ಫ್ಲಾಯ್ಟ್!?

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕುಕ್ಕೆಹಳ್ಳೆಕ್ ಡೈರೆಕ್ಟ್ ಫ್ಲಾಯ್ಟ್!?

[ವಿಡಂಬನ್] - ವಲ್ಲಿ ಕ್ವಾಡ್ರಸ್

ಆಯ್ಲೆವಾರ್ ಗಲ್ಫಾಂತ್ಲ್ಯಾ ಚಡ್ತಾವ್ ಪ್ರಾಂತ್ಯಾ ಥಾವ್ನ್ ಮಂಗ್ಳುರಾಕ್ (ಬಜ್ಪೆ) ಡೈರೆಕ್ಟ್ ವಿಮಾನ್ ಜಾಲ್ಲಿ ಗಜಾಲ್ ಭೋವ್ ಅಪುರ್ಭಾಯೆಚೆ ರಿತಿನ್ ಸರ್ವ್ ಪತ್ರಾಂನಿ, ಸಾಯ್ಟಾಂನಿ ಪರ್ಗಟ್ ಜಾಲಿ. ಕೊಣೆಂ ಲಾಡು ವಾಂಟ್ಲೆ ಆನಿ ಕೊಣೆ ಪೇಡಾ. ಕೊಣೆ ಫಟಾಕ್ಯೊ ಫೊಡ್ಲ್ಯೊ ಆನಿ ಕೊಣೆ ಗರ್ನಾಳ್ಯೊ. ಕೊಣೆ ಕವಿತಾ ಬರಯ್ಲ್ಯೊ ಆನಿ ಕೊಣೆ ಲೇಖನಾಂ. ಕೊಣೆಂ ಸಂದರ್ಶನಾಂ ಘೆತ್ಲಿಂ ಆನಿ ಕೊಣೆಂ ಸಂವಾದ್ ಚಲಯ್ಲೆ.

ಹೆಂ ಪಳೆವ್ನ್ ಕುಕ್ಕೆಹಳ್ಳಿ ವೆಲ್‌ಫೇರ್ ಅಸೋಸಿಯೇಶನಾಚಿ ತುರಂತ್ ಜಮಾತ್, ಸಂಚಾಲಕ್ ಲಾಟ್‌ಫೊಟ್ ಲಾದ್ರುನ್ ಆಪಯ್ಲಿ. ಹೋಟೆಲ್ ಗಿಟ್ಕೆಭವನ ಇಂಟರ್‌ನ್ಯಾಶನಲಾಚಾ ಸಭಾಸಾಲಾಂತ್ ಸಾಂಜೆರ್ ಸಾತ್ ವೊರಾಂಕ್ ಹಿ ಜಮಾತ್ ಸುರು ಜಾಲಿ.

ಪಣ್ತೆಚೊ ದಿವೊ ಪೆಟವ್ನ್ ಜಮಾತೆಚೆಂ ಉಗ್ತಾವಣ್ ಕರ್ನ್ ಕುಕ್ಕೆಹಳ್ಳಿ ವೆಲ್‌ಫೇರ್ ಅಸೋಶಿಯೇಶನಾಚೊ ಅಧ್ಯಕ್ಶ್ ಬೊಂಬಿಲ್ ಬಾಬುಟಿ ಅಶೆಂ ಮ್ಹಣಾಲೊ;

"ಆಯ್ಚೊ ಸಂಸಾರ್ ಪ್ರಗತೆಚ್ಯಾ ಪಾವ್ಲಾಂನಿ ಚಮ್ಕೊನ್ ಆಸಾ. ಆಮ್ಚಿ ಕುಕ್ಕೆಹಳ್ಳಿ ಆಮ್ಚಾ ದೇಶಾಚ್ಯಾ ಖಂಚ್ಯಾಯ್ ಗಾಂವಾಕ್ ಸೊಡ್ನ್ ದೀನಾ. ಆಮ್ಚಾ ಕುಕ್ಕೆಹಳ್ಳೆಂತ್ಲೊ ಲೋಕ್‌ಯ್ ಗಲ್ಫಾಂತ್ ಘೊಳ್ತಾ, ಕೊಣಾ ಕೊಣಾಚಿ ಚಾಕ್ರಿ ಕರ್ನ್ ಗಾಂವಾಕ್ ಪೊಯ್ಶೆ ಧಾಡ್ತಾ. ಆನಿ ಗಾಂವಾಂತ್‌ಯ್ ಥೊಡಿಂ ಸೊರೊ ಪಿಯೆವ್ನ್ ಖಣಿಂತ್ ಪಡೊಂಕ್ ಪುರೊ ವಾ ಕೊಣಾ ಕೊಣಾಚಾ ಕುಂಕ್ಡಾ ಗುಡಾಕ್ ರಿಗೊನ್ ಕುಂಕ್ಡಾಂಕ್ ಚೊರುಂಕ್ ಪುರೊ ಪುಣ್ ಥೊಡಿಂ ಕೊಣಾ ಕೊಣಾಚಿ ಬುಟ್ಟಿ ಚಾಕರಿ ಕರ್ನ್ ಜಿಯೆತಾ. ಆಮ್ಕಾಂ ಆತಾಂ ಗಲ್ಫಾ ಥಾವ್ನ್ ಬಜ್ಪೆ ಆನಿ ಬಜ್ಪೆ ಥಾವ್ನ್ ಕುಕ್ಕೆಹಳ್ಳೆಕ್ ವಚೊಂಕ್ ಏಕ್ ವೋರ್ ಲಾಗ್ತಾ. ಹ್ಯಾ ಎಕಾ ವೊರಾಂತ್ ಗಲ್ಫಾ ಥಾವ್ನ್ ಹಾಡ್‌ಲ್ಲ್ಯೊ ಸೊಸೆಜ್-ಚೀಜ್ ಆನಿ ಐಸ್‌ಕ್ರೀಮ್ ಪಾಡ್ ಜಾತಾ ದೆಕುನ್ ಕುಕ್ಕೆಹಳ್ಳೆಕ್ ಏಕ್ ಡೈರೆಕ್ಟ್ ಫ್ಲಾಯ್ಟ್ ಆಸ್ಲ್ಯಾರ್ ಹೇಂ ಏಕ್ ವೋರ್ ಆಮಿ ವಿಭಾಡ್ ಜಾಂವ್ಚೆಂ ರಾವವ್ಯೆತ್"

ಕಾರ್ಯದರ್ಶಿಣ್ ಗೊಡ್ಡು ಮೆರ್ಸಿನಾನ್ ಸಂಚಾಲನಾನ್ ಪಾಟ್ಲ್ಯಾ ಪಾಂಚ್ ವರ್ಸಾಂನಿ ದಿಲ್ಲ್ಯಾ ಸೆವೆಚಿ ವರ್ದಿ ವಾಚ್ಲಿ. ಹ್ಯಾ ಪಾಂಚ್ ವರ್ಸಾಂನಿ ವೆವೆಗ್ಳ್ಯಾ ರಿತಿರ್ ಸಾಯ್ಟಾರ್ ಶುಭಾಶಯ್ ಪಾಟಂವ್ಚಿ, ತವಳ್ ತವಳ್ ಮೂಡ್ ಜಾತಾನಾ ಮಿಟಿಂಗ್ ಆಪಂವ್ಚೆಂ, ಪಿಕ್ನಿಕಾಂ ಕರ್ಚಿಂ. ಹಫ್ತ್ಯಾಕ್ ಏಕ್ ಪಾವ್ಟಿಂ ಚುಕಾನಾಸ್ತಾಂ ಮಿಸಾಕ್ ವೆಚೆಂ. ಅಶೆಂ ವೆವೆಗ್ಳೊ ವಾವ್ರ್ ಕರ್ನ್ ಕುಕ್ಕೆಹಳ್ಳೆಚೆಂ ನಾಂವ್ ಊಂಚ್ ದವರ್‌ಲ್ಲ್ಯಾ ಹ್ಯಾ ಸಂಚಾಲನಾಚಾ ಹರ್ಯೆಕಾ ಸಾಂದ್ಯಾಂಚಾ ನಾಂವಾರ್ ವಿಜಿಟಿಂಗ್ ಕಾರ್ಡಾಂ ಛಾಪೊನ್ ದಿಂವ್ಚಿ ಗರ್ಜ್ ಆಸಾ ಮ್ಹಣ್ ತಿಣೆ ಉಲೊ ದಿಲೊ.

ಮುಖೆಲ್ ಸಯ್ರೊ ಜಾವ್ನ್ ಆಯ್‌ಲ್ಲ್ಯಾ ಚೊಂಟ ಬೊಮ್ಮಾನ್ (ಚಾಮಾದೊರಾಂಚಾ ಎಕ್ತಾರಾಚೊ ಸಂಚಾಲಕ್) ಅಪ್ಲ್ಯಾ ಭಾಶಣಾಂತ್ "ಆಮ್ಚಾ ಲೊಕಾಂನಿ ಕುಕ್ಕೆಹಳ್ಳೆಚಿ ಪ್ರಗತಿ ಕರಿಜಾಯ್ ತರ್ ಕುಕ್ಕೆಹಳ್ಳೆಂತ್ ರಾವಾಜಯ್. ನಾಂತರ್ ಆಮ್ಚೊ ಲೋಕ್ ಬಜ್ಪೆ, ಕೇರಳ ಆನಿ ಖಂಯ್ ವಿಮಾನಾಂ ಯೆತಾತ್ ಥಂಯ್ ವಚೊಂಕ್ ಆಸಾ ದೆಕುನ್ ಕುಕ್ಕೆಹಳ್ಳೆಕ್ ಡೈರೆಕ್ಟ್ ಫ್ಲಾಯ್ಟ್ ಜರೂರ್ ಆಸಾಜಯ್. ತ್ಯೇ ಖಾತಿರ್ ವಿಮಾನ್ ನಿಲ್ದಾಣ್ ಕರ್ಚ್ಯಾಕ್ ಅಪ್ಲ್ಯಾ ಸಂಚಾಲನಾಚಾ ಸಾಂದ್ಯಾಂಕ್ ಘೆವ್ನ್ ಜಾಗೊ ಸಪಾಯ್ ಕರುಂಕ್ ಆಮಿಂ ತಯಾರ್ ಆಸಾಂವ್" ಮ್ಹಣಾಲೊ.

ಹೆಚ್ಚ್ ಸಂದರ್ಭಾರ್ ಸಂಚಾಲಕಾಕ್ ಶಾಲ್ ಪಾಂಗ್ರುನ್, ಫುಲಾಂ ಫಳಾಂ ದೀವ್ನ್ ಮಾನ್ ಕೆಲೊ ಆನಿ "ಕುಕ್ಕೆಹಳ್ಳೆಚೊ ವಿಶ್ವ್ ಶಾಂತಿ ನೋಬೆಲ್ ಪುರಸ್ಕಾರ್" ದಿಲೊ. ಸಮಾಜೆಂತ್ ಶಾಂತಿ ಖಾತಿರ್ ಹಾಣೆಂ ಕೆಲ್ಲ್ಯಾ ವಾವ್ರಾಚಿ ಸಂಪೂರ್ಣ್ ವಳೊಕ್ ಉಪಾಧ್ಯಕ್ಶ್ ಬೊಂಬ್ಲಿ ಜುಂವಾಂವಾನ್ ಕರುನ್, ತೊ ಕಶೆಂ ಸೊರೊ ಉಕಡ್ಚೆ ಥಾವ್ನ್ ಹೆರಾಂ ಸಂಚಾಲನಾಂಕ್ ಫುಟಂವ್ನ್ (ಫಕತ್ತ್ ಶಾಂತೆಖಾತಿರ್), ವೆವೆಗ್ಳಿಂ ಸಂಚಾಲನಾಂ ಹಾಣೆಂ ಸ್ಥಾಪನ್ ಕೆಲ್ಲಿಂ ಮ್ಹಣ್ ಒತ್ತು ದೀವ್ನ್ ಸಾಂಗ್ಲೆಂ. ಸನ್ಮಾನಾ ಉಪ್ರಾಂತ್ ಸಂಚಾಲಕ್ ಲಾವೊತ್ಸೂಚ್ಯಾ ಉತ್ರಾಂಚೊ, ಮಹಾತ್ಮಾ ಗಾಂಧಿಚ್ಯಾ ಉತ್ರಾಂಚೊ, ಬರ್ನಾಡ್ ಶಾಚ್ಯಾ ಉತ್ರಾಂಚೊ ನಿಯಾಳ್ ಕರುನ್ ದೀವ್ನ್ ಮ್ಹಣಾಲೊ "ಮ್ಹಾಕಾ ಕೊಣೆಂಯ್ ಹೊಗಳ್ಸಿಲ್ಯಾರ್ ಚಡ್ ಖುಶಿಯೀ ಜಾಯ್ನಾ, ಕೊಣೆಂಯ್ ವಿಮರ್ಸೊ ಕೆಲ್ಯಾರ್ ಚಡ್ ಬೆಜಾರಾಯ್‌ಯೀ ಜಾಯ್ನಾಂ" ಮ್ಹಣಾಲೊ. ಹೆಚ್ಚ್ ಸಂದರ್ಭಾರ್ ತಾಚ್ಯೊ ತಸ್ವೀರೊ ಆನಿ ’ಎಕ್ಸ್‌ಕ್ಲೂಸಿವ್ ವರ್ದಿ’ ಪರ್ಗಟ್ ಕರ್ಚಾ ಸರ್ವ್ ಪತ್ರಾಂಕ್, ಸಾಯ್ಟಾಂಕ್ ಅರ್ಗಾಂ ದೀಂವ್ಕ್ ತೊ ವಿಸರ್ಲೊನಾ.

ಕುಕ್ಕೆಹಳ್ಳಿ ವೆಲ್‌ಫೇರ್ ಅಸೋಸಿಯೇಶನಾಚಾ ಸಾಂದ್ಯಾಂನಿ ಹೌಸಿ ಹೌಸಿ ಖೆಳ್, ಮ್ಯೂಜಿಕಲ್ ಚೇರ್ ಖೆಳ್ ಆನಿ ಫಾಮಾದ್ ಡಿಜೆಂಚ್ಯಾ ’ಕಾಂಟಾ ಲಗೇ’, ’ಬೀಡಿ ಜಲಾಯ್ಲೇ’ ಪದಾಂಕ್ ಲ್ಹಾನ್ ಭುರ್ಗ್ಯಾಂನಿ ಡ್ಯಾನ್ಸ್ ಕರ್ನ್ ಮನರಂಜನ್ ಕೆಲೆಂ. ವ್ಹಡಾಂಕ್ (ದಾದ್ಲ್ಯಾಂಕ್) ಪಿಲ್ಚಂಡಿ ಆನಿ ಕಬಡ್ಡಿ ಖೆಳ್ ಆಸ್‌ಲ್ಲೆ ತರ್ ಬಾಯ್ಲಾಂನಿ ಖಬ್ರೊ ಕರ್ಚ್ಯೊ ಅಂತಾಕ್ಷರಿ ಖೆಳ್ ಖೆಳ್ಳಿಂ. ಕಾರ್ಯಾಚೆ ಅಖ್ರೇಕ್ ಲಾಟ್‌ಫೊಟ್ ಕೇಟರರ್ಸ್ ಹಾಣಿಂ ರುಚಿಕ್ ಮಂಗ್ಳುರಿ ಜೆವಾಣ್ (ದುಕ್ರಾಮಾಸ್, ಸಾನ್ನಾಂ ಆನಿ ಪಿಟ್ಕ್) ದಿವುನ್ ಸರ್ವಾಂಕ್ ದಾಧೊಸ್ ಕೆಲೆಂ.

ವರ್ದಿ - ಕುಕ್ಕೆಹಳ್ಳಿ ವೆಲ್‌ಫೇರ್ ಎಸೋಸಿಯೇಶನಾಚೊ ಭಾತ್ಮಿ.

ಹಾಸ್ ಆನಿ ಹಾಸಯ್

ದಾಯ್ಜ್ ಲೇಖನಾಂ

ದಾಯ್ಜ್ ಪಾನಾಕ್

ಸಜ್ಜಿಗೆ

ವಿಚಾರ್-ಉಚಾರ್

ಪಕ್ವಾನ್