मार्च २० (मुंबय) महाराष्ट्र कोंकणि असॊसियॆशन तशेंच अखिल भारतीय कोंकणि परिषद हांच्या जॊड आयॊगाखाल ’कोंकणी सहमिलन आनि कविसम्मॆळ’ हेच्च मार्चाच्या २० तारिकेर, मुंबयांत्ल्या जेरिमेरिच्या सां।जूड फिर्गजेच्या सभासालांत चल्लें.
कार्याचि सुर्वात जेरि बोंदेल आनि ल्यान्सि निड्डॊडि हाणिं गाय्लेल्या कोंकणी पदासवें जातच्च कोंकणी परिषदेचो उपाध्यक्ष मानेस्त डा।चंद्रकांत शेणय हाणें कोंक्णेचो एक्वटित वाव्र कर्चि गर्ज कसलि म्हळ्ळ्याचेर विवर दीव्न, आज हर्येक प्रांतीय भास ऎक न्हय एका रितिच्या समस्यांत बुडोन आसा आस्तां, आम्कां एक्वटित जाव्न एका भासेचो पॊस कर्चि गर्ज अनिवार्य तशेंच भॊव गर्जेचि जाल्यास्तां, कोंकणी भासेच्या उदर्गते पासत सर्वांनि एका मनान वाव्र कर्चि गर्ज आसा म्हणालो, आनि ह्या दिशेन अखिल भारतीय कोंकणी साहित्य परिषद अप्लो वाव्र कर्तलो म्हणालो.
भुर्गे लियॊन आनि लिरॊन फेर्नांडिस हाणिं ’कोंकणी आम्चि भास’ म्हळ्ळें पद गाव्न कोंकणी सम्मॆळनाचि सुर्वात केलि, महाराष्ट्र कोंकणि असॊसियॆशन हाचो स्थापक अध्यक्ष मानेस्त लीयो फेर्नांडिसान, कसो हो संस्थो वीस वर्साधिं सुरु जाल्लो आनि ह्या वीस वर्सांनि ह्या संस्थ्यान वाडोन आयिल्लि रीत आनि कोंकणेच्या उदर्गतेपासत केल्ल्या वेवेग्ळ्या वाव्राचि मट्वि वळोक करुन दिलि.
उप्रांत वेवेग्ळ्या कलाकारां थाव्न नाट्कुळे तशेंच मट्वे हास्य प्रदर्शन जातच्च फिलॊमिना फेर्नांडिस कल्माडि आनि पंग्डाथाव्न नाच प्रदर्शित जालो. तशेंच भुर्ग्यांनि सय्त तांचो नाच प्रदर्शित केलो
त्यॆ उप्रांत बाय फिलॊमिना फ्रान्सिस्कॊ हिच्या मुखॆल्पणाखाल ऎक संवाद चलय्लो. पर्गांवांत आसोन्यी, हेर भासो शिक्चेसवें कशें कोंकणी भास सय्त हिं शिकुंक पाव्लिं म्हळ्ळ्याचेर अपुर्भायेचो आटोव चल्लो.
त्यॆ उप्रांत रॊन माय्कल वास हाच्या अध्यक्ष्पणाखाल कोंकणी कविगॊश्टि चल्लि, १६ कविंनि हांतुं भाग घेत्लो; उप्रांत हांतुं भाग घेत्ल्ल्यांनि विंचुन काड्ल्ल्या दोगां उत्तीम कविंक; वल्लि क्वाड्रस आनि फिलॊमेना फ्रान्सिस्कॊ हांकां मा।बा।ल्यान्सिन तशेंच मानेस्तिण बेनडिक्टा रेबेल्लोन मान केलो.
उप्रांत चल्ल्ल्या वॆदि कार्यांत मानेस्त बस्ति वामन शेणय, परिषदेचो अध्यक्ष मानेस्त गॊकुल्दास प्रभु, उपाध्यक्ष मानेस्त डा।चंद्रकांत शेणय, मुखेल सय्रो जाव्न मा।बा।ल्यान्सि, महाराष्ट्र कोंकणि असॊसियॆशनाचो अध्यक्ष मानेस्तिण बेनडिक्टा रेबेल्लो आनि लीयो फेर्नांडिस वेदिचेर हाजर आस्ल्लिं. आप्ल्या उत्रांनि मानेस्त गॊकुल्दास प्रभुन, च्यार राज्यांनि शिंप्डोन गेल्ल्या कोंकणी भासेचो पॊस कर्तेल्या वेवेग्ळ्या संस्थ्यांचो उल्लॆक करीत, आज कोंकणी भासेच्या उदर्गतेखातिर जाय्ते आव्कास आसात आस्तां, फकत्त ऎक ’एक्वटिक वाव्र कर्चें बरें मन’ मात्र ह्या भासेच्या विकासाक कारण करुंक सक्ता म्हणालो. मानेस्त बस्ति वामन शेणयान मुंबयांत कोंकणी भासेच्या मोगान व्हडा संख्यान आयिल्ल्या लोकाचि वाखण्णि करुन ’केद्नांय मंग्ळुर आय्ल्यार विश्व कोंकणी कॆंद्राक’ भेट दींव्क विसर्नाकात म्हणुन उलो दिलो.
मुखेल सय्रो मा।ल्यान्सिन ’कोंकणी भास’ आम्चि माय्भास आनि आम्च्या माय्भासेक आमि केदिंच सोडिनाये, ति भास एका संस्कृतेक, आनि एका सभ्यतेक घेव्न येता म्हणालो.
हेच्च संधर्भिं वेवेग्ळ्या संस्थ्यांनि, वेवेग्ळ्या प्रकारांनि वाव्र केलेल्या कोंकणी मानेस्तांक वॆदिक आपव्न मान केलो.
मानेस्त विन्सिन उप्कार आटय्लो तर, हें अपुर्भायेच्या कार्याचें निर्वाहण मानेस्त सिरिल क्यास्तलिनो पेर्नाल हाणें केलें.
रुचिक जेव्णासवें संप्ल्ल्या कार्यांत सुमार देड्शां वय्र कोंकणी लॊक हाजर आस्लो.
