ಜೋನ್ ಕ್ರಾಸ್ತಾ - ಕೊಂಕ್ಣೆಚೊ ಬಳ್ವಂತ್ ಫುಡಾರಿ - ಏಕ್ ಶೃದ್ದಾಂಜಲಿ.
"ದೊಳೆ ತೆ ಬಿಜ್ತಾತ್ ದುಕಾಂನಿ
ಪುಣ್ ಪೊಲ್ಯಾರ್ ಹಾಸೊ ಹಾಡ್ತಿತ್
ತುಜ್ಯಾ ಕರ್ತುವಾಂಚೊ ಉಗ್ಡಾಸ್ ಯೆತಾನಾ
ಮಿರಾರೋಡಾಂತ್ಲೊ ಕೊಂಕ್ಣೆಚೊ ಭಂವರ್ ತುಂ
ಕೊಂಕ್ಣಿ ಕಾಳ್ಜಾಂಚೊ ಕುಂವರ್ ತುಂ"
ದೆವಾಧಿನ್ ಜೋನ್ ಕ್ರಾಸ್ತಾಕ್ ಸಹಜ್ಲ್ಲಿಂ ಉತ್ರಾಂ ಹಿಂ. ಜಿಣ್ಯೆ ತಾರುಂ, ಜೀವನ್ ಮ್ಹಳ್ಳ್ಯಾ ದರ್ಯಾಂತ್ ಆಪ್ಲೆಂ ಪಯ್ಣ್ ಸಂಪವ್ನ್ ಗಡಿಕ್ ಪಾಟಿಂ ಪರ್ತನಾಸ್ತಾಂ ದುಸ್ರ್ಯಾಚ್ ಅಗಣಿತ್ ದೇಶಾಂತ್ ಪ್ರವೇಶ್ ಜಾಲೆಂ. ಹ್ಯಾ ದುಖಾಳ್ ಘಡ್ಯೆ ಮರಣ್ ಪಾವ್ಲ್ಲ್ಯಾ ಆಮ್ಚಾ ಭಾವಾ ಜೋನ್ ಕ್ರಾಸ್ತಾಕ್ ಸೈಂಟ್ ಜೊಸೆಫ್ಸ್ ಕೊಂಕಣಿ ವೆಲ್ಫೇರ್ ಅಸೊಶಿಯೇಶನ್ ಮಿರಾರೋಡ್ ತರ್ಫೆನ್ ಶೃದ್ದಾಂಜಲಿ ಭೆಟಂವ್ಕ್ ತಸೆಂಂಚ್ ತಾಚ್ಯಾ ಕುಟ್ಮಾಕ್ ಭುಜಾವಣ್ ಪಾಟಂವ್ಕ್ ಹೆಂ ಮ್ಹಜೆಂ ಲ್ಹಾನ್ಶೆಂ ಪ್ರಯತನ್.
ಮಿರಾರೋಡಾಂತ್ಲೊ ಏಕ್ ಬಳ್ವಂತ್ ಕೊಂಕ್ಣಿ ಫುಡಾರಿ ಆಜ್ ಆಮ್ಚಾ ಮಧೆಂ ನಾ ಮ್ಹಣ್ ಚಿಂತುಂಕ್ ಕಷ್ಟ್ ಮಾರ್ತಾತ್. ಮಾನೆಸ್ತ್ ಜೊನ್ ಕ್ರಾಸ್ತಾ - ಮಿರಾರೋಡಾಂತ್ಲೊ ಏಕ್ ಬಳಿಷ್ಟ್ ಆನಿ ತಾಂಕಿವಂತ್ ಕೊಂಕ್ಣಿ ಸಂಘಟಕ್. ಚೊವ್ದಾ ವರ್ಸಾಂ ಸಾಂ. ಜುಜೆ ಕೊಂಕ್ಣಿ ವೆಲ್ಫೇರ್ ಎಸೋಸಿಯೇಶನಾಚೊ ಮುಖೆಲಿ ಜಾವ್ನ್ ವಾವ್ರ್ ದಿಲಾ ಆನಿ ಲೊಕಾಮೊಗಾಳ್ ಜಾಲಾ. ಕೊಂಕ್ಣಿ ಭಾಸೆಚ್ಯಾ ಆನಿ ಕೊಂಕ್ಣಿ ಸಂಸ್ಕ್ರತಿಚ್ಯಾ ಉದರ್ಗತೆ ಖಾತಿರ್ ವಿವಿಧ್ ಕಾರ್ಯಿಂ ತಾಣೆ ಮಾಂಡುನ್ ಹಾಡ್ಲ್ಯಾಂತ್. ಕೊಂಕ್ಣೆ ಖಾತಿರ್ ತೊ ಸದಾಂ ತಯಾರ್ ಆನಿ ಜಾಯ್ನಾ ಮ್ಹಣ್ ಪಾಟಿಂ ಸರ್ಚೊ ಮಾನಾಯ್ ಕೆದಿಂಕ್ಚ್ ನ್ಹಯ್. ಸಾಂ. ಜುಜೆ ಕೊಂಕ್ಣಿ ವೆಲ್ಫೆರ್ ಸಂಘ್ ಮಿರಾರೋಡ್ ಹಾಚೊ ಪ್ರಸ್ತುತ್ ಅಧ್ಯಕ್ಷ್ ಜಾವ್ನಾಸ್ಲ್ಲೊ.
ಅಗ್ರಾರ್ ಫಿರ್ಗಜೆಂತ್(ಪುನೆಕೊಲ್) ತಾಚೊ ಜಲ್ಮ್ 15 May 1962- ಂತ್ ಜಾಲೊ. ಲಾಗ್ಸಾರ್ಚ್ಯಾ ಒಮ್ಜುರ್ ಫಿರ್ಗಜೆಂತ್ ಮೂಳ್ ಶಿಕಪ್ ಕರುನ್ ಬರ್ಯಾ ಫುಡಾರಾ ಖಾತಿರ್ ಮುಂಬಯ್ ಪಾವ್ಲೊ. ಸುರ್ವೆರ್ ಥಾವ್ನ್ಂಚ್ ಸ್ವ-ಉಧ್ಯಮಾಂತ್ ಆಸಕ್ತ್ ಆಸ್ಲ್ಲ್ಯಾನ್ ಮುಂಬಯ್ ಯೇವ್ನ್ ಥೊಡ್ಯಾಚ್ ವರ್ಸಾನಿಂ ಆಪ್ಲೆಂ ಸ್ವಉಧ್ಯಮ್ ಸ್ಥಾಪಿತ್ ಕರುನ್ ಯಶಸ್ವಿ ಜೊಡುಂಕ್ ಪಾವ್ಲೊ. ತಿತ್ಲೆಂಚ್ ನ್ಹಯ್ ಸಮಾಜ್ ಸೆವಾ ಕರ್ಚ್ಯಾಂತ್ , ಗರ್ಜೆವಂತಾಕ್ ಪಾಂವ್ಚ್ಯಾಂತ್ ತಾಚೊ ಉಕಲ್ಲೊಲೊ ಹಾತ್.
ಕನ್ನಡಾಚೊ ಮಾಲ್ಗಡೊ ಕವಿ ಜಿ ಯಸ್ ಶಿವರುದ್ರಪ್ಪ ಆಪ್ಲೆ ಎಕಾ ಕವಿತೆಂತ್ ಆಶೆಂ ಮ್ಹಣ್ತಾ- "ಏಕ್ ದೀಸ್ ಆಮ್ಚೊ ಜಲ್ಮ್ ತರ್, ಮರಣ್ ಆನ್ಯೇಕ್ ದೀಸ್, ಹಾಚೆ ಮಧ್ಲೆ ತೆ ದೀಸ್ ಹಜಾರ್, ಹೆಂಚ್ ತೆಂ ಜೀವನ್". ವ್ಹಯ್ ತುಜ್ಯಾ ತ್ಯಾ 59 ವರ್ಸಾಂಚಾ ಫಳಾದಿಕ್ ಸಂಸಾರಿ ಪಯ್ಣಾಂತ್ ಜೀವನಾಚೆ ವಿವಿಧ್ ಹಂತ್ ಜಾಂವ್ಕ್ ಪುರೊ ಪೂತ್, ಭಾವ್, ಪತಿ, ಬಾಪುಯ್ ಆನಿ ಏಕ್ ಆಪ್ತ್ ಮಿತ್ರ್ ಆಮಾಂ ಸರ್ವಾಂಕ್, ತುವೆಂ ಯಶಸ್ವಿ ಥರಾನ್ ಸಾಂಬಾಳ್ಯಾಯ್.
ಉದೆಲ್ಲೊ ಸುರ್ಯೊ ತೊ ಬುಡ್ತಾ, ಫುಲ್ಲ್ಲೆಂ ಫುಲ್ ತೆಂ ಬಾವ್ತಾ, ಉಬ್ಲ್ಲೆಂ ಸುಕ್ಣೆಂ ತೆಂ ದೆಂವ್ತಾ, ಆನಿ ಜಲ್ಮಾಲ್ಲೆಂ ಸಂಸಾರಿ ಜೀವಿತ್ ಮರ್ಣಾಂತ್ ಸಂಪ್ತಾ. ಎಪ್ರಿಲಾಚ್ಯಾ 19 ತಾರಿಕೆರ್ ಸಾಂಜೆರ್ ಸುರ್ಯೊ ಆಸ್ತಮ್ಚಾ ವೆಳಾ ಸಗ್ಳ್ಯಾ ಮಿರಾರೋಡಾಂತ್ ಆಕ್ಲಾಸಾಚೊ ಆಕಾಂತ್ ಹಾಡುನ್ ಆಯ್ಲೊ. ಚಿಂತುಂಕ್ ನಾತ್ಲ್ಲೆಂ ತೆಂ ಘಡ್ಲೆಂ. ತುಜ್ಯಾ ಆಲ್ಪ್ಕಾಲಾಚ್ಯಾ ಆಸ್ವಸ್ಥೆ ಥಾವ್ನ್ ಉಬ್ಜಲ್ಲೆಂ ತೆಂ ಜೀವನ್-ಮರ್ಣಾ ಮಧ್ಲೆಂ ಝುಜ್ ಸಂಪ್ಲೆ. ದೆವಾಚಾ ಆಪವ್ಣ್ಯಾಕ್ ತುಂವೆ ಸಯ್ ಘಾಲಿಯ್, ಆಮ್ಚೆ ಥಾವ್ನ್ ಸಾಸ್ಣಾಕ್ ಭವ್ತಿಕ್ ಸ್ಥಿತೆನ್ ಪಯ್ಸ್ ಗೆಲೊಯ್.
ಪಾಟ್ಲ್ಯಾ ಬ್ರೆಸ್ತಾರಾ ಸಾಂಜೆಚ್ಯಾ ವೆಳಾ ತುಜ್ಯಾ ಭಲಾಯ್ಕೆ ವಿಶಿಂ ಖಬರ್ ಕಾಡುಂಕ್ dial ಕೆಲ್ಲೆಂ ತೆಂ ಫೊನ್ ಮೋವ್ ತಾಳ್ಯಾನ್ .."ಹಾಂವ್ ಹುಶಾರ್ ಆಸಾಂ, ಆತಾಂ ದಾಕ್ತೆರ್ ಆಸಾತ್ ಫಾಲ್ಯಾಂ ಉಲವ್ಯಾಂ" ಮ್ಹಳ್ಳ್ಯಾ ಜವಾಬೆಸವೆಂ ಸ್ತಬ್ದ್ ಜಾಲೆಂ. ತುಕಾ ರೂಪ್ ರೂಪ್ ಪಳೆವ್ನ್ ತುಜ್ಯಾ ಸಹವಾಸಾಂತ್ ಮೆತೆರ್ ಜಾಂವ್ಚೆಂ ಫಾಲೆಂ ಆಯ್ಲೆಂನಾ...!
ಆಶೆಂ ಕಿತ್ಯಾಕ್ ಜಾಲೆಂ? ಇತ್ಲೆ ವೆಗ್ಗಿಂ ಕಸೆಂ ಘಡ್ಲೆಂ? ಮ್ಹಳ್ಳಿಂ ಸವಲಾಂ ಮತಿಂತ್ ಉದೆತಾತ್, ಪುಣ್ ದೆವಾಚ್ಯಾ ಮಾಂಡಾವಳೆಕ್ ಸವಾಲ್ ಕರ್ಯೆತ್? ಮನ್ಶಾ ಜೀವಿತ್ ಜಲ್ಮ್ ಅನಿ ಮರ್ಣಾ ಮಧೆಂ ಭಾಂದ್ಲ್ಲೊ ಸಾಂಕವ್. ಜನನ್ ಕೆದಳಾ ಯೇತ್ ಮ್ಹಣ್ ಥೊಡ್ಯಾ ದಿಸಾಂ ಆದಿಂ ತರೀ ಕಳಿತ್ ಜಾತಾ, ಪುಣ್ ಮರಣ್ - ಆವ್ಚಿತ್ ಯೆತಾ. ಆಶೆಂಚ್ ಘಡ್ಲೆಂ ಜೋನ್ ಕ್ರಾಸ್ತಾ ಥಂಯ್, ಆನಿ ತಾಚೆಂ ಕುಟಮ್ ದುಕಾಂತ್ ಬುಡ್ಲೆಂ. ದುಖೆಸ್ತ್ ಜಾಲ್ಲ್ಯಾ ತಾಚಾ ಪತಿಣೆಕ್ ಹೆಲೆನ್ ಬಾಯೆಕ್, ಪುತಾ ಡೆಲ್ಹಾನಾಕ್ ಆನಿ ಧುವ್ ಜೇನಾಕ್ ಆಮಿಂ ಸರ್ವ್ ಭುಜಾವಣ್ ಪಾಟಯ್ತಾಂವ್, ಆಮ್ಚ್ಯಾ ಮಾಗ್ಣ್ಯಾಚೊ ಆಧಾರ್ ಭಾಸಾಯ್ತಾಂವ್. ಭವ್ತಿಕ್ ಥರಾನ್ ಜೋನ್ ತುಮ್ಚ್ಯೆ ಥಾವ್ನ್ ವೆಗ್ಳೊ ಜಾಲಾ ತರೀ ಸ್ಪಿರಿತಾನ್ ತುಮ್ಚೆ ಸಂಗಿ ತೊ ಸದಾಂ ಆಸ್ತಲೊ. ಸರ್ಗಾರ್ ಥಾವ್ನ್ ತೊ ದೆವಾಚಿಂ ವಿಶೇಸ್ ಬೆಸಾಂವಾ ಮಾಗೊನ್ ಧಾಡ್ತಲೊ ಮ್ಹಣ್ ಆಮಿಂ ಪಾತ್ಯೆತಾಂವ್. ತಾಣೆ ಸೊಡುನ್ ಗೆಲ್ಲೊ ಜಾಗೊ ಭರ್ತಿ ಕರುಂಕ್ ಕುರ್ಪಾ ಆನಿ ಸಸಾಯ್ ತೊಚ್ ರಚ್ಣಾರ್ ಫಾವೊ ಕರುಂ ಮ್ಹಳ್ಳೆಂ ಆಮ್ಚೆಂ ಖಾಲ್ತೆಂ ಮಾಗ್ಣೆಂ.
ಜೀವಿತಾಂತ್ ಬರೆಂ ಕರ್ತಾ ತೊ ಮೆಲ್ಯಾ ಉಪ್ರಾಂತ್ಯ್ ಆಪ್ಲೆಂ ನಾಂವ್ ಶಾಸ್ವತ್ ದವರ್ತಾ. ಮಿರಾರೋಡಾಂತ್ಲೊ ಕೊಂಕ್ಣಿ ಸಂಸ್ಥೊ ಆನಿ ಘಡೊನ್ ಹಾಡ್ಲ್ಲಿಂ ವಿವಿಧ್ ಕೊಂಕ್ಣಿ ಕಾರ್ಯಿಂ ಪ್ರತ್ಯೇಕ್ ಜಾವ್ನ್ ಮೊಂತಿ ಫೆಸ್ತಾಚೊ ಸಂಭ್ರಮ್ ಸದಾಂ ಆಮ್ಚ್ಯೆ ಥಂಯ್ ಉಗ್ಡಾಸಾಚೊ ಘುರ್ತ್ ಜಾತಲೊ. ತುಜ್ಯಾ ಸಾದ್ಯಾ ವ್ಯಕ್ತಿತ್ವಾನ್, ಸೆವಾ ಮನೋಭಾವನ್, ಉಪ್ಕಾರಿ ಮನಾನ್, ಆನಿ ಸರ್ವಾಂಕ್ ಆದಾರ್ಸುಂಚಾ ಉದಾರ್ಪಣಾನ್ ತುಜೆ ಆಭಿಮಾನಿ ಸಂಸಾರ್ ಭರ್ ಆಸಾತ್ ತೆಂ, ತುಜ್ಯಾ ಮರ್ಣಾಚಿ ಖಬರ್ ವಾಚುನ್ ಪತ್ರಾನಿಂ, ಅಂತರ್ಜಾಳಿಂನಿ ತಾಣಿ ದಿಲ್ಲಿ ತಿ ಪ್ರತಿಕ್ರಿಯಾಚ್ ಹಾಕಾ ಸಾಕ್ಸ್. ಏಕ್ ಉಜ್ವಾಡಾಚೊ ದಿವೊ ಆಜ್ ಪಾಲ್ವಲಾ ತರೀ ತುಜ್ಯೆ ಸಂಗಿ ಖರ್ಚಿಲ್ಲ್ಯೊ ತ್ಯೊ ಘಡ್ಯೊ ಆಮ್ಚ್ಯಾ ಕಾಳ್ಜಾಂನಿ ಮಾಜ್ವನಾತ್ಲ್ಲಿಂ ಪಾವ್ಲಾಂ ಜಾಂವ್ಕ್ ಪಾವ್ಲ್ಯಾಂತ್. ತುಜ್ಯೊ ಯಾದಿ ವೊಡಾರುಕಾಚ್ಯಾ ಪಾಳಾಂಬರಿ ಆಮ್ಚ್ಯೆ ಮತಿಂತ್ ಖಂಚ್ಲ್ಯಾತ್.
ಜೋನ್ ಕ್ರಾಸ್ತಾ ಏಕ್ ವಿಭಿನ್ನ್ ಕಾಲೆತಿಚೊ ವ್ಯಕ್ತಿ, ಸಂಪ್ರದಾಯಾಚೊ ಮೋಗಿ, ವೆಳಾ ಕಾಳಾಚ್ಯಾ ರೊದಾಂಕ್ ಹೊಂದ್ವುನ್, ಮಿರಾರೋಡಾಂತ್ ಕೊಂಕ್ಣಿ ಸಂಸ್ಕ್ರತಿ ಆಳ್ವೊಂಕ್ ಆಯ್ತಿ ಜಾತಾನಾ ತಿ ಉರಂವ್ಚೆಂ ಝುಜ್ ಮಾಂಡ್ಲ್ಲೊ ಕೊಂಕ್ಣೆಚೊ ಏಕ್ ಸುಪುತ್ರ್. ತಾಚಿಂ ಜಾಯ್ತಿಂ ಸಪ್ಣಾಂ ಆಧುರಿಂ ಉರ್ಲ್ಯಾಂತ್ ತರೀ, ತಾಚ್ಯಾ ಕೊಂಕ್ಣೆಚ್ಯಾ ಸೆವೆಂತ್ ಆಮ್ಚಾ ಕಾಳ್ಜಾಂನಿ ಅಮರ್ ಜಾಲ್ಯಾಂತ್. ತುವೆಂ ತುಜ್ಯಾ ಫುಡಾರ್ಪಣಾರ್ ಕೆಲ್ಲಿಂ ಕೊಂಕ್ಣೆಚಿಂ ನಾನಾತಿಂ ಕಾಮಾಂ ಕೊಂಕ್ಣಿ ಲೊಕಾ ಮಧೆಂ ಸದಾಂ ಜಿವಿಂ ಉರ್ತಲಿಂ. ಜೋನ್ ಕ್ರಾಸ್ತಾ ಅಮರ್ ತುಂ ... ಆಮ್ಚ್ಯಾ ಕಾಳ್ಜಾಂತ್, ಮನಾಂತ್, ಸಂಸ್ಥ್ಯಾಂತ್, ಫಿರ್ಗಜೆಂತ್ ಆನಿ ಸಮಾಜೆಂತ್ ಸದಾಂ ಜಿವೊ ತುಂ ಆಸ್ತೊಲೊಯ್.
ಆದೇವ್ಸ್ ತುಕಾ ಜೋನ್ ಕ್ರಾಸ್ತಾ..!
ಸಾಂ. ಜುಜೆ ಕೊಂಕಣಿ ಸಂಘಟನಾಚ್ಯಾ ಸಮೇಸ್ತ್ ಸಾಂದ್ಯಾಂ ತರ್ಫೆನ್
- ಜೆರಾಲ್ಡ್ ಡಿ’ಸೊಜಾ (ಕಾರ್ಯದರ್ಶಿ- ಸೆಂ. ಜೊಸೆಫ್ಸ್ ಕೊಂಕಣಿ ವೆಲ್ಫೇರ್ ಅಸೊಶಿಯೆಶನ್ ಮಿರಾರೋಡ್)
