[Khobor] DKA-n Anik Don Pustokam Uzvaddailim

Jess Fernandes-achem ‘Koxttanche Vantte’ ani William Fernandes-achem ‘Godd-Ambott-Tikh’

Kuddchodde : Dalgado Konknni Akademin (DKA) Kuddchoddem Konknni Kendr (KKK) hanchea zodd-palvan anik don pustokam uzvaddaun Konknni bhaxek girest keli. Jess Fernandesan boroilolem mottvia kannianchem pustok ‘Koxttanche Vantte’ ani William Fernandesachem ‘Gott-Ambott-Tikh’ him donui pustokam Gõy rajyacho Viz Montri Nilesh Cabral hachea hatantlean uzvaddailim. Ho suvallo 02 Novembr disa Kuddchoddechea Ravindra Bhovonant zalo. Hea vellar Nilesh Cabrala borabor DKA-cho Odheokx Tomazinho Cardozo, Chittnis Vincy Quadros, Bhanddari Celso Fernandes, Adlo Bhanddari Walter Menezes ani donui pustokanche borovpi Jess Fernandes ani William Fernandes machier hajir asle.

Mukhel Soiro Nilesh Cabral hannem DKA-chea vaurachi tokhnnai keli ani ek borovpi apli zannvai lokank dita te khatir tannem dogui borovpiank porbim bhettoitanam Konknni bhaxe sovem sogllem sarkem cholonam he vixim tannem khont ugtaili ani apnnachean kitem korunk zata zalear apunn kortolo mhonn utor dilem. Hea vellar DKA-chea Odheokxanui aple vichear manddle.

Vincy Quadrosan Jess Fernandesachea ‘Koxttanche Vantte’ hea pustokachi vollokh dili zalear Walter Menezesan William Fernandesachea ‘Godd-Ambott’Tikh’ hea pustokacher aple vichear manddle. Pustok uzvaddavnni zale uprant dogui borovpiamni ap-aplem monogot veokt kelem. Hich sond gheun Jess Fernandesan adim chhapun dovorlolim don pustokam mhollear ek kadombori ‘Kakluticho Arso’ ani kovitam pustok ‘Ratan Bauli’ heai pustokanchi hea vellar uzvaddavnni zali.

Hea vellar hajir aslolea manestam modem DKA-cho adlo Odheokx Premanand A. Lotlikar, Kuddchodde-Kakoda Nogorpalikechi Up-Nogorsevika Piedade Diniz, tiatrist John Claro Fernandes, Agnelo de Borim, Justiano Fernanes, Aleixino Fernandes, Borovpi Alvaro Gomes, Anthony Menezes, Fausto V. Da Costa, Edvin Fernandes, Natividade De Sa adi, hannim karyavollik sobai haddli.

Survatek Celso Fernandes-an hajir asloleank yeukar dilo zalear DKA Vaurpi Somiti Vangddi Vassalo Carvalho hannem soglleanche upkar mandle. KKK-cho Odheokx Mathew D’Costa hannem mukhel soireachi vollokh korun dili ani Konknni Borovpi Brenda Menezesan sutrsunchealon kelem.

Raxttrgit mhunnon karyavoll sompli.