[खबर] कोंकणी कथेंचेर राश्ट्रीय वेबिनार - कथाविहान
आशावादी प्रकाशन आनी उज्वाड पंद्राळें हांच्या जोड पालंवाखाल कोंकणी मोटव्या कथेंचेर केल्लें राश्ट्रीय पांवडाचें वेबिनार २ अक्तोबर (आयतारा) सांजेर ४ थावन ६ परयांत चल्लें.
बाय दक्षिता सल्गांवकार हिणें सर्वांक येवकार मागून कथाविहान आयच्या कोंकणी साहितीक वर्तुलांत कित्याक गर्जेचें म्हणून विवरावन हें सत्र चलयलें.
उध्यमी तशेंच कोंकणी गावपी, अभिनेता मानेसत जोसेफ मथायसान उग्तावण करून कोंकणी साहित्याक डिजिटल माध्यमांत उंचायेचो पांवडो दिंवचेदिशेन वावर कर्च्या समेसतांक उल्लास पाठयले.
उज्वाड पंद्राळ्याच्या संपादकान मा|बा|रोयसन फेर्नांडिसान येवकार उलवप करून, कोंकणी साहित्यांत मोटव्या कथेंचेर वावर कर्ची बरीच गर्ज आसा आनी त्या दिशेन राश्ट्र पांवडार एक वेदी तयार कर्च्यांत कथापाठ मिसांव खंडीत सुफळ जालां म्हळ्ळें पाटल्या तीन वर्सांनी मांडून हाडलेल्या तीन कथापाठ शिंकळेंच्या अट्रा-वीस वेबिनारांनी रुजू केलां आनी एका प्रांत्याक मात सीमीत जावन नासताना हेर प्रांत्याच्या कथाकारांची वळोक आनी तांच्या साहित्याचें अभ्यास करुंक आमकां मेळल्ली संधी खंडीत जावन युवजणांक लाभल्लो एक वर्तो आवकास म्हणाले.
बाब शयलेंद्र मेहतान दोन अध्ययन पुसतकांची मोटव्या परिचय करून कशें हीं दोन पुसतकां दोन लिपिंनी (कन्नड आनी नागरी) आसून च्यार पुसतकां जातात म्हणालो.
’चल दोन चंद्रांक’ (समकाळीन कथाकार बाब एडवीन जे.एफ.डी’सोज आनी बाब वल्ली वग्गच्या च्या-च्यार कथेंचेर वल्ली क्वाड्रसान केल्लें तुलनात्मक अभ्यास पुसतक डिजिटल विमोचन करून) विशीं अपल्या प्रसतावीक उलवपांत उलयित्त दो|प्रकाश पेरियंकर (गोंय विध्यापीठाच्या कोंकणी विभागाचो आधलो मुखेसत तशेंच राश्ट्र पुरसकार जिकपी कथाकार) हाणीं आमी असलो कोंकणी वावर एकामनान केलोना तर खरेंच जावन आमी आमच्या वर्तुलाभितर बोन्साय जावन उर्तल्यांव म्हणालो.
’कथाविहान’ (समकाळीन कथाकारांच्या कथेंचेर केल्ल्या सात तुलनात्मक अभ्यास लेखनाच्या पुसतकाक डिजिटल विमोचन करून ह्या पुसतकाचेर उलयिल्ल्या दो|किरण बुडकुलो (गोंय विध्यापीठाच्या इंगलीश विभागाची आधली मुखेसत) हिणें उलवन खरेंच कोंकणिंत सयत उंचल्या दर्जेच्या साहित्य निर्माणांत कथापाठाचो वावर खूप मजतदार जातलो म्हणाली.
दूसऱ्ये सत्रेंत च्यार राज्यांतल्या मोटव्या कथेंचेर च्यार प्रबंधां मांडन जालीं;
गोंयचे कथाकार आनी कथाचेर दो|रेश्म अनील खोल्कार हिणें प्रभंध मांडलो
कर्नाटकाचे कथाकार आनी कथाचेर बाय लवी गंजिमठ हिणें प्रभंध मांडलो
महाराश्ट्राचे कथाकार आनी कथाचेर बाब हिलरी डिसिलवान प्रभंध मांडलो
केरळाचे कथाकार आनी कथाचेर बाय नमृता पी किणी हिणें प्रभंध मांडलो
दे|फ्रेड्रीक क्वाड्रस स्मारक आशावादी प्रकाशनाचे डिजिटल माध्यमाच्या वावराचे २०२२ वर्साचे पुरसकार जिकप्यांचीं नांवां बाय मोनिका डे’सा मथायस हिणें उचारलीं;
पयलें स्थान: बाय योगिता वेर्णेकरान वेबिनार ६ चेर सादर केल्ल्या प्रभंधाक (वल्ली क्वाड्रस आनी एच्चेम हांच्या कथेंचेर केल्लें अभ्यास)
दुस्रें स्थान: बाय कृपाली नायक हिणें वेबिनार ३ चेर सादर केल्ल्या प्रभंधाक (पुंडलीक नायक आनी एन. शीवदासाच्या कथेंचेर केल्लें अभ्यास)
तिस्रें स्थान: मा|बा|जेसन पिंटोन वेबिनार ७ चेर सादर केल्ल्या प्रभंधाक (जयंती नायक आनी वसंत सावंताच्या कथेंचेर केल्लें अभ्यास)
बाब मेलवीन रोड्रिगसान बाय क्याथरीन रोड्रिगसाची आनी तिच्या सविसतार साहित्यीक वावराची ओळोक करून तिच्या ५० कथेंच्या पुसतकाचेर उलवन ’क्याथरीन रोड्रिगसाच्यो मोटव्यो कथा’ पुसतकाचें डिजिटल विमोचन केलें.
बाय डो|जयंती नायकान बाब वल्ली क्वाड्रसाच्या २५ कथेंच्या पुसतकांक (सांकव; कन्नड आनी नागरी लिपियेंत) डिजिटल विमोचन करून कोंकणी कथा साहित्यांत बाब वल्लीन येदोळच अपलें स्थान घेतलां आनी ह्या दिशेन ताच्यो सभार कथा उत्कृश्ट कोंकणी कथेंनी मेजुंक जाता म्हणून हो सांकव फकत दोन प्रदेशांचो मात्र न्हय दोन विचारांचो, दोन तत्वांचो, दोन सिद्धांताचो म्हणाली.
बाब वसंत सावंत हाणीं वल्ली क्वाड्रसान लिपियंतर आनी संपादन केलेल्या राश्ट्रीय पांवडाच्या तीसऱ्या संकलनाचेर (सूर्यो उदेला) पुसतकाची ओळोक करून ह्या पुसतकाचें डिजिटल विमोचन केलें.
त्ये उपरांत हाजर आसल्ल्या दो|आसटीन प्रभून ह्या वेबिनारा थावन खरेंच खूप शिकुंक आवकास मेळ्ळो आनी त्या दिशेन वावे केल्ल्या आशावादी प्रकाशनाक आनी उज्वाड पंद्राळ्याक धिन्वासलें.
बाब उब्ब मूडबिद्रीन कोंकणी बरयणारांनी पयलें आधल्या कथाकारांचें साहित्य वाचुंक जाय म्हणालो.
मा|बा|रोयसन फेर्नांडिसान धिन्वास पाठयलें.
हें कथाविहान वेबिनार बाय दक्षिता सल्गांवकार आनी बाब शैलेंद्र मेहता हाणीं चलवन व्हेलें.
