ್ ಮಾರ್ಚಿಂ ಸವಾಲಾಂ ಉಭಿಂ ಕರ್ತಾ. ಹಾಂಗಾಸರ್ಯೀ ಅಸಲೆಂಚ್ ಏಕ್ ಅಪುರ್ಭಾಯೆಚೆಂ ಸವಾಲ್ ಹ್ಯೇ ಕವಿತೆಂತ್ ಉಟಂವ್ಚೆಂ ವಾಚ್ತಾಂ ವಾಚ್ತಾಂಚ್ ಹ್ಯೇ ಕವಿತೆಚಿ ತಾಂಕ್ ಆನಿ ಸೊಭ್ ದೊಳ್ಯಾಂ ಸಮೊರ್ ಉಭೆಂ ಜಾತಾ.
ಉಬೊಂಕ್ ಸಕಾನಾಸ್ಲ್ಲ್ಯಾ ಸುಕ್ಣ್ಯಾಂಕ್
ಅರ್ ನಾಸ್ಲ್ಲ್ಯಾ ನ್ಹಂಯಾಂಕ್
ಅಳ್ ನಾಸ್ಲ್ಲ್ಯಾ ರುಕಾಂಕ್
ಆಶೆಂ ಕಿತ್ಯಾಕ್ ರಚ್ಲಾಂ?
ರಗಾತ್ ನಾತ್ಲ್ಲ್ಯಾ ಶಿರಾಂಕ್
ತ್ರಾಣ್ ನಾತ್ಲ್ಲ್ಯಾ ಇರಾಂಕ್
ಆರ್ ಮಾರ್ಲ್ಲ್ಯಾ ಜಿವಾಂಕ್
ಆಶೆಂ ಕಿತ್ಯಾಕ್ ರಚ್ಲಾಂ?
ಪೊಟಾಕ್ ನಾತ್ಲ್ಲ್ಯಾ ತೊಂಡಾಂಕ್
ಮಾಸ್ ನಾತ್ಲ್ಯಾ ಹಾಡಾಂಕ್
ವಕಾತ್ ನಾತ್ಲ್ಲ್ಯಾ ಪಿಡೆಂಕ್
ಆಶೆಂ ಕಿತ್ಯಾಕ್ ರಚ್ಲಾಂ?
ಚಲಾವಣೆರ್ ನಾತ್ಲ್ಲೆಂ
ಹೆಂ ಜಾವ್ನಾಸಾ ಜಿಣೆಂ
ಏಕ್ ಪೊಟ್ಟು ನಾಣೆಂ
ಆಶೆಂ ಕಿತ್ಯಾಕ್ ರಚ್ಲಾಂ?
ಬರ್ಯಾ ಮಧೆಂ - ವಯ್ಲ್ಯಾನ್
ಇಲ್ಲೆಂ ವಾಯ್ಟ್ಯೀ ಸೊಡ್ಲಾಂ
ಭೊವ್ಶಾ ಬರ್ಯಾಚಿ ವ್ಹಳೊಕ್ ಧರುಂಕ್
ತಾಣೆಂ ಇಲ್ಲೆಂ
ಅಶೆಂಯೀ ರಚ್ಲಾಂ.
- ನಜ್ರೆತ್ ನೆರಿ, ತಾಕೊಡೆ. [ಅಕ್ತೋಬರ್, 2016]
More in Poinnari
ಕವಿತಾकविताPoem Feb 2025
ಧಾಳ್ಯೊ [ಡೊ. ಝೀಟಾ ಲೋಬೊ]
ಕವಿತಾकविताPoem Oct 2020
ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
ಕವಿತಾकविताPoem Nov 2016
ಎಕಾ ಫೊಂಡಾಚಿ ಕಥಾ
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.