Merilin Munro

Moineacho Kovi - 8. Merilin Munro

Ek kovita boroun ’kovi’ zal'lea mhaka

kaim xembhoramni kovita boroitana koll'llem

’hamv kovich nhoi’.

Mhojeach thoddea vollinchi yad aili jedna hi kovita vachli. Az‌kal ’kovita’ mholl'llem namv lokamogall dekun amchea gamvant monxam hozar punn tantle kovi ek hozar ek. Punn udeta proxn ’kovita mhollear kitem?’

Hem proxn ek pautt nhoi, doreka disa ’hamv kovi’ mhonn chinteleamni, patyeteleamni opnnak vicharchi ani tachi zap sodhchi gorz asa.

Atam kovita kiteak pasun aschi mholl'llem proxn hea hozar lokak kelem tor hozar riticheo zapi melltit. Konnak kovita ek hoves, konnak kovita ek ttaim'‌pas, konnak kovita ek kola, punn kovita mholl'lli konnak jivitachea saullechim rupam zatat tednam poilo boro monis svota kovich zata mholl'llem nokhkhem sanguyeta.

Kovita ek svobhavo, kovita ek zovabhdari, kovita jinnyechea mouleank gallun, pillun kadd‌l'lim sotam.

’Sotam’ mhollem hamvem ’khotam nhoi’. Punn aicho kall osoki, kitem boroilam mhonn vachunk, somzunk amchelagim vell na, somyom' na, xeathi na. Punn konne boroilam tem poilem polleun, tanche-hanchethaun aikol'lench sot mhonnun patyeun jieun asamv dekun ’kovita’ chea mullavea orthacher ami fokot ’khotam’ zaunko soktamv xivai choddtik kitench nhoi.

Hech chintpak lagun az pasun merilin munro fokot painalacher jieta. Punn chondrachea protibimbant oploch jivo hogddaitasor sodhun kaddleleo kovita somajechea omurt chintpak adalltat.

Bab Neelba Khandekar konkonnintlo namnecho kovi. Sahity okaddemicho puroskar zoddpi. Hi tachi ailevar‌chi kovita kaim zaiteo kannionch sangun vetat. Hi kovita vachun gel'leporinch porot vachunk prerit kortat.

Merilin Munro (- Neelba Khandekar)

Hamv tika kovita vachun dakhoitalom

eka poros ek ghoddye akantacheo

ti gul'l zali ani kovita sompleo

ten'na chondrim' mina kumarichem bhut zaun

mollbantlean vhaut voitalo

Monant dhoril'lea kovitentlea

xobdancho adhar gheun

ti utthli modinch

mhonnpak lagli, kems ugoun yetam

kems ugoitam ugoitam

Tichea kemsantlean don-tin kovita zhoddleo

ani polloitam polloitam teo

mollob ghott'tt dhorun axil'lea

chan'nea vangdda vitllun geleo

Dhovea ful'l gubgubit galant murogott'ttana

aiz mhaka ti merilin munro bhaxen disli

yedea vhoddlea silvor skrinicher

tika iskoll zaupak zagoch naxil'lo

vonntti xivai

chouktti xivai

protikam xivai

somxtti soit svotak ghott'tt zoddpi oso

dorek zogpank globol ghumvdde gheun legit

Kosle xobd ani kosleo kovita (?)

sury dita ani chondrim' vhorta

mhonnttat tem vogich nhoi

tori-i khub zann sodit astat

aplea morilina khatir choukantolo arso

lipon tor chondrimachea protibimbant

jivo vogddaisor sodun kaddli kovita

'Kems ugoun yetam'

hem tichem fokt ek nimit't

Atam konn khorem manit, ki

kovita fokt aikopa khatiruch astat mhonn (?)

Play the video

Watch on YouTube

[July 2020]