ಆಶಾವಾದಿ ಪ್ರಕಾಶನಾಚಿಂ ಪಾಂಚ್ ಕೊಂಕಣಿ ಪುಸ್ತಕಾಂಚೆಂ ಉಗ್ತಾವಣ್ ಆನಿ ಕೊಂಕಣಿ ಕವಿಗೋಶ್ಟಿ
ಗಂಟಲ್ಕಟ್ಟೆ (19 ಜನೆರ್ 2025): ರುಪ್ಯೊತ್ಸವಾಚೆಂ ವರಸ್ ಸಂಭ್ರಮುಂಚ್ಯಾ ಆಶಾವಾದಿ ಪ್ರಕಾಶನ್ ಆನಿ ಸ್ತ್ರೀ ಸಂಘಟನ್ ಗಂಟಲ್ಕಟ್ಟೆ, ಭಾರತೀಯ್ ಕಥೊಲಿಕ್ ಯುವಸಂಚಾಲನ್ ಹಾಂಚ್ಯಾ ಮುಕೇಲ್ಪಣಾಖಾಲ್ ಪಾಂಚ್ ಕೊಂಕಣಿ ಪುಸ್ತಕಾಂಚೆಂ ಉಗ್ತಾವಣ್ ಕಾರ್ಯೆಂ ಗಂಟಲ್ಕಟ್ಟೆಂತ್ಲ್ಯಾ ನಿತ್ಯಾದಾರ್ ಸಾಯ್ಭಿಣಿಚ್ಯಾ ಫಿರ್ಗಜೆಂತ್ ವಿಗಾರ್ ಬಾಪ್ ಮಾ|ರೊನಾಲ್ಡ್ ಪ್ರಕಾಶ್ ಡಿಸೊಜಾಚ್ಯಾ ಅಧ್ಯಕ್ಷ್ಪಣಾಖಾಲ್ ಚಲ್ಲೆಂ.
ಫೆಲ್ಸಿ ಲೋಬೊ ದೆರೆಬೈಲ್ ಹಿಚ್ಯಾ ಸೂತ್ರ್ ಸಂಚಾಲನಾಂತ್ ಚಲ್ಲೆಲ್ಲ್ಯಾ ಹ್ಯಾ ಕಾರ್ಯಾಂತ್ ಬಾಯ್ ಫ್ಲಾವಿಯಾ ಆಲ್ಬುಕರ್ಕ್ ಪುತ್ತೂರ್ ಹಿಣೆಂ ಆಶಾವಾದಿ ಪ್ರಕಾಶನಾಚ್ಯಾ ಪಂಚ್ವೀಸ್ ವರ್ಸಾಂಚಿ ಮೊಟ್ವಿ ಒಳೊಕ್ ಕರುನ್ ದಿಲಿ. ಉಪ್ರಾಂತ್ ಆಶಾವಾದಿ ಪ್ರಕಾಶನಾನ್ ಪರ್ಗಟ್ ಕೆಲ್ಲಿಂ ಪುಸ್ತಕಾಂ; ಗಂಟಲ್ಕಟ್ಟೆಚೊ ಕವಿ ಎಡ್ವಿನ್ ಪಿಂಟೊಚೆಂ ’ಮ್ಹಜೊ ಗಾಂವ್ ರಡ್ತಾ’, ಪ್ರಕಾಶ್ ದ. ನಾಯ್ಕಾಚೆಂ ’ಮೊಡ್ಕುಳ್’, ವಲ್ಲಿ ಕ್ವಾಡ್ರಸಾಚೆಂ ಲಿಪ್ಯಂತರಣಾಚ್ಯಾ ತಾಂತ್ರಿಕತೆಚೆಂ ಪುಸ್ತಕ್ ’ಕೊಂಕಣಿ’, ಡೊ.ಜಯಂತಿ ನಾಯ್ಕಾಚೆಂ ’ತಿಚಿ ಕಾಣಿ’, ಉದಯ್ ಮ್ಹಾಂಬ್ರೊಚೆಂ ’ಸಪ್ಣಾಂತ್ಲ್ಯಾ ಗಾಂವ್ಚಿ ವಾಟ್’ ಪುಸ್ತಕಾಂಚೆಂ ಉಗ್ತಾವಣ್ ಮಾ.ಬಾ.ರೊನಾಲ್ಡ್ ಡಿಸೋಜಾನ್, ಲಿಡಿಯಾ ಡಿಕುನ್ಹಾ, ರೆಕ್ಸನ್ ಮಿರಾಂದಾ, ಪ್ರಮೀಳಾ ಪಿರೇರಾ ಆನಿ ನಾನು ಮಾರೋಳ್ ತೊಟ್ಟಾಮ್ ಹಾಣಿಂ ಉಗ್ತಾವಣ್ ಕೆಲಿಂ.
ಪುಸ್ತಕ್ ಉಗ್ತಾವಣ್ ಕಾರ್ಯಾ ಉಪ್ರಾಂತ್ ’ಆಟ್ವೊ ಸುರ್’ ಪುಸ್ತಕಾಕ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಜಿಕ್ಲೆಲ್ಯಾ ಬಾಯ್ ಸಲೋಮಿ ಮಿಯಾಪದವ್ ಮೊಗರ್ನಾಡ್ ಹಿಚ್ಯಾ ಅಧ್ಯಕ್ಷ್ಪಣಾಖಾಲ್ ಕೊಂಕಣಿ ಕವಿಗೋಶ್ಟಿ ಚಲ್ಲಿ. ಹಾಂತುಂ ಡೊ.ಜಯಂತಿ ನಾಯ್ಕ್, ಪ್ರಕಾಶ್ ದ. ನಾಯ್ಕ್, ಉದಯ್ ಮ್ಹಾಂಬ್ರೊ, ಫೆಲ್ಸಿ ಲೋಬೊ ದೆರೆಬೈಲ್, ಫ್ಲಾವಿಯಾ ಆಲ್ಬುಕರ್ಕ್, ನಿಯೋನಾ ಡಿಸೋಜ ಬೆಳ್ವಾಯ್, ಜೆವೆಲ್ ಡಿಸಿಲ್ವಾ, ಐಡಾ ಮಿನೇಜಸ್, ಐವನ್ ಡಿಸೋಜ್, ಲಿಶೆಲ್ ಕೊರೆಯಾ, ಸೋನಿಯಾ ಡಿಕೊಸ್ತಾ, ಲೋನಾ ಪಿಂಟೊ ಹಾಣಿಂ ವಾಂಟೊ ಘೆತ್ಲೊ.
ಕವಿಗೋಶ್ಟಿಂತ್ ವಾಂಟೊ ಘೆತ್ಲೆಲ್ಯಾಂಕ್ ಎಲ್ಯೆರ್ ತಾಕೊಡೆ ಆನಿ ನಾನು ಮರೋಳ್ ಹಾಣಿಂ ಉಡಾಸಾಚಿ ಕಾಣಿಕ್ ಭೆಟಯ್ಲಿ.
ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಠಯ್ಲೆ
