ಅಮೇಯ್ ನಾಯ್ಕ್

ಖುನ್  

ಖುನ್ ಜಾಲಾ ಖುನ್

...ಮನೀಸಪಣಾಚೊ.

ಹಾಂವ್ಪಣಾಚ್ಯಾ ಖುಸ್ತಾರ್

ಮಿರೊವ್ಪಿ ಮನಾಂಚೊ.

ವಾವ್ಡ್ಯೊ ಮಾರ್ತಾತ್ ಗಜಾಲಿ

ಖುನಿ ಆಜೂನ್ ಫರಾರ್ ಆಸಾ.

ಗುನ್ಯಾಂಕಾರಾವಾಂಗಡಾ ತಸೊ

ದರ್ ಎಕ್ಲ್ಯಾಚೊ ಕರಾರ್ ಆಸಾ.

ಹುಮ್ಟಾವನ್ ಪಡಿಲ್ಲ್ಯಾ ರೂಖಾಕ್

ದುಬಾವ್ ಯೆತಾ ಪಾನಾಂಚೊ.

ಖುನ್ ಜಾಲಾ ಖೂನ್

...ಮನೀಸಪಣಾಚೊ.

ಹಾಂವ್ಪಣಾಚ್ಯಾ ಖುಸ್ತಾರ್

ಮಿರೊವ್ಪಿ ಮನಾಂಚೊ.

ನಿಶೆಧಾಚ್ಯಾ ಮೆಣಾತ್ ಘಾತ್ಲ್ಯಾ

ಫಿತೂರ್ಯಾನಿ ವಾತ್.

ಪೆಟಯ್ತಕೂಚ್ ವಾತೀಕ್ ಮಾಗೀರ್

ಧರ್ಮ್ ಲಾಗ್ನಾ ಜಾತ್.

ಭಗ್ಭಗಪಿ ಉಜ್ಯಾಕ್ ಆಧಾರ್

ಸಂಪ್ರದಾಯಿಕ್ ತಣಾಚೊ.

ಖುನ್ ಜಾಲಾ ಖುನ್

...ಮನೀಸಪಣಾಚೊ.

ಹಾಂವ್ಪಣಾಚ್ಯಾ ಖುಸ್ತಾರ್

ಮಿರೊವ್ಪಿ ಮನಾಂಚೊ.

ಕಸಲೆಂ ವಿಪರ್ಯಾಸ್ ಪಳೆಯಾತ್, ಬಗ್ಲೆನ್ ವ್ಹಾಳುಂಕ್ ಲಾಗ್ಲಾಂ ರಗತ್; ಅಮಾಯಕ್ ಮನಶಾಚೆಂ, ಅಸ್ಕತ್ ಮನಶಾಚೆಂ ಆನಿ ಮನಿಸ್ ಕಸ್ಲಿಚ್ ಫಿಕಿರ್ ನಾಸ್ತಾಂ ಕವಿತಾ ಬರಂವ್ಕ್ ಲಾಗ್ಲಾ ಆನಿ ಮ್ಹಾಕಾ ಲಾಯ್ಕ್ ಕರಾ ಶೇರ್ ಕರಾ ಮ್ಹಣುನ್ ಸೆಲ್ಫಿ ಕಾಡ್ಚಾಂತ್ ವೆಸ್ತ್ ಆಸಾ. ಅಸಲೆ ಹಡ್ಬೆ ಜರ್ ಕವಿ ತರ್ ಹಾಚ್ಯಾಕೀ ಅನಿಶ್ಟ್ ಸಮಾಜೆಂತ್ ಆನಿ ಕಿತೆಂ ಆಸುಯೆತಾ? ಆಯ್ಚೊ ಕಾಳ್ ದಾಖವ್ಪಾಚೊ ದೆಕುನ್ ಸಗ್ಳೆ ದಾಕವ್ಪಾಂತ್ ವೆಸ್ತ್. ಹಾಂವ್ ವ್ಹಡ್ಲೊ, ಹಾಂವ್ ಉಂಚ್ಲೊ, ಕಿತ್ಯಾಕ್ ಮ್ಹಜೆಲಾಗಿಂ ಅಖ್ಬರ್ ಉಲಯ್ಲಾ ಮ್ಹಣುನ್ ದಾಂಗ್ರೊ ಮಾರ್ಚೆ ತಕ್ಲೆಂತ್ ಶೆಣ್ ಆನಿ ಗೊಬೊರ್ ಭರುನ್ ಆಸ್ಚೆ, ತೊಂಡಾರ್ ಮೇಕಪ್ ಘಾಲುನ್ ಸಮಾಜೆಕ್ ಫಟಯ್ತಾತ್.

ಹ್ಯಾ ಕವಿತೆಂಚ್ ಏಕ್ ಖುನ್ ಆಸಾ ಮನ್ಶಾಪಣಾಚೆರ್ ಖುನ್ ಜಾಲ್ಯಾ ಆನಿ ದರೇಕಾ ದಿಸಾ ಜಾವ್ನ್‍ಚ್ ಆಸಾ. ಪೊಯ್ರ್ ಎಕಾ ಚೆಡ್ವಾಚೆರ್ ಸಾಮೂಹಿತ್ ಭಲತ್ಕಾರ್ ಜಾವ್ನ್ ತಿಕಾ ಲಗಾಡ್ ಕಾಡ್ಲೊ ಆನಿ ಕಾಲ್ ಆಮ್ಚ್ಯಾ ಕಾಯ್ದೆ ಕಾನುನಾಕ್ ಬೊಲ್ಸಾಂತ್ ಘಾಲ್ಲ್ಯಾಂನಿ ತಿಕಾ ಪುರುನ್ ಸೊಡ್ಲೊ ಆನಿ ಆಮಿ ಸಗ್ಳಿಂ ಸುಶೆಗಾತ್ ಮಿರಂವ್ಕ್ ಪಡ್ಲ್ಯಾಂವ್ ಜಶೆಂ ಆಮ್ಕಾಂ ಮರಣ್ ನಾ, ಆಮಿ ಸಾಸ್ಣಿಕ್ ಮನಿಸ್ ಮ್ಹಳ್ಳೆಪರಿಂ.

Khun