ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 42. ಧೆಸ್ವಾಟ್
ಕ್ಲಾರಾ ಫೆರ್ನಾಂಡಿಸ್: ಕೊಂಕ್ಣಿ ಸಾಹಿತ್ಯಾಂತ್ ಬರ್ಪಾಚೆಂ ದೆಣೆಂ ಆಸೊನ್ ಬರಂವ್ಚಾ ಭೋವ್ ಥೊಡ್ಯಾ ಸ್ತ್ರೀ ಲೇಖಕಿಂ ಪಯ್ಕಿ ಬಾಯ್ ಕ್ಲಾರಾ ಫೆರ್ನಾಂಡಿಸ್ ಎಕ್ಲಿ. ಅಪ್ಲ್ಯಾ ಸಾಹಿತ್ಯಾಚಿ ಸುರ್ವಾತ್ ಕರುನ್ ಅಜಿಕ್ ಪಂದ್ರಾ ವರ್ಸಾಂ ಉತರ್ತಾತ್, ಹ್ಯಾ ಆವ್ದೆಂತ್ ಹಿಣೆಂ ಕೊಂಕ್ಣೆಂತ್ ಬರಯಿಲ್ಲೆಂ ಉಣೆಂ ತರ್ಯ್ ಹಿಚ್ಯಾನ್ ಹೆರಾಂಚೆರ್ ಪ್ರಭಾವ್ ಘಾಲ್ಚೆಂ ಸಾಹಿತ್ಯ್ ರಸ್ಚೆಂ ದೆಣೆಂ ಆಸಾ ಮ್ಹಳ್ಳೆಂ ಸತ್. ಫುಡೆಂಯ್ ಹಿಚಾ ಲಿಖ್ಣೆಥಾವ್ನ್ ಬರೆಂಚ್ ಸಾಹಿತ್ಯ್ ಉದೆಂವ್ದಿ ಮ್ಹಣ್ ಆಶೆತಾಂ.
ಕ್ಲಾರಾ ಫೆರ್ನಾಂಡಿಸ್
ಟ್ರಿನ್..... ಟ್ರಿನ್...... ಫೊನ್
ವ್ಹಾಜ್ತಾಲೊ. ಮಾರ್ಯೆಟ್ ಎಕಾಚ್ಫಾರಾ ಉಟೊನ್ ಆಪ್ಲೆಂ ’ಟೈಂ
ಪೀಸ್’ ಪಳೆಂವ್ಕ್ ಲಾಗ್ಲೆಂ. ತಾಣೆಂ ಚಿಂತ್ಲ್ಲೆಂ ಅಲಾರಾಮ್
ವಾಜ್ತಾ ಮ್ಹಣೊನ್ ಪೂಣ್ ಆತಾಂ ತಾಕಾ ಕಳಿತ್ ಜಾಲೆಂ ಹೆಂ ಅಲಾರಾಮ್
ನೈಂ ಸಾಲಾಂತ್ಲೆಂ ’ಕೊರ್ಡ್ಲೆಸ್’ ಫೋನ್.
’ಕೋಣ್ ಉಲಯ್ತಾ?’.
’ಹಾಂವ್ ಪಾಂಡೇಶ್ವರ್ ಪೊಲಿಸ್ ಸ್ಟೇಶಾನಾ ಥಾವ್ನ್ ಇನ್ಸ್ಪೆಕ್ಟರ್ ರಾಜೇಶ್
ಪೂಜಾರಿ ಉಲಯ್ತಾಂ’ ದಾದ್ಲ್ಯಾಚೊ ತಾಳೊ.
"ಮಿಸ್ಸೆಸ್ ರೇಗೊ, ಮಾಯ್ಕಾಲ್ ರೇಗೊಚಿ ಬಾಯ್ಲ್ ಅಸಾ?"
’ವ್ಹಯ್, ಹಾಂವ್ ಮಿಸ್ಸೆಸ್ ಮಾರ್ಯೆಟ್ ರೇಗೊ ಉಲಯ್ತಾಂ’.
ಆಮ್ಕಾಂ ರೇಲ್ವೆ ಸ್ಟೇಶನಾಂತ್ ಎಕ್ ಮೊಡೆಂ ಮೆಳ್ಳಾಂ ಆನಿಂ ತ್ಯಾ
ಮೊಡ್ಯಾಚಾ ಕಲ್ಸಾಂವಾಂತ್ ಹೆಂ ಫೋನ್ ನಂಬರ್ ಮೆಳ್ಳೆಂ.
"ಮೊಡೆಂ! ಮಾಯ್ಕಾಲ್! ಫೋನ್ ನಂಬರ್! ಮ್ಹಾಕಾ ಕಾಂಯ್
ಸಮ್ಜೊಂಕ್ ನಾ ಆನಿಂ ಮಾಯ್ಕಾಲ್ ಮಂಗ್ಳುರಾಂತ್ ರಾವಾನಾ ತೊ...."
’ಮಿಸ್ಸೆಸ್ಸ್ ರೇಗೊ, ತುಮ್ಕಾಂ ಕಿತೆಂಯ್ ಸಾಂಗೊಂಕ್ ಅಸಾ ತರ್ ದಯಾಕರುನ್
ಪೊಲಿಸ್ ಸ್ಟೇಶಾನಾಂತ್ ಯೇವ್ನ್ ಉಲಯಾತ್. ಹಾಂವ್ ಜಾಣಾ ಅತಾಂ ಸಕಳಿಂಚಿಂ
ಪಾಂಚ್ ವೊರಾಂ, ತುಮಿಂ ಸಕಳಿಂ ಸಾತ್ ವೊರಾರ್ ಯೆಯಾತ್."
"ಜಾಯ್ತ್. ಹಾಂವ್ ಸಕಾಳಿಂ ಸಾತ್ ವೊರಾರ್ ಯೆತಾಂ,"
ಮ್ಹಣೊನ್ ಮಾರ್ಯೆಟಾನ್ ಫೋನ್ ಸಕಯ್ಲ್ ದವರ್ಲೊ.
.....................
ಮಾರ್ಯೆಟ್ ಏಕ್ ಮಾನೇಸ್ತ್ ಕುಟ್ಮಾಂತ್ಲೆಂ. ರೋಜಿ ಆನಿಂ
ಮಾವ್ರಿಸಾಮಾಚೆಂ ತಿಸ್ರೆಂ ಬುರ್ಗೆಂ. ಮಾರ್ಯೆಟ್ ಕುವೆಯ್ಟ್ಚಾ ಕುವೆಯ್ಟ್ಚಾ ಗಾಂವಾಂತ್ ಜಲ್ಮಾಲ್ಲೆಂ. ಇರಾಕ್-ಕುವೆಯ್ಟ್ಚ್ಯಾ ಝಗ್ಡ್ಯಾ ವೆಳಾರ್ ತಿಂ
ಸಗ್ಳಿಂ ಕುವೆಯ್ಟ್ ಸೊಡುನ್ ಬೊಂಬಯಿ ವಸ್ತಿ ಕರುಂಕ್
ಲಾಗ್ಲಿಂ. ಮಾರ್ಯೆಟ್ ನಿಮಾಣೆ ಜಾಲ್ಲ್ಯಾನ್, ತೆಂ ಕಾಲೇಜಿಂತ್ ಶಿಕ್ತಾಲೆಂ.
ಮಾರ್ಯೆಟ್ ಈiಟಿಚಿಟ ಙeಚಿಡಿ ಃ’ಅom ಕರ್ತಾಸ್ತಾನಾ ಮಾವ್ರಿಸಾಮ್ ದೆವಾದೀನ್ ಜಾಲೊ.
ಹ್ಯಾಚ್ಚ್ ವೆಳಾರ್ ಮಾರ್ಯೆಟಾಕ್ ಏಕ್ ಬೊರಿ ಸಯ್ರಿಕ್ಯೀ ಆಯ್ಲಿ. ರೋಜಿ
ಬಾಯೆನ್ ಅಪ್ಲ್ಯಾ ಘೊವಾಚೆಂ ವರ್ಸಾಚೆಂ ಮೀಸ್ ಜಾತೆಚ್ಚ್
ಮಾರ್ಯೆಟಾಚೆಂ ಕಾಜಾರ್ ಮೈಕಲಾ ಕಡೆನ್ ಕರುನ್
ದಿಲೆಂ.
ಮೈಕಲ್ ಗುಣಾಂನಿ ಬೊಳೊ, ಖಾಲ್ತೊ ಅನಿ ವಿಶೇಷ್ ಸಮ್ಜೊನ್ಕಾಯೆಚೊ ಚೆಡೊ. ತಿತ್ಲೆಂಚ್
ನ್ಹಂಯ್ ಏಕ್ ದೆವಾಸ್ಪಣಿ ಅನಿಂ ಕಸಲ್ಯೊಯ್ ವಾಯ್ಟ್
ಸವಾಯೊ ತಾಕಾ ನಾತ್ಲ್ಲ್ಯೊ. ಮಾರ್ಯೆಟ್ ನಿಜಾಯ್ಕಿ ಭಾರಿಚ್ಚ್ ನಶಿಬ್ವಂತ್ ಚೆಡುಂ, ಅಸಲೊ ಜಿಣ್ಯೆ
ಸಾಂಗಾತಿ ಫಾವೊ ಜಾಂವ್ಕ್.
ಮಯ್ಕಾಲ್ ದುಬೈ ಎಲೆಕ್ಟ್ರಿಶ್ಯಾನ್ ಜಾವ್ನ್ ಕಾಮ್ ಕರ್ತಾಲೊ ಜಾಲ್ಲ್ಯಾನ್ ತಾಕಾ
ಮರ್ಯೆಟಾಕ್ ದುಬೈ ವ್ಹರೊಂಕ್ ಜಾಂವ್ಕ್ ನಾ. ಮಯ್ಕಾಲಾನ್ ಕಾಜಾರಾ ಆದಿಂಚ್
ಮಲಾಡ್ ಘರ್ ಕೆಲ್ಲೆಂ ತಶೆಂ ಜಾಲ್ಲ್ಯಾನ್ ಕಾಜಾರ್ ಜಾತೆಚ್ಚ್
ಮಾರ್ಯೆಟ್ ಆಪ್ಲ್ಯಾ ಘೊವಾಚಾ ಫ್ಲೆಟಾಂತ್ ರಾವೊಂಕ್ ಗೆಲ್ಲೆಂ.
ಮಾರ್ಯೆಟಾಕ್ ಆತಾಂ ಮಯ್ಕಾಲಾ ಥಾವ್ನ್ ದೋನ್ ಚೆಡ್ವಾಂ
ಬುರ್ಗಿಂ ಜಾಲ್ಲಿಂ. ವ್ಹಡ್ಲೆಂ ಹೆಜಾಲ್ ಅನಿಂ ದುಸ್ರೆಂ ರೆಚಲ್.
ಮಾರ್ಯೆಟ್ ಅಪ್ಲೆಂ, ಆಪ್ಲ್ಯಾ ಬುರ್ಗ್ಯಾಂಕ್ ಘೆವ್ನ್, ಸುಶೆಗಾತ್,
ಸಂತೊಸಾನ್ ಅನಿ ಅಪ್ಲ್ಯಾ ಘೊವಾಕ್ ಖಾಲ್ತೆಂ ಜಾವ್ನ್ ಏಕ್ ದೆಖಿಭರಿತ್ ಜಿಣಿಂ ಜಿಯೆತಾಲೆಂ.
ಪೂಣ್ ಕೊಣಾಚಿ ದೀಷ್ಟ್ ಹ್ಯಾ ಸುಖಿ ಪರಿವಾರಚೆರ್ ಪಡ್ಲಿ ಕೋಣ್ ಜಾಣಾ.
..................
ಮ್ಹಹಿನೊ ಎಪ್ರಿಲ್. ಕುವೆಯ್ಟಾಂತ್ ಕಠಿಣ್ ಧಗ್. ಹ್ಯಾ
ವಾತಾವರಣಾಚೊ ಫಾಯ್ದೊ ಜೊಡ್ಯಾಂ ಮ್ಹಣೊನ್ ಮಾರ್ಯೆಟಾಚಾ
ವ್ಹಡ್ಲ್ಯಾ ಭಯ್ಣಿನ್ ಮಾಗ್ರೆಟಾನ್ ಆಪ್ಲ್ಯಾ ಭಯ್ಣಿಕ್ ಅನಿ ತಾಚಾ
ಬುರ್ಗ್ಯಾಂಕ್ ವಿಜಿಟಾಚೆರ್ ಕುವೇಯ್ಟ್ ಹಾಡ್ಲೆಂ. ತಶೆಂಚ್
ಮಯ್ಕಾಲಾಕ್ಯೀ ದುಬೈಥಾವ್ನ್ ಕುವೇಯ್ಟ್ ವಿಜಿಟಾಚೆರ್
ಹಾಡ್ಲೆಂ. ಮಾಗ್ರೇಟಾಕ್ ಕಳಿತ್ ನಾತ್ಲ್ಲೆಂ ತಾಚ್ಯಾ ಬೊರ್ಯಾ
ಮನಾಚಿ ಕರ್ನಿ ಆಪ್ಲ್ಯಾ ಭಯ್ಣಿಚಿ ಸುಖಾಳ್ ಕಾಜಾರಿ ಜಿಣಿ ದೆಸ್ವಾಟ್ ಕರುನ್ ಉಡಯ್ತಾಲಿ
ಮ್ಹಣ್.
ಮಾಗ್ರೆಟಾನ್ ಆಪ್ಲ್ಯಾ ಭಯ್ಣಿಕ್ ಆನಿ ತಾಚಾ ಕುಟ್ಮಾಕ್ ಆಪ್ಲ್ಯಾಚ್ಚ್ ಘರಾ ರಾವೊಂಕ್ ಆಸ್ರೊ
ದಿಲೊ. ಭಯ್ಣಿ ಮೊಗಾನ್ ಜಿಯೆಲಿಂ ತರ್ ಮಯ್ಕಾಲ್
ಲೊಕಾಚ್ಯಾ ಕುಸ್ತಾರ್ ಜಿಯೆಂವ್ಚೆಂ ನಾಕಾ ಮ್ಹಣ್ ಕಾಮಾಚಾ
ಸೊದ್ನೆರ್ ಪಡ್ಲೊ. ದೀಸ್ ಉಬ್ಲೆ, ಮ್ಹಹಿನೆ ಪಾಶಾರ್ ಜಾಲೆ.
ಮಾಯ್ಕಾಲಾಕ್ ಖೈಂಚರ್ಯೀ ಫಾವೊತೆಂ ಕಾಮ್ ಮೆಳ್ಳೆಂ
ನಾ. ಆತಾಂ ಮಯ್ಕಾಲಾಕ್ಯೀ ಖೆಲ್ಲೆಂ ಜಿರಾನಾ ಜಾಲೆಂ. ದೋನ್ ನೆನ್ತಿ
ಬುರ್ಗಿಂ, ಬಾಯ್ಲ್ ಆನಿ ಸಾಂಗಾತಾ ದಿಸಾಂದೀಸ್ ವಾಡ್ಚೊ ಖರ್ಚ್. ಆಪ್ಣೆಂ ಚೂಕ್ ಕೆಲಿಗಾಯ್ ದುಬೈಚೆಂ ಕಾಮ್
ಸೊಡುನ್ ಮ್ಹಣ್ ಚಿಂತುಂಕ್ ಲಾಗ್ಲೊ.
ಮಯ್ಕಾಲಾಚಿ ಮನಾಭಿತರ್ಚ್ಚ್ ಖರ್ಗೊಂವ್ಚಿ ಪರಿಸ್ಥಿತಿ ಪಳೆವ್ನ್,
ಮಾರ್ಯೆಟಾನ್ ಆತಾಂ ಕಾಮ್ ಸೊದೊಂಕ್ ಸುರು ಕೆಲೆಂ. ಜಿತ್ಲೆ
ಪೈಶೆ ಯೆಂವ್ಚೆ ತೆ ಯೆತೆಲೆ. ಕಿತೆಂಯ್ ಜಾಂವ್ದಿ ಕಿತ್ಲೆ
ದೀಸ್ ಆಮಿಂ ’ಭಯ್ಣಿಚ್ಯಾ ಕುಸ್ತಾರ್ ದೀಸ್ ಕಾಡ್ಚೆ?’ ಅಶೆಂ ಚಿಂತುನ್
ಮಾರ್ಯೆಟಾನ್ ಭಯ್ಣಿಕಡೆನ್ ಆಪ್ಲಿ ’ಸಿವಿ’ ತಯಾರ್ ಕರುಂಕ್
ಸಾಂಗ್ಲೆಂ.ಆನಿಂ ಹಿ ಕೊಬಾರ್ ಮಯ್ಕಾಲಾಚಾ ಕಾನಾಂತ್ ಪಡ್ಲಿ.
’ಹಾಂವ್ ಕಿತೆಂ ಆಯ್ಕಾತಾಂ ಮಾರ್ಯೆಟ್ ತುಂ ಕಾಮ್ ಕರುನ್ ಆಮ್ಕಾಂ
ಪೊಸ್ತೆಲೆಂಯ್?’ ವಿಚಾರ್ಲೆಂ ರಾಗಾನ್ ಮಾಯ್ಕಾಲಾನ್.
’ತಶೆಂ ಕಾಂಯ್ ನಾ ಮಾ, ಆಮಿಂ ದೊಗಾಂಯ್ನಿಂ ಘರಾ ಬಸೊನ್ ದುಸ್ರ್ಯಾಂಚೆಂ ಶಿತ್ ಖಾಂವ್ಚ್ಯಾಕೀ, ತುಕಾ ಫಾವೊತೆಂ ಕಾಮ್ ಮೆಳ್ತಾ
ಮ್ಹಣ್ಸರ್ ಹಾಂವ್ ಖೈಂ ತರ್ಯೀ ಕಾಮ್ ಮೆಳ್ಳ್ಯಾರ್ ಕರ್ತಾ
ಮ್ಹಣ್’ ಮೊವಾಳಾಯೆನ್ ಜಾಪ್ ದಿಲಿ ಮಾರ್ಯೆಟಾನ್.
’ನಾಂ ಮಾರ್ಯೆಟ್, ಕಾಜಾರ್ ಜಾವ್ನ್ ಆಮ್ಕಾಂ ಸಾತ್ ವರ್ಸಾಂ ಜಾಲಿಂ, ಕಾಜಾರಾಚಾ ಆದಿಂ ಯಾ ಉಪ್ರಾಂತ್ ತುಂವೆಂ ಯೆದೊಳ್
ಮ್ಹಣ್ಸರ್ ಕಾಮ್ ಕರುಂಕ್ ನಾ ಆನಿಂ ಆತಾಂ ಹ್ಯಾ ಗಾವಾಂತ್ ತುಂ
ಬಾಯ್ರ್ ವಚೊನ್ ಕಾಮ್ ಕರ್ಚೆಂ ಮ್ಹಾಕಾ ಪಸಂದ್
ನಾಂ’ ಮಾಯ್ಕಾಲ್ ಆಪ್ಲ್ಯಾ ಭರ್ಮಾದಿಕ್ ತಾಳ್ಯಾನ್
ಸಾಂಗಾಲಾಗ್ಲೊ.
’ತಶೆಂ ಸಾಂಗ್ಲ್ಯಾರ್ ಆಮ್ಚೆ ದೀಸ್ ವೆತೆಲೆ ಕಶೆ ಮಾಯ್ಕಾಲ್?
ಹಾಂವೆ ಎದೊಳ್ ಕಾಮ್ ಕರುಂಕ್ ನಾಂ ತರ್ ಕಾಂಯ್ ವ್ಹಡ್
ನಾಂ, ಆತಾಂ ತರಿ ತುಕಾ ಕಾಮ್ ಮೆಳ್ತಾ ಮ್ಹಣ್ಸರ್ ಮ್ಹಾಕಾ ಕಾಮ್ ಕರುಂಕ್ ದಿ"
ಮ್ಹಣ್ ಘೊವಾಕ್ ಆಪ್ಲ್ಯಾ ಸಮ್ಜಂವ್ಕ್ ಲಾಗ್ಲೆಂ ಮಾರ್ಯೆಟ್.
ಮಾಯ್ಕಾಲಾನ್ ನಾಖುಶೆನ್ ಮ್ಹಳ್ಳೆಬರಿ ಆಪ್ಲಿ ಪರ್ವಾಣ್ಗಿ ದಿಲಿ
ಮಾರ್ಯೆಟಾಕ್ ಕಾಮ್ ಸೊದುಂಕ್.
ಮಾರ್ಯೆಟಾಚೆಂ ನಶಿಬ್ ಮ್ಹಣ್ಯೆತ್, ತಾಕಾ ಹೊಟೆಲ್ ’ಐe
ಒeಡಿiಜieಟಿ’ ಹೊಟೆಲಾಂತ್ ’ರೂಮ್ ರಿಸರ್ವೇಶನ್ ಸ್ಟಾಫ್’ ಜಾವ್ನ್ ಕಾಮ್ ಮೆಳ್ಳೆಂ.
ಹಿ ಸಂತೊಸಾಚಿ ಖಬಾರ್ ತಾಣೆಂ ಆಪ್ಲ್ಯಾ ಘೊವಾಕ್ ಆನಿಂ ಭಯ್ಣಿಕ್ ಕಳ್ಸಿಲಿ.
ಬಯ್ಣಿಸೊ ಸಂತೊಸ್ ಆಪರಿಮಿತ್ ತರ್ ಘೊವಾಚೊ ತಾತ್ಕಾಲಿಕ್. ಕಾಮ್
ನಾಸ್ತಾನಾಂ, ಮಾಯ್ಕಾಲ್ ದೆದೆಸ್ಫಾರ್ ಜಾಲ್ಲೊ. ಮ್ಹನಿಸ್ ಕಿತ್ಲೊಯೀ
ಸಮ್ಜೊನೆಚೊ ಆಸೊಂದಿ, ಪೂಣ್ ಎಕ್ ಪಾವ್ಟಿಂ ದುಬಾವೆಚೆಂ
ಭಿಂ ಮನಾಂತ್ ಆನಿಂ ಕಾಳ್ಜಾಂತ್ ರೊಂಬಾತ್ ತರ್ ಮಾಗಿರ್
ಮನ್ಶ್ಯಾಚೆಂ ಜಿವಿತ್ ದೆಸ್ವಾಟ್ ಜಾತಾ.
’ಮಾಯ್ಕಾಲ್, ಮ್ಹಾಕಾ ಕಾಮ್ ಮೆಳ್ಳೆಂ’ ಹಾಂವ್ ಆಜ್
ಮೊಸ್ತು ಸಂತುಷ್ಟ್ ಆಸಾಂ’, ಮ್ಹಣೊನ್ ಮಾರ್ಯೆಟಾನ್ ಘಟ್
ವೇಂಗ್ ಮಾರ್ಲಿ ಆಪ್ಲ್ಯಾ ಘೊವಾಕ್.
ಮಾಯ್ಕಾಲಾನ್ ವಳೂ ವೇಂಗ್ ಸೊಡಯ್ಲಿ ಆನಿಂ ಮ್ಹಳೆಂ,
’ತುಂವೆ ಇತ್ಲೆಂ ಸಂತೊಸ್ ಪಾಂವ್ಚಿ ಘರ್ಜ್ ನಾ’. ಮ್ಹಾಕಾ ಇತ್ಲಿಂ
ವರ್ಸಾಂ ಮ್ಹಜ್ಯಾ ಕಾಮಾಚಿ ಮಾಹೆತ್ ಆಸೊನ್ ಎಕ್ಯಿ ಕಾಮ್
ಮೆಳೊನಾ. ತುಕಾ, ಕೆದ್ನಾಂಯ್ ಕಾಮ್ ಕರಿನಾತ್ಲ್ಲ್ಯಾಕ್ ಇತ್ಲೆಂ
ಬೊರೆಂ ಕಾಮ್ ಮೆಳ್ಳೆಂ? ಕಾಂಯ್ ಘಡ್ಬಡ್ ತರ್ಯಿ
ನಾಂ ಮೂ?’ ನಂಜಳ್ಯೊ ಹಾಸೊ ಹಾಸೊನ್ ಸಾಂಗಾಲಾಗ್ಲೊ.
ಕಿತೆಂ ಉಲಯ್ತಾಯ್ ಮಾಯ್ಕಾಲ್? ತುಂ ಮ್ಹಜೆರ್ ದುಬಾವ್ ಕರ್ತಾಯ್!!
ಸಂತೊಸ್ ಪಾಂವ್ಚೆ ಸೊಡ್ನ್ ತುಂ ಆಶೆಂ ಉಲಯ್ತಾಯ್? ವಿಜ್ಮಿತ್
ಪಾವ್ಲೆಂ ಮಾರ್ಯೆಟ್. ತರ್ಯೀ ಆಪ್ಲಿ ದುಃಖಾಂ ಘೊವಾಕ್ ದಾಕಯ್ನಾಸ್ತಾನಾ
ಮಾರ್ಯೆಟ್ ’ವ್ಹಡ್ ನಾ ಮಯ್ಕಾಲ್, ಆತಾಂ ಹೆಜಲಾಕ್ ಇಸ್ಕೊಲಾಕ್ ಘಾಲ್ಚೊಯೀ ವೇಳ್ ಜಾಲೊ. ದೆವಾನ್ಂಚ್
ದಿಲೆಂ ಹೆಂ ಕಾಮ್ ಮ್ಹಾಕಾ’.
ಮಾರ್ಯೆಟ್ ಆತಾಂ ಕಾಮಾಕ್ ಸರಾಗ್ ವೆತಾಲೆಂ. ತೆಂ ರಾಕ್ತಾಲೆಂ, ಕೆದ್ನಾಂ ಆಪ್ಲೆಂ ’ರೆಸಿಡೆನ್ಸ್’ ಟ್ರಾನ್ಸ್ಫರ್ ಜಾತೆಲೆಂ ಆನಿಂ ಕೆದ್ನಾಂ ಅಪುಣ್
ಹೆಜಾಲಾಚೆಂ ಇಸ್ಕೊಲಾಚೆಂ ಎಡ್ಮಿಶನ್ ಘೆತೆಲಿಂ ಮ್ಹಣ್.
ದೀಸ್ ಪಾಶಾರ್ ಜಾಲೆ. ಮ್ಹಹಿನೆ ದೋನ್ ಜಾಲೆ ಮಾರ್ಯೆಟ್ ಕಾಮಾಕ್
ಸೆರ್ವೊನ್. ದೀಸ್ ವೆತಾ ವೆತಾಂ ಮಯ್ಕಾಲ್ ಅಪ್ಲ್ಯಾ
ಬಾಯ್ಲೆ ವಯ್ರ್ ದುಬಾವ್ ಕರುಂಕ್ ಲಾಗ್ಲೊ. ಮಾಯ್ಕಾಲಾನ್
ಬುರ್ಗ್ಯಾಂಕ್ಯೀ ಸಾಂಗ್ಲೆಂ ತಾಂಚ್ಯಾ ಅವಯ್ ವಯ್ರ್ ದೊಳೊ ದವರುಂಕ್, ತೆಂ ಕೊಣಾ
ಸಾಂಗಾತಾ ಘರಾ ಪಾಟಿಂ ಯೆತಾ, ಕೊಣಾ ಸಾಂಗಾತ ಸಕಾಳಿಂ ಕಾಮಾಕ್
ವೆತಾ. ಥೊಡೆ ಪಾವ್ಟಿಂ ಮಾರ್ಯೆಟ್ ಆಪ್ಲ್ಯಾ ಟ್ರಾನ್ಸ್ಪೊರ್ಟಾಚೆರ್
ಬಸ್ಲ್ಲೆಂಚ್, ಮಾಯ್ಕಾಲ್ ಟ್ಯಾಕ್ಸಿ ಘೆವ್ನ್ ತಾಚೊ ಪಾಟ್ಲಾವ್ ಕರಿ.
ಎಕ್ ದೀಸ್ ಮಾರ್ಯೆಟ್ ಆಪ್ಲ್ಯಾ ಟ್ರಾನ್ಸ್ಪೊರ್ಟಾಚೆರ್ ಚಡ್ತಾನಾ ತಾಕಾ
ಬಿಲ್ಡಿಂಗಾಚ್ಯಾ ಕುಂದ್ಯಾಲಾಗಿಂ ಮಾಯ್ಕಾಲಾಕ್ ಪಳೆಲ್ಲ್ಯಾ
ಪರಿ ಜಾಲೆಂ. ತೆಂ ತಕ್ಷಣ್ ಡ್ರೈವರಾಕ್ ಏಕ್ ಮಿನುಟ್ ರಾವ್
ಮ್ಹಣ್ ಸಾಂಗೊನ್ ಬಿಲ್ಡಿಂಗಾ ಲಾಗಿಂ ಆಯ್ಲೆಂ. ತೆಂ ಮಯ್ಕಾಲಾಕ್ ಪಳೆವ್ನ್ ಆಜಾಪ್ಲೆಂ.
’ಮಾಯ್ಕಾಲ್, ತುಂ ಹಾಂಗಾಸರ್ ಕಿತೆಂ ಕರ್ತಾಯ್? ಸಕಾಳಿಂ ತುಂ
ಸಾತ್ ವೊರಾರ್, ಇಂಟರ್ವ್ಯೂ ಆಸಾ ಮ್ಹಣ್ ಘೆಲ್ಲೊಯ್, ಆಜೂನ್
ಹಾಂಗಾಸರ್ಚ್ಚ್ ಆಸಾಯ್? ಚಲ್, ಮ್ಹಜ್ಯಾ ಟ್ರಾನ್ಸ್ಪೊರ್ಟ್ವಾಲ್ಯಾಕ್
ಹಾಂವ್ ತುಕಾ ಪಾವೊಂಕ್ ಸಾಂಗ್ತಾಂ.’
’ನಾಂ, ಹಾಂವ್ ಆಜ್ ಇಂಟರ್ವ್ಯೂಕ್ ವಚಾನಾ, ಮ್ಹಜ್ಯಾ ಜಿವಾಕ್
ಬೊರೆಂ ನಾ’, ಜಿವ್ಯೊ ಫಟಿ ಮಾರೊಂಕ್ ಲಾಗ್ಲೊ ಮಾಯ್ಕಾಲ್.
ಮಾರ್ಯೆಟಾಕ್ ಕಾಮಾಕ್ ವೇಳ್ ಜಾಲ್ಲ್ಯಾನ್, ತೆಂ ಚಡ್ ಚಿಂತುಂಕ್
ವಚನಾಸ್ತಾನಾ ಆಪ್ಲ್ಯಾ ವಾಟೆಕ್ ಲಾಗ್ಲೆಂ.
ಆಶೆಂಚ್ ಮಾಯ್ಕಾಲಾಚೆಂ ದುಬಾವಾಚೆಂ ಭಿಂ ಚಡ್ ಅನಿಂ ಚಡ್ ಖಿರ್ಲಿತ್ತ್ ಆಯ್ಲೆಂ.
ಮಾರ್ಯೆಟಾಚೆಂ ರೆಸಿಡೆನ್ಸ್ ಆಜೂನ್ ಟ್ರಾನ್ಸ್ಫರ್ ಜಾಂವ್ಕ್
ನಾತ್ಲ್ಲೆಂ. ಮಾಯ್ಕಾಲ್ ಘರಾಂತ್ ಸದಾಂಯ್ ಕರಂದಾಯ್ ಕರುಂಕ್
ಲಾಗ್ಲೊ. ಆತಾಂ, ಮಾರ್ಯೆಟಾಕ್ ಕಳ್ಳೆಂ, ಆಪ್ಲೊ ಘೊವ್ ಆಪ್ಲ್ಯಾ
ವಯ್ರ್ ದುಬಾವ್ ಕರ್ತಾ. ದೀಸ್ ವೆತಾ ವೆತಾ ಮಾಯ್ಕಾಲ್ ಬದ್ಲುನ್ ಆಯ್ಲೊ. ತಾಚಿ ಕಾಮ್
ಸೊದ್ಚಿ ಆಶಾ ಆತಾಂ ಉಬೊನ್ ಗೆಲ್ಲಿ. ತೊ ಆತಾಂ ಅಪ್ಲ್ಯಾಚ್ಚ್
ಬಾಯ್ಲೆಚೊ ಪಾರೊ ಜಾಲ್ಲೊ. ಬಾಯ್ಲ್ ಕಿತೆಂ ನೆಸ್ತಾ, ಕೊಣಾ
ಸಾಂಗಾತಾ ವೆತಾ, ಕಿತ್ಲ್ಯಾ ವೊರಾರ್ ಘರಾ ಪಾಟಿಂ ಯೆತಾ ಇತ್ಯಾದಿ ತಾಕಾ ಜೆವ್ಣಾಚಾಕಿ ಚಡ್ ಗರ್ಜೆಚೆಂ ಜಾಲ್ಲೆಂ.
ಘೊವಾಚಿ ಹಿ ಚಾಲ್ ಚಾಮ್ಕೊನ್ ಆತಾಂ ಮಾರ್ಯೆಟಾಕ್ ಸೊಸುಂಕ್ ಜಾಯ್ನಾ ಜಾಲಿ.
ದಿಸಾಂದಿಸ್ ತಾಕ್ ಜಿಯೆಂವ್ಚೆಚ್ಚ್ ಕಷ್ಟಾಂಚೆ ಜಾಲೆಂ. ತಾಚೆಂ ದುಃಖ್ ಫಕತ್ ತಾಚೆಂ ಭಯ್ಣ್
ಸಮ್ಜತಾಲೆಂ ಶಿವಾಯ್ ಹೆರಾಂ ತಾಚಿಂ ಕೆಳ್ಕುಳಾಂ ಕರುನ್ ತಾಕಾ
ಹಿನ್ಸಿತಾಲಿಂ. ತಾಕಾ ಆತಾಂ ಬೊಗ್ಲೆಂ ಮಾಯ್ಕಾಲಾ ಸಾಂಗಾತಾ ಕಾಜಾರಿ ಜಿಣಿ
ಮುಖಾರ್ಸುಂಕ್ ಸಾಧ್ಯ್ ನಾಂ. ಹೆಣೆಂ, ಮಾಯ್ಕಾಲಾಚಿ ವಿಜಿಟ್ ವಿಜಾಯ್ ಕಾಬಾರ್ ಜಾವ್ನ್ ಆಯ್ಲಿ.
ಹೊಚ್ಚ್ ಬೊರೊ ವೇಳ್ ಮ್ಹಣ್, ಮಾರ್ಯೆಟಾನ್ ಘೊವಾಲಾಗಿ ಡೈವೊರ್ಸ್ ವಿಚಾರ್ಲೊ.
ಮಾಯ್ಕಾಲ್ ತಾಕಾ ಮ್ಹಣಾಲೊ ’ಆಪುಣ್ ಮೆಲ್ಯಾರಿ ತುಕಾ ಡೈವೊರ್ಸ್ ಕೆದ್ನಾಂಚ್ ದಿಂವ್ಚೊ
ನಾಂ’ ತುಜ್ಯಾ ಜಿವಿತಾಚಿ ದೆಸ್ವಾಟ್ ಕರ್ತೊಲೊಂ", ಅಶೆಂ
ಸಾಂಗೊನ್ ಹಾತಾಂತ್ಲೊ ಟಿ.ವಿ. ರಿಮೊಟ್ ಧರ್ನಿಕ್ ಮಾರ್ನ್ ಚಲ್ತೆತ್ ರಾವ್ಲೊ.
ಮಾಯ್ಕಾಲಾಚಿ ವಿಜಿಟ್ ವಿಜಾ ಕಾಬಾರ್ ಜಾಲ್ಲ್ಯಾನ್ ತಾಕಾ ಕುವೆಯ್ಟ್
ಸೊಡುಂಕ್ ಪಡ್ಲೆಂ. ಮಾರ್ಯೆಟಾನ್ ತಾಚ್ಯಾ ಹೊಟೆಲಾಚ್ಯಾ
ಮ್ಯಾನೇಜಾರಾ ಕಡೆನ್ ಉಲವ್ನ್ ಬುರ್ಗ್ಯಾಂಚೆಂ ರೆಸಿಡೆನ್ಸ್
ಮಾರ್ಲ್ಲೆಂ.
ಮಾಯ್ಕಾಲ್ ದುಸ್ರೊ ಉಪಾವ್ ನಾಸ್ತಾನಾ ಎಕ್ಲೊಚ್ಚ್
ಬೊಂಬಯ್ ಪಾಟಿಂ ಗೆಲ್ಲೊ.
ಮಾರ್ಯೆಟಾನ್ ಕೆದ್ನಾಂಚ್ ಚಿಂತುಂಕ್ ನಾತ್ಲ್ಲೆಂ ಆಪ್ಲೆಂ ಕಾಜಾರಿ ಜಿವಿತ್ ಫುಟುಲ್ಲ್ಯಾ ಎಕಾ ಆರ್ಸ್ಯಾ
ಪರಿ ದೆಸ್ವಾಟ್ ಜಾತೆಲೆಂ ಮ್ಹಣ್.
ಮಾಯ್ಕಾಲ್ ಆನಿಂ ಮಾರ್ಯೆಟ್ ಕಾಜಾರಿ ಜಿವಿತಾಂತ್ ವಿಂಗಡ್ ಜಾವ್ನ್, ವಿಂಗಡೆ ಜಿಯೆತಾಲಿಂ ತರೀ ತಾಂಚ್ಯಾ ಕಾಳ್ಜಾಂತ್ ಆನಿಂ
ಮನಾಂತ್ಚ್ಚ್ ತಿಂ ಎಕಾಮೆಕಾಕ್ ಚಿಂತ್ತಾಲಿಂ. ತಾಂಕಾಂ ಎಕಾಮೆಕಾಕ್
ವಿಸ್ರೊಂಚೆಂ ಕಷ್ಟಾಂಚೆಂ ಜಾಲ್ಲೆಂ. ದೊಗಾಂಯ್ ತಾಂಚೊ ಸ್ವಾಭಿಮಾನ್
ಸೊಡ್ನ್ ಎಕಾಮೆಕಾ ಲಾಗಿಂ ರಾಜಿ ಜಾಂವ್ಕ್ಯೀ ತಯಾರ್ ನಾತ್ಲ್ಲಿಂ.
ತಿಂ ದೊಗಾಂಯ್ ವಿಂಗಡ್ ಜಾವ್ನ್ ಆತಾಂ ೨೭ ವರ್ಸಾಂ ಜಾಲ್ಲಿಂ. ಮಾರ್ಯೆಟಾನ್ ಅಪ್ಲ್ಯಾ ಚೆಡ್ವಾಂಚೆಂ ಕಾಜಾರ್ ಜಾತೆಚ್ಚ್ ಕುವೆಯ್ಟ್
ಸೊಡ್ನ್ ರುಜಾಯ್ ಏಕ್ ಲ್ಹಾನ್ಶೆಂ ಘರ್-ಜಾಗೊ ಘೆವ್ನ್ ವಸ್ತಿ ಕರ್ತಾಲೆಂ. ತಾಚಿಂ ದೊಗಾಂಯ್ ಚೆಡ್ವಾಂ
ನ್ಯೂಜಿಲೇಂಡಾಂತ್ ಸೆಟಲ್ ಜಾಲ್ಲಿಂ. ಅವಯ್ಕ್ ಜಾಯ್ತೆ ಪಾವ್ಟಿಂ
ಸಾಂಗ್ತಾಲಿಂ "ಮಮ್ಮಿ ತುಂ ಎಕ್ಲಿಚ್ಚ್ ಗಾವಾಂತ್ ಕಿತ್ಯಾಕ್ ರಾವ್ತಾಯ್. ತುಂ
ಸಗ್ಳೆಂ ವಿಕುನ್ ಆಮ್ಚೆ ಸಾಂಗಾತಾ ಯೇವ್ನ್ ರಾವ್". ಪೂಣ್
ಮಾರ್ಯೆಟಾಕ್ ಆಪ್ಲ್ಯಾ ಉತಾರ್ ಪ್ರಾಯೆರ್ ಕೊಣಾಯ್ಚ್ಯಾ ಆಂಗ್ಸಾನೆಂತ್ ಜಿಯೆಂವ್ಕ್
ನಾಕಾ ಆಸ್ಲ್ಲೆಂ. ತೆಂ ತಾಚಾ ಘೊವಾ ಥಾವ್ನ್ ವಿಂಗಡ್ ಜಾಲ್ಲೆಂ ತರ್ಯೀ ದೆವಾಕ್ ಖಾಲ್ತೆಂ ಜಾವ್ನ್ ತಾಣೆಂ ಇತ್ಲಿಂ
ವರ್ಸಾಂ ಮಾನ್ ಆನಿಂ ಮಾನ್ಸುಗಿ ಸಾಂಬಾಳುನ್ ಆಪ್ಲ್ಯಾ ಚೆಡ್ವಾ
ಬುರ್ಗ್ಯಾಂಕ್ ತಾಣೆಂ ಫುಡಾರ್ ಜೊಡುನ್ ದಿಲ್ಲೊ.
********
ಮಾರ್ಯೆಟಾಕ್ ಪೊಲಿಸ್ ಸ್ಟೇಶಾನಾ ಥಾವ್ನ್ ಫೋನ್ ಆಯಿಲ್ಲ್ಯಾ ಉಪ್ರಾಂತ್
ನೀದ್ ಪಡನಾ ಜಾಲಿ. ತೆಂ ಲ್ಹಾನ್ ವ್ಹಡ್ ಕುವೆಯ್ಟ್ ಜಾವ್ನ್,
ಬೊಂಬಯ್ ತಾಣೆಂ ತಾಚೆಂ ಶಿಕಾಪ್ ಮುಖಾರ್ಸಿಲ್ಲೆಂ ತರೀ ತಾಕಾ
ಮಂಗ್ಳುರ್ಚಿ ಚಡ್ ಮಾಹೆತ್ ನಾತ್ಲ್ಲಿ. ಪೂಣ್ ತೆದಳಾ ತೆದಳಾ ಅಪ್ಲ್ಯಾ
ಬಯ್ಣಿ ದ್ವಾರಿಂ ತೆಂ ಮಯ್ಕಾಲಾ ವಿಶ್ಯಾಂತ್ ಖಬಾರ್ ಕಾಡಿತ್ತ್ ಆಸ್ತಾಲೆಂ.
ಮಾಯ್ಕಾಲ್ ಪರ್ತ್ಯಾನ್ ದುಬಾಯ್ ಪಾಟಿಂ ಗೆಲಾ ತೆಂಯೀ ತೆಂ ಜಾಣಾ ಆಸ್ಲ್ಲೆಂ.
ಮಾಯ್ಕಾಲ್ ಕಠಿಣ್ ಸೊರೊ ಪಿಯೆತಾ ಮ್ಹಳ್ಳೆಂ ಅಯ್ಕೊನ್ ತಾಕಾ ಚಡ್ ದೂಃಖ್
ಬೊಗ್ತಾಲೆಂ. ತೆಂ ತಾಚ್ಯಾ ಘೊವಾ ಪಾಸ್ವತ್ ಸದಾಂನಿತ್ ಮಾಗ್ತಾಲೆಂ.
ಮಾರ್ಯೆಟಾನ್ ಮಾಯ್ಕಲಾ ಸಾಂಗಾತಾ ಫಕತ್ ೮ ವರ್ಸಾಂ ಜಿಯೆಲ್ಲೆಂ ತರ್ಯೀ, ತೊ ತಾಚ್ಯಾ ಜಿವಿತಾಚೊ ಏಕ್ ಅಂಗ್ ಜಾಲ್ಲೊ.
೮ ವರ್ಸಾ ತಾಂಚಿಂ ಕಿತ್ಲಿಂ ಸೊಭಿತ್ ರಿತಿನ್ ಗೆಲ್ಲಿಂ. ಎಕಾಮೆಕಾ ಥೈಂ ಕಿತ್ಲಿ
ಸಮ್ಜೊಣಿ ಆಸ್ಲ್ಲಿ. ಫಕತ್ತ್ ಏಕಾ ದುಬಾವಾನ್, ತಾಂಚ್ಯಾ
ಸೊಭಿತ್ ಕುಟ್ಮಾಚಿ ದೆಸ್ವಾಟ್ ಕೆಲ್ಲಿ.
****
ಮಾರ್ಯೆಟ್ ಅಪ್ಲ್ಯಾ ಸಾದ್ಯಾ ಮುಸ್ತಾಯ್ಕೆರ್ ಪಾಂಡೇಶ್ವರ್
ಪೊಲಿಸ್ ಸ್ಟೇಶಾನಾಕ್ ಗೆಲೆಂ. ಥೈಂ ಥಾವ್ನ್ ತಾಕಾ ಶೀದಾ
’ಗವರ್ನ್ಮೆಂಟ್ ಆಸ್ಪತ್ರೆಚ್ಯಾ ಮೋರ್ಗಾಕ್ ವೆಲೆಂ’ ಮೊಡೆಂ ವಳ್ಕೊಂಕ್.
ಮಾರ್ಯೆಟಾಕ್ ಮೊಡೆಂ ವಳ್ಕೊಂಕ್ ಪಯ್ಲೆಂ ಇಲ್ಲೆಶೆಂ ಕಷ್ಟ್ ಜಾಲೆ ತರ್ಯೀ,
ಮಾಯ್ಕಾಲಾಚೆಂ ರುಪ್ಣೆಂ ಸಾಮ್ಕಾರ್ ದೊಳ್ಯಾಂ ಸಾಮ್ಕಾರ್ ಆಯ್ಲೆಂ.
ಮಾರ್ಯೆಟಾನ್ ಸಗ್ಳ್ಯೊ ಕಾರ್ಯಾವಳಿ ಕರುನ್ ಮೊಡೆಂ ಆಪ್ಲೆ
ಸ್ವಾದೀನ್ ಘೆತ್ಲೆಂ. ತೆದ್ನಾಂ ಪೊಲಿಸಾಂನಿ ತಾಚ್ಯಾ ಹಾತಿಂ ಮಾಯ್ಕಲಾಚ್ಯಾ
ಪೆಂಟಾಚ್ಯಾ ಬೊಲ್ಸಾಂತ್ ಮೆಳ್ಲ್ಲಿ ಪರ್ಸ್ ಕಾಡುನ್ ಮಾರ್ಯೆಟಾಕ್ ದಿಲಿ.
ಪರ್ಸಾಂತ್ ಪಯ್ಶೆ ನಾತ್ಲ್ಲೆ ಕಾಂಯ್ ಪೊಲಿಸಾಂನಿ ಕಾಡ್ಲ್ಲೆ ಜಾವ್ಯೆತ್
ಪೂಣ್ ಥೊಡಿ ವಿಜಿಟಿಂಗ್ ಕಾರ್ಡಾಂ ಆನಿಮ್ ಏಕ್ ಲ್ಹಾನ್ಶಿ ಟೆಲಿಫೋನಾಚಿ ಡೈರಿ ಆಸ್ಲ್ಲಿ.
ಪರ್ಸಾಚ್ಯಾ ಏಕಾ ಆಂಕನಾಂತ್ ಏಕ್ ಲ್ಹಾನ್ಶಿ ಚೀಟ್ ಆಸ್ಲ್ಲಿ ಅನಿಂ ತಾಚೆ
ಮಧೆಂ ಮಾರ್ಯೆಟಾಚಿ ಆನಿಂ ಮಾಯ್ಕಾಲಾಚಿ ಕಾಜಾರಾಚಿ ಲ್ಹಾನ್ ಫೊಟೊ ಆಸ್ಲ್ಲಿ.
ಮಾರ್ಯೆಟ್ ಮತಿಂತ್ಚ್ಚ್ ಚಿಂತಿಲಾಗ್ಲೆಂ ’ತುಂ ಮ್ಹಾಕಾ
ವಿಸ್ರೊಂಕ್ ನಾಂಯ್’.
ಮಾರ್ಯೆಟಾನ್ ಸಾದ್ಯಾ ರಿತಿನ್ ಮಾಯ್ಕಾಲಾಚೆಂ ಮೊರ್ನ್ ರುಜಾಯ್ ಕಾಥೆದ್ರಾಲಾಂತ್ ಕೆಲೆಂ.
ಮಾರ್ಯೆಟಾಚಾ ದೊಳ್ಯಾಂತ್ ದುಃಖಾಂ ಥೆಂಬೆ ದೆವ್ಲೆ ತರಿ ತಾಕಾ ಚಡ್ ದೂಃಖ್
ಬೊಗುಂಕ್ ನಾಂ. ತಾಣೆಂ ತಾಚಿಂ ಮೊಲಾಧಿಕ್ ವರ್ಸಾಂ ಮಾಯ್ಕಾಲಾಚಾ ಚಿಂತ್ನಾಂನಿಂ ಖರ್ಚಿಲ್ಲಿ, ತಾಚಾ
ಸಾಂಗಾತಾಂತ್ ನೈಂ.
ಮಾರ್ಯೆಟ್ ಇಗರ್ಜೆಂ ಥಾವ್ನ್ ಘರಾ ಆಯಿಲ್ಲೆಂಚ್ ಪೊಲಿಸಾಂನಿ
ದಿಲ್ಲ್ಯಾ ಮಾಯ್ಕಾಲಾಚಿ ಪರ್ಸ್ ತಪಾಸೊಂಕ್ ಲಾಗ್ಲೆಂ.
ಪಯೆಂ ತಾಣೆಂ ’ತಿ’ ಚೀಟ್ ಕಾಡ್ಲಿ ಅನಿಂ ವಾಚೊಂಕ್ ಲಾಗ್ಲೆಂ.
"ಮೊಗಾಳ್ ಮಾರ್ಯೆಟ್, ಹಿ ಚೀಟ್ ವಾಚ್ಚೆ ಪಯ್ಲೆಂ, ಮ್ಹಾಕಾ ದಯಾಕರುನ್ ತುಂ
ಮಾಫ್ ಕರ್. ಹಾಂವ್ ಜಾಣಾ, ಮ್ಹಜ್ಯಾ ದುಬಾವಾ ವರ್ವಿಂ
ಹಾಂವೆಂ ತುಕಾ ಆನಿಂ ಮ್ಹಜ್ಯಾ ನೆಣ್ತ್ಯಾ ಬುರ್ಗ್ಯಾಂಕ್ ಕಷ್ಟಾಂತ್ ಘಾಲೆಂ.
ಮ್ಹಜ್ಯಾ ದುಬಾವಾ ವರ್ವಿಂ ಹಾಂವ್ ಮಾನಸಿಕ್ ತರಾನ್ ವಳ್ವಳ್ಳೊಂ.
ಹಾಂವ್ ತುಜ್ಯೆ ಥಾವ್ನ್ ಪಯ್ಸ್ ರಾವ್ಲೊಂ ತರ್ಯೀ ,
ಪಯ್ಸ್ ಥಾವ್ನ್ ಹಾಂವೆಂ ತುಜೆರ್ ಪಾರೊ ದವರ್ಲೊ.
ಮಜ್ಯಾ ಲ್ಹಾನ್ಶ್ಯಾ ದುಬಾವಾಚೆಂ ಕೀಟ್ ಇತ್ಲೆಂ ಮಾರೆಕಾರ್ ಜಾವ್ನ್, ಆಮ್ಚ್ಯಾ
ಸುಖಿ ಜಿವಾನಾಚೆಂ ದೆಸ್ವಾಟ್ ಕರಿತ್ ಮ್ಹಣ್ ಹಾಂವೆಂ ಚಿಂತುಂಕ್
ನಾತ್ಲ್ಲೆಂ. ಮ್ಹಜೆ ಬಗಾರ್, ತುಂವೆಂ ಬೊರೆಂ ಶಿಕಾಪ್ ದೀವ್ನ್ ತಾಂಚೊ ಫುಡಾರ್ ಜೊಡುನ್
ದಿಲೊಯ್. ಹಾಂವ್ ತುಜೆ ಥಾವ್ನ್ ವಿಂಗಡ್ ಜಾಲೊ ತರ್ಯೀ,
ಮ್ಹಜ್ಯಾ ಜಿವಿತಾಂತ್ ತುಂ ಅಖೇರ್ ಪರ್ಯಾಂತ್ ಆಸ್ತೆಲೆಂಯ್. ದೇವ್ ಆಮ್ಕಾಂ ಏಕ್
ದೀಸ್ ಖಂಡಿತ್ ಜಾವ್ನ್ ಎಕಾಮೆಕಾ ಮೆಳಯ್ತೊಲೊ. ಮಾಕಾ
ಮಾಫ್ ಕರ್ ಮಾರ್ಯೆಟ್ ಮಜಾ ಚೂಕಿಕ್ ಅನಿಂ ಹಾಂವೆಂ ಕೆಲ್ಲ್ಯಾ ದೆಸ್ವಾಟೆಕ್’.
ಆತಾಂ ಮಾರ್ಯೆಟಾಚಾ ದೊಳ್ಯಾಂ ಥಾವ್ನ್ ಖರಿಂ ದುಃಖಾಂ ಗಳ್ಳಿಂ ಅನಿಂ
ಮ್ಹಣಾಲೆಂ ’ಹಾಂವೆಂ ತುಕಾ ಮಾಫ್ ಕೆಲಾಂ ಮಾಯ್ಕಾಲ್,
ಪೂಣ್ ಕಿತೆಂ ಫಾಯ್ದೊ ಆಮ್ಚ್ಯಾ ದೆಸ್ವಾಟೆಚೊ ಆಖೇರಿಚೊ ಆರ್ಸೊಯ್ ಫುಟೊನ್ ಭೆಸಾಂ ಜಾಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
