ಕವಿತಾकविताPoem

ಲಿಸಾಂವ್ (- ಮೊನಿಕಾ ಡೆ’ಸಾ ಮಥಾಯಸ್)

[ಕವಿತಾ] ಲಿಸಾಂವ್ (- ಮೊನಿಕಾ ಡೆ’ಸಾ ಮಥಾಯಸ್)

ಸಮಾಜೆಂತ್ ಕವಿಕ್ ಏಕ್ ವೆಗಳೆಂಚ್ ಸ್ಥಾನ್ ಆಸ್ತಾ ನ್ಹಯ್ ತೊ ಬರಯ್ತಾ ಮ್ಹಣುನ್, ಬಗರ್, ಕವಿಚಿ ನದರ್ ವೆಗ್ಳಿಚ್ ಆಸ್ತಾ, ಜಿ ಹೆರ್ ಲೊಕಾಂಚ್ಯಾ ನದರೆಚ್ಯಾಕಿ ಗುಂಡಾಯೆಚಿ ಆಸ್ತಾ. ಪಾಟ್ಲ್ಯಾ ಥೊದ್ಯಾ ಮಯ್ನ್ಯಾಂನಿ ಅಖ್ಖೊ ಸಂಸಾರ್ ’ಕೊರೊನಾ’ ಚ್ಯಾ ಕಾವ್ಜೆಣಿಂತ್ ಭಿಂಯೆತಾ ತರ್, ಹಾಂಗಾಸರ್ ಕವಿ ವೆಗ್ಳಿಚ್ ನದರ್ ಹಾಚೆರ್ ಘಾಲ್ತಾ ಆನಿ ಹ್ಯಾ ’ಕೊರೊನಾ’ನ್ ಮನಶಾಕ್ ಶಿಕಯ್ಲೆಲಿಂ ಲಿಸಾಂವಾಂ ಭೋವ್ ಸೊಭಿತ್ ರಿತಿನ್ ಉತರಾಯ್ತಾ.

[ಕವಿತಾ] ಲಿಸಾಂವ್ (- ಮೊನಿಕಾ ಡೆ’ಸಾ ಮಥಾಯಸ್)

ಲಿಸಾಂವ್

ಕೊರೊನಾ, ಸಂಪಾನಾ ತುಜಿ ಹೊಗ್ಳಿಕ್ ಗಾವುನ್

ದಾಕಯ್ಲೆಂಯ್ ತುವೆಂ ದುಡ್ವಾಕ್ ನಾ ಮೋಲ್ ಮ್ಹಣುನ್

ಗಲ್ಫಾಕ್ ಪಾವ್ಲೊಂ ಹಾಂವ್ ದುಡ್ವಾಚ್ಯಾ ಆಶೆನ್

ಪಾಟಿಂ ಹಾಡ್ಲೊಯ್ ಮ್ಹಾಕಾ ಮಾಂಯ್‌ಗಾಂವ್ಚೆಂ ಮೋಲ್ ದಾಕವ್ನ್

ಶೆತಾಂ ಭಾಟಾಂ ವಿಕುನ್ ಪರ್ಗಾಂವಾಕ್ ಹಾಂವ್ ಪಾವ್‌ಲ್ಲೊಂ

ದುಡ್ವಾಚ್ಯಾ ಬಿಛಾಣ್ಯಾರ್ ನಿದ್ಚಿಂ ಸ್ವಪ್ಣಾಂ ಹಾಂವ್ ದೆಕ್ತಾಲೊಂ

ದುಡ್ವಾಕ್‌ಚ್ ಮಾನ್ ಮರ್ಯಾದ್ ಮ್ಹಣ್ ಹಾಂವ್ ಸಮ್ಜತಾಲೊಂ

ಆಜ್ ಮ್ಹಜ್ಯಾ ಜಿಣಿಯೆಚೊ ಖರೊ ಅರ್ಥ್ ಜಾಣಾ ಜಾಲೊಂ

ನಿರಾಶ್ರಿತ್ ಕೆಲೊ ಮ್ಹಾಕಾ ಗಲ್ಫಾಚ್ಯಾ ರೆಂವೆನ್

ಆಸ್ರೊ ದಿಲೊ ಮ್ಹಜ್ಯಾ ಮಾಂಯ್‌ಗಾಂವ್ಚ್ಯಾ ಮಾತಿಯೆನ್

ವಿಕ್‌ಲ್ಲಿಂ ಶೆತಾಂ ಪಾಟಿಂ ಮೊಲಾಕ್ ಘೆತ್ಲಿಂ ರೀಣ್ ಕಾಡುನ್

ಭಾಂಗಾರ್ ಪಿಕಯ್ಲೆಂ ಹ್ಯಾ ಶೆತಾಂತ್ ಘಾಮಾಚೆ ಥೆಂಬೆ ಜಿರವ್ನ್

ಶಿಕಯ್ಲೆಂಯ್ ತುವೆಂ ಕಶ್ಟ್ ಕಾಡ್ಲ್ಯಾರ್ ಮಾತ್ರ್ ಸುಕ್ ಮೆಳ್ತಾ

ಹ್ಯಾ ಬಂಜರ್ ಗಾದ್ಯಾಂನಿ ಭಾಂಗಾರ್ ಪಿಕ್ತಾ

ಪಯ್ಸ್ ದಿಸ್ಚೊ ಪರ್ವತ್ ಸದಾಂಚ್ ಮೋವ್ ದಿಸ್ತಾ

ಥಂಯ್ಚರೀ ಕಶ್ಟ್ ಆಸಾತ್ ತೆಂ ಲಾಗಿಂ ವೆತೆಚ್ ಕಳ್ತಾ

- ಮೊನಿಕಾ ಡೆ’ಸಾ ಮಥಾಯಸ್. [ಅಗೋಸ್ತ್, 2020]

Author

ಮೊನಿಕಾ ಡೆಸಾ ಮಥಾಯಸ್

ಪಾಟ್ಲ್ಯಾ ಪಂಚ್ವೀಸ್-ತೀಸ್ ವರ್ಸಾಂನಿ ವೆವೆಗ್ಳ್ಯಾ ನೆಮಾಳ್ಯಾಂನಿ ಕಥಾಕಾರ್ ಜಾವ್ನ್ ನಾಂವ್ ವೆಲಾಂ. ಸಾಹಿತ್ಯಿಕ್ ಸರ್ತೆಂನಿ ಇನಾಮಾಂ ಜೊಡ್ಲ್ಯಾಂತ್. ’ನವಿ ದಿಶಾ’ ಹಿಚೊ ಪಯ್ಲೊ ಕಥಾಜಮೊ 2020 ಇಸ್ವೆಂತ್ ಆಶಾವಾದಿ ಪ್ರಕಾಶನಾನ್ ಪ್ರಕಾಶಿತ್ ಕೆಲ್ಲೊ. ಹ್ಯಾ ಪುಸ್ತಕಾಕ್ ’ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಉತ್ತಿಮ್ ಪುಸ್ತಕ್ ಪುರಸ್ಕಾರ್’ ಲಾಭ್ಲಾ. ಹೆಂ ಪುಸ್ತಕ್ ರೊಮಿಂತ್ ತಶೆಂಚ್ ನಾಗರಿಂತ್ ಲಿಪ್ಯಂತರಣ್ ಜಾವ್ನ್ ಪ್ರಿಂಟ್ ತಶೆಂಚ್ ಡಿಜಿಟಲ್ ಪುಸ್ತಕಾರುಪಾರ್ ಆಯ್ಲಾಂ. ’ಪಾನಾಂಚ್ ಫುಲಾಂ ಜಾತಲಿಂ’ ಹಿಚ್ಯಾ ಕವಿತೆಂಚೊ ಪಯ್ಲೊ ಜಮೊ. ’ಜಿಣ್ಯೆ ಕಾಣಿಕ್’ ಹಿಚ್ಯಾ ಪಯ್ಲ್ಯಾ ನವಾಲಿಕಾಚೆಂ ಪುಸ್ತಕ್ ಕನ್ನಡ, ನಾಗರಿ ಆನಿ ರೊಮಿ ಲಿಪಿಂನಿ ಆಯ್ಲಾಂ. ಫೊಟೊಗ್ರಾಫಿ, ಪಯ್ಣಾಸಾಹಿತ್ಯ್ ಹಿಚೆ ಹೆರ್ ಹವ್ಯಾಸ್. ಕೆ.ಎಮ್.ಸಿ. ಮಣಿಪಾಲ್ ಥಾವ್ನ್ ನರ್ಸಿಂಗ್ ಪದ್ವಿ ಜೊಡ್ಲಲಿ ಹಿ ಪ್ರಸ್ತುತ್ ಡಬ್ಲಿನ್ (ಅಯರ್‌ಲೆಂಡ್) ಶೆರಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ.

All 7 pages by this writer