ಎಕ್ ತಳೆಂ

[ಕವಿತಾ] ಎಕ್ ತಳೆಂ

ಏಕ್ ತಳೆಂ ಜೆಂ ದುಬ್ಳಿಕಾಯೆಚೆಂ ಪುಣ್ ಸತಾ-ನಿತಿಚೆಂ, ಮೊಗಾ-ಮಯ್ಪಾಸಾಚೆಂ. ಪುಣ್ ಕಾಳ್ ಬದಲ್ಲೆಪರಿಂ ಪ್ರಕ್ರತಿಚೆ ವಿರೋದ್ ಗೆಲ್ಲ್ಯಾಕ್ ಲಾಗುನ್ ಭೋವ್ಶಾ ಆಜ್ ಸಕ್ಕಡ್ ವಿಭಾಡ್ ಜಾಲಾಂ. ಮನಿಸ್ ಜಶೆಂ ಜಾನ್ವಾರ್ ಲೆಗುನ್ ಕಂಗಾಲ್ ಜಾಲಾ ಆನಿ ಪರತ್ ತ್ಯಾ ತಳ್ಯಾಕ್ ಪಾಟಿಂ ವಚುಂಕ್ ಆಶೆಂವ್ಕ್ ಲಾಗ್ಲಾ.

[ಕವಿತಾ] ಎಕ್ ತಳೆಂ

ತಳೆಂ ಎಕ್ ಆಸ್ಲೆಂ ಥಂಯ್ ಗರಿಬ್ ವಸ್ತಿಯೆಂತ್

ಚಲ್ತಾಲೆಂ ಧುವಪ್ ನ್ಹಾವಪ್ ಗರವಪ್

ಜಾತಾಲಿ ಗೊರ್ವಾಂ ಆನಿ ಪಾಜಿಪಾಲ್ಯಾಚಿ ಶಿಂಪ್ಣಿ

ಸಮಾಜ್ ಪುರ್ವಣೆಕ್ ಪರಂಪರಿಕ್ ಶೆತಿ ಕರಪ್

ಎಕ್ ದಿಸ್ ಎಕ್ ವ್ಹಡ್ಲೊ ಟ್ರಕ್ ಆಯ್ಲೊ ವಾಟ್ ಕಾಡಿತ್

ಗೆಲೊ ಖುಯಂಚೆಂ ತರಿ ಆಡ್ವಾರ್ಲಲೆಂ ಅಟವ್ನ್

ಪ್ರದುಶಣ್ ಆನಿ ಘಾತಕ್ ಜಾಲೆಂ ವಾತಾವರಣ್

ವಸ್ತಿಯೆಂತ್ಲ್ಯಾ ಕೊಣಾಕ್ ಯೆವಂಚೆ ಆದಿಂ ಕಳನ್

ಅವ್ಗ್ಯಾ ದನ್ ದಿಸಾಂನಿ ಮೆಲೆಂ ಬಾರಿಕ್ ನುಸ್ತೆಂ

ವಸ್ತಿಯೆಂತ್ಲ್ಯಾ ಲೊಕಾಚ್ಯಾ ಪಟಾಕ್ ಚಿಂಟೊ ಆಯ್ಲೊ

ತೆದ್ನಾಂಚ್ ಆನಿಕ್ ಎಕ್ ಟ್ರಕ್ ಪಾವ್ಲೊ ಜಿಪಿ ಸಯ್ತ್

ಫಿಂತಾಚೊ ವ್ಹಡಿಲ್ ಸ್ವತಾ ರಕವ್ನ್ ಗೆಲೊ

ವಸ್ತಿಯೆಂತ್ಲಾ ಲೊಕಾಂನಿ ಕಳಯ್ಲೆಂ ಪಂಚಾಯತಿಕ್

ನಾಂ ಪಳೆವ್ಣಿ ನಾಂ ವಿಚಾರ್ಣಿ ಸಗ್ಳೆಂ ಸುಸ್ತ್

ತಿಸ್ರ್ಯಾ ಟ್ರಕಾನ್ ಸಬಂದ್ ನುಸ್ತ್ಯಾಕ್ ಮಾರ್ಲೆಂ

ಪಯ್ಶೆಕಾರಾಂಚೆಂ ಪಾಡ್-ಮನ್ ಜಿಖ್ಲೆಂ ಜುಸ್ತ್

ಉದಕ್ ವಾಪರ್ತಲ್ಯಾಂಚೆ ಹಾತ್ ಲಾಗ್ಲೆ ಇಬಾಡಂಕ್

ಪಿಂಜ್ಲೆ ಕಪ್ಡೆ ಆನಿ ಸವ್ಣಿಂಯ್ ಕಾಂಯ್ ಮೆಲಿಂ

ವಾಡ್ಯಾ ವೆಲಿಂ ಜನಾವರಾಂ ಪಡ್ಲಿಂ ಭಕಿಕ್

ವೆಳಾರ್ ತಾಂಕಾಂ ನಿತಳ್ ಉದ್ಕಾನ್ ಸಾಲ್ವಾರ್ ಕೆಲಿಂ

ಆತಾಂ ತಳ್ಯಾ ಕಡೆಂ ಕೊಣುಚ್ ವಚನಾಂ

ಗಯ್ರ್ ಕಾಮ್ ಕರ್ತಲ್ಯಾಂಚೆಂ ಆಯ್ತೆಂಚ್ ಶಿಜ್ಲೆಂ

ತಳೆಂ ಅರ್ದ್ ಪುರವ್ನ್ ಕೆಲೆ ಹಾಲ್ ಸಾಂನ್ಯಾಂಚೆ

ಗಾಂವ್ಚ್ಯಾ ಬಾಂಯ್ಯ್ಯಾಂನಿ ವಸ್ತಿಜಿವನ್ ರಾಖ್ಲೆಂ

‘ದೆವ್ ನ್ಹಿದ್ಲಾ ಕಾಯ್?' ಭುಕೆಲ್ಲ್ಯಾ ಪೊಟಾಚೊ ವಿಲಾಪ್

ನ್ಹಿದ್ಲಲ್ಯಾಕ್ ಆಯ್ಲಿ ಜಾಗ್ ಘಾನ್ಟ್ ವಾಜ್ಲಿ ಆಮೊರಿಯೆಚಿ

ತ್ಯಾಚ್ ವೆಳಾರ್ ಮಾಹಾಮಾರಿ Covid-19-ಆಕ್ ಲಾಗುನ್

ಆಂಬಲ್ಬಜಾವ್ಣಿ ‘Lockdown ಘಶ್ಣೆಚಿ

ತಳ್ಯಾಚಿ ಖಬರ್ ಪಾವ್ಲಿ ಮಂತ್ರಿಯಾ ಮೆರೆನ್

ನಿತಳ್ ಕೆಲೆಂ ಬೆಕಾರ್ ಸರ್ಕಾರಿ ಕಾಂದಾರಾಂನಿ

ಝರಿ ಫುಟ್ಲಿಯೊ ಉದ್ಕಾಕ್ ಕೆಲಿ ವಾಟ್ ವ್ಹಾಂವುಂಕ್

ಜಾಗ್ರುತ್ ದೆವಾನ್ ಕೆಲಿ ಗರಿಬ್ ವಸ್ತಿಚಿ ಬಾಂದ್ಣಿ

ಪರತ್ ಎಕ್ ಪಾವ್ಟ್ ಫುಲ್ಲಿಂ ಸಾಳ್ಕಾಂ ವಸ್ತಿಯೆಂತ್

ನ್ಹಾವಂಕ್ ಗರವಂಕ್ ಕಪ್ಡೆ ಧುುಂಕ್ ಆಪಯ್ತಾ

ಫುಟುಂ ಕೆದಯ್ ವ್ಹಡ್ ದುಖಾಚೊ ಬಂಬ್

ಎಕಾ ತಳ್ಯಾಚಿ ದಯ್ವತುಚ್ ರಾಖಣ್ ಕರ್ತಾ

[ಎಪ್ರಿಲ್, 2020]