एक कविता बरोवंक नाशिल्ली [डो|हनुमंत चोपडेकर]

जेदनां एक कविता सब्धांच्या खचऱ्याक आनी त्या खचऱ्याच्या गोबोराक मेळच्या मान तारिफेसमोर उभी जाता तेदनां खरेंच भगचें आसा बरेंच जालें संसार आपणाक व्हळकना. आयचो संसार इतलो वेसत जाला म्हळ्यार सब्धांक संगीत, उत्रांक साहीत म्हणून अपार्थ करून जियेता. ह्या हकीगतेंत कवी जाल्लो खरोच उत्रां नासताना मोनो जाता.

बाब हनुमंत चोपडेकर गोंयचो नामणेचो विशलेषक, कवी, चिंत्पी अनी प्राध्यापक. कोंकणी साहित्याक उंचल्या पांवड्याक पावंवचेपासत वावर कर्तेल्यां पयकिंतलो दिश्टावो आसचो कवी. समाजेचें बरें वायट लागसिल्यान पळेवन पार्कून अयिल्लो देकून ह्या कवितेंत उत्रांनी मात्र न्हय, मौनांत सयत जायतें समजुंक मेळता. हीच ह्या कवितेची तांक आनी ही तांक आनी सोभाय पार्कून तुकाच सोडतां.

[कविता] एक कविता बरोवंक नाशिल्ली [डो|हनुमंत चोपडेकर]

एक कविता बरोवंक नाशिल्ली

तसो हांव हांसता खरो

पूण हें म्हजें हांसप न्ही

कवितेंत म्हज्या गोबोरूच गोबोर

पूण तें म्हजें ल्हासप न्ही

हांव जल्मुंकूच ना मरपाक

मरुंकूच ना पुनर्जल्म घेवपाक

म्हाका कूड ना आकार ना

गूण ना खूण ना

अवतार.... ?

अवतार बिवतार भिस्क्यार म्हज्या

हांव कोणाचेंच प्रतीक न्ही....

खरें सांगचें म्हळ्यार

प्रतिकात्मक लटीक जाल्यार न्हीच न्ही

तसो हांव हांसता खरो ....

भायर भितर म्हाका कांय लागना

हांव कंसांतलो कसो आसतलो

तुमचो पुर्णविराम स्वल्पविराम

म्हाका कसो बादतलो....

हांव उतरांची रास न्ही

कुवाड्यांची भास न्ही

हांव शब्द केन्नाच नासलो

अर्थ जाल्यार न्हीच न्ही.....

तसो हांव हांसता खरो

न्हय दुस्मान न्हय इश्ट

न्हय पावस न्हय सृश्ट

न्हय प्रस्न न्हय जाप

न्हय वजन न्हय माप

सांगल्यार तुमकां फट दिसतलें

वयल्यान तुमी हांसतले

कसोय कितलोय जोखात म्हाका

हांव कोणाचें पाप न्ही....

तसो हांव हांसता खरो ....

हांव स्वयंभू रवी न्ही

शब्दांचो खून करपी

नावाडगो कवी न्ही

आतां तुमकां म्हूण सांगता

कोणी कोणांक सांगचें न्ही

रचूंकूच नाशिल्ली कविता म्हजी

शाण्या मनशान वाचची न्ही.....

हांव हांसता खरो

पूण हें म्हजें हांसप न्ही

कवितेंत म्हज्या गोबोरूच गोबोर

पूण तें म्हजें ल्हासप न्ही....

- डो|हनुमंत चोपडेकर [जनेर, २०१९]

डो|हनुमंत चोपडेकर: वृत्तेन शिक्षक जावनासचो हो काणियेगार, नाटकिसत, बाल साहीत‌कार, संशोधक, तर्जण‌कार तसोच कवी. ’आतां केन्नातरी फांतोड जातली’, ’एक चीट मोगाळ आयीक’ म्हळ्ळे कविताजमे पर्गटल्यात. कोंकणी भाशा मंडळाचो पुरसकार, गोवा कोंकणी अकाडेमिचो पुरसकार हाका लाभ‌ल्ले प्रमूक पुरसकार.