[ಖಬರ್] ಅಂತರಾಷ್ಟ್ರೀಯ್ ಸ್ತ್ರೀಯಾಂಚೊ ದಿವಸ್-2024
1 ಮಾರ್ಚ್ 2024 ವೆರ್ ಸಾಂ ಲುವಿಸ್ ಕೊಲೆಜ್ ಹಾಂಗಾಸರ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ, ಕೊಂಕ್ಣಿ ಲೇಖಕಿಂಚೊ ಎಕ್ತಾರ್, ಮಂಗ್ಳುರ್ ಆನಿ ಕೊಂಕ್ಣಿ ಸಂಘ್ ಸಾಂ. ಲುವಿಸ್ ಕೊಲೆಜ್ ಹಾಂಚ್ಯಾ ಜೋಡ್ ಆಸ್ರ್ಯಾ ಖಾಲ್ 'ಅಂತರಾಷ್ಟ್ರೀಯ್ ಸ್ತ್ರೀಯಾಂಚೊ ದಿವಸ್-2024’ ಆಚರಣ್ ಕೆಲೊ.
ಥಂಡ್ ಪೀವನಾ ಸಂಗಿಂ ಸಾಂ ಲುವಿಸ್ ಕೊಲೆಜ್ ವಿದ್ಯಾರ್ಥಿನಿಂ ರೊನಿ ಕ್ರಾಸ್ತಾ , ಕೆಲರಾಯ್ ವಿರಚಿತ್ ಕೊಂಕ್ಣಿ ಧ್ಯೇಯ್ ಗೀತ್ ಗಾಯ್ಲೆಂ. ಫ್ಲಾವಿಯಾ ಅಲ್ಬುಕರ್ಕ್, ಪುತ್ತೂರ್ ಹಿಣೆಂ ಯೆವ್ಕಾರ್ ಮಾಗೊನ್ ಕೊಂಕ್ಣಿ ಲೇಖಕಿಂಚೊ ಎಕ್ತಾರ್ ಚಾರ್ ವರ್ಸಾಂ ಪಯ್ಲೆಂ ಪ್ರಾರಂಭ್ ಜಾಲ್ಲ್ಯಾಚೊ ಉದ್ದೇಶ್ ಪ್ರಾಸ್ತವಿಕ್ ಉಲೊವ್ಪಾಂತ್ ವಿವರಿಲೆಂ.. ಮಾನೆಸ್ತಿಣ್ ಬಸ್ತಿ ಶೋಭಾ ಶೆಣೈ ಹಿಚೆ ಸವೆಂ ಹೆರ್ ಮುಕೆಲ್ ಸಯ್ರ್ಯಾನಿಂ ಗುಮಟ್ ವಾಜಾವ್ನ್ ಕಾರ್ಯೆಂ ಉಗ್ತಾಯ್ಲೆಂ. ತಶೆಂಚ್ ಕೊಂಕ್ಣಿ ಲೇಖಕಿಂಚೊ ಎಕ್ತಾರಾಚೊ ನವೊ ಲೋಗೊ ಉಗ್ತಾವಣ್ ಕೆಲೊ. ಮುಕೆಲ್ ಸಯ್ರ್ಯಾಂಚ್ಯಾ ಹುಜಿರ್ ಸಲೊಮಿ ಮೊಗರ್ನಾಡ್ ಹಿಚ್ಯಾ ಅಧ್ಯಕ್ಷ್ಪಣಖಾಲ್ ಕವಿಗೋಷ್ಟಿ ಚಲಯ್ಲಿ. ಚಂದ್ರಿಕಾ ಮಲ್ಯ, ಕೃತಿಕಾ ಕಾಮತ್, ಫ್ಲಾವಿಯಾ ಅಲ್ಬುಕರ್ಕ್ ಪುತ್ತೂರ್, ಜೋಯ್ಸ್ ಕಿನ್ನಿಗೋಳಿ, ಮರ್ಲಿನ್ ಮಸ್ಕರೆನ್ಹಸ್ ಹಾಣಿಂ ಕವಿತಾ ವಾಚನ್ ಕೆಲೆಂ. ಸ್ತ್ರೀಯಾಂಚ್ಯಾ ದಿಸಾ ಸಂದರ್ಭಿ ಆಸಾ ಕೆಲ್ಲೆಲ್ಯಾ ಲೇಖನ್ ಸ್ಪರ್ಧ್ಯಾಂತ್ ಜಿಕ್ಲೆಲ್ಯಾಂಚಿ ನಾಂವಾಂ ಡಾ.ಅನಿ ಡಿಂಪಲಾನ್ ಜಾಹಿರ್ ಕೆಲೆಂ. ಸ್ಪರ್ಧ್ಯಾಕ್ ಆಯ್ಲೆಲ್ಯಾ ಸುಮಾರ್ ಪಾಂತ್ತೀಸ್ ವಯ್ರ್ ಲೇಕನಾಂ ಪಯ್ಕಿ ಪಯ್ಲೆಂ ಇನಾಮ್: ಐರಿನ್ ರೆಬೆಲ್ಲೊ ಕುಲ್ಶೇಕರ್, ದುಸ್ರೆಂ ಇನಾಮ್ ಕನ್ಸೆಪ್ಟಾ ಫೆರ್ನಾಂಡಿಸ್ ಆನಿ ತಿಸ್ರೆಂ ಇನಾಮ್: ಫೆಲ್ಸಿ ಲೋಬೊ ದೇರೆಬೈಲ್ ಹಾಂಕಾಂ ಫಾವೊ ಜಾಲೆಂ.
ಕಾರ್ಯಾಧ್ಯಕ್ಷ್ ರೆ.ಫಾ. ಮೆಲ್ವಿನ್ ಜೆ.ಪಿಂಟೊ ಹಾಣಿಂ “ಹಾಂಗಾಸರ್ ಕವಯತ್ರಿನಿ ವಾಚ್ಲ್ಲ್ಯಾ ಕವಿತೆ ಥಾವ್ನ್ ಮ್ಹಾಕಾ ಪ್ರೇರಣ್ ಮೆಳ್ಳೆಂ ತಶೆಂಚ್ ತುಮ್ಚ್ಯಾ ಕವಿತೆ ಆನಿ ಬರ್ಪಾಂ ಥಾವ್ನ್ ಹರ್ ವಾಚ್ಪ್ಯಾಂಕ್ ಪ್ರೇರಣ್ ಲಾಭೊಂದಿ.” ಅಸೊ ಸಂದೇಶ್ ದಿಲೊ. ವೆದಿರ್ ಹಾಜರ್ ಆಸ್ಲ್ಲ್ಯಾ ಸರ್ವಾಂಕ್ ಮಾನೆಸ್ತಿಣ್.ಮೇರಿ ಡಿಸಿಲ್ವಾನ್ ಉಗ್ಡಾಸಾಚಿ ಕಾಣಿಕ್ ದಿಲಿ. ಆಮ್ಚ್ಯಾ ಸಮಾಜಿಚ್ಯಾ ತಾಲೆಂತಾಕ್ ವೆದಿ ದಿಂವ್ಚ್ಯಾ ಮಾನೆಸ್ತಿಣ್.ಮೇರಿ ಡಿಸಿಲ್ವಾಕ್ ಕೊಂಕ್ಣಿ ಲೇಖಾಕಿಂಚ್ಯಾ ಎಕ್ತಾರಾ ತರ್ಫೆನ್ ಮಾನ್ ಕೆಲೊ. ಸನ್ಮಾನ್ ಪತ್ರ್ ಮಾನೆಸ್ತಿಣ್ ಪ್ರೀತಾ ಮಿರಾಂದಾನ್ ವಾಚನ್ ಕೆಲೆಂ. ಸಿ. ಡಾ. ಮೇಬಲ್ ಕ್ಲಾರಾ ಡಿಮೆಲ್ಲೊ ಬಿ.ಎಸ್. ಹಿಣೆಂ ʼಭಲಾಯ್ಕೆಭರಿತ್ ಸಮಾಜ್ ರಚ್ಪಾಂತ್ ಆಧುನಿಕ್ ಕಾಳಾಚಾ ಸ್ತ್ರೀಯೆಚೊ ಪಾತ್ರ್ʼ ಹ್ಯಾ ವಿಶಿಂ ಉಲೊವ್ಪ್ ದಿಲೊ. ಲವಿ ಗಂಜಿಮಠನ್ ಹಿಚೊ ಪರಿಚಯ್ ದಿಲೊ.
ಮಾನೆಸ್ತಿಣ್ ಐರಿನ್ ರೆಬೆಲ್ಲೊ ,ಸಪ್ಣಾ ಸಲ್ಡಾನ್ಹಾ ಆನಿ ಫ್ಲಾವಿಯಾ ಸಲ್ಡಾನ್ಹಾ ಹಾಣಿಂ ಸ್ವ ರಚಿತ್ ಆನಿ ವಿಂಚ್ಣಾರ್ ಪದಾಂ ಗಾಯ್ಲಿಂ. ಹಾಂಕಾಂ ಆರ್ ಮನೋಹರ್ ಕಾಮತ್ ಹಾಣಿಂ ಉಗ್ಡಾಸಾಚಿ ಕಾಣಿಕ್ ದಿಲಿ. ಐರಿನ್ ಮೆಂಡೋನ್ಸಾ ಹಿಣೆಂ ಖೆಳ್ ಮಾಂಡುನ್ ಹಾಡ್ಲೊ. ವಿಜೇತ್ ಜಾಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ. ಶ್ರೀಮತಿ ಫ್ಲೋರಾ ಕ್ಯಾಸ್ತೆಲಿನೊ ಹಿಣೆಂ ಸರ್ವಾಂಚೊ ಉಪ್ಕಾರ್ ಆಟಯ್ಲೊ.
ಫೆಲ್ಸಿ ದೆರೆಬಯ್ಲ್ ಹಿಣೆಂ ವೇಳ್ ವಿಬಾಡಿನಾಸ್ತಾಂ ಭೋವ್ ಉತ್ತಿಮ್ ರೀತಿನ್ ಕಾರ್ಯೆಂ ಚಲಯ್ಲೆಂ. ತಿನ್ಶ್ಯಾಂ ವಯ್ರ್ ಯುವಜಣ್ ಆನಿ ಸ್ತ್ರೀಯೊ ಹಾಜಾರ್ ಆಸ್ಲ್ಲ್ಯೊ. ಕಾಫಿ- ಫಳ್ಹಾರಾ ಅನಿ ವಿದ್ಯಾರ್ಥಿಂಚ್ಯಾ ಬಾಯ್ಲಾ ನಾಚಾ ಸವೆಂ ಕಾರ್ಯೆಂ ಸಮಾಪ್ತ್ ಜಾಲೆಂ.
