[खबर] मुंबयांत कोंकणी बरव्प्यांचें सहमिलन
आशावादी प्रकाशन मुंबय आनी दिवो हफ्त्याळें हांच्या जोड आगोगाखाल
कोंकणी बरव्प्यांचें सहमिलन वाल्टर
लस्रादो आनी मा।स्टॆनी डि’कुन्हाचेर ऎक नियाळ
दॊन बुकांचें मोक्ळीक कारयें
११ अगॊस्त २०१९ (अंधॆरि, मुंबय): आशावादी प्रकाशन आनी दिवो कोंकणी हफ्त्याळें हाणि अगॊस्त ११ तारिकेर (आय्तारा) मुंबय्च्या मुड्ल अंधॆरिंत्ल्या ’आत्म दर्शनांत’ आयॊजित केल्ल्या कोंकणी बरव्प्यांच्या सहमिलनांत आय्लेवार देवाधीन जाल्ल्या नामणेच्या कोंकणी बरय्णार वाल्टर लस्रादो आनी मा।स्टॆनि डि’कुन्हा हांचेर ऎक नियाळ करुन तांकां शृद्दांजली भेटय्ली. दिवो पत्राचो संपादक मानेस्त लारेन्स कुवेल्होच्या अध्यक्ष्पणाखाल, चल्ल्ल्या ह्या कार्यांत वीज इ-पत्राचो संपादक दो। आस्टिन डि’सॊज प्रभु मुखेल सय्रो जाव्न हाजर आस्लो तशेंच उध्यमि मानेस्त जॊन डि’सिल्वा वेदिर हाजर आस्लो.
सकाळिं इक्रा वोरांक सुरु जाल्ल्या कारयांत बाय वाय्लेट आळ्व मूड्बेळ्ळेन वाल्टर लस्रादोचि सविस्तार वळोक करुन दिलि, तशेंच बाब लारेन्स कुवेल्हो आनी बाब आल्फॊन्सो डि’सॊज हाणिं वाल्टर लस्रादोविशिं सविस्तार माहेत दिवुन ताच्या वर्त्या गुणांचो उल्लॆक कर्तच मानेस्त वल्लि क्वाड्रसान मा।स्टॆनी डि’कुन्हाचि मट्वि वळोक करुन ताच्या समाज्सेवेच्या वाव्राविशिं, साहितिक वाव्राविशिं विवर दिलो.
उप्रांत शारल डि’सॊजान दो। आस्टिन डि’सॊज प्रभुचि वळोक करुन दितच दो। आस्टिन डि’सॊजान कोंकणी वाव्राक लागुन जोड्ल्लो अन्भव वांटुन, अप्णाक लाग्ल्लि कोंकणी खोरोज केदिंच निंव्चिना म्हणालो.
दो।आस्टिन डि’सॊज प्रभुच्या अध्यक्ष्पणाखाल दन्पारां उपरांत्ल्या कारयांत पय्ल्या वांट्यांत ’मुंबंय्त कोंकणी कित्लि प्रस्तुत आनी कोंकणीचो फुडार’ विश्याचेर बाय फिलॊमेना सांफ्रान्सिस्कोच्या मुखॆल्पणाखाल संवाद चल्लो. ह्या संवादांत बाय फ्लॊरा कल्माडि तशेंच युव प्रतिनिधि दो।रॊश्नि क्रास्ता हाणिं वांटो घेत्लो आनी आपाप्ले विचार प्रस्तुत केले. बाय फिलॊमेना सांफ्रान्सिस्कोन सविस्तार रितिन मुंबंय्त कोंकणी जिवाळुंक भुरग्यांक मुकार हाड्चेविशीं हरयॆका व्हडिलांनि आटोव करची गरज आसा म्हणालि.
संवादा उप्रांत्ल्या कार्यांत पय्णारी विशॆस अंको तशेंच ’कंगाल, कुक्केहळ्ळि मत्तु कतेगळु’ (कोंकणी मट्व्या काणियांच्या कन्नड अनुवादाच्या बुकाचें) मोक्ळीक कार्यें दो।आस्टिन प्रभु आनी रॊन्स बंट्वाळ हाणिं केलें. बूक उग्तावण कर्तच रॊन्स बंट्वाळान आय्च्या परिगतेविशिं तशेंच एका कोंकणी बरव्प्यांच्या खळ्मित नात्ल्ल्या मिनतेचेर तशेंच मिनतेचेर उज्वाड घालो.
मुंबयांत कोंकणी अभियान समितिंत वाव्र केल्ल्या समॆस्तांचो उडास काडुन हाजर आस्ल्ल्या रिचार्ड डि’सॊज सान्पाड, मॆरि वास कांदिवलि, फ्लॊरा कल्माडि जेरिमेरि हांकां काणिक दिवुन मान दिलो. हेच संधर्भार हाजर आस्ल्ल्या वाल्टर लस्रादोच्या पतिणेन मानेस्तिण बेन्नि लस्रादोन हाजर आस्ल्ल्या समॆस्तांक वाल्टर लस्रादोचो तर्जण मट्व्या काणियांचो बूक ’पाटिं पर्तल्लिं ल्हारां’ हाजर आस्ल्ल्या समॆस्तांक काणिकेरुपार दिलो.
पय्णारी संपादक वल्लि क्वाड्रसान कार्यें चलव्न वेलें.
- आम्चो भात्मी
