ಚಂದ್ರಾಕಡೆನ್ ಸಂವಾದ್ [ ಶುಭಾ ಬರಡ್]

ಮನಿಸ್ ಚಂದ್ರೆಮಾಲಾಗಿಂ ವೆವೆಗಳ್ಯಾ ಕಾಳಾರ್ ಸಂವಾದ್ ಚಲವ್ನ್ ಆಯ್ಲಾ. ಭುರಗೆಪಣಾರ್ ಚಂದಮಾಮಾ, ತರ್ನಾಟ್‌ಪಣಾರ್ ಚಂದ್ರಮಾ ಆನಿ ಜಾಣ್ತೆಪಣಾರ್ ಚಂದ್ರೆಮ್. ಆನಿ ಹ್ಯಾ ವೆವೆಗಳ್ಯಾ ಕಾಳಾರ್ ಸಯ್ತ್ ಉಲವ್ಪಾಚೊ ಲಯ್ ವೆಗ್ಳೊ. ಹಾಂಗಾಸರ್‌ಯೀ ಏಕ್ ಅಸಲೆಂಚ್ ಸಂವಾದ್ ಆಸಾ ಪುಣ್ ಹಾಂಗಾಸರ್ ಪ್ರತಿಮಾ ವೆಗಳ್ಯೊ ದೆಕುನ್ ಹ್ಯಾ ಸಂವಾದಾಂತ್ ವೆವೆಗ್ಳ್ಯೊ ಕಾಣಿಯೊ ದಿಸ್ತಾತ್ ದೆಕುನ್ ಹಿ ಕವಿತಾ ಕಾಂಯ್ ಮನಾಚ್ಯಾ ಪಡದ್ಯಾಚೆರ್ ಏಕ್ ವೆಗಳೆಂಚ್ ಪಿಂತುರ್ ಉಭೆಂ ಜಾತಾ.

ಬಾಯ್ ಶುಭಾ ಬರಡೆನ್ ಕಾಂಯ್ ಶೆಂಭೊರಾಂ ವಯ್ರ್ ಕವಿತಾ ಬರಯ್ಲ್ಯಾತ್, ಗೊಂಯ್ಚ್ಯಾ ನಾಮ್ನೆಚ್ಯಾ ನೇಮಾಳ್ಯಾಂನಿ ತ್ಯೊ ಪರ್ಗಟ್ ಜಾಲ್ಯಾತ್. ಆಲ್ ಇಂಡಿಯಾ ರೇಡಿಯೊಚೆರ್ ಕವಿತಾ ಸಾದರ್ ಕೆಲ್ಯಾತ್ ತಶೆಂಚ್ ಸಭಾರ್ ಕವಿಗೋಶ್ಟಿಂನಿ ವಾಂಟೊ ಘೆತ್ಲಾ. ಹಾಂಗಾಸರ್ ಸಯ್ತ್ ಏಕ್ ವೆಗ್ಳಿಚ್ ಕವಿತಾ ಘೆವ್ನ್ ಆಯ್ಲ್ಯಾ ಆನಿ ಹ್ಯಾ ಕವಿತೆಚಿ ಸೊಭಾಯ್ ಚಾಕುಂಕ್ ತುಕಾ ಸೊಡ್ತಾಂ.

[ಕವಿತಾ] ಚಂದ್ರಾಕಡೆನ್ ಸಂವಾದ್ [ ಶುಭಾ ಬರಡ್]

ಚಂದ್ರಾಕಡೆನ್ ಸಂವಾದ್

ಚಂದ್ರಾ..

ಚಂದ್ರಾ ಕಿತ್ಯಾಕ್ ತುಂ ತ್ಯಾ ನಕೆತ್ರಾಂಕ್ ಇತ್ಲೊ ಚಿಕ್ಟತಾ?

ಕೃಷ್ಣಾವರಿ ತುಂ ‘ಚಂದ್ರಲೀಲಾ’ ರಚಯ್ತಾ ಕಾಯ್?

ಚಂದ್ರಾನ್ ಮ್ಹಣ್ಲೆಂ, ನಾ..

ಚಂದ್ರಾನ್ ಮ್ಹಣ್ಲೆಂ ನಾ, ತುಮ್ಚ್ಯಾ ಮೊಗ್ಚಿ ಸಾಕ್ಷ್ ಜಾವ್ಪಾಕ್

ಹ್ಯಾ ನಕೆತ್ರಾಂಚಿ ‘ನಕೆತ್ರಸಂಖ್ಯಾ’ ವಾಡಯ್ತಾಂ

***

ಚಂದ್ರಾ..

ಚಂದ್ರಾ ಕಿತ್ಯಾಕ್ ತುಂ ಅಸೊ ಪಾನಾಂಚ್ಯಾ ಖಾಂಚಿಂನಿ ಲಿಪ್ಲಾ?

ಲಿಪ್ಚೊರಯಾಂ ತುಕಾ ಚಾನ್ನ್ಯಾಚೊ ಭೊಗ್ ಘೆವ್ಪಾಕ್ ಜಾಯ್?

ಚಂದ್ರಾನ್ ಮ್ಹಣ್ಲೆಂ ನಾ..

ಚಂದ್ರಾನ್ ಮ್ಹಣ್ಲೆಂ ನಾ, ಮ್ಹಾಕಾ ಕಳ್ನಾ ಭೊಗ್ ಘೆವ್ಪಾಕ್

ಹಾಂವ್ ಫಕ್ತ್ ಪೃಥ್ವೀಚಿ ಲಜ್ ರಾಖ್ತಾಂ

***

ಚಂದ್ರಾ..

ಚಂದ್ರಾ ಕಶೆ ಆಯ್ಲೆ ತುಜೆರ್ ಹೆ ಕಾಳೆ ಡಾಗ್?

ಕೊಣೆ ತುಜೊಯ್ ಕೆಲಾ ಕಾಯ್ ಬಲ್ತ್ಕಾರ್?

ಚಂದ್ರಾನ್ ಮ್ಹಣ್ಲೆಂ ನಾ

ಚಂದ್ರಾನ್ ಮ್ಹಣ್ಲೆಂ ನಾ, ರಚ್ಣಾರ್ಯಾಚ್ಯಾ ಕರ್ಮಾಚೊ

ಹಾಂವೂಂಚ್ ಜಾವ್ನ್ ಆಸಾ ಸಾರ್

***

ಚಂದ್ರಾ..

ಚಂದ್ರಾ, ಉಮಾಶೆಚೆ ರಾತೀಕ್ ತುಂ ಖಂಯ್ ಶೆಣ್ಟಾ?

ಕಾಳ್ಖಾಕ್ ಭಿಯೆವ್ನ್ ತೂಂಯ್ ಪಳೂನ್ ವತಾ?

ಚಂದ್ರಾನ್ ಮ್ಹಣ್ಲೆಂ ನಾ..

ಚಂದ್ರಾನ್ ಮ್ಹಣ್ಲೆಂ ನಾ, ಪುನ್ವೆಚೊ ಉಜ್ವಾಡ್ ಪಸ್ರಾವಪಾಕ್

ಕಾಳೊಖ್ ಮ್ಹಾಕಾ ಪಾಂಗುರಚೊಚ್ ಪಡ್ಟಾ.

- ಶುಭಾ ಬರಡ್ [ಎಪ್ರಿಲ್, 2019]

ಶುಭಾ ಬರಡ್: ಗೊಂಯ್ಚ್ಯಾ ಮಡ್ಗಾಂವಾಂತ್ ವಸ್ತಿ ಕರುನ್ ಆಸ್ಚಿ ಬಾಯ್ ಶುಭಾ ಬರಡ್ ಕೊಂಕಣಿ ಕವಿತಾ ಬರಯ್ತಾ. ಶೆಂಬೊರಾಂ ವಯ್ರ್ ಕವಿತಾ ಬರಯ್ಲ್ಯಾತ್ ಆನಿ ಗೊಂಯ್ಚ್ಯಾ ವೆವೆಗ್ಳ್ಯಾ ನೇಮಾಳ್ಯಾಂನಿ ತ್ಯ್ಪ್ ಪರ್ಗಟ್ಲ್ಯಾತ್. ಆಲ್ ಇಂಡಿಯಾ ರೇಡಿಯೊಚೆರ್ ಕವಿತಾ ಸಾದರ್ ಕೆಲ್ಯಾಂತ್ ತಶೆಂಚ್ ಸಭಾರ್ ಕವಿಗೋಶ್ಟಿಂತ್ ಹಿಣೆಂ ವಾಂಟೊ ಘೆತ್ಲಾ. ಹಿಚ್ಯಾ ಕವಿತೆಂಚೊ ಜಮೊ ’ವಸುಂಧರಾ’ 2015 ಇಸ್ವೆಂತ್ ಪರ್ಗಟ್ ಜಾಲಾ.

ಸರ್ವಿಸಿಂಗ್ | सर्विसिंग