ಉಪ್ರೆ (- ಸಂಗೀತಾ ನಾಯ್ಕ್)

[ಕವಿತಾ] ಉಪ್ರೆ (- ಸಂಗೀತಾ ನಾಯ್ಕ್)

ಜೆದ್ನಾಂ ಅಮಿ ಆಮ್ಚೆ ಪಯ್ಕಿಂತ್ ಪರ್ಕಿ ಜಾತಾನಾ ಬಾಕಿಚೆಂ ಕಿತೆಂ ಉರ್ಲೆಂ? ಹೆಂ ಪ್ರಶ್ನ್ ದರೆಕಾ ಮನ್ಶಾಚಿ ಮನಾಚಿ ಶಾಂತಿ ಕದ್ವಳುಂಕ್ ಸಕ್ತಾ. ಪುಣ್ ಹಾಂಗಾಸರ್ ಅಪ್ಲ್ಯಾ ಮಾಯ್‌ಗಾಂವ್ಚೊ; ಜಾಂವ್ ಖಾಣಾಚೊ, ಸೆಂವ್ಚ್ಯಾ ಉಸ್ವಾಸಾಚೊ, ದೊಳ್ಯಾಂನಿ ದಿಸಾನಾಸ್ಚ್ಯಾ ಶೆತಾಂ-ಭಾಟಾಂಚೊ, ಕಾನಾಂನಿ ಸಾದ್ಚ್ಯಾ ದರ್ಯಾಚೊ ಗಾಜ್ ಇತ್ಲೊಯ್ ಭರುನ್ ಗೆಲಾ ಮ್ಹಳ್ಯಾರ್ ಸಂಸಾರಾಚ್ಯಾ ಖಂಚ್ಯಾಯ್ ಕೊನ್ಶ್ಯಾಕ್ ಪಾವ್ಲ್ಯಾರ್ ಅಪ್ಲ್ಯಾ ಮಾಯ್‌ಗಾಂವ್ಚ್ಯೊ ಯಾದಿ ಉಮಾಳುನ್ ಯೆತಾನಾ ಖರೆಂಚ್ ಕಿತೆಂ ಹಾಂವ್ ಉಪ್ರೆ ಮ್ಹಣಜೆ ಭಾಯ್ಲೆ ವ ಪರ್ಕಿ (stranger) ಮ್ಹಳ್ಳೆಂ ಚಿಂತಪ್ ಸಹಜ್ ಥರಾನ್ ಮತಿಂತ್ ಉಭ್ಜತಾ.

ಕವಿ ಬಾಯ್ ಸಂಗೀತಾ ನಾಯ್ಕಾಚಿ ಹಿ ಕವಿತಾ ಖರಿಚ್ ಜಾವ್ನ್ ಪರತ್ ಪರತ್ ವಾಚುಂಕ್ ಲಾಯ್ತಾ ಆನಿ ಎಕೇಕ್ ಪಾವ್ಟಿಂ ಎಕೇಕ್ ಕಾಣಿ ಮತಿಚ್ಯಾ ಪಡ್ದ್ಯಾಚೆರ್ ಹಾಡುನ್ ಯೆತಾ. ಎಕಾ ಬರ್‍ಯಾ ಕವಿತೆಚಿಂ ಲಕ್ಶಣಾಂ ಸಯ್ತ್ ತಿಂಚ್. ಆತಾಂ ಬಾಕಿಚೆಂ ಪಾರ್ಕುಂಕ್ ತುಕಾಚ್ ಸೊಡತಾಂ.

[ಕವಿತಾ] ಉಪ್ರೆ (- ಸಂಗೀತಾ ನಾಯ್ಕ್)

ಉಪ್ರೆ

ಸಂವ್ಸಾರಾಂತ್ ಖಯುಯ್ ಗೆಲೆ

ಜಾಲ್ಯಾರ್ ಹಾಂವ್ ಉಪ್ರೆ....

ಗೊಯ್ ಮಾಯೆ ಹಾಂವ್

ತುಜೆಚ್ ಗೆ ಝಿಪ್ರೆ!

ರುಚ್ಚೀಕ್ ಖಾಣಾ ಸೊದತ್ ಭೊವ್ಲೆ

ಸಂಸಾರಾಚೆ ಕೊನ್ಶೆ.....

ಜೀಬೆರ್ ಮಾತ್ ಘೊಳತ್ ರಾವ್ಲೆ

ಹಾಂಗ್ಚೆ ಪಾವ್ ಹುನ್ಶೆ

ರೆವ್ಟ್ , ಹಿಮ್ ಮಾಡ್ಡಯತನಾ

ಮನಯ್ಲೊ ಪೊಟಾಂತ್ಲ್ಯಾನ್ ಹರ್ಷ್ ...

ಶಿರಂತರಾನಿ ಮಾತ್ ಭರೂನ್ ರಾವ್ಲಾ

ತುಜೆ ಒಲೆ ರೆವೆಂಚೊ ಸ್ಪರ್ಶ್

ಡೊಳ್ಯಾನಿ ಪೀಯೆತ್ ರಾವ್ಲೆ

ಜೆ ಜೆ ಭವ್ಯದಿವ್ಯ್ ಮ್ಹಾನ್....

ಮನಾಕ್ ಮಾತ್ ಸಾಸ್ಣಾಚಿ

ವೆಳೊ, ಶೆತಾ-ಭಾಟಾ ಆನಿ

ಕುಳಾಗರಾಂಚಿ ತಾನ್

ತರ್ತರಾನಿ ಕೆಲಿ ರಿಜವ್ಣ್

ಆಯ್ಕತ್ ಸಂಗೀತ್ ಸ್ವರ್-ಸಾಜ್ …

ಕಾನಾಂನಿ ಮಾತ್ ಸಾದತ್ ರಾವ್ಲಾ

ಮಾಯೆಚೊ ದರ್ಯಾ ಗಾಜ್

ಧುಂದ್ ಫುಂದ್ ಘೆತ್ಲೆ ಕೀತ್ಲೆ

ಅರ್ಣಯಿ ಸುಗಂಧ್ ….

ಯಾದ್ ಮಾತ್ ಯೆತ್ ರಾವ್ಲೊ

ಭೂಯ್ಚಾಫೊ ಮಂದ್

ಪಂಚೆದ್ರೀಯಾಂನಿ ತುಜೀಚ್ ಸಾಸಾಯ್

ಬಸ್ಲ್ಯಾ ಮಾರೂನ್ ಠಾಣ್….

ವಿಶ್ವ್ ಜರಿ ಘರ್ ಮ್ಹಜೆ

ಮಾಯೆ ತೂಚ್ ಪಂಚ್ಪ್ರಾಣ್

ದೆಖೂನ್…

ಸಂವ್ಸಾರಾನ್ ಖಯುಯ್ ಗೆಲೆ

ಜಾಲ್ಯಾರ್ ಹಾಂವ್ ಉಪ್ರೆ....

ಗೊಯ್ ಮಾಯೆ ಹಾಂವ್

ತುಜೆಚ್ ಗೆ ಝಿಪ್ರೆ!

(ಉಪ್ರೆ - outsider, one who is/feels out of place, ಝಿಪ್ರೆ - Vagabond/wanderer )

- ಸಂಗೀತಾ ನಾಯ್ಕ್. [ಜನೆರ್, 2020]