सुरयो उदेता (डिजिटल बूक - २)
सुरयो उदेता - कोंकणी साहित्याचें अध्ययन करुंक मन आसल्ल्यांक तें तितलें सलीसायेचें काम न्हय. कोंकणी च्यार राज्यांनी, पांच लिपियांनी आसा. जशें हेर समकाळीन भाशेंतलें साहित्य अभ्यास करुंक हो समस्सो ना पूण कोंकणीक हो समस्सो आसा. असुंक कोंकणी भाशेक साहित्य अकाडेमी आसा, सगळें असा पूण राश्ट्रीय कोंकणी मट्टार आसचें साहित्य, तेंय मटव्यो काणियो पर्गट जाल्ले बूक नांत.
२००६ इस्वेंत कर्नाटक कोंकणी साहित्य अकाडेमिच्या अध्यक्ष बाब एरीक ओझेरान ह्या चिंतपाची सुरवात केल्ली. त्या चिंतपाचो फळ जावन राश्ट्रीय मट्टाच्या कोंकणी मटव्या काणियेगारांच्या काणियांक एका बुकारुपार संपादन कर्ची जवाभदारी म्हाका दिल्ली आनी ’२०व्या शेकड्याच्यो कोंकणी मटव्यो काणियो’ म्हळ्ळो बूक कन्नड लिपियेंतल्यान पर्गट जालो. ह्या बुकांत गोंय, केरळ, महाराश्ट्र तशेंच कर्नाटकांतल्यो १२५ मटव्यो काणियो आसात.
२०१८ इस्वेंत गोंयच्या युनिवर्सिटिच्या कोंकणी विभागाचो मुखेसत बाब प्रकाश पेऱ्यंकर हांचेसवें एका राश्ट्रीय मट्टाच्या मटव्या काणियांच्या बुकाचें चिंतप सुरू जालें, आनी च्यार राज्यांतल्या कांय ३० वयर मटव्या काणियेगारांक संपर्क केलो. पूण तांच्यो काणियो संग्रह कर्चें काम तितलें सलीस नातलें. पूण बेताळाच्या पाटीक पडल्ल्या विक्रमादित्यपरीं हांवेंय ह्या काणियेगारांच्या पाटीक पडुंक पडलें. ह्ये पासत दोन पावटीं म्हाका खूद मुंबय थावन गोंयां ड्रायव कर्न येवपाक पडलें पूण ह्या मिनतेचो फळ जावन ’सुरयो उदेता’ म्हळ्ळ्या दोन लिपियेंतल्या बुकाक लागून २७ काणियो जमो केल्यो. गोंय कोंकणी अकाडेमिच्या ’अनन्य’ पत्राची संपादकी बाय दो|जयंती नायक हिचो पाटिंबो सयत मेळ्ळो देकून हो बूक तयार करुंक म्हज्यान जालें.
दोन लिपिंतल्या ह्या बुकाक पर्गटुंचें काम कर्नाटक कोंकणी साहित्य अकाडेमीन २०१९ इस्वेंत केलें. पूण हो बूक राज्य/प्रांत्याच्यो, बोली/लिपिच्यो गडी उत्रोन वेची गर्ज आसा देकून डिजिटल कर्ची येवजण घाली आनी हें काम पोंताक पाववंक गोंयचे तशेंच मंगळूरचे मात्र न्हय विदेशांतले कोंकणी मोगिंनी पाटिंबो दिलो आनी एकेक काणी भोव बरे रितीन सादर करून म्हाका धाडली. ह्या बुकांतल्यो २७ काणियो वेवेगळ्यो; कथावसतुंत, भांदावळेंत, तांत्रिकतेंत तशेंच व्हापार जाल्ल्या भासेंत सयत विविधता आसा आनी खूप आयकोवप्यांक ह्यो कथा आवडतात म्हळ्ळें ताणीं आमकां धाडच्या संधेशांनी कळून येता. ’सुरयो उदेता’ एक सुरवात मात्र. कोंकणिंत अनीकयी सभार उत्तीम काणियेकार आसात, दूसऱ्या बुकांत तांच्योय कथा फुडिल्या दिसांनी तुमकां वाचुंक/आयकुंक मेळतल्यो.
