[खबर] कथापाठ (राषट्रीय वेबिनार) शिंकळ - ६.
राश्ट्रीय डिजिटल कामासाळ कथापाठ (शिंकळ - ६) उग्तावण
२६ जुलाय २०२५: आशावादी प्रकाशनान वरसान वरस चलंव्चें राश्टईय मट्टाचें साहितिक कामासाळ कथापाठाची सवी शिंकळेचें उग्तावण जुलाय २६ तारिकेर सन्वारा सांजेच्या ४:१० थाव्न ५:४५ म्हणासर डिजिटल माध्यमाचेर चल्लें. सां। लुविस विध्यापीठ मंग्ळुर हांचे कुलपती मा। दो। प्रवीण मार्टिसान डिजिटल उग्तावण करुन "कोंकणी साहितिक अध्ययन खरेंच जाव्न आय्चा काळार भॊव गर्जेचो विशय, आनी ह्या अध्ययनांत राश्ट्रीय पांव्डार वेग-वेगळ्या कोलेजिंनी शिक्चिं विध्यार्थिंनी वांटो घेंव्चो, आनी त्या पासत हो आव्कास फावो करुन दिंव्च्या आशावादी प्रकाशनाक तशेंच भागिदार सर्व कोलेजिंच्या कोंकणी मुखेस्तांक उल्लास" म्हणालो.
दॆविता खुलेन कथापाठाच्या सुर्वातेर जुलाय २१ तारिकेर अंतर्लेल्या बाय ग्लॆडिस रॆगोच्या अत्म्याक शांती माग्च्या इराद्यान ऎक मिनुट माव्न प्रार्थन केलें. उप्रांत येव्कार करुन सर्व मान सय्र्यांची मोट्वी ओळोक करुन दितच बाब शैलॆंद्र मेह्तान पय्णारी २०२५ वरसाचो कथाकार मा। चॆतन लॊबोचि, तांच्या पर्गट्लेल्या पुस्तकांचि, तांच्या साहितिक दॆण्गेची झळक दिलि. गोंय्ची नाम्नेची कोंकणी संशॊधकि, प्राध्यापकी बाय दो।किरण बुड्कुलेन मुखेल उलव्प करुन कोंकणी कथेंचेर विशय, आशय तशेंच हेर तांत्रिक विश्यांचेर जागतिक स्थराचेर कथा खंच्या पांव्डार आसात आनी कोंकणिंत्ल्यो कथा मुकार पावोंक असलिंच कामासाळां, एकामेका हात धरुन, एका मनान, मोगान आनी गौरवान हें मिसांव मुकारुन व्हर्ची गर्ज आसा म्हणालि. तिच्या उलव्पांत ऒ हेन्री तशेंच हेर थोड्या कथेंचो मोट्वो विवर दिवुन, कोंकणिंत सय्त असले अपुर्भायेचे कथाकार आस्ची माहेत दिवुन बाब एड्विन जे.एफ. डि’सॊजाची मोट्वी कथा ’दिर्वें’, बाब गजानन जॊगाची मोट्वी कथा, तशेंच हेर थोड्या वेग-वेग्ळ्या विशय-कथानक्चेर आयिल्ल्या कथेंचेर तिणें अपुर्भायेचें उलव्प करुन, ह्या कथापाठ उपक्रमाच्या सर्व आयॊजकांक धिन्वास्लें.
मुखेल सय्रो जाव्नास्लो विश्व कोंकणी कॆंद्र मंग्ळुर्चो संचालक बाब नंदगॊपाल शेणय हाणें अप्ल्या उलव्पांत कोंकणी साहित्याचें अध्ययन खरेंच जाव्न मुक्ल्या दिसांनी बरे साहिती निर्मित कर्च्या दिशेन उप्काराक पड्तेलें म्हणालो.
मा। चॆतन लॊबोन अप्ल्या संधॆशांत म्हळें; "आय्च्या परिगतेंत कोंकणिंत आस्च्या कथाकारांपय्किंक प्राय्वंत वा उतर प्राय्वंत कथाकार चड आसात आनी तर्नें/युव कथाकार उणें. ह्या दिशेन वाव्र कर्ची गर्ज आसा, कथाकाठ कामासाळ पाट्ल्या कांय तेंपाथाव्न असल्या चिंत्पाक पाटिंबो दिवुन आसा आनी हाची फाय्दो युवजणांनी जोड्ची गर्ज आसा".
गोंय कोंकणी अकाडेमिचो अध्यक्ष दो। पूर्णानंदा च्यारिन अप्ल्या उलव्पांत म्हळें; "कथापाठ ऎक बरें उपक्रम, ह्या कथापाठ वेबिनारांनी प्रपत्रां सादर जातात, बरी गजाल. पुण ऎक कथा वाचन जाव्न त्या कथेचेर केल्लें अध्ययन पत्र सादर जालें तर, आसक्त आस्च्या विध्यार्थिंक ऎक कथा कशी बरव्येत म्हळ्ळें मार्गदर्शन मेळुंक साध्य आसा".
दल्गादो कोंकणी अकाडेमिचो अध्यक्ष बाब सेल्सो फेर्नांडिसान अप्ल्या उलव्पांत "कोंकणी भास लोकांनी सांबाळुंक कोंकणी साहित्य उप्कार्ता, देकुन कोंकणी साहित्याच्या उदर्गतेक लागुन वाव्र कर्पाची गर्ज आसा" म्हणालो.
इ-उज्वाड नॆमाळ्याचो संपादक बाब लुविस रोड्रिगसान अप्ल्या उलव्पांत "कोंकणी साहित्याचें अध्ययन अशेंच उंच्ल्या पांव्डाक पावोंदि" म्हणालो.
धेंपे कोलेजिच्या कोंकणी विभागाची मुखेस्त बाय अंजु साखर्दांडेन अप्ल्या संधॆशांत "कथापाठ कामासाळा मुखांत्र आम्कां गोंयांत अध्ययन कर्पी विध्यार्थिंक कन्नड लिपिंत आस्च्या अपुर्भायेच्या कथाकारांचो तशेंच तांच्या कथेंची ओळोक मेळ्ळि. देकुन हो सांकव फुडें वचोंक फावो आनी कोंकणी साहित्याची गिरेस्त्काय पय्लें आम्कांच सम्जोंक पावोंदि" म्हणालि.
आशावादी प्रकाशनाच्या वल्ली क्वाड्रसान कथापाठाचो पॊषक मानेस्त माय्कल डिसॊजाक, तशेंच समॆस्त मान सय्र्यांक, जॊड-आयॊजकांक, प्रपत्रां सादर कर्पिंक, सूत्र संचालकांक तशेंच वांटेली जांव्चा समॆस्त विध्यार्थिंक, बरव्प्यांक, विमर्शकांक धिन्वास पाठय्ले.
=====
पय्णारी २०२५ वरसाचो कथाकार पुरस्कार जोड्पी मा। चॆतन लॊबोच्या मोट्व्या कथेंच्या वेग-वेगळ्या विश्यांचेर पांच प्रपत्रां ह्या कथापाठ शिंकळेंनी चल्च्या वेबिनारांनी सादर जातलिं (शन्वारां ४:१५ थाव्न ६:०० पर्यांत).
०२ अगॊस्त (सन्वारा): प्रपत्र-१: मा।चॆतन लॊबोच्या कथेंत्ली वय्चारिकता (बाय मॆगन डे सॊज, गोंय)
०९ अगॊस्त (सन्वारा): प्रपत्र-२: मा।चॆतन लॊबोच्या कथेंत्ली सिद्धांतिकता (मा। रॊमन रोड्रिगस, गोंय)
१६ अगॊस्त (सन्वारा): प्रपत्र-३: मा।चॆतन लॊबोच्या कथेंत्ली समाजिकता (बाय दॆविता खुले, गोंय)
२३ अगॊस्त (सन्वारा): प्रपत्र-४: मा।चॆतन लॊबोच्या कथेंत्ली आध्यात्मिकता (मा। जॆसन पिंटो, मंग्ळुर)
[Khobor] KOTHAPATT (Raxttri-i Webinar) Xinkoll 6.
कथापाठ शिंकळ - VI
