[ಖಬರ್] ಕೊಂಕ್ಣಿ ಭಾಶಾ ಕೊಂಕ್ಣಿ ಭಾಶಾ ಮಂಡಳ್, ಗೊಂಯಾನ್ ಮನಯ್ಲೊ 58ವೊ ವರ್ಧಾಪನ್ ದೀಸ್
ಕೊಂಕ್ಣಿ ಭಾಶಾ ಕೊಂಕ್ಣಿ ಭಾಶಾ ಮಂಡಳ್, ಗೊಂಯಾನ್ ಮನಯ್ಲೊ 58ವೊ ವರ್ಧಾಪನ್ ದೀಸ್
ಅಜುನೂಯ್ ಸಾಹಿತ್ಯಕಾರ್ ಆಪ್ಲ್ಯಾ ಲೆಖ್ನಾಂತ್ ಬಾಯ್ಲೆಚಿ ಚುಕೀಚಿ ಆನಿ ಆಪ್ಲ್ಯಾಕ್ ಜಾಯ್ ತಶಿ ಪ್ರತಿಮಾ ದಾಖಯ್ತಾತ್. ಹೆಂ ಜೆನ್ನಾ ನಾ ಜಾತ್ಲೆಂ ತೆನ್ನಾಚ್ ಬಾಯ್ಲ್ ಆನಿ ದಾದ್ಲೊ ಫರಕ್ ನಾ ಜಾತ್ಲೊ ಅಶೆಂ ಜೆಶ್ಠ್ ಸಾಹಿತ್ಯೀಕ್ ಆನಿ ಲೊಕ್ವೆದ್ ಸಂಶೊಧಕ್ ಜಯಂತಿ ನಾಯ್ಕ್ ಹಾಂಣಿ ಸಾಂಗ್ಲೆಂ. ಕೊಂಕ್ಣಿ ಭಾಶಾ ಮಂಡಳ್, ಗೊಂಯಾಚ್ಯಾ 58ವ್ಯಾ ವರ್ಧಾಪನ್ ದೀಸ್ ಸುವಾಳ್ಯಾ ವೆಳಾರ್ ತಿ ಉಲಯ್ತಾಲಿ.
ಆಪ್ಲೊ ಫುಡಾರ್ ಘಡೊವ್ಪಾಚ್ಯಾ ಕಾಳಾಂತ್ ಕೊಂಕ್ಣಿ ಭಾಸ್ ಆನಿ ಸಮಾಜಾ ಖಾತೀರ್ ತರ್ಣಾಟೆ ಕೊಂಕ್ಣಿ ಭಾಶಾ ಮಂಡ್ಳಾ ವರ್ವಿಂ ವಾವ್ರ್ ಕರ್ತಾತ್ ಹಿ ಖೊಶ್ಯೆಚಿ ಗಜಾಲ್ ಅಶೆಂ ಮತ್ ಜೆಶ್ಠ್ ಸಾಹಿತ್ಯೀಕ್ ಆನಿ ಲೊಕ್ವೆದ್ ಸಂಶೊಧಕ್ ಜಯಂತಿ ನಾಯ್ಕ್ ಹಾಂಣಿ ಸಾಂಗ್ಲೆಂ.
ಭಾಶೆಚಿ ಶಕ್ತ್ ತಾಚಿ ಬೊಲಿ ವಾ ಶೈಲಿ. ಕೊಂಕ್ಣೀಚಿ ಗಿರೆಸ್ತ್ ಅಶಿ ಉತ್ರಾವಳ್ ಆಸಾ. ತಿ ಶೆಣ್ಪಾಕ್ ಲಾಗ್ಲ್ಯಾ. ಆಪ್ಲೆ ಬೊಲಿ ವಿಶಿಂ ನ್ಯುನ್ಗಂಡ್ ಸಮಾಜಾ ಭಿತರ್ ನಿರ್ಮಾಣ್ ಜಾಲ್ಯಾ. ಹಾಕಾ ಲಾಗೂನ್ ಕಿತ್ಲ್ಯೊಶ್ಯೊಚ್ ಬೊಲ್ಯೊ ಶೆಣ್ಪಾಕ್ ಲಾಗ್ಲ್ಯಾತ್. ಹ್ಯೊ ಬೊಲ್ಯೊ ರಾಖೂನ್ ದವ್ರಪಾ ಖಾತೀರ್ ಎಕ್ಠಾಂಯ್ ಯೆವ್ನ್ ವಿಚಾರ್ ಕರ್ಪಾಕ್ ಜಾಯ್ ಆನಿ ತ್ಯೊ ಸಾಂಬಾಳೂನ್ ದವ್ರಪಾಕ್ ಜಾಯ್ ಅಶೆಂ ತಾಂಣಿ ಸಾಂಗ್ಲೆಂ.
ಮಂಡ್ಳಾನ್ ಆಪ್ಲೊ 58ವೊ ವರ್ಧಾಪನ್ ದೀಸ್ 30 ಸಪ್ಟೆಂಬರ್ 2020 ದಿಸಾ ಅನ್'ಲಾಯನ್ ಮಾಧ್ಯಮಾಂತ್ಲ್ಯಾನ್ ಮನಯ್ಲೊ. ಹ್ಯಾ ವೆಳಾರ್ ಮುಖೆಲ್ ಸೊಯ್ರಿ ಜಯಂತಿ ನಾಯ್ಕ್ ಹಾಂಣಿ ವರ್ಧಾಪನ್ ದೀಸ್ ವಿಶೆಶ್ ಸ್ಮರ್ಣಿಕೆಚೆಂ ಲೊಕಾರ್ಪಣ್ ಕೆಲೆಂ. ಹಿ ಸ್ಮರ್ಣಿಕಾ ಮಂಡ್ಳಾಚ್ಯಾ www.konkanibhashamandal.com ಸಂಕೆತಥಳಾಚೆರ್ ಉಪಲ್ಬ್ಧ್ ಆಸಾ. ಹೆ ಕಾರ್ಯಾವಳೀಚೆಂ ಮಂಡ್ಳಾಚ್ಯಾ ಫೆಸ್ಬೂಕ್ ಪಾನಾಚೆರ್ ತಶೆಂಚ್ ಯುಟ್ಯೂಬ್ ಚೆನ್ಲಾಚೆರ್ ಥೆಟ್ ಪ್ರಸಾರಣ್ ಜಾಲೆಂ.
ಶಿಮೊ-ಮೆರೊ ಲಾಗ್ತಾತ್ ತ್ಯೊ ಸುವಾರ್ಥಾಕ್. ನಿಸುವಾರ್ಥೀಪಣಾನ್ ಕಾಮ್ ಕರ್ಪ್ಯಾಂಕ್ ಲಾಗ್ತಾ ತಿ ಫಕತ್ ಎಕಚ್ ಜಾತ್, ಎಕಚ್ ಧರ್ಮ್ ಆನಿ ಎಕಚ್ ಭಾಸ್ ತಿ ಮ್ಹಣ್ಲ್ಯಾರ್ ಕೊಂಕ್ಣಿ ಭಾಸ್ ಅಶೆಂ ಕೊಂಕ್ಣಿ ಭಾಶಾ ಮಂಡ್ಳಾಚಿ ಅಧ್ಯಕ್ಷ್ ಅನ್ವೆಷಾ ಸಿಂಗ್ಬಾಳ್ ಹಾಂಣಿ ಆಪ್ಲ್ಯಾ ಯೆವ್ಕಾರಾಚ್ಯಾ ಉಲೊವ್ಪಾಂತ್ ಮ್ಹಣ್ಲೆಂ. ಕೊವೀಡ್ ಕಾಳಾಂತ್ ತರ್ಣಾಟೆ ಆನಿ ಜೆಶ್ಠಾಚೊ ಆದಾರ್ ಘೆವ್ನ್ ಮಂಡ್ಳಾನ್ ಶಿಕ್ಷಣೀಕ್ ತಶೆಂಚ್ ಸಾಹಿತ್ಯೀಕ್ ಮಳಾರ್ ಆಪ್ಲೊ ವಾವ್ರ್ ಚಾಲೂಚ್ ದವ್ರಲಾ. ಮಂಡ್ಳಾನ್ ಶಿಕ್ಷಣೀಕ್ ಎನಲಾಯನ್ ಸಾಹಿತ್ಯ್ ತಯಾರ್ ಕೆಲೆಂ, ಎನಲಾಯನ್ ಶಬ್ದಕೊಶ್ ಕೆಲೊ, ಪುಸ್ತಕಾಂ ಅಮೆಝೊನಾರ್ ಘಾಲಿಂ ತಶೆಂಚ್ ಅಣ್ಕಾರ್, ಆವಾಜಾಚೆಂ ಶಾಸ್ತ್ರ್, ಸಂಶೊಧನ್, ಪತ್ರಕಾರಿತಾ ಹ್ಯಾ ವಿಶ್ಯಾಂತ್ ವೆಬಿನಾರ್ ಘಡೊವ್ನ್ ಹಾಡ್ಲೆ ಅಶಿ ಮಾಹಿತಿ ಅನ್ವೆಷಾ ಸಿಂಗ್ಬಾಳ್ ಹಾಂಣಿ ದಿಲಿ.
ಕೊಂಕ್ಣಿ ಭಾಶಾ ಮಂಡಳ್ ಪುರ್ಸ್ಕೃತ್ ಸೆವಾ ಪುರ್ಸ್ಕಾರ್ ಹರಿಶ್ಚಂದ್ರ್ ನಾಗ್ವೆಂಕಾರ್, ಸೆರಾಫೀನ್ ಕೊತಾ ಪುರಸ್ಕ್ರತ್ ಫೆಲಿಸ್ಯು ಕಾರ್ದೊಜ್ ಯಾದಿಸ್ತಿಕ್ ಶಿಕ್ಷಕ್ ಪುರಸ್ಕಾರ್ ಡೊ. ಪ್ರಕಾಶ್ ವಜ್ರೀಕಾರ್, ಜುಜೆ ಪಿಯೆದಾದ್ ಕ್ವಾದ್ರುಸ್ ಯಾದಿಸ್ತಿಕ್ ಕಾರ್ಯಕ್ರ್ತೊ ಪುರಸ್ಕಾರ್ ಸರ್ಗೆಸ್ತ್ ನಿತ್ಯಾನಂದ್ ನಾಯ್ಕ್, ಲಿಗೊರಿಯೊ ಫುರ್ತಾದ್ ಟ್ರಸ್ಟ್ ಪತ್ರಕಾರಿತಾ ಪುರಸ್ಕಾರ್ ಜುಜೆ ಸಾಲ್ವಾದೊರ್ ಫೆರ್ನಾಂಡೀಸ್, ದಿನೆಶ್ ಮಣೆರಕಾರ್ ಪುರಸ್ಕ್ರತ್ ಚಂದ್ರಕಾಂತ್ ಕೆಣಿ ಯಾದಿಸ್ತಿಕ್ ಸ್ತಂಭ್ಲೆಖನ್ ಪುರಸ್ಕಾರ್ ಉಲ್ಹಾಸ್ ನಾಯ್ಕ್, ದಿನೆಶ್ ಮಣೆರಕಾರ್ ಪೃರಸ್ಕೃತ್ ರಾಮ್ನಾಥ್ ಮಣೆರಕಾರ್ ಯಾದಿಸ್ತಿಕ್ ಅಣ್ಕಾರ್ ಪುರಸ್ಕಾರ್ ಮಾಣಿಕರಾವ್ ರಾಮ್ ಪ್ರಭು ಗಾವ್ಣೆಕಾರ್, ಸ. ನರ್ಸಿಂಹ್ ದಾಮೊದರ್ ನಾಯ್ಕ್ ಯಾದಿಸ್ತಿಕ್ ಸಾಹಿತ್ಯ್ ಪುರಸ್ಕಾರ್ ಎಂಟ್ನಿ ಬಾರ್ಕೂರ್, ಸ. ರೊಕ್ ಬಾರ್ರೆಟೊ ಯಾದಿಸ್ತಿಕ್ ಸಾಹಿತ್ಯ್ ಪುರಸ್ಕಾರ್ ಶೈಲೆಂದ್ರ್ ಮೆಹ್ತಾ, ಕೊಂಕ್ಣಿ ಭಾಶಾ ಮಂಡಳ್ ಸಾಹಿತ್ಯ್ ಪುರಸ್ಕಾರ್ ಮಾರಿಒ ಮಿನೆಝಿಸ್, ಮನೊಹರರಾಯ್ ಸರ್ದೆಸಾಯ್ ಯಾದಿಸ್ತಿಕ್ ಬಾಲ್ ಸಾಹಿತ್ಯ್ ಪುರಸ್ಕಾರ್ ನಯ್ನಾ ಆಡಾರಕಾರ್ ಆನಿ ಸ. ಪದ್ಮಜಾ ಮಾಣಿಕರಾವ್ ಗಾವ್ಣೆಕಾರ್ ಯಾದಿಸ್ತಿಕ್ ಪ್ರಪ್ತ್ರ್ ಲೆಖನ್ ಸರ್ತೀಚೆಂ ಇನಾಮ್ ದಿಪ್ರಾಜ್ ಸಾತೊರ್ಡೆಕಾರ್ ಹಾಂಣಿ ಆಪ್ಲೆಂ ಮನೊಗತ್ ವ್ಯಕ್ತ್ ಕೆಲೆಂ. ಕೊವೀಡ್-19 ಮಹಾಮಾರೀಚಿ ಪರಿಸ್ಥಿತಿ ಸುದಾರ್ಲ್ಯಾ ಉಪ್ರಾಂತ್ ಮಾನೆಸ್ತಾಂಕ್ ಪುರಸ್ಕಾರ್ ಭೆಟೊವ್ಪಾಚೊ ಸುವಾಳೊ ಮಂಡಳ್ ಘಡೊವ್ನ್ ಹಾಡ್ಟಲೆ.
ರವೀನ್ದ್ರ್ ಕೆಳೆಕಾರ್ ಜ್ಞಾನ್ಮಂದೀರ್, ಮಡ್ಗಾಂವ್ಚ್ಯಾ ವಿದ್ಯಾರ್ಥ್ಯಾಂಚೊ ಸೈಮ್ ಪಿಶಿಂ ಆಮಿ ಗಿತಾಚೆರ್ ನಾಚ್, ಫೊಂಡೆಂಚ್ಯಾ ಶ್ರಿ. ಕಟ್ಮಗಾಳ್ ದಾದಾ ಪಂಗ್ಡಾಚೊ ಟ್ರಿಯೊ, ಸಾವ್ಯ್ವೆರೆಂಚೊ ಸಖ್ಯಾಹರೀಚೊ ಕೊಯ್ರಾಸೂರ್ ಗಿತಾಚೆರ್ ನಾಚ್, ಸರ್ಕಾರಿ ಮಹಾವಿದ್ಯಾಲಯ್, ಖಾಂಡೊಳೆಚ್ಯಾ ವಿದ್ಯಾರ್ಥ್ಯಾಂನಿ ಸಾದರ್ ಕೆಲ್ಲಿ ವಾದ್ಯಾಂಚಿ ಜುಗ್ಲಬಂದಿ, ಸರ್ಕಾರಿ ಮಹಾವಿದ್ಯಾಲಯ್, ಕೆಪೆಂಚ್ಯಾ ವಿದ್ಯಾರ್ಥ್ಯಾಂಚೊ ಭೂಮ್ ಭೂಮ್ ಗಿತಾಚೆರ್ ನಾಚ್, ಮಡ್ಗಾಂವ್ಚ್ಯಾ ಕಲಾ ಎಕ್ಸ್ತಮಾಚೊ ಪದರ್ ಗಿತಾಚೆರ್ ನಾಚ್, ಯುವಾ ಕಾಣ್ಕೊಣಕಾರಾಚೊ ಟ್ರಿಯೊ ಆನಿ ವಿದ್ಯಾ ಭುವ್ನ್ ಕೊಂಕ್ಣಿ ಶಾಳಾ, ಮಡ್ಗಾಂವ್ಚ್ಯಾ ಕುಡೀಚೆ ಅವ್ಯ್ವ್ ಗಿತಾಚೆರ್ ನಾಚ್ ಹೆ ಕಾರ್ಯಾವಳೀಚೊ ಭಾಗ್ ಆಶಿಲ್ಲೆ.
ಕಾರ್ಯಾವಳೀಚೆಂ ಸುತ್ರಸಂಚಾಲನ್ ಗೊಪಿನಾಥ್ ಗಾಂವ್ಸ್ ಹಾಂಣಿ ಆಪ್ಲ್ಯಾ ಸತ್ತರೀಂತ್ಲ್ಯಾ ಖಾಶೆಲೆ ಶೈಲೀನ್ ಕೆಲೆಂ. ಮಂಡ್ಳಾಚೆ ಸಚೀವ್ ಉಲ್ಹಾಸ್ ಗಾಂವ್ಕಾರ್ ಹಾಂಣಿ ಉಪ್ಕಾರಾಚೆಂ ಉಲೊವ್ಪ್ ಕೆಲೆಂ.
