ದರ್ಯಾ (- ಅಕ್ಷತಾ. ಅ. ಬೊಡ್ಕೆ)

ತ್ಯಾ ದರ್ಯಾನ್ ಪಳಯ್ಲೆಂ ತಾಂಚೆ ವ್ಹಡ್ಪಣ್

ಕಾಂಯ್ ಜಾಣಾಂಕ್ ದಿಲೊ ತಾಣೆಂ ಆದಾರ್

ತರ್ ಕಾಂಯ್ ಜಾಣಾಂನಿ ಕೆಲೊ ತಾಚೊ ನಿರ್ಧಾರ್

ಮನ್ ಮೆಕ್ಳೆಂ ಜಾವ್ನ್ ಬಸ್ಲೆಂ ಹಾಂವ್ ದರ್ಯಾದೆಗೆರ್

ದೊಳೆ ದಿಪ್ಕಾವನ್ ಪಳಯ್ತ್ ರಾವ್ಲೆಂ ಶೆವ್ಣ್ಯಾಂಕ್ ರುಖಾಂ ತೆಂಗ್ಶೆರ್

ವ್ಹಾಂವ್ತಾ ತ್ಯಾ ಲ್ಹಾರಾಂಕ್ ಪಳೊವ್ನ್ ವಿಸ್ರಲೆಂ ಹಾಂವ್ ಮ್ಹಜೆಂ ದುಖ್ಖ್

ದರ್ಯಾಕ್ ಮೆಳೂನ್ ಮೆಳ್ಳೆಂ ಮ್ಹಾಕಾ ಮ್ಹಜ್ಯಾ ಜನ್ಮಾಚೆಂ ಸುಖ್

ಮನಾಂತಲಿ ಕಾಣಿ ಉಕ್ತಾಯಲಿ ಹಾಂವೆಂ ದರ್ಯಾ ಸಾಮ್ಕಾರ್

ದೊಳ್ಯಾಂತಲೆಂ ಟಿಪೂಸ್ ಲೆಗೀತ್ ವ್ಹಾವಯ್ಲೆಂ ಹಾಂವೆಂ ದರ್ಯಾ ಸಾಮ್ಕಾರ್

ಫಣ್ಫಣ್ಟ್ಯಾ ಉದ್ಕಾಂತ್ ಪಳೊವ್ನ್ ಸ್ಫೂರ್ತ್ ಮೆಳ್ಳಿ ಮ್ಹಾಕಾ

ಪೂಣ್ ಆಯ್ಜ್ ಹ್ಯಾ ದರ್ಯಾಚಿ ಸ್ಥಿತಿ ಪಳಯ್ಲ್ಯಾರ್ ಜೀವ್ ನಾಕಾ

ಶಿಕ್ಷಾ ಮೆಳ್ಳ್ಯಾ ಹ್ಯಾ ದರ್ಯಾಕ್,

ಗುನ್ಯಾಂವ್ ತಾಚೊ ಕಿತೆಂ ತೆಂ ಖಬರ್ ನಾ

ಭೊಗ್ತಾ ತೊ ಸದಾಂಚ್ ಅತ್ಯಾಚಾರ್

ವಾಟಾವ್ಪಾಕ್ ತಾಕಾ ಕೊಣ್ ನಾ

ರಾವ್ಲಾ ತೊ ತ್ಯಾ ರಖ್ರಖ್ತ್ಯಾ ವತಾಂತ್ ಆಪ್ಲೆಂ ಸಳ್ಸಳಟೆಂ ಉದಕ್ ಘೆವ್ನ್

ಕಾಂಯ್ ಜಾಣಾಂಕ್ ದಿಲೆಂ ತಾಣೆಂ ಪ್ರಾಣ್

ಕಾಂಯ್ ಜಿವಾಂಚೆಂ ಘೆತ್ಲೆಂ ತಾಣೆಂ ಪ್ರಾಣ್

ಅಸೊ ಹೊ ದರ್ಯಾ ಶಾಂತ್ ಆನಿ ಸೊಬೀತ್

ಪೂಣ್ ವಾಟೆಕ್ ಗೆಲ್ಯಾರ್ ತಾಚ್ಯಾ ಜಾವ್ಪಿ ತೊ ಭಯಾನಕ್ ಆನಿ ರಾಗೀಟ್.

- ಅಕ್ಷತಾ. ಅ. ಬೊಡ್ಕೆ. [ಮಾರ್ಚ್, 2020]

ಅಕ್ಷತಾ. ಅ. ಬೊಡ್ಕೆ: ಗೊಂಯ್ಚ್ಯಾ ದೆಂಪೆ ಕಲಾ ಆನಿ ವಿಗ್ಯಾನ್ ಕೊಲೆಜಿಂತ್ ಶಿಕುನ್ ಆಸ್ಚಿ ಬಾಯ್ ಅಕ್ಶತಾ ಬೋಡ್ಕೆಚ್ಯೊ ಕವಿತಾ ಗೊಂಯ್ಚ್ಯಾ ನೇಮಾಳ್ಯಾಂನಿ ಪರ್ಗಟ್ಲ್ಯಾತ್. ಕವಿಗೋಶ್ಟಿಂನಿ ಸಯ್ತ್ ಹಿಣೆಂ ಅಪ್ಲ್ಯೊ ಕವಿತಾ ಸಾದರ್ ಕೆಲ್ಯಾತ್. ಕೊಂಕಣಿ ಸಾಹಿತ್ಯ್, ಕೊಂಕಣಿ ಕವಿತಾ ತಿಣೆ ಖಾಯ್ಸ್ ಕರ್ಚೊ ಪ್ರಕಾರ್.