ಜಿವನ್ ರಂಗಾಚೆಂ (- ಜ್ಯೋಸ್ನಾ ಆಬ್ರೆವ್)

[ಕವಿತಾ] ಜಿವನ್ ರಂಗಾಚೆಂ (- ಜ್ಯೋಸ್ನಾ ಆಬ್ರೆವ್)

ಕವಿತಾ ಟ್ರಸ್ಟಾಮುಖಾಂತ್ರ್ ಬಾಬ್ ಮೆಲ್ವಿನ್ ಲುದ್ರಿಕ್ ಮಂಗ್ಳುರಾಂತ್ ತಶೆಂಚ್ ಹೆರ್ ರಾಜ್ಯಾಂನಿ ಸಯ್ತ್ ಆಸ್ಚ್ಯಾ ಕವಿತಾ ತಾಲೆಂತಾಕ್ ಸೊಧುನ್ ವರ್ಸಾನ್ ವರಸ್ ಭಂವ್ಡಿ ಮಾರ್ತಾ. 2017 ಇಸ್ವ್ಂತ್ ಕವಿತಾ ಟ್ರಸ್ಟಾಸವೆಂ ಮೆಳುನ್ ಆಶಾವಾದಿ ಪ್ರಕಾಶನಾನ್ ಮುಂಬಂಯ್ತ್ ಸಯ್ತ್ ಹಿಂ ಸೊಧ್ನಾಂ ಕೆಲ್ಲೆವೆಳಾರ್ ಜಾಯ್ತೆಂ ತಾಲೆಂತ್ ಮುಂಬಂಯ್ತ್ ಮೆಳ್ಳೆಂ. ಹೊ ಕವಿತಾ ಸಾದರ್ ಕರ್ಚೊ ಸ್ಪರ್ಧೊ ತರ್‌ಯೀ, ಹ್ಯಾ ಕವಿತಾ ಸಾದರ್ ಕರ್ಚೆಮುಖಾಂತ್ರ್ ಕೊಂಕಣಿ ಕವಿತೆಂಚ್ಯಾ ಮೊಗಾರ್ ಪಡ್ಚಿ ಕಲಾ ಸರ್ವಾಂಕ್ ಆಪ್ಣಾಂವ್ಕ್ ಸಾಧ್ಯ್ ನಾ. ಪುಣ್ ವಸಯ್ ಫಿರ್ಗಜಿಂತ್ ಫುಲ್‌ಲ್ಲೊ ಏಕ್ ಕಾವ್ಯಾಳ್ ಕಳೊ ಆಜ್ ಅಪ್ಲಿ ಪಯ್ಲಿ ಕವಿತಾ ಆಮ್ಚೆಸಮೊರ್ ವಾಂಟುನ್ ಘೆತಾ. ಜಿವಿತಾಚ್ಯಾ ಸುಕ್ತೆ-ಭರ್ತೆಕ್ ಪಾವ್ಸಾಚ್ಯಾ ಧೊಣಾಸವೆಂ ತುಲನ್ ಕರ್ಚೆಂ ಚಿಂತಪ್ ಭೋವ್ ಸೊಭಿತ್ ರಿತಿನ್ ವ್ಹಾಳಯಿಲ್ಲೆಂ ಹ್ಯಾ ಕವಿತೆಂತ್ ದಿಸುನ್ ಯೆತಾ. ಫುಡೆಂ ಹಿಚೆಥಾವ್ನ್ ಅನಿಕ್‌ಯೀ ಬರಿಂ ಕವಿತಾ ಯೇಂವ್ದಿತ್ ಮ್ಹಳ್ಳೆಚ್ ಮ್ಹಜೆ ಆಂವ್ಡೆ.

[ಕವಿತಾ] ಜಿವನ್ ರಂಗಾಚೆಂ (- ಜ್ಯೋಸ್ನಾ ಆಬ್ರೆವ್)

ಜಿವನ್ ರಂಗಾಚೆಂ

ಜಿವನ್ ಮ್ಹಜೆಂ ದೊನ್‌ಚ್ ಖಿಣಾಂಚೆಂ

ಹೆಂ ಜಿವನ್ ಮ್ಹಜೆಂ ದೊನ್‌ಚ್ ಖಿಣಾಂಚೆಂ

ಹ್ಯಾ ದೊನ್ ಖಿಣಾಂಚ್ಯಾ ಜಿವಿತಾಂತ್‌ಯೀ ವೆವೆಗಳೆ ರಂಗ್

ಜಶೆ ಪಾವ್ಸಾಧೊಣಾಂತ್ ಆಸಾತ್ ಸಾತ್ ರಂಗ್

ರಂಗ್ ಆಸಾ ಸುಕಾಕ್

ರಂಗ್ ಆಸಾ ದುಕಾಕ್

ರಂಗ್ ಆಸಾ ನಾತ್ಯಾಕ್

ರಂಗ್ ಆಸಾ ಮೊಗಾಕ್

ರಂಗ್ ಪಶ್ಚಾತಾಪಾಕ್

ರಂಗ್ ಆಸಾ ಸಂತೊಸಕ್

ರಂಗ್ ಆಸಾ ಸಂಕಶ್ಟಾಕ್

ಸಾತ್ ರಂಗ್ ಜರ್ ಮೆಳಾನಾಸ್ಲೆ

ಪಾವ್ಸಾಧೊಣು ಕಶೆಂ ಜಾಯ್ತ್ ಸೊಭಿತ್

ಮನಶಾ ಜಿವಿತಾಂತ್ ರಂಗ್ ನಾಸ್ಲೆ

ಕಶೆಂ ಜಾಂವ್ಚೆಂ ಪೂರ್ಣ್ ಜಿವಿತ್

ದಿಶಾಚ್ ಜಿವಿತಾಚೆಂ ರೋದ್

ಪಾಟಲಿ ದಿಶಾ ತೊಜೊ ಕಾಳ್

ಭಂವ್ತಿಂತ್ ಭರ್ವಸೊ ಸೊಧ್

ಮನಶಾ ವಾಟ್ ಮುಕಾರ್ ಚಲ್

- ಜ್ಯೋಸ್ನಾ ಆಬ್ರೆವ್. [ಮಾಯ್, 2020]

ಜ್ಯೋಸ್ನಾ ಆಬ್ರೆವ್: 2017 ಇಸ್ವೆಂತ್ ಮುಂಬಂಯ್ತ್ ಆಸಾ ಕೆಲ್ಲ್ಯಾ ಕೊಂಕಣಿ ಕವಿತಾ ಸಾದರ್ ಸರ್ತೆಂತ್ ಇನಾಮ್ ಆಪ್ಣಾಯಿಲ್ಲಿ ಬಾಯ್ ಜ್ಯೋಸ್ನಾ ಆಬ್ರೆವ್ ವಸಯ್ ಗಾಂವ್ಚಿ. ಸಾಹಿತಿಕ್ ಅಭಿರುಚ್ ಆಸ್ಚ್ಯಾ ಹಿಚಿ ಕವಿತಾ ಹಿಕಾ ಫುಡ್ಲ್ಯಾ ದಿಸಾಂನಿ ಕೊಂಕಣಿಂತ್ ಏಕ್ ಕವಿ ಜಾಂವ್ಕ್ ಪ್ರೇರಣ್ ದೀಂವ್ಕ್ ಮ್ಹಳ್ಳೆ ಮ್ಹಜೆ ಆಂವ್ಡೆ.