ದಾನ್ [ಬಮ್ಮು ಭಾಗೂ ಫೊಂಡೆ]

ಹ್ಯಾ ಸಂಸಾರಾಂತ್, ಸೆವಾ, ಮಜೂರಿ, ಕೂಲ್ ಅನಿ ದಾನ್ ಮ್ಹಳ್ಳ್ಯಾ ಸಬ್ಧಾಂಕ್ ಜಶೆ ವೆವೆಗ್ಳೆ ಅರ್ಥ್ ಆಸಾತ್ ತಶೆಂಚ್ ಹೆ ಪ್ರಕಾರಾಂಕ್ ಸಯ್ತ್. ಪುಣ್ ಬದ್ಲೊನ್ ವೆಚ್ಯಾ ಸಂಸಾರಾಂತ್ ಕಿತ್ಯಾಕ್‌ಗಿ ಹ್ಯಾ ಸಬ್ಧಾಂಚೆ ಅರ್ಥ್ ಎಕಾಮೆಕಾ ಮಿಸ್ಳೊನ್ ಗೆಲ್ಯಾತ್‌ಶೆಂ ಭಗ್ತಾ. ಹಿ ಕವಿತಾ ತೆಚ್ ಚಿಂತ್ಪಾಚ್ಯಾ ಬುನ್ಯಾದಿಚೆರ್ ಉಭಿ ಕೆಲ್ಯಾ ದೆಕುನ್ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಗಯ್ರೆ ಜಾಲ್ಲ್ಯಾ ದೊಳ್ಯಾಂ ಸಮೊರ್ ಹಕೀಗತೆಚ್ಯೊ ಸಾಂಕ್ಳಿ ತುಟೊನ್ ಪಡ್ತಾತ್ ಆನಿ ಏಕ್ ನವೆಂಚ್ ರುಪ್ಣೆಂ ಉಭೆಂ ಜಾತಾ.

ಬಮ್ಮು ಭಾಗೂ ಫೊಂಡೆ ಕಾರ್‌ವಾರ್ ಮುಳಾಚೊ ಯುವಕವಿ, ಗೊಂಯ್ಚ್ಯಾ ’ಭಾಂಗಾರ್ ಭುಂಯ್’ ಪತ್ರಾಂತ್ ವಾವ್ರ್ ಕರುನ್ ಆಸ್ಚೊ. 2018 ಇಸ್ವೆಂತ್ ಪಯ್ಣಾರಿ ಆನಿ ವೀಜ್ ಹಾಣಿಂ ಮಾಂಡುನ್ ಹಾಡ್‌ಲ್ಲ್ಯಾ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ರಾಶ್ಟ್ರೀಯ್ ದ್ವಿಲಿಪಿ ಕೊಂಕಣೀ ಸಾಹಿತಿಕ್ ಸ್ಪರ್ಧ್ಯಾಂತ್ ಹುಮೆದಿಚೆಂ ಇನಾಮ್ ಆಪ್ಣಾಯಿಲ್ಲಿ ಹಿ ಕವಿತಾ ವಾಚುಂಕ್ ಆನಿ ತಾಚೊ ಸ್ವಾದ್ ಚಾಕುಂಕ್ ತುಕಾ ಆಪೊವ್ಣೆಂ ದಿತಾಂ.

[ಕವಿತಾ] ದಾನ್ [ಬಮ್ಮು ಭಾಗೂ ಫೊಂಡೆ]

ದಾನ್

ಭಾಂಗ್ರಾಚ್ಯಾ ದೆಂವಾ ತುಕಾ

ಕಿತೆಂ ದಿವ್ಚೆಂ ದಾನ್

ಮನಾನ್ ಘೆಂವ್ನ್ ಆಯ್ಲಾ ಭಕ್ತಿ

ಮನೀಸ್ ಹಾಂವ್ ಲ್ಹಾನ್

ಪೈಸೊ ಆನಿ ಭಾಂಗ್ರಾನ್

ದೆವ್ಳಾಂ ಭರುನ್ ವತ್ತಾ

ತರೀಯ್ ತುಜ್ಯಾ ಮುಖಾರ್

ಭಿಖಾರಿ ಕಿತ್ಯಾಕ್ ದಿಶ್ಟಿ ಪಡ್ಟಾ?

ವ್ಹಡ್ ವ್ಹಡ್ ಪೈಶೆಕಾರ್

ದೆವ್ಳಾನ್ ತುಝ್ಯಾ ಯೆತಾ

ಕೊಟ್ಯಾನಿ ರುಪಾಯಾ

ದಾನ್ ಕರುಂನ್ ವತಾ

ಮ್ಹಜಿ ನಾ ಈತ್ಲಿ ತಾಂಕ್

ತುಂಯ್ ಜಾಣಾ ಮ್ಹಜಿ ಕಾಣಿ

ಕಾಳ್ಜಾಂತ್ ಅಸಾ ಭಕ್ತಿ

ಬೊಲ್ಸಾಂ ಮಾತ್ ರೀಕಾಮಿ

ಹಾಡಿಲ್ಲೆ ಥೊಡೆ ದೂಧ್

ತುಜ್ಯಾ ಪಾಯಾಂರ್ ಘಾಲ್ಪಾಕ್

ದೂಧಾನ್ ತು ನ್ಹಾಂತಾ ದೆಖೂನ್

ದೆತಾ ಹಾಂವ್ ತೆ ಗರೀಬಾಕ್

ಪೈಶ್ಯಾಕಾರಾಂಚ್ಯೊ ಲಾಗ್ಲ್ಯಾ ಲಾಯ್ನಿ

ದೆವ್ಳಾಂತ್ ಯೆಂವ್ಕ್ ಭಿರಾಂತ್ ದಿಸ್ತಾ.

ಹುಂಬ್ರ್ಯಾವೆಲ್ಯಾಂನ್ ಪಾಯಾ ಪಡೂನ್

ದೆಂವಾ ಹಾಂವ್ ಪರತ್ ವತಾ

- ಬಮ್ಮು ಭಾಗೂ ಫೊಂಡೆ [ಅಗೋಸ್ತ್, 2019]

ಬಮ್ಮು ಭಾಗೂ ಫೊಂಡೆ: ಕಾರವಾರ್ ಮುಳಾಚೊ ಯುವಕವಿ ಬಮ್ಮು ಭಾಗೂ ಫೊಂಡೆ ಗೊಂಯಾಂತ್ಲ್ಯಾ ಭಾಂಗಾರ್ ಭುಂಯ್ ದಿಸಾಳ್ಯಾಂತ್ ರಿಪೋರ್ಟರ್ ಜಾವ್ನ್ ವಾವ್ರ್ ಕರುನ್ ಆಸಾ. ಕೊಂಕಣಿ ಸಾಹಿತಿಕ್ ವರ್ತುಲಾಂತ್ ಸಕ್ರಿಯ್ ರಿತಿನ್ ವಾವ್ರ್ ಕರುನ್ ಆಸಾ. ಹಾಣೆ ಸಭಾರ್ ಕವಿತಾಗೋಶ್ಟಿಂನಿ ವಾಂಟೊ ಘೆತ್ಲಾ.