ಅವಸ್ವರ್ 1
ಮೊರ್ತೆಲ್ಯಾಂಕ್ ಸಾಸ್ಣಿಕ್ ಜಿಣ್ಯೆಕ್ ತಯಾರ್ ಕರ್ಚೆಂ ಕಾಮ್ ತಾಚೆಂ ಜಾವ್ನಾಸ್ಲೆಂ. ಪುಣ್ ಅಪುಣ್ಚ್ ತಯಾರ್ ನಾತ್ಲ್ಲಿ ಗಜಾಲ್ ಗಮ್ತಾನಾ ತಾಕಾ ಅಘಾತ್ ಜಾಲೊ. ತೊ ಎಕ್ಲೊ ವಾಸ್ತಾವ್ವಾದಿ ಜಾವ್ನಾಸ್ಲೊ. ಮ್ಹನಿಸ್ ಜಲ್ಮಾತಾನಾಂಚ್ ಆಪ್ಲ್ಯಾ ಮರ್ಣಾಚೆಂ ಫರ್ಮಾಣ್ ಬರವ್ನ್ ಘೆವ್ನ್ಂಚ್ ಜಲ್ಮಾತಾ ಮ್ಹಣೊನ್ ತೊ ಜಣಾಸ್ಲೊ. ತೊ ಥಂಡ್ ವ್ಯಕ್ತಿತ್ವಾಚೊ ಜಾವ್ನಾಸೊನ್ ಶಿಸ್ತ್ ತಾಕಾ ಕರ್ಕರೆ ಹಾಡಾಯ್ನಾತ್ಲಿ ತರೀ ಅಮರತ್ವಾಚ್ಯಾ ಭ್ರಾಂತೆಕ್ ವಳಗ್ ಜಾಲ್ಲೊ.
ಮರ್ಣಾನ್, ಕಸಲೊಚ್ ಹಿಶಾರೊ ದೀನಾಸ್ತಾಂ ಎಕಾ ಚೊರಾ ಪರಿಂ ಅವ್ಚಿತ್, ಕುಸ್ಕುಟ್ ತಯಾರ್ ನಾತ್ಲ್ಯಾ ವೆಳಾ ಆಕ್ರಮಣ್ ಕರ್ಚಿ ರೀತ್ ಜಾವ್ನಾಸ್ಲಿ. ದಸ್ತುರೆ ಫರ್ಮಾಣೆ ತಾಣೆ ಆಪ್ಲೊ ಭಾವ್ ನಿದೆ ಬರಿಂ ವ ಎಕಾಚ್ಛಾಣೆ ಹಿಂಸಾತ್ಮಕ್ ರಿತಿನ್ ಯೆಂವ್ಚೆ ಆಸ್ಲೆಂ.
ಮರ್ಣಾಚಿ ರೀತ್. ಅಸಲ್ಯಾ ಮರ್ಣಾಕ್ ಮ್ಹನಿಸ್ ಕಿತ್ಲೊ ಆಶೆವ್ನ್ ಆಸ್ತಾ! ಮಾಗೊನ್ ಆಸ್ತಾ! ಅಸಲೆಂ ಮರಣ್ ತಾಕಾ ನಿರಾಕರ್ಸಿಲ್ಲೆ ವೆಳಾ ತೊ ಕಿತ್ಲೊ ಕಂಗಾಲ್ ಜಾತಾ, ಕೊಡ್ಸಾಣೆನ್ ಭರ್ತಾ, ಆನಿ ದೆದೆಸ್ಪರ್ ಜಾತಾ. ಲಂಡನಾಂತ್ಲ್ಯಾ ತ್ಯಾ ವಸಂತ್ ಋತುಚ್ಯಾ ತರ್ನ್ಯಾ ವೊತಾಂತ್ ಬಸೊನ್ ಆಸ್ಲೊ ಬ್ಲೇಸ್ ಮೆರ್ಡಿತ್ ಆಪ್ಲ್ಯಾ ಮರ್ಣಾ ವಿಶಿಂ ಚಿಂತುನ್ ಆಸ್ಲೊ. ಸಮಧಾನಾಚೆಂ ಮರಣ್ ತಾಕಾ ನಾ ಫಾವೊ ಕೆಲ್ಲೆಂ. ವಾರ್ಯಾಕ್ ಧಲೊನ್ ಆಸ್ಚಿಂ ಕ್ರೋಕಸ್, ಡ್ಯಾಫೊಡಿಲ್ ಫುಲಾಂ, ಹಾತಾಂತ್ ಹಾತ್ ಮೆಳವ್ನ್ ಜಿವಿತಾಚೆ ಅಖ್ರೇಚೆ ಥೆಂಬೆ ಚಾಕೊನ್ ಆಸ್ಚಿಂ ಪ್ರಾಯೆಸ್ತ್ ಜೊಡಿಂ, ಎಕಾಮೆಕಾ ವೆಂಗೆಂತ್ ಸೆರ್ವಾಲ್ಲಿಂ ತನಿಂ ಜೊಡಿಂಸ॒ಗ್ಳ್ಯಾನಿಂ ಸೃಷ್ಟೆಚೆಂ ಕಾಯೆಂ ಭರಾನ್ ಚಲೊನ್ ಆಸ್ಚೆಂ ದೆಕ್ತಾನಾ ಅಪ್ಣಾಕ್ ಮಾತ್ರ್ ಮೊರೊಂಕ್ ಆಸಾ ಮ್ಹಳ್ಳ್ಯಾ ಕೊಡ್ಹು ಚಿಂತ್ಪಾನ್ ಮೆರ್ಡಿತ್ ಫುಮಾರ್ ಜಾಲೊ.
ಕಾರ್ಸಿನೋಮಾ! ಕಾಂಯ್ಚ್ ದುಬಾವ್ ನಾ. ಎಕ್ಸ್ರೇಚ್ಯಾ ಮಧೆಂಗಾತ್ ಬೋಟ್ ಭಂವ್ಡಾವ್ನ್ ದಾಕ್ತೆರಾನ್ ಮ್ಹಳ್ಳೆಂ. ವಾಡಾವಳ್ ಸಾರ್ಕಿ ಜಾಂವ್ಕ್ ನಾ ತರೀ ಕೆಸೊಳಿ ಕೆನ್ಸರಾಚಿಚ್ ಮ್ಹಣ್ಚಾಂತ್ ಕಾಂಯ್ಚ್ ದುಭಾವ್ ನಾ! ತಾಣೆ ತೀರ್ಪ್ ದಿಲ್ಲೆಂ.
ಉಜಳ್ಚ್ಯಾ ಎಕ್ಸ್ರೇಚೆರ್ ಭಂವ್ಚೆ ದಾಕ್ತೆರಾಚೆಂ ಬೋಟ್ ಪಳೆತಾನಾ ಮೆರ್ಡಿತಾಕ್ ಪರಿಸ್ಥಿತಿಚಿ ಗಂಭೀರತಾ ಕಳೊನ್ ಆಯ್ಲಿ. ತಾಚಿ ಸಗ್ಳಿ ಜಿಣಿ ದುಸ್ರ್ಯಾಂಚ್ಯಾ ಜಿಣ್ಯೆಚ್ಯಾ ಸತಾಂ ವಿಶ್ಯಾಂತ್, ದರ್ಣಿಕ್ ಶೆವ್ಟಾಯಿಲ್ಲ್ಯಾ ತಾಂಚ್ಯಾ ಪಾತ್ಕಾಂ ವಿಶ್ಯಾಂತ್ ಸಮ್ಜಂವ್ಚಾಂತ್ ಖರ್ಚಾಲ್ಲಿ. ಆತಾಂ ತೊ ಆಪ್ಣಾ ಭಿತೆರ್ ಆನಿ ಥೊಡ್ಯಾಚ್ ತೆಂಪಾನ್ ಆಪ್ಲಿ ಜಿಣಿ ನಾಸ್ ಕರುಂಕ್, ಫುಲೊನ್ ಯೆಂವ್ಚ್ಯಾ ಕೆಸೊಳೆಕ್ ಪಳೆತಾಲೊ.
ತಾಣೆ ಉದ್ವೇಗಾ ವಿಣೆ ವಿಚಾಲೆಂ: ಒಪ್ರೇಶನ್ ಸಾಧ್ಯ್ ನಾಂಗಿ?
ದಾಕ್ತೆರ್ ಸ್ಕ್ರೀನಾಚೊ ಲೈಟ್ ಪಾಲ್ವವ್ನ್ ಮೆಜಾ ಸಶಿಂ ಬಸ್ಲೊ. ಮೆರ್ಡಿತಾಚೆರ್ ಉಜ್ವಾಡ್ ಪಡ್ಚೆ ಬರಿಂ ತಾಣೆ ಟೇಬಲ್ ಲ್ಯಾಂಪ್ ಘುಂವ್ಡಾಯ್ಲೊ. ದಾಕ್ತೆರ್, ಕಾಳೊಕಾಂತ್. ಪಿಡೆಸ್ತ್, ಮ್ಯೂಸಿಯಮಾಂತ್ಲ್ಯಾ ಮಾರ್ಬಲಾಚ್ಯಾ ಮೂರ್ತಿ ಬರಿಂ. ಮೆರ್ಡಿತಾಕ್ ದಾಕ್ತೆರಾಚಿ ಸಜಾವಣ್ ಸಮ್ಜೊಂಕ್ ಕಷ್ಟ್ ಜಾಲೆನಾಂತ್. ತೆ ದೊಗೀ ಪ್ರೊಫೆಶನಲ್ ಜಾವ್ನಾಸ್ಲೆ. ದೊಗಾಂಯ್ಚ್ಯಾ ಭೆಸಾಂತ್ ಮ್ಹನ್ಶಾ ಸಂಪರ್ಕ್ ಪ್ರಮುಖ್ ಜಾವ್ನಾಸ್ಲೊ. ತಾಂಚ್ಯಾ ಸಂಪರ್ಕಾಕ್ ಆಯ್ಲೆಲ್ಯಾ ಲಾಗ್ಗಿಂ ತಾಣಿ ಭಾವನಾಂರಹಿತ್ ಜಾವ್ನ್ ಆಸಾಜಾಯ್ ಅಸ್ಲೆಂ. ನಾ ತರ್, ಸಸಾಯ್ ಮಾಗೊನ್ ಆಯ್ಲೆಲ್ಯಾಂಕ್ ತಾಣಿ ಕುಮಕ್ ಕರ್ಚಿ ಸಾಧ್ಯತಾ ನಾತ್ಲಿ.
ಒಪ್ರೇಶನ್ ಕರುಂಕ್ ಹಾಂವ್ ಸಕಾನ್ ಪುಣ್ ತುಂ ತೀನ್ ಮಯ್ನ್ಯಾನಿಂ ಮೊರ್ತೊಲೊಯ್. ನಾ ತರ್, ಥೊಡೊ ತೇಂಪ್ ಚಡ್ತಾವ್ ವಾಂಚ್ತೊಲೊಯ್, ಪುಣ್ ದುಕಿನ್ ವಳ್ವಳೊನ್ ಮೊರ್ತೊಲೊಯ್.
ಚಡ್ತಾವ್ ಮ್ಹಳ್ಯಾರ್ ಕಿತ್ಲೊ ತೇಂಪ್?
ಸ ಥಾವ್ನ್ ಬಾರಾ ಮಯ್ನೆ.
ಕಷ್ಟಾಂಚಿ ವಿಂಚವ್ಣ್.
ವ್ಹಯ್. ಪುಣ್ ತುಂವೆ ಕರಿಜಾಯ್ಚ್ ಪಡ್ತೆಲಿ.
ಮ್ಹಾಕಾ ಸಮ್ಜತಾ.
ಬಸ್ಲ್ಲೆ ಕಡೆಚ್ ದಾಕ್ತೆರ್ ಸದಿಳ್ ಜಾಲೊ. ತಾಕಾ ಉದ್ವಿಗ್ನ್ ಕೆಲ್ಲಿ ವಿಷಮ್ ಘಡಿ ಉತ್ರಾಲ್ಲಿ. ತಾಣೆ ಚಿಂತ್ಲ್ಲೆ ಫ್ರಮಾಣೆ ತಾಚ್ಯಾ ಪಿಡೆಸ್ತಾನ್ ಪರಿಸ್ಥಿತಿ ಸಮ್ಜೊನ್ ಘೆತ್ಲ್ಲಿ . ತೊ ಬುದ್ವಂತ್. ಕೊಣಾಯ್ಚಿ ಮಜತ್ ನಾಸ್ತಾಂ ಅಪ್ಣಾಕ್ಚ್ ಸಾಂಬಾಳುಂಕ್ ಸಕ್ತಲೊ. ಅನಿವಾರ್ಯ್ ಪರಿಸ್ಥಿತೆಕ್ ತೊ ಖಂಡಿತ್ ಖಾಂಧ್ ಮಾರ್ತೊಲೊ ಆನಿ ವೇಳ್ ಘಡಿ ಯೆತಾನಾ ತೊ ಘನಾನ್ ದೂಕ್ ಸೊಸ್ತೊಲೊ.
ಆಪ್ಲ್ಯಾ ಶಾಂತ್ ಆನಿ ಸುಕ್ಯಾ ತಾಳ್ಯಾನ್ ಮೆರ್ಡಿತ್ ಮ್ಹಣಾಲೊ: ಎಕಾದಾವೆಳಾ ಒಪ್ರೇಶನ್ ಕರಿನಾಸ್ತಾಂ ಹಾಂವೆ ಮ್ಹಜಾ ಕಾಮಾಕ್ -ರೋಮಾಕ್-ವಚೊಂಕ್ ಚಿಂತ್ಲ್ಯಾರ್, ಥೈಂಚ್ಯಾ ಮ್ಹಜಾ ದಾಕ್ತೆರಾ ಖಾತಿರ್ ಸಗ್ಳೊ ರಿಪೋರ್ಟ್ ಬರವ್ನ್ ದಿಶಿಗೀ?
ಖಂಡಿತ್ ಜಾವ್ನ್ ಮೊನ್ಸಿಜ್ಞೊರ್ ಮೆರ್ಡಿತ್. ತುಜೆಂ ಧೈರ್ ಹಾಂವ್ ಮೆಚ್ವಾತಾಂ. ಹಾಂವ್ ಕಥೊಲಿಕ್ ನ್ಹಯ್ ತರೀ, ಹ್ಯಾ ಸಂದರ್ಭಾರ್ ತುಜೊ ಭವಾಡ್ತ್ ತುಕಾ ಖಂಡಿತ್ ಜಾವ್ನ್ ಉಪ್ಕಾರ್ತಾಲೊ.
ಹಾಂವ್ ಯೀ ತಶೆಂಚ್ ಚಿಂತುನ್ ಆಸಾಂ ಡೊಕ್ಟರ್ ಮೆರ್ಡಿತಾನ್ ಸಾಂಗ್ಲೆಂ. ಪುಣ್ ತಾಕಾ ಭರ್ವಾಸೊ ನಾತ್ಲೊ.
ಆತಾಂ ಪಾಕಾಂತ್ಲ್ಯಾ ತ್ಯಾ ಬಾಂಕಾಚೆರ್ ಬಸೊನ್ ತೊ ಆಪ್ಲಿ ಮುಕ್ಲಿ ಜಿಣಿ ನಿಯಾಳುಂಕ್ ಲಾಗ್ಲೊ. ವಾರ್ಯಾಂತ್ ವಸಂತ್ ಋತುಚೊ ಸ್ವಾಧೀಕ್ ಪರ್ಮಳ್ ಮಿಸ್ಳೊನ್ ಆಸುಲ್ಲೊ. ತರ್ನೆಂ ವೋತ್ ನವಿ ಹುರುಪಾಯ್ ಹಾಡಿಲಾಗ್ಲಿ, ಪುಣ್ ಮೆರ್ಡಿತಾಚ್ಯಾ ವಾಂಟ್ಯಾಕ್ ತೆಂ ಸಕ್ಕಡ್ ನಿರ್ಫಳ್ ಜಾವ್ನಾಸ್ಲೆಂ. ವಿದ್ಯಾರ್ಥಿ ಜೀವನಾಂತ್ ಎಕಾ ಪಾದ್ರಿನ್, ಮರ್ಣಾ ಥಾವ್ನ್ ಉಟ್ಲೆಲ್ಯಾ ಲಾಜರಸಾ ವಿಶ್ಯಾಂತ್ ದಿಲ್ಲೊ ಘಣ್ಗಣಿತ್ ಸೆಮಾಂವ್ ತಾಚ್ಯಾ ಉಡಾಸಾಕ್ ಆಯ್ಲೊ. ಜೆಜುನ್ ಊಠ್ ಮ್ಹಳ್ಳ್ಯಾಕ್ಷಣ್ ಕಸೊ ಲಾಜರಸ್ ಕಾಂಪೊನ್ ಉಭೊ ರಾವ್ತಾ ಮ್ಹಳ್ಳೆಂ ತಾಣೆ ರೂಬ್ ರೂಬ್ ಪಳೆಲ್ಲೆಶೆಂ ಪಿಂತ್ರಾಯಿಲ್ಲೆಂ. ಪುನರ್ಜೀವನಾ ಖಾತಿರ್ ಲಾಜರಸಾನ್ ಕಸಲೆಂ ಮೋಲ್ ಫಾರಿಕ್ ಕೆಲ್ಲೆಂ? ಪೆಲ್ಯಾ ಖಾತಿರ್ ಕಾಳಿಜ್ ಕಡ್ಚೆ ಬರಿಂ ತೊ ಚಲ್ಲೊಗೀ? ವ..
ಹೆಂ ಸವಾಲ್ ಮೆರ್ಡಿತಾಕ್ ಸಬಾರ್ ವಸಾಂ ಥಾವ್ನ್ ದೊಸ್ತಾಲೆಂ. ಆತಾಂ ಅಖ್ರೆಕೀ ತಾಕಾ ಜಾಪ್ ಮೆಳ್ಳಿ, ಜಿವಾ ವ್ಹರ್ತಿ ಸ್ವಾಧಿಕ್ ವಸ್ತ್ ದುಸ್ರಿ ನಾ, ವೆಳಾ ವ್ಹರ್ತಿ ಮೊಲಾಧಿಕ್ ವಸ್ತ್ ದುಸ್ರಿ ನಾ. ಪಾಚ್ವೆಂ ತಣ್ ಆನಿ ಮಾತ್ಯೆಚೊ ಸ್ಪರ್ಶ್, ಸುಕ್ಣ್ಯಾ ಸಾವ್ಜಾಂಚ್ಯಾ ರಂಗೀನ್ ಆವಾಜಾ ವ್ಹರ್ತೊ ಸಂತೊಸ್ ದುಸ್ರೊ ನಾ.
ಹಿಚ್ ಸಂಗತ್ ಮೆರ್ಡಿತಾಕ್ ಧೊಸ್ತಾಲಿ. ವೀಸ್ ವಸಾಂ ದೆವಾಚೊ ಮಣಿಯಾರಿ ಜಾವ್ನ್ ತಾಣೆ ಖರ್ಚಿಲ್ಲಿಂ. ನಶ್ವರ್ ಕುಡಿಂತ್ , ದೆವಾಚ್ಯಾ ಪಾಯಾಂಥಳಾ ಸೆವೊಂಕ್ ಅತ್ರೆಗ್ಚೊ ಆತ್ಮೊ ಕುಡಿ ಥಾವ್ನ್ ಮೆಕ್ಳೊ ಜಾಂವ್ಚಿ ತಾರಿಕ್ ಪಯ್ಲಿಚ್ ಕಳಿತ್ ಜಾಲ್ಯಾ ತರೀ ಹೆಂ ಮಾಂದುಂಕ್ ಅಪುಣ್ ಕಿತ್ಯಾಕ್ ನರ್ಗಾತಾಂ? ಸಂತೊಸಾನ್ ನ್ಹಯ್ ತರೀ ಭರ್ವಸ್ಯಾನ್ ಪುಣಿ? ಅಪುಣ್ ಕಿತ್ಯಾಕ್ ಪಾಸುನ್ ಚಿಡ್ಕೊನ್ ರಾವ್ಲಾಂ? ಆಪ್ಲಿಂ ಮ್ಹಳ್ಳಿಂ ತಾಕಾ ಕೊಣ್ಚ್ ನಾತ್ಲಿಂ. ಆಸ್ತ್? ರೊಮಾಂತ್ ಏಕ್ ಅಪಾರ್ಟ್ಮೆಂಟ್, ಕೂಡ್ ಭರ್ತಿ ಬೂಕ್, ಆನಿ ಅವಯ್ ಥಾವ್ನ್ ಥೊಡೆಂ ವಾರ್ಷಿಕ್ ಧನ್. ವೃತ್ತೇ ಖಾತಿರ್ ಪುಣಿ? ಜಾವ್ನಾಸೊಂಕೀ ಪುರೊ. ಕಿತ್ಯಾ, ತೊ ಧಾರ್ಮಿಕ್ ವಿಧಿಂಚ್ಯಾ ಪವಿತ್ರ್ ಮೇಳಾಚೊ ಲೆಖಾಂ ತಪಾಸ್ಣಾರ್, ಪ್ರಿಫೆಕ್ಟ್ ಕಾಡ್ದಿನಾಲ್ ಯೂಜಿನಿಯಾ ಮಾರೊಟ್ಟೊಚೊ ಆಪ್ತ್ ಕಾರ್ಯ್ದರ್ಶಿ ಜಾವ್ನಾಸ್ಲೊ. ಹೆಂ ಕಾಮ್ ಪಾಪ್ ಸಾಯ್ಬಾಚ್ಯಾ ಸಾವ್ಳೆಕ್ ಲಾಗ್ಗಿಂ ಪಡ್ತಾಲೆಂ. ಎದ್ಯಾ ವ್ಹಡ್ಲ್ಯಾ ಧಾರ್ಮಿಕ್ ಸಂಸ್ಥ್ಯಾಚ್ಯೊ ಆಂತರಿಕ್ ಚಟುವಟಿಕೊ ಲಾಗ್ಗಿಂ ಥಾವ್ನ್ ಪಳೆಂವ್ಚೊ ಸುಯೋಗ್ ತಾಕಾ ಲಾಬ್ಲ್ಲೊ. ತೊ ಸ್ವತಂತ್ರ್ ಆಸುಲ್ಲೊ. ತರೀ ಪುಣ್ ವಾಂಚೊನ್ ಉರೊಂಕ್ ಹಿಂಚ್ ಪ್ರಬಳ್ ಕಾರಣಾಂ ಜಾಂವ್ಕ್ ಸಾಧ್ಯ್ ನಾತ್ಲಿಂ. ಸಾಸ್ಣಾಚೆ ಜಿಣ್ಯೆ ವಿಶಿಂ ಸೆಮಾಂವ್ ದಿತೆಲ್ಯಾಂಕ್ ವಯ್ಲೆಂ ಕಾರಣ್ ಜಾವ್ನಾಸೊಂಕ್ ಸಾಧ್ಯ್ಚ್ ನಾ.
ತೊ ಕೆದ್ನಾಂಯ್, ಕಸಲ್ಯಾಕ್ಚ್ ಆಶೆಂವ್ಕ್ ನಾತ್ಲೊ. ತಾಣೆ ಇಗರ್ಜ್ ಮಾತೆಚೆಂ ಶಿಸ್ತ್ ಸಾಂಬಾಳ್ಲ್ಲೆಂ ಆನಿ ಇಗರ್ಜ್ ಮಾತೆನ್ ತಾಕಾ ರಕ್ಷಣ್ ದಿಲ್ಲೆಂ. ತಾಚಿಂ ತಾಲೆತಾಂ ಗಳ್ಸುಂಕ್ ಇಗರ್ಜ್ಮಾತೆನ್ ತಾಕಾ ಅವ್ಕಾಸ್ ದಿಲ್ಲೊ. ತಾಚ್ಯಾ ರೆಲಿಜಿಯೊಸ್ ಜೀವನಾಂತ್ ಎಕಾ ಥರಾಚಿ ತೃಪ್ತಿ ತಾಕಾ ಪ್ರಾಪ್ತ್ ಜಾಲ್ಲಿ. ಪುಣ್ ಆಜ್ ತಾಚ್ಯಾ ತೃಪ್ತೆಂತ್ ತಾಕಾ ದುಬಾವ್ ಸುರು ಜಾಲ್ಲೊ.. ಅತಾಂ, ನಿಮಾಣ್ಯಾ ಝಡ್ತೆ ವೆಳಾ ಅಪುಣ್ ಕಿತೆಂ ವ್ಹರ್ತೊಲೊಂ? ಆನಿ ಸಂಸಾರಾಂತ್, ಉರ್ಲೆಲ್ಯಾನಿಂ ಅಪ್ಣಾಚೊ ಉಗ್ಡಾಸ್ ಕಾಡುಂಕ್ ಕಿತೆಂ ಸೊಡ್ನ್ ವೆತೊಲೊಂ? ಹಾಂಗಾಚ್ ತಾಚ್ಯಾ ಅತೃಪ್ತೆಚಿ ಕೊಡ್ಸಾಣ್ ಆಸುಲ್ಲಿ. ಅಪುಣ್ ಜಿವಿತಾಂತ್ ಸಲ್ವಲಾಂ ಮ್ಹಣ್ಚಾಂತ್ ಕಾಂಯ್ಚ್ ದುಬಾವ್ ನಾತ್ಲೊ.
ತಾಣೆ ಕೆದಿಂಚ್ ಎಕಾ ಭುರ್ಗ್ಯಾಕ್ ಜಲ್ಮ್ ದೀಂವ್ಕ್ ನಾತ್ಲೊ ಸೊಡ್ಯಾಂ, ಏಕ್ ರೊಂಪಿ ಸಯ್ತ್ ಲಾಂವ್ಕ್ ನಾತ್ಲಿ. ರಾಗ್ ಕರುಂಕ್ನಾತ್ಲೊ ವ ದಾನ್ ದೀಂವ್ಕ್ ನಾತ್ಲೆಂ, ತಾಚಿ ಜಿಣಿ ವಾತಿಕಾನಾಚ್ಯಾ ದಪ್ತರಾನಿಂ ಎಕಾ ಬೂಕಾ ಕಿಡಿ ಬರಿಂ ಪಾಶಾರ್ ಜಾಲ್ಲಿ, ತಾಚೆ ಥಾವ್ನ್ ಕಿತೆಂಯ್ ಬರೆಂಪಣ್ ಜಾಲಾಂ ತರ್, ತಾಂತುಂ ವ್ಯಕ್ತಿಗತ್ ಸಮರ್ಪಣ್ ನಾತ್ಲೆಂ. ಭುಜಾವಣ್ ದಿಲ್ಲ್ಯಾ ಖಾತಿರ್ ತಾಕಾ ಕೊಣ್ಚ್ ಪಿಡೆಸ್ತ್ ಬೆಸಾಂವ್ ದಿಂವ್ಚೆ ನಾಂತ್. ಪಾತ್ಕಿ, ಸಲ್ವಾಸಾಂವಾ ಲಾಗೊನ್ ತಾಚೊ ಉಡಾಸ್ ಕಾಡ್ಚೆ ನಾಂತ್. ತಾಕಾ ಉಕಳ್ಶಾ ಮೊರಾಜಾಯ್ ಪಡ್ತೆಲೆಂ.
ಎಕಾಚ್ಛಾಣೆ ತೊ ಘಾಬಾರ್ಲೊ. ತಾಕಾ ಶೆಳೊ ಘಾಮ್ ಸುಟ್ಲೊ. ಬೋಲ್ ಖೆಳೊನ್ ತಾಚೆ ಲಾಗ್ಗಿಂ ಪಾವ್ಲ್ಲೆಲ್ಲೆ ಥೊಡೆ ಭುರ್ಗೆ ತಾಚೆಂ ತೊಂಡ್ ಪಳೆವ್ನ್ಚ್ ನಪಂಯ್ಚ್ ಜಾಲೆ. ಥೊಡೊ ಥೊಡೊಚ್ ಆಕಾಂತ್ ಪಯ್ಸ್ ಜಾವ್ನ್ ಪರ್ತ್ಯಾನ್ ತಾಚೆ ಥೈಂ ಶಾಂತತಾ ಭರ್ಲಿ. ಉರ್ಲೆಲ್ಯಾ ಅವ್ದೆಂತ್ ಆಪ್ಲಿ ಜಿಣಿ ಕಶಿ ಮಾಂಡುನ್ ಹಾಡ್ಚಿ ಮ್ಹಣೊನ್ ತೊ ನಿಯಾಳುಂಕ್ ಲಾಗ್ಲೊ.
ರೋಮಾಂತ್ಲ್ಯಾ ದಾಕ್ತೆರಾನಿಂ ತಾಚ್ಯಾ ಪಿಡೆ ವಿಶ್ಯಾಂತ್ ಪಯ್ಲೆಂ ಕಳಯ್ತಾನಾ, ಸಹಜ್ ಜಾವ್ನ್ ಆಪ್ಲ್ಯಾ ಮಾಂಯ್ಗಾಂವ್ ಲಂಡನಾಕ್ ವಚೊಂಕ್ ತಾಣೆ ನಿರ್ಧಾರ್ ಕೆಲ್ಲೊ. ಆಪ್ಲ್ಯೆ ಜಿಣ್ಯೆಚಿ ಅವ್ದಿ ಮಟ್ವಿ ಜಾಲ್ಯಾರ್, ಮರ್ಣಾಕ್, ಲಂಡನಾಚ್ಯಾ ಪ್ರಶಾಂತ್ ವಾರ್ಯಾಂತ್ಚ್ ಸ್ವಾಗತ್ ಕರುಂಕ್ ತಾಣೆ ಚಿಂತ್ಲ್ಲೆಂ.
ಆತಾಂ ಹಿ ಆಶಾ ಯೀ ಸ್ವಪಾಣ್ ಜಾಂವ್ಕ್ ಪಾವ್ಲ್ಲಿ. ತಾಚ್ಯಾ ಪೊಟಾಂತ್ ವ್ಹಾಡೊನ್ ಯೆಂವ್ಚ್ಯಾ ದುಸ್ಮಾನಾಕ್ ನಾಸ್ ಕರುಂಕ್ ಸಾಧ್ಯ್ ನಾತ್ಲೆಂ. ಏಕ್ ದಾದ್ಲೊ ಆನಿ ಯಾಜಕ್ ಜಾವ್ನ್ ಸಲ್ವಾಲ್ಲ್ಯಾ ಸತಾ ಬರಿಂ. ಆತಾಂ ಕಿತೆಂ ಕಚೆಂ? ಒಪ್ರೇಶನ್ ಕರವ್ನ್ ದೂಕ್ ಆನಿ ವಳ್ವಾಳ್ಯಾಂ ಥಾವ್ನ್ ಸುಟ್ಕಾ ಜೊಡ್ಚಿ? ಪುಣ್ ಹಿ ದುಸ್ರ್ಯಾ ಥರಾಚಿ ಸಲ್ವಣಿ ಜಾಂವ್ಚಿ ನಾಮೂ? ಹಾಕಾ ಆನಿ ಜೀವ್ಘಾತಾಕ್ ಕಿತೆಂ ಫರಕ್? ತಾಣೆ ಫಾರಿಕ್ ಕರುಂಕ್ ಆಸ್ಚೆಂ ದೆಂವೆ ಮಸ್ತು ಆಸುಲ್ಲೆಂ. ಭೊರ್ಯಾ ವಯ್ರ್ ಬೊರ್ಕೊಟಿ ಕಿತ್ಯಾಕ್?
ಪಾಟಿಂ ಕಾಮಾಕ್ ವೆಚೆಂ? ರೋಮಾಂತ್ಲ್ಯಾ ಕೊಂಗ್ರೆಗೇಶನ್ ರಾವ್ಳೆರಾಂತ್ ತಾಚಿ ಬಸ್ಕಾ ಖಾಲಿಚ್ ಆಸುಲ್ಲಿ. ಥೈಂ ಸಾಂತಿಪಣಾಕ್ ತಯಾರ್ ಜಾಲ್ಲ್ಯಾ ವೆಕ್ತಿಂಚಿ ದರಬಸ್ತ್ ಫಾಯ್ಲಾಂ ಧುಳ್ ಖಾವ್ನ್ ರಾಕೊನ್ ಆಸ್ಲಿಂ. ತಿಂ ಉಗ್ತಿಂ ಕರ್ನ್ ತಾಂಚಿ ಜಿಣಿ. ಕೃತ್ಯಾಂ, ಅಜ್ಯಾಪಾಂ ಇತ್ಯಾದಿ ತಜ್ವೀಜ್ ಕರ್ನ್ ವಿಶ್ಲೇಶಣ್ ಕರುಂಕ್ ಆಸ್ಲೆಂ. ತಾಂಚ್ಯಾ ಸಾಂತಿಪಣಾ ಆನಿ ಅಜ್ಯಾಪಾಂ ವಯ್ರ್ ತೀಕ್ಷ್ಣ್ ಸವಾಲಾಂ ಕರುಂಕ್ ಆಸ್ಲಿಂ. ಕಸಲ್ಯಾ ಫಾಯ್ದ್ಯಾಕ್? ಸಾಂತಿಪಣಾಚೊ ಕುರೊವ್ ಎಕ್ಲ್ಯಾಕ್ ನಿರಾಕರ್ಸುಂಕ್, ಕಿತ್ಲೇಶ್ಯಾ ವಸಾಂ’ಪ್ರಾಂತ್ ಪಾಪ್ಸಾಯ್ಬಾನ್ ಆನ್ಯೆಕಾ ವೆಕ್ತಿಕ್ ಸಾಂತಾಚೆ ಪಟ್ಟೆರ್ ನಾಂವ್ ಮೆಳಂವ್ಕ್ ಹುಕುಂ ದಿಂವ್ಚೆ ಖಾತಿರ್?
ಆಪ್ಣೆ ತಾಂಚ್ಯಾ ಜಿಣ್ಯೆವಯ್ರ್ ಕಿತೆಂ ಬರಯ್ಲಾಂ ಮ್ಹಣ್ ಹೆ ಸರ್ಲ್ಲೆ ವೆಕ್ತಿ ಗಣ್ಣೆ ಕರ್ತಿತ್? ತೆ ಸರೊನ್ ಕಿತ್ಲೀಶಿಂ ವಸಾಂ ಸಂಪ್ಲ್ಯಾಂತ್ ಆನಿ ತಾಂಚೆರ್ ಎದೊಳ್ಚ್ ತೀರ್ಪ್ ವಾಚ್ಲಾಂ, ವೆಗ್ಗಿಂಚ್ ಆಪ್ಣಾಚೆಂ ಜಾಂವ್ಕ್ ಆಸ್ಚೆ ಬರಿಂ. ಏಕ್ ನವೊ ಯಾತ್ರಿಕ್ ಜಾಗೊ, ಲಿತುರ್ಜಿಂತ್ ನವೆಂ ಮೀಸ್ ಖಂಚೇಂಯ್ ತಾಂಚೆರ್ ಕಸಲೊಚ್ ಪ್ರಭಾವ್ ಘಾಲ್ಚೊ ನಾ. ಬ್ಲೇಸ್ ಮೆರ್ಡಿತ್ ತಾಂಚಿ ಜಿಣ್ಯೆ ಚರಿತ್ರಾ ಘೆವ್ನ್ ಕಿತ್ಲಿಂ ವಸಾಂ ಸಂಸೊಧ್ ಕರಿತ್ ಜಾಲ್ಯಾರೀ ಕಿತೆಂಚ್ ಜಾಂವ್ಚೆಂ ನಾ.
ಪುಣ್ ಹೆಂ ತಾಚೆಂ ಕಾಮ್ ಜಾವ್ನಾಸ್ಲೆಂ. ನವೆಂ ಕಾಮ್ ಶಿಕೊಂಕ್ ಆತಾಂ ವೇಳ್ ಉತ್ರಾಲ್ಲೊ. ಸದಾಂಯ್ ಮೀಸ್ ಸಾಂಗ್ಚೆಂ, ದಫ್ತರಾಚೆಂ ಕಾಮ್, ಅಪ್ರೂಬ್ಶೆಂ ಇಂಗ್ಲೆಜ್ ಇಗಜಿಂತ್ ಸೆರ್ಮಾಂವ್ ದಿಂವ್ಚೊ, ರಜೆರ್ ಆಸ್ಚ್ಯಾ ಪಾದ್ರಿಚ್ಯಾ ಜಾಗ್ಯಾರ್ ಕುಮ್ಸಾರಿಂತ್ ಬಸ್ಚೆಂ, ಬ್ರಿವಿಯರಿ ವಾಚ್ಚಿ, ಆನಿ ನಿದೆವಿಣ್ ರಾತ್ ಪಾಶಾರ್ ಕರ್ಚಿ ತಾಚ್ಯಾ ಮುಕ್ಲ್ಯಾ ಸ ವ ಬಾರಾ ಮಯ್ನ್ಯಾಂಚಿ ದಿಸ್ಪಟಿ ಜಾಂವ್ಕ್ ಆಸ್ಲಿ. ಉಪ್ರಾಂತ್ ಏಕ್ ದೀಸ್ ತೊ ಮೊರ್ತೊಲೊ. ಏಕ್ ಹಫ್ತೊ ಬರ್ ಸರ್ಲ್ಲೊಲೊ ಆಮ್ಚೊ ಭಾವ್ ಬ್ಲೇಸ್ ಮೆರ್ಡಿತ್.. ಮ್ಹಣೊನ್ ಮೀಸಾಂಚೆರ್ ತಾಚೊ ಉಡಾಸ್ ಕಾಡ್ತೆಲೆ. ನಂತರ್, ಸರ್ಲ್ಲ್ಯಾ ಸರ್ವ್ ಭಾವಾಡ್ತ್ಯಾಂ ಪಾಸುನ್.. ಜೆರಾಲ್ ಮಾಗ್ಣ್ಯಾಂತ್ ಸೆರ್ವಾತೊಲೊ.
ಪಾಕಾಂತ್ ಆತಾಂ ಥಂಡಿ ದೆಂವೊನ್ ಯೇಂವ್ಕ್ ಲಾಗ್ಲಿ. ಮೋಗಿಂ ಕುಲ್ಯಾಂಕ್ ಚಿಡ್ಕಾಲ್ಲೆಂ ತಣ್ ಪಾಪುಡ್ನ್ ಘರಾ ಕುಶಿಕ್ ಭಾಯ್ರ್ ಸಲಿಂ. ಹಾಸಾಂ ತಳ್ಯಾಚ್ಯಾ ದೆಗೆಕ್ ವೊಂದೊಂಕ್ ಲಾಗ್ಲಿಂ. ಮೊನ್ಸಿಜ್ಞೊರ್ ಬ್ಲೇಸ್ ಮೆರ್ಡಿತ್ಯೀ ಉಟೊಂಕ್ ತಯಾರ್ ಜಾಲೊ. ವೆಸ್ಟ್ ಮಿನಿಸ್ಟರಾಚ್ಯಾ ಆಡಳ್ತೆದಾರಾ ಥಾವ್ನ್ ತಾಕಾ ಚ್ಹಾಯೆಚೆಂ ಆಮಂತ್ರಣ್ ಆಸುಲ್ಲೆಂ. ಆಪ್ಲ್ಯಾ ಸಾಲ್ವಾಸಾವಾಂತ್ ದುಸ್ರ್ಯಾಂಕ್ ವಾಂಟೆಲಿ ಕರಿನಾಸ್ತಾಂ ಆಪ್ಲೊ ಖುರಿಸ್ ಅಪ್ಣೆಂಚ್ ವ್ಹಾವೊಂವ್ಚಿ ಇಂಗ್ಲಿಷ್ ರೀತ್ ಜಾವ್ನಾಸ್ಲಿ. ಥೊಡೊ ವೇಳ್ ಪುಣಿ ದುಸ್ರ್ಯಾಂ ಸಾಂಗಾತಾ ಗಜಾಲಿ ಮಾರ್ನ್ ಆಪ್ಲಿ ದೂಕ್ ವಿಸ್ರೊಂಕ್ ಮೆಳ್ಳೆಲ್ಯಾ ಅವ್ಕಾಸಾ ಖಾತಿರ್ ಅಭಾರಿ ಜಾವ್ನ್ ಮೆರ್ಡಿತ್ ಉಟೊನ್ ಹಳೂ ಚಲೊಂಕ್ ಲಾಗ್ಲೊ.