साहितीक विमर्श्याचेर मुंबयांत राश्ट्रीय काऱ्यासाळ

[खबर] साहितीक विमर्श्याचेर मुंबयांत राश्ट्रीय काऱ्यासाळ

(मुंबय, नवेंबर २५): मंगळूर विश्वविध्यानिलन कोंकणी अध्ययन पीठ आनी आशावादी प्रकाशन हाणीं मांडून हाड‌ल्लो ’साहितीक विमर्सो बरंवचो’ चेर राश्ट्रीय कार‍यासाळ नवेंबर २५ तारिकेर मुंबयांतल्या ’आत्म दर्शनांत’ चल्लें. डा|जयवंत नायक काऱ्याचो अध्यक्ष जावन, कर्नाटक कोंकणी साहित्य अकाडेमिचो अध्यक्ष बाब आर. पी. नायक, नामणेचो उध्यमी बाब आलबर्ट डबल्यू डी’सोज तशेंच साहीत अकाडेमी पुरसकृत नामणेचो कोंकणी कवी बाब मेलवीन रोड्रिगस मुखेल सयरे जावन हाजर आसले.

बाब जेरालड डी’सोज अनी बाय शारल डी’सोजान सयऱ्यांक वेदीक स्वागत कर्तच, दिवटी पेटवन ह्या काऱ्याचें उग्तावण करून जातच, पयल्या भागांत ’साहितीक विमर्सो बरंवचो’ चेर परिसंवाद चल्लो. पयलो प्रबंध पयणारी.कोम संपादक बाब वल्ली क्वाड्रसान वाचलो, दुस्रो प्रबंध डा|अरविंद श्यान‌भागन वाचतच संवाद चल्लो. ह्या भागाचो सयरो जावन आयिल्लो बाब लारेन्स डी’सोज कमानीन ’कोंकणीक विमर्सो भोव गर्जेचो’ म्हणालो. ह्या परिसंवाद काऱ्याचो अध्यक्ष बाब मेलवीन रोड्रिगसान ह्या दोन उलवपांचेर अपले विचार दिले.

दूसऱ्या भागांत आशावादी प्रकाशनान आयलेवार पर्गट‌ल्ले च्यार कोंकणी बूक; काळजाउडी (रोशुबाबा बार्कूर), चाबूक आनी हेर कथा (रोनी मोंतेरो कटपाडी), पर्नो रूक आनी तर्नी वाल (एवरी पांगळा), शिमटी आनी हेर कथा (स्टेन‌रो अजेकार) तशेंच ’नमान तुका सोडवोणदाराचे माये’ म्हळ्ळी संगीत कोवळी (बेन्नी टीचर दुभाय) ह्या बुकांच्या बरयणारांची तशेंच्च बुकांची वळोक हिलरी डी’सिलवान कर्तच संगीत कोवळेची आनी बेन्नी टीचेरिची मटवी वळोक करून दिली. बाब मेलवीन रोड्रिगसान ’काळजाउडी’, बाब आर. पी. नायकान ’चाबूक आनी हेर कथा’, बाब आलबर्ट डबल्यू डी’सोजान ’पर्नो रूक आनी तर्नी वाल’, डा|जयवंत नायकान ’शिमटी आनी हेर कथा’ तशेंच मा|बा|चारल्स वाज एस.वी.डी. हाणीं संगीत कोवळेचें मोकळीक कर्तच दोन उत्रां उलयिल्लो रोनी मोंतेरोन एका तेंपादीं लिखणी रावयिल्ली परत बरवंक उत्तेजन दिल्ल्या समेसतांक धिन्वासून अपल्या बुकाक समेसतांनी प्रोत्साव दीवंक उलो दिलो. बेन्नी टीचरीन अपल्या नोव कोवळेंपयकिंत पयलेपावटीं मुंबयांत म्हजी कोवळी मोकळीक कर्चो संधर्भ लाभ‌ल्लो देकून तिणें धिन्वास पाठयलो. वेदिचेर बाब जोन डी’सिलवा, बाब लारेन्स कुवेल्हो, बाब लारेन्स डी’सोज कमानी, मा|बा|चारल्स वास, रोनी मोंतेरो कटपाडी आनी बाय बेन्नी टीचर आसलीं.

तीसऱ्या भागांत विलफी रेबिंबस स्मारक पयणारी-वीज हाणीं मांडून हाड‌ल्ल्या पयल्या द्वी-लिपी कोंकणी साहितीक स्पर्ध्यांत इनामां जिकलेल्यांक इनामां तशेंच सर्टिफिकेट्यो वांटल्यो. बाब आर. एस. भासकर (कोच्ची), बाय उर्जिता भोबे (गोयां), बाब हिलरी डी’सिलवा (प्रसन्न निड्डोडी) मुंबय, बाय बेन्नि टीचर (दुभाय) तशेंच बाब अरविंद श्यान‌भाग (मंगळूर) हाजर आसले. उपरांत मुंबयांत अपुर्भायेन कवितासादर सर्ती चलवन वेल्ल्या संघटनां पयकिंत २०१८ इस्वेचें अत्युत्तम संघटन पुरसकार ’असुप्सांव कोंकणी संघटन कांदिवली’ आनी २०१७ इस्वेचें अत्युत्तम संघटन पुरसकार ’कोंकण तारां जेरिमेरी’ हांकां फावो जालें. बाय हिलडा पिरेरा आनी बाय फ्लोरा कल्माडी हाणीं संघटना तर्फेन हीं इनामां स्वीकार केलीं.

चोवत्या भागांत बाय फिलोमेना सांफ्रान्सिसकोच्या अध्यक्ष‌पणार चल‌ल्ल्या बहुभाशा कविगोश्टिंत कवी बाब मेलवीन रोड्रिगस, बाब आर. एस. भासकर, बाय उर्जिता भोबे हाणीं कोंकणी कविता, डा| गिरिजा शासत्री आनी मानेसत वी. एस. श्यान‌भाग हाणीं कन्नड कविता, बाय रीटा आलबुकर्क हिणें तुळू कविता, फिलोमेना सांफ्रान्सिसकोन हिंदी कविता प्रसतूत केलीं.

मुखेल सयरो बाब आलबर्ट डबल्यू डी’सोजान अपल्या उलवपांत मुंबयांत कोंकणी लोकाक लागीं हाडुंक कोंकणी भास एक भळवंत हातेर देकून आमी सर्वांनी एकवटीत जावन हो वावर करुंक उलो दिलो. कर्नाटक कोंकणी साहीत अकाडेमिचो अध्यक्ष बाब आर. पी. नायकान मुंबयांत कोंकणी काऱ्याक हाजर जाल्ल्या लोकाक पळेवन अपलो संतोस पर्गटतच, फुडें आमीं सयत एक बरें काऱ्यें मांडून हाड्यां म्हणून सांगलें. काऱ्याध्यक्ष डा|जयवंत नायक अपल्या उलवपांत ’आमी कोंकणी लोक वेवेगळ्या समुदायांत शिंपडला’ आनी तांकां ह्या भासेच्या माध्यमांत लागीं हाडुंक उलो दिलो.

वल्ली क्वाड्रसान उपकार आटयलो.