ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಆಮ್ಚಾ ಜಿಣ್ಯೆಂತ್ ಚಡ್ತಾವ್ ಜಾವ್ನ್ ಆಮಿ ಹೆರಾಂಚಿ ಜಿಣಿ ಜಿಯೆಂವ್ಕ್ ವಚೊನ್ ತಾಂತುಂ ಆಮ್ಕಾಂ ಲಾಭ್ಚಿ ಸಲ್ವಣ್ ಘೆಂವ್ಚಿ ಸಕತ್ ನಾಸ್ಚಿಚ್ ವ್ಹಡ್ಲೆಂ ಅಸಮಧಾನ್."
ಫಿರ್ಗಜೆವಾರ್ ಕೊಂಕ್ಣಿ ವಾವ್ರಾಚಿ ಗರ್ಜ್
ವರಸ್ : 2006
ಅಂಕೊ : 23
ಮಯ್ನೊ : ಮಾಯ್
ಸಂಪಾದಕೀಯ್ - 23.
ವಲ್ಲಿ ಕ್ವಾಡ್ರಸ್
ಕೊಂಕ್ಣಿ ಥಂಯ್ ಮೊಗಾಳ್ ವಾಚ್ಪ್ಯಾ,
ಜಿಣಿಂ ಆಸ್ಚಿ ಶಿಕೊಂಕ್ ಮ್ಹಣ್ತಚ್ ಜಿಣ್ಯೆಚಾ ಹರ್ಯೆಕಾ ಹಂತಾರ್ ಮನಿಸ್ ಜಾಲ್ಲ್ಯಾಕ್ ತವಳ್ ತವಳ್ ಪಡೊಂಕ್ ಆಸ್ತೆಲೆಂ, ತಶೆಂಚ್ ಉಟೊಂಕ್ ಆಸ್ತೆಲೆಂ ತರ್ಯ್ ಅಪ್ಲೆಂ ಮಿಸಾಂವ್ ಘೆವುನ್ ಚಲೊಂಕ್ ಆಸ್ತೆಲೆಂ. ತೆಚ್ಚ್ಪರಿಂ ಆಮ್ಚಾ ಮಿಸಾಂವಾಂತ್ ಆಮಿಂ ಶಿಕೊನ್ಂಚ್ ಆಯ್ಲ್ಯಾಂವ್ ಆನಿ ಶಿಕೊನ್ಂಚ್ ಆಸಾಂವ್. ಹ್ಯಾ ಮಿಸಾಂವಾಂತ್ ಜಿತ್ಲಿ ಜೀಕ್ ಮನಿಸ್ ಆಪ್ಣಾಂವ್ಕ್ ಸಕ್ತಾ ಮ್ಹಳ್ಳೆಂ ತ್ಯಾ ತ್ಯಾ ಮನ್ಶಾಚಾ ಮನೋಗತೆಚೆರ್ ಹೊಂದ್ವೊನ್ ಆಸಾ ತರ್ಯ್ ಏಕ್ ಸತ್ ಮಾತ್ರ್ ಕೊಣ್ಯ್ ನೆಗಾರ್ ಕರಿಚೊನಾ, ಆನಿ ತೆಂ ಜಾವ್ನಾಸಾ ’ಜಿತ್ಲಿ ಮಿನತ್ಗಿ ತಿತ್ಲೊ ಪ್ರತಿಫಳ್’.
ಪ್ರಸ್ತುತ್ ಕೊಂಕ್ಣಿ ಪರಿಗತೆಂತ್ ಹ್ಯಾ ಮಿಸಾಂವಾಕ್ ಅಡ್ಕಳ್ಯೊ ಜಾವ್ನ್ ಜಾಯ್ತೆ ಸಮಸ್ಸೆ ಆಮ್ಚೆಮುಖಾರ್ ಉಭೆ ರಾವೊನ್ ಹೆಡಾಯ್ತಾತ್ ತರ್ಯ್ ತಾಂಚೆಂ ಗಣ್ಣೆಂ ಕರಿನಾಸ್ತಾನಾ ಅಪ್ಲೆಂ ಮಿಸಾಂವ್ ತೆಚ್ಚ್ ಶೃದ್ದೆನ್, ಗೌರವಾನ್, ಮೊಗಾನ್ ತಶೆಂಚ್ ಹಠಾನ್ ಮುಖಾರುನ್ ವ್ಹರ್ಚಿ ಗರ್ಜ್ ಉದೆಲ್ಯಾ. ಆಜ್ ಕೊಂಕ್ಣಿ ಅಪ್ಲ್ಯಾ ಲಿಪಿ-ಬೊಲಿ, ಜಾತ್-ಧರ್ಮ್ ಹಾಚೆಂ ಪಂದಾ ಅಡ್ಚೊನ್ ಆಸಾ ತರ್ಯ್ ಥಂಯ್ ಹಾಂಗಾ ಕೊಂಕ್ಣೆಚೆ ಬಾವ್ಟೆ ಉಭ್ತಾತ್ ಮ್ಹಣ್ತಚ್ ಕೊಂಕ್ಣಿ ಉದ್ದಾರ್ ಜಾಲಿ ಯಾ ಜಾತೆಲಿ ಮ್ಹಣೊನ್ ಸ್ವಪ್ಣಾಂತ್ ಖೆಳಿಂ ಖಾಂವ್ಚಿ ಸೊಡ್ನ್ ಕೊಂಕ್ಣಿ ವಾವ್ರಾಕ್ ಆಮಿ ಹರ್ಯೆಕ್ಲ್ಯಾಂನಿ ಆಯ್ತೆಂ ಜಾಯ್ಜಯ್ ಪಡ್ಲಾಂ. ಕೊಂಕ್ಣಿ ಕೊಣಾಚಿ? ಕೊಣೆಂ ಹೆಂ ಕಾಮ್ ಕರುಂಕ್ ಜಾಯ್? ಕಶೆಂ ಆನಿ ಕಿತ್ಯಾಕ್ ಕರ್ಚೆಂ? ಕೊಂಕ್ಣಿ ವಾವ್ರ್ ಕೆಲ್ಲ್ಯಾಂತ್ ಆಮ್ಕಾಂ ಕಿತೆಂ ಮೆಳ್ತಾ? ಮ್ಹಳ್ಳಿಂ ಬೌತಿಕ್ ರಾಜಾಂವಾಚಿಂ ಸವಾಲಾಂ ವಿಚಾರ್ಚಿಂ ಸೊಡ್ನ್ ಆಮ್ಚಾ ಗಾಂವಾಂತ್ ಆಮ್ಚಾ ಫಿರ್ಗಜೆಂತ್, ಆಮ್ಚಾ ವಾಡ್ಯಾಂನಿ ಪುಣ್ ಪಯ್ಲೆಂ ಆಮ್ಚಾ ಘರಾಂನಿ ಹೊ ಕೊಂಕ್ಣಿ ವಾವ್ರ್ ಆಮಿ ಸುರು ಕರುಂಕ್ ಜಾಯ್.
ಆಮ್ಚಾ ಜಿಣ್ಯೆಂತ್ ಜಾಯ್ತ್ಯಾ ಸಂಗ್ತೆಂಕ್ ಆಮಿ ಮಹತ್ವ್ ದಿತಾಂವ್, ಜಶೆಂ ಲ್ಹಾನ್ಪಣಾರ್ ದೊತೊರ್ನ್ ಶಿಕ್ತಾಂವ್, ಇಸ್ಕೊಲಾಕ್ ವೆತಾಂವ್, ಮೀಸ್-ಕುಮ್ಸಾರಾಕ್ ವೆತಾಂವ್ ಪುಣ್ ಹಾಚೆಸವೆಂ ಕೊಂಕ್ಣಿ ಭಾಸೆಖಾತಿರ್ ಆಮಿ ಕಿತೆಂಯ್ ಕರುಂಕ್ ಆಮ್ಚಾ ಯುವ ಮುಖೆಲ್ಯಾಂನಿ ಮನ್ ಕೆಲೆಂ ತರ್, ಕೊಂಕ್ಣೆಂತ್ ನವ್ಯಾ ಭರ್ವಶ್ಯಾಚೆ ಫಾಂಟೆ ಉದೆತೆಲೆ, ಕೊಂಕ್ಣಿ ನವೆಂಸಾಂವಾಚ್ಯೊ ಆಂಖ್ರ್ಯೊ ಫುಟ್ತೆಲ್ಯೊ.
ಕೊಂಕ್ಣಿ ವಾವ್ರ್ ಕರ್ಚೆವಿಶ್ಯಾಂತ್ ಖಂಯ್ಚಾಯ್ ಬುಕಾಂನಿ/ಗೃಂಥಾಂನಿ ಬರಯ್ಲೆಲೆಂ ವಾಚುಂಕ್ ಆಮ್ಕಾಂ ಮೆಳ್ಚೆಂನಾ ತರ್ಯ್ ಕ್ರಿಯಾತ್ಮಕ್ ರಿತಿನ್ ಚಿಂತ್ಲೆಂ ತರ್ ಆಮ್ಚಾ ಸಾಹಿತಿಂನಿ ಹ್ಯಾ ದಿಶಿಂ ಇಲ್ಲೆಂ ಚಿಂತಾಪ್ ಆಟಂವ್ಚೆಂ ಗರ್ಜೆಚೆಂ.. ಹಾಚಾಧಿಂಯ್ ಥೊಡ್ಯಾಂನಿ ಹಾತ್ ಭಾಂದುನ್ ಫಕತ್ತ್
ಹೆರಾಂಕ್ ’ಕೊಂಕ್ಣಿ ವಾವ್ರ್ ಕರಿಜಾಯ್’ ಮ್ಹಳ್ಳಿ ಬೂದ್ ಸಾಂಗ್ಲ್ಯಾ ತರ್ಯ್, ತೊ ವಾವ್ರ್ ಕಸಲೊ ಮ್ಹಳ್ಳೆಂ ಸಾಂಗೊಂಕ್ ನಾ.
ಆಮ್ಚಾ ಫಿರ್ಗಜೆಂತ್ ಆಮಿಂ ಕೊಂಕ್ಣಿ ಮಿಸಾಂವ್ ಕಶೆಂ ಕರ್ಯೆತ್?
ಆಮ್ಚಾ ಫಿರ್ಗಜೆಂತ್ ಆಮಿಂ ರಾತ್-ದೀಸ್ ಕೊಂಕ್ಣೆಚೆಂ ಭಜನ್ ಗಾಯ್ಜೆ ಮ್ಹಣ್ ಸಾಂಗ್ಚೊ ಇರಾದೊ ನ್ಹಯ್, ಜಶೆಂ ’ಕೊಂಕ್ಣಿ ಮ್ಹಜಿ ಮಾಯ್.. ಕೊಂಕ್ಣಿ ಮ್ಹಾಕಾ ಜಾಯ್’ ಮ್ಹಳ್ಳಿಂ ಕಿರ್ತನಾಂ ಗಾಯ್ತಚ್ ಕೊಂಕ್ಣಿ ಫುಲಾನಾ ವ ಪಾಲೆನಾ.. ನೀಜ್ ರಿತಿನ್ ಕೊಂಕ್ಣೆಂತ್ ಕಿತೆಂಯ್ ಕರ್ಚೆಂ ತರ್ ಜಾಯ್ತ್ಯೊ ವಾಟೊ ಆಮ್ಚಾನ್ ಸೊಧುಂಕ್ ಸಾಧ್ಯ್ ಆಸಾತ್;
1. ಫಿರ್ಗಜೆಂತ್ ವರ್ಸಾಕ್ ಏಕ್ ಪುಣೀಂ ಕೊಂಕ್ಣಿ ನಾಟಕ್/ನಾಟ್ಕುಳೊ ಖೆಳವ್ನ್ ಧಾಖಯ್ಜಾಯ್.
2. ಫಿರ್ಗಜೆಂತ್ ಆಸ್ಚಾ ತಾಲೆಂತಾಕ್ ಪ್ರೋತ್ಸಾಹ್ ದಿಂವ್ಚಾ ದಿಶೆನ್ ಕೊಂಕ್ಣಿ ಸ್ಪರ್ಧೆ ಆಸಾ ಕರ್ಯೆತಾ, ತೆ ಸ್ಪರ್ಧೆ ಜಾವ್ಯೆತ್ ಕೊಂಕ್ಣಿ ಭಾಶಣ್ ಸ್ಪರ್ಧೊ, ಕೊಂಕ್ಣಿ ಗಾಯನ್ ಸ್ಪರ್ಧೊ, ಕೊಂಕ್ಣಿ ಸಾಹಿತಿಕ್ ಸ್ಪರ್ಧೊ, ಕೊಂಕ್ಣಿ ಕ್ವಿಜ್ ಸ್ಪರ್ಧೊ.....ವ ಹೆರ್ ಸ್ಪರ್ದೊ.
3. ಫಿರ್ಗಜೆಂತ್ ಹರ್ಯೆಕಾ ಘರಾಂನಿ ಏಕ್ ಕೊಂಕ್ಣಿ ಪತ್ರ್ ಪುಣೀಂ ಹಾಡ್ಚಿ ರಿವಾಜ್ ಸುರು ಕರಿಜಾಯ್.
4. ಫಿರ್ಗಜೆಂತ್ ವರ್ಸಾಕ್ ಎಕಾ ಕೊಂಕ್ಣಿ ಬುಕಾಕ್, ಎಕಾ ಕೊಂಕ್ಣಿ ಸಂಗೀತ್ ಕೊವ್ಳೆಕ್, ತರ್ಯ್ ಮೋಲ್ ದೀವ್ನ್ ಘೆಂವ್ಕ್ ಜಾಯ್ [ಫುಂಕ್ಯಾಕ್ ವಿಚಾರುನ್ ಹಾಡ್ಚೆಂ ರಾವಯ್ಜಯ್].
5.
ಫಿರ್ಗಜೆಹಂತಾರ್ ಲೊಕಾಂಕ್ ಜಾಗೃತ್ ಕರ್ಚಾಕ್
ರಸ್ತ್ಯಾನಾಟಕ್/ಕೊಂಕ್ಣಿ ಯಕ್ಷಗಾನ ಯಾ ಅಸಲೆ ಪ್ರಯೋಗ್
ಕೊಂಕ್ಣಿ ಪ್ರಚಾರಾಕ್ ಭೋವ್ ಉಪ್ಕಾರಾಕ್ ಪಡ್ತೆಲೆಂ.
6.
ಫಿರ್ಗಜೆಹಂತಾರ್/ವಾರಾಡ್ಯಾ ಹಂತಾರ್ ಏಕ್ ಕೊಂಕ್ಣಿ
ಲೈಬ್ರೆರಿ ಆಸಾ ಕರ್ಯೆತಾ, ತಾಂತುಂ ಸರ್ವ್ ಕೊಂಕ್ಣಿ
ಪತ್ರಾಂ, ಬೂಕ್ ಆಸ್ಲ್ಯಾರ್ ಕೊಂಕ್ಣಿ ವಾಚ್ಪ್ಯಾಂಕ್
ಚಡಂವ್ಕ್ ಖಂಡಿತ್ ಉಪ್ಕಾರಾಕ್ ಪಡ್ತೆಲೆಂ.
7.
ಕೊಂಕ್ಣಿ ಪತ್ರಾಂನಿ ಕೊಂಕ್ಣಿ ಭಾಸೆಚಾ/ಸಾಹಿತ್ಯಾಚಾ
ವ್ಹಾಡಾವಳೆಚಾ ನದ್ರೆನ್ ಸೃಜನಾತ್ಮಕ್ ರಿತಿನ್ ಚಿಂತ್ಚಿ
ಗರ್ಜ್ ಆಸಾ. ಸಾಹಿತಿಕ್ ಸ್ಪರ್ಧೆ ಆನಿ ಸಾಹಿತಿಕ್ ಸಂವಾದ್
ಅಸಲ್ಯಾ ಕ್ರಿಯಾತ್ಮಕ್ ಚಟುವಟಿಕಾಂಕ್ ಪ್ರೋತ್ಸಾಹ್
ದಿಂವ್ಚೆ ತಸಲಿಂ.
8.
ವಾರಾಡ್ಯಾ ಹಂತಾರ್ ಅಸಲೆ ಸ್ಪರ್ಧೆ/ಶಿಭಿರಾಂ ವರ್ಸಾಕ್
ಏಕ್ ಪಾವ್ಟಿಂ ಪುಣೀಂ ಮಾಂಡುನ್ ಹಾಡುಂಕ್ ತ್ಯಾ ತ್ಯಾ
ವಾರಾಡ್ಯಾಂನಿ ಪ್ರಯತ್ನ್ಚಲಾಜಾಯ್.
9.
ದಿಯೆಸೆಜಿಚಾ ಹಂತಾರ್ ಅಸಲೆ ಸ್ಪರ್ಧೆ/ಶಿಭಿರಾಂ
ಮಾಂಡುನ್ ಹಾಡುಂಕ್ ಕೇಂದ್ರೀಯ್ ಯುವ
ಸಂಚಾಲನಾನ್/ಕಥೊಲಿಕ್ ಸಭೆನ್ ಮುಖೇಲ್ಪಣ್
ಘೆಜಾಯ್.
ಸಭಾರ್
ಫಿರ್ಗಜೆಂನಿ ಜಾಯ್ತಿಂ ಸಂಘಟನಾಂ ಆಸಾತ್, ಯುವ ಸಂಚಾಲನ್, ಕಥೊಲಿಕ್ ಸಭಾ...... ಹೆಂ ಕಾಮ್ ತಿಂ ಕರುಂದಿತ್, ಹಿಂ ಕರುಂದಿತ್ ಮ್ಹಣ್ ಹಾತ್ ಭಾಂದುನ್ ಬೊಸಾನಾಸ್ತಾಂ ಎಕಾ ಸಂಘಟನಾನ್ ಮುಖೇಲ್ಪಣ್ ಘೆತ್ಲೆಂ ತರ್ ಹೆರಾಂನಿ ತಾಂಚೊ ಸಹಕಾರ್ ದೀವ್ನ್ ಹ್ಯಾ ವಾವ್ರಾಕ್ ಕುಮೊಕ್ ಕರ್ಯೆತ್. ಯುವಜಣಾಂನಿ ಪ್ರತ್ಯೇಕ್ ಜಾವ್ನ್ ಅಸಲ್ಯಾ ಕಾಮಾಂನಿ ಮುಖೇಲ್ಪಣ್ ಘೆತ್ಲೆಂ ತರ್ ಖಂಡಿತ್ ಜಾವ್ನ್ ಆಮ್ಚಾ ಮಾಯ್ಭಾಶೆಕ್ ಕೆದಿಂಚ್ ಕಿತೆಂಚ್ ಉಣೆಂ ಪಡ್ಚೆಂನಾ..
ಮನಿಸ್ ಕೊಣ್ಯ್ ಜಾಂವ್, ಕಿತೆಂಯ್ ಜಾಂವ್ ಪುಣ್ ಜೊ ಮನಿಸ್ ಆಪ್ಲ್ಯಾ ಆವಯ್ಕ್ ವಾಟೆರ್ ಘಾಲ್ತಾ, ತಾಕಾ ಸಮಾಜ್ ಮಾನ್ ದೀನಾ - ತೆಚ್ಚ್ಪರಿಂ ಆಪ್ಲ್ಯಾ ಮಾಂಯ್ಭಾಶೆಕ್ ಜೊ ಕೊಣ್ ಉಣೆಂ ಲೆಖ್ತಾ, ತಾಕಾ ಸ್ವಾಭಿಮಾನ್ ಮ್ಹಳ್ಳೊ ಭಿಲ್ಕುಲ್ ಆಸೊಂಕ್ ಸಾಧ್ಯ್ ನಾ.
ದಾಯ್ಜ್ ಏಕ್ ಅಸಲೆಂಚ್ ಮಿಸಾಂವ್ ಆಮ್ಚೆಂ, ಆಮಿಂ ಪರ್ಗಾಂವಾಂತ್ ಆಸ್ಚೆ ತರ್ಯ್ ಆಮ್ಚೊ ಮೋಗ್ ಕೊಂಕ್ಣೆಚೊ, ಕೊಂಕ್ಣೆಖಾತಿರ್ ಆಮ್ಚಾ ತಾಂಕಿಭಿತರ್ಲೆಂ ಕಿತೆಂ ತರ್ಯ್ ಕರುಂಕ್ ಆಮ್ಚೆಂ ಪ್ರೇತನ್ ಆಸ್ತಾನಾ ಆಮ್ಚೆಂ ಗಿನ್ಯಾನ್ ಫಕತ್ ಆಮ್ಚಾ ವಾವ್ರಾಚೆರ್ ಆಸಾ ಶಿವಾಯ್ ಆಮ್ಚೆವಿಶಿಂ ಕೊಣ್ ಕಿತೆಂ ಮ್ಹಣ್ತಾ ಮ್ಹಳ್ಳೆಂ ಚಿಂತುಂಕ್ ಆಮಿ ವಚಾನಾಂವ್, ಜಶೆಂ ಚಡ್ ಆಂಬೆ ಆಸ್ಚಾ ರುಕಾರ್ ಚಡ್ ಫಾತೊರ್ ಮಾರ್ತಾತ್ ತಶೆಂ ಆಮ್ಚಾ ಮಿಸಾಂವಾಚೆರ್ ಹಾಸ್ತೆಲೆ ಹಾಸೊನ್ಂಚ್ ಬೊಸೊಂ. ತಾಚಿ ಬಿಲ್ಕುಲ್ ಫಿಕಿರ್ ಆಮ್ಕಾಂ ನಾ. ಆಮಿಂ ವಯ್ಲೆಯ್ ನ್ಹಯ್, ಪಯ್ಲೆಯ್ ನ್ಹಯ್ - ಆಮಿ ನಿಮಾಣೆಂ.. ಜರ್ತರ್ ಕೊಂಕ್ಣೆಚಿ ಅಭಿವೃದ್ದಿ ಜಾಯ್ತ್ ತರ್ ಆಮ್ಚೆಂ ಅಸ್ತಿತ್ವ್ಚ್ ನಾ ಮ್ಹಣೊಂಕ್ಯ್ ಆಮಿಂ ತಯಾರ್. ಕಿತ್ಯಾಕ್ ಮ್ಹಳ್ಯಾರ್ ಆಮಿ ಹಾಂಗಾ ದೆಂವ್ತಾನಾ ಕಾಂಯ್ ಪುಂಜಾಂವ್ಚೊ ಇರಾದೊ ಘೆವ್ನ್ ಆಯಿಲ್ಲೆ ನ್ಹಯ್, ತೆ ಇರಾದೆಯ್ ಆಮ್ಕಾಂ ನಾಂತ್..
ಪಾಟ್ಲ್ಯಾ ದೋನ್ ವರ್ಸಾಂನಿ ಕೆಲ್ಲೆಪರಿಂಚ್ ಹ್ಯಾ ವರ್ಸಾಯ್ ಆಮ್ಚಿಂ ಪಾವ್ಲಾಂ ಆಮಿಂ ಕಾಡ್ತೆಲ್ಯಾಂವ್.. ಆಮ್ಚಾ ಪಾವ್ಲಾಂಕ್ ತುಮ್ಚಾ ಮಾಗ್ಣ್ಯಾಚೊ ತಶೆಂಚ್ ಸರ್ವೆಸ್ಪರಾಚಾ ಆಶಿರ್ವಾದಾಂಚೊ ಶಿಂವೊರ್ ಪಡೊಂದಿ ಮ್ಹಣ್ ಮಾಗ್ತಾಸ್ತಾನಾ ಆಮ್ಚೆಂ ಮಾಗ್ಣೆಂ ಇತ್ಲೆಂಚ್; ’ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್’.
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
