[Khobor] Konknni Borovpianchem Sommelon
Konknni Borovpianchem Sommelon
Ponnje : Romi lipintlea borovpiank margdorxon diunk ani tanchio oddchonni asat zalear somzunk Dalgado Konknni Akademi vorsan voros Konknni Borovpianchem Sommelon manddun haddtta, toxem heai vorsam tem manddun haddlam. He vixim zagrutai borovpiam modem favo ti zagrutai kelia. Hea vorsachem Sommelon 19 Janer 2020 disa Patto Ponnjechea ‘Art & Culture Department’-achea Conference Hall-ant sokallchim 10.00 tem sanje 5.00 meren choltolem.
Hea sommelonant don mukhel sotram astolim. Poilem sotr ‘Konknni Sahit’ya ani Borovpi’ ani hea sotrant ‘Gulab’ masikacho Sompadok Fausto V. Da Costa mukhel ulovp kortolo. Mukhel vixoyak dhorun kaim borovpi sahityachea veg-vegllea prokarancher aple vichear manddttole. Uprant thoddo vell bhasabhas astoli. Sanjer zavpi dusrem sotr ‘Konknni Khatirchio Yeuzonno’ hantunt DKA-cho Odheokx Tomazinho Cardozo DKA-chea yeuzonnancher uloitolo. Te uprant Konknni khatir lagu zaunk xoktat oxea her yeuzonnancher bhasbhas astoli.
Jevnna uprant ek Kovi Sommelon astolem, tantunt Romi lipintle ‘amontrit’ kovi aplio kovita sador kortole. Te xivai Tharav Ghevpi Sotr astolem, tantunt Sommelonak hajir asloleamni Konknni vixim tharav manddunk zatole. He tharav adim-fuddem boroun dile zalear tancher bhasabhas korunk sompem zatolem.
Donui mukhel sotranche vixoi borovpiank lagu zavpi asat. Dekhun borovpiamni aple vichear mukhar ghalunk ani goroz thoim suchovnnio korunk vell astolo, tacho faido kaddunk vinonti asa.
MES College-icho Professor ani Konknni borovpi Dr. Cosma Fernandes hachea hatantlean divli pettoun Sommelonachem ugtavonn zatolem. Tea vellar DKA-cho Odheokx Tomazinho Cardozo, Chittnis Vincy Quadros ani Bhanddari Celso Fernandes hajir astole.
Sommelon Romi lipint boroitolea sogllea Konknni borovpiank ugtem asa. Nanv-nondnni adinch chalu zaloli asa. Tori, jea borovpiamni nanv nond korunk nam, tannim beginuch nanv nond korchem mhonn DKA ulo marta. Chea-panneachi ani donarchea jevnnachi DKA vevostha kortoli.
