ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 41. ವಾಲ್
ಸುನಿಲ್ ಫೆರ್ನಾಂಡಿಸ್: ಪಾಟ್ಲ್ಯಾ ಪಾಂಚ್-ಸ ವರ್ಸಾಂನಿ ಕೊಂಕ್ಣೆಂತ್ ಉದೆಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಕಾಣ್ಯಾಂಗಾರಾಂ ಪಯ್ಕಿಂತ್ ಮ್ಹಾಕಾ ಹೊ ಉಟೊನ್ ದಿಸ್ತಾ. ಸಾಮಾಜಿಕ್ ಸಂಗ್ತ್ಯಾಂಕ್ ವೊರಾವ್ನ್ ಪಳೆಂವ್ಚೆಂ, ತುಕ್ಚೆಂ ತಶೆಂಚ್ ಮಾಪ್ಚೆಂ ಚಿಂತಾಪ್ ಆಸ್ಚೊ ಹೊ ಪ್ರೇತನ್ ಕರಿತ್ ತರ್ ಅಪ್ಲಿಚ್ ಶೈಲಿ ರುತಾಂ ಕರ್ಚಾಂತ್ ಜಯ್ತೆವಂತ್ ಜಾತಲೊ. ಹಾಣೆಂ ಬರಯಿಲ್ಲ್ಯೊ ಕಾಣ್ಯೊ ಥೊಡ್ಯೊಚ್ ತರ್ಯ್ ಎಕೆಕಾ ಕಾಣ್ಯಾಂನಿ ಜೀವ್ ಭರ್ಚಿ ಕಲಾ ಬರ್ಯಾನ್ ಜಾಣಾಂ ಆಸಾ ಮ್ಹಣ್ಚಾಕ್ ಹಿ ಕಾಣಿ ಗೊವಾಯ್ ದೀತ್.
ಸುನಿಲ್ ಫೆರ್ನಾಂಡಿಸ್
"ಪಿಶ್ಯಾಕ್ ದುಸ್ರೆಂ ಕಾಮ್ ನಾ .........",
" ಮ್ಹಾತಾರೊ...ಸಂಸಾರ್ ನಿತಳ್ ಕರುಂಕ್ ಭಾಯ್ರ್ ಸರ್ಲಾ...........", ಸಾಂತೆಂತ್ ಹೆವ್ಶಿನ್ ತೆವ್ಶಿನ್ ಪಾಶಾರ್ ಜಾತೆಲಿಂ ಕಿತೆಂ ನಾ ಕಿತೆಂ ಸಾಂಗೊನ್ ಹಾಸೊನ್ ವೆತಾಲಿಂ. ಪುಣ್ ಹಾಂವ್ ತಾಂಚಿ ಪರ್ವಾ ಕರ್ನಾಸ್ತಾನಾ, ಕುಡಿಕ್ ತಾಂಕಾನಾ ತರಿ ಗಾಂವ್ಚಾ ಸಾಂತೆಂತ್ ಆಸ್ಚ್ಯಾ ವಾಡಾ ರುಕಾ ಮುಳಾಂತ್ ಕಿರ್ಲೊನ್ ವಾಡಾ ರುಕಾಚೊ ಆಸ್ರೊ ಸೊಧುನ್ ಆಸ್ಚಾ ವಾಲಿಂಕ್ ಎಕೆಕ್ ಜಾವ್ನ್ ಪಾಳಾಂ ಸಯ್ತ್ ಹುಂಮ್ಟೊನ್ ಆಸ್ಲ್ಲೊಂ. ಮ್ಹಾಕಾ ನಾಕಾಸ್ಲಿ ಹಿ ವಾಲ್ ಹ್ಯಾ ವಾಡಾ ರುಕಾಚೊ ಆಸ್ರೊ ಘೆವ್ನ್ ವಯ್ರ್ ವೆಚಿ. ತಶೆಂ ಮ್ಹಣ್ ಮ್ಹಾಕಾ ತುಮಿಂ ಮೊಸ್ರಿ ಮ್ಹಣ್ ವೊಲಾಯ್ನಾಕಾತ್. ಮ್ಹಜಾ ತಸ್ಲ್ಯಾ ಸಬಾರ್ ನಿರ್ಗತಿಕಾಂಕ್, ಸುಕ್ಣಾಂಕ್ ಆಸ್ರೊ ದೀವ್ನ್ ಆಸ್ಚಾ ಹ್ಯಾ ರುಕಾಚಿ ಜತನ್ ಘೆಂವ್ಚಿ ಮ್ಹಜೊ ಕಾಯ್ದೊ ಜಾವ್ನ್ ಆಸಾ. ಜರ್ ಹ್ಯಾ ವಾಲಿಂಕ್ ಹಾಂವ್ ಹುಂಮ್ಟೊನ್ ಉಡೈನಾ, ತಿ ಎಕ್ ದೀಸ್ ಹ್ಯಾ ರುಕಾಚೆರ್ ಚಡೊನ್ ರುಕಾಚೆ ಅಂತ್ ಕರ್ತಾ. ಮ್ಹಾಕಾ ಜಾಲ್ಲೊ ಅನ್ಯಾಯ್ ಹ್ಯಾ ರುಕಾಕ್ ಜಾಂವ್ಕ್ ನಜೊ.
ಪೆಂಟೆ ಸಾಲಾಂತ್ ಲೋಕ್ ತೊರ್ಣಾಂ ಬಾಂದುನ್ ಆಸ್ಲ್ಲೆ. ಲಾಗ್ಶಿಲ್ಯಾ ಉಗ್ತ್ಯಾ ಮೈದಾನಾರ್ ವ್ಹಡ್ಲೊ ಮಾಟೊವ್ ಘಾಲ್ಲ್ಲೊ ದಿಸ್ತಾಲೊ. ಪೊಲಿಸಾಂಚಿ ಜೀಪಾಂ ಥಂಯ್ ಹಾಂಗಾ ಘುವೊನ್ ಆಸ್ಲ್ಲಿಂ. ರಸ್ತ್ಯಾ ಕಾಮಾಂಚೆ ರಸ್ತ್ಯಾಚೆ ಫೊಂಡ್ ಭರ್ನ್, ಚರಂಡೆನಿ ಭರ್ಲರೊ ಕಸ್ತೊಳ್, ಚಿಕೊಲ್ ಕಾಡ್ನ್ ನಿತಳ್ ಕರ್ತಾಲೆ. ಹಾಂವೆ ಎಕ್ ದೊಗಾಂ ಕಡೆಂ ವಿಚಾರ್ಲೆ ಹೆಂ ಕಿತ್ಯಾಕ್ಗೀ ಮ್ಹಣೊನ್. ತೆ ಮ್ಹಾಕಾ ಪಳೆವ್ನ್ ತೊಂಡ್ ತಿರ್ಪುನ್ ಗೆಲೆ. ಹ್ಯಾ ಪಿಶ್ಯಾ ಕಡೆಂ ಕಿತೆಂ ಉಲಂವ್ಚೆಗೀ ಮ್ಹಣ್ ಚಿಂತುನ್ ಜಾವ್ಯೆತ್ !. ಎಕ್ಲ್ಯಾ ಪುನೆಕೆಲ್ಲ್ಯಾನ್ ಮ್ಹಾಕಾ ಜಾಪ್ ದಿಲಿ "ಫಾಲ್ಯಾಂ ಸಾವ್ಕಾರ್ ಹೆಕ್ಟರಾಕ್ ಸನ್ಮಾನ್ ಆಸಾ. ತ್ಯಾ ಕಾರ್ಯಾಕ್ ರಾಜ್ಯಾಚೊ ಮುಖೆಲ್ಮಂತ್ರಿ, ಮೊಠಾಚೊ ಸೊಮ್ಗೊಳ್, ಕಿರಿಶ್ಚನಾಂಚೊ ಗುರ್ಗೊಳ್, ಸಾಯ್ಬಾಂಚೊ ಹಾಜ್ಜಿ ಸಕ್ಕಡ್ ಯೆಂವ್ಚೆ ಆಸಾತ್. ಗಾಂವ್ಚಾ ಸಕ್ಕಡ್ ಲೊಕಾಂಕ್ ಧರ್ಮಾಂಚೆ ಜೆವಾಣ್ ಆಸಾ". ಮ್ಹಣ್ ಸಾಂಗೊನ್ ಚಲ್ತಚ್ ರಾವ್ಲೊ.
ನಾವಾಡ್ದಿಕ್ ಉದ್ಯಮಿ, ಸಮಾಜ್ ಸುಧಾರಕ್, ಉದಾರ್ ದಾನಿ, ದುಬ್ಳ್ಯಾಂಚೊ ಆಧಾರ್, ಧಾರ್ಮಿಕ್ ವ್ಯಕ್ತಿಂಕ್, ರಾಜಕಾರಣಿಂಕ್ ಲಾಕ್ಶಿಲೊ, ಸಬಾರ್ ಸಂಘ್ ಸಂಸ್ಥ್ಯಾಂಚೊ ಅಧ್ಯಕ್ಷ್, ಸಮಾಜೆಚೊ ಗಣ್ಯ್ ವ್ಯಕ್ತಿ ಮಾನೆಸ್ತ್ ಹೆಕ್ಟರ್ ಬ್ರಗಾಂಜಾ, ತೊಚ್ ತೊ ವ್ಯಕ್ತಿ ಹಾಂವೆ ಆಸ್ರೊ ದಿಲ್ಲಿ ವಾಲ್. ಸಮಾಜೆಂತ್ ಎಕ್ ಮಾನಾಚೊ ವ್ಯಕ್ತಿ. ರಾಜಕಾರಣಿಂಕ್ ಲಾಗ್ಶಿಲೊ ಕಿತ್ಯಾಕ್ ತೊ ತಾಂಚಿ ಪೊಟಾಂ ಭರ್ತಾಲೊ. ಧಾರ್ಮಿಕ್ ಮುಖೆಲ್ಯಾಂಕ್ ಮೊಗಾಚೊ ಕಿತ್ಯಾಕ್ ದಿವ್ಳಾಂಕ್, ಇಗರ್ಜೆಂಕ್, ಪಳ್ಳೆಂಕ್ ಮ್ಹಣೊನ್ ಪಯ್ಶೆ ಉದ್ಕಾ ಬಾಶೆನ್ ವೊತ್ತಾಲೊ. ಫಕತ್ ಹಾಂವ್ ಒಳ್ಕಾತಾಲೊ ಹೊ ಹೆಕ್ಟರ್ ಬ್ರಗಾಂಜಾ ಕೊಣ್ ಮ್ಹಣೊನ್ ಆನಿ ತೊ ಕಿತೆಂ ಮ್ಹಣೊನ್ ಫಕತ್ ತಾಚಾ ಘರಾಂತ್, ಕಾರ್ಖಾನ್ಯಾಂತ್ ಕಾಂ ಕರ್ಚೆ ಕಾಮೆಲಿ ಜಾಣಾಸ್ಲೆ. ಪುಣ್ ಸಮಾಜೆಚಾ ದಿಶ್ಟಿಕ್ ತೊ ಎಕ್ ಮಾನಾಂಚೊ ವ್ಯಕ್ತಿ ಜಾವ್ನ್ ದಿಸ್ತಾಲೊ.
ಆಜೀಕ್ ತೆತ್ತೀಸ್ ವರ್ಸಾಂ ಆದ್ಲಿ ಗಜಾಲ್.............
ಕಾಜಾರ್ ಜಾವ್ನ್ ಪಂಚ್ವೀಸ್ ಪಾವ್ಸಾಳೆ ಉತರ್ಲ್ಯಾರೀ ಆಮ್ಚ್ಯಾ ಕಾಜಾರಿ ಜಿವಿತಾಚಾ ವೊಡ್ತಾಂತ್ ಏಕ್ ಫಳ್ ಸಯ್ತ್ ದೆವಾನ್ ಫಾವೊ ಕರುಂಕ್ ನಾತ್ಲ್ಲೆಂ. ಗ್ರೇಸ್ತ್ಕಾಯ್, ಹಿತಾಲ್, ಶೆತಾಂ ಭಾಟಾಂ, ಬೊಂಗ್ಲೊ, ಚಾಕೊರ್ ನೌಕರ್, ಸಕ್ಕಡ್ ಆಸ್ಲ್ಯಾರೀ ಘರಾಂತ್ ಭುರ್ಗ್ಯಾಚೆ ಉಣೆಪಣ್ ಉಟೊನ್ ದಿಸ್ತಾಲೆಂ. ಬಾಯ್ಲ್ ಮ್ಹಜಿ ಹ್ಯಾಚ್ ಖಂತಿನ್ ದಿಸಾನ್ ದೀಸ್ ಕರ್ಗೊನ್ ವೆತಾಲಿ. ಘರಾಂತ್ ಸಂತೊಸ್ ನಾತ್ಲ್ಲೊ. ಮುಕಾರ್ ಹ್ಯಾ ಘರಾಚೊ, ಆಸ್ತಿಚೊ ವಾರಿಸ್ ಕೋಣ್ಗಾಯ್ ಮ್ಹಳ್ಳೊ ಹುಸ್ಕೊ ಮ್ಹಜಾ ಕಾಳ್ಜಾಂತ್ ಕಾಂತಾಯ್ತಾಲೊ.
ತ್ಯಾ ಎಕಾ ಸಕಾಳಿಂ ಸದಾಂಚೆಪರಿ ಘರ್ಚಾ ವೊಡ್ತಾಂತ್ ಬಸೊನ್ ಹಾಂವ್ ದಿಸಾಳೆಂ ಪತ್ರ್ ವಾಚೊನ್ ಆಸ್ಲ್ಲೊಂ. ಘರ್ಚೊ ಚಾಕೊರ್ ಧಾವೊನ್ ಯೇವ್ನ್ ಖರ್ಶೇವ್ನ್ ಖರ್ಶೇವ್ನ್ ಮ್ಹಣೊಂಕ್ ಲಾಗ್ಲೊ
"ಧನ್ಯಾ... ಕಾರಾಂ ರಾವೊಂವ್ಚ್ಯಾ ಕುಡಾ ಬಗ್ಲೆನ್ ಕೊಣಾಂಚೆಗಿ ಎಕ್ ಲ್ಹಾನ್ಶೆ ಬಾಳ್ಶೆ ಆಸಾ !". ಘಡ್ಯೇನ್ ಚಾಕ್ರಾ ಸಂಗಿ ಹಾಂವ್ ಥಂಯ್ ಪಾವ್ಲೊಂ. ಲ್ಹಾನ್ ಜಲ್ಮೊನ್ ಎಕಾ ದಿಸಾ
ಭಿತರ್ಲೆಂ ಬಾಳ್ಶೆಂ ಜಾವ್ಯೆತ್ ಥಂಡಾನ್ ಕಡ್ಕಡ್ತಾಲೆಂ. ಘರ್ಚೆಂ ಸಕ್ಕಡ್ ಚಾಕರ್ ಥಂಯ್ಸರ್ ಜಮ್ಲ್ಲೆ. ಮ್ಹಜಾ ಪತಿಣೆನ್ ತ್ಯಾ ಬಾಳ್ಶಾಕ್ ಆಪ್ಲ್ಯಾ ವೆಂಗೆಂತ್ ಘೆತ್ಲೆಂಚ್. ತಿಚಾ ಮುಖಾಮಳಾರ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಯೆವ್ಶಿನ್ ನಾತ್ಲ್ಲೊ ತೊ ಸಂತೊಸ್ ಆಜ್ ಮ್ಹಾಕಾ ಪಳೆಂವ್ಕ್ ಮೆಳ್ಳೊ.
ವೇಳ್ ಕರ್ನಾಸ್ತಾಂ ಹಾವೆಂ ಪೊಲಿಸಾಂಕ್ ಖಬರ್ ಕಳಯ್ಲಿ ಆನಿ ಬಾಳ್ಶಾಚಿ ಭಲಾಯ್ಕಿ ತಪಾಸಣಿ ಕರುಂಕ್ ದಾಕ್ತೆರಾಕ್ ಹಾಡಯ್ಲೆಂ. ದೀಸ್ ಪಾಶಾರ್ ಜಾಲೆ, ಹಪ್ತೊ ಗೆಲೊ, ಹಪ್ತೊ ಮಹಿನ್ಯಾನ್ ಬದಲ್ಲೊ ಜಾಲ್ಯಾರೀ ಬಾಳ್ಶಾಚೆ ವಾರಿಸ್ದಾರ್ ಕೊಣಿಂ ಯೇಂವ್ಕ್ ನಾತ್ಲ್ಲ್ಯಾ ಪತ್ರಾನಿಂ ಇಸ್ತಿಹಾರಾಂ ಪ್ರಗಟ್ ಜಾಲಿಂ, ಪೊಲಿಸಾಂನಿ ಥಂಯ್ ಹಾಂಯ್ ಘುಟ್ ಕಾಟ್ಲೊ ಜಾಲ್ಯಾರಿ ಬಾಳ್ಶೆ ಕೊಣಾಂಚೆ ಮ್ಹಣೊನ್ ಸೊದುನ್ ಕಾಡುಂಕ್ ತಾಂಚಾನ್ ಜಾಂವ್ಕ್ನಾ. ಕೊಣಾಂಕ್ ನಾಕಾಸ್ಲೆ ಬಾಳ್ಶೆ ಆಸ್ತಲೆಂ ಮ್ಹಳ್ಳೊ ನಿರ್ದಾರ್ ಪೊಲಿಸಾನಿ ಘೆತ್ಲೊ. ಭುರ್ಗ್ಯಾಕ್ ಕಿತೆಂ ಕರ್ಚೆಂ ? ಮ್ಹಳ್ಳೆ ಸವಾಲ್ ಸಕ್ಕಡಾಂ ಥಂಯ್ ಉದೆಲೆಂ. ಎದೊಳ್ ಮ್ಹಣಾಸರ್ ಮ್ಹಜಾ ಪತಿಣೆಚಾ ಜತ್ನೆನ್ ಬಾಳ್ಶೆ ವಾಡೊನ್ ಯೆತಾಲೆಂ. ತಿ ತಾಕಾ ಆಪ್ಲ್ಯಾಚ್ ಬಾಳ್ಶಾಪರಿ ಪೋಸ್ ಕರ್ತಾಲಿ. ತಿಚೆ ಮುಖಾಮಳಾರ್ ಸಂತೊಸ್ ಉಟೊನ್ ದಿಸ್ತಾಲೊ.
"ಬಾಳ್ಶೆಂ ಕೊಣಾಂಕ್ ನಾಕಾ ತರ್ ಆಮಿ ತಾಕಾ ಪೊಸ್ಕೆಂ ಘೆವ್ಯಾಂ ನ್ಹಂಯ್ವೇ ?" ಎಕ್ ದೀಸ್ ಪತಿಣ್ ಮ್ಹಜಿ ಕಾವ್ಜೆವ್ನ್ಶೆ ಮ್ಹಜಾ ಲಾಗಿಂ ಮ್ಹಣೊಂಕ್ ಲಾಗ್ಲಿ. ವ್ಹಯ್ ಪತಿಣೆಚಾ ಮನಾಂತ್ ಕಿತೆಂ ಸೊಸ್ತಾಲೆ ತೆಂಚ್ ಮ್ಹಜಾ ಮತಿಂತ್ಯಿ ಸೊಸ್ತಾಲೆ. ವ್ಹಯ್ ಬಾಳ್ಶಾಕ್ ಕೊಣಾಂಚಿ ಗತ್ ನಾತ್ಲ್ಲಿ. ಆಮ್ಕಾಂಯ್ ಎಕ್ ಬಾಳ್ಶಾಚಿ ಗರ್ಜ್ ಆಸ್ಲ್ಲಿ. ಹಾಂವೆ ಸಂತೊಸಾನ್ ಪಯ್ಲ್ಯಾ ಪಾವ್ಟಿಂ ಪತಿಣೆಚ್ಯಾ ಹಾತಾ ಥಾವ್ನ್ ತ್ಯಾ ಬಾಳ್ಶಾಕ್ ಮ್ಹಜಾ ಹಾತಾಂನಿ ಘೆತ್ಲೆಂ, ಕೀಸ್ ದಿಲೆ, ಕೊಂಗಾಟೊ ಕೆಲೊ. ಎಕಾ ನಮುನೆಂಚೊ ಉಲ್ಲಾಸ್ ಭೊಗ್ಲೊ. ಮತಿಂತ್ ಕಾಂತೊಂವ್ಚಿ ತಿ ಬೆಜಾರಾಯ್ ಪಯ್ಸ್ ಗೆಲ್ಲ್ಯಾ ಬಾಶೆನ್ ಜಾಲೆಂ. ಬಾಳ್ಶಾ ಸಂಗಿ ಹಾಂವ್ಯಿ ಬಾಳ್ಶೆ ಜಾಲೊಂ. ತಾಕಾ ಖೆಳೊಂವ್ಕ್ ಲಾಗ್ಲೊಂ, ತಾಚಾ ಸಂಗಿ ಗೊದ್ದೆ ಗೊದ್ದೆ ಉತ್ರಾಂನಿ ಉಲೊಂವ್ಕ್ ಲಾಗ್ಲೊಂ. ಮ್ಹಾಕಾಂಚ್ ಹಾಂವ್ ವಿಸರ್ಲೊ. ಮ್ಹಜಿ ಮತ್ ಹಾಳು ಜಾಲ್ಲಿ.
ಬಾಳ್ಶಾಕ್ ಪೊಸ್ಕೆಂ ಘೆಂವ್ಕ್ ಜಾಯ್ ಜಾಲ್ಲಿ ದಸ್ತಾವೆಜಾ ಆಮಿಂ ಆಮ್ಚ್ಯಾ ವಕೀಲಾಕ್ ಸಾಂಗೊನ್ ಕರಯ್ಲಿ. ವ್ಹಯ್ ಕಾನುನಾ ಪರ್ಮಾಣೆ ಆಮಿ ತ್ಯಾ ಬಾಳ್ಶಾಚಿ ವಾರಿಸ್ದಾರಾಂ ಜಾಲ್ಯಾಂವ್. ರಿವಾಜಿ ಪರ್ಮಾಣೆ ಬಾಳ್ಶಾಕ್ ಇಗರ್ಜೆಂತ್ ವೋಲ್ ದಿವಯ್ಲೆಂ. ಚೆರ್ಕೊ ಭುರ್ಗೊ ಜಾಲ್ಲ್ಯಾನ್ ಹೆಕ್ಟರ್ ಮ್ಹಣೊನ್ ಆಮಿ ತಾಕಾ ನಾಂವ್ ದಿಲೆಂ. ಅಶೆಂ ಆಮ್ಚಾ ಆಲ್ಕುಂಜಾಚೊ ಹಕ್ಕದಾರ್ ತೊ ಜಾಲ್ಯಾನ್ ಬಾಳ್ಶೆಂ ಹೆಕ್ಟರ್ ಬ್ರಗಾಂಜಾ ಜಾಲೊ.
ಸಕ್ಲಾ ದವರ್ಲ್ಯಾರ್ ಮುಯೊ ಚಾಬ್ತಿತ್, ಭಾಯ್ರ್ ವ್ಹೆಲ್ಯಾರ್ ಕಾವ್ಳೊ ವ್ಹರಿತ್ ಮ್ಹಳ್ಳ್ಯಾ
ಭಿಂಯಾನ್ ಬಾಳ್ಶಾಕ್ ಭೊವ್ ನಾಜುಕಾಯೆನ್ ಮ್ಹಜಿ ಪತಿಣ್ ಬಾಳ್ ಹೆಕ್ಟರಾಚಿ ಪೊಸ್ ಕರ್ತಾಲಿ. ಆಮ್ಚ್ಯಾಚ್ ಭುರ್ಗ್ಯಾಬರಿ ಹೆಕ್ಟರಾಕ್ ವಾಡಯ್ಲೆಂ, ಬರ್ಯಾ ಇಸ್ಕೊಲಾಕ್ ತಾಕಾ ಧಾಕಲ್ ಕೆಲೆಂ. ಶಿಕ್ಪಾಂತ್, ಖೆಳಾಂತ್ ಮಸ್ತ್ ಚುರುಕ್ ಆಸ್ಲ್ಲೊ ತೊ. ಶಿಕ್ಪಾಂತ್ ಕ್ಲಾಸಿಂತ್ ತೊ ಪಯ್ಲ್ಯಾ ಸ್ಥಾನಾರ್ ಆಸ್ತಾಲೊ. ಹರ್ಯೇಕಾ ವರ್ಸಾ ಶಿಕ್ಪಾಂತ್ ತಶೆಂ ಖೆಳಾಂತ್ ತೊ ಇನಾಮಾಂ ಆಪ್ಣಾಯ್ತಲೊ. ಇಗರ್ಜೆಂತ್ಯಿ ತೊ ಸಕ್ಕಡಾಂಚಾ ಮೊಗಾಚೊ ಜಾವ್ನಾಸ್ಲ್ಲೊ. ಆಲ್ತಾರ್ ಭುರ್ಗ್ಯಾಂಚೊ ತೊ ಮುಖೆಲಿ ಜಾವ್ನಾಸ್ಲ್ಲೊ. ಉಪ್ರಾಂತ್ ಯುವಕ್ ಸಂಘಾಚೊ ಅಧ್ಯಕ್ಶ್ ಜಾವ್ನ್ ತೊ ಸಕ್ಕಡಾಂಕ್ ವಳ್ಕಿಚೊ ಜಾಲ್ಲೊ.
ದೀಸ್ ವೆತಾ ವೆತಾಂ ರಾಯಾಚೊ ಘೊಡೊ ಗಾಡಾಂವ್ ಜಾಲ್ಲೊ ಖಂಯ್. ತಶೆಂಚ್ ಹೆಕ್ಟರ್ ಕೊಲೆಜಿಚೆಂ ಮೇಟ್ ಚಡ್ತಚ್ ಸಗ್ಳೊಚ್ ಬದ್ಲಾಲ್ಲೊ. ಕ್ಲಾಸಿಕ್ ವೆಚೆಂ ಉಣೆಂ ಜಾಲೆಂ. ಉಪ್ರಾಂತ್ ಕೊಲೆಜಿಂತ್ ತೊ ವಿದ್ಯಾರ್ಥಿಂಚೊ ಅಧ್ಯಕ್ಷ್ ಜಾವ್ನ್, ಖೆಳಾಂತ್ ತಶೆಂ ಶಿಕ್ಪಾಂತ್ ಮುಕಾರ್ ಆಸೊನ್ ತೊ ಸಕ್ಕಡಾಂಚೊ ಮೊಗಾಚೊ ಜಾಲ್ಲೊ.
ಪುಣ್ ದೀಸ್ ವೆತಾಂ ವೆತಾಂ ತಾಚೆ ಥಂಯ್ ಆಸ್ಲ್ಲೆಂ ಮುಖೆಲ್ಪಣಾಚೆ ಶೆಗುಣ್ ಪಳೆವ್ನ್ ರಾಜಕಾರಣಿ ತಾಚಾ ಪಾಟಿಂ ಲಾಗ್ಲೆ. ತಾಂಚಾ ಖಾತಿರ್ ಚುನಾವಣಾಂತ್ ಕಾಮ್ ಕರುಂಕ್, ತಾಂಚಾ ಪಾಡ್ತಿ ಖಾತಿರ್ ಕಾಮ್ ಕರುಂಕ್. ಹೆಕ್ಟರಾ ಥಂಯ್ ಹುನ್ ರಗತ್ ವ್ಹಾಳ್ತಾಲೆಂ, ರಾಜಕೀಯಾಚೆ ವಾರೆಂ ತಾಕಾ ಲಾಗ್ಲ್ಲೆಂ. ಶಿಕ್ಪಾಂತ್ ತೊ ಪಾಟಿಂ ಪಡ್ಲೊ. ಕಶ್ಟಾನಿ ಕೊಲೆಜಿಚೆಂ ಶಿಕಾಪ್ ತಾಣೆಂ ಮುಗ್ದಿಲೆಂ. ಎಕಾ ಪ್ರಭಾವೀ ರಾಜಕಾರಣಿಚಾ ಬಳಾನ್ ತಾಣೆಂ ಪದ್ವಿ ಪಾಸ್ ಕರೊವ್ನ್ ಘೆತ್ಲ್ಲಿ ಮ್ಹಣ್ ಉಪ್ರಾಂತ್ ಮ್ಹಾಕಾ ಕಳೊನ್ ಆಯ್ಲೆಂ.
ಕಿತೆಂ ಸಾಂಗ್ಲ್ಯಾರ್ ಹೆಕ್ಟರಾಚಾ ಮತಿಕ್ ದುಕಾತ್ ಮ್ಹಳ್ಳ್ಯಾ ಇರಾದ್ಯಾನ್ ಆಮಿ ತಾಕಾ ಚಡ್ ಭೆಶ್ಟಾಂವ್ಕ್ ವಸುಂಕ್ ನಾಂವ್. ಬೂದ್ಬಾಳ್ ಸಾಂಗ್ಲಿ ಆನಿ ತಾಚಾ ಥಂಯ್ ಆಸ್ಲ್ಲ್ಯ್ ಮುಖೆಲ್ಪಣಾಚಾ ತಾಲೆಂತಾಕ್ ಆಮಿ ಪ್ರೋತ್ಸಾಃ ದಿಲೊ. ಖರ್ಚಾಕ್ ಜಾಯ್ ತಿತ್ಲಿ ಪಯ್ಶೆ ದಿತೆಲ್ಯಾಂವ್. ಆಜ್ ಥಂಯ್ ಸಮ್ಮೇಳನ್, ಫಾಲ್ಯಾಂ ಹಾಮ್ಗಾ ಸಭಾ, ರ್ಯಾಲಿ ಮ್ಹಣೊನ್ ಪಯ್ಶೆ ವ್ಹರ್ತಾಲೊ.
ವಾಲ್ ಧಾಟಿ ಮೊಟಿ ಜಾವ್ನ್ ವಾಡ್ತಾಲಿ.......
ದೀಸ್ ವೆತಾಂ ವೆತಾಂ ಹೆಕ್ಟರಾ ಥಂಯ್ ಪಯ್ಶಾಂಚೊ ಹರ್ಬೊಸ್ ಚಡ್ ಜಾವ್ನ್ ಯೆತಾ ತೊ ದಿಸ್ತಾಲೊ. ಪಯ್ಶೆ ವಿಚಾರ್ಚೆ ಚಡ್ ಜಾವ್ನ್ ಯೆತಾಲೆ. ಮ್ಹಜೊ ಬ್ಯಾಂಕ್ ಖಾತೊ ಖಾಲಿ ಜಾವ್ನ್ ಯೆತಾಲೊ. ವೆಗಿಂ ವೆಗಿಂ ಪಯ್ಶೆ ಕಮಾಂವ್ಚಿ ಆತುರಾಯ್ ಹೆಕ್ಟರಾ ಥಂಯ್ ದಿಸೊನ್ ಯೆತಾಲಿ. ಹಾಂವ್ ಚಲಯ್ತಾಲೊ ತಿ ಥಂಡ್ ಪಿವನ್ ತಯಾರ್ ಕರ್ಚೊ ಕಾರ್ಖಾನೊ ತಾಣೆಂ ಸೊರೊ ತಯಾರ್ ಕರ್ಚೊ ಕಾರ್ಖಾನೊ ಜಾವ್ನ್ ಬದಲ್ಲೊ, ಮ್ಹಜಾ ಅನುಮತೆ ಬಗಾರ್. ಕಾಮೆಲ್ಯಾಂಚೆ ಸಾಂಭಾಳ್ ಉಣೆಂ ಕರಯ್ಲೊ. ಮ್ಹಜಾ ಕಾಲಾರ್ ಖುಶೆನ್ ಆಸ್ಲ್ಲೆ ಕಾಮೆಲಿ ಆತಾಂ ಮ್ಹಜಾ ಘರಾ ಯೇವ್ನ್ ಹೆಕ್ಟರಾಚಾ ಪಾಡ್ ಕರ್ತುವಾಂ ವಿಶ್ಯಾಂತ್ ಸಾಂಗೊನ್ ರಡ್ತಾಲೆ. ಹೆಕ್ಟರಾಕ್ ಸಂಮ್ಜೊಂವ್ಕ್ ಆಮಿ ಕೆಲ್ಲೆಂ ಪ್ರಯತ್ನ್ ನಿರ್ಫಳ್ ಜಾಲ್ಲೆಂ. ತೊ ಕೊಣಾಂಚೆ ಆಯ್ಕೊಂಕ್ ತಯಾರ್ ನಾತ್ಲ್ಲೊ.
ಹೆಕ್ಟರ್ ಸಮಾಜ್ಸೆವಾ, ವ್ಯಾಪಾರ್ ಮ್ಹಣೊನ್ ಘರಾಂತ್ ಉಣೆಂ ಪಳೆಂವ್ಕ್ ಮೆಳ್ತಾಲೊ. ಫಕತ್ ಪತ್ರಾಂನಿ, ಟಿ.ವಿಚೆರ್ ತಾಚಿ ಖಬರ್ ಪಳೆಂವ್ಕ್, ವಾಚುಂಕ್ ಮೆಳ್ತಾಲಿ. ಏಕ್ ನಾವಾಡ್ದಿಕ್ ಸಮಾಜ್ಸೇವಕ್, ವ್ಯಾಪಾರಿಸ್ತ್ ಜಾವ್ನ್ ತೊ ಲೊಕಾಂ ಮದೆಂ ಫಾಮಾದ್ ಜಾಲ್ಲೊ. ನಕ್ಲಿ ಸೊರೊ ಕರ್ನ್ ವಿಕ್ತಾ ಮ್ಹಣೊನ್ ಎಕಾ ಕಾಮೆಲ್ಯಾನ್ ಮ್ಹಾಕಾ ದೂರ್ ದಿಲ್ಲೆಂ. ಹೆಕ್ಟರಾಕ್ ಸಂಮ್ಜೊಂವ್ಚೆ ಪ್ರಯತ್ನ್ ಕೆಲೆಂ. ಪುಣ್ ಹಾಂವ್ ಕಿತೆಂಚ್ ಕರುಂಕ್ ಸಕ್ಲೊನಾ. ಪಾಪ್ ದೂರ್ ದಿಲ್ಲ್ಯಾ ನೌಕರಾನ್ ಜೀವ್ ಹೊಗ್ಡಾಯ್ಜೆ ಪಡ್ಲೊ. ಮ್ಹಜೆ ಥಂಯ್ ಆಸ್ಲ್ಲೆಂ ಬಳ್ ಉಣೆಂ ಜಾವ್ನ್ ಯೆತಾ ಕಶೆಂ ಮ್ಹಾಕಾ ಭೊಗ್ತಾಲೆಂ. ಹಾಂವ್ ನಿಸ್ಸಾಹಾಯಕ್ ಜಾಲ್ಲೊಂ. ಘರಾಂತ್ ಸಮಾಧಾನ್ ನಾ ಜಾಲೆಂ.
ರೂಕ್ ಬಾವೊನ್ ಯೆತಾಲೊ...... ವಾಲ್ ರೂಕ್ ಭರ್ ವಿಸ್ತಾರೊನ್ ಜಾಲ್ಲಿ.....
ಎದೊಳ್ಚ್ ಮ್ಹಜೆ ಪಯ್ಶೆ ತೊ ವ್ಯಾಪಾರ್ ಹೊ ವ್ಯಾಪಾರ್ ಮ್ಹಣೊನ್ ಹೆಕ್ಟರಾನ್ ಮ್ಹಜೆ ಥಾವ್ನ್ ವ್ಹೆಲ್ಲೊ. ಜೆಂ ಕಿತೆಂ ಜಿಣ್ಯೆಂತ್ ಕಶ್ಟಾನಿಂ, ಮರ್ಯಾದೆನ್ ಜೊಡ್ಲ್ಲೆಂ ಖಾಬಾರ್ ಜಾಲ್ಲೆಂ. ತಾಚಾಕಿನಾ ಚಡ್ ಸಮಾದಾನ್ ನಾ ಜಾಲಿ. ಹ್ಯಾಚ್ ಖಂತಿನ್ ಮ್ಹಜಿ ಪತಿಣ್ ಏಕ್ ದೀಸ್ ನಿದ್ಲ್ಲಿ ಉಟೊಂಕ್ಚ್ನಾ. ತಿಣೆ ಹ್ಯಾ ಸಂಸಾರಾಕ್ ಆದೇವ್ನ್ ಮಾಗ್ಲ್ಲೊ.
ರುಕಾಚೊ ಏಕ್ ಖಾಂದೊ ಕೊಸ್ಳಾಲ್ಲೊ......
ನಕ್ಲಿ ಸೊರೊ ಪಿಯೆವ್ನ್ ಲೋಕ್ ಮೆಲ್ಲಿ ಖಬರ್ ಪತ್ರಾಂನಿ ತವಳ್ ತವಳ್ ಯೆತಾಲಿ. ಆನಿ ಹೆಕ್ಟರ್ ಥಂಯ್ ಮೆಲ್ಲ್ಯಾಂಚಾ ಘರ್ಚಾಂಕ್ ಭುಜಾವಣ್ ದೀಂವ್ಕ್, ಸರ್ಕಾರಾ ಥಾವ್ನ್ ತಾಂಚಾ ಘರ್ಚಾಂಕ್ ಕುಮೊಕ್ ಹಾಡವ್ನ್ ದಿಂವ್ಚೆ, ತೆಂ ಟಿ.ವೀ. ಚೆರ್ ದಾಕಯ್ತಾಲೆ ಆನಿ ವ್ಹಡ್ಲ್ಯಾ ದಾಟ್ ಅಕ್ಷರಾನಿ ಪತ್ರಾಂನಿ ಛಾಪ್ತಾಲೆ. ವ್ಹಾ ಕಸ್ಲೊ ಸಂಸಾರ್ !
ಹೆಕ್ಟರಾಚೆಂ ಕಾಜಾರ್ ಗ್ರೇಸ್ತ್ ಕರೊಡ್ಪತಿ ಉದ್ಯಮಿಚಾ ಧುವೆ ಸಂಗಿ ಜಾಲೆಂ. ಭಾರೀ ಗದ್ದಾಳಾಯೆನ್ ಕಾಜಾರ್ ಜಾಲೆಂ ಖಂಯ್. ಮ್ಹಾಕಾ ಕಾಜಾರಾ ಯೇಂವ್ಕ್ ಪುತಾನ್ ಇನ್ಕಾರ್ ಕೆಲ್ಲೆಂ. ಹಾಂವ್ ತಾಚೊ ನೀಜ್ ಬಾಪುಯ್ ನ್ಹಂಯ್ ಮ್ಹಣೊನ್ ಗೀ ಯಾ ಹಾಂವ್ ಗೆಲ್ಯಾರ್ ಕಾಜಾರಾಚಿ ಸೊಬಾಯ್ ಪಾಡ್ ಜಾಯ್ತ್ ಮ್ಹಳ್ಳ್ಯಾ ಉದ್ದೇಶಾನ್ಗೀ ತೆಂ ಹಾಂವ್ ಅರ್ಥ್ ಕರುಂಕ್ ಸಕ್ಲೊ ನಾ.
"ತುಂ ಪಿಸೊ, ಫಾಲ್ಯಾಂ ಥಾವ್ನ್ ತುಜೆಂ ಘರ್ ಹಾಂಗಾ ನ್ಹಂಯ್, ಪಿಶ್ಯಾಂಚಾ ಆಸ್ಪತ್ರೆಂತ್" ಮ್ಹಣ್ ಪುತಾನ್ ಆನಿ ಸುನೆನ್ ಸಾಂಗ್ತಾನಾ ಸಗ್ಳೊ ಸಂಸಾರ್ ಕೊಸ್ಳೊನ್ ಮ್ಹಜೆ ತಕ್ಲೆರ್ ಪಡ್ಲ್ಲೊ ಅನ್ಭೋಗ್ ಮ್ಹಾಕಾ ಜಾಲ್ಲೊ. ಹಾಂವ್ ಪಿಸೊ ಮ್ಹಣೊನ್ ದಾಕ್ತೆರಾನಿ ದಿಲ್ಲೆಂ ಶಿಫಾರಾಸ್ ಪತ್ರ್ ತಾಂಚಾ ಲಾಗ್ಗಿಂ ಅಸ್ಲ್ಲೆಂ. ಕಾನುನಾ ಪರ್ಮಾಣೆ ಹಾಂವ್ ಪಿಶ್ಯಾಂಚ್ಯಾ ಪಟ್ಟೆರ್ ಧಾಖಲ್ ಜಾಲ್ಲೊಂ. ಹಾಂವ್ ನಿಸ್ಸಾಹಾಯಕ್ ಜಾಲ್ಲೊಂ, ಕಿತೆಂಚ್ ಕರುಂಕ್ ಸಕ್ಲೊನಾ. ಮ್ಹಜೆ ಮ್ಹಳ್ಳೆ ಕೊಣಿ ನಾತ್ಲ್ಲೆ. ದುಡು, ಆಸ್ತ್ ಹೆಕ್ಟರಾನ್ ಪಯಿಲ್ಲಿಚ್ ಹಳೂ ಹಳೂ ತಾಚಾ ನಾಂವಾರ್ ಕರೊವ್ನ್ ಘೆತ್ಲ್ಲಿ.
ಪಿಶ್ಯಾಂಚಿ ಆಸ್ಪತ್ರ್ ಮ್ಹಜೆಂ ಘರ್ ಜಾಲ್ಲೆಂ. ಥಂಯ್ಚ್ಯಾ ಪಿಶ್ಯಾಂ ಸಂಗಿ ಹಾಂವ್ಯಿ ಪಿಸೊ ಜಾಲ್ಲೊ. ಪಿಸೊ ಜಾಯ್ಜಯ್ ಪಡ್ಲೆಂ. ಪಿಸೊ ನ್ಹಂಯ್ ಮ್ಹಳ್ಯಾರ್ ಕೊಣಿಂ ಪಾತ್ಯೆ ನಾತ್ಲ್ಲೆ. ಏಕ್ ದೀಸ್ ಸಾರ್ಕಿ ಘಡಿ ಪಳೆವ್ನ್ ಹಾಂವೆ ಪಿಶ್ಯಾಂಚಾ ಆಸ್ಪತ್ರೆ ಥಾವ್ನ್ ಚುಕಾರಿ ಮಾರ್ಲಿ. ಗಾಂವ್ ಗಾಂವ್ ಭವೊನ್ ಅಖ್ರೇಕ್ ಮ್ಹಜಾಚ್ ಗಾಂವಾಕ್ ಯೇವ್ನ್ ಪಾವ್ಲೊಂ. ಸಾಂತೆಂತ್ ಆಸ್ಚೊ ಹೊ ವಡಾ ರೂಕ್ ಮ್ಹಜೊ ಆಸ್ರೊ ಜಾಲೊ.
ಗಾಂವಾಂತ್ ಕೋಣೆಂಯ್ ಮ್ಹಜಿ ವಳೊಕ್ ಧರ್ಲಿನಾ. ಹಾಂವೆಯಿ ಕೊಣಾಂಕ್ ಮ್ಹಜಿ ವಳಕ್ ಸಾಂಗೊಂಕ್ ವಸುಂಕ್ ನಾ. ಕೊಣಾಂಕ್ ವಳಕ್ ಮೆಳ್ಳಿ ತರ್, ತಿ ಖಬರ್ ಹೆಕ್ಟರಾಕ್ ಕಳೊನ್ ಪರತ್ ಮ್ಹಾಕ್ ಪಿಶ್ಯಾಂಚಾ ಆಸ್ಪತ್ರೆಂತ್ ದಾಖಲ್ ಕರಿತ್ ಆನಿ ಮ್ಹಜಾ ಜಿವಿತಾಚಿ ಅಖ್ರೇಚಿ ಆಶಾ ಮ್ಹಜಾಚ್ ಗಾಂವಾತ್ ಅಖ್ರೇಚೊ ಉಸ್ವಾಸ್ ಸೊಡ್ಚೆ ಭಾಗ್ ನಾ ಫಾವೊ ಜಾಯ್ತ್ ಮ್ಹಳ್ಳ್ಯಾ ಎಕಾಚ್ ಉದ್ದೇಶಾನ್. ನೊವೊದ್ ವರ್ಸಾಂಕ್ ಲಾಗಿಂ ಪಾವ್ಲ್ಲ್ಯಾ ಮ್ಹಾಕಾ ಆನೀಕ್ ಜಡ್ ದೀಸ್ ರಾಕೊಂಕ್ ಪಡ್ಚೆನಾ ....... ತ್ಯಾ ದಿಸಾಕ್...
*******
ತೊ ದೀಸ್ ಉದೆಲೊ. ’ಭಿಕಾರ್ಯಾನಿಂ, ಪಿಶ್ಯಾನಿ ಕೊಣಿಂ ಮುಕಾರ್ ಪಡಾನಾಯೆ, ಆಯ್ಚಾ ದೀಸಾ ಭೀಕ್ ಮಾಗೊಂಕ್ ಆಡ್ವಾರ್ಲಾ’ ಮ್ಹಣೊನ್ ಥೊಡೆ ಬೊಂಬೈ ಥಾವ್ನ್ ಹಾಡಯ್ಲೆ ಸ್ವಯಂ ಸೇವಕ್ ಸಕಾಳಿಂಚ್ ಯೇವ್ನ್ ಆಮ್ಕಾಂ ಭೆಶ್ಟಾವ್ನ್ ತಾಕಿತ್ ದೀವ್ನ್ ಗೆಲ್ಲೆ. ಸ್ವಯಂ ಸೇವಕ್ ಥಂಯ್ ಹಾಂಗಾ ಧಾಂವಾಟ್ ಕಾಡ್ನ್ ಆಸ್ಲ್ಲೆ, ಲೋಕಾಂಕ್ ಜಮೊ ಕರುಂಕ್. ಬ್ಯಾಂಡಾ ವ್ಹಾಜ್ಪಾಚೊ ಆವಾಜ್ ಚಡೊನ್ ಯೆತಾಲೊ. ಭೊವ್ಶಾ ಸಾವ್ಕಾರ್ ಹೆಕ್ಟರಾಚಿ ಮೆರ್ವಣ್ಗಿ ಲಾಗ್ಗಿಂ ಯೇವ್ನ್ ಆಸಾ ಆಸ್ತಲಿ. ಲೋಕಾಂಚಿ ಖೇಟ್ ರಸ್ತ್ಯಾಚಾ ದೊನೀ ಕುಶಿನಿಂ ಜಮೊ ಜಾಲ್ಲಿ. ಮುಕ್ಕಾರ್ ಇಸ್ಕೊಲಾಚಿ ಭುರ್ಗಿಂ. ತ್ಯಾ ದೊನ್ಪಾರಾಚಾ ಖರ್ಕಟ್ಯಾ ವೊತಾಂತ್ ಬಿರ್ಮತ್ ಭುರ್ಗಿಂ ಸಾವ್ಕಾರ್ ಹೆಕ್ಟರಾಕ್ ತಶೆಂ ಮಾನಾಂಚಾ ಸೈರ್ಯಾಂಕ್ ಸ್ವಾಗತ್ ಕರುಂಕ್ ಸಕಾಳಿಂ ಥಾವ್ನ್ ಉಬೆ ಆಸ್ಲ್ಲಿಂ.
ವಡಾರುಕಾಚಾ ಕಾಟ್ಯಾರ್ ತಾಂಕಾನಾ ತರೀ ಕಶ್ಟಾನಿ ಉಬೆ ರಾವೊನ್ ಹಾಂವೆ ಲೋಕಾಂಚಾ ಮಧೆಂ ಥಾವ್ನ್ ತೀಳ್ನ್ ಪಳೆಲೆಂ. ಮೊರ್ಚಾ ಪಯ್ಲೆಂ ಹೆಕ್ಟರಾಕ್ ದೊಳೆ ಭರ್ನ್ ಪೆಳೆಂವ್ಯಾ ಮ್ಹಣೊನ್. ಹೆಕ್ಟರ್ ಫುಲಾಂನಿ ಸುಂರ್ಗಾರಾಯಿಲ್ಲ್ಯಾ ಉಗ್ತ್ಯಾ ವಿದೇಶಿ ಕಾರಾರ್ ಬಸೊನ್ ಆಸ್ಲ್ಲೊ ಆನಿ ಲೋಕಾಂಕ್ ಹಾತ್ ಜೋಡ್ನ್ ನಮಾನ್ ಕರ್ತಾಲೊ. ಲೋಕ್ ಆಪ್ಲ್ಯಾ ಹಾತಾಂನಿ ಆಸ್ಲ್ಲಿ ಫುಲಾಂ ತಾಚಾ ಕಾರಾಕ್ ಉಡೈತಾಲೊ. ಥೊಡೆ ಕಾರ್ಯಕರ್ತ್ ಪಯ್ಲೆಂಚ್ ಎಕಾ ವಾಹನಾರ್ ಯೇವ್ನ್ ಲೊಕಾಂಕ್ ಫುಲಾಂ ವಾಂಟುನ್ ಗೆಲ್ಲೆ. ಮೆರ್ವಣ್ಗಿ ಮೈದಾನಾ ಕುಶಿನ್ ಚಮ್ಕೊನ್ ಆಸ್ಲ್ಲಿ ಥಂಯ್ಸರ್ ಚಲೊಂಕ್ ಆಸ್ಚ್ಯಾ ಸನ್ಮಾನ್ ಕಾರ್ಯಾಕ್. ತಾಚಾ ಪಾಟಿಂ ಲೋಕ್ ಹಾರಿ ಹಾರಿನಿಂ, ಥೊಡೆ ಸ್ವಯಂ ಸೇವಕಾಂಚಾ
ಭಿಂಯಾನ್ ಆನಿ ಥೊಡೆ ಧರ್ಮಾರ್ಥ್ ಜೆಂವ್ಣಾಚಾ ಆಶೆನ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
