ಅತಿವಾಸ್ತವ್ ದೈವ್‌ಗತಿ [ ಶೈಲೆಂದ್ರ್ ಮೆಹ್ತಾ]

ಕಾಂಯ್ ತೆಂಪಾಥಾವ್ನ್ ಕವಿತೆಚೆಂ ಆಮಾಲ್ ಸೆಂವ್ಕ್ ಅತ್ರೆಗೊನ್ ಆಸ್ಲೊಂ ಹಾಂವ್ ಹಿ ಕವಿತಾ ವಾಚುನ್ ವಾಚುನ್ ಕಾಂಯ್ ಕವಿತೆಚೊ ಬೆಬ್ದೊಚ್ ಕಸೊ ದಿಸ್ಲೊಂ. ಕಿತೆಂ ಸಂವಾರ್ ಹ್ಯಾ ಕವಿತೆಂತ್ ಲಿಪ್ಲ್ಯಾತ್ ಆನಿ ಯೆದೊಳ್ ಪಾಸೊನ್ ಹ್ಯಾ ಕವಿಕ್ ಹಾಂವ್ ಕೊಂಕಣಿ ಕವಿಂಚ್ಯಾ ಮೆಳಿಂತ್ ಕಿತ್ಯಾಕ್ ಪಳೆಂವ್ಕ್ ಸಕ್ಲೊಂನಾ ಮ್ಹಳ್ಳೆಂ ಲಾಚಾರ್‌ಪಣಾಚೆಂ ಚಿಂತಪ್ ಮತಿಂತ್ ಘುಸ್ಲೆಂ, ಪುಣ್ ಆತಾಂ ತರ್‌ಯೀ ಹೊ ಕವಿ ಆನಿ ಹ್ಯಾ ಕವಿಚ್ಯಾ ಕವಿತೆಂಕ್ ಪಾರ್ಕುಂಕ್ ತಶೆಂಚ್ ಶಿಕುಂಕ್ ಆವ್ಕಾಸ್ ಲಾಭ್ಲೊ ಮ್ಹಳ್ಳೊ ಸಂತೊಸ್‌ಯೀ ಜಾಲೊ.

ಕಾಂಯ್ ಚಾಳಿಸ್ ವರ್ಸಾಂ ಥಾವ್ನ್ ಮರಾಠಿ ತಶೆಂಚ್ ಕೊಂಕಣಿಂತ್ ಕವಿತಾ ಬರವ್ನ್ ಆಯಿಲ್ಲೊ ಬಾಬ್ ಶಯ್ಲೇಂದ್ರ ಮೆಹ್ತಾ, ಪಾರಂಪರಿಕ್ ಕವಿತಾ ನ್ಹಯ್ ಬಗಾರ್ ಆಧುನಿಕ್ ಕವಿತಾ ಬರಯ್ತೆಲ್ಯಾಂಚ್ಯಾ ಪಂಗ್ತೆರ್ ಆಸಾ. ಅಮೂರ್ತ್ ಸಂಕೇತ್ (Abstract images) ಅಪ್ಲ್ಯಾ ಕವಿತೆಂನಿ ಗುಂತುನ್ ಉತ್ರಾಂತಲ್ಯಾ ಅರ್ಥಾಂಚ್ಯಾ ಗರ್ಭಾಂನಿ ತಿಂ ಲಿಪಂವ್ಚಿ ಶ್ಯಾಥಿ ಆಸ್ಚೊ ತಾಕ್ತೆವಂತ್ ಕವಿ ಮ್ಹಣಚ್ಯಾಕ್ ತಾಚೊ ಆಯ್ಲೆವಾರ್ ಪರ್ಗಟ್ ಜಾಲ್ಲೊ ಕವಿತಾಜಮೊ ’ಸಿಸಿಫಸ್ ತೆಂಗ್‌ಶೆರ್’ ಗವಾಯ್. ಬಾಕಿಚೆಂ ಮಾಪುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಅತಿವಾಸ್ತವ್ ದೈವ್‌ಗತಿ [ಶೈಲೆಂದ್ರ್ ಮೆಹ್ತಾ]

ಅತಿವಾಸ್ತವ್ ದೈವ್‌ಗತಿ

ವಂಟಿ ನಿರ್ಮಾಣ್ ಜಾಂವ್ಚೆಂ ಆದಿಂ

ಮಳಬ್ ಮೆಕ್ಳೆಂ

ಕುಪಾಂ ವಿರಯ್ತ್

ಇಂದ್ರಧೊಣೂಚೆ ಕುಡೀಸುವಾಳೆ

ಸಜಯ್ತ್ ಆಪ್ಲ್ಯಾ ಆಂಗ್ಣಾತ್

ಆಪೊವ್ಣೆ ಧಾಡೀತ್

ವಸಂತರಾನಾಂತ್ಲ್ಯಾ ಶೆವ್ಣ್ಯಾಂಕ್

ಪಾಶಾಣ್ ಯುಗಾಸಾವನ್

ವಂಟಿ ಉಬ್ಯೊ ಜಾತ್ಕಚ್

ವಾರೆಂ ಆಡಾವ್ಲೆಂ

ಸುರು ಜಾಲೆ

ಆಪಾಪ್ಲ್ಯಾ ಖಳ್ಯಾಂತಲೆ

ದಶಾವ್ತಾರಾಂಚೆ ಕಾಲೆ

ಆಯ್ಲೊ ಸಾಂವಾರ್

ಘುಸ್ಪಲೆ ಸಮೆಸ್ತ್

ಮಿಥಕ್ ಆನಿ ಫಿಕ್ಶನ್

ಹಾಂಚ್ಯಾ ಉಟಂಗಾರಾಂತ್

ನಾಚಯ್ತ್ ಖೆಳಯ್ತ್

ಧಾಲೊ- ಫುಗ್ಡಯೊ -ಶಿಗ್ಮೊ

ಆನಿ ಉಪ್ರಾಂತ್

ಜೀಣೆಚಿ ಧುಳವ್ಡ್ ಕರೀತ್

ಸ್ಮೃತಿಭ್ರಂಶಾಚ್ಯಾ ದುಯೆಂಸಾನ್

ಘಾಲ್ಯೊ ಆಡ್

ತರ್ಣ್ಯೊ ಕುಡಿ

ಲೊಡ್ ಶೆಡೀಂಗ್ ಚ್ಯಾ ನಿಮ್ತಾನ್ ಬಾಂದಿಲ್ಲ್ಯಾ

ಕಾಳ್ಖಾಚ್ಯಾ ಬಲ್ಕಾಂವಾಂಚೆರ್

ಉಗ್ಡಾಸಾಚಿ ಫಸ್ಕಾಂ ಪೆಟವ್ಪಿ

ಕುಡ್ಡಯಾ - ಭೆಡ್ಡಯಾ -ಶಕ್ತಿಹೀನ್

ಮ್ಹಾತಾರ್ಯಾ ಕೊತಾರ್ಯಾ

ದಧೀಚಿಂಚಿ ಹಾಡಾಂ

ಮಾರೀತ್ ರಾವ್ಲಿಂ ಕರಂದಾಯೊ

ಪೂಣ್ ಇತಿಹಾಸ್ ವಿಸ್ರೂನ್ ಗೆಲ್ಲ್ಯಾ

ಕುಸಾಂಕಿಡೀಂಕ್ ಉರ್ಲೀನಾ ಆಸ್

ಫುಲ್ಪಾಕುಲ್ಯಾಚ್ಯಾ ಮುಕ್ತ್ ಉಡ್ಡಾಣಾಚಿ

ಕಾಳ್ಖ್ಯಾ ಕುಪಾಂಚಿ

ಚಿತ್ರವಿಚಿತ್ರ್ ಪಾಯಂಜೆಲಾಂ

ಬಾಂದೂನ್ ಘಾಲೂನ್

ಚಕ್ಚಕತೆ ಫ್ರೆಮಿಂತ್

ಮಳಬ್ ಆಯ್ಲೆಂ ದಾಟೂನ್

ಸ್ವಯಂಪ್ರಕಾಶಿತ್ ಕಾಜೂಲೆ

ಆನಿ ಸೂರ್ಯ್ ಚಂದ್ರ್ ನಖೆತ್ರಾಂ ಲೆಗೀತ್

ಘುಂವ್ಲೆ - ಲಿಪ್ಲೆ ಸೊದಿತ್

ಕಾಲ್ಚೊ ಕಾಳ್

ಕಾಲ್ಚೆ ದಿಸ್

ಕಾಲ್ಚೆ ಖೀಣ್

ಫ್ರೆಮೀಚ್ಯಾ ಉಜ್ವಾಡಾಂತ್

- ಶೈಲೆಂದ್ರ್ ಮೆಹ್ತಾ [ಮಾರ್ಚ್, 2019]

ಶೈಲೆಂದ್ರ್ ಮೆಹ್ತಾ: ಕಾಂಯ್ ಚಾಳಿಸ್ ವರ್ಸಾಂ ಥಾವ್ನ್ ಮರಾಠಿ ತಶೆಂಚ್ ಕೊಂಕಣಿಂತ್ ಕವಿತಾ ಬರವ್ನ್ ಆಯಿಲ್ಲೊ ಬಾಬ್ ಶಯ್ಲೇಂದ್ರ ಮೆಹ್ತಾ, ಪಾರಂಪರಿಕ್ ಕವಿತಾ ನ್ಹಯ್ ಬಗಾರ್ ಆಧುನಿಕ್ ಕವಿತಾ ಬರಯ್ತೆಲ್ಯಾಂಚ್ಯಾ ಪಂಗ್ತೆರ್ ಆಸಾ. ಅಮೂರ್ತ್ ಸಂಕೇತ್ (Abstract images) ಅಪ್ಲ್ಯಾ ಕವಿತೆಂನಿ ಗುಂತುನ್ ಉತ್ರಾಂತಲ್ಯಾ ಅರ್ಥಾಂಚ್ಯಾ ಗರ್ಭಾಂನಿ ತಿಂ ಲಿಪಂವ್ಚಿ ಶ್ಯಾಥಿ ಆಸ್ಚೊ ತಾಕ್ತೆವಂತ್ ಕವಿ. ತಾಚೊ ಕವಿತಾಜಮೊ ’ಸಿಸಿಫಸ್ ತೆಂಗ್‌ಶೆರ್’ ಆಯ್ಲೆವಾರ್ ಪರ್ಗಟ್ ಜಾಲ್ಲೊ ಜಾವ್ನಾಸಾ.