[ಅಂಕಣ್] ಪಯ್ಣಾರಿಚೆಂ ರಾಜಾಂವ್ [ಆಗ್ನೆಲ್ ಪಿರೇರಾ]
ಆಗ್ನೆಲ್ ಪಿರೇರಾ: ಥೊಡಿ೦ ವರ್ಸಾ೦ ಬಾಹ್ರೆನ್ ವಾವ್ರ್ ಕರ್ನ್ ಆತಾ೦ ಬೆ೦ಗ್ಳುರಾ೦ತ್ ವಸ್ತಿ ಕರ್ನ್ ಆಸ್ಚ್ಯಾ ಮ೦ಗ್ಳುರ್-ಉರ್ವಾಚೊ ಆಗ್ನೆಲ್ ಪಿರೆರ್ ಸಬಾರ್ ಕ್ಶೇತ್ರಾನಿ೦ ಯಶಸ್ವಿ ಲಾಭ್ಲ್ಲೊ ಆನಿ೦ ಜಾಣ್ವಾಯ್ ಆಪ್ಣಾಯಿಲ್ಲೊ ವ್ಯಕ್ತಿ. ಲ್ಹಾನ್ ಆಸ್ತಾನಾ ಆಪ್ಲೆ ಆವಯ್ಚ್ಯಾ ರಾ೦ದ್ವೊಯೆ ಆ೦ಗ್ಡಿ ಬಸುನ್ ಶಿಕ್ಲ್ಲೆಂ ಸಾ೦ಸಾರಿಕ್-ವ್ಯವಹಾರಿಕ್ ಜ್ಞಾನ್ (ತೀನ್ ಭಾಶೆ೦ನಿ೦), ಆದ್ಲ್ಯೊ ಸಾ೦ಗ್ಣ್ಯೊಆನಿ೦ ಗಾದಿ, ತಶೆ೦ಚ್ ಪ್ರಿ೦ಟಿ೦ಗ್ ಪ್ರೆಸ್ಸಾ೦ತ್ ಕಾಮ್ ಕರ್ಚ್ಯಾ ಬಾಪಾಯ್ನ್ ಘರಾ ಹಾಡ್ನ್ ಯೇ೦ವ್ಚಿ೦ ಕೊ೦ಕ್ಣಿ-ಕಾನಡಿ ದಿಸಾಳಿ೦-ಹಫ್ತ್ಯಾಳಿ೦-ಮಹಿನ್ಯಾಳಿ೦ ಆನಿ೦ ವಾರ್ಷಿಕ್ ವಿಶೇಷಾ೦ಕ್ಯಾನಿ ಆಟಾಪ್ಲೆಲೆ೦ ಚಿ೦ತಾಪ್. ಮಾಗಿರ್ ಚಾರ್ಟರ್ಡ್ ಎಕೌ೦ಟೆ೦ಟ್ ಅನಿ೦ ಕ೦ಪೆನಿ ಸೆಕ್ರೆಟರಿಚ್ಯಾ ವ್ರತ್ತಿಪರ್ ಶಿಕ್ಪಾಚ್ಯಾ ವೆಳಾರ್ ಆಪ್ಣಾಯಿಲ್ಲಿ ಜಾಣ್ವಾಯ್, 25 ವರ್ಸಾ೦ ವಯ್ರ್ ಅ೦ತರಾಷ್ಟ್ರೀಯ್ ಸ೦ಸ್ಥ್ಯಾನಿ೦ ಕಾಮ್ ಕರ್ನ್ ತಶೆ೦ಚ್ ದೇಶ್-ವಿದೇಶ್ ಭೊವುನ್ ಗಳ್ಸಿಲ್ಲೊ ಅನುಭವ್! ಸ೦ಘ್-ಸ೦ಸ್ಥ್ಯಾನಿ೦ ಗುರ್ಕಾರ್ಪಣ್, ಸಾಮಾಜಿಕ್, ರಾಜಕೀಯ್, ಸಾಂಸ್ಕೃತಿಕ್ ಕಾರ್ಯಾಂನಿ ಮುಖೇಲ್ಪಣ್, ತಶೆ೦ಚ್ ಅನಾಥಾಶ್ರಮಾ೦ಚ್ಯಾ ಸಾ೦ಗಾತಾ ವಾವ್ರ್, ಕ್ರಿಕೆಟ್ ತಶೆ೦ ಹೆರ್ ಖೆಳಾನಿ೦ ಸಕ್ರಿಯ್ ಪಾತ್ರ್ ಆನಿ೦ ಭುರ್ಗ್ಯಾ೦ಕ್ ತಶೆ೦ ತರ್ನಾಟ್ಯಾ೦ಕ್ ಶಿಕ್ಪಾ-ವಾವ್ರಾ ಸ೦ಬ೦ಧಿ ಬೂದ್-ಬಾಳ್– ಅಶೆ೦ ಅನುಭವಾಚೆ೦ ಆನಿ೦ ಮಾಹೆತಿಚೆ೦ ಬುಯಾ೦ವ್ ಮ್ಹಣ್ಯೇತ್ ಕೊಣ್ಣಾ೦.
ಹೆ೦ ಸರ್ವ್ ಏಕ್ ನಾ೦ತರ್ ಏಕ್ ದೀಸ್ ಚಾರ್ ಲೊಕಾಮಧೆ೦ ವಾ೦ಟುನ್ ಘೆ೦ವ್ಚಿ ಉರ್ಬಾ ಆಗ್ನೆಲಾಚಿ. ಮಧೆ೦ ಸಬಾರ್ ವರ್ಸಾ೦ ಮ೦ಗ್ಳುರಿ ಲೊಕಾನ್ ಚಲ೦ವ್ಚ್ಯಾ ಅ೦ತರ್ಜಾಳಾ೦ತ್ (mangalorean.com) ಆನಿ೦ ದಾಯ್ಜ್ ಪತ್ರಾಚೆರ್ ತಾಣೆ೦ ಯೆದೊಳ್ಚ್ ಸಭಾರ್ ವಿಶಯಾ೦ಚೆರ್ ಬರಯ್ಲಾ೦.ತಾಣೆ೦ ಕೆಲ್ಲ್ಯಾ ಪಯ್ಣಾ೦ಚೊ ವಿವರ್ ಧರ್ನ್, ಬಾಹ್ರೇನಾ೦ತ್ ಜಾಲ್ಲ್ಯಾ ಅ೦ತಾರಾಶ್ತ್ರೀಯ್ ಕಾರ್ಯಾ೦ಚಿ ವರ್ದಿಯಿ ತಾಣೆ೦ ಬರಯ್ಲ್ಯಾ. ಮ೦ಗ್ಳುರ್ಚ್ಯಾ ಟಿವಿರ್ ಚುನಾವ್ ವಿಶ್ಲೇಷಣ್ ತಾಣೆ೦ ಕೆಲಾ೦, ಭ್ರಷ್ಟಾಚಾರಾಚ್ಯಾ ವಿರೋದ್ ಆಂದೋಳನಾಂತ್ಯೀ ತಾಣೆ೦ ಪಾತ್ರ್ ಘೆತ್ಲಾ.
ಪೂಣ್ ತಾಚೊ ಚುರ್ಚುರೊ ಕಿತೆ೦ಗೀ ಮ್ಹಳ್ಯಾರ್, ಆಪ್ಣಾಚೊ ವೇಳ್ ಫಾವೊತೆ ಪರಿ೦ ಖರ್ಚಿನಾತ್ಲ್ಲ್ಯಾ ವರ್ವಿ೦ ಕೊ೦ಕ್ಣೆ೦ತ್ ಚಡ್ ಬರಂವ್ಕ್ ಸಾಧ್ಯ್ ಜಾ೦ವ್ಕ್ ನಾ೦ಮ್ಹಣ್!
ಹ್ಯಾಮುಕಾ೦ತ್ರ್ ಆಗ್ನೆಲ್ ಪಿರೆರಾನ್ ವಿವಿಧ್ ವಿಶಯಾ೦ಚೆರ್ ಬರಯಿಲ್ಲೆ ಲೇಖ್ “ಪಯ್ಣಾರಿಚೆ೦ ರಾಜಾ೦ವ್” ಮ್ಹಳ್ಳ್ಯಾ ಅಂಕಣಾಂತ್ ವ್ಹಾಳ್ತೆಲೆಂ.
ಅಂಕಣ್ಕಾರ್ ಉಲಯ್ತಾ
ಬರ೦ವ್ಕ್ ಆವ್ಕಾಸ್ ಕರ್ನ್ ದಿಲ್ಲ್ಯಾ ಪಯ್ಣಾರಿ ಕುಟ್ಮಾಕ್ ಧನ್ಯವಾದ್. ಆಮಿ ಸರ್ವ್ ಪಯ್ಣಾರಿ ಆಮ್ಚ್ಯಾ ಜೀವನಾಚ್ಯಾ ಪಯ್ಣಾಚ್ಯಾ ವಿವಿದ್ ಹ೦ತಾರ್ ಆಸಾ೦ವ್. ಹಾಂವ್ಯೀ ಏಕ್ ತುಮ್ಚೆ ಮಧ್ಲೊ, ಮ್ಹಜ್ಯಾ ಜಿಣ್ಯೆ-ಪಯ್ಣಾಚ್ಯಾ ಎಕಾ ಹ೦ತಾರ್ ಆಸಾ೦. ತುಮ್ಚೆ ಬರಿ೦ಚ್ ಹಾ೦ವೆ೦, ಆನಿ೦ ಮಜೆ ಬರಿ೦ಚ್ ತುಮಿ –ಆಮ್ಚಾಮ್ಚ್ಯಾ್ಚ್ಯಾ ಪಯ್ಣಾವೆಳಾರ್ ಜಾಯ್ತೊ ಅನ್ಭೋಗ್ ಜೋಡ್ಲಾ. ಪೂಣ್ ಹಾ೦ತುನ್ ವ್ಯತ್ಯಾಸ್ ಆಸೊ೦ಕ್ ಸಾಧ್ಯ್ ಆಸಾ, ಆನಿ೦ಆಮ್ಚೊ ಅನ್ಭೋಗ್ ಭೊಗ್ಚೆ ವಿಧಾನ್ ವೆವೆಗ್ಳೆ ಆಸೊ೦ಕ್ ಪುರೊ ಮ್ಹಣ್ ಚಿಂತುನ್ ಹಾ೦ವ್ ಹೆ೦ ಅ೦ಕಣ್ ಬರ೦ವ್ಕ್ ಮುಕಾರ್ ಸರ್ತಾ೦.
ಏಕ್ ಗರ್ಜೆಚೊ ವಿಷಯ್. ಸಬಾರ್ ಪಾವ್ಟಿ೦ ಕೊಣಾಯ್ಕಿ ಬೆಜಾರ್ ಜಾಯ್ನಾಯೆ, ಕೊಣಾಯ್ಚ್ಯಾ ಭಾವನಾ೦ಕ್ ದುಕೈನಾಯೆ ಮ್ಹಣ್ ಆಮಿ ಸಬಾರ್ ವಿಶಯಾ೦ಚೆರ್ ಬರ೦ವ್ಕ್ ಆವ್ಕಾಸ್ ದೀನಾ೦ವ್. ಆಮ್ಚೆ ಭಿತರ್ ಆಮಿ ದಾ೦ಬುನ್ ಧರು೦ಕ್ ಪ್ರಯತ್ನ್ ಕರ್ತಾ೦ವ್. ತಸ್ಲೆ ದೋನ್ ವಿಶಯ್ ಜಾವ್ನ್ ಆಸಾತ್, ರಾಜಕಾರಣ್ (Politics) ಆನಿ೦ ಧರ್ಮ್ (Religion). ಮ್ಹಜ್ಯಾ ಬರ್ಪಾ೦ತ್ ತುಮ್ಕಾ೦ ಸರ್ವ್ ಸಂಗ್ತಿ ಮೆಳ್ತೊಲ್ಯೊ, ಹ್ಯೊ ದೊನೀ ವಿಶಯಾ೦ ಸಮೇತ್.
ಕಿತ್ಯಾಕ್ ಮಳ್ಯಾರ್, ಆಮಿ೦ ಕಿತ್ಲೆ೦ ಪಾತ್ಯೆನಾ೦ವ್ ಮ್ಹಳ್ಯಾರಿ ಧರ್ಮಾ ಥಾವ್ನ್ ಪಯ್ಸ್ ಸರೊ೦ಕ್ ಆಮ್ಕಾ೦ ಸಾಧ್ಯ್ ನಾ೦. ಆಮ್ಚೆ೦ ಧರ್ಮ್ ಆಮ್ಕಾ೦ ಕಶೆ೦ ತರೀ ಪಾಟಿ೦ ವೋಡ್ನ್ ಹಾಡ್ತಾ. ವಾರ್ಯಾರ್ ಉಬ್ಚ್ಯಾ ಆಮ್ಕಾ೦ ಸಬಾರ್ ಪಾವ್ಟಿ೦ ಧರ್ಣಿಚಿ ವಾಟ್ ದಾಕಯ್ತಾ. ಆಮಿ೦ ಖೊಟೆ೦ ಆಸ್ಲ್ಲೆಂ ಮಾತ್ರ್ ಉಕಲ್ನ್ ಧರ್ನ್ ಬೆ೦ಡ್ತಾ೦ವ್, ವಾನಾರ್ ಘಾಲ್ನ್ ವಾಟ್ತಾ೦ವ್, ಶೆರ್ಮಾಂವ್ ಸಾಂಗ್ಲ್ಲ್ಯಾ ಪಾದ್ರ್ಯಾಬಾಚೊ ಆವಾಜ್ ಕಾ೦ಯ್ ಬರೊ ನಾ೦, ಸಾಂಗ್ಲ್ಲೆಂಚ್ ಸಾ೦ಗ್ತಾ, ತಾಕಾ ಕಿತೆ೦ ಕಳಿತ್ ಆಮ್ಚೆ ಕಷ್ಟ್... ಅಶೆ೦ ಸಬಾರ್ ಸಬೂಬ್ ದೀವ್ನ್ ಶೆರ್ಮಾ೦ವಾಚ್ಯಾ ಗರ್ಜೆಚ್ಯಾ ವಿಷಯಾಚೆರ್ ದೊಳೆ ಆನಿ೦ ಕಾನ್ ಧಾ೦ಪ್ತಾ೦ವ್. ಕಾನ್ ಉಣೆ೦ ಆಯ್ಕೊ೦ಚ್ಯಾ ಪಾದ್ರಿ ಸರ್ಶಿನ್ ಕುಮ್ಸಾರಾಕ್ ವೆತಾ೦ವ್, ಸೊಭಿತ್ ದಿಸ್ಚ್ಯಾ ಆನಿ೦ ಇಲ್ಲೆಶೆ೦ ಉಲ೦ವ್ಚ್ಯಾ ಪಾದ್ರಿಕ್ ಆಮ್ಚ್ಯಾ ದಬಾಜಿಕ್ ಕಾರ್ಯಾ೦ಕ್ ಆಪವ್ಣೆ ದಿತಾ೦ವ್. ಮಾಟ್ಯಾ೦ತ್ ತಕ್ಲಿ ಮಾತ್ರ್ ರಿಗವ್ನ್ ಆಪುಣ್ ಸ೦ಪೂರ್ಣ್ ಥರಾನ್ ಲಿಪ್ಲ್ಯಾ೦ ಮ್ಹಣ್ ಪಾತ್ಯೆ೦ವ್ಚ್ಯಾ ಸೊ೦ವ್ಶ್ಯಾಬರಿ೦ ಆಮ್ಕಾ೦ ಜಾ೦ವ್ಕ್ ಸಾಧ್ಯ್ ನಾ೦, ನೈ೦ಗೀ?
ತಶೆ೦ಚ್ ಆಸಾ ರಾಜಕಾರಣ್ (governance), ಯಾ ರಾಜಕೀಯ್ (politics). ತೆ೦ ಗಲೀಜ್, ತೆ೦ ಮ್ಹೆಳೆ೦ ಮ್ಹಣ್ ಆಮ್ಚ್ಯೊ ತಕ್ಲ್ಯೊ ಪಾಡ್ ಕೆಲ್ಯಾತ್, ಮೆ೦ದು ಧುವ್ನ್ ಘಾಲ್ಯಾತ್. ಶಿಕ್ಪ್ಯಾನಿ೦ ರಾಜಕಾರಣಾಚ್ಯಾ ಲಾಗಿ೦ ಗೆಲ್ಯಾರ್ ಭ್ರಷ್ಟ್ ಫುಡಾರಿ೦ಕ್ ಕಷ್ಟ್ ಮ್ಹಣ್ ಆಮಿ೦ ತಾಚ್ಯಾ ಲಾಗಿ೦ ವಚಾನಾತ್ಲ್ಲೆಪರಿಂ ಆಮ್ಕಾ೦ ಭಾ೦ದುನ್ ದವರ್ಲಾ೦. ಆಮಿ೦ ರಾಜಕೀಯಾ ವಿಶ್ಯಾ೦ತ್ ಉಲೈತಾನಾ೦ಚ್ ಆಮ್ಚಿ೦ ತೊ೦ಡಾ೦ ಧಾ೦ಪ೦ವ್ಚೆ೦ ಪ್ರಯತ್ನ್ ಜಾತಾ. ಹೆ೦ ಪೂರಾ ಹಾಕಾ ಕಿತ್ಯಾಕ್, ತೆ ಖಾ೦ವ್ಚೆ೦ ಖಾ೦ವ್ದಿತ್, ಅಮ್ಚೆ೦ ಕಿತೆ೦ ವೆತಾ? ಭ್ರಶ್ಟಾಚಾರ್ ಕೋಣ್ ಕರ್ನಾ ಹ್ಯಾ ಕಾಳಾರ್? ಅಶೆ೦ ಮ್ಹಣ್ ಅಮ್ಕಾ೦ ಥ೦ಡ್ ಬಸೈತಾತ್.
ಶಿಕ್ಪ್ಯಾ೦ನಿ೦ ಹೆ೦ ಮ್ಹೆಳೆ೦ ಮ್ಹಣ್ ರಾಜಕೀಯಾಚ್ಯಾ ಲಾಗಿ೦ ವಚಾನಾತ್ಲ್ಯಾರ್ ಕೊಣಾಕ್ ಲಾಭ್? ದುಬ್ಳ್ಯಾ ಮತ್-ಬ್ಯಾ೦ಕಾಕ್ ಪಾ೦ಯ್ಶ್ಯಾ೦ಚೊ ನೋಟ್ ಹಾತಾ೦ತ್ ಚೆಪುನ್ ತಾ೦ಚೊ ಮತ್ ಚೊರುನ್ ಕೊರೋಡಾನಿ ಆಮ್ಚೆ ಟೆಕ್ಸಾಚೆ ಪೊಯ್ಷೆ ಲುಟ್ತಾನಾ, ಆಮಿ೦ ದೋನ್ ಪೆಗ್ಗ್ ಘಾಲ್ನ್, ಸುಕ್ರಾರಾ/ಸನ್ವಾರಾ (ಗಲ್ಫಾ೦ತ್ ಬ್ರೆಸ್ತಾರಾ/ಸುಕ್ರಾರಾ) ರಾತಿಚ್ಯಾ ಪಾರ್ಟಿ೦ತ್ ವೇಳ್ ಪಾಶಾರ್ ಕರ್ಚ್ಯಾ ಕರ್ಮಾಕ್ ಹೆ೦ ಅಶೆ೦ ಜಾಯ್ಜೆ ಆಸ್ಲ್ಲೆಂ, ಹೆ೦ ತಶೆ೦ ಕರಿಜೆ ಆಸ್ಲ್ಲೆಂ, ಪೂರಾ ಚೋರ್, ತಾಣೆ೦ ಅಶೆ೦ ಕೆಲೆ೦, ಹಾಣೆ ಪೊಯ್ಷೆ ಕೆಲೆಮ್ಹಣ್ ಬೋಟ್ ಜೊಕ್ತಾ೦ವ್, ಆದ್ಲ್ಯಾ ದಿಸಾ ದೊಳೆ ಧಾ೦ಪಿನಾಸ್ತಾನಾ‘ಈಡಿಯಟ್ ಬೋಕ್ಸಾರ್’ ಪಳಯಿಲ್ಲಾ ಆವಾಜಾ-ಘ೦ಟ್ಯಾಚೊ (NOISE HOUR) ಉಡಾಸ್ ಕಾಡ್ತಾ೦ವ್, ಆನಿ೦ ತ್ಯಾ ಬೋಬಾಟ್ಯಾ ಯೆಜ್ಮಾನ್ಯಾಬರಿ (anchor) “ದ ನೇಶನ್ ವಾ೦ಟ್ಸ್ ಟು ನೋ” ಮ್ಹಣ್ ಸವಾಲಾ೦ ಉಡಯ್ತಾ೦ವ್. ಇನ್ಕಮ್ ಟೆಕ್ಸ್ ಸೊಡ್ಯಾ೦, ಹಾಡ್’ಲ್ಲ್ಯಾ ಸಾಮಾನಾರ್ ಯಾ ಘೆತ್’ಲ್ಲ್ಯಾ ಸೇವೆಚೆರ್ ಉಣ್ಯಾರ್ ಉಣೆ೦ 15% ಟೆಕ್ಸ್ (VAT ಯಾ service tax) ಭರ್ನ್ ಸರ್ಕಾರಾಚ್ಯಾ ಹರ್ಧ್ಯಾರ್ ಘಾಲ್ತಾ೦ವ್, ಪೂಣ್ ‘ಮ್ಹೆಳ್ಯಾ’ ರಾಜಕೀಯಾವಿಶ್ಯಾ೦ತ್ ಉಲ೦ವ್ಚೆ೦ ಮಾತ್ರ್ ಅಮ್ಕಾ೦ ನಾಲಿಸಾಯೆಚೆ೦, ಗಲೀಜ್ ಜಾತಾ!
ವ್ಹಯ್ ಮ್ಹೆಳೆ೦ ಆಸಾ; ಸಾರ್ಕೆ೦. ಆಮ್ಕಾ೦ ತೆ೦ ನಿತಳ್ ಕರು೦ಕ್ ನಾಕಾ, ಯಾ ವೇಳ್ ನಾ೦ ತೆ೦ಯೀ೦ ಸಾರ್ಕೆ೦, ಪೂಣ್ ತೆ೦ ಆಪುಣ್ ನಿತಳ್ ಕರ್ತಾ೦, ಮ್ಹಾಕಾ ತುಮ್ಚೊ ಪಾಟಿ೦ಬೊ ದಿಯಾ ಮ್ಹಣ್ ಕೊಣಿ ತರೀ ಮುಕಾರ್ ಸರ್ಲೋ ತರ್ ಆಮಿ೦ ಕಿತೆ೦ ಕರ್ತಾ೦ವ್? ತಾಕಾ ಉತ್ತೇಜನ್ ದೀ೦ವ್ಚೆ೦ ಸೊಡ್ಯಾ೦, ಆಮಿ ಕಸ್ಲೆ೦ಯ್ ತಜ್ವೀಜ್ ಕರಿನಾಸ್ತಾನಾ ತಸಲ್ಯಾ ಮ್ಹಣ್ಶ್ಯಾಚ್ಯೊ ಖೊಡಿ ಕಾಡ್ತಾ೦ವ್. ತಾಕಾ ಖೆ೦ಡ್ತಾ೦ವ್. ತಾಚ್ಯೊ ಲಾನ್-ಲಾನ್ ಚುಕಿ ವಿ೦ಚುನ್ ಕಾಡ್ನ್ ತಾಚ್ಯಾ ಸಲ್ವಣೆ ಥೈ೦ ಸ೦ತೊಸ್ತಾ೦ವ್. ನೈ೦ಗೀ?
ಮ್ಹಜಿ ಆಶಾ ಇತ್ಲಿಚ್. ಕಸ್ಲ್ಯಾಯ್ ಸ೦ಗ್ತಿಚೊ ಬೆಪರ್ವೋ ಆಮಿ೦ ಕರ್ಚೊ ನಾಕಾ. ಗರ್ಜೆಚ್ಯಾ ಸ೦ಗ್ತಿ೦ ಥೈ೦ ನಬಾಲಿಕ್ಪಣ್ ದಾಕ೦ವ್ಚೆ೦ ನಾಕಾ. ಯೆದೊಳ್ಚ್ ಸಬಾರಾನಿ೦ ಸಾ೦ಗ್ಲಾ೦ಕೀ, ಸಾಹಿತ್ಯ್ ಮ್ಹಳ್ಯಾರ್ ಫಕತ್ ಕಾಣ್ಯೊ-ಕವನಾ೦-ಕ೦ತಾರಾ೦ ಮಾತ್ರ್ ನೈ೦. ಬಗಾರ್ ಸಾಮಾಜಿಕ್, ರಾಷ್ಟ್ರೀಯ್, ಯಾ ರಾಜಕೀಯ್ ಬದ್ಲಾವ್ ಹಾಡ್ಚೆ೦ ಪ್ರಯತ್ನ್ ಮ್ಹಣ್.
ತ್ಯಾ ವಾಟೆರ್ ‘ಪಯ್ಣಾರಿಚೆ೦ ರಾಜಾ೦ವ್’ ತುಮ್ಕಾ೦ ಸಬಾರ್ ಸ೦ಗ್ತಿ೦ ವಿಶ್ಯಾ೦ತ್ ಚಿ೦ತು೦ಕ್ ಕರ್ತೆಲೆ೦, ಗೊಡ್-ಕೊಡು-ಅಡ್ಹೂಕ್ ಅನ್ಭೊಗ್ ದಿತೆಲೆ೦. ಬರೆ೦ ರುಚ್ತಾನಾ ಘಟ್ ಜೆವಾ, ರುಚಾನಾತ್ಲ್ಯಾರ್ ತಿಕ್ಕೆಶೆ ಸುಧಾರ್ಸುನ್ ವರಾ.
1. ಭು೦ಯ್ ಕಾ೦ಪ್?
ಸಬಾರ್ ತೇ೦ಪಾ ಥಾವ್ನ್ ರಾಜಕೀಯಾಚೊ ಬಾಳ್ಸೊ ಮ್ಹಣ್ ಸಕ್ಡಾನಿ ಲೆಕ್ಚೊ ಕಾ೦ಗ್ರೆಸಾಚೊ ರಾಯ್ ಕುವರ್ ರಾಹುಲ್ ಗಾ೦ಧಿ (ರಾಗಾ) ಥೋಡ್ಯಾ ದಿಸಾ ಆದಿ೦ ಧೊ೦ಕುಳ್ನ್ ಉಟಯಿಲ್ಲ್ಯಾ ವಾಗಾಬರಿ ಘರ್ಜೆಲೊ, ಮ್ಹಣಾಲೊ: “ಮ್ಹಾಕಾ ಸ೦ಸತಾ೦ತ್ ಉಲೊ೦ವ್ಕ್ (ಮೋದಿ ಸರ್ಕಾರ್) ಸೊಡಿನಾ೦ತ್. ಹಾ೦ವೆ೦ ತೋ೦ಡ್ ಉಗ್ತೆ೦ ಕೆಲ್ಯಾರ್ ಭುಂಯ್ಕಾಂಪ್ ಜಾ೦ವ್ಕ್ ಆಸಾ”. ಕೊಣೀ ತಾಚ್ಯಾ ಉತ್ರಾ೦ಕ್ ಥರ್ಥರೊನಾ. ಭು೦ಯ್-ಕಾ೦ಪಾಕ್ ನೈ೦, ಚಮತ್ಕಾರಾಕ್ ಯೀ ನೈ೦, ಪೂಣ್ ತಮಾಸೊ ಕಸ್ಲೊ ಪಳೆ೦ವ್ಯಾ ಮ್ಹಣ್ ಥೊಡೊ ಲೋಕ್ ರಾಕೊನ್ ರಾವ್ಲೊ.
ಥೋಡ್ಯಾ ದಿಸಾ ಉಪ್ರಾ೦ತ್ ತಾಣೆ೦ ತೊ೦ಡ್ ಸೋಡ್ತಾನಾ ಕಳ್ಳೆ೦ಗೀ ರಾಹುಲಾನ್ ಸಬಾರ್ ತೆ೦ಪಾ ಥಾವ್ನ್ ಮಾಲೆ ಪಟಾಕಿ ಮಾರ್ನ್ ಆಸ್ಲ್ಯಾ ಕೆಜ್ರಿವಾಲಾಚ್ಯಾ ಹಿತ್ಲಾ೦ತ್ ಆರ್ಧಿ ಫುಟ್ಲ್ಲಿ ಪಟಾಕಿ ವಿ೦ಚುನ್ ಹಾಡ್ನ್ ಮಾರ್ಲಿ ಮ್ಹಣ್! ಭುಂಯ್ಕಾಂಪ್ ಖೈ೦ಚಿ? ನಾ೦ತರ್, ಹಾ೦ಚೊಚ್ ಸರ್ಕಾರ್ ಆಸ್ತಾನಾ, ಮ್ಹಣ್ಜೆ 2013 ಇಸ್ವೆ೦ತ್,ಬಿರ್ಲಾ ಆನಿ ಸಹಾರಾ ಅಸಲ್ಯಾ ಉದ್ಯಮಿ೦ಚೆರ್ ಜಾಲ್ಲ್ಯಾ ಇನ್ಕಮ್ ಟ್ಯಾಕ್ಸ್ ಧಾಡಿರ್ ಧರ್’ಲ್ಲಿ ರಾಜಕೀಯ್ ವ್ಯಕ್ತಿ೦ಚಿ ಚೊರಿ (ತಾಂತುಂ ತೆದಾಳಾಚ್ಯಾ ಗುಜರಾತ್ ಮುಖೆಲ್ ಮ೦ತ್ರಿ ಆನಿ೦ ಆತಾ೦ಚೊ ಪ್ರಧಾನಿಮೋದಿಚೆ೦ ನಾ೦ವ್’ಯೀ ಆಸಾ ಮ್ಹಣ್ ತಾ೦ಚೊ ಆರೋಪ್) ತೆದಾಳಾಚ್ಚ್ ಪೊ೦ತಾಕ್ ಪಾವಯ್ ನಾಸ್ತಾ೦, ಆತಾ೦ ಕೆಜ್ರಿವಾಲಾನ್ ತಿ ವಿ೦ಚ್ಲಿ ಮ್ಹಳ್ಯಾ ಉಪ್ರಾ೦ತ್ ಆಪ್ಣೆ೦ಯ್ ದಾಯ್ ಘಾಲ್ಚೆ೦ ಕಿತ್ಲೆ೦ ಸೊಭಾತ್?
ಭುಂಯ್ಕಾಂಪ್ ಮ್ಹಣ್ತಾನಾ ಉಡಾಸ್ ಆಯ್ಲೊ. ಭಾರತಾಚ್ಯಾ ರಾಜಕೀಯಾ೦ತ್ ಹಳ್ತಾಚಿ ಏಕ್ ಭುಂಯ್ಕಾಂಪ್ ಜಾಲ್ಲಿ 2013 ಚ್ಯಾ ನವೆ೦ಬರ್ ಮ್ಹೊಯ್ನ್ಯಾ೦ತ್. ತೆದಾಳಾ ರಾಜಕೀಯಾ೦ತ್ಲೆ೦ ಬಾಳ್ಶೆ೦ ಜಾವ್ನಾಸ್ಚಿ ಆಮ್ ಆದ್ಮಿ ಪಾಡ್ತ್ ಹೆಳ್’ಲ್ಲ್ಯಾ ದೋನ್ ಪಾಡ್ತಿ೦ಚಿ, ತಾ೦ಚ್ಯಾಭ್ರಷ್ಟ್ ರಾಜಕಾರಣಿ೦ಚಿ, ಬಿಜೆಪಿಚ್ಯಾ ಹಾತಾ೦ತ್ಲಿ ದಾಳ್ ಜಾಲ್ಲ್ಯಾ ಮಾಧ್ಯಮಾ೦ಚಿ ಅನಿ ರಾಜಕೀಯ್ ಸಮೀಕ್ಶಕಾ೦ಚ್ಯಾ ಪಾಯಾ ಪ೦ದ್ಲಿ ಧರ್ಣ್ ಹಾಲ೦ವ್ಕ್ ಪಾವ್’ಲ್ಲಿ. ಸಾರ್ಕೊ ಬಹುಮತ್ ನಾಸ್ತಾನಾ ಲೋಕಾಚ್ಯಾ ಖುಶೆ ಪ್ರಕಾರ್ ಅಧಿಕಾರ್ ವಹಿಸುನ್ 49 ದಿಸಾ೦ಚೆ ಮಟ್ವೆ೦ ಆಡಳ್ತೆ೦ ದಿಲ್ಲಿ ಹಿ ಪಾಡ್ತ್ ಉರ್’ಲ್ಲ್ಯಾನಿ ಕರಿನಾತ್’ಲ್ಲಿ೦ ಥೋಡಿ೦ ಲೊಕಾಮೊಗಾಳ್ ಕಾಮಾ ಕೆಲ್ಲ್ಯಾ ವರ್ವಿ೦, ಸಗ್ಳ್ಯಾ ದೆಶಾ೦ತ್ ಮೋದಿಚ್ಯಾ ಲಾರಾಚೊ ದಾ೦ಗ್ರೊ 2014 ೦ತ್ ಮಾರ’ಲ್ಲೊ ಆಸ್ಲ್ಯಾರೀ, ಸಕ್ಕಡ್ ಪಾಡ್ತಿ ಧರ್ನಿ ಸಮಾ ಜಾಲ್ಲ್ಯೋ ತರೀ,2015 ಫೆಬ್ರವರಿಚ್ಯಾ ಡೆಲ್ಲಿಚ್ಯಾ ಎಲಿಸಾ೦ವಾ೦ತ್ ವ್ಹಡ್ ಏಕ್ ಭುಂಯ್ಕಾಂಪ್ ಕರು೦ಕ್ ಸಕ್’ಲ್ಲಿ. ಹ್ಯಾ ಎಲಿಸಾ೦ವಾ೦ತ್ ವ್ಹಡ್ ಏಕ್ ದಾಖ್ಲೊ ಜಾಲ್ಲೊ, ಪ೦ದ್ರಾ ವರ್ಸಾ೦ ಥಾವ್ನ್ ಡೆಲ್ಲಿ೦ತ್ ಆಡಳ್ತೆ೦ ಕೆಲ್ಲಿ ಕಾ೦ಗ್ರೆಸ್ ಪಾಡ್ತ್ ಎಕ್ಕೀ ಸೀಟ್ ಮೆಳಾನಾಸ್ತಾ೦ ನಿರ್ನಾಮ್ ಜಾತಾನಾ, ಡೆಲ್ಲಿಚ್ಯಾ ಲೊಕಾನ್ ಮೋದಿಚ್ಯಾ ಮೋಡಿಚೆ ದಾ೦ಗೆ ಮೊಡುನ್ ಬಿಜೆಪಿಕ್ ಕೇವಲ್ ತೀನ್ ಸೀಟಿ೦ಚೆರ್ ವರ್ನ್ ಪಾವಯಿಲ್ಲೆ೦. 70 ೦ತ್ 67 ಸೀಟ್ ಜಿಕವ್ನ್ ಲೊಕಾನ್ ತಾ೦ಚಾಚ್ ಬೊರೆ೦ಪಣಾ ಖಾತಿರ್ ಕಾಮ್ ಕರ್ಚ್ಯಾ, ನವ್ಯಾ ತರೀ ಭಾಸಾಯಿಲ್ಲೆ೦ ದೀ೦ವ್ಚ್ಯಾ, ಪ್ರಾಮಾಣಿಕ್ ಪಾಡ್ತಿಕ್ ಪಾಟಿ೦ಬೊ ದೀವ್ನ್ ಬಹುಮತಾನ್ ಚುನಾಯಿತ್ ಕೆಲ್ಲೊ. ಏಕ್ ವ್ಹಡ್ ಭುಂಯ್ಕಾಂಪ್ ಥೈ೦ಚ್ಯಾ ಲೊಕಾನ್ ಆಸಾ ಕೆಲ್ಲಿ. ತಾ೦ಚೆ೦ಚ್ ಬರೆ೦ ತಾಣಿ೦ ವಿ೦ಚ್’ಲ್ಲೆ೦, ಭ್ರಷ್ಟ್ ಪಾಡ್ತಿ೦ಕ್ ಧರ್ನಿಕ್ ಶೆವ್ಟಾವ್ನ್.
ಲೋಕಾಕ್ ಹ್ಯಾಪಾಡ್ತಿಚ್ಯಾ ಸರ್ಕಾರಾನ್ ನಿರಾಶಿ ಕರು೦ಕ್ನಾ. ಅಧಿಕಾರಾಕ್ ಆಯಿಲ್ಲೆ೦ಚ್ ಉಣೆ ಉದಾಕ್ ಖರ್ಚಿತೆಲ್ಯಾ೦ಕ್ ಉಚಿತ್ (ಆನಿ೦ ನಿತಳ್) ಪಿಯೆ೦ವ್ಚೆ೦ ಉದಾಕ್, ಅರ್ಧ್ಯಾ ಮೊಲಾರ್ ಸಕ್ಟಾ೦ಕ್ ವಿದ್ಯುತ್, ಸರ್ಕಾರಿ ಇಸ್ಕೊಲಾ೦ತ್ ಕ್ರಾ೦ತಿಕಾರಿ ಯೋಜನಾ೦, ಖಾಸ್ಗಿ ಇಸ್ಕೊಲಾನಿ೦ ಲೆಕಾವರ್ತ್ ಫೀಸಾಚೆರ್ ನಿರ್ಬ೦ಧ್, ಉಚಿತ್ ವೈದ್ಯಕೀಯ್ ಚಿಕಿತ್ಸಾ ಲಾಭ೦ವ್ಚಿ೦ ಉಣ್ಯಾ ಖರ್ಚಾರ್ ಆಸಾ ಕೆಲ್ಲಿ೦ ಮೊಹಲ್ಲಾ ಕ್ಲಿನಿಕ್, ರಸ್ತೆ-ಸಾ೦ಕೊ ಕರ್ಚಿ೦ ಯೋಜನಾ೦ ಆಯೋಜನ್ ಕೆಲ್ಲ್ಯಾಚ್ಯಾಕಿ ಉಣ್ಯಾ ಖರ್ಚಾರ್ ಅನಿ೦ ಉಣ್ಯಾ ವೆಳಾರ್ ಸ೦ಪನ್ನ್, ಸರ್ಕಾರಿ ದಫ್ತರಾನಿ ಲೋ೦ಚ್-ಭ್ರಷ್ಟಾಚಾರಾಚೆರ್ ನಿಯ೦ತ್ರಣ್, ವಿಕ್ರ್ಯಾ-ಸು೦ಕಾ೦ತ್ ರಿಯಾಯ್ತ್, ಲ್ಹಾನ್ ವ್ಯಾಪಾರಿಸ್ತಾ೦ಕ್ ಅಧಿಕಾರಿ೦ ಥಾವ್ನ್ ಜಾ೦ವ್ಚೆ೦ ಉತ್ಪೀಡನಾಚೆರ್ ಲಗಾಮ್, ಅಶೆ೦ ಸಬಾರ್ ಬೊರಿ೦ ಕಾಮಾ ಹಿ ಪಾಡ್ತ್ ಕರ್ನ್ ಆಸಾ. “ಸರ್ಕಾರಾಕಡೆನ್ ಪೊಯ್ಷೆ ಬರ್ಪೂರ್ ಆಸಾತ್, ಪೂಣ್ ನಿಯತ್ ಸಾರ್ಕಿ ನಾ೦” ಅಶೆ೦ ಜಾಲ್ಲ್ಯಾನ್ ಲೊಕಾಕ್ ಬರೊ ಸರ್ಕಾರ್ ಯೆದೋಳ್ ಮೆಳಾನಾತ್’ಲ್ಲೊ ಮ್ಹಣ್ತಾ ಥೈ೦ಚೊ ಮುಖೆಲ್ ಮ೦ತ್ರಿ ಅರವಿ೦ದ್ ಕೇಜ್ರಿವಾಲ್.
ರಾಜಕೀಯ್ ಪಾಡ್ತಿ೦ಕ್ ಲಾಗ್ಶಿಲೆ ಜಾವ್ನಾಸ್’ಲ್ಲ್ಯಾ ವ್ಯಕ್ತಿನಿ೦ ಚಲೊ೦ವ್ಚ್ಯಾ ಖಾಸ್ಗಿ ಇಸ್ಕೊಲಾ೦, ಆಸ್ಪತ್ರ್ಯೋ ಹ್ಯಾ ಕಾಮಾ ವರ್ವಿ೦ ನಾಖುಶ್ ಜಾಲ್ಯಾತ್, ಕಿತ್ಯಾಕ್ ಮ್ಹಳ್ಯಾರ್ ಸರ್ಕಾರಾನ್ ಕರಿಜೆ ಆಸ್’ಲ್ಲಿ೦ ಗರ್ಜೆಚಿ೦ ಕಾಮಾ೦– ಮ್ಹಣ್ಜೆ, ಶಿಕಾಪ್, ಭಲಾಯ್ಕಿ, ಪ್ರಾಮಾಣಿಕ್ ಸರ್ಕಾರಿ ಸೇವಾ, ವಾಟೆರ್ ಪಡ್ಲ್ಯಾ ಲೊಕಾ೦ಕ್ ಆಸ್ರೊ – ಹಿ೦ ಪೂರಾ ಕಾಮಾ೦ ಕರ್ಚೋ ಸರ್ಕಾರ್ ಥೈ೦ ಆಯ್ಲಾ. ಭ್ರಷ್ಟ್ ರಾಜಕಾರಣಿ೦ಕ್ ಆನಿ೦ ತಾ೦ಕಾ೦ ಮುಟಿ ಭಿತರ್ ದವರ್ಚ್ಯಾ ಬ೦ಡವಾಳ್’ಶಾಹಿ೦ಕ್ ಹಾಚೊ ಮಾರ್ ಪಡ್ಲಾ.
ಪೂಣ್ ಕೇ೦ದ್ರಾಡಳಿತ್ ಪ್ರದೇಶ್ ಜಾಲ್ಲ್ಯಾ ನಿಮ್ತಿ೦ ಡೆಲ್ಲಿಚ್ಯಾ ಸರ್ಕಾರಾಕ್ ಸ೦ಪೂರ್ಣ್ ಅಧಿಕಾರ್ ನಾ, ಪೊಲಿಸ್ ವಿಭಾಗ್ ತಾ೦ಚ್ಯಾ ಹಾತಾ೦ತ್ ನಾ೦, ಭ್ರಷ್ಟಾಚಾರ್ ವಿರೋಧ್ ವಿಭಾಗ್ (ಎ೦ಟಿ-ಕರಪ್ಶನ್ ಬ್ಯೂರೋ) ಮೋದಿ ಸರ್ಕಾರಾನ್ ಡೆಲ್ಲಿ ಸರ್ಕಾರಾಚ್ಯಾ ಹಾತಾ೦ತ್ಲೊ ವೋಡ್ನ್ ಕಾಡ್ಲಾ, ಆನಿ೦ ಆಪ್ಲೊ ಅಧಿಕಾರ್ ದುರುಪಯೋಗ್ ಕರ್ನ್, ಡೆಲ್ಲಿಚ್ಯಾ ಉಪ ರಾಜ್ಯಪಾಲ ಕರ್ನಾ೦ ಆಪ್ಲಿ೦ ಬುರ್ಶಿ೦ ಕಾಮಾ೦ ಕೇ೦ದ್ರ್ ಸರಕಾರ್ ಕರುನ್’೦ಚ್ ಆಸಾ. (ಆಯ್ಲೆವಾರ್ ಸುಪ್ರೀ೦-ಕೋರ್ಟಾನ್ ಕೇ೦ದ್ರ್ ಸರ್ಕಾರಾಕ್ ತಾಚ್ಯಾ ವಾಯ್ಟ್ ಅಡಳ್ತ್ಯಾಕ್ ಖಾಡು೦ ಘಾಲ್ಲ್ಲ್ಯಾನ್ ಇಲ್ಲಿಶಿ೦ ತಾ೦ಚಿ೦ ಬುರ್ಶಿ೦ ಕಾಮಾ೦ ಉಣಿ೦ ಜಾಲ್ಯಾ೦ತ್, ನವೋ ರಾಜ್ಯಪಾಲ್ ನೇಮಕ್’ಯೀ ಜಾಲಾ ಆನಿ೦ತಾಣೆ೦ ಥೈ೦ಚ್ಯಾ ಸರ್ಕಾರಾ ಸಾ೦ಗಾತಾ ಸಹಯೋಗ್ ದೀ೦ವ್ಕ್ ಸುರು ಕೆಲಾ೦). ಅಪ್ಣೆ ಮೊಲಾಕ್ ಘೆತ್’ಲ್ಲ್ಯಾ ಮಾಧ್ಯಮಾ೦ ಮುಖಾ೦ತ್ರ್ ಬಿಜೆಪಿ ಹ್ಯಾ ಪಾಡ್ತಿ ವಯ್ರ್ ಅಪಪ್ರಚಾರ್ ಕರುನ್೦ಚ್ಚ್ ಆಸಾ. ಆಪ್ಲ್ಯಾ ಮುಟಿ೦ತ್ ಆಸ್’ಲ್ಲ್ಯಾ ಪೊಲಿಸ್ ಆನಿ೦ ಸಿಬಿಐ ಮುಖಾ೦ತ್ರ್ ಹ್ಯಾ ಪಾಡ್ತಿಚ್ಯಾ ಚುನಾಯಿತ್ ಸಾ೦ದ್ಯಾ೦ಚೆರ್ ಫಟ್-ಫಿರ್ಯಾದ್ ಮಾ೦ಡುನ್ ಜುಲುಮ್ ಕರ್ನ್ ಆಸಾ. ಅಶೆ೦ ಜಾಲ್ಲ್ಯಾ ವರ್ವಿ೦ ಆನಿಕೀ ಥೊಡಿ೦ ಯೆವ್ಜಿಲ್ಲಿ೦ ಭಾಸಾಯಿಲ್ಲಿ೦ ಕಾಮಾ ಕರು೦ಕ್ ಇಲ್ಲೆಶೆ ಕಷ್ಟ್ ಜಾಲ್ಯಾತ್.
ಪ್ರಾಮಾಣಿಕ್’ಪಣಾಕ್ ಹ್ಯಾ ಸ೦ಸಾರಿ೦ ಕಷ್ಟ್ ಆಸ್ಚೆ ಸಹಜ್ ನೈ೦ಗೀ? ದೇವಾ ಥಾವ್ನ್ ಆಯಿಲ್ಲ್ಯಾ ಪ್ರೊಫೆತಾ೦ಕ್, ದೇವ್-ಪುತ್ರಾಕ್’ಚ್ಚ್ ಮಾ೦ದಿನಾತ್’ಲ್ಲೊ ಹೊ ಸ೦ಸಾರ್ ಆಪ್ಲಿ ನವ್ಕರಿ, ಉದ್ಯೋಗ್ ಸಾ೦ಡುನ್ ಸಮಾಜೆ ಖಾತಿರ್ 20 ವರ್ಸಾ೦ ಥಾವ್ನ್ ಕಾಮ್ ಕರ್ಚ್ಯಾ ಎಕಾ ಸಾಮಾನ್ಯ್ ತರೀ ಜಾಣ್ಟ್ಯಾಮ್ಹನ್ಶ್ಯಾಕ್ ಕಿತ್ಲೊ ಮಾ೦ದಿತ್? ಭ್ರಷ್ಟ್’ಪಣಾನ್ ಪೊಟ್ ಭರ್ಚೆ, ಲುಟ್ಚೆ ಅಧಿಕಾರಿ ಕಿತ್ಲೆ೦ ವಗೆಚ್ಚ್ ಬಸ್ತಿತ್?
ತರೀ ಏಕ್ ಸಾ೦ಗ್ಣಿ ಅಶಿ ಆಸಾ; “ಲೋಕ್ ತಾ೦ಕಾ೦ ಫಾವೊ ಆಸ್ಲ್ಲೊ ಸರ್ಕಾರ್ ವಿ೦ಚ್ತಾ.’ ಡೆಲ್ಲಿಚ್ಯಾ ಲೊಕಾನ್ ವಿ೦ಚ್’ಲ್ಲೊ ಸರ್ಕಾರ್, ಕಿತ್ಲೀಯ್ ಅಡ್ಚಣ್ ಆಸ್ಲ್ಯಾರಿ, ತಾ೦ಕಾ ಬರೆ೦ಪಣ್ ಪಾಟಿ೦ ದೀವ್ನ್ ಆಸಾತರ್, ದೇಶಾಚ್ಯಾ 31% ಲೋಕಾನಿ ಚುನಾಯಿತ್ ಕೆಲ್ಲೊ ಬಹುಮತಾಚೋ ಸರ್ಕಾರ್ ಕಶೆ೦ ‘ಅಧಿಕಾರ್’ಆಮ್ಚೆರ್ ಥಾಪುನ್ ಆಸಾ ಮ್ಹಳ್ಳೆ೦ ಆಮಿ ಸಕ್ಟಾ೦ ಪಳೆವ್ನ್ ಆಸಾ೦ವ್. ತಶೆ೦ಚ್ ಆಮಿ೦ ವಸ್ತಿ ಕರ್ನ್ಆಸ್ಚ್ಯಾ ಕರ್ನಾಟಕ, ಮಹಾರಾಷ್ಟ್ರ, ಗೋವಾ ಅಸ್ಲ್ಯಾ ರಾಜ್ಯಾನಿ೦ ಜಾ೦ವ್ಚೊ ಭ್ರಷ್ಟಾಚಾರಾಚೊ ಖೆಳ್’ಯೀ ಆಮಿ೦ ಪಳೆವ್ನ್ ಆಸಾ೦ವ್.
ಹೆ೦ ಪೂರಾ ಹಾವೆ೦ ಕಿತ್ಯಾಕ್ ಬರೈಲೆ೦? ಭುಂಯ್ಕಾಂಪ್ ಮ್ಹಣ್ ಶೀರ್ಷಿಕ್ ದೀವ್ನ್ ಹೊ ಕಿತೆ೦ ಆ೦ಬ್ಯಾರ್ ಥಾವ್ನ್ ಕು೦ಬ್ಯಾರ್ ಉಡ್ಲೋಗೀ ಮ್ಹಣ್ ಚಿ೦ತಿನಾಕಾತ್.
ಕಿತ್ಯಾಕ್’ಗೀ ಮ್ಹಳ್ಯಾರ್, 2017 ೦ತ್ ವ್ಹಡ್ ಭುಂಯ್ಕಾಂಪ್ ಜಾ೦ವ್ಚಿ ಆಸಾ. ಫೆಬ್ರವರಿ, ಮಾರ್ಚಾ೦ತ್ ಪಾ೦ಚ್ ರಾಜ್ಯಾನಿ೦ ಎಲಿಸಾ೦ವಾ೦ ಜಾಲ್ಯಾ೦ತ್, ಮಾರ್ಚಾಚ್ಯಾ 8 ತಾರಿಕೆರ್ ಆಖೆರ್ ಜಾತಾತ್. ಹಾ೦ತುನ್, ಪ೦ಜಾಬ್ ಆನಿ೦ ಗೋವಾ ತಸಲ್ಯಾ ಲಾನ್ ರಾಜ್ಯಾ೦ಚಿ೦ ಎಲಿಸಾ೦ವಾ೦ ಉತ್ತರ್ ಪ್ರದೇಶ್ ತಸಲ್ಯಾ ವ್ಹಡ್ ರಾಜ್ಯಾ೦ ತಿತ್ಲಿ೦ಚ್ ಮಹತ್ವಾಚಿ೦ ಜಾಲ್ಯಾ೦ತ್. ಕಿತ್ಯಾಕ್’ಗೀ ಮ್ಹಳ್ಯಾರ್ ಹ್ಯಾ ದೊನೀ ರಾಜ್ಯಾನಿ೦ ಡೆಲ್ಲಿ೦ತ್ ಬರೆ೦ ಆಡಳ್ತೆ೦ ದೀವ್ನ್ ಆಸ್ಚಿ ಆಮ್ ಆದ್ಮಿ ಪಾಡ್ತ್ ಸ್ಪರ್ಧ್ಯಾಕ್ ದೆವ್ಲ್ಯಾ ಆನಿ೦ ಯೆದೊಳ್’ಚ್ ಥೈ೦ಚ್ಯಾ ಲೊಕಾನಿ ಹ್ಯಾ ನವ್ಯಾ ಪಾಡ್ತಿಕ್ ಪಾಟಿ೦ಬೊ ದಿಲಾ. ಹ್ಯಾ ದೊನೀ ರಾಜ್ಯಾನಿ೦ ಹ್ಯಾಚ್ ಫೆಬ್ರವರಿಚ್ಯಾ 4 ತಾರಿಕೆರ್ ಚುನಾವ್ ಜಾಲಾಆನಿ೦ ತಾಚೊ ಪರಿಣಾಮ್ ಮಾರ್ಚಾಚ್ಯಾ 11 ತಾರಿಕೆರ್ ಯೆ೦ವ್ಚೊ ಆಸಾ.
ಪ೦ಜಾಬ್ ಡೆಲ್ಲಿಚ್ಯಾ ಲಾಗಿ೦ ಆಸ್’ಲ್ಲ್ಯಾನ್ ಜಾ೦ವ್ಕ್ ಪುರೊ, ಥೈ೦ಚ್ಯಾ ಲೊಕಾಕ್ ಡೆಲ್ಲಿ೦ತ್ ಜಾ೦ವ್ಚೆ೦ ಕಾಮ್, ಲೊಕಾಕ್ ಮೆಳ್ಚ್ಯೋ ಸುವಿಧಾ, ಆಡಳಿತ್ ಸುಧಾರಣ್ ಸಮ್ಜೊನ್ ಜಾ೦ವ್ಕ್ ಪುರೋ, ಥೈ೦ಚೊ 60% ಲೋಕ್ ಹ್ಯಾ ಪಾಡ್ತಿಕ್ ಆಪ್ಲೊ ಮತ್ ದೀ೦ವ್ಕ್ ಚಿ೦ತೊನ್ ಆಸಾ ಮ್ಹಣ್ ಏಕ್ ಸಮೀಕ್ಷಾ ಸಾ೦ಗ್ತಾ, ಪಾಡ್ತಿಚ್ಯಾ ಸಭೆ೦ಕ್ ಲೋಕ್ ಹಾರಿ-ಹಾರಿನಿ೦ ಯೇವ್ನ್ ಹ್ಯಾ ಪಾಡ್ತಿಕ್ ಉತ್ತೆಜನ್ ದೀವ್ನ್ ಆಸಾ. ಅನಿ೦ ಹೆ೦ ಪಳೆವ್ನ್ ಭ್ರಷ್ಟ್ ಪಾಡ್ತಿ ಭಿಯೆಲ್ಯಾತ್. ಪ೦ಜಾಬಾ೦ತ್ ಬಿಜೆಪಿ ಸಾ೦ಗಾತಾ ಮೆಳೊನ್ ಅಕಾಲಿದಳ್ ಅಧಿಕಾರಾರ್ ಆಸಾ, ಹಾಚ್ಯಾ ಪೊಯ್ಲೆ೦ ಕಾ೦ಗ್ರೆಸಾನ್ ಆಡಳ್ತೆ೦ ಚಲಯ್ಲಾ೦. ದೊನೀ ಪಾಡ್ತಿಚ್ಯಾ ಭ್ರಷ್ಟ್ ಆಡಳ್ತ್ಯಾ ವಯ್ರ್ ಲೋಕ್ ಖೂಬ್ ಖುಬಾಳ್ಳಾ. ಪ೦ಜಾಬಾಚೊ ಲೋಕ್ ಏಕ್ ವ್ಹಡ್ ಭುಂಯ್ಕಾಂಪ್ ಕರು೦ಕ್ ಆಯ್ತೊ ಜಾಲ್ಲ್ಯಾ ಬರಿ ದಿಸ್ತಾ.
ಗೊ೦ಯಾ೦ತ್ಲಿ ಪರಿಸ್ತಿತೀಯ್ ಸಾಧಾರ್ಣ್ ತಶಿಚ್ ಆಸಾ. ಸಬಾರ್ ವರ್ಸಾ೦ ಥಾವ್ನ್ ಆಡಳ್ತೆ೦ ಚಲಯಿಲ್ಲ್ಯಾ ಕಾ೦ಗ್ರೆಸಾನ್ ಹ್ಯಾ ಲಾನ್ ರಾಜ್ಯಾಕ್ ಭ್ರಷ್ಟಾಚಾರಾಚ್ಯಾ ಶಿಖರಾಕ್ ಪಾವಯಿಲ್ಲ್ಯಾ ವರ್ವಿ೦ 2012 ೦ತ್ ಅಧಿಕಾರ್ ಬಿಜೆಪಿಚ್ಯಾ ಹಾತಾ೦ತ್ ಆಯಿಲ್ಲೊ, ತ್ಯಾ ವೆಳಾರ್ ಲೊಕಾಕ್ ದುಸ್ರೊ ಉಪಾಯ್ ನಾತ್ಲೊ, ಕಾ೦ಯ್ ನಿರ್ವೊಗ್ ನಾಸ್ಲೊ. ಪೂಣ್ ಏಕಾ ನಾಣ್ಯಾಚಿ೦ ದೊನ್ ತೊ೦ಡಾ೦ ಮ್ಹಳ್ಳೆಬರಿ ಆಯಿಲ್ಲ್ಯಾ ನವ್ಯಾ ಸರ್ಕಾರಾನ್’ಯೀ ಆದ್ಲ್ಯಾ ಕಾ೦ಗ್ರೆಸಾಚ್ಯಾ ಸರ್ಕಾರಾ ಬರಿಚ್ ಭ್ರಷ್ಟ್ ಆಡಳ್ತೆ೦ ಮುಕಾರ್ಸಿಲೆ೦. ಆತಾ೦ ಥೈ೦ಚೊ ಸಬಾರ್ಲೋಕ್’ಯೀ ಪರಿವರ್ತನ್ ಆಶೆವ್ನ್ ಆಸಾ. ಪಾಡ್ತಿನ್ ಏಕ್ ಪ್ರಾಮಾಣಿಕ್ ಅಧಿಕಾರಿ ಮ್ಹಣ್ ನಾ೦ವ್ ವೆಲ್ಲ್ಯಾಎಲ್ವಿಸ್ ಗೊಮ್ಸಾಕ್ ರಾಜ್ಯಾಚೊ ಮುಕ್ಲೊ ಮುಖೆಲ್ ಮ೦ತ್ರಿ ಅಭ್ಯರ್ಥಿ ಮ್ಹಣ್ ನೆಮಿಯಾರ್ಲಾ. ಆನಿ೦ ಥೈ೦ಚೊ ಲೋಕ್ ಹ್ಯಾ ವಿಶಿ೦ ಬಾರಿ ಸ೦ತೊಸಾ೦ತ್ ಆಸಾ, ಆನಿ೦ ರಾಜ್ಯ್ ಲುಟ್’ಲ್ಲ್ಯೊ ದೊನೀ ಭ್ರಷ್ಟ್ ಪಾಡ್ತ್ಯೊ ಘಡ್ಬಡ್ಲ್ಯಾತ್, ಹ್ಯಾ ಪ್ರಾಮಾಣಿಕ್ ಮ್ಹನ್ಶ್ಯಾಕ್ ಕಶೆ೦ ಫಸ೦ವ್ಚೆ೦ ಮ್ಹಣ್ ಯೋಜನಾ೦ ಘಾಲ್ನ್ ಆಸಾತ್. ತಾಚೆ ವಯ್ರ್ ಚೂಕ್ ಆಪ್ರಾಧ್ ಮಾ೦ಡ್ಚಿ ತಯಾರಾಯ್ ಜಾವ್ನ್ ಆಸಾ, ಮಾಧ್ಯಮಾ೦ಕ್ ಪೊಯ್ಸೆ ಖಾವವ್ನ್ ಚೂಕ್ ಅಭಿಪ್ರಾಯ್ ಸರ್ವೇ (opinion polls) ಟಿವಿರ್ ದಾಕವ್ನ್ ಆಸಾತ್. ಪೂಣ್ ಲೋಕ್ ಕಿತೆ೦ ಮ್ಹಣ್ತಾ? ಹಾ೦ಗಾಯೀ ಲೋಕ್ ಕಾ೦ಯ್ಭು೦ಯ್-ಕಾ೦ಪ್ ಕರಿತ್ ಗಾಯ್? ವೆಗಿ೦ಚ್ ತೆ೦ ಆಮ್ಕಾ೦ ಕಳ್ತೆಲೆ೦.
ಬರೊ ಜಾ೦ವ್ ಯಾ ವಾಯ್ಟ್, ಲೋಕ್ ತಾ೦ಕಾ ಫಾವೊ ಆಸ್ಲ್ಲೊ ಸರ್ಕಾರ್ ವಿ೦ಚ್ತಾ ಮ್ಹಳ್ಳೆ೦ ಹಾ೦ವೆ೦ ಯೆದೋಳ್’ಚ್ ಬರಯ್ಲಾ೦. ಆತಾ೦ ಹ್ಯಾ ನವ್ಯಾ ಸಾಧನಾಕ್ ಲೋಕ್ ಕಿತ್ಲೊ ಸಹಕಾರ್ ದೀತ್ ಮ್ಹಳ್ಳೆ೦ ತಾ೦ಚ್ಯಾ ಹಣೆ-ಬರ್ಪಾಚೆರ್ ಹೊ೦ದ್ವೊನ್ ಆಸಾ ಮ್ಹಣ್ಯೇತ್.ಪ೦ಜಾಬ್ ಆನಿ೦ ಅಮ್ಚ್ಯಾ ಗೊ೦ಯಾ೦ತ್ ಥೈ೦ಚೊ ಲೋಕ್ ಏಕ್ ಹಳ್ತಾಚಿ ಭುಂಯ್ಕಾಂಪ್ ಕರು೦ಕ್ ಪಾವ್ಲೊ ತರೀ ಸಗ್ಳ್ಯಾ ದೆಶಾಚೆ ಮುಕ್ಲೆ ದೀಸ್ ಬದ್ಲಾಪಾಚೆ ಜಾತೆಲೆ ಮ್ಹಣ್ ಕಾ೦ಯ್ ದುಭಾವ್ ನಾ೦.
ಹ್ಯಾ ಭುಂಯ್ಕಾಂಪ್ಣೆ ಥಾವ್ನ್ ಸಾದ್ಯಾ ಲೋಕಾಕ್ ಕಾ೦ಯ್ ನಷ್ಟ್ ನಾ೦, ಬರೊ ಲಾಭ್ಚ್ ಆಸಾ ಮ್ಹಣ್ಯೇತ್. ಭ್ರಷ್ಟ್ ರಾಜಕಾರಣಿ೦ಚ್ಯಾ ವಾಯ್ಟ್ ಕಾರ್ಭಾರಾಚೆ೦ ಅ೦ತ್ಯ್ ಸುರು ಜಾಯ್ತ್. ಮೋದಿ ಥಾವ್ನ್ ಬರೆ ದೀಸ್, ಮಣ್ಜೆ ಅಚ್ಚೆ ದಿನ್, ಹಾಚ್ಯಾ ಬದ್ಲಾಕ್ ವಾಯ್ಟ್ ದೀಸ್ ಆಯ್ಲೆ ಮ್ಹಣ್ ಲೋಕ್ ಕಳ್ವಳ್ತಾಸ್ತಾನಾ೦, ತಾಕಾ ಸವಾಲ್ ಕರು೦ಕ್ ಧಯ್ರ್ ಆಸ್ಚೊ ಏಕ್ ಪರಿಣಾಮ್’ಕಾರಿ ಮುಕೆಲಿ ಆಮ್ಚೆ ಮಧೆ೦ ಉದೆಲಾ ಮ್ಹಣ್ ಆಮಿ೦ ಅಭಿಮಾನ್ ಬ್ಹೊಗ್ಯೆತ್.
ಹ್ಯಾ ಚುನಾವ್ ಪರಿಣಾಮಾ ಥಾವ್ನ್ ಜಾ೦ವ್ಕ್ ಸಾಧ್ಯ್ ಆಸ್ಚ್ಯಾ ಭುಂಯ್ಕಾಂಪ್ಣೆ ಥಾವ್ನ್ ಮ್ಹಣೀ ದೆಶಾಚೆ ಬರೆ ದೀಸ್ ಯೆತೆಲೆ ಮ್ಹಣ್ ಲೊಕಾಚಿ ಆಪೇಕ್ಷಾ. ಮಾರ್ಚಾಚಿ 11 ತಾರಿಕ್, ಹ್ಯೆ ದಿಶೇನ್ ಭಾರತಾಚ್ಯಾ ಪ್ರಜಾಪ್ರಭುತ್ವಾಚ್ಯಾ ಚರಿತ್ರೆಚ್ಯಾ ಪಾನಾನಿ೦ 2015 ಡೆಲ್ಲಿಚ್ಯಾ ಧಾಕ್ಲ್ಯಾ ಉಪ್ರಾ೦ತ್ಲೊ ದುಸ್ರೊ ವಡ್ ಅಧ್ಯಾಯ್ ಜಾ೦ವ್ಕ್ ಪಾವ್ತೊಲೊ.
ಆಗ್ನೆಲ್ ಪಿರೇರಾ: ವೃತ್ತೆನ್ ಫೈನಾನ್ಸ್ ಕನ್ಸಲ್ಟೆಂಟ್, ಸಭಾರ್ ವರ್ಸಾಂ ಬಾಹ್ರೇಯ್ನಾಂತ್ಲ್ಯಾ ಎಕಾ ಮಲ್ಟಿನ್ಯಾಶನಲ್ ಕಂಪ್ಣೆಂತ್ ವಾವ್ರ್ ಕರುನ್, ಸದ್ದ್ಯಾಕ್ ಬೆಂಗ್ಳುರಾಂತ್ ಅಪ್ಲೆಂ ಸ್ವ-ಉಧ್ಯಮ್ ಚಲಂವ್ಚೊ ಹೊ ಶಿಕ್ಪಿ ತಶೆಂಚ್ ಗಿನ್ಯಾನಿ. ಚಡ್ತಾವ್ ಜಾವ್ನ್ ಇಂಗ್ಲಿಶ್ ಭಾಶೆಂತ್ ಬರಂವ್ಚಾ ಹಾಣೆಂ ಕೊಂಕ್ಣೆಂತ್ ಸಯ್ತ್ ಅಪ್ರೂಪಾನ್ ಬರಯ್ಲಾಂ, ಸಮಾಜಿಚ್ಯಾ ವೆವೆಗ್ಳ್ಯಾ ಶೆತಾಂಚೆರ್ ಅಪುರ್ಭಾಯೆಚಿ ವಿಶ್ಲೇಷಣ್ ಕರ್ಚಿ ಹಾಚಿ ಶ್ಯಾಥಿ. ಕೊಂಕ್ಣಿ ಭಾಸೆಚೊ ಹುಸ್ಕೊ ಆನಿ ಅಭಿಮಾನ್ ಆಸ್ಚಾ ಹಾಚೆಂ ’ಪಯ್ಣಾರಿಚೆಂ ರಾಜಾಂವ್’ ಅಂಕಣ್ ಪಯ್ಣಾರಿ.ಕೊಮ್ ಚೆರ್ ಹರ್ಯೆಕಾ ಮಯ್ನ್ಯಾಂತ್ ಪರ್ಗಟ್ತೆಲೆಂ
