[मोटवी कथा]: सिद्धांतां
०८:४७
हेरिटेज रेसिडेन्सिच्या तीसऱ्या माळियेर, लिफ्टाथावन भायर येताना, रयनान आपल्या वोचाचेर नदर मारली. नम्यारल्ल्य वेळापरास पयलेंच पावल्लो तो.
रूम नंबर ३०३ रेसटोरेंटाच्या केबिनाबरीं सजयिल्लें. उरूट मेजाभंवतीं स कदेलां मांडल्लीं तर, एका कोनश्याक आसल्लो एल सी डी परदो मीटिंग रुमाक जेवणासालांत बदलिल्ल्याची गवाय दितालो.
कोनश्याक आसच्या मिनिबाराच्या पाक्याथावन जळचो मंद दिवो. पोंदा आसल्ल्या विदेशी सोरयांबाटल्यांवयर परजळतालो. त्या सोभायेमुखार सुतारयान नाजूक थरान कांतयिल्लें रुकाडाचें काम अपलो प्रभाव होगडायलांशें दिसतालें.
रायन बसका घेवन, ग्लासांत भरल्ल्या नितळ उदकाक घोट मारन, फोनाचेर बोटां चरवंक लागलो. डोकटर नरेशान ताका नोव वरांचो वेळ दिल्लो.
रायन मथायस!!
पाटल्या पंद्रावरसांनीं हें नांव पांवड्या पांवड्यार वळकिचें जाल्लें. ल्हान श्हेरांत, लगबग डजनाभर बांदपां ताचेवरवीं उबीं जाल्लीं. मदल्या वरगाच्या लोकाच्या हाताक पांवच्या मोलाक तो फ्ल्याटां तो विक्तालो. क्रिसतांवांक एक पात्येणेचो बांदपी म्हण फामाद जाल्लो. दिल्ल्या पयश्यांक पूरतें मोल म्हण लोक समजाल्लो.
एका उत्रान सांगचें तर, रियल एसटेट वेव्हारांत, ’ड्रीम्स कनस्ट्रक्षन्स’ हाचें नांव उंचायेक पावल्लें.
डोकटर नरेश भितर रिगलो.
तूरत मिटिंग म्हळ्ळेपरीं, फकत एका दिसाच्या ल्हान आवदेभितर डोकटर नरेशान ताका आपवणें धाडल्लें.
डोकटर नरेशाच्या दिश्टिंत हें एक मिटिंगापरास एका थराच्या सोल्ल्याची तयाराय.
डोकटर नरेश!!
ह्या नांवाक ह्या श्हेरांत वळकानातल्लो कोणयी नातल्लो.
नांवाडदीक ’न्युरो सरजन’ म्हणजे मेंद्वाचें ओपरेशन करच्यांत ताचे तितलो चतूर कोणयी ह्या श्हेरांत नातल्लो. ताचेहातीं जायनातल्ली केस आनी कोणाथावनयी जायनां म्हळ्ळें सरवांक कळीत आसल्लें. मदल्या प्रायेचो तरी ताच्या अनभोग आनी जाण्वायेन सबार पिडेसतांक मरणाच्या दावलेथावन बचावी ताणें दिल्ली. ताचें वेक्तित्व विशिषट. तरन्या दाक्तेरांक तो एक डायनामीक हीरो. न्यूरो सरजरिंत सनद जोडच्या दाक्तेरांक तांचेबरीं नांवाडदीक जांवची आशा. ताची वयक्तीत जिणी खंच्याय सीनिमीय पात्राचें चिरण तशें भग्तालें. ओपरेशन करता म्हण सरवां सांग्तालीं. सिग्रेटिची घाण, ताच्या लागशिल्यान पाशार जाताना नाकाक आदाळताली. ओपरेशन थियेटरांत कुटका या पान खातासताना, थुकच्याक आयदान धरुंक नरसां या शिकच्या दाक्तेरांक नम्यारतलो म्हण खबर आसल्ली. ताच्या घरा वचोन पयस्यांची थयली दीनासतां, ओपरेशनाक आयकना म्हणोन ताचेर दुरां आसल्लीं.
हें सरव ताच्या जाण्वाय या यशस्वेथंय बोट जोकिनातल्लें. तसलें अथवेंच वेक्तित्व तांचें!
रायन आनी नरेश!!
विदेशी विसकेचे बर्फान भरल्ले ग्लास, संसारीक उलवण्याण मुखारून गेले. दुस्रे पावटिंच्या ग्लासार गंभीर उलवणें सुरू करचे मधें मोबायल फोनांनी अडकळ हाडल्ली.
मानेसत!!
श्हेराचे दोग मानेसत एका सोल्ल्या खातीर मेजाभंवचीं जमल्ले. तांचेमधें गूंड इश्टागत नातल्ली तरी एकामेकाक ते दोगी भिल्कूल अपरिचीत न्हय. लयन्स क्लब्बाच्या पारटेवेळीं ते सभार पावटीं मेळल्ले.
तिस्रो पेग तयार जाल्लो!
संसारांत जांवच्या चडताव मीटिंगांक सोरयान बरपूर रंग हाडल्लो! हरयेका तरकापाटल्यान, वेवेगळ्यो अभिपरायो आनी अखरेक एका ताळ्यान येंवच्या नीरधारांत विसकेचो पात्र महत्वाचो, सबार सोल्ले जाल्ले.
"आमीं आतां गरजेचें उलव्यां" डोकटर नरेशान आपलो मोबायल स्वीच ओफ करचेसंगीं रायनाचेर एक मटवी दीश्ट घाली आनी हिशारो समजल्ल्या रायनान अपलो फोन बंध करन पयस दवरलो.
"श्हेरांत ’संजीविनी मल्टी स्पेश्यालिटी होस्पिटल’ हाची येवजण तयार जाल्ली ती तूं बरयान जाणांय. त्या होस्पिटलाविशीं चडीत तुका समजांवची गरज आसचिनां. कित्याक म्हळ्यार हाचेविशीं हरयेका थरान तूं जाणां आसल्ल्यांत सबार सिवील कनस्ट्रक्षन पंपेन्यां पयकी तुज्या कंपेनीन आसक्त दाकयिल्ली हाका साक्स." दाक्तेरान व्हड एक घोट मारून मुखारिलें.
"ही आस्पत्र ह्या श्हेरांत सरव आस्पत्रें प्रास चडीत पिडेसतांक सेवा दिंवची मात न्हय आसतां अत्त्याधुनीक सवलत्यांनी भरल्ली आसतली. तेगां भागिदारां मधें हांव एकलो आनी दोग भागिदार विदेशी जाल्यान आनी तशेंच ते वयजाकीय शेतांतले न्हय जाल्ल्यान, बांदपाच्या पांवड्याथावन आडळतें चलंवच्या परयांत सरव जवाभदारी म्हजीच"
"मटव्यान सांगचें तर हें कोंटऱ्याकट तुका मेळचेबरीं अक्रचें म्हज्या हातांत आसा. हाचो मतलब हो न्हय की तुवें सरवांपरास उणें कोटेशन दिलांय या ऊरल्ल्यां प्रास तूं ऊंच म्हण भिल्कूल न्हय."
दाक्तेर आपलो चस्मा एका बोटान पाटीं लोटून एका घडियेक रायनाक पळेवंक लागलो.
"तशें तर आमच्या कंपेनीक विंच्यांत कितें मतलब म्हण जाणां जाव्येतगी?’ रायनान इरादो समजोंचें प्रेतन केलें.
"थोडीं बांदपां तुवें उबारल्यांय. तूं ह्याच श्हेराचो आनी वळकेभितरलो. इतल्या व्हड प्रोजेकटाचें काम तुंवें हातीं धरल्यार तुका ह्या श्हेरांत मात न्हय, लागशिल्या श्हेरांनी नांव येतलें. तुका हाचेपरास उंचल्या पांवड्याक पावंवची श्याथी म्हाका आसा. एकामेकाच्यो गरजो तूं समजोंक सक्ताय" दाक्तेरान सिग्रेट जळयली.
रायनाच्या वेव्हारीक चिंत्पाक दाक्तेर बदलेक कितेंगी आशेता तें खचीत जाल्लें. "म्हजे थावन कितें आशेताय?" कपलार मिनिरो घालन विचारलें ताणें.
"ह्या प्रोजेकटांत तुका पांच कोरोडांचो मुनाफो आसा. ताचे १०% म्हणजे पन्नास लाख, कमिशना लेकार" दाख्तेरान नीट प्रसताप मुकार दवरलो.
"डोकटर नरेश.. तूं बरयान जाणांय. आमची कंपनी कोंटऱ्याकट वांकड्या वाटांनी आपणावंक वचाना. आमी दिल्ल्या कोटेशनांत उंचल्या कालेतिच्या साहेतिचें फावोतें मोल दाखयलां. आनी तुवें सांगचेतितलो मुनाफो खंडीत ना"
डोकटर नरेश झड लायतानांच फळ लुवोंक पळेतालो.
"रायन वेव्हारीक चिंत्पाचो म्हण हांवें लेखल्लें’ गुत्काची पेकेट ताळ्यांत देंवयताना, डोकटर नरेश, एका वयजापरास, आंगडिंतल्या बनियापरीं दिसोंक लागलो.
"वेव्हार म्हजो प्रामाणीक. म्हाका म्हजिंच म्हळ्ळीं सिद्धांतां आसात. आनी ह्या वरवीं ह्या श्हेराक उंचल्या मट्टाचीं घरां आनी रावळेरां आमी दीवंक सकल्यांव."
"रावळेरां मनश्यांच्या वसतेखातीर. हांगासर तूं आस्पत्र बांधताय. आनी आस्पत्रेंत कोणंच रावोंक आशेना. फरक तूं पारकुंक सकलोनांय" दाक्तेर राजांव उलयतालो.
एका नांवाडदीक दाक्तेराचें चिंताप रायनाचो नीरधार दंडळावंक सकलेंना.
ताका सोल्लो मंजूर नातल्लो!!
ताचे थंय ताचेंच वेक्तित्व आसल्लें तें नास करुंक नाका आसल्लें.
"चडीत मुनाफया खातीर ओपरेशनावेळार तुमीं वापारच्यो साहेती या मनश्यांच्या कुडिंभितर दवरच्यो नकली भात तुमीं कीळ मट्टाच्योच वापारतातगी म्हण दुबाव भग्ता म्हाका " रायनाच्या चवत्या पेग्गाथावन चिंतिनासतानांच सवाल उटयिल्लें.
"तूं आमच्या दैवीक कामाचेर बोट जोक्ताय"
"तुजो नीरधार अखरेचोगी? चिंतून पळे" दाक्तेराचो फोन सायलेंट मोडार आसल्यारयी तीन मिस्ड कोल्स दाकयतालें.
"म्हज्या सिद्धांतांथावन हांव मेकळो जांवचोनां" रायनान खचीत केल्लें.
"तूं आनी तुजीं सिद्धांतां. तुंच दवर, वाटो सबार आसात" नरेशान फोन उबारलो. "भोवश्या आस्पत्रे थावन जावंक पुरो"
एका कोनश्याक चमकोन ताणें विवर घेंवचो पळेवन रायनाकयी घरा वचोंक तडव जाल्लो.
डोकटर नरेशान जांव, प्राय, खंयचर आनी केदाळा म्हळ्ळो विवर घेवन जाताना, रायनाकयी घराथावन फोनां येवंक सुरू जाल्लीं. पूण ताणें चिंतल्लेपरीं बायलेचें फोन न्हय.
रीमा!!
ताची भयण. फटाफट कोल करन आसल्लें.
फोन कानाक दवरन, बागलाभायर होटेलाच्या कोरोडोरांत पासायो मारिलागलो.
रीमा कावजेल्लें. ताच्या उत्रां मधें रडण्याचो आवाज चडीत आसल्लो.
"समीर अवघडांत गंभीर थरान घायेवन, अथेन्स होटेलाच्या तूरत विभागांत आसा. ताचें बायक लोरियेक आफ्टोन मात्याक गंभीर मार जाला. कोमांत आसल्ल्या ताच्या बोल्सांतल्या फोनाथावन पोलिसांनी म्हाका खबर दिल्ली. कशें पुणी करन ताका वांचय. ताचेवीण हांव जियेवंक सकचिंना" रीमाचें रडणें विशेस आसल्लें.
एक लांव श्वास सेवलो ताणें
कपलार उदेल्ल्या मिरियांक बोटांनी खोरपिलें.
समीर!!
रीनाचो क्लासमेट जावन ईश्ट जाल्लो.
ईश्ट क्रमेण बोयफ्रेंड जावन बदलाल्लो.
सळावळ घरा भेट दिंवची मात न्हय आसतां, बायकार भंवचे परयांत पावल्ली.
सिवील इंजिनियरिंगांत सनद जोडल्ल्या तक्षण रीनान ताका कंपेनिंत घेवंक ओत्ताय केल्ली. रीनाच्या खुशेक खाल जावन मात न्हय आसतां समीराच्या आकर्शीक वेक्तित्वांत, उंचलो फुडार दिसोन येतालो.
अशें जाल्ल्यान रायनान ताका "प्रोजेकट ईनचारज" जावन नमियारल्लो.
रायनाचें लेख हांगासर चूकल्लें.
दिसानदीस चडत वेच्या वेळ रातीं परयांतल्या पारट्यांवरवीं ताचें गुमान जवाभदारेथावन पयस वरुंक पावल्लें. हाचेपयलेंय तीन पावटीं तो रसत्या आवघडांत सांपडल्लो तरी मतीक उज्वाड येवंक नातल्लो.
तीन च्यार पावटीं होटेलांनी पियेंवण्याच्या आमालार गलाटो करन मार खावंक पडल्ले.
एक पावटीं पोलिसांचो सयरो जाल्लो!
आमालार गाडी चलवन एका भूरग्याचो पांय मोडल्ल्यान कोडतिंत केज चल्ताली.
कंपनिच्या लेखांत गडबड दिसोन येताली.
सिमेंट सपलायराथावन कमिशन घेवन कंपेनिचो मुनाफो फारतालो मात न्हय आसतां नांव पाड करताळो.
तितलेंच न्हय आसतां, आयलेवारच प्रतिस्परधी संपेनेसवेंय हात मेळोवन आसा म्हण रायनाक कळोन आयिल्लें.
ह्या सरव संग्तेविशीं रायनान ताका चत्राय दिल्ली. ताचे उपरांतयी समीराक रायनाच्या दोळ्यांक दोळे मेळंवच्यांत कितेंच अडकळ भगानातली.
रीमा ताच्या जिण्येंत गुंडायेक रोंबल्लें.
रीमा म्हळ्ळें ट्रंप कारड आपणासवें आसता परयांत रायन अपणाचें कितेंच बिगडोंक सकचोना म्हण ताणें आपल्या वरतुलांत गाजंवचें रायनाच्या कानाक पडल्लें.
समीर रयनाच्या जिण्येंत गिळुंक या थुकुंक जायनातल्ली उंडी जावन बदलाल्लो.
असल्या परिगतेंत ताच्या एकाच मोगाच्या भयणीन समीराच्या जिवच्या बचावेखातीर बोब मारल्ली!
संदिगद परिगतेंत तो शीरकाल्लो!!
डोकटर नरेश तूरतान वेच्या तयारायेर आसल्लो.
"बरें तर रायन. हांगासर आमीं चडीत वेळ विभाडन कितेंच फायदो ना. म्हाका एमरजेन्सिंत एक पेशंट आसा. रसत्या आवघडाची केज. हांवें घळाय करुंक जायना. वेळ भोव मोलाधीक." म्हणात डोकटर नरेश बागला तेवशीं सरारां मेटां काडुंक लागलो.
"पेशंटाचें नांव समीरगी? थोड्या सेकुंदाचें मौन!
"प्राय २९ वरसां?" एक लांब श्वास!
"मोटर बायक आवघड आनी कोमांत!?"
रायनाचीं तीन सवालां आयकोन डोकटर नरेशाक विज्मीत जांवचें बराबर आतुरय वाडली.
"हूं" व्हय म्हणच्याबरीं दाक्तेरांनी तकली हालयताना, रायनाच्या कपलाथावन देमवोन येंवची बारीक घामाझर दाक्तेराच्या गुमानाक येनासतां रावलिनां.
"कितल्या घडीस आसा? जिवाक कसलोय बादक?" रायनाचो ताळो गदगदीत जाल्लो.
"रायन. मेंद्वाक मार (Brain injury and internal bleeding) आनी आंतरीक रग्तास्राव. खंडीत जावन भोव मारेकार. रग्तास्राव आपलेसतकीं रावल्यार बरें आसा. पूण हें गेटे जाल्लें रगत मेंद्वाच्या शिरांक लुक्साण करता जाल्ल्यान, हो वेक्ती कोमाथावन भायर येनासतां आसचो संभव आसा. कितले दीस, हाफ्ते या मयने सांगोंक जांशेंना. आनी एकावेळार कोमाथावन भायर आयल्यारय खंचे तरी ऊण खंडीत आसतले"
"ऊण..? Disability !? रायनाचीं उत्रां कातरन दाक्तेरान मुखारिलें.
"शेळिपिडा (Paralysis), मतिची असकत्काय, असें सांगचें तर सबार आसात"
"डोकटर नरेश, समीर म्हजो खास मनीस. हांव ताचो सांभाळनार म्हण तुवें चिंत्येत, ताची चिकित्सा म्हजी उंचली जवाभदारी." रयनान हात उदारे केले.
"तशें तर ओपरेशनाची गरज पडल्यार पयश्यांविशीं फिकीर करची हांगासर गरज आसची ना"
एका घडियेक रायनाच्या मतिंत सबार पिंतुरां दांवोंक लागलीं.
रीमासंगीं एक असहायक मांद्रेक शेवटाल्लो तरनाटो.
असहायक! निसतेज वेजिटेबल!!
रायन हाका तयार नातल्लो!!!
"ओपरेशन?" रयन घुस्पडल्लें जाळ सोडयतालो.
"पिडेसतान वांचोन ऊरचो आवकास उणो. संपूरण थरान पाटीं पर्तुंची साध्यता आसा. असले पिडेसत चड जावन ओपरेशन थियेटराथावन भायर येनांत जाल्ल्यान, पिडेसतांच्या वारेसदारांक चडीत रिसक. पूण दाक्तेरांची रिसक उणें" दाक्तेराच्या उत्रांनी मनशापण उणें दिसतालें तरयी राजांव आसल्लें.
रीमा आनी समीर!!
पयशिल्या पयस परयांत सारकें दिसानातल्लें!!
"डोकटर नरेश. हांगासर पिडेसतान ओपरेशन थियेटराथावन जिवंत परतोंक न्हजो. टेबलारच.. तुजें फावोतें मोल हांव फारीक करतलों." रायनान निचेव केल्लो.
सिद्धांत! सिद्धांत!!
"देवा उपरांतलो जागो आमकां दितात. आमी जीव वांचवंक दाख्तेर जातांव. सनद जोडल्ले वेळार आमी सपोत घेतांव. निश्कपटपणांत आमी पिडेसतांची सेवा करचेपासत. ह्या संसारांत अजून दाक्तेरांक उंचलो मान आसा. हजार हजार जीव मरणाच्या दांवलेंथावन चोरन आमी पाटीं हाडल्यात. तूं कितें आमकां कसायगार म्हण चिंताय?" डोकटर नरेशाचो आवाज चडोन येंवचो रायनाच्या गुमानाक आयलो.
"सोल्लो! सोल्लो!! तुज्या नव्या आस्पत्रेच्या बांदपाचें काम हांव हातीं घेतलों, आनी तुवें घाल्ल्या हर शरतांक हांव वोप्तां"
डोकटर नरेशान रायनाचो हात हालयलो.
रायनाच्या तोंडार मंद हासो आसल्ल्यो.
[नवेंबर, २०१८]
