ಹೆಂ ವಯ್ರಸ್ (- ವಲ್ಲಿ ಕ್ವಾಡ್ರಸ್)

[ಕವಿತಾ] ಹೆಂ ವಯ್ರಸ್ (- ವಲ್ಲಿ ಕ್ವಾಡ್ರಸ್)

ಸಂಸಾರಾಂತ್ ಜಿಯೆತೆಲ್ಯಾ ಸರ್ವ್ ಜಿವಿಂ ಪಯ್ಕಿಂತ್ ಮನಿಸ್ ಮ್ಹಳ್ಳಿ ಜೀವಿ ಭೋವ್ ಚಡ್ ಮಾರೆಕಾರ್. ಆನಿ ಹೆಂ ವಯ್ರಸ್ ಕೊರೊನಾಚ್ಯಾಕೀ ಹಜಾರ್ ವಾಂಟ್ಯಾಂನಿ ಮಾರೆಕಾರ್ ವಯ್ರಸ್ ಜೆಂ ಆಜ್-ಕಾಲ್ಚೆಂ ವಯ್ರಸ್ ಹೆಂ ನ್ಹಯ್. ಕಾಯ್ನಾನ್ ಅಬೆಲಾಕ್ ಜಿವೆಶಿಂ ಮಾರಿಶೆಂ ಕೆಲ್ಲೆಂ, ತುರ್ಕಿಶ್, ಖಿಳ್ಜಿ, ತುಗ್ಲಕ್, ಮುಘಲ್, ಬ್ರಿಟಿಶ್, ಪೊರ್ಚುಗೀಸ್ ಅಶೆಂ ವೆವೆಗಳ್ಯಾಂಚೆಂ ಗುಲಾಮ್ ಜಾವ್ನ್ ಆತಾಂ ಹ್ಯಾ ವಯ್ರಸಾಕ್ ಸಮಾಜೆಂತ್ ವಿಸ್ತಾರಾಂವ್ಚ್ಯಾ ಆಮ್ಕಾಂ ಸರವಾಂಕ್ ಹೆಂ ವಯ್ರಸ್ ದಿಸ್ತಾ ಪುಣ್ ಆಮಿ ಕೊಣ್‌ಚ್ ಪಳೆನಾಂವ್. ಕೊರೊನಾಕ್ ತರ್‌ಯೀ ವ್ಹಕತ್ ಆಸತ್ ಪುಣ್ ಹ್ಯಾ ವಯ್ರಸಾಕ್ ನಾ ತರ್ ಹೆಂ ವಯ್ರಸ್ ಕಸಲೆಂ ತೆಂ ತುಮಿಂಚ್ ಸಮ್ಜುನ್ ಘೆಂವ್ಚೆಂ.

[ಕವಿತಾ] ಹೆಂ ವಯ್ರಸ್ (- ವಲ್ಲಿ ಕ್ವಾಡ್ರಸ್)

ಹೆಂ ವಯ್ರಸ್

ಹೆಂ ವಯ್ರಸ್ ಯುಗಾಯುಗಾಂಚೆಂ

ಕಾಯ್ನಾನ್ ಅಬೆಲಾಕ್ ಮಾರ್ಚೆಂ

ವಯ್ರಸ್ ಕೊಣೆಂಚ್ ದೆಕಾನಾಸ್ಚೆಂ

ತುರ್ಕಿಶ್ ಸುಲ್ತಾನಾಂಚ್ಯಾ ಬಂಧಿಚೆಂ

ಖಿಳ್ಜಿಚ್ಯಾ ಗುಲಾಮ್‌ಪಣಾಚೆಂ

ತುಗ್ಲಕಾಂಚ್ಯಾ ಮುಡ್ದಾರ್ಗೆಚೆಂ

ವಯ್ರಸ್ ಆಮ್ಕಾಂ ಸವಯೆಚೆಂ

ಬುದ್ದಾಕ್ ರಾಜ್ಯ್ ಸಾಂಡಿಶೆಂ ಕೆಲ್ಲೆಂ

ಮುಘಲಾಂಚ್ಯಾ ಕಠೋರಾಯೆಚೆಂ

ಬ್ರಿಟಿಶಾಂಚ್ಯಾ ಶೋಶಣಾಂಚೆಂ

ಪೊರ್ಚುಗೀಸಾಂಚ್ಯಾ ಧೂರ್ತ್‌ಪಣಾಚೆಂ

ವಯ್ರಸ್ ಕಾಳ್ಯಾ ಬಜಾರಾಚೆಂ

ಚಾರ್ ಮಾಗುನ್ ದೋನ್ ದಿಂವ್ಚೆಂ

ವಯ್ರಸ್ ಜಮಂವ್ಚೆಂ ಕಮಾಂವ್ಚೆಂ

ವಯ್ರಸ್ ದಾಳ್ಚೆಂ ತಾಂತುಂಚ್ ಲೊಳ್ಚೆಂ

ಧರ್ಮಾಕ್ ಧರ್ಮಾಂತ್ ಬೆಂಡ್ಚೆಂ

ಜಾತಿಕ್ ಜಾತಿಂತ್ ಖೆಂಡ್ಚೆಂ

ಭಾಶೆ ಭಾಶೆಂನಿ ಫಟಂವ್ಚೆಂ

ಲಿಪಿ-ಬೊಲಿಂನಿ ಧುಸ್ಪಟಾಂವ್ಚೆಂ

ವಯ್ರಸ್ ಸಗಳ್ಯಾಂಕ್ ದಿಸ್ಚೆಂ

ವಯ್ರಸ್ ಕೊಣೆಂಚ್ ದೆಕಾನಾಸ್ಚೆಂ

ಮನ್ಶಾಪಣಾಕ್ ವಿಣ್ಗೆಂ ಕರ್ಚೆಂ

ನ್ಹಯ್ ಕಾಲ್ಚೆಂ ಪೊರ್ಚೆಂ

ಕೊರೊನಾ ಫಕತ್ ಆಪಡ್ತಚ್ ಯೆಂವ್ಚೆಂ

ಹೆಂ ಆಮ್ಚ್ಯಾ ಜೀನ್ಸಾಂತ್ ಆಸ್ಚೆಂ

ಕೊರೊನಾಕ್ ತರ್‌ಯೀ ವ್ಹಕತ್ ಆಸತ್

ಹೆಂ ವಯ್ರಸ್ ಯುಗಾಯುಗಾಂಚೆಂ

- ವಲ್ಲಿ ಕ್ವಾಡ್ರಸ್. [ಎಪ್ರಿಲ್, 2020]