[ಸಂಪಾದಕೀಯ್ - 32] ಮನ್ಶಾಪಣಾಕ್ ಸಕ್ಲಾ ದೆಂವಯಿಲ್ಲೆಂ ಲೋಕ್ಡಾವ್ನ್
ಸಕಾಳಿಂಚಿ ನೀದ್ ಸುಟ್ಚ್ಯಾದಿಂಚ್ ಸುಕ್ಣ್ಯಾಂಚೊ ಆವಾಜ್ ಮತಿಕ್ ಉಲ್ಲಾಸ್ ದೀಂವ್ಕ್ ಲಾಗ್ತಾನಾಂಚ್ ಎಂಬುಲೆನ್ಸಾಚೊ ಆವಾಜ್ ಜಾಗೊ ಕರ್ತಾನಾ ಮನಾಂತ್ ಏಕ್ ಪ್ರಶ್ನ್ ಉದೆತಾಲೆಂ; ಆಜ್ ಕೊಣ್ ಮೆಲೊ? ಕಾಂಯ್ ತೊ ಮೆಲ್ಲೊ ಆಮ್ಚ್ಯಾ ಸೊಸಾಯ್ಟಿಚೊ ವಾ ಶೆಜ್ರ್ಯಾಚ್ಯಾ ಸೊಸಾಯ್ಟಿಚೊ? ತೊ ಮೆಲ್ಲೊ ಹಿಂದ್ವಾಂಚೊ? ಕ್ರಿಸ್ತಾಂವಾಂಚೊ ವ ಮುಸ್ಲಿಮಾಚೊ? ತೊ ಹ್ಯಾ ರಾಜ್ಯಾಂತ್ಲೊ? ವಾ ಭಾಯ್ಲ್ಯಾ ರಾಜ್ಯಾಂತ್ಲೊ? ಆನಿ ತ್ಯಾ ಮೆಲ್ಲ್ಯಾಚಿ ಕೂಡ್ ಆತಾಂ ತಾಚ್ಯಾ ಕುಟ್ಮಾಚ್ಯಾ ಹಾತಿಂ ದಿತಲಿಂ ವಾ ಮುನ್ಸಿಪಾಲಿಟಿಚಿಂ ವರುನ್ ಪುರ್ತಲಿಂ ವ ಲಾಸ್ತಲಿಂ?
ಗವ್ಜೆಚ್ಯಾ ಮುಂಬಯ್ ಶೆರಾಂತ್ ಪಾಟ್ಲ್ಯಾ ದೋನ್ ಮಯ್ನ್ಯಾಂನಿ ದಿಸಾಕ್ ಏಕ್ ಹಾದ್ಸಾ. ಹೆಂ ಶೆರ್ಚ್ ಹಾದ್ಸಾಚೆಂ ಶೆರ್ ತರ್ಯೀ, ಫಾಟ್ಲ್ಯಾ ದೋನ್ ಮಯ್ನ್ಯಾಂನಿ ಮನ್ಶಾನ್ ಮನ್ಶಾಪಣಾಕ್ ಕಿತ್ಲೆಂ ಸಕ್ಲಾ ಘಾಲುಂಕ್ ಜಾತಾ ಮ್ಹಳ್ಳ್ಯಾಚಿ ಪರಿಕ್ಶಾ ಕಶಿ ದಿಸ್ಲಿ. ಕಾಂಯ್ ಮಯ್ನ್ಯಾದಿಂ ಎಕಾ ಫಾಂತ್ಯಾರ್ ಘರ್ ಸೊಡ್ನ್ ಗೆಲ್ಯಾರ್ ರಾತಿಚ್ಯಾ ಮಧ್ಯಾನೆ ಪರ್ಯಾಂತ್ ಧಾಂವ್ಣಿ; ಜೊಡುಂಕ್, ಕಮಾಂವ್ಕ್, ಪುಂಜಾಂವ್ಕ್ ಆನಿ ದಾಳುಂಕ್. ಹ್ಯಾ ಧಾಂವ್ಣೆಂತ್ ಚಿಂತುಂಕ್ ವೇಳ್ ನಾ; ಅಪ್ಲಿಂ-ಪೆಲಿಂ ಕೊಣ್, ಬರೆಂ-ವಾಯ್ಟ್ ಕಿತೆಂ? ಮನ್ಶಾಧರ್ಮ್ ಮ್ಹಳ್ಯಾರ್ ಕಿತೆಂ? ಆಮಿ ಶಿಕುನ್ ಆಯಿಲ್ಲಿಂ ನಯ್ತಿಕ್ ಮೊಲಾಂ ಆಮ್ಚ್ಯಾ ಧಾಂವ್ಣೆಂತ್ ಖಂಯ್ ಸೊಡುನ್ ಅಯ್ಲ್ಯಾಂವ್? ಕಿತೆಂಚ್ ಚಿಂತುಂಕ್ ವೇಳ್ ನಾಸ್ತಾನಾ ಧಾಂವ್ತೆಲ್ಯಾಂಕ್ ಮಧೆಂಚ್ ಘರಾಂನಿ ಕಯ್ದ್ ಕೆಲೆಂ; ದೊಳ್ಯಾಂಕ್ ದಿಸಾನಾಸ್ಚ್ಯಾ ಎಕಾ ವಯ್ರಸಾನ್ ಸಗ್ಳಿ ಧರ್ತಿಚ್ ಕಾಂಪಯ್ಲಿ.
ಮಾಯಾನಗ್ರಿ ಮುಂಬಯ್ ಶೆರ್ ಮಾಫಿಯಾ ಶೆರ್. ಹಾಂಗಾ ಸರ್ಕಾರ್ ಕೊಣಾಯ್ಚೊಯ್ ಯೇಂವ್ ಪುಣ್ ರಾಜ್ ಚಲ್ಚೆಂ ಮಾಫಿಯಾಚೆಂ. ಹೆಂ ಆಜ್-ಕಾಲ್ ಥಾವ್ನ್ ನ್ಹಯ್, ತೆಂಪಾದಿಂಚ್ ಹೆಂ ಹ್ಯಾ ಶೆರಾಂತ್ ವಸ್ತಿ ಕರ್ತೆಲ್ಯಾಂಕ್ ಸವಯೆಚೆಂ ಜಾಲಾಂ. ಉದ್ಕಾಕ್ ಮಾಫಿಯಾ, ಬಿಲ್ಡರ್ ಮಾಫಿಯಾ, ಸಾಕರ್-ಕೊಬು ಮಾಫಿಯಾ, ಪಿಯಾವ್-ಬಟಾಟೆ ಮಾಫಿಯಾ, ಫಳ್ ಮಾಫಿಯಾ.... ಆನಿ ಜೆದ್ನಾಂ ಅಸಲೆ ಸಂಕಶ್ಟ್ ಉದೆವ್ನ್ ಮನಿಸ್ ಲಾಚಾರ್, ಕಂಗಾಲ್ ಜಾತಾ ತೆದ್ನಾಂಚ್ ಹ್ಯಾ ಕೊರ್ಪೊರೆಟ್ ಮಾಫಿಯಾನ್ ಸರ್ಕಾರಾಚ್ಯಾ ಮಜತೆನ್ ಲೊಕಾಕ್ ಪಿಳ್ಚೆಂ, ಪಯ್ಲೆಂಚ್ ಪರಿಸ್ತಿತೆನ್ ಪಿಳುನ್ ರೋಸ್ ಕಾಡ್ಲೆಲ್ಯಾ ಕೊಬಾಚ್ಯಾ ಚಿಂವ್ಡಾಂಕ್ ಸಯ್ತ್ ಪರತ್ ಗಾಣ್ಯಾರ್ ಘಾಲುನ್ ಪುರ್ತೊ ನಪ್ಪತ್ ನಾರ್ ಕರುನ್ ಮನ್ಶಾಪಣಾಚೊ ಖಚ್ರೊ ಕೆಲ್ಯಾರೀ ಹಾಂಚೆಂ ಪೊಟ್ ಭರಾನಾ, ಹಾಂಚೆಂ ಗುದಾಂವ್ ಭರಾನಾ.
ಹೆಚ್ ಗಾಂವಾಂತ್, ಹೆಚ್ ಸೊಸಾಯ್ಟಿಂತ್, ಹೆಚ್ ಫ್ಲೇಟಾಂತ್ ಹೆಂ ಮ್ಹಜೆಂ ಪಾಂಚ್ವೆಂ ವರಸ್. ಜಶೆಂ ಹೆಚ್ ಶೆರಾಚ್ಯಾ ಚಡ್ತಾವ್ ಗಾಂವಾಂನಿ ಜಾಂವ್ಚೆಪರಿಂ; ಮಾರ್ಚ್ ಮಯ್ನೊ ಅಖೇರ್ ಜಾಲ್ಲೆಪರಿಂಚ್ ಉದ್ಕಾ ಮಾಫಿಯಾ ಆನಿ ಬಿಲ್ಡರ್ ಮಾಫಿಯಾ ಕಾರ್ಯಾಳ್ ಜಾತಾತ್. ಆಮ್ಕಾಂ ಪಿಂಯೆಂವ್ಕ್ ಯೇಂವ್ಕ್ ಜಾಯ್ ಜಾಲ್ಲೆಂ ಉದಕ್ ಬಿಲ್ಡರಾಂಚಿಂ ಬಿಲ್ಡಿಂಗಾಂಕ್ ಉಭಿಂ ಕರುಂಕ್ ವೆತಾ, ಬಾಕಿಚೆಂ ಉದಕ್ ಉದ್ಕಾ ಮಾಫಿಯಾಚೆ ಆಪ್ಲ್ಯಾ ಟ್ಯಾಂಕರಾಂನಿ ಭರುನ್ ಆಮ್ಕಾಂಚ್ ಹಾಡ್ನ್ ವಿಕ್ತಾತ್. ಉಲಂವ್ಕ್ ಗೆಲ್ಯಾರ್ ಆಯ್ಕತಲಿಂ ನಾಂತ್. ಮುನ್ಸಿಪಾಲಿಟಿಲಾಗಿಂ ನಿಬಾಂಚಿ ಪಟ್ಟಿ ಕೆದ್ನಾಂಚ್ ಸಂಪ್ಲ್ಲಿ ನಾ. ಆವಾಜ್ ಉಟಯ್ತಲ್ಯಾಂಕ್ ಎಕ್ಚ್ ದುಡ್ವಾಂತ್ ಮೊಲಾಯ್ತಾತ್ ವಾ ಭೆಶ್ಟಾಂವ್ಣೆಂತ್ ಚುಪ್ ಕರ್ತಾತ್. ತೆದ್ನಾಂಯ್ ಚುಪ್ ಜಾಯ್ನಾತ್ಲ್ಯಾರ್ ಹ್ಯಾ ಶೆರಾಂತ್ ಮೊಡಿಂ ಪಡುಂಕ್ ಚಡ್ ವೇಳ್ ನಾ. ಮಾರ್ಗಾಯೆಚ್ಯಾ ಹ್ಯಾ ಶೆರಾಂತ್ ಸಗ್ಳ್ಯಾಚ್ಯಾಕೀ ಸವಾಯೆಚೆಂ ಮ್ಹಳ್ಯಾರ್ ಮನ್ಶಾಚ್ ಜೀವ್. ಮಾರ್ಚ್ ಉತ್ರೊನ್ ಎಪ್ರಿಲ್ ಸಂಪ್ಲೊ ಮ್ಹಣ್ತಚ್ ಉದ್ಕಾಚೆಂ ಮೋಲ್ ಚಡ್ತ, ಸೊಸಾಯ್ಟಿಕ್ ಕಶೆಂಯ್ ಚಡ್ತಿಕ್ ಮೊಲ್ ದೀವ್ನ್ ಟ್ಯಾಂಕರಾಂ ಹಾಡಯ್ತಾತ್ ತರ್ ಹೆರಾಂ ಎಕಾ ಬಾಲ್ದಿ ಉದ್ಕಾತ್ ಲೆಗುನ್ ಲೋಕ್ ಲಾಯ್ನಿರ್ ಉಭೊ ರಾವ್ತಾ. ಆನಿ ಆಮ್ಕಾಂ ಪಿಂಯೆಂವ್ಕ್ ಆಸ್ಚೆಂ ಉದಕ್ ಆಮ್ಚ್ಯಾ ಘಾಮಾ-ರಗ್ತಾಸವೆಂ ಪಿಯೆಲ್ಲೆ ಹೆ ಭಡ್ವೆಚ್ ಆಮ್ಚೆರ್ ರಾಜ್ವಟ್ಕಿ ಚಲಯ್ತಾತ್. ಪುಣ್ ಹ್ಯಾ ವರ್ಸಾ ಮಾಯ್ ಮಯ್ನೊ ಅಖೇರ್ ಜಾಲೊ ಪುಣ್ ಹ್ಯಾ ವರ್ಸಾ ಟ್ಯಾಂಕರಾಂ ನಾಂತ್, ಬಿಲ್ಡಿಂಗಾಂ ನಾಂತ್ ದೆಕುನ್ ದರಬಸ್ತ್ ಉದಕ್. ಪುಣ್ ಹ್ಯಾ ದೋನ್ ಮಯ್ನ್ಯಾಚ್ಯಾ ಘರ್-ಬಂದಿಖಾನೆಂತ್ ಹೆರ್ ಮಾಫಿಯಾನ್ ಮನ್ಶಾಂಕ್ ಪಿಳ್ಚೆಂ ಕಾಮ್ ಹಾತಿಂ ಘೆತ್ಲಾಂ.
ಏಕ್ ಕಿಲೊ ಬೆಂಡೆ 40 ರುಪ್ಯಾಂಚೆ ಆಸ್ಲೆ ಆತಾಂ 100 ರುಪಯ್. ಏಕ್ ಕಿಲೊ ಬೀನ್ಸ್ 60 ರುಪ್ಯಾಂಚೆ ಆಸ್ಲೆ ಆತಾಂ 140. 1 ಡಜನ್ ಕೆಳಿಂ 30 ರುಪ್ಯಾಂಚಿ ಆಸ್ಲಿಂ ಆತಾಂ 60 ರುಪಯ್. ಏಕ್ ಲೀಟರ್ ದೂದ್ 40 ರುಪ್ಯಾಂಚೆಂ ಆಸ್ಲೆಂ ಆತಾಂ 46 ರುಪಯ್. 100 ರುಪ್ಯಾಂಕ್ 1 ಕಿಲೊ ಚಿಕನ್ ಮೆಳ್ಚೆಂ ಆತಾಂ ಕಿಲ್ಯಾಕ್ 280 ರುಪಯ್. 650 ರುಪ್ಯಾಂಕ್ 1 ಕಿಲೊ ಮಟನ್ ಮೆಳ್ಚೆಂ ಆತಾಂ 850 ರುಪ್ಯಾಂಕ್. 600 ರುಪ್ಯಾಂಕ್ ಮೆಳ್ಚಿ 1 ಕಿಲೊ ಸುರ್ಮಾಯೆಕ್ ಆತಾಂ 1200 ರುಪಯ್. ಆನಿ ಹೆಂ ಬ್ಲ್ಯಾಕ್ ಮಾರ್ಕೆಟಿಂಗ್ ಸಗ್ಳೆಂ ಹೆಂಚ್ ಮಾಫಿಯಾ ವೆವಸ್ತಿತ್ ರಿತಿನ್ ಕರ್ತಾ. ಪಯ್ಲೆಂ; ದೀಸ್ಪಡ್ರ್ಯೊ ಗರ್ಜೆಚ್ಯೊ ವಸ್ತು ಮೆಳಾನಾಶೆಂ ಕರ್ತಾ. ಪಯ್ಲೆಂಚ್ ದಾಳುನ್ ದವರ್ಲ್ಲ್ಯಾಂಕ್ ತಾಂಚೆಲಾಗಿಂ ಆಸ್ಚೊ ಸಮಾನ್ ದೊಡ್ತ್ಯಾ ಮೊಲಾಕ್ ವಿಕುಂಕ್ ಸಲೀಸ್ ಜಾತಾ. ತಾಂತುಂಯ್ ಏಕ್ ವಿಚಾರ್ಲ್ಯಾರ್ ಏಕ್ ನಾ, ಆನಿ ಸಭಾರ್ ಮೆಡಿಕಲಾಂನಿ ಸಯ್ತ್ ವಿಕುನ್ ಗೆಲ್ಲಿಂ ವಾ ವೆಚಿಂ ವಖ್ತಾಂ ಸಯ್ತ್ ಎಕ್ಸ್ಪಾಯ್ರಿ ಡೇಟ್ ಉತ್ರಲ್ಲಿಂ ಮ್ಹಳ್ಯಾರ್ ಕೋಣ್ ಪಾತ್ಯೆತ್? ಹೆಂ ಮಿಡಲ್ ಕ್ಲಾಸಾಕ್ ಲುಟ್ಚಿ ರೀತ್ ತರ್ ಬಾಕಿಚ್ಯಾಂಚಿ ಹಾಲ್ ಹಾಚ್ಯಾಕೀ ಭಿರಾಂಕುಳ್; ಜೊ ಲೋಕ್ ಚಾಲಿಂನಿ, ಕೊಲೊನಿಂನಿ ರಾವ್ತಾ, ತಾಂಚೆಲಾಗಿಂ ಕರುಂಕ್ ಕಾಮ್ ನಾ, ದೀಸ್ಪಡ್ತೊ ಗ್ರಾಸ್ ನಾ, ಭಾಯ್ಲ್ಯಾ ಶೆರಾಥಾವ್ನ್ ಆಯಿಲ್ಲೊ ತರ್ ತಾಂಚೆಲಾಗಿಂ ಖಾಂವ್ಕ್ ಸಯ್ತ್ ಗತ್ ನಾ. ಸರ್ಕಾರ್ ಟಿವಿಂನಿ ಫಕತ್ ಆಶ್ವಾಶನಾಂ ದಿತಾ; ಸಗ್ಳ್ಯಾಂಕ್ ಫುಂಕ್ಯಾಕ್ ತಾಂದುಳ್, ಗೋಂವ್, ತೇಲ್, ಸಾಕರ್ ದಿತಾಂ ಮ್ಹಣ್ ಪುಣ್ ಹಕೀಗತೆಂತ್ ಹೆಂ ಹೆಚ್ ಮಾಫಿಯಾಚೆ ಖಾವ್ನ್ ಸೊಡ್ತಾತ್. ಜೊಕ್ತಿಂ ದಸ್ತಾವೆಜಾಂ ಆಸುನ್ಯೀ, ರೇಶನ್ ಕಾರ್ಡಾಂ ವಾ ಹೆರ್ ಕಾರ್ಡಾಂ ಕರುಂಕ್ ಸಲೀಸಾಚೆಂ ಕಾಮ್ ನ್ಹಯ್. ಹಾಂತುಂಯ್ ದಲ್ಲಾಳಾಂಮುಖಾಂತ್ರ್ ಹಾಂಚೆಂ ಪೋಟ್ ಭರುಂಕ್ ಲೋಂಚ್ ದೀಂವ್ಕ್ ಪಡ್ತಾ. ಆನಿ ಹ್ಯಾ ಪರಿಗತೆಂತ್ ಬಾಂಗ್ಲಾಚ್ಯಾ ಕಿತ್ಲೆಶ್ಯಾಂಕ್ ನಾಂವಾಂ ಬದ್ಲುನ್ ಹಾಂಗಾ ಹಾಡ್ಚಿ ಮಾಫಿಯಾ ಭೋವ್ ಸಕ್ರಿಯ್ ರಿತಿನ್ ಕಾಮ್ ಕರುನ್ ಆಸಾ; ಬಾಂಗ್ಲಾಚ್ಯಾ ನಫೀಸಾ, ನದೀಮಾಕ್ ಹ್ಯಾ ಶೆರಾಂತ್ ಉಶಾ ವಾ ರೇಕಾ ತಶೆಂಚ್ ನಿತಿನ್ ವಾ ಜತಿನ್ ನಾಂವಾರ್ ಆಧಾರ್ ಕಾರ್ಡಾಂ ಆನಿ ಪ್ಯಾನ್ ಕಾರ್ಡಾಂ ಸಲೀಸಾಯೆನ್ ತಯಾರ್ ಜತತ್. ಆನಿ ಅಸಲಿಂ ಫೇಕ್ ಕಾರ್ಡಾಂ ಕರ್ನ್ ಹ್ಯಾ ಶೆರಾಂತ್ ಘೊಳ್ಚಿಂ ಕಾಂಯ್ ಲಾಕಾಂನಿ ಲೋಕ್ ಯೆವುನ್ ಎಕಾ ಲ್ಹಾನ್ ಭಾಡ್ಯಾಚ್ಯಾ ಕುಡಾಂತ್ ಧಾ-ಭಾರಾ ಜಣಾಂ ಜಿಯೆತಾ ಆನಿ ದೀಸ್ಭರ್ ಘರಾಂ ಘರಾಂನಿ ವಚುನ್ ಕಾಮ್ ಕರ್ತಾ. ಆನಿ ಹ್ಯಾ ಭಿರಾಂಕುಳ್ ಪರಿಸ್ತಿತೆಂತ್ ವ್ಹಡ್ಲೊ ಮಾರ್ ಪಡ್ಲ ಅಸಲ್ಯಾಂಚೆರ್. ಪುಣ್ ಹಾಂಚಿ ಕಾಳ್ಜಿ ಕೊಣೆಂಚ್ ಘೆಂವ್ಚೆಪರಿಂ ನಾ; ಸರ್ಕಾರಾಕ್ ಹಾಂಚಿ ಪರ್ವಾ ನಾ ಕಿತ್ಯಕ್ ಮ್ಹಳ್ಯಾರ್ ಹಿಂ ವೋಟ್ಬೆಂಕ್ ನ್ಹಯ್. ತಶೆಂಚ್ ತಾಂಚ್ಯಾ ದೇಶಾಕ್ ಸಯ್ತ್ ಹಾಂಚಿ ಫಿಕಿರ್ ನಾ. ಆತಾಂ ಕರುಂಕ್ ಕಾಮ್ ನಾ, ದೀಂವ್ಕ್ ಭಾಡೆಂ ನಾ, ಜೇಂವ್ಕ್ ಖಾಣ್ ನಾಸ್ತಾನಾ ಹೊ ಲೋಕ್ ಕಂಗಾಲ್ ಜಾಲ. ಕಾಂಯ್ ಹಾಂತ್ಲೊ ಥೊಡೊ ಲೋಕ್ ರಿಸ್ಕ್ ಘೆವ್ನ್ ಫಳ್-ವಸ್ತು ವಿಖುಂಕ್ ಬಸ್ಲೊ ತರ್, ಮಾಫಿಯಾಚೆ ಮನಿಸ್ ’ಸ್ವ-ರಕ್ಷಣಾಚ್ಯಾ ನಿಬಾನ್’ ಯೇವ್ನ್ ಹಾಂಕಾಂ ತೊಣ್ಕ್ಯಾಂನಿ ಮಾರ್ತಾತ್. ಅಸಯಾಂಚ್ಯಾ ಪಿಡೆಕ್ ವ್ಹಖ್ತಾಂ ಜಾಂವ್, ಹಾಂಚ್ಯಾ ಮೊಡ್ಯಾಂಕ್ ಮೆಲ್ಲ್ಯಾಂಚ್ಯಾ ಪಟ್ಟೆರ್ ಜಾಂವ್ ಘೆಂವ್ಕ್ ಸರ್ಕಾರ್ ತಯಾರ್ ನಾ. ಸರ್ಕಾರಿ ಅಂಕ್ಡೆ ಸಾಂಗ್ಚೆಪರಿಂ ದಿಸಾಕ್ ಪನ್ನಾಸ್-ಸಾಠ್ ಮೊರ್ನಾಂ, ಪುಣ್ ಹಕೀಗತೆಂತ್ ಹೊ ಆಂಕ್ಡೊ ಉಣ್ಯಾರ್ ಉಣೆ ಪಾಂಚ್-ಸ ವಾಂಟೊ ಚಡ್ ಆಸಾ. ಹಾಂ! ಹಾಂತುಂ ಪೊಟಾಕ್ ನಾಸ್ತಾನಾ ಮೆಲ್ಲ್ಯಾಂಚೆಂ ಲೇಕ್ ಭಿಲ್ಕುಲ್ ನಾ. ಕಿತ್ಲೆಂ ವಿಪರ್ಯಾಸ್ ಜಿವಿತ್ ಹ್ಯಾ ಶೆರಾಚೆಂ.
ಗೋವಾ ಮೋಡೆಲ್?
ಆಧ್ಲ್ಯಾ ಮಯ್ನ್ಯಾಂತ್ ಸರ್ಕಾರಾನ್ ಸಾಂಗ್ಲೆಂ ಹ್ಯಾ ಶೆರಾಂತ್ ಗೊವಾ ಮೋಡೆಲಾಪರಿಂ ಕೊರೊನಾಕ್ ಮುಟಿಂತ್ ಹಾಡಿಜಯ್: ಅನ್ಯೇಕ್ ವಿಡಂಬನ್, ಪರತ್ ಮಾಫಿಯಾಚ್ಯಾ ಮುಟಿಂತ್ ಸರ್ಕಾರ್. ಸಾಂಗುಂಕ್ ಜಿಲ್ಲ್ಯಾಚೆ ಬೋರ್ಡರ್ ಸೀಲ್ ಜಾಲೆ, ಘರಾಂತ್ಲೊ ಮನಿಸ್ ಘರಾಂತ್ ಉರ್ಲೊ. ಗರ್ಜೆಚ್ಯಾ ವಸ್ತುಂಚಿಂ ಮೊಲಾಂ ದೊಡ್ತಿಂ ಜಾಲಿಂ. ಆನಿ ಎಕೆಕಾ ಗಾಂವಾಂನಿ, ಎಕೆಕಾ ಸೆಕ್ಟರಾಂನಿ ವಚುನ್ ಪರಿಕ್ಶಾ ಕರ್ಚೆ ನಿಬಾಂನಿ ಅಯಿಲ್ಲ್ಯಾಂನಿ ಕೆಲ್ಲಿ ಪರಿಕ್ಶಾ ಅಶಿ ಆಸಾ; ಹಾಂಚೆಲಾಗಿಂ ಏಕ್ ಥರ್ಮೋಮೀಟರ್ ಜಾಂವ್ ನಾ, ಎಕಾ ಮೀಟರ್ ಪಯ್ಸ್ ಬಸುನ್ ಸೊಸಾಯ್ಟಿಚ್ಯಾ ಎಕೆಕಾ ಫ್ಲೇಟಾಂತ್ ಜಿಯೆತೆಲ್ಯಾಂಚಿಂ ನಾಂವಾಂ, ಪ್ರಾಯ್, ಆನಿ ಸಂಪರ್ಕ್ ನಂಬರ್ ಘೆವ್ನ್ ವೆತಾತ್ ಆನಿ ಅಸಲ್ಯಾ ಸರ್ವೆಕ್ ಗೋವಾ ಮೋಡೆಲ್ ಮ್ಹಣ್ತಾತ್ ಬೇಕೂಫ್. ಹೆಂ ಸೊಡಾ, ಆತಾಂ ಕೊಣ್ಯೀ ಪಿಡೇಸ್ತ್ ಆಸಾ ತರ್ ತಾಕಾ ಆಸ್ಪತ್ರೆಂತ್ ಭರ್ತಿ ಕರುಂಕ್ ಖಂಚಿಚ್ ಆಸ್ಪತ್ರ್ ತಯಾರ್ ನಾ. ದೆಕುನ್ ಕೊಣ್ಯೀ ಕೊರೊನಾಚ್ಯಾ ತಾಪಾಚಿ ಲಕ್ಶಣಾಂ ಆಯ್ಲಿಂ ಮ್ಹಣ್ತಚ್ ತಾಂಕಾಂ ವರುನ್ ಲೊನಾವ್ಲಾಚ್ಯಾ ಮುನ್ಸಿಪಾಲಿಟಿ ಆಸ್ಪರೆಂತ್ ಚೆಪ್ತಾತ್. ಥಂಯ್ ನಿತಳ್ ಖಾಕುಸ್ ಸೊಡಾ, ನಿತಳ್ ಮ್ಹಣ್ ಸಾಂಗ್ಚೆಂ ಎಕ್ಯೀ ನಾ. ಎಕಾ ರಿತಿನ್ ಹಾಂಗಾ ಅರ್ಧೊ ಮೊರ್ಚೆಪ್ರಾಸ್ ಥಂಯ್ ಪುರ್ತೊ ಮೋರ್ ಮ್ಹಣುನ್ ಆಸ್ಯೆತ್. ಪುಣ್ ಹಿ ಹಕೀಗತ್ ಕಾಂಯ್ ಕಾಲ್ಪನಿಕ್ ಕಥಾ ನ್ಹಯ್. ದೆಕುನ್ ಲೋಕ್ ಸಯ್ತ್ ತಪಾಸ್ಣಿ ಕರುಂಕ್ ಮುಕಾರ್ ಯೇಂವ್ಕ್ ಭಿಂಯೆತಾ ಆನಿ ಹೆಚ್ ಭಿರಾಂತೆಕ್ ಭಂಡ್ವಾಳ್ ಕರುನ್ ಜಾಯ್ತೆ ವಯ್ಜ್ ಅಪ್ಲೊ ದಂದೊ ಚಲಯ್ತಾತ್, ಸಾಮಾನ್ಯ್ ಶೆಳ್-ತಪಾಕ್ ಸಯ್ತ್ ಕೊರೊನಾ ನೆಗೆಟಿವ್ ರಿಪೋರ್ಟ್ ಜಾಯ್ ತರ್ ೫೦೦ ರುಪಯ್. ಕೊರೊನಾ ಪೊಸಿಟಿವ್ ಆಸ್ಲ್ಯಾರ್ಯೀ, ನೆಗೆಟಿವ್ ರಿಪೋರ್ಟಾಕ್ ಏಕ್ ಹಜಾರ್ ರುಪಯ್. ಹ್ಯಾ ವೆವಸ್ತೆಂತ್ ಕಮಾಂವ್ಚೆಯ್ ಆಸಾತ್ ಆನಿ ತಾಣಿಂ ಮನ್ಶಾಪಣಾಚಿಂ ಸರ್ವ್ ಮೊಲಾಂ ಲುಟುನ್ ಖೆಲ್ಯಾಂತ್.
ಮನ್ಶಾಮೊಲಾಂಚಿ ದೆಂವ್ಣಿ
ನಾಸಿಕಾಂತ್ ಎಕಾ ಸರ್ಜನಾನ್ ಕಾಮ್ ಕರುನ್ ಆಸ್ಲ್ಯಾ ಆಸ್ಪತ್ರೆಂತ್ ಖೂಪ್ ಸೆವಾ ದಿಲಿ ದೆಕುನ್ ತಾಣೆಂ ರಾಂವ್ಚ್ಯಾ ಸೊಸಾಯ್ಟಿಚ್ಯಾ ಲೊಕಾಂನಿ ತಾಕಾ ತಾಳಿಯೊ ಪೆಟುನ್ ಸ್ವಾಗತ್ ಕೆಲೊ ಆನಿ ಫುಲಾಂಚೆ ಹಾರ್ ಚಡಯ್ಲೆ. ಥೊಡೆಚ್ ದಿಸಾಂನಿ ಆರೋಗ್ಯ ಸೇತು ಏಪಾಮುಖಾಂತ್ರ್ ಕಳುನ್ ಆಯ್ಲೆಂಕಿ, ತ್ಯಾ ಸರ್ಜನಾಕ್ ಕೊರೊನಾ ಪೋಸಿಟಿವ್ ಮ್ಹಣುನ್. ತೆಚ್ ಘಡ್ಯೆ ಸೊಸಾಯ್ಟಿಚಿ ಮೊಬಾಯ್ಲಾಚೆರ್ ಮೆಸೇಜ್ ಆಯ್ಲಿ ’ದಯಕರುನ್ ಸೊಸಾಯ್ಟಿಕ್ ಯೇನಕಾ, ತುಜಿ ರಾವ್ಪಾಚಿ ಬಂದೊಬಸ್ತ್ ಕರ್’. ಹ್ಯಾ ಸರ್ಜನಾಕ್ ಸೆಲ್ಫ್-ಕ್ವಾರಂಟಾಯ್ನಾಚಿ ಪರ್ವಣ್ಗಿ ಆಸ್ಲಿ ದೆಕುನ್ ತೊ ಅಪ್ಲ್ಯಾ ಘರಾಂತ್ಚ್ ಸೆಲ್ಫ್ ಕ್ವಾರಂಟಾಯ್ನ್ ಜಾಂವ್ಚ್ಯಾ ಇರಾದ್ಯಾನ್ ಪಾಟಿಂ ಯೆತಾನಾ ಸೊಸಾಯ್ಟಿನ್ ತಾಕಾ ರೀಗ್ ದಿಲಿನಾ. ಹಿ ಖಬರ್ ಪೊಲಿಸಾಕ್, ಜಡ್ಜಾಕ್ ಆಸುನ್ಯೀ ತಾಂಚ್ಯಾನ್ ಕಿತೆಂಚ್ ಕರುಂಕ್ ಜಾಲೆಂನಾ ದೆಕುನ್ ತೊ ಸರ್ಜನ್ ಪಾಟಿಂ ಅಪ್ಣಾನ್ ಕಾಮ್ ಕರ್ಚ್ಯಾ ಆಸ್ಪತ್ರೆಕ್ ಗೆಲೊ, ಪುಣ್ ಥಂಯ್ ಏಕ್ ಖಾಟ್ ಸಯ್ತ್ ನಾ, ಏಕ್ ವೆಂಟಿಲೇಟರ್ ಸಯ್ತ್ ನ, ಏಕ್ ಮಾಸ್ಕ್ ಸಯ್ತ್ ನಾ. ಅಖ್ರೇಕ್ ತ್ಯಾ ಆಸ್ಪತ್ರೆಚ್ಯಾ ಸ್ಟೋರ್ ರುಮಾಂತ್ ಅಪ್ಣಾಕ್ ಸೆಲ್ಫ್ ಕ್ವಾರಂಟಾಯ್ನ್ ಕರುಂಕ್ ತಕಾ ಪಡ್ಲೆಂ. ಹೆಂ ಮನ್ಶಾಪಣಾಚಿ ವೀದ್-ವಾವ್ಳಿ.
ಅಸಲೆಚ್ ಜಾಯ್ತೆ ದಾಕ್ಲೆ ದಿವ್ಯೆತಾ. ಹೆಂ ಶೆರ್ ಗಾಂವಾಂತ್ಲ್ಯಾಂಕ್ ಮುಂಬಯ್ ಶೆರ್ ತರ್ಯೀ ಹಾಂಗಾ ಪ್ರಮುಕ್ ಜಾವ್ನ್ ದೋನ್ ಮಾ-ಶೆರಾಂ ಆಸಾತ್; ಪನ್ವೆಲ್ ಥಾವ್ನ್ ವಾಶಿ ದರ್ಯೊ ಪರ್ಯಾಂತ್ ’ನವಿ ಮುಂಬಯ್’ ಆನಿ ವಾಶಿ ದರ್ಯೊ ಉತರ್ತಚ್ ಮುಂಬಯ್ - ಅಶೆಂ ಜೆರಾಲ್ ರಿತಿನ್ ಸಾಂಗ್ಯೆತ್. ಮುಂಬಂಯ್ತ್ ಚಾಲಿ-ಜೊಪ್ಡ್ಯಾಂನಿ ಜಿಯೆಂವ್ಚೆ ಜಾಯ್ತೆ ಗಾಂವ್ ಆಸಾತ್ ತರ್ಯೀ ಪ್ರಮುಕ್ ಜಾವ್ನ್ ಧಾರಾವಿ ಎಕಾ ಗಾಂವಾಂತ್ ಜಿಯೆತೆಲೊ ಲೋಕ್ ಅಖ್ಖ್ಯಾ ಮಂಗ್ಳುರಾಂತ್ಲ್ಯಾ ಲೊಕಾಚ್ಯಾಕೀ ಚಡಿತ್. ಆನಿ ನವಿ ಮುಂಬಯಾಂತ್ ಸಯ್ತ್ ಅಸಲ್ಯಾ ಚಾಲಿ-ಜೊಪ್ಡ್ಯಾಂನಿ ಜಿಯೆತಲೊ ಲೋಕ್ ಜಾಯ್ತೊ ಅಸಾ. ತಾಂತುಂ ಪ್ರಮುಕ್ ಜಾಗೊ ಜಾವ್ನಾಸಾ ವಾಶಿಂತ್ಲಿ APMC ಮಾರ್ಕೆಟ್; ಹ್ಯಾ ಮಾರ್ಕೆಟಿಂತ್ ಕಾಮ್ ಕರ್ಚೊ ಲೋಕ್ ಸಗ್ಳೊ ವ್ಯಾಪರಿಸ್ತ್ ನ್ಹಯ್, ದಲ್ಲಾಳ್ ಆಸಾತ್, ಆನಿ ವಿಖ್ತೆಲೆ ಆಸಾತ್ ತಶೆಂಚ್ ಕೂಲಿ ಕಾಮ್ ಕರ್ಪಿ ಆಸಾತ್, ಜೆ ಸಮಾನ್ ಉಕಲ್ನ್ ಮಾರ್ಕೆಟಿಭಾಯ್ರ್ ಪರ್ಯಾಂತ್ ಹಾಡುನ್ ಗಾಡಿಯಾಂನಿ ಘಾಲ್ತಾತ್. ಚಡ್ತಾವ್ ಲೋಕ್ ಯುಪಿ ಬಿಹಾರಿಚೊ ವಾ ಭಾಯ್ಲ್ಯಾ ರಾಜ್ಯಾಂತ್ಲೊ. ಹಾಂಕಾಂ ರಾಂವುಂಕ್, ನಿದುಂಕ್ ಮ್ಹಣ್ ದುಸ್ರಿ ಸುವಾತ್ ನಾ, ತೆಚ್ ಮೆಳಾಂತ್, ತೆಚ್ ಘಾಣಿಂತ್ ತಾಂಚಿ ಜಿಣಿ. ಜೆದ್ನಾಂ APMC wholesale ಮಾರ್ಕೆಟಿಂತ್ ಕೊರೊನಾ ರಿಗ್ಲೆಂ, ಸಭಾರಾಂಕ್ ಹ್ಯಾ ವಾಯ್ರಸಾನ್ ಗ್ರಾಸಿಲೆಂ.
ಇತ್ಲೆಂ ಸರ್ವ್ ಘಡ್ತಾನಾ ಮಾಂಯ್ಗಾಂವಾಂತ್ ಬೊಂಬೊಯ್ ಥಾವ್ನ್ ಕೊಣೆಂಚ್ ಗಾಂವಾಕ್ ಯೇನಾಶೆಂ ಕರುಂಕ್ ಆವಾಜ್ ಉಟುನ್ ಆಸಾ, ಗಲ್ಫಾಕ್ ಗೆಲ್ಲ್ಯಾಂನಿ ಸಯ್ತ್ ಪಾಟಿಂ ಯೇನಾಶೆಂ ಕರುಂಕ್ ಆವಾಜ್ ಉಟ್ತಚ್ ಆಸಾ ಮ್ಹಳ್ಳೆಂ ಅನ್ಯೇಕ್ ಧಾರುಣ್ ಸತ್. ಆಮ್ಚೊ ಗಾಂವ್ ದೇವ್-ಧರ್ಮಾಚೊ ಗಾಂವ್, ಮಂದಿರ್-ಇಗರ್ಜಾಂನಿ ಆಮ್ಚ್ಯೊ ಪುಜಾ-ರೆತಿರೊ ಚಡ್ಲ್ಯಾತ್ ಪುಣ್ ಇತ್ಲೆಂ ಸರ್ವ್ ಚಡುನ್ಯೀ, ಆಮ್ಚೆಭಿತರ್ ಆಮ್ಚೆಂ ಮನ್ಶಾಪಣ್ ಕಶೆಂ ದೆಂವ್ಲಾಂ? ಆನಿ ಕಿತ್ತುನ್ ದೆಂವ್ಲಾಂ? ಹೆಂ ಮಾತ್ರ್ ಹ್ಯಾ ಘಡ್ಯೆ ಆಮಿ ಆಮ್ಕಾಂಚ್ ವಿಚಾರುಂಕ್ ಜಾಯ್ ಜಾಲ್ಲೆಂ ಸವಾಲ್.
- ವಲ್ಲಿ ಕ್ವಾಡ್ರಸ್ [ಮಾಯ್, 2020]
