ಕೊಂಕ್ಣಿ ಸಾಹಿತ್ಯಾಂತ್ ಜಿತ್ಲ್ಯಾ ಮಾಪಾನ್ ಕವಿತಾಶೆತಾಂತ್ ಜಾಲ್ಲೆಪರಿಂ ಕಾಣ್ಯಾಂಚ್ಯಾ ಶೆತಾಂತ್ ಕೃಶಿ ಜಾಂವ್ಕ್ ನಾ. ತ್ಯೇ ದಿಶೆನ್ ಕಾಂಯ್ ವಾವ್ರ್ ಕರ್ಚೆ ದಿಶೆನ್ ಆಮಿ ಕಾಂಯ್ 2006 ಇಸ್ವೆಂತ್ ’ಕಥಾಪಾಠ್’ ರುಪಾರ್ ಪ್ರೇತನ್ ಕೆಲ್ಲೆಂ ಪುಣ್ ಆಮ್ಚ್ಯಾನ್ ತೆಂ ಜ್ಯಾರಿ ದವರುಂಕ್ ಸಾಧ್ಯ್ ಜಾಂವ್ಕ್ ನಾ. ಸಭಾರ್ ಕಾರಣಾಂಕ್ ಲಾಗೊನ್:
1. ಚಡ್ತಾವ್ ಕಾಣ್ಯೆಗಾರ್ ಹೆರಾಂಚ್ಯೊ ಕಾಣ್ಯೊ ಭಿಲ್ಕುಲ್ ವಾಚಿನಾಂತ್ - ಹಾಂಗಾಸರ್ ಕಾಣ್ಯೊ ವಾಚಿನಾಸ್ತಾನಾಂಚ್ ಪ್ರಸ್ತಾವನ್ ಬರಂವ್ಚೆ ಸಯ್ತ್ ಆಸಾತ್ ಮ್ಹಳ್ಯಾರ್ ತುಮಿ ವಿಜ್ಮಿತ್ ಪಾಂವ್ಚೆಂ ನಾಕಾ.
2. ಜೆದ್ನಾಂ ಆಮ್ಚೆಂ ವಾಚಾಪ್ಚ್ಚ್ ಅಸ್ಕತ್ ಆಸ್ತಾನಾ, ವಿಶ್ಲೇಷಣ್ ವಾ ವಿಮರ್ಸೊ ಕರ್ಚೆಂ ಮಯ್ಲಾ ಪಯ್ಸಿಲೆಂ ಚಿಂತಪ್.
3. ಸಾಹಿತ್ಯ್ ಮ್ಹಳ್ಯಾರ್ ಸಿಂತಿಮೆಂತಾಂ ತಶೆಂಚ್ ಜಾಣ್ವಾಯೆಚೆಂ ಸಮಾಸಮ್ ಮಿಶ್ರಣ್ Literature is the collaboration of emotions and intellectuality. ಪುಣ್ ದುರ್ಭಾಗ್ಪಣಾಂತ್ ಸಾಂಗ್ಚೆಂ ತರ್, ಕೊಂಕ್ಣೆಂತ್ ಚಡ್ತಾವ್ ಸಾಹಿತ್ಯ್ ಫಕತ್ತ್ ಸಿಂತಿಮೆಂತಾಳ್ ಆನಿ ಕುಸ್ಕುಟಾಚಿ ಸಯ್ತ್ ಜಾಣ್ವಾಯ್ ನಾಸ್ಚೆಂ.
4. ಆಮ್ಚೊ ಕೊಂಕ್ಣಿ ವಾಚ್ಪಿ, ಆಮ್ಚೆ ಬರವ್ಪಿ ಆನಿ ಆಮ್ಚೆ ಸಂಪಾದಕ್ ಎಕಾಚ್ಚ್ ಪಾಂವ್ಡಾರ್ ಆಸ್ಚೆಂ; ಖರೆಂಪಣಿಂ, ವಾಚ್ಪ್ಯಾಂಚ್ಯಾಕೀ ಏಕ್ ಮೇಟ್ ಮುಖಾರ್ ಆಸೊಂಕ್ ಜಾಯ್ ಬರಯ್ಣಾರಾನ್, ಆನಿ ಬರಯ್ಣಾರಾಚ್ಯಾಕೀ ಏಕ್ ಮೇಟ್ ತರ್ಯೀ ಮುಖರ್ ಆಸುಂಕ್ ಜಾಯ್ ಸಂಪಾದಕಾನ್. ಪುಣ್ ಕೊಂಕ್ಣೆಂತ್ ಎದೊಳ್ ಮ್ಹಣಾಸರ್ ಹೆ ದೀಸ್ ಯೇಂವ್ಕ್ ನಾಂತ್.
5. ಆಮ್ಚೆ ಕಾಣ್ಯೆಗಾರ್ ’ಕಾಲ್ಪನಿಕ್ ತುಂಡುರಾಯ್’ - ಚಡ್ತಾವಾಂಕ್ ಪಾಟೊಸಾರ್ ಚಡವ್ನ್ ಮಾನ್ ಕರುಂಕ್ ಜಾಯ್ ಶಿವಾಯ್ ಅಧ್ಯಯನ್/ವಿಶ್ಲೇಷಣ್ ತಾಂಚ್ಯಾ ಕಟ್ಟ್ಯಾಕ್ ರಿಗ್ಚೆತಸಲೆಂ ನ್ಹಯ್. ಅಸಲ್ಯಾಂಕ್ ಕಸಲೆಂ ಅಧ್ಯಯನ್ ಜಾಲಾಂ, ಕಿತೆಂ ವಿಶ್ಲೇಷಣ್ ಜಾಲಾಂ ಮ್ಹಣ್ ಸಮ್ಜುಂಚ್ಯಾಕೀ ಚಡಿತ್ ಹೊರ್ಭೊಸ್ - ಕಿತ್ಲೆ ಜಣ್ ಆಸ್ಲೆ ಆನಿ ಕಿತ್ಲೆಶ್ಯಾ ಪತ್ರಾಂನಿ ವರ್ದಿ ಪರ್ಗಟ್ ಜಾಲ್ಯಾ ಮ್ಹಳ್ಳ್ಯಾಂತ್ ಆಸಾ.
6. ಆಲ್ಕಂದ್ಚೆ ಅರ್ಧೆ ಕೊಳ್ಸೆ. ಜೆದ್ನಾಂ ಕೊಂಕ್ಣೆಂತ್ ವಿಚಾರ್ವಂತ್ ಚಿಂತ್ಪಾಚಿ ಖಾತಡ್ ಆಸಾ, ತೆದ್ನಾಂ ಕಾಜುಲೆಚ್ಚ್ ಸುರ್ಯೊ, ಕಾಜುಲೆಚ್ಚ್ ಚಂದ್ರ್.
ಪುಣ್ ಕಾಣ್ಯಾಂನಿ ಸಯ್ತ್ ಜೊಕ್ತ್ಯಾ ಮಾಪಾನ್ ವಾವ್ರ್ ಜಾಯ್ಜಯ್ ಮ್ಹಳ್ಳೆ ಎಕಾಚ್ಚ್ ಇರಾದ್ಯಾನ್ ಆಮಿ ಹ್ಯಾ ಅಂಕಣಾಂತ್ ಪರ್ಗಟ್ ಜಾಂವ್ಚ್ಯೊ ವಿಂಚ್ಣಾರ್ ಕಾಣ್ಯೊ ವಿಂಚುನ್ ’ಕಥಾಪಾಠ್’ ಅಂಕಣಾಂತ್ ತ್ಯೇ ಕಾಣ್ಯೆಚೆರ್ ವಿಶ್ಲೇಷಣ್ ಚಲಯ್ತೆಲ್ಯಾಂವ್. ಆಮ್ಚೊ ಆಮ್ಚೊ ಆಶಾವಾದ್ ಇತ್ಲೊಚ್ಚ್ - ಹಿಂ ವಿಶ್ಲೇಷಣಾಂ ವಾಚುನ್ ಸಂಸಾರ್ ಬದ್ಲತಾ ಮ್ಹಳ್ಳಿಂ ಪಿಸಾಂಟ್ ಕಲ್ಪನಾಂ ಆಮ್ಚೆಥಂಯ್ ನಾಂತ್, ಪುಣ್ ಕಾಂಯ್ ಏಕ್-ದೋಗ್ ಬರೆ ಕಾಣ್ಯೆಗಾರ್ ಆಮ್ಚ್ಯಾ ಕೊಂಕ್ಣೆಂತ್ಲ್ಯಾ ಮಟ್ವ್ಯಾ ಕಾಣ್ಯಾಂಕ್ ಅನ್ಯೇಕಾ ಪಾಂವ್ಡಾಕ್ ಪಾವಂವ್ಕ್ ಸಕುಂದಿತ್ ಮ್ಹಳ್ಳೊ ಆಮ್ಚೊ ಆಶಾವಾದ್.
ಮಟ್ವ್ಯಾ ಕಾಣಿಯಾಂಚಿಂ ವೆವೆಗಳಿಂ ಅಂಕಣಾಂ
ಮಟ್ವ್ಯೊ ಕಾಣ್ಯೊ (ಮಟ್ವ್ಯೊ ಕಾಣ್ಯೊ)
ಕಥಾದಾಯ್ಜ್ (ಡಿಜಿಟಲ್ ಕಾಣ್ಯೊ)
ಕಥಾಪಾಠ್ (ಕಥಾ ಅಧ್ಯಯನ್)
ದರ್ಯೊ ತಾನೆಲಾ (ತರ್ಜಣ್ ಕಾಣಿಯೊ)
ನಿಮಿತ್ತ್ ಮಾತ್ರ್! | निमित्त मात्र!
ಭಿರಾಂಕುಳ್ ಘುಂವ್ಡಿ| भिरांकूळ घुंवडी
ಸುಕ್ಯಾ ಬೊಂಡಿಯೆಚೊ.. | बोंडियेचो..
ತಿಕಾ ಎಕ್ಯೀ ಕಳಿತ್ ನಾ | तिका एकयी कळीत ना
