ಸರ್ವಿಸೀಂಗ್ [ ಜೊಸ್ಮಿತಾ ಫೆರ್ನಾಂಡಿಸ್]

ಆಯ್ಚೊ ಕಾಳ್ ಮೋಡರ್ನ್ ಕಾಳ್. ದೆಕುನ್ ಕಾನಾಚೆ ಕಾನ್ಪೆ ಕಾಡ್ಚೆ ಥಾವ್ನ್ ಪಾಂಯಾಂಚ್ಯೊ ನಾಕ್ಶ್ಯೊ ಸೊಭಂವ್ಕ್ ಸಯ್ತ್ ಅಪ್ಲ್ಯಾ ಘರಾಚ್ ಬೊಸೊನ್ ಫಕತ್ ಮೊಬಾಯ್ಲಾಚೆರ್ ತೆಂ ಕಾಮ್ ಕರ್ತೆಲ್ಯಾಂಕ್ ಆಪವ್ಯೆತ್. ತಕ್ಲೆಚೆಂ ಮಸಾಜ್ ಜಾಂವ್, ಆಂಗಾಚೆಂ ಮಸಾಜ್ ಜಾಂವ್ ಹರೇಕ್ ಥರಾಚಿ ಸೆವಾ ಆಜ್‌ಕಾಲ್ ಲಾಭ್ತಾ. ಪುಣ್ ಹ್ಯಾ ಕೃತಕ್ ಜಿವಿತಾಂತ್ ಸಯ್ತ್ ಮನ್ಶಾಕ್ ಮೋಗ್ ಮ್ಹಳ್ಳೊ ಅಜೂನ್ ಸಹಜ್ ಪ್ರಕ್ರಿಯಾ ದೆಕುನ್ ಮನ್ಶಾಕ್ ಮೋಗ್ ಸಹಜ್ ರಿತಿನ್ ಜಾಂವ್ಕ್ ಜಾಯ್ ಮ್ಹಳ್ಳೆಂ ಚಿಂತಾಪ್ ಅಪುರ್ಭಾಯೆನ್ ಉಭ್ಜಾಂವ್ಚಿ ಕವಿತಾ ಘೆವ್ನ್ ಆಯ್ಲ್ಯಾ ಬಾಯ್ ಜೊಸ್ಮಿತಾ ಫೆರ್ನಾಂಡಿಸ್.

ಎಮ್.ಎ. ಪದ್ಯುತ್ತರಾಚೆಂ ಶಿಕಪ್ ಜೊಡುನ್ ಗೊಯಾಂತ್ ಶಿಕಂವ್ಚಿ ಹಿ ಕೊಂಕಣಿ ಕಾರ್ಯಾಂನಿ ಸಕ್ರಿಯ್. ಸೊಂಪೆ ವಿಚಾರ್ ಪುಣ್ ಮನ್ಶಾಪಣಾಕ್ ಲಗ್ತಿ ಜಾಲ್ಲೆ ದೆಕುನ್ ಹಿಚಿ ಕವಿತಾ ಸೊಂಪಿ ಮ್ಹಣ್ಚೆಪರಿಂ ನಾ. ಆತಾಂ ಹ್ಯಾ ಕವಿತೆಚಿ ಸೊಭಾಯ್ ಚಾಕುಂಕ್ ತುಕಾಚ್ ಸೊಡ್ತಾಂ

[ಕವಿತಾ] ಸರ್ವಿಸೀಂಗ್ [ ಜೊಸ್ಮಿತಾ ಫೆರ್ನಾಂಡಿಸ್]

ಸರ್ವಿಸೀಂಗ್

ಲಗ್ನಾ ಪಯ್ಲಿ ಜಾವಂ

ಲಗ್ನಾ ಉಪ್ರಾಂತ್ ಜಾವಂ

ಮೊಗಾಚೆಂ ಸರ್ವಿಸೀಂಗ್ ಕರೂನ್ ಘೆವ್ಚೆಚ್ ಪಡ್ಟಾ

ಮೊಗಾಕ್ ತಾನ್ ಲಾಗ್ತಾ...

ಭೂಕ್ ಲಾಗ್ತಾ...

ತಿಕಾ ಪೆಟ್ರೊಲ್-ಡಿಜಲ್-ಎಯ್ಲ್ ಘಾಲೂನ್

ಚಲೊವ್ಚೆಚ್ ಪಡ್ಟಾ

ಮೊಗಾಕ್ ಥಂಡಿ ಜಾತಾ...

ಜೊರ್ ಯೆತಾ...

ಹಿ ಥಂಡಿ, ಹೊ ಜೊರ್

‘ಹಾಯ್ ಟಾಯ್ಡ್’ ಜಾವ್ನ್

ತಕ್ಲೆರ್ ಚಡ್ಟಚ್

ಮೊಗಾಕ್, ದೊತೊರಾಗೆರ್ ವ್ಹರ್ಚೆ ಪಡ್ನಾ

‘ಮೂಡ್’ ಸಾರ್ಕೊ ಕರೂನ್ ಘೆವ್ಕ್

‘ಡೆಟೀಕ್’ ವ್ಹರ್ಚೆ ಪಡ್ಟಾ

ಲಗ್ನಾ ಆದಿ, ವ್ಹಕ್ಲೆ-ನ್ಹರ್ಯಾಚಿ

ಮೊಗ್ಯಾಂಚಿ...

ಲಗ್ನಾ ಉಪ್ರಾಂತ್

ಘೊವ್-ಬಾಯ್ಲೆಚಿ...

ಕೆಸ್ತಾವಾಂ ಸೊಡೊವಂಕ್,

ರಾಗಾವ್ಲ್ಯಾರ್- ದುಖವ್ಲ್ಯಾರ್

ಝಗಡ್ಲ್ಯಾರ್- ರಡ್ಲ್ಯಾರ್

ಬೆಜಾರ್ಲ್ಯಾರ್...

ಅಶಿ ಕಿತ್ಲೀಶೀಚ್ ಸರ್ವಿಸೀಂಗಾಂ

ಲಗ್ನಾ ಪಯ್ಲಿ ಆಸುಂ

ಲಗ್ನಾ ಉಪ್ರಾಂತ್ ಆಸುಂ

ಹೆಚ್ ಮೊಗಾಚ್ಯಾ ತುಫಾನಾಕ್

ಎಫಲಾಯನ್ ಆಶಿಲ್ಲೆ ಎನಲಾಯನ್ ಹಾಡೂಕ್

ಕೆನ್ನಾ-ಕೆನ್ನಾ ಎಫಲಾಯನ್ ವಚ್ಪಿ ಮೊಗಾಕ್

ಎನಲಾಯನ್ ಹಾಡ್ಚೆಚ್ ಪಡ್ಟಾ

ಮೊಗಾಚೊ ಸ್ರ್ಕು ಟಾಯ್ಟ್ ಕರುಂಕ್,

‘ಶೌರುಮಾಂತ್’ ವ್ಹರ್ಚೆಂ ಪಡ್ಟಾ

ಮೊಗಾಚೆಂ ಸರ್ವಿಸೀಂಗ್ ಕರೂಂನ್ ಘೆವ್ಚೆಚ್ ಪಡ್ಟಾ

ಮೊಗಾಕ್ ತಾನ್ ಲಾಗ್ತಾ...

ಭೂಕ್ ಲಾಗ್ತಾ...

ತಿಕಾ ಪೆಟ್ರೊಲ್-ಡಿಜಲ್-ಎಯ್ಲ್ ಘಾಲೂನ್

ಚಲೊವ್ಚೆಚ್ ಪಡ್ಟಾ

ಮೊಗಾಕ್ ಸರ್ವಿಸೀಂಗ್ ಜಾಯ್ಚ್ ಆಸ್ತಾ.

- ಜೊಸ್ಮಿತಾ ಫೆರ್ನಾಂಡಿಸ್ [ಮಾರ್ಚ್, 2019]

ಜೊಸ್ಮಿತಾ ಫೆರ್ನಾಂಡಿಸ್: ಎಮ್.ಎ. ಪದ್ಯುತ್ತರ್ ಶಿಕಪ್ ಜೊಡುನ್ ಗೊಯಾಂತ್ ಶಿಕಂವ್ಚಿ ಹಿ ಕವಿತಾ, ಲೇಖನಾಂ ತಶೆಂಚ್ ಕಾಣಿಯೊ ಬರಯ್ತಾ. ರಾಶ್ಟ್ರೀಯ್ ಕಾರ್ಯಾಸಾಳಾಂನಿ ಪ್ರಬಂಧ್ ಸಾದರ್ ಕೆಲ್ಯಾತ್. ಸಭಾರ್ ಬರ್ಪಾಂ ಪರ್ಗಟ್ಲ್ಯಾಂತ್, ಕವಿಗೋಶ್ಟಿಂನಿ ವಾಂಟೊ ಘೆತ್ಲಾ. ಗೊಂಯಾಂತ್ ಕೊಂಕಣಿ ಕಾರ್ಯಾಂನಿ ಸಕ್ರಿಯ್ ರಿತಿನ್ ವಾಂಟೊ ಘೆತಾ.