[ಮಟ್ವಿ ಕಥಾ]: ಬರ್ಥ್ಡೇ ಗಿಫ್ಟ್...
[ಮಟ್ವಿ ಕಥಾ]: ಬರ್ಥ್ಡೇ ಗಿಫ್ಟ್... [ಪ್ರಸನ್ನ್ ನಿಡ್ಡೊಡಿ]
ಆಜ್ ಮ್ಹಜೊ ಜಲ್ಮಾ ದೀಸ್. ಹಾಂವ್ ಆಜ್ 68 ವರ್ಸಾಂಚೊ ’ಸೀನಿಯರ್ ಸಿಟಿಜನ್’! ಎಕ್ಸುರಿ ಜಿಣಿ ಮ್ಹಜಿ ಎಕಾ ಸಾಂಗಾತ್ಪಣಾಕ್ ಆಶೆತಾಲಿ. ಪತಿಣ್ ಸರೊನ್ ಚಾರ್ ವರ್ಸಾಂ ಜಾಲ್ಲಿಂ. ತಿ ಆಸ್ತಾನಾ ಹರ್ಯೆಕಾ ವರ್ಸಾ ಸಾಕಾಳಿಂ ಫುಡೆಚ್ ಗಾಲಾರ್ ಏಕ್ ನಾಜೂಕ್ ಕೀಸ್ ವೊಡುನ್ ಚ್ಹಾಯೆಚೆಂ ಕಪ್ ಹಾತಿಂ ದೀವ್ನ್ "ಹೆಪ್ಪಿ ಬರ್ಥ್ಡೇ" ಮ್ಹಣ್ ವಿಶ್ಶ್ ಕರ್ತಾಲಿ, ತೊ ಆಜ್ ಉಡಾಸ್ ಮಾತ್ರ್, ದೊಳ್ಯಾನಿಂ ದುಕಾಂ ಹಾಡೊಂವ್ಕ್!. ಸದಾಂ ಇಲ್ಲೆಂ ವ್ಯಾಯಾಮ್ ಕರುನ್ ಜೀವ್ ಸುಡ್ಸುಡಿತ್ ದವರಿಜಾಯ್ ಪಡ್ತಾಲೆಂ. ಪೂಣ್ ಸುಕ್ಲ್ಲ್ಯಾ ರುಕಾಕ್ ಕೀಡ್ ಲಾಗೊನ್ ಸುರ್ಯೊನ್ ವೆಚಾ ಪರಿಂ ಎಕ್ಸುರ್ಪಣಾಚಿ ಕೀಡ್ ಮ್ಹಾಕಾ ದೊಸ್ತಾಲಿ ತರ್ ಕಿತೆಂ ಕರುಂಕ್ ಜಾತಾ?
ಎಕ್ಲೊಚ್ ಪೂತ್ ರೂಡಿ ಆಮೆರಿಕಾಂತ್ ನವ್ಕರಿ ಕರ್ತಾ. ತಾಣೆ ಹಾಡ್ಲ್ಲ್ಯಾ ಕಂಪ್ಯುಟರಾ ಆನಿ ಮೊಬಾಯ್ಲಾದ್ವಾರಿಂ ಆಮ್ಚೊ ಸಂಪರ್ಕ್ ಹಪ್ತ್ಯಾಂತ್ ದೋನ್ ಪಾವ್ಟಿಂ ಪುಣಿ ಜಾತಾ.
ಹಾಂವ್ ತಾಕಾ ಮ್ಹಜೆಂ ಸಂಗಿ ಮುಂಬಯ್ ರಾವೊಂಕ್ ವತ್ತಾಯ್ ಕರ್ತಾಲೊಂ. ತರೀ ತಾಕಾ ಆಮೆರಿಕಾ, ಹುದ್ದೊ, ನವ್ಕರಿ ಸೊಡುಂಕ್ ನಾಕಾ.
ಆಜ್ ಸಕಾಳಿಂ ಉಟ್ಲ್ಲೊಂಚ್ ನಿರ್ಧಾರ್ ಕೆಲ್ಲೊ, ಹಾಂವ್ ಪುತಾಕ್ ಆಜ್ ಫೊನ್ ಜಾಂವ್ ಇಮೈಲ್ ಜಾಂವ್ ಕರ್ಚೊನಾ, ತಾಕಾ ಮ್ಹಜ್ಯಾ ಜಲ್ಮಾ ದಿಸಾಚೊ ಉಗ್ಡಾಸ್ ತರೀ ಆಸಾಗೀ ಪಳೆಂವ್ಕ್ ಜಾಯ್. "ತೊ ಖಂಡಿತ್ ವಿಸರ್ಚೊ ನಾ" ಮ್ಹಜ್ಯಾ ಪುತಾ ಥಂಯ್ ಮ್ಹಾಕಾ ಅಭಿಮಾನ್ ಆನಿ ಭರ್ವಸೊ ಆಸ್ಲ್ಲೊ. ತಾಚಿ, ತಾಚ್ಯಾ ಕಾಮಾಚಿ, ತಾಚ್ಯಾ ಕಂಪ್ಣೆಚಿ ಜವಾಬ್ದಾರಿ ಹಾಂವ್ ಜಾಣಾ. ತರೀ ಹಾಂವ್ ಪುತಾ ಥಾವ್ನ್ ಮೆಳ್ಚೊ ಮೋಗ್ ಆಶೆತಾಲೊಂ!.
ಥೊಡೆ ಪಾವ್ಟಿಂ ರೂಡಿಯ್ ತಾಚ್ಯಾ ಜಾವಾಬ್ದಾರೆ ನಿಮ್ತಿಂ ಮ್ಹಾಕಾ ಫೊನ್ ಯಾ ಇಮೈಲ್ ಕರುಂಕ್ ವಿಸರ್ತಾಲೊ. ಹಾಂವ್ ಚಿಂತಾಲೊ ಮ್ಹಜೊ ಪೂತ್ ಇತ್ಲೊ ಬಿಜಿ? ಮ್ಹಾಕಾ ಉಡಾಸ್ ಹಾಡ್ತಾಲೊ ಮ್ಹಜೆ ಆದ್ಲೆ ದೀಸ್." ಮ್ಹಜಾಯ್ ತರ್ನಾಟ್ಪಣಾರ್ ಹಾಂವೆ ಆಸೆಂಚ್ ಕೆಲ್ಲೆಂ ನಾ? ಮ್ಹಜ್ಯಾ ಆವಯ್-ಬಾಪಾಚೆಂ ಗಣ್ಣೆ ಹಾಂವೆ ಕೆಲ್ಲೆಂ ಆಸಾ?"
ದೀಸ್ ಆತಾಂ ದನ್ಪಾರ್ ಜಾಲ್ಲೊ, ಜೆವಾಣ್ ಕರುನ್ ಆಡ್ ಪಡ್ಲ್ಯಾರೀ ನೀಡ್ ಪಡ್ಲಿನಾ. ಪುತಾಚ್ಯಾ ಸಂದೇಶಾಕ್ ರಾಕ್ತಾಲೊಂ. ರೂಡಿ ಆಜ್ ಚಡ್ಚ್ ಬಿಜಿಗಾಯ್? ವೊಡ್ನಾ, ಸಾಂಜೆರ್ ತರಿ ಸಂದೇಶ್ ಧಾಡ್ತಾಲೊ ಮ್ಹಣ್ ಮ್ಹಾಕಾಚ್ ಸಮಾಧಾನ್ ಕೆಲೆಂ.
ದೀಸ್ ಬುಡ್ಲ್ಲೊ, ರಾತಿಂಚಿಂ ವರಾಂ ನೋವ್ ಜಾಲ್ಲಿಂ. ಪೂಣ್ ರೂಡಿ ಥಾವ್ನ್ ಫೊನ್ ಜಾಂವ್ ಇಮೈಲ್ ಜಾಂವ್ ಆಯ್ಲೆನಾಂ. ಹಾಂವ್ ಆತಾಂ ಸಗ್ಳೊಚ್ ಕಾಲುಬುಲೊ ಜಾಲ್ಲೊಂ. ಲ್ಹಾನ್ ಆಸ್ತಾಂ ರೂಡಿಕ್ ದಿಲ್ಲೊ ಮೋಗ್, ತ್ಯಾಗ್, ಸವ್ಲತ್ಯೊ ಮತಿ ಪಡ್ದ್ಯಾರ್ ಧೊಸುಂಕ್ ಲಾಗ್ಲ್ಲ್ಯೊ.
ಆನಿ ಆಖ್ರೇಕ್ ಹಾಂವೆಂಚ್ ಸಲ್ವಣಿ ಮಾಂದುನ್ ಘೆವ್ನ್ ರೂಡಿಕ್ ಫೊನ್ ಘುಂವ್ಡಾಯ್ಲೆಂ.
"ಹಲೊ..."
"ಹಲೊ.. ರೂಡಿ ಹಿಯರ್"
ಮ್ಹಜೊ ತಾಳೊ ಸುಟ್ಲೊಚ್ ನಾ ಕಾಂಪ್ತಾಲೊ, "ಹಲೊ, ಹಲೊ ಡ್ಯಾಡ್ ಆರ್ ಯು ದೇರ್, ಕಿತ್ಯಾಕ್ ರಡ್ತಾಯ್ ಡ್ಯಾಡ್... ಹಾಂವ್ ಇಲ್ಲೊಸೊ ಬಿಜಿ ಆಸ್ಲ್ಲೊಂ... ಅರ್ ಯು ಆಲ್ರಾಯ್ಟ್?"
" ನತ್ತಿಂಗ್ ರೂಡಿ , ಐ ಎಮ್ ಆಲ್ರಾಯ್ಟ್, ಜಸ್ಟ್ ಒಪನ್ ದ ಇಮೈಲ್".. ಹಾಂವೆಂ ರಿಸೀವರ್ ಸಕ್ಲಾ ಘಾಲೆಂ.
ಮ್ಹಜ್ಯಾ ದೊಳ್ಯಾನಿಂ ದುಕಾಂಚ್ಯೊ ಝರಿಚ್ ವ್ಹಾಳ್ಳ್ಯೊ, "ಮ್ಹಜ್ಯಾ ಪುತಾಕ್ ಆಜೂನ್ ಮ್ಹಜ್ಯಾ ಜಲ್ಮಾ ದಿಸಾಚೊ ಉಗ್ಡಾಸ್ ನಾ?"
ಪಾಂಚ್ ಮಿನುಟಾಂ ಚಿಂತ್ನಾವೀಣ್ ಸರ್ಲಿಂ.
ಫೊನ್ ಪರತ್ ಆವಾಜ್ಲೆಂ "ಹಲೊ ಡ್ಯಾಡ್.. ಮೆನಿ ಮೆನಿ ಹೆಪ್ಪಿ ರಿಟರ್ನ್ಸ್ ಒಫ್ ದ ಡೇ, ಐ ಎಮ್ ಸೊರ್ರಿ ಡ್ಯಾಡ್".. ರೂಡಿ ರಡ್ತಾ ತಸೆಂ ಭಗ್ಲೆಂ ಮ್ಹಾಕಾ. "ಸೊರ್ರಿ ಡ್ಯಾಡ್ ಹಾಂವ್ ಖರೆಂಚ್ ವಿಸ್ರಾಲ್ಲೊಂ, ತುಜೆಂ ಇಮೈಲ್ ಆತ್ತಾಂ ಚೆಕ್ ಕೆಲೆಂ... ಡ್ಯಾಡ್... ಮ್ಹಾಕಾ ಆತಾಂ ಸಾಂಗ್, ಕಿತೆಂ ಗಿಫ್ಟ್ ತುಕಾ ಜಾಯ್?"
"ಪುತಾ... ಹಾಂವೆ ವಿಸಾರ್ಲ್ಲೆಂ ಗಿಫ್ಟ್ ಮ್ಹಾಕಾ ದಿಶಿಗೀ?"
"ಜಸ್ಟ್ ವಿಸಾರುನ್ ಪಳೆ ಡ್ಯಾಡ್"... ರೂಡಿಚೊ ತಾಳೊ ಧೃಡ್ ಲಾಗ್ತಾಲೊ.
"ಐ ವೋಂಟ್ ಯು ಟು ಬಿ ಹಿಯರ್ ವಿದ್ ಮಿ ಸನ್"... ಮ್ಹಾಕಾ ಮುಕಾರ್ ಉಲಂವ್ಕ್ ಜಾಲೆಂನಾ, ದುಕಾಂ ಝರಿ ಮ್ಹಜ್ಯಾ ಗಾಲಾಂ ಥಾವ್ನ್ ನಿಸರ್ತಾಲಿ.
ಹಾಂವ್ ಫೊನ್ ಸಕಯ್ಲ್ ದವರ್ತಾನಾ ಹಾಂವ್ ಸಂತೊಸಾನ್ ಫುಲ್ಲ್ಲೊಂ.... ರೂಡಿಚಿಂ ಉತ್ರಾಂ ಮ್ಹಜ್ಯಾ ಕಾನಾಂತ್ ಪರತ್ ಪರತ್ ಪ್ರತಿಧ್ವನಿತ್ ಜಾಲಿಂ..... "ಐ ಪ್ರೊಮಿಸ್ ಡ್ಯಾಡ್........"!
***000***
ಪ್ರಸನ್ನ್ ನಿಡ್ಡೊಡಿ: ಲಿಖ್ಣೆನಾಂವಾಖಾಲ್ ಬರಂವ್ಚೊ ಹಿಲರಿ ಡಿ’ಸಿಲ್ವಾ ಪಾಟ್ಲ್ಯಾ ತೀಸ್ ವರ್ಸಾಂಥಾವ್ನ್ ಕಾಣಿ, ಕವಿತಾ, ಲೇಖನಾಂ ಬರಯ್ತಾ. ನಾಟಕಿಸ್ತ್, ನಿರ್ದೇಶಕ್ ತಶೆಂಚ್ ವಾವ್ರಾಡಿ ಜಾವ್ನಾಸ್ಚೊ ಹೊ ಪಯ್ಣಾರಿ.ಕೊಮ್ಚೊ ಸಹ-ಸಂಪಾದಕ್ ಜಾವ್ನಾಸ್ಚ್ಯಾ ಹಾಚ್ಯಾ ಕವಿತೆಂಚೊ ಜಮೊ ’ತಾನ್’ 2018 ಇಸ್ವೆಂತ್ ಪರ್ಗಟ್ಲಾ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯ್ಲ್ಯಾಂತ್. ಕೊಂಕ್ಣೆಶಿವಾಯ್ ಹಿಂದಿ, ಇಂಗ್ಲಿಶಾಂತ್ ಸಯ್ತ್ ಅಪ್ರೂಪ್ ಬರಂವ್ಚೊ ಪ್ರಸನ್ನ್ ನಿಡ್ಡೋಡಿ ಅಪ್ಲ್ಯಾ ಕುಟ್ಮಾಸವೆಂ ಮುಂಬಯ್ಚ್ಯಾ ಮಿರಾರೋಡ್ ಗಾಂವಾಂತ್ ವಸ್ತಿ ಕರುನ್ ಆಸಾ.
ಹೆರ್ ಚಿಕ್ಣಿಕಥಾ
