ಕವಿತಾकविताPoem

ಚಾಳಿಶೀಂತ್ ಮ್ಹಜೆ (- ರುಪಾಲಿ ಮಾವ್ಜೊ ಕೀರ್ತನಿ)

[ಕವಿತಾ] ಚಾಳಿಶೀಂತ್ ಮ್ಹಜೆ (- ರುಪಾಲಿ ಮಾವ್ಜೊ ಕೀರ್ತನಿ)

ದರೇಕಾ ಮನಶಾಕ್ ಹೆಂ ಚಿಂತಪ್ ಯೆತಾ ಜೆದನಾಂ ಚಾಳಿಸಾವೊ ಪಾಂವಡೊ ಉತರತಾನಾ ಅಶೆಂ ಭಗತಾ; ಅಪಲ್ಯಾ ಸಂಪುನ್ ಗೆಲ್ಲ್ಯಾ ವರಸಾಂನಿ ಕಿತೆಂ ಕರುಂಕ್ ಜಾಯ್ ಆಸ್ಲೆಂ ಪುಣ್ ಕರುಂಕ್ ಸಕುಂಕ್ ನಾ. ದೆಕುನ್‌ಚ್ ಆಜ್ ಪಾಸೊನ್ ಮನಿಸ್ ಚಂದ್ರಾಕ್ ಉಡ್ಕಿ ಮಾರ್ತಾ, ಉದ್ಕಾಕ್ ಮುಟಿಂತ್ ಧರತಾ, ಪುಣ್ ವೆಳಾಕ್ ರಾವಂವ್ಕ್ ಸಕಾನಾ. ಸಂಪುನ್ ಗೆಲ್ಲ್ಯಾ ವೆಳಾಚಿ ಯಾದ್ ಕಾಡುನ್ ಆಜ್ ಆಸಾ ತೊ ವೇಳ್ ಕಸೊ ಬರೊ ಕರುನ್ ಉಪೇಗ್ ಕರುಂಕ್ ಜಾಯ್ ಮ್ಹಳ್ಳೆ ಸಂಗ್ತೆಚೆರ್ ಎಕೊಡೊ ನಿಯಾಳ್ ಹಾಡಯ್ತಾ ಹಿ ಕವಿತಾ.

ಬಾಯ್ ರುಪಾಲಿ ಮಾವ್ಜೊ ಕಿರ್ತನಿಚ್ಯಾ ಕವಿತೆಂನಿ ಏಕ್ ವೆಗಳೊಚ್ ಸಂಸಾರ್ ಆಸತಾ. ಆನಿ ಹ್ಯಾ ಕವಿತೆಂತ್ ಸಯ್ತ್ ತಿಣೆಂ ತೊ ಸಂಸಾರ್ ರುತಾಂ ಕೆಲ್ಲೆಂ ಪಳೆಂವ್ಕ್ ತುಕಾ ಉಲೊ ದಿತಾಂ.

[ಕವಿತಾ] ಚಾಳಿಶೀಂತ್ ಮ್ಹಜೆ (- ರುಪಾಲಿ ಮಾವ್ಜೊ ಕೀರ್ತನಿ)

ಚಾಳಿಶೀಂತ್ ಮ್ಹಜೆ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

ಶೆಣಿಲ್ಲೆ ಖೀಣ್ ತೆ ಸಗ್ಲೆ

ಆಜ್ ಹಾಂವ್ ಪುಂಜಾವಂಕ್ ಸೊದ್ತಾಂ

ಕರೂಂಕ್ ಪಾವ್ಲೆಂ ನಾ ತೆಂ ಸಗ್ಳೆಂ

ಆತಾಂ ಹಾಂವ್ ಕರೂಂಕ್ ಲಾಗ್ತಾಂ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

ಧುಂವ್ರೆಲ್ಲೆ ನದ್ರೆನ್ ಹಾಂವ್

ನಿವ್ಳ್ ಎಕ್ ಚಿತ್ರ್ ಸೊದ್ತಾಂ

ಮಿರ್ಯೆಲ್ಲ್ಯಾ ಕಪ್ಲಾರ್ ಇಲ್ಲಿ

ತಿಕ್ತಿಕೀತ್ ಕಾತ್ ಸೊದ್ತಾಂ

ಥಕಿಲ್ಲ್ಯಾ ದೊಳ್ಯಾಂನಿ ಹಾಂವ್

ವ್ಹಡ್ ಸಪ್ನಾಂ ಪಳೊವಂಕ್ ಸೊದ್ತಾಂ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

ಗಚ್ಚ್ ಬಿರ್ಬಿಟಾಯ್ಲ್ಲ್ಯಾ ಕಾಗ್ದಾರ್

ಬರೊವಂಕ್ ಇಲ್ಲೊ ಜಾಗೊ ಸೊದ್ತಾಂ

ರಂಗಯ್ಲ್ಲ್ಯಾ ಚಿತ್ರಾಂತ್ ಪರತ್

ವಿಂಗಡ್ ರಂಗ್ ಭರೂಂಕ್ ಸೊದ್ತಾಂ

ಸೊಬೀತ್ ಉತ್ರಾಂಚಿ ಮಾಳ್ ಗುಂಥೂನ್

ಮ್ಹೊವಾಳ್ ಗೀತ್ ಗಾವಂಕ್ ಸೊದ್ತಾಂ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

ಪಾಂಖಾಂತ್ ಎಕ್ಠಾಂಯ್ ಕರೂನ್ ಬಳ್

ಮೆಕ್ಳ್ಯಾ ಮಳ್ಬಾಂತ್ ಉಡೂಂಕ್ ಸೊದ್ತಾಂ

ರೊಪ್ಟ್ಯಾರ್ ಬಸೂನ್ ಪರತ್ ಎಕ್ದಾ

ಮಂದ್ ವಾರ್ಯಾರ್ ಧೊಲೂಂಕ್ ಸೊದ್ತಾಂ

ಕಾಡೂನ್ ಉಡೊವ್ನ್ ರುಪ್ಡೆಂ ಹಾಂವ್

ರೂಪ್ ಮ್ಹಜೆಂ ಪಳೊವಂಕ್ ಸೊದ್ತಾಂ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

ಜಗ್ಚೆ ಖಾತೀರ್ ವೆಳ್ ರಾವ್ನಾ

ವೆಳ್ ಪಳೊವ್ನ್ ಜಗಪ್ ಜಾಯ್ನಾ

ದೆಖೂನ್...

ತೆನ್ನಾ ಕರೂಂಕ್ ಪಾವ್ಲೆಂ ನಾ ತೆಂ

ಆಜ್ ಸಗ್ಳೆಂ ಕರೂಂಕ್ ಸೊದ್ತಾಂ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

ಮನಾತ್ ಯೆತಾ ತೆಂ ಮನಾತ್ ಯೆತಾ ತೆನ್ನಾ

ಮನಾತ್ ಯೆತಾ ತಶೆಂ ಕರೂಂಕ್ ಸೊದ್ತಾಂ

ಚಾಳಿಶೀಂತ್ ಮ್ಹಜೆ ಆಜ್ ಹಾಂವ್

ವಿಶೀಂತಲೆ ತೆ ದೀಸ್ ಸೊದ್ತಾಂ

- ರುಪಾಲಿ ಮಾವ್ಜೊ ಕೀರ್ತನಿ. [ಜನೆರ್, 2020]