मुंबय (फेब्रेर २६): हेच्च फेब्रेराच्या २६ तारिकेर, आय्तारा सांजेर ६ वोरांचेर, अंधॆरिंत्ल्या आत्मदर्शन हांगासर, आशावादि प्रकाशनाच्या मुखॆल्पणाखाल सुर्वात्ल्ल्या मुंबयांत्ल्या सर्व कोंकणी संघटनांनि एक्वटित जाव्न आसा केल्लें ’कोंकणी सहमिलन’ भॊव अपुर्भायेन चल्लें.
मिरारॊड फिर्गजेचि याजक मा।बा।मेल्विन डि’कुन्हा हांच्या अध्यक्श्पणाखाल, ख्यात उध्यमि मानेस्त वि.पि. लॊबो मुखॆल सय्रो जाव्न आस्ल्ल्या ह्या कार्यांत, कोंक्णेंत पंद्रा वर्सां संपयिल्ल्या आशावादि प्रकाशनाचे पांच नवे कोंकणी बुकांचि मोक्ळीक, तशेंच ’पय्णारि.कोम विशॆस अंको’ पर्गट्ले, तशेंच कोंक्णेंत वेवेग्ळ्या शेतांत वाव्र केल्ल्यांक ’जीव्अव्देचें साधन’ केल्ल्या सर्व मानेस्त; ह्यारिबॊय (रंग्मंच), हेन्रि डि’सॊज (संगीत), लारेन्स सल्डान्हा (संगीत), तशेंच कोंक्णेंत्ल्या वेवेग्ळ्या शेतांनि ’विशॆस साधन’ केल्ल्या सर्व मानेस्त; वाल्टर लस्रादो नक्रे (अनुवाद), वि. डि’सिल्वा कांजूर्मार्ग (साहित), फ्रान्सिस फेर्नांडिस कास्सिया (नाटक), हेन्रि डि’पाव्ला (पत्रिकॊध्यम), लारेन्स कुवेल्हो (पत्रिकॊध्यम), ह्यारि फेर्नांडिस बार्कुर (फिल्म निर्दॆशन), जॊय पालड्का (नाटक निर्दॆशन), फ्रान्सिस ओलिवेरा (रंग्मंच) हांकां मान्पत्र, यादिस्तिका आनि काणिको दीव्न पर्गट मान केलो.
सांजेर ५:३० चेर काफि फळार आनि नोंदाव्णिसवें ६ वोराक सुर्वात जाल्ल्या ह्या कार्यांत कोंकण्तारां (जेरिमेरि) पंग्डाथाव्न, मानेस्त जॊन मस्करॆन्हसान बरव्न, संगीत दिल्लें ’स्वागत गीत’, पंग्डाच्या सांद्यांनि गायन कर्तच, कार्यें निर्वाहक मानेस्त फ्रान्सिस ओलिवेरान लोकाक येव्कार मागोन, ’कोंकणी एक्वट २०१७’ हाच्या प्रधान संचालक मानेस्त रिचार्ड डि’सॊज (कोंकाण - नविमुंबय), तशेंच संचालकि मानेस्तिण ग्लेंडा अल्मॆडा (दहिसर) हांकां, सय्र्यांक वेदिचेर आपव्न हाडुंक उलो दिलो. कार्याचें उध्घाटन करुन मा।बा।जॊकिम फेर्नांडिसान ह्या अपुर्भायेच्या कार्याक बरें माग्लें.
मानेस्त रिचार्ड डि’सॊजान अप्ल्या स्वागत उलव्पांत, वेदिचेर आस्ल्ल्या मुखेल सय्र्यांचि वळोक करुन, ’हो एक्वट, ऎक सुर्वात मात, पय्लें मॆट साहितिक मॆट, फुड्लें मॆट सांस्कृतिक मॆट आमि अशेंच एक्वटित थरान काडुंक आसा, देकुन एक्वटिक चिंत्पाच्या सर्वांक लागिं यॆव्न, मुंबयांत कोंकणी बोंदेर उभोच्च आस्चेपरिं करुंक उलो दिलो’.
’आशावादि प्रकाशनाचो पंद्रा वर्सांचो वाव्र’ - मानेस्त हिलरि डि’सिल्वा (प्रसन्न निड्डॊडि) हाणें वळोक कर्न दितच्च, मानेस्त अनंत अमेंबळान, मोक्ळीक जांव्क आस्च्या पांच बुकांचि वळोक करुन दिलि. मानेस्त सिरिल क्यास्तलिनोन ह्या पांच बुकांच्या बरव्प्यांचि मट्व्यान वळोक करुन दिलि. उप्रांत हे पांच बूक मोक्ळीक करुंक आयिल्ल्या सय्र्यांचि मट्वि वळोक फ्रान्सिस ओलिवेरान करुन दितच्च, तांकां वेदिचेर आपव्न काडुंक बुकांच्या बरव्प्यांक उलो दिलो; बंध (वल्लि क्वाड्रसाच्यो मट्व्या काण्यांचो जमो) बुकाचि मोक्ळीक मानेस्त चार्ल्स डि’मेल्लो पांग्ळा हाणें केलें, सर्गावय्लि मांय (रोनाल्ड ओलिवेरा पडुकॊणेचो मट्व्या काण्यांचो जमो) बुकाचि मोक्ळीक मानेस्तिण जानेट डि’सॊजान केलें, अपवित्र संबंध (वाल्टर लस्रादो नक्रेचो मट्व्या काण्यांचो जमो) बुकाचि मोक्ळिक मानेस्त ~आंड्रु मेंडोन्सान केलें, बजार (वल्लि क्वाड्रसाच्या कवितेंचो जमो) बुकाचि मोक्ळीक मानेस्तिण फिलॊमेना सांफ्रान्सिस्को (गोंय्चि फामाद कवयत्रि) हिणें केलें, मुग्दनात्ल्लिं गितां (वल्लि क्वाड्रसाच्या कविता विश्लॆषणांचो जमो) बुकाचि मोक्ळीक मानेस्त जियॊ आग्रार हाणें केलें.
बुकांचें मोक्ळीक कार्यें जाव्न, अप्ल्या उलव्पान बाय फिलोमेना सांफ्रान्सिस्कोन वल्लि क्वाड्रसाच्या कवितेंचेर, चिंत्पाचेर, तशेंच संसारि बजारि चिंत्पाचेर अप्लिं भग्णां उचारुन, अप्लि कविता प्रस्तुत केलि. जियॊ अग्रार अप्ल्या उलव्पांत, वल्लिच्या कोंकणी मिसांवाविशिं, कठीण हट अनि परिश्रमासवें, कोणाच्या खोडि-कुल्पांचो सय्त बेपर्वा करुन कर्च्या वाव्राचेर एकोडो उज्वाड फांकय्लो, तशेंच एका ल्हान कवितेचेर अप्ल्या जिण्येंत गळ्सिल्ल्या अन्भॊगानिम्तिं सविस्तार रितिन केल्लिं एकॆक विश्लॆषणां, खंडित जाव्न कवि जाल्ल्यानिंच वाचुंक तशेंच शिकुंक जाय्तें आसा म्हणालो. बरव्पि रोनाल्ड ओलिवेरा अप्ल्या बुकाक परत ऎक पाव्टिं पर्गटुन यॆंव्क कारण जाल्ल्या सर्वांक उप्कारि मनान धिन्वास्लें.
उप्रांत ’पय्णारि विशॆस अंको २०१७’ हाचें उग्तावण मा।बा।मेल्विन डि’कुन्हान केलें, बुकाचें उग्तावण जातच्च, वल्लि क्वाड्रसान अप्ल्या संपादकाच्या उत्रांनि ह्या बुकाक हकीगतेंत यॆंव्क कारण जाल्ल्या सर्वांक धिन्वासुन, हें मॆट ऎक ल्हान सुर्वात मात, फुडें जाय्तिं कामां करुंक आस्चेविशिं माहेत दिलि, तशेंच T3 प्रायॊजित ’पय्णारि साहितिक स्पर्धो’ चें घॊषण केलें. कार्याच्या पय्ल्या भागाचें निर्वाहण फ्रान्सिस ओलिवेरा पडुकॊणेन भॊव अपुर्भायेन कर्तच, कोंकण तारां पंग्डाथाव्न अपुर्भायेचो नाच प्रस्तुत जालो.
कार्याच्या दुस्र्या भागांत सुर्वातेर वल्लि क्वाड्रसान, कोंक्णेंत वेवेग्ळ्या शेतांनि जाय्तो वाव्र करुन, खबर नास्तानांच आम्कां सांडुन गेल्ल्यांचो उडास काडुन, प्रत्यॆक जाव्न दे।विक्टर कोन्सेसो, आनि दे।गिब्बा कुल्शॆकर हांच्या अत्म्याक शांति मागुन, सर्वांनि अर्धें मिनुट उभें रावुन माग्तच, ’अप्ल्या एदोळ्च्या तेत्तीस वर्सांच्या साहितिक काळार, भोव थोडे दीस अप्ल्या जिण्येआव्देंत उडासाक उर्चेतसले जाव्नासात, तांतुं आय्चो दीस खंडित महत्वाचो, कित्याक म्हळ्यार, अप्ल्या साहितिक भुर्ग्यापणार ज्या कलाकारांक, संगीत्कारांक, साहित्कारांक हांव वळ्कुन आयिल्लों, आज तसल्यांक हांगासर वेदिचेर पर्गट मान आसा आनि ह्या कार्यांत वांटेलि जांव्चें भाग देवान म्हाका फावो केलां, आनि असल्यांक दिल्लो/दिंव्चो मान, फकत्त तांकां दिल्लो मान न्हय, बगार अम्कांच आमि दिंव्चो मान. जांव्क पुरो कोंकणी वाव्र केल्ल्या ह्या महान कलाकारांनि संसारि विलासि धन-दिर्वें पुंजांव्क ना, पुण अप्ल्या मायामोगानिम्तिं आज सय्त कोंक्णी लॊक तांचेर अभिमान पाव्ता आनि तांकां मान कर्ता’ म्हणालो.
’जिण्येआव्देचें साधन’ केल्ल्या ह्यारिबॊय, हेन्रि डि’सॊज, लान्रेन्स सल्डान्हा हांचिं मान्पत्रां; नेरि नज्रेत ताकोडे, हिल्डा पांग्ळा, हिलरि डि’सिल्वा हाणिं वाचुन जातच, मा।मेल्विन डि’कुन्हा आनि मानेस्त वि.पि.लॊबो हांचेसवें मानेस्तिण ज्यॊति लॊबो हाणिं मान्पत्र, यादिस्तिका, आनि काणिको दिवुन पर्गट मान केलो.
त्यॆ उप्रांत, ’विशॆस साधन’ केल्ल्यांक, मुंबयांत्ल्या कोंकणी संघटनाचे मुखेलिंनि पर्गट मान केलो; वाल्टर लस्रादो नक्रेक माल्वाणि संघटनाचो अध्यक्ष फेलिक्स माल्वाणिन मान केलो, वि. डि’सिल्वाक थाणे संघटनाचो कार्यदर्शि मानेस्त क्रिस्टॊफर डि’सॊजान मान केलो, हेन्रि डि’पाव्लाचो मान स्वीकार केल्ल्या मानेस्त फिलिफ वि’ डि’सॊजाक कोंकण्तारां संघटनाचो अध्यक्ष जॊन मस्करॆन्हसान मान केलो. फ्रान्सिस फेर्नांडिसाक बोरिव्लि संघटनाचो प्रतिनिधि जॊसेफ बोरिव्लिन मान केलो, लारेन्स कुवेल्होचो मान स्वीकार केल्ल्या सिप्रि संपिगेक कांदिवलि संघटनाचो अध्यक्ष वलॆरियन पाय्स हाणें मान केलो, ह्यारि फेर्नांडिस बार्कुर हाका मलाड कोंकणी संघटनाचो प्रतिनिधि सिरिल क्यास्तलिनोन मान केलो, जॊय पालड्काक वसय कोंकणी संघटनाचो अध्यक्ष रेजिनाल्ड सांतुमायेरान मान केलो, फ्रान्सिस ओलिवेराक बार्कुर्गारांच्या संघटनाचो अध्यक्ष ऐवन रेबेल्लोन मान केलो. सर्वांक मान्पत्र, यादिस्तिका आनि काणिको दिवुन मान केल्ल्या अध्यक्ष/प्रतिनिधिंक ’यादिस्तिका आनि काणिको’ दिवुन रिचार्ड डि’सॊज अनि ग्लेंडा अल्मॆडा हाणिं धिन्वास्लें. इत्लें अपुर्भायेचें कार्यें मांडुन हाड्ल्लेपासत प्रधान संचालक रिचार्ड डि’सॊजा आनि संचालकि ग्लेंडा अल्मॆडा हांकां मा।बा।मेल्विन डि’कुन्हान यादिस्तिका दिवुन मान केलो. तेच्च्परिं मुंबयांत्ल्या सर्व कोंकणी संघटनाच्या मुखेल्यांक/प्रतिनिधिंक वेदिचेर आपव्न, मा।बा।मेल्विन डि’कुन्हान सर्वांक बुकांचि मान्प्रति दिलि.
’साहित्यामुखांत्र समाज्सेवा’ - होच्च ध्यॆय आशावादि प्रकाशनाचो, देकुन ’कुवॆय्ट्गारांचो झेलो विशॆस अंको (२००३), दिवो-दाय्ज विशॆस अंको (२००५), मित्र-दाय्ज विशॆस अंको (२००७) आनि पय्णारि.कोम विशॆस अंको (२०१७)’ मुखांत्र फकत्त गर्जेंत आस्च्यांक आर्थिक कुमोक केल्या. आनि हेंच चिंताप आम्चें फुडेंय ज्यारि आस्तलें, आध्ल्या वर्सांत पय्णारि.कोम सुर्वातेर अप्ल्या भलाय्कि होग्डाव्न भॊव कश्टांत आस्ल्ल्या फामाद कोंकणी बरव्पि रोनाल्ड पिरॆरा आंजेलॊराक ’रोनाल्ड पिरॆरा निधि’ स्थापित करुन लग्बग दॆड लाख रुप्यांचि मजत केल्लि. पुण आज होच्च बरव्पि, उटोन बसुंक सकाना, वख्तात सय्त ताचेलागिं दुडु ना देकुन आज पर्गट्ल्ल्या पांच बुकांच्या विख्र्याचो अर्धो ह्या मिसांवाखातिर आमि काम कर्तेल्यांव, देकुन ह्या पांच बुकांचें मॊल (रु.८७५) पुण अमि रु.६०० लेकान तुम्कां पावित कर्तेल्यांव, आनि हांत्लो अर्धो ऐवज आमि रोनाल्ड पिरॆराच्या वख्तांच्या खर्चाक दितेल्यांव देकुन बरे मनाच्या कोंकणी लोकांनि अप्लें उदार मन धाखंव्क उलो दिलो.
सन्मानितां तर्फेन उलयिल्ल्या मानेस्त हेन्रि डि’सॊजान ’एदोळ म्हणासर कोंक्णेंत खंय्चर्यी असलें ऎक अपुर्भायेचें कार्यें जांव्क ना, देकुन हो मान खरोच्च जाव्न भॊव महत्वाचो तशेंच काळ्जांत सदांच उडासाक उर्चेतसलो, आनि असलें ऎक कार्यें मुंबयांत उभें कर्चें तित्लें सलीसायेचें न्हय तर्यी, पाट्ल्यान जाय्ति मिनत केल्ल्या एक्वट पंग्डाक तशेंच आशावादि प्रकाशनाक उल्लास पाटय्लो.
मुखेल सय्रो जाव्न हाजर आस्ल्लो ख्यात उध्यमि तशेंच T3 संस्थ्याचो माल्हक मानेस्त वि. पि. लॊबोन, कोंक्णि पत्रिकॊध्यमाचे उदर्गतेखातिर वावुर्ताना, फकत्त सिंतिमेंतां मात्र मतिंत दवरिनास्ताना, आर्थिक रितिन सय्त चिंताप आटंव्चें गर्ज आस्तां, कोंक्णेचो जाय्तो उध्यमि आज मुंबयांत आसा पुण कोंक्णि पत्रांनि जाहीरातां दिसोन येंव्चिं भॊव थोडिं, देकुन कोंक्णि अभिवृद्देचि जवाभ्दारि सर्वांनि म्हणुन सांगालाग्लो.
कार्याचो अध्यक्ष मा।बा।मेल्विन डि’कुन्हान अप्ल्या उलव्पांत; ’देवान सर्वांक वेवेग्ळिं देणिं दिल्यांत आनि तिं देणिं हर्येक्ल्यांनि समाजेच्या बरेपणापासत गळ्सुंचि भॊव गर्ज आसा, देकुन साहित्यामुखांत्र समाज्सेवा कर्च्या आशावादि प्रकाशनाच्या मिसांवाक लोकांचो भर्पूर पाटिंबो मेळुंदि तशेंच सर्वेस्पराचिं आशीर्वादां पडुंदि म्हणालो’
मानेस्तिण ग्लेंडा अल्मॆडान उप्कार आटव्णि केलि. दुस्र्या भागाचें कार्यें निर्वाहण वल्लि क्वाड्रसान केल्लें.
[कोंकण - नविमुंबयांत्लें कोंकणी संघटनान, कोंकण्तारां जेरिमेरि हाणिं अप्ल्या संघटनाच्या तर्फेन रोनाल्ड पिरॆराक कुमोक कर्च्या आशावादि प्रकाशनाच्या मिसांवांत वांटेलि जांव्चो भर्वसो दिलो]
:भात्मी: एक्वट भात्मी
