ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಸಾಂಗೊಂಕ್ ಸಲೀಸ್ ಪುಣ್ ಪಾಳುಂಕ್ ಕಶ್ಟ್ - ತುಂ ಪಯ್ಲೆಂ ಪಾಳುಂಕ್ ಶಿಕ್, ತುಜೆಂ ಸಾಂಗ್ಚೆಂ ಕಾಮ್ ಉರ್ತೆಲೆಂ"
ಆಮ್ಚೊ ಧರ್ಮ್ ಆನಿ ಮುಖೆಲಿ
ವರಸ್ : 2007
ಅಂಕೊ : 32
ಮಯ್ನೊ : ಫೆಬ್ರೆರ್
ಸಂಪಾದಕೀಯ್ - 32.
ವಲ್ಲಿ ಕ್ವಾಡ್ರಸ್
ಆಯ್ಲೆವಾರ್ ಮುಂಬಯಾಂತ್ ಚಲ್ಲ್ಲ್ಯಾ ಎಕಾ ಗ್ರೇಸ್ತಾಂಚಾ ಕಾಜಾರಾಕ್ ಆಪವ್ಣೆಂ ನಾಸ್ತಾಂ ಏಕ್ ಜೊಡೆಂ ರಿಗ್ಲೆಂ. ಪುಣ್ ಕಾಜಾರಾಕ್ ಆಯಿಲ್ಲ್ಯಾ ಥೊಡ್ಯಾ ಲೊಕಾಂನಿ ತಾಂಕಾಂ ಧರ್ನ್, ತಾಂಕಾಂ ಮಾರ್ಲೆಂ, ಝಳ್ಚಾ ಸಿಗ್ರೆಟಿಂತ್ ದಾಗುನ್ ದವರ್ಲೆಂ, ಥೊಡ್ಯಾಂನಿ ತ್ಯಾ ಬಾಯ್ಲೆಕ್ ಅರ್ಧೆಂ ನಾಗ್ಡೆಂ ಕರ್ನ್ ತಿಚ್ಯೊ ತಸ್ವೀರ್ಯೊ ಕಾಡ್ಲ್ಯೊ. ಥೊಡ್ಯಾಂನಿ ತಾಂಕಾಂ ಜಿವೆಶಿಂ ಮಾರ್ಚಿ ಧಮ್ಕಿ ದಿಲಿ, ಅನಿ ಥೊಡ್ಯಾಂನಿ ತ್ಯಾ ಬಾಯ್ಲೆಚೆರ್ ಸಾಮೂಹಿಕ್ ಭಲತ್ಕಾರ್ ಕರ್ಚಿ ಧಮ್ಕಿ ಸಯ್ತ್ ದಿಲಿ, ಥೊಡ್ಯಾಚ್ಚ್ ವೆಳಾನ್ ಲೊಕಾಂನಿ ತಾಂಕಾಂ ಧರ್ನ್ ಪೊಲಿಸಾಂಚಾ ತಾಬೆಂತ್ ದಿಲೆಂ. ಪೊಲಿಸಾಂನಿ ಅಖ್ರೇಕ್ ಘುಟ್ ಸೊಡಯ್ತಾನಾ ತಿಂ ಮ್ಹಣಾಲಿಂ; "ಏಕ್ ಬರೆಂ ಜೆವಾಣ್ ಜೇಂವ್ಕ್ ಆಮಿ ಆಶೆಲ್ಲ್ಯಾಂವ್. ಆಮ್ಕಾಂ ಪೊಯ್ಶೆ ದೀವ್ನ್ ತೆಂ ಜೆವಾಣ್ ಜೇಂವ್ಕ್ ಸಾಧ್ಯ್ ನಾತ್ಲ್ಲಿ ದೆಖುನ್ ಕಾಜಾರಾಂತ್ ದೋನ್ ಜೆವ್ಣಾಂತ್ ಫರಕ್ ಪಡ್ಚೊನಾ ಮ್ಹಳ್ಳೆಂ ಚಿಂತುನ್ ಆಮಿಂ ಆಪವ್ಣ್ಯಾವಿಣೆಂ ಥಂಯ್ ರಿಗ್ಲ್ಯಾಂವ್". ಭೋವ್ ಬರೆಂ ಕಾಮ್ ತ್ಯಾ ಲೊಕಾಂನಿ ಕೆಲ್ಲೆಂ. ಎಕೆಕ್ಲ್ಯಾಕ್ ಧರ್ನ್ ಭಾರತ್ರತ್ನ್ ಪುರಸ್ಕಾರ್ ವಾ ವಿಶ್ವ್ ಶಾಂತೆಚೊ ನೋಬೆಲ್ ಪುರಸ್ಕಾರ್ ದಿವ್ಯೆತ್.
ಹೆಂ ಘಡಿತ್ ಅಜೀಕ್ ಲಗ್ಬಗ್ ತೀಸ್ ವರ್ಸಾಧಿಂ ಆಯಿಲ್ಲ್ಯಾ ’ದೀವಾರ್’ ಪಿಂತುರಾಂತ್ಲ್ಯಾ ಎಕಾ ಘಡಿತಾಚೊ ನಿಯಾಳ್ ಕರುನ್ ದಿತಾ, ನವೊಚ್ ಪೊಲಿಸ್ ಇನ್ಸ್ಪೆಕ್ಟರ್ ಜಾವ್ನ್ ಆಯಿಲ್ಲೊ ರವಿ (ಶಶಿಕಪೂರ್), ಚೊರಿ ಕರ್ನ್ ಧಾಂವ್ಚ್ಯಾ ಎಕ್ಲ್ಯಾ ಭುರ್ಗ್ಯಾಕ್ ಧಾಂವ್ಡಾವ್ನ್ ವರ್ತಾ ಆನಿ ಅಪ್ಲ್ಯಾ ಪಿಸ್ತುಲೆಚ್ಯಾ ಗುಳ್ಯಾಂತ್ ಮಾರ್ನ್ ತಾಚಾ ಆಸ್ಪತ್ರೆಚ್ಯಾ ಖಟ್ಲ್ಯಾಕ್ ಪಾವಯ್ತಾ. ತಾಣೆಂ ಕೆಲ್ಲಿ ಚೊರಿ ಇತ್ಲಿಚ್; ’ಆಪ್ಲ್ಯಾ ಘರಾಂತ್ ಭುಕೆನ್ ವ್ಹಳ್ವಳ್ಚಾ ಆವಯ್ಕ್, ಲ್ಹಾನ್ ಭಯ್ಣಿಕ್ ಆನಿ ರಿಟಾಯರ್ಡ್ ಮೆಸ್ತ್ರಿ ಬಾಪಾಯ್ಕ್ ಖಾಂವ್ಚಾಕ್ ಥೊಡೆ ಉಂಡೆ’.
ಹೆಂ ಪಿಂತುರಾಂನಿ ಮಾತ್ರ್ ನ್ಹಂಯ್, ಆಮ್ಚಾ ಚಾಲ್ತ್ಯಾ ಜಿಣ್ಯೆಂತ್ ಲಾಗು ಜಾಯ್ನಾಂಗಿ?
ಹ್ಯಾ ಸಂಸಾರಾಂತ್ ’ಚೂಕ್/ಅಪ್ರಾದ್’ ಮ್ಹಳ್ಳೊ ಚಡಾವತ್ ಜಾವ್ನ್ ಲಾಗು ಜಾಲಾ ವಾ ಜಾತಾ ತರ್ ತೊ ಅಸ್ಕತ್ಯಾಂಚೆರ್ ಮಾತ್ರ್, ಕಸಲಿಚ್ ವಶೀಲಾಯ್ ನಾತ್ಲೆಲ್ಯಾಂಕ್ ವಾ ಪ್ರಾಮಾಣಿಕಾಂತ್ ಮಾತ್ರ್. ವಶಿಲಾಯ್ ಆಸ್ಚಾಂಕ್, (ತಿ ವಶಿಲಾಯ್ ಕಸ್ಲೀಯ್ ಜಾಂವ್; ಜಾಂವ್ ಪಯ್ಶ್ಯಾಂಚಿ, ಜಾಂವ್ ಪದ್ವೆಚಿ, ಜಾಂವ್ ಸ್ಥಾನಾಚಿ ವಾ ಅಧಿಕಾರಾಚಿ) ಅಪ್ರಾದ್ ಕೆಲ್ಯಾರ್ಯೀ ಕಶೆಂ ಹ್ಯಾ ಆಪ್ರಾಧಾ ಥಾವ್ನ್ ಸುಟ್ಕಾ ಘೆಂವ್ಚಿ ಮ್ಹಳ್ಳೆಂ ಕಳಿತ್ ಆಸಾ. ಆನಿ ಅಸಲ್ಯಾಂಕ್ ರಾಕೊಂಕ್ ಆಮ್ಚೆ ಕಾನೂನ್ ರಾಕ್ವಲಿ ಮಜತ್ಯ್ ದರಬಸ್ತ್ ಕರ್ತಾತ್.
ಮ್ಹಜ್ಯಾ ಭುರ್ಗ್ಯಾಪಣಾರ್ ಆಮ್ಚಾ ಗಾಂವ್ಚೊ ಎಕ್ಲೊ ಬೊಣ್ಕೊ ಆಮ್ಚಾ ಗಾಂವಾಂತ್ ಮಾತ್ರ್ ನ್ಹಂಯ್, ಲಾಗ್ಶಿಲ್ಯಾ ಸುತ್ತೂರಾಂತ್ ಭೋವ್ ವಳ್ಕೆಚೊ - ಲೋಕ್ ತಾಚೆಂ ನಾಂವ್ ಆಯ್ಕತಾನಾಂಚ್ ಕಾಂಪ್ತಾಲೊ. ತಾಣೆಂ ಕೆಲ್ಲೆಂ ಸಾಧನ್ ಇತ್ಲೆಂಚ್, ಎಕಾ ಕೊಂಬ್ಯಾ ಕಾಟಾಂತ್ ತಾಚಾ ಸಾಂಗಾತಿನ್ ತಾಚೆಲಾಗಿಂ ವಾರ್ಜಿಕ್ ಕೆಲ್ಲ್ಯಾಕ್ ತಾಕಾ ಥಂಯ್ಚ್ ಚುರಿ ಘಾಲ್ನ್ ಲಗಾಡ್ ಕಾಡ್ಲ್ಲೊ. ಪೊಲಿಸ್ ಆಯಿಲ್ಲೆ, ಹಾಕಾ ಕುಡಾಯಿಲ್ಲೆಂ ತರ್ಯೀ ತಾಚ್ಯಾ ಕುಟ್ಮಾಚಾ ವಶೀಲಾಯೆನ್ ತೊ ಭಾಯ್ರ್ ಆಯಿಲ್ಲೊ. ಮೆಲ್ಲೊ ತೊ ಮೆಲೊ, ತಾಚ್ಯಾ ಲಾಚಾರ್ ವಿಧವ್ ಬಾಯ್ಲೆನ್ ಆನಿ ದೊಗಾಂ ಭುರ್ಗ್ಯಾಂನಿ ಕೊಣಾಲಾಗಿಂ ಝುಜ್ಚೆಂ? ಅಪ್ಲ್ಯಾ ದೀಸ್ಪಡ್ತ್ಯಾ ಗ್ರಾಸಾಕ್ ಝುಜ್ಚೆಂಗೀ ವಾ ಆಪ್ಲ್ಯಾ ಪತಿಚ್ಯಾ ಖುನಿಗಾರಾಸವೆಂ? ತ್ಯಾ ಶಿವಾಯ್ ತ್ಯಾ ಖುನಿಗಾರ್ ಬೊಂಟಾಚಾ ಕುಟ್ಮಾನ್ ತಾಂಕಾಂ ದುಡು ದೀವ್ನ್ ತಾಂಚೊ ತಾಳೊ ಬಂಧ್ ಕರಯ್ಲೊ.
ಪುಣ್ ತ್ಯಾಚ್ಚ್ ಆಮ್ಚಾ ಗಾಂವಾಂತ್ ವಾ ಗಾಂವ್ಚಾ ಸುತ್ತುರಾಂತ್ ಆಜ್ಕಾಲ್ ಚುರಿ ಘಾಲ್ಚಿ ಸೊಡ್, ರಸ್ತ್ಯಾಂನಿ ಕೊಣೆಂ ಕೊಣೆಂ ಖಾತರ್ನ್ ಘಾಲ್ಲೆ ಹಾತ್/ಪಾಂಯ್ ಸದಾಂಚಿಂ, ಆಮ್ಚಾ ಸಮಾಜೆಂತ್ ನಿಬಾಂಯ್ ಹಜಾರೊಂ ಆಸಾತ್. ಕೊಣಾಚಾ ಘರಾ ಲುಟ್ಕಾರ್ ರಿಗ್ಲೆ, ಕೊಣಾಚಿ ಖುನ್ ಜಾಲಿ, ಕೊಣಾಚಾ ಬಾಯ್ಲಾಂಚೆರ್, ಧುವಾಂಚೆರ್ ಅತ್ತ್ಯಾಚಾರ್...... ಕೊಣಾಚಿಂ ಘರಾಂ ಹುಲ್ಪಾಯ್ಲಿಂ ಕೊಣಾಚ್ಯೊ ಗಾಡ್ಯೊ ಹುಲ್ಪಾಯ್ಲ್ಯೊ, ಕೊಣಾಚಿಂ ಬಸ್ಸಾಂ ಪಿಟೊ ಕೆಲಿಂ.. ಬಂಧ್ ಕೆಲೆಂ....
ಆಮ್ಚಾ ಸಮಾಜೆಂತ್ ಜಿಯೆಂವ್ಚಾ ಹರ್ಯೆಕ್ಲ್ಯಾಕ್ ಏಕ್ ನ್ಹಂಯ್ ಏಕ್ ಧರ್ಮ್ ಆಸಾ. ಪುಣ್ ಸವಾಲ್ ಹೆಂ - ಖಂಚ್ಯಾ ಧರ್ಮಾಂತ್ ಹೆಂ ಶಿಕಯ್ಲಾಂ ವಾ ಶಿಕಯ್ತಾತ್ ಕೀ ಖುನ್ ಕರಾ, ಮಾರಾ, ಚೊರಾ, ಪುರಾ ಮ್ಹಣ್? ಆಮ್ಚೆಲಾಗಿಂ ಆಸಾ ಮನ್ಶಾಪಣ್??ದೆಖುನ್
ಜಾಯ್ಜಯ್ ಆಮ್ಚೆಲಾಗಿಂ ಇತ್ಲೆಂ ಸರ್ವ್ ಆಸೊನ್ಯ್ ಆಮಿ ರಿತೆ, ಆಮ್ಚಾ ಗಾಂವಾಂತ್ ಜಿಯೆವ್ನ್ ಆಸೊನ್ಯೀ ಆಮಿ ಪರ್ದೇಶಿ. ಆಮ್ಚಾ ಸಮಾಜೆಂತ್, ದಿಸಾನ್ದೀಸ್ ತುಟೊನ್ ವೆಚ್ಯಾ ಕುಟ್ಮಾಂಕ್ ಪರತ್ ಫುಟ್ ಹಾಡಂವ್ಚೆ ದರಬಸ್ತ್ ಆಸಾತ್, ಪುಣ್ ತಾಂಕಾಂ ಜೊಡುಂಕ್ ಕರ್ಚೆ ಮುಖೆಲಿ ಖಂಯ್ ಆಸಾತ್? ಕಿತೆಂ ಕರ್ತಾತ್? ಕೊಣೆಂ ಹೆಂ ಕರಿಜಾಯ್? ಕಿತ್ಯಾಕ್ ಕರಿಜಾಯ್? ಕಶೆಂ ಕರಿಜಾಯ್? ಕೆದ್ನಾಂ ಕರಿಜಾಯ್? ಸವಾಲಾಂಚಿ ಶಿಂಖಳ್ ಲಾಂಬಾತ್ತ್ ವೆತಾ.
ಆಮ್ಚಾ ಸಮಾಜೆಕ್ ಉಜೊ ಘಾಲ್, ಆಮ್ಚಾ ಭಾಗೆವಂತ್/ಕುರ್ಪೆವಂತ್ ಕ್ರಿಸ್ತಾಂವ್ ಸಮಾಜೆಕ್ ಧರಾ; ಕೊಣ್ ಆಸಾತ್? ಆಮ್ಚೆ ದೈವಿಕ್ ಮುಖೆಲಿ ಭಾಂದ್ಪಾಂ ಭಾಂದ್ಚಿಂ ನಿಬಾಂ ಸೊಧುನ್ ಆಸಾತ್. ಭಾಂದ್ಪಾಂ ಭಾಂದ್ಚ್ಯಾಧಿಂ ಫಿರ್ಗಜ್ ಕುಟ್ಮಾಂ ಭಾಂದ್ಚಿಂ ಭೋವ್ ಗರ್ಜೆಚೆಂ ಮ್ಹಳ್ಳೆಂ ಹಾಂಚ್ಯಾ ಕಟ್ಟ್ಯಾಕ್ ಕಿತ್ಯಾಕ್ ರಿಗಾನಾ?
ಆಯ್ಲೆವಾರ್ ಎಕಾ ಫಿರ್ಗಜೆಚ್ಯಾ ಪಾದ್ರ್ಯಾಬಾನ್ ಏಕ್ ವಿನತಿ ಧಾಡ್ಲಿ, ತಾಂತುಂ ತ್ಯಾ ದುಬ್ಳ್ಯಾ ಫಿರ್ಗಜೆಚಿ ಮಟ್ವಿ ವರ್ದಿ ಆಸ್ಲ್ಲಿ; ಆಮ್ಚಾ ಫಿರ್ಗಜೆಂತ್ ಇತ್ಲಿಂ ಭಾವಾರ್ಥಿ ಕುಟ್ಮಾಂ ಜಿಯೆತಾತ್, ಹಾಂತುಂ ಇತ್ಲ್ಯಾ ಕುಟ್ಮಾಚ್ಯಾಂಚಾ ಘರಾಂನಿ ಖಾಕುಸ್ ನಾಂತ್, ಇತ್ಲಿಂ ಘರಾಂ ಪರ್ತೊಂವ್ಚಾ ಸ್ಥಿತೆರ್ ಆಸಾತ್, ಇತ್ಲೆಶ್ಯಾ ಭುರ್ಗ್ಯಾಂಕ್ ಶಿಕ್ಪಾಚಿ ಗತ್ ನಾ, ಇತ್ಲೆಶ್ಯಾ ಭುರ್ಗ್ಯಾಂಕ್ ಪಿಡಾ ಆಸಾ ವಖ್ತಾತ್ ಗತ್ ನಾ, ಇತ್ಲೆಶಿಂ ತರ್ನಾಟಿಂ ಬೆಕಾರ್ ಆಸಾತ್.. ಭೋವ್ಶ ಥೊಡೆ ಯಾಜಕ್ ತರ್ಯೀ ಅಪ್ಲ್ಯಾ ಭೆಸಾಚಿ ಜಾವಾಬ್ಧಾರಿ ಬರ್ಯಾನ್ ಸಮ್ಜತಾತ್. ಪುಣ್ ಅಸಲೆ ಆಸಾತ್ ಖಂಯ್ಚರ್ ಮ್ಹಳ್ಳೆಂ ವ್ಹಡ್ಲೆಂ ಸವಾಲ್.
ಥೊಡ್ಯಾ ವರ್ಸಾಧಿಂ ಕೆದಿಂಚ್ ದೆಖೊಂಕ್ ನಾತ್ಲ್ಲ್ಯಾ ಎಕಾ ಮಾಲ್ಘಡ್ಯಾ ಪಾದ್ರ್ಯಾಬಾನ್ ಏಕ್ ವಿನತಿ ಧಾಡ್ಲಿ, ಎಕಾ ಭೋವ್ ದುಬ್ಳ್ಯಾ ಗಾಂವಾಂತ್ ತೊ ಅನಾಥ್ ಭುರ್ಗ್ಯಾಂಕ್ ಜಮೊ ಕರ್ನ್ ತಾಂಕಾಂ ಶಿಕಾಪ್ ದಿತಾ, ಕಠೀಣ್ ದುಬ್ಳಿಂ, ಪಿಡೆಂತ್ ಆಸ್ಚಾಂಕ್ ತೊ ಖರೊಚ್ ಏಕ್ ದೇವ್ ಜಾಲಾ. ನತಾಲಾಂ ಫೆಸ್ತಾಚಾ ಸಂದರ್ಭಾರ್ ತ್ಯಾ ಭುರ್ಗ್ಯಾಂಕ್ ಏಕ್ ಜೊಡಿ ನವೆಂ ವಸ್ತುರ್ ಶಿವಂವ್ಚಾಕ್, ತಾಂಕಾಂ ಇಲ್ಲಿಂ ವಕ್ತಾಂ ಮೊಲಾಕ್ ಘೆಂವ್ಚಾಕ್, ತಾಂತ್ಲ್ಯಾ ಕೊಣಾಕ್ ಶಿಕ್ಶಣ್ ಲಾಭ್ಲಾಂ ತಾಂಕಾಂ ಅಪ್ಲಿ ಜಿಣಿ ಸುರು ಕರುಂಕ್ ಕಾಂಯ್ ಮಜತ್ ಕರ್ಚ್ಯಾ ಇರಾದ್ಯಾನ್ ಆಯಿಲ್ಲಿ ತಿ ವಿನತಿ ವಾಚ್ತಾಂ ದೊಳ್ಯಾಂನಿ ದುಃಖಾಂ ದೆಂವ್ತಾತ್. ಆಸಾತ್! ಆಮ್ಚಾ ಸಮಾಜೆಂತ್ ಭೋವ್ ಥೊಡೆ ತರ್ಯ್ ಅಸಲೆ ಮುಖೆಲಿ ಆಸಾತ್, ಪುಣ್ ಹಾಂಕಾಂ ಚಡ್ತಾವ್ ವಳ್ಕಾನಾ, ಕಿತ್ಯಾಕ್ ಹೆ ಬಿಲ್ಡರ್ ನ್ಹಂಯ್, ಕಾರಾಂನಿ ಭಂವಾನಾಂತ್, ಪತ್ರಾಂನಿ ಅಪ್ಲೆಂ ವ್ಹಡ್ಪಣ್ ಗಾಜಯ್ನಾಂತ್, ಹಾಂಕಾಂ ಭಡ್ವೆ-ಶಿಸ್ ನಾಂತ್, ಹಾಂಚೆಲಾಗಿಂ ಮೊಚೆ ಸೊಡ್, ನೆಸೊಂಕ್ ಏಕ್ ಜೊಡಿ ಬರ್ಯೊ ವ್ಹಾಣೊಯ್ ಆಸ್ಚ್ಯೊನಾಂತ್. ಕಿತೆಂಯ್ ಆಸಾ ತರ್ - ಭರ್ಪೂರ್ ಮನ್ಶ್ಯಾ ಮೋಗ್ ಆನಿ ದಯಾ.
ಧರ್ಮ್ ಮ್ಹಳ್ಯಾರ್ ಪುಲ್ಪುತ್ರಾರ್ ಚಡೊನ್ ’ಎಕಾಮೆಕಾಚೊ ಮೋಗ್ ಕರಾ, ತುಮ್ಚ್ಯಾ ದುಸ್ಮಾನಾಂಕ್ ಭಗ್ಸಿಯಾ’ ಮ್ಹಣ್ ತಾಳೊ ಪಿಂಜುನ್ ಬೊಬಾಟ್ಚೆಂ ನ್ಹಂಯ್. ಪಯ್ಲೆಂ ತಿ ಜಿಣಿ ಜಿಯೆವ್ನ್ ಧಾಖಂವ್ಚಿ. ಮೊರ್ನ್ ಪಾವ್ಲ್ಲ್ಯಾ ಫಿರ್ಗಜೆಚ್ಯಾ ಎಕಾ ದುಬ್ಳ್ಯಾಕ್ ಪುರುಂಕ್ ವೆಚ್ಯಾಧಿಂ ಅನ್ವಲ್ ದಿಯಾ ಆನಿ ಪುರಾ ಮ್ಹಣ್ಚೆಂ ನ್ಹಂಯ್, ಚೂಕ್ ಕೆಲ್ಲ್ಯಾಂಕ್ ಪೊಲಿಸ್ ಶಿಕ್ಶಾ ಲಾಭಂವ್ನ್ ವಾ ಕೋರ್ಟಾಚೆಂ ನೋಟಿಸ್ ಧಾಡ್ನ್ ನೀತ್ ಕರ್ಚಿ ನ್ಹಂಯ್. ಅಸಲೆ ಮುಖೆಲಿ ಆಸ್ತಿತ್ ತರ್ ಮಾತ್ರ್ ಆಮ್ಚೆ ಪಾಟ್ಲಾವ್ದಾರಿ ಬರೆ ಜಾತಿತ್.
ಪುಣ್ ತಾಚ್ಯಾಧಿಂ ಮ್ಹಾಕಾ ಚಡುಣೆಂ ಸತ್ರಾ ವರ್ಸಾಧಿಂ ’ಆಮ್ಚೊ ಯುವಕ್’ ಪತ್ರಾಂತ್ ವಾಚ್ಪ್ಯಾಂಚಾ ಸವಾಲಾಂಕ್ ಜಾಪಿ ದಿಂವ್ಚ್ಯಾ ಎಚ್. ಆರ್. ಆಳ್ವನ್ ದಿಲ್ಲಿ ಹಿ ಜಾಪ್ ಉಡಾಸಾಕ್ ಯೆತಾ;ಸ:
ಆಮ್ಚಾ ಫಿರ್ಗಜೆಚ್ಯಾ ಹರ್ಯೆಕಾ ಬರ್ಯಾ ಕಾಮಾಂನಿ ಪಾದ್ರಿ ಆಡ್ ಪಾಂಯ್ ದಿತಾ ಕಿತ್ಯಾಕ್?
ಎಚ್.ಆರ್.ಆಳ್ವಚಿ ಜಾಪ್: ತೊ ಆಡ್ ದಿಲ್ಲೊ ಪಾಂಯ್ ಮೊಡ್ಚೆ ಆಮ್ಚಾ ಸಮಾಜೆಂತ್ ನಾಂತ್ ದೆಖುನ್.
ಭೋವ್ ಅಪುರ್ಭಾಯೆಚಿ ಜಾಪ್. ಆಮ್ಚಾ ಸಮಾಜೆಂತ್ ಪಾದ್ರಿಂಚೆರ್ ಕಸಲೊಯ್ ಅನ್ನ್ಯಾಯ್ ಜಾಲೊ ತರ್, ಭಕ್ತ್ ಜಮ್ಲೆ ಪುರ್ಶಾಂವಾಕ್ - ಅರೆ ಭಾವಾ, ಆಮ್ಚಾ ಭಯ್ಣ್ಯಾಂಕ್, ಆಮ್ಚಾ ಬಾಯ್ಲಾಂಕ್, ಆಮ್ಚಾ ಲೊಕಾಂಚೆರ್ ಕೊಣೆಂಯ್ ಮಾರ್ಲೆಂ, ಚಿರ್ಲೆಂ ವಾ ಪುರ್ಲೆಂ ತರ್ - ಪಾದ್ರ್ಯಾಬಾಂಚೊ ಪುರ್ಶಾಂವ್ ಖಂಯ್ ತರ್ಯೀ ಜಾಲ್ಲೊ ತುಮಿ ಆಯ್ಕಲಾ? ಹೊ ಆಮ್ಚೊ ಧರ್ಮ್?ಆಯ್ಲೆವಾರ್
ಮ್ಹಜೆಸವೆಂ ಸೆಮಿನರಿಕ್ ವಚೊನ್ ಯಾಜಕ್ ಜಾಲ್ಲೊ ಮ್ಹಜೊ ಮಿತ್ರ್ ಯಾಜಕ್ ಮ್ಹಾಕಾ ಅಶೆಂ ವಿಚಾರಿಲಾಗ್ಲೊ; "ವಲ್ಲಿ - ತುಜ್ಯಾ ಚಡ್ತಾವ್ ಕಾಣ್ಯಾಂನಿ ಪಾದ್ರ್ಯಾಬಾಂಕ್ ಏಕ್ ಕೂಟ್ ಜರೂರ್ ಆಸಾ, ಕಿತ್ಯಾಕ್?"
ಹಾವೆಂ ತಾಕಾ ಮೊಗಾನ್ ಜಾಪ್ ದಿಲಿ; "ಮ್ಹಾಕಾ ದೊಂಗೊಟ್ ಖಂಯ್ಚರ್ಯ್ ದಿಸಾನಾಂಮೂ?"
ಹಾಂವ್ ಪಾದ್ರಿಂಕ್ ಭಿಲ್ಕುಲ್ ವಿರೋಧ್ ನ್ಹಂಯ್, ಪುಣ್ ಪಾದ್ರಿಚೊ ವೇಸ್ ಘಾಲ್ನ್ ಲೊಕಾಂಕ್ ಶೋಷಿತ್ ಕರ್ಚ್ಯಾಂಕ್ ದೇವ್ ಮ್ಹಣ್ ಮಾಂಧ್ಚಾಂತ್ಲೊ ಹಾಂವ್ ಭಿಲ್ಕುಲ್ ನ್ಹಂಯ್.
ದಿವ್ಳಾಚಾ ಪಾಟ್ಲ್ಯಾನ್ ಆಸ್ಚೊ ಗೂ ಪಳೆವ್ನ್ ಎಕ್ಲ್ಯಾನ್ ವಿಚಾರ್ಲೆಂ ಕಂಯ್ "ಹೊ ಕೊಣಾಚೊ ಗೂ?"
ದುಸ್ರೊ ಜಾಪ್ ದಿತಾ ಕಂಯ್ "ಗೂ ಮ್ಹಣಾನಾಕಾರೆ, ಭೊಟ್ ಮಾಮ್ ಹಾಗ್ಲ್ಲೊ ಜಾಂವ್ಕ್ ಪುರೊ"ಮ್ಹಳ್ಯಾರ್
ಹಾಣಿಂ ಹಾಗ್ಲ್ಲೊ ಗೂ ನ್ಹಂಯ್? ಪ್ರಸಾದ್?
ಪ್ರಸಾದ್ ಮ್ಹಣ್ಚೆಯ್ ಜಾಯ್ತೆ ಆಸಾತ್. ಆಸೊಂದಿ, ಮ್ಹಣೊಂದಿ ಆನಿ ತೊ ಪ್ರಸಾದ್ ಸೆಂವ್ದಿತ್. ಪುಣ್ ಮ್ಹಾಕಾ ತೊ ಪ್ರಸಾದ್ ನಾಕಾ.
ವೆಚ್ಯಾಧಿಂ ಫಕತ್ತ್ ಏಕ್ ಸವಾಲ್ ತುಕಾ;"ತುಂ
ಹಾಕಾ ಪ್ರಸಾದ್ ಮ್ಹಣ್ಚ್ಯಾಂತ್ಲೊಗೀ?"
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
