ಮಂತಾರಿ (- ಸ್ಮಿತಾ ಶೆಣೈ)

[ಕವಿತಾ] ಮಂತಾರಿ (-  ಸ್ಮಿತಾ ಶೆಣೈ)

ಎಕಾ ಅಸ್ತುರೆನ್ ಅಪಲ್ಯಾ ಜಿವಿತಾಂತ್ ಕಿತಲೆ ಪಾತ್ರ್ ಘೆವಪಾಕ್ ಪಡತಾತ್, ಏಕ್ ಧುವ್ ಜಾವ್ನ್, ಏಕ್ ಭಯ್ಣ್ ಜಾವ್ನ್, ಏಕ್ ಬಾಯ್ಲ್ ಜಾವ್ನ್, ಏಕ್ ಇಶ್ಟಿಣ್ ಜಾವ್ನ್, ಏಕ್ ಆವಯ್ ಜಾವ್ನ್, ಏಕ್ ಆಜಿ ಜಾವ್ನ್, ಏಕ್ ಪಿಜಿ ಜಾವ್ನ್... ಪುಣ್ ದರೇಕಾ ವೆಳಾರ್ ತಿಣೆಂ ಎಕಾ ವಾತಿಪರಿಂ ಅಪಣಾಕ್‌ಚ್ ಜಳವ್ನ್ ಹೆರಾಂಕ್ ಸೆವೆಚೊ ದಿವೊ ಪೆಟಂವ್ಕ್ ಆಸಾ. ಉತರ್ ಪ್ರಾಯೆರ್ ಪಾವಲಿ ತರ್‌ಯೀ ತಿ ತಿಚ್ಯಾ ಪತಿಕ್ ಬಾಯ್ಲ್‌ಚ್ ಮ್ಹಳ್ಳೆಂ ಖರೆಂ ಸತ್. ಹ್ಯಾ ಅಪುರ್ಭಾಯೆಚ್ಯಾ ಅಸ್ತುರೆಚ್ಯಾ ರುಪಾಚೆರ್ ಸೊಭಿತ್ ರಿತಿನ್ ವಿಣ್ಲಲಿ ಕವಿತಾ ಹಿ.

ಕೊಂಕಣಿ ಭಾಶೆಚಿ ಸೊಭಾಯ್ ವೆವೆಗಳ್ಯಾ ಬೊಲಿಂತ್ ಆಸತಾ. ಹಿ ಕವಿತಾ ಗಿ.ಎಸ್.ಬಿ. ಬೊಲಿಂತ್ ಆಸಾ. ಬಾಯ್ ಸ್ಮಿತಾ ಶೆಣೈ ಹಿಣೆಂ ಬರಯಿಲ್ಲಿ ಜಾವ್ನಾಸಾ.

[ಕವಿತಾ] ಮಂತಾರಿ (-  ಸ್ಮಿತಾ ಶೆಣೈ)

ಮಂತಾರಿ

ಸುನ್ನೇಲೆ ಉತ್ರಾನಿ ಚಬ್ಬೊನು ಘೇವ್ನು ಸರ ಸರ ಕುಡಾಕ ವತ್ತಾ,

ಹತ್ಲಾರಿ ಪಳ್ಳೇಲೆ ಮಂತಾರ್‍ಯಾ ಲಗ್ಗಿ

ವೊಗ್ಗಿ ಬೈಸೂನು ದೂಕಿ ಪರ್ಸೂನು ಘೆತ್ತ... ಮಂತಾರಿ

ಕಚಪಚ ಉಲ್ಲೊವ್ಚೆ ತಿಗೆಲೆ ಸಖಿಯಾಲೆ ಮಧೇತು

ಎಕ್ಲಿಪುಣಿ ಪಾಯು ಅಪ್ಪೋಣು ಹಾಥು ಧರುನು

ಉಲ್ಲೈಸಿತಲಿಕೀ ಮ್ಹಳ್ಳೆಲೆ ಆಕಾಂಕ್ಷೆಕ ಭಾಯ್ರಿ ಎತ್ತ

ತಿಜ್ಜೆ ಭ್ಹೊಗ್ಣಾಂಚೆ ಗೋಲಕಾಕ

ತಂಚೆ ಉತ್ರಾಂತು ಕಿತ್ತೇಯಿ ಮೇಳನಾಶಿ ಪರ್‍ತೂನು ಕುಡಾಕ ವತ್ತ . ....ಮಂತಾರಿ

ಧನ್ಪಾರಾಚೆ ಮೌನಾಕ, ಮಂತಾರ್‍ಯಾಕ,

ಏಕ ಪಳ್ಳೇಚೆ ಪದ ಸಂಗುಕ ಮ್ಹಣೂನು ಅಶೆತಾ

ಏಕ್ಕೀ ಉಡ್ಗಾಸು ಏನಶೀ ಆಶಾ ಸೊಡ್ತಾ ,

ರತ್ತೀಕ ಹಳೂ ಭಾರ್ಯಿ ಎವ್ಚೆ ಜರ್ಲ್ಯಾವರಿ ಮಧೇ ಧನ್ಪಾರ

ಕೋಣ್ ನತ್ತೀಲೆ ವೆಳಾರಿ ಟಿ.ವಿ.ಲಯ್ತಾ. ಮೊದಿಲೆ ಉತ್ರಾಂಕ ಆಯ್ಕುನು

ಚಾಂಗು ಮನೀಷು ಪಾಪ್ ಮ್ಹಣುನು ಸಕ್ಕಡಲ್ಯಾವರಿ ಲೆಕ್ತ

ಕಪಟಾಂತುಲೆ ಕಪ್ಪಡಾಂ ಪೈಕಿ ಕಪ್ಪೂಸು ಝೋರ್ನು,

ಮೊವಾಳ್ ಜಲ್ಲೆಲೆ ಕಿರ್ಗಿ ಸೊದ್ದುನು ನ್ಹೆಸ್ತಾ.

ನತ್ರಾಲ್ಯಾಂತು ಕೊಣಾಖೈ ವರ್ಲಾಕ ಹಾಥು ಪುಸೂಚ್ಯಾಕ

ಅಪ್ಪಣ ಜಾಯಿ ಜತ್ತಲಿ ಮ್ಹಣೂನು ಜವಣಾ ಮ್ಯಾಜಾಲಗ್ಗಿ ಸರ್ನು ರಬ್ತಾ

ತಂಚ್ಯಾ ಖೇಳು, ಚರ್ಚಾ, ಅಂತಾಕ್ಷರೀಂತು ತಿಕಾ ಕಾಂಯೀ ಕಾಮ್ ನತ್ಲ್ಯಾರೀಯೀ,

ಸ್ವಾಭಾವಿಕ್ ಜಾವ್ನು ಖುಶಿ ಜತ್ತಾ. ....ಮಂತಾರಿ

ಮಂತಾರ್ಯಾನ ಮರ್ಕುಚೆ ಆವಾಜಾಕ

ಸಕ್ಕಡ ಸೋಣು ವಚ್ಚೂನು ಪಾಯು ದಂಪ್ತ.

ಕುಡಾಂತು ಕೋಯ್ರು ಪುಸ್ಪಾಕ ಎವ್ಚೆ ಚೆಡ್ವಾ ಲಗಿ

ಬಮ್ಣಾನ ಮಾರ್ಚೆ, ಪೋಟ್ ಧುವ್ಚೆ ಕಾಣೀಯೋ ಆಯ್ಕೂನು

ಪೊರ್ನೆ ರೀತಿಚೆ ಜೀವನ್ ಖೈಕೀ ಜೀವಂತ್ ಅಸುಚೆ ಕಳುನು ಸಮಾಧಾನ್ ಪಾವ್ತ

ತಿಜ್ಜೆ ವರ್ಲಾಕ ಧಾರುಪ್ಪಯೊ ಬಂದೂನು, ಪಯ್ಯಾಂಕ ನಮಸ್ಕಾರು ಘೆತ್ತ.

ನ್ಹವೆ ಘರಾಚೆ ನಯ ಪಾಗಾರಾಂಕ ನಿಯಾಳ್ನು ಸಂಸಾರಾಚೊ

ವಾದು, ಸುವಾದು, ಮೋಗು-ಝಗಡೆ ಹಾಸು-ರಣ್ಯೆ, ಲಗ್ನ-ಮೂಂಜಿ ,

ಬಾಳಾಂತೀರೊ- ಭಷ್ಟಪಣ್, ದೊಳೇ ಉದ್ದಾಕ -ರಗತ ಪೀವ್ನು

ಘಟ್ಟಿ ಮಂಡೀಲೆ ಪೊರ್ನೆ ಖರ್ ವಣತೀಚೆ ಉಡ್ಗಾಸು ಕಾಡ್ತ

ಸಂಜೇರಿ ಶಾಲೆ ಥಾವ್ನು ಎವ್ಚೆ ಪುತ್ತಲೆ ಯಾದ್ ಏವ್ನು ಅತ್ತಯೀ

ಚಾರಿ ವಜ್ತಾನ ಧಾವಂತಾರಿ ದಾರ್ ಉಬ್ತೆ ಕರ್ತಾ.

ಸೂಟ್ ಬೂಟಾಚೆ ಪುತ್ತಾನ , ಚಡ್ ಭವ್ನಕ್ಕಾ ತೂವೆ ಪಳ್ಯಾರಿ ಮಕಾ ರಜಾ ಮೆಳನಾ

ಮಳ್ಯೆಲೆ ಉತ್ರಾಕ್ ಬೊಡ್ಕೋ ಹಲ್ಲವ್ನು ಕುಡಾಕ್ ರಿಗ್ತಾ

ಮಂತಾರ್ಯಾಲೆ ಹಂತ್ಲಾ ಕೌಳೋ, ಮುತ್ತಾ ಖೊಟ್ಟೋ, ಕಫಾಚೆ ಗಿಂದಲ್

ಫುಟ್ ಕರ್ತನಾ ’ತಂಕಾ ಹಾಂವ್ಚ್ ಜಾಯ್..ಆನಿ ಕೊಣಿ ಜಾಯಾ ಮ್ಹಣ್‌ಚ್ಯಾಂತು ಪೌಚೆ ಅಸ್ತಿತ್ವ,

ನಾರಾಯಣಾ.... ನಾರಾಯಣಾ ಮ್ಹಣೂನ್ ಉಟಾನು ಗೆಲ್ಲೆಲೆ ತಗೆಲೆ ಮಡೇ ಮಕ್ಷೀಚಿ ಖಳುನು ಘೆತ್ತಾ.

ಕುಂಕುಂ ಧುತ್ತಾ, ಕಪಟಾಂಥುಲೆ ಕಿರ್ಗ್ಯೊ, ಧರೇಮಣಿ, ಕಂಕ್ಣ ವಂಣೂನು ನಿರ್ಲಿಪ್ತ್ ಜತ್ತಾ.

ತಿಜ್ಜಿ ಪಾಳಿ ಕೆದ್ನ ಎತ್ತಕೀ ಮ್ಹಣೂನ್ ಲ್ಯಾಕ್ ಘಲ್ತ.... ರಾಕ್ತಾ....ಮಂತಾರಿ

-  ಸ್ಮಿತಾ ಶೆಣೈ. [ಮಾಯ್, 2020]

 ಸ್ಮಿತಾ ಶೆಣೈ: ತೀರ್ಥಹಳ್ಳಿಚಿ ಮುಳಾಚಿ ಸದ್ದ್ಯಾಕ್ ಮಂಗ್ಳುರಾಂತ್ ವಸ್ತಿ ಕರುನ್, ಕೊಂಕಣಿ, ಕನ್ನಡ್, ಇಂಗ್ಲಿಶ್ ನೆಮಾಳ್ಯಾಂನಿ ತಶೆಂಚ್ ಜಾಳಿಜಾಗ್ಯಾಂನಿ ಬರಂವ್ಚಿ ಹಿ ವೃತ್ತೆನ್ ಸಹಾಯಕ್ ಪ್ರಾಧ್ಯಾಪಕ್ ಜಾವ್ನ್ ಮಂಗ್ಳುರ್‌ಚ್ಯಾ ಬೆಸೆಂಟ್ ಕೊಲೆಜಿಂತ್ ಪತ್ರಿಕೋಧ್ಯಮ್ ವಿಭಾಗಾಚಿ ಮುಖೇಸ್ತ್ ಜಾವ್ನ್ ವಾವ್ರ್ ಕರುನ್ ಆಸಾ. ಟಿವಿ ಚ್ಯಾನಲಾಂನಿ ನಿರೂಪಕಿ, ನಾಟಕಾಂನಿ ಅಭಿನಯ್, ಮಂಗ್ಳುರ್ ಆಕಾಶ್‌ವಾಣಿಂತ್ ಕಾರ್ಯಕ್ರಮಾಂ, ಡಿಜಿಟಲ್ ಆಡಿಯೊಂತ್ ಕಥಾ ಸಾದರ್‌ಪಣ್ ಅಶೆಂ ಹಿಚಿ ಪ್ರತಿಭಾ ವೆವೆಗಳ್ಯಾ ಶೆತಾಂತ್ ಆಸಾ.