[खबर] डो| जयंती नायकचो बूक मोकळीक
डॉ. जयंती नायक हांचो साहित्यीक आनी लोकसंस्कृतीचो वावर अतूल्य आसा.
पणजी – गोवा, ताः 20-08-2019. राजाई प्रकाशन, केपें आनी कोकणी कला साहित्य केंद्र, कुडचडें हांणी जोडपालवान 17 ऑगस्ट 2019 दिसा कुडचडें हांगा घडोवन हाडिल्ल्या नामनेची साहित्यीक आनी लोकवेद संशोधिका डॉ. जयंती नायक हिच्या ‘आर्त‘ आनी ‘गूढबंध’ ह्या पुस्तकांचें लोकार्पण करतना मुखेल सोयरे श्री. देविदास कदम हांणी म्हणलें की ‘डॉ. जयंती नायक हिचें कोंकणी साहित्य आनी लोकसंस्कृतिच्या क्षेत्रांतलें कार्य अतूल्य आसा. तिचेकडेन आशिल्ली संवेदनशिलता, तर्कनिश्टता, अणभवसिध्दता, अफाट कल्पनाशक्त आनी भाशेवयलें प्रभूत्व या गुणांक लागून ती कोंकणी साहित्य क्षेत्राक व्हड योगदान दिवंक पावल्या.’कार्यावळीची अध्यक्षा श्रीमती ज्योती कुंकळकार हिणें मत व्यक्त केलें की ‘जयंती नायक ही मेळिल्ले संदिचें भांगर करपी, आपल्या कामकडेन निश्टा बाळगुवपी लेखिका’, तर मानाचें सोयरे श्री. संजीव वेरेकार हांणी आपल्या उलोवपांत ‘जयंती नायक ही एक निर्भिड लेखिका असें मत व्यक्त करून कोंकणी भाशीक चळवळींत तिणें केल्लें कार्य खूब मोलादीक आसा अशें म्हणलें.’ खास आमंत्रित प्रो. आगुस्तो पिंटो हांणी, ‘जयंती नायक हिच्या कथांनी भोवजनांचो हुंकार आसा ‘अशें विधान केलें तर, खास आमंत्रित आनी गोवा कोंकणी अकादेमीची सचिव श्रीमती उपासना माजगांवकार हिणें ‘जयंती नायक हिचो आपल्याक अभिमान आसा अशें वक्तव्य केलें.’पुस्तकाचेर उलोवपी श्री. बबन भगत हांणे ‘आर्त ह्या कथासंग्रहांतल्यो कथा भारतीय कथा विश्र्वांत मानाचो पाट जोडपी कथा आसात, तशेंच गूढबंध हे लोकवेदावयल्या मराठी लेखांचें पुस्तक एक संदर्भ पुस्तक म्हणून खूब मोलादीक आसा अशें मत व्यक्त केलें.’
ह्या वेळार जयंती नायक हिचीं प्रकाशीत पुस्तकां आनी पुरस्कार हांची माहिती दिवपी माहिती पुस्तिकेचेंय विमोचन जालें. कार्यावळीचें सुत्रसंचालन श्री. वसंत सावंत हांणे अतिशय सुरबूस रितीन केलें तर श्रीमती रजनी भेंब्रे हिणें मुद्देसूद रितीन सोयऱ्यांची वळख केली. डॉ. जयंती नायक हिणें सोयऱ्यांक येवकार दितनाच लेखिका म्हण आपलें मनोगत व्यक्त केलें. आपल्या उलोवपांत तिणें लोकसंस्कृतीचो कोश निर्माण करपाच्या आपल्या फुडाराच्या संकल्पाविशीं सांगलें. कोंकणी कला साहित्य केंद्राचे अध्यक्ष श्री. अशोक नायक हांणे उपकार मानलें, तर राजाई प्रकाशनाचे प्रकाशक श्री. अवधूत आमोणकार हांणें सोयऱ्यांक यादस्तिकां भेटयलीं. बाब अथर्व अवधूत आमोणकार, बाय रुपाली नायक आनी बाय दिपा शिरोडकार हांणी सोयऱ्यांक फुलां भेटयलीं. आर्यादुर्गा संगीत वर्ग ह्या पंगडान सुरवेक येवकार गीत गायलें. कार्यावळीक केपें, कुडचडे, तशेंच गोंयच्या विवीध वाठारंतल्यान साहित्यीक आनी मानेस्त व्हडा संख्येन उपस्थीत आशिल्ले, तेमदीं वीजमंत्री आनी कुडचडेचे आमदार श्री. निलेश काब्राल, सरस्वती सन्मान पुरस्कार सन्मानीत श्री. महाबळेश्र्वर सैल, साहित्यीका श्रीमती मीना काकोडकार, श्री. कांता गावडे, श्री. संदेस सामंत, श्री. भास्कर नायक, श्रीमती माया खरंगटे, श्री. कमलाकर म्हाळशी, श्री. सुहास दलाल, श्रीमती हर्षा शेटये, श्रीमती अलका असोळडेकार आदिचो आस्पाव आशिल्लो.
