[खबर] राश्ट्रीय डिजिटल कामासाळ कथापाठ (शिंकळ - ६) समरोपी वेबिनार
राश्ट्रीय डिजिटल कामासाळ कथापाठ (शिंकळ - ६) समरोपी वेबिनार
२३ अगोस्त २०२५: जुलाय २६ तारिकेर सन्वारा सां| लुवीस युनिवर्सिटी मंगळूर हांचे कुलपती मा| दो| प्रवीण मार्टीस हांचेथावन उग्तावण जाल्लें, आशावादी प्रकाशनान मांडून हाडल्लें राषट्रीय मट्टाचें कथा अध्ययनाचें डिजिटल कामासाळ कथापाठ शिंकळ-६ चें समरोपी वेबिनार अगोस्त २३ तारिकेर सांजेर ४ वोरांचेर धेंपे कोलेजिचो प्रिन्सिपाल प्रोफेसर दो.पी. एस. रामुमूर्तिच्या अध्यक्षपणाखाल चल्लें. पयणारी वर्साचो कथाकार २०२५ पुरसकारीत मा.बा.चेतन लोबोच्या ’एक नवो संसार’ पुस्तकांतल्या कथेंनी ’तार्किकता, वयचारिकता, समाजिकता आनी आध्यात्मिकता’ अशें च्यार वेबिनारांनी च्यार प्रपत्रां सादर जालीं.
२ अगोस्त वेबिनार: विशय: एक नवो संसार पुस्तकांतल्या कथेंनी तार्किकता, प्रपत्र: मेगान डे सोज, निरीक्षक: शैलेंद्र मेहता, गोंय
९ अगोस्त वेबिनार: विशय: एक नवो संसार पुस्तकांतल्या कथेंनी वयचारिकता, प्रपत्र: मा.बा. रोमन रोड्रिगस, निरीक्षक: हिलरी डिसिलवा, मुंबय
१६ अगोस्त वेबिनार: विशय: एक नवो संसार पुस्तकांतल्या कथेंनी समाजिकता, प्रपत्र: देविता खुळे, निरीक्षक: शैलेंद्र मेहता, गोंय
२३ अगोस्त वेबिनार: विशय: एक नवो संसार पुस्तकांतल्या कथेंनी आध्यात्मिकता, प्रपत्र: मा.बा.जेसन पिंटो (सादरीकरण: सान्सिको डायस), निरीक्षण: आंडऱ्यू एल. डी’कुन्हा, मंगळूर
शैलेंद्र मेहतान येवकाराचें उलवप करून, शिक्षण मनशाच्या चिंत्पाचेर उज्वाड फांकवंक सक्ता आनी समाजेक बरी वाट दीवंक सक्ता आनी ह्या दिशेन कथाकाराची मुळावी जवाभदारी महत्वाची. कथापाठ ह्या दिशेन कोंकणिच्या वेग-वेगळ्या लिपिंनी आसचा उत्तीम कथाकारांची तशेंच तांच्या साहित्याची ओळोक करून दिता म्हणालो. नाम्नेचो कवी, कथाकार, विशलेषक आंडऱ्यू एल. डी’कुन्हान प्रस्तावीक उलवप करून चेतन कापुजीन हांच्या कथेंनी सक्रियता (Activism) विश्याचेर खोलायेन केल्लें अध्ययन प्रसतूत करून म्हणालो; एक धार्मीक याजक जावनयी तांच्या बर्पांनी उटोन दिसची सामाजीक काळजी तशेंच हुसको वाखणचेतसलो. धर्म आनी आध्यात्मिकता दोन वेग-वेगळें, चेतन कापुजीन हांच्या बर्पांनी; जांव कथा वा संपादकीयांनी वेग-वेगळ्या रितिंनी आध्यात्मिकता भोव परिपकव रितीन आसा म्हणालो तशेंच कोंकणी साहित्यांत संघरष ना म्हणच्या आड-वादाद अपवाद म्हणचेपरीं चेतन कापुजिनाच्या कथेंनी हें जिण्ये संघरष दाटायेन आसचें गमता. आनीं असल्या कथेंक बरंवचा कथाकाराच्या पुस्तकाचेर इतल्या खोलायेन राषट्र मट्टाचें अध्ययन कामासाळ चल्चें खरेंच कसल्याय पुरसकाराच्याकी वर्तें म्हणालो.
दो.रामू मूर्तीन पाटल्या स वर्सांनी कथापाठ वेबिनार शिंकळ आयोजीत कर्च्या आशावादी प्रकाशनासवें धेंपे कोलेजिचें समजिकायेचें खरार (MOU) आसलेवर्वीं फकत धेंपे कोलेजिच्या विध्यार्थिंक मात्र सीमीत नासतां, गोंयच्या हेर सभार कोलेजिंनी शिकचा विध्यार्थिंक सयत हाचो फायचो लाभला. ह्या वेबिनारांनी सादर जाल्लीं अमोलीक प्रपत्रां एका पुस्तकारुपार पर्गटून येंवची गर्ज आसा तशेंच असलीं उपक्रमां फुडेंय मांडून हाडपाची गर्ज आसा, समग्र कोंकणिची गिरेस्तकाय आमी समजुंची गर्ज आसा म्हणालो.
मा.चेतन लोबोच्या कथेंनी ’आध्यात्मिकता’ विश्याचेर मा.बा.जेसन लोबोचें प्रपत्र रोसरी कोलेजिचो प्राध्यापक सान्सिको लोबोन सादर केलें. कोंकणी अकाडेमी गोंय-चो अध्यक्ष दो.पूर्णानंद चारीन अपल्या उलवपांत ’कथापाठ उपक्रम कसो विस्तार कोंकणिच्या वेग-वेगळ्या कथाकारांची आनीं कथेंची ओळोक करून दिता, तेचपरीं कोंकणिचो फुडार घट कर्चा इराद्यान एकामनान आमी लागीं येवन वावर कर्पाची गर्ज आसा. ह्या दिशेन पाटल्या कांय तेंपाथावन वावर कर्चा आशावादी प्रकाशनाक परबीं’ म्हणालो.
कथापाठ शिंकळेचो सह-भागित्व केल्ल्या वीज ई-पत्राचो संपादक दो.आसटीन डिसोज प्रभून अपल्या उलवपांत ’कोंकणी साहित्याक इतलो बरो मान आनी गवरव लाभचो एकारितीन कोंकणीक लाभचो मान. ह्या वावराक मुखारून वर्चो आनी हाचो फायदो कोंकणीक लाभचो. ह्या दिशेन आशावादी प्रकशनान केल्लो वावर, प्रत्येक जावन डिजिटल माध्यमांत तरयी कोणेंच करुंक ना’ म्हणालो.
बाय दो.चंद्रलेख डिसोजान अपल्या उलवपांत ’आध्यात्मिकता’ म्हळ्ळो सब्ध ’आदी + आत्म चिंतन’ म्हळ्ळ्या दोन सब्धांक आटाप्ता. म्हळ्यार पयलें स्व-अवलोकन भोव गर्जेचें. आनी कोंकणीक हें भोव गर्जेचें. कोंकणी साहित्यांत सक्रियता गर्जेची’ म्हणाली.
गोंयचा आल्टिन्हो कोलेजिचो आधलो प्रिन्सिपाल बाब विल्ली गोयेसान अपल्या उलवपांत म्हणालो; ’कोंकणी साहित्याचेर इतल्या खोलायेन अध्ययन जाता म्हळ्ळी खबर आसली पूण आयज ह्या वेबिनारांत वांटेली जाल्ल्यान ह्या अध्ययनाचो फायदो कितलेश्यांक जोडुंक साध्य आसा, आनी असलीं उपक्रमां कोंकणिंत जांवची गर्ज आसा’ म्हणालो.
कोंकणी लेखकांच्या एक्ताराचो अध्यक्ष गौरीश वेर्णेकरान अपल्या उलवपांत म्हणालो; "कथापाठाच्या सर्व वेबिनारांनी हाजर जावंक अपणाक जावंक ना तरयी ह्या अधय्यनांनी पाटल्या कांय वर्सांनी वांटेली जालेल्या जायत्या विध्यार्थिंनी जोडलल्या जाण्वायेविशीं अपणाक माहेत आसा, खरेंच जावन आयच्या काळार असलिंच जायतीं अधयन कामासाळां जावपाची गर्ज आसा. ह्या दिशेन आशावादी प्रकाशनाच्या वावराक अपणाचो तेंको आस्तलो" म्हणालो.
मा| चेतन लोबोन अपल्या उलवपांत म्हळें; "पाटल्या पंद्रा-वीस वर्साधीं हांवें बरयिल्ल्या कथेंचेर सादर जाल्लीं एकेक प्रपत्रां पळेताना, हांवें कथा बरंवचा वेळार म्हजी मनोगत आनी परिस्थिती, संधरब कसो आसलो म्हळ्ळो उडास आयलो. हांवें केदिंच चिंतुंक ना, एका दिसा म्हज्या कथेंचेर असलें एक अध्ययन चल्तलें आनी म्हज्या कथेंच्या वेग-वेगळ्या आयामांचेर खोलायेन अध्ययन केल्लीं प्रपत्रां सादर जातलीं म्हण. हांव संपादक व्हय पूण मुळान हांव एक कथाकार जाल्ल्यान म्हाका आवडचो प्रकार कथा. खरेंच जावन एका कथाकाराक हाच्याची व्हड पुरसकार ना. ह्या दिशेन वावर केल्ल्या आशावादी प्रकाशन तशेंच ताच्या सर्व सह-भागिदारांक म्हजे खल्ते धिन्वास" म्हणालो
कथापाठ शिंकळ ६ च्या वेबिनारांनी हाजर जावन अपणाक जोडललो अनभोग खरोच वर्तो. असलीं वेबिनारां फुडेंय जावंक जाय आनी कन्नड लिपिंतल्या हेर उंचल्या कथाकारांची तशेंच तांच्या कथेंची ओळोक आमकां जावपाक जाय म्हण विध्यार्थिंनी; सलोनी धुमासकर (धेंपे कोलेज), मेलबा कार्डोज (कार्मेल कोलेज), रोहिणी मुर्गांवकार (गोंय विध्यापीठ) अपले अनभोग उचारले.
धेंपे कोलेजिच्या कोंकणी विभागाची मुखेसत बाय अंजू साखरदांडेन धिन्वास पाठयले. धेंपे कोलेजिची प्राध्यापकी बाय विधिता शेट हिणें वेबिनाराचें सूत्र-संचालन केलें.
(कथापाठ शिंकळ ६ चो प्रायोजक मानेस्त मायकल डिसोज आनी कुटम, दुभाय)
[Khobor] KOTHAPATT (Raxttri-i Webinar) Xinkoll 6.
कथापाठ शिंकळ - VI
