ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 11. ಫಾಸ್ಟ್ ಫಾರ್ವರ್ಡ್
ಮೆಲ್ವಿನ್ ಜೆ. ವಾಸ್
ಮನಿಸ್ ಮ್ಹಳ್ಳೊ ತೊ
ಮಾಂಕ್ಡಾ ಜಾತಿಂತ್ಲೊ ಮ್ಹಳ್ಯಾಕ್ ಡಾರ್ವಿನಾಚೊ ವಾದ್ ವಿಗ್ಯಾನಾಕ್
ಮನ್ಶಾ ಜಾತಿಚಾ ಯೆಣ್ಯಾಚೆಂ ಸತ್ ರುಜು ಕರುನ್ ದಾಖಯ್ತಾ ಮ್ಹಳ್ಳ್ಯಾಕ್
ಹಾಂವ್ ತರೀ ಖಂಡಿತ್ ಪಾತ್ಯೆನಾತ್ಲ್ಲೊಂ. ಕಾರಣ್ ಹಾಂವ್ ನಾಸ್ತಿಕ್
ಬಿಲ್ಕುಲ್ ನಹಿಂ. ಪುಣ್ ಹಾಂವೆಚ್ ಮ್ಹಜ್ಯೆ ಮಧೆಂ ಆನಿಂ ವಿಗ್ಯಾನ್
ಮಧೆಂ ಏಕ್ ಸೊಲ್ಲೊ ಕೆಲ್ಲೊ. ಜಶೆಂ ಎಕಾ ದರ್ಯಾಚೊ ದೋನ್ ತಡಿ.
ಪುಣ್ ಆತಾಂತಾಂ ಕಿತ್ಯಾಕ್ಗೀ ಮ್ಹಜ್ಯಾ ನಾಕಾಕ್ ಹೆಂ ನಾಸ್ತಿಕತೆಚೆಂ
ವಾರೆಂ ಚಡ್ಚ್ ವ್ಹಾಳೊಂಕ್ ಲಾಗ್ಲಾಂ. ಕಾರಣ್ ಮನ್ಶಾಕ್ ಅದ್ಯಾತ್ಮಿಕತಾಕ್
ಪಾವೊಂಕ್ ವೇಳ್ ನಾ ಮ್ಹಣೊನ್ ಬಿಲ್ಕುಲ್ ನಹಿಂ. ಬಗಾರ್
ಮನ್ಶ್ಯಾನ್ ಆಜ್ ಕರ್ಚಾ ತಾಚ್ಯಾ ಕರ್ತುಬಾಂನಿ ಹೆಂ ಮ್ಹಾಕಾ ಕಳೊನ್ ಆಯ್ಲಾಂ ಕಿ
ಮನಿಸ್ ಖಂಡಿತ್ ಜಾವ್ನ್ ಮಾಂಕ್ಡಾ ಜಲ್ಮಾ ಥಾವ್ನ್ಂಚ್ ಆಯಿಲ್ಲೊ.
ನಾಂ ಜಾಲ್ಯಾರ್ ಆತ್ತಾಂ ಹ್ಯಾ ರುಕಾರ್ ಥಾವ್ನ್ ತ್ಯಾ ರುಕಾಕ್,
ಹ್ಯಾ ಪಾರ್ಟೆ ಥಾವ್ನ್ ತ್ಯಾ ಪಾರ್ಟೆಕ್, ಹ್ಯಾ ಕ್ಯಾಬಿನಾ ಥಾವ್ನ್ ತ್ಯಾ ಕ್ಯಾಬಿನಾಕ್. ತೆಂಚ್ ಕಿತೆಂ ಆತ್ತಾಂ
ಹ್ಯಾ ಕೆಂಳ್ಬ್ಯಾ ಶಿರೊತಿ ಥಾವ್ನ್ ತ್ಯಾ ಬೊಶಿಯೆಕ್ ಆನಿಂ ಆತ್ತಾಂ ತ್ಯಾ ಬೊಶಿಯೆ ಥಾವ್ನ್ ತ್ಯಾ ಕೆಂಳ್ಬ್ಯಾ ಶಿರೊತೆಕ್ ಉಡೊಂಕ್
ವೆತೊಂ?
ಖಂಡಿತ್ ನಾಂ.
ತರ್ ಮನಿಸ್ ಆಶೆಂ ಉಡ್ತಾ ಕಿತ್ಯಾಕ್? ಆಪ್ಲ್ಯಾ ಜಾತಿಚೆಂ ಹಣೆಬರಪ್ ದಾಖಂವ್ಕ್? ಆಪುಣ್
ಮಾಂಕ್ಡಾ ಜಾತಿಚೊಚ್ ಮ್ಹಣೊನ್ ರುಜು ಕರುಂಕ್? ಭೋವ್ಶಾ ಡಾರ್ವಿನಾನ್
ಮಾಂಡ್ಲ್ಲ್ಯಾ ವಾದಾಪರಿಂ ಮ್ಹಜೊ ವಾದ್ ವಿಗ್ಯಾನಿಕ್ ರುಪಾನ್
ಸಂಪೂರ್ಣ್ ಜಾತಲೊ ಮ್ಹಣೊನ್ ಮ್ಹಾಕಾ ಭಗನಾ.
ಹ್ಯಾಚ್ ಖಾತಿರ್ ಹಾಂವ್ ಹಾಂಗಾಂ ಮ್ಹಜ್ಯಾ ವಯ್ಲ್ಯಾ ವಾದಾಕ್
ಸಂಪೂರ್ಣ್ ಕರ್ಚೆಂ ಖಾತಿರ್ ವಿಗ್ಯಾನಿಕ್ ಆನಿಂ ಅಧ್ಯಾತ್ಮಿಕ್ ಸಾಂಗಂತಾ ಘೆತಾಂ.
ಅಧ್ಯಾತ್ಮಿಕತೆಚಾ ಮ್ಹಜ್ಯಾ ಸಂಸ್ಕ್ರತೆಂತ್ ಏಕ್ ಚಲಿ ಜಲ್ಮೊನ್ ಯೆಂವ್ಚೆಂ ನಿಜಾಯ್ಕ್ಯ್
ವರ್ತೆಂ ಭಾಗೆವಂತ್ಪಣ್. ಹ್ ಯಾ ಭಾಗೆವಂತ್ಪಣ್. ಹ್ಯಾ ಭಾಗೆವಂತ್ಪಣಾಕ್ ತಾಚ್ಯಾ ಬಿಡಾರಾಕ್ ಅದೇವ್ಸ್ ಭಾಸಾಂವ್ಚೆಂ ಯಾ ಒಪ್ಸುನ್ ದಿಂವ್ಚೆಂ ನಿಜಾಯ್ಕ್ಯ್
ಸುಸಂಸ್ಕ್ರತೆಚೆಂ ಕಾರ್ಯೆಂ. ಕಾರ್ಯಿಂ ತಿಂ ಕಸಲಿಂಯ್ ಜಾಂವ್. ತ್ಯಾ ಕಾರ್ಯಾಚ್ಯೊ ರಿತಿ ರಿವಾಜಿ ಎಕಾ ಥಾವ್ನ್ ಎಕಾಕ್ ಚಡ್
ಪವಿತ್ರ್ ಆನಿಂ ಅರ್ಥಾಭರಿತ್. ಹ್ಯಾಚ್ ರಿತಿ ರಿವಾಜಿಕ್ ಪಾಳುನ್ ಆಯಿಲ್ಲಿ
ಮ್ಹಜಿ ಸಂಸ್ಕ್ರತಿ ನಿಜಾಯ್ಕ್ಯ್ ಅತಿ ಪವಿತ್ರ್.
ಹ್ಯಾ ಪವಿತ್ರ್ಪಣಾಂತ್ ವ್ಹಡ್ಪಣ್ ಮ್ಹಳ್ಳೆಂ ದಳ್ದಿರ್ಪಣ್ ಕಶೆಂ ಆಯ್ಲೆಂ ಕೋಣ್ ಜಾಣಾಂ?
ಹಾಂವ್ ಜಣಾಂ ವ್ಹಡ್ಪಣ್ ತೆದ್ನಾಂಯ್ ಆಸ್ಲ್ಲೆಂ. ಪುಣ್ ತೆಂ
ವ್ಹಡ್ಪಣ್ ಮ್ಹಜ್ಯಾ ಸಂಸ್ಕ್ರತೆಚೆಂ ದಳ್ದಿರ್ಪಣ್ ಜಾಂವ್ಕ್
ನಾತ್ಲ್ಲೆಂ. ಮ್ಹಜಿ ಸಂಸ್ಕ್ರತಿ ಲ್ಹಾನಾಂ ಆನಿಂ ವ್ಹಡಾಂ ಸಾಂಗಾಂತಾ
ಸದಾಂಚ್ ಗ್ರೇಸ್ತ್ ಜಾವ್ನ್ ಆಸ್ಲ್ಲಿ. ಅಸಲ್ಯಾ ಸಂಸ್ಕ್ರತೆಕ್ ಕಸಲಿ ವ್ಹಾಳಯ್ ದರ್ಲಿ
ಮ್ಹಣೊನ್ ಹಾಂವ್ ಥೊಡೆಂ ಥೊಡೆಂ ಜಣಾಂ ಜಾಲ್ಯಾರೀ ಹೆಂ ಕುರ್ಡ್ಯಾಂಕ್ ಕುಡ್ಕೊ ಉಕ್ಲುನ್ ದಾಕಂವ್ಚೆಂ ಖಂಡಿತ್
ಸಾರ್ಕೆಂ ನಹಿಂ.
ವ್ಹಡ್ಪಣ್ ಮ್ಹಳ್ಯಾರ್ ಹಾಂಗಾಸರ್ ಹಾಂವೆಂ ಸಾರ್ಕೆಂ ಸಾಂಗ್ಚೆಂ ಜಾಲ್ಯಾರ್
ಸವೆಂಚ್ ಆಯಿಲ್ಲ್ಯಾ ವ್ಹಡ್ಪಣಾಕ್ ತಾಕಾ ವಳಗ್ ಜಾಲ್ಲ್ಯಾನಿಂ ದಳಿದ್ರ್
ಪಣಾಂತ್ ಬದ್ಲಿಲೆಂ. ಹಾಚಿ ಸಾಕ್ಸ್ ಜಾವ್ನ್ ಆಜ್ ಹಾಂವ್ ಸಾಂಗೊ ಕಿತೆಂ?
ಹೆಂಚ್ ದಳಿದ್ರ್ಪಣ್ ಆತ್ತಾಂ ಹಾಂಗಾಂ ಆತ್ತಾಂ ಥಂಯ್. ಆತ್ತಾಂ ಕೆಂಳ್ಬ್ಯಾ ಶಿರೊತಿಕ್ ಆತಾಂ ಬೊಶಿಯೆಕ್ ಉಡ್ತಾ. ಉಡೊನ್ ಉಡೊನ್ ದಾಖಂವ್ಕ್
ಸೊಧ್ತಾಕೀ ಹಾಂವ್ ಪಯ್ಲೆಂ ಹಾಂಗಾಸರ್ ಆಸ್ಲ್ಲೊಂ. ಆತಾಂ
ಹಾಂವ್ ಥಂಯ್ಸರ್ ಆಸಾ. ತೊ ಸಾಂಗೊಂಕ್ ಆಶೆತಾ ಕಿ ಪಯ್ಲೆಂ
ಹಾಂವ್ ಶಿರೊತೆಂತ್ ಜೆವ್ತಾಲೊಂ ಆತಾಂ ಬೊಶಿಯೆಂತ್ ಜೆವ್ತಾಂ.
ವ್ಹಡ್ ನಾ ದೇವ್ ಬರೆಂ ಕರುಂ ಕೊಣಾಕ್ ಖಂಯ್ ಜಾಯ್ ಥಂಯ್ ರಾವ್ಯೆತ್. ಕೊಣಾಕ್ ಕಶೆಂ ಜಾಯ್ ತಶೆಂ ಜೆವ್ಯೆತ್.
ಹಾಂತುಂ ಹಾಂವೆಂ ಆಕ್ಶೇಪ್ ಕೆಲ್ಯಾರ್ ಖಂಡಿತ್ ಹಾಂವೆಂ ಕುಮ್ಸಾರ್ ಜಾಂವ್ಚೆಂ
ಪಡ್ತೆಲೆಂ ಕಿತ್ಯಾಕ್ ಮ್ಹಳ್ಯಾರ್ ಹಾಂವೆಂ ಪಯ್ಲೆಂಚ್ ಸಾಂಗ್ಲಾಂ.
ಹಾಂವ್ ನಾಸ್ತಿಕ್ ನಹಿಂ ಮ್ಹಣೊನ್.
ಕೊಣಾಕ್ ಕಶೆಂ ಜಾಯ್ ತಶೆಂ ರಾವ್ಯೆತ್ ಖಾವ್ಯೆತ್ ಪಿಯೆವ್ಯೆತ್
ನ್ಹೆಸ್ಯೆತ್ ಜಾಲ್ಲ್ಯಾರ್ ಆತಾಂ ವಿಷಯ್ ಕಸಲೊ?
ವಿಶಯ್ ತೊಚ್ಚ್. ಹಾಂವ್ ಆಶೆಂ ರಾವ್ತಾಂ, ಆಶೆಂ ಖಾತಾಂ, ಆಶೆಂ ಪಿಯೆತಾಂ, ಆಶೆಂ
ನ್ಹೆಸ್ತಾಂ, ಆನಿಂ ಆಶೆಂ ........ಸೊಡ್ಯಾಂ ತೆಂ ಆಮ್ಕಾಂ ನಾಕಾ. ಆಶೆಂ
ಮ್ಹಣೊನ್ ಸಂಸಾರಾಕ್ ದಾಖಂವ್ಚಿ ಗರ್ಜ್ ಕಸಲಿ?
ಆತಾಂ ಹಾಕಾ ಆನಿಂ ತ್ಯಾ ಡಾರ್ವಿನಾಚಾ ವಾದಾಕ್ ಸಂಭಂಧ್ ಕಸಲೊ?
ಹಾಂವ್ ಡಾರ್ವಿನಾಚೊ ವಾದ್ ಸಾರ್ಕೊ ಮ್ಹಣೊನ್ ರುಜು ಕರುಂಕ್ ಗೆಲ್ಲೊ.
ಪುಣ್ ಮಧೆಂಚ್ ಹೆಂ ದಳ್ದಿರ್ಪಣ್ ಆಡ್ ಆಯ್ಲೆಂ. ಹ್ಯಾ ದಳ್ದಿರ್ಪಣಾಕ್ ಉಕ್ಲುನ್ ಕಾಡುನ್ ದೆಗೆನ್ ದವರ್ಯಾಂ. ಕಿತ್ಲೆಂ ಕಾಡುನ್ ದೆಗೆನ್ ದವರ್ಲ್ಯಾರ್ಯ್
ಪರ್ತುನ್ ಪರ್ತುನ್ ಹೆಂ ಲಜ್ ನಾಸ್ತಾನಾ ಮಧೆಂಚ್ ಯೆತಾ. ಆಪ್ಲೆಂ
ವ್ಹಡ್ಪಣ್ ದಾಖಂವ್ಕ್ ಜಾಯ್ ನೆಂ. ದಾಖಯ್ನಾ ಜಾಲ್ಯಾರ್ ಕೊಣಾಯ್ಕ್ ಕಳಾತ್ ತರಿ ಕಶೆಂ?
ಹಾಂಕಾ ತಾಂಕಾ ಕಳ್ಚೆಂ ಬಾರಿಚ್ಚ್ ಗರ್ಜೆಚೆಂ. ನಾಂ ಜಾಲ್ಯಾರ್ ಮ್ಹಜ್ಯಾ ರೊಸಾಕ್
ಹಜಾರ್ ಲೋಕ್ ಆಸ್ಲ್ಲೊ ಮರ್ಣಾಕ್ ಬ್ಯಾಂಡ್ ಆಸ್ಲ್ಲೆಂ ಕಾಜಾರಾಕ್ ಧಾ
ಪಾದ್ರಿ ಚಾರ್ ಬ್ಯಾಂಡಾ ಆಸ್ಲ್ಲಿಂ, ಘರಾಚಾ ದಾರಿಯಾಂಕ್ ಕಡ್ಚಿಲ್,
ಹರ್ಧ್ಯಾ ವಯ್ರ್ ಧಾ ಕಿಲ್ಯಾ ತೂಕ್, ಕುಲ್ಯಾಂ ವಯ್ಲೆಂ ಕಾಳೆಂ ತಿಕ್ ಕೊಣಾಯ್ಕ್ಯ್ ಆಸಾ
ಮ್ಹಣೊನ್ ಕಳ್ಚೆ ತರಿ ಕಶೆಂ?
ಹ್ಯಾ ಸರ್ವಾಂ ಮಧೆಂ ಮ್ಹಜ್ಯಾ ಆಬಾಚಾ ತೆಂಪಾರ್ ಗಿರೆಸ್ತ್ಪಣಾಚಾ ಶಿಖರಾರ್
ವೈಭವಾನ್ ಪರ್ಜಳ್ಚಿ ಮ್ಹಜಿ ಮೊಗಾಳ್ ಸಂಸ್ಕೃತಿ
ಹಾಂಗಾ ಆತಾಂ ಚಿಡ್ಡುನ್ ಮುಡ್ಡುನ್ ಉಮ್ಕಾಳ್ನ್ ಪಡೊನ್ ತ್ಯಾಚ್ ದಳ್ದಿರ್ ತುಕಾಕ್ ಆನಿಂ ಥಿಕಾಕ್
ಸೊಸುನ್ ಸೊಸುನ್ ಆಪ್ಲೊ ವೈಭವ್ ಹೊಗ್ಡಾವ್ನ್ ಆತ್ತಾಂ ಥಂಯ್ ಆತ್ತಾಂ
ಹಾಂಗಾ ಮ್ಹಳ್ಳ್ಯಾ ಪರಿಂ ಜಾಂವ್ಕ್ ಪಾವ್ಲ್ಯಾ.
ಮಾಂಕ್ಡಾ ಥಾವ್ನ್ ಮನಿಸ್ ಜಾಲ್ಲೊ ಮ್ಹಣ್ತಾನಾ ಹಿ ಬದ್ಲಾವಣ್ ಖಂಡಿತ್
ಸಾರ್ಕಿ ಮ್ಹಣೊನ್ ಮ್ಹಾಕಾಯ್ ವಳ್ಕೊಂಕ್ ಪಡ್ತಾ.
ಪುಣ್ ಹಾಂಗಾಸರ್ ಹೆಂ ವಳ್ಕೊನ್ ಘೆಂವ್ಕ್ ಮ್ಹಾಕಾ ಕಿತ್ಯಾಕ್ಗಿ ಕಷ್ಟ್
ಮಾರ್ತಾತ್. ಮಾಂಕ್ಡಾ ಪರಿಂ ಕಿತ್ಲೊ ಮಾಂಡೊ ಕೊರ್ಪುನ್ ಚಿಂತ್ಲ್ಯಾರ್ಯ್
ಮಿಸ್ತೆರ್ಚ್ ಸಮ್ಜಾನಾಂ.
ಮಾಂಕ್ಡಾ ಥಾವ್ನ್ ಮನಿಸ್ ಜಾಂವ್ಕ್ ಕಿತ್ಲೆಂಗಿ ಮಿಲಿಯನ್
ವರ್ಸಾಂ ಲಾಗ್ಲಿಂ.....! ಮ್ಹಜಿ ಸಂಸ್ಕ್ರತಿ ಬದ್ಲುಂಕ್ ಹ್ಯಾಚ್
ಮನ್ಶಾಕ್ ಥೊಡಿಂಚ್ ವರ್ಸಾಂ ಪುರೊ ಜಾಲಿಂ....!! ಮಾಂಕ್ಡಾಚ್ಯಾ
ಬುದ್ವಂತ್ಕಾಯೆ ಪ್ರಾಸ್ ಮನ್ಶಾಚಿ ಬುದ್ವಂತ್ಕಾಂಯ್ ಧಾ
ಮಾಪಾನಿಂ ಚಡ್ ಆಸಾ ತೆಂ ಏಕ್ ಕಾರಣ್ಯ್ ಹ್ಯಾ Fast Forward
ಕ್ ಕಾರಣ್ ಜಾಂವ್ಕ್ ಪುರೊ.
ಪುಣ್ ವಿಜ್ಮಿತ್ಕಾಯೆಚಿ ಗಜಾಲ್ ಮ್ಹಳ್ಯಾರ್ ಹೊಚ್ ಮನಿಸ್
ಪರ್ತ್ಯಾಕ್ ತ್ಯಾಚ್ ಆದ್ಲ್ಯಾ ಸಂಸ್ಕ್ರತೆಕ್ ತ್ಯಾ ರಂಗ್ ಮಂಚಾರ್ ದಾಖಂವ್ಕ್
ಲಾಗ್ಲಾ. ತ್ಯಾ ಶೊಕೇಸಿಂತ್ ದವರ್ನ್ ದಾಖಂವ್ಕ್ ಆರಂಭ್ ಕೆಲಾಂ. ಜಶೆಂ
ಮನ್ಶಾನ್ ಮಾಂಕ್ಡಾಕ್ಚ್ ಪಿಂಜ್ರ್ಯಾತ್ ಬಾಂಧುನ್ ದಾಖಂವ್ಚಾ
ಪರಿಂ.
ಕಿತ್ಲ್ಯಾ ಸಂತೊಸಾಚಿ ಗಜಾಲ್....!
ಹೊಚ್ ದಳ್ದಿರ್ ವ್ಹಡ್ಪಣಾಕ್ ವೆಂಗ್ಲ್ಲೊ ಆಪ್ಲಿಚ್ ಸಂಸ್ಕ್ರತಿ ಬದ್ಲುನ್ ಆತಾಂ
ನವ್ಯಾನ್ ತ್ಯಾಚ್ ಆದ್ಲ್ಯಾ ವೈಭವಾಂತ್ಲ್ಯಾ ಮ್ಹಜ್ಯಾ
ಸಂಸ್ಕ್ರತೆಕ್ ಆಪ್ಲ್ಯಾ ದಳ್ದಿರ್ಪಣಾಚಿ ರುಜ್ವಾತ್ ಜಾವ್ನ್
ಸಾದರ್ ಕರುಂಕ್ ಲಾಗ್ಲಾ.
ವ್ಹಾರೇ ತುಜ್ಯಾ ವ್ಹಡ್ಪಣಾ ಆನಿಂ ಮ್ಹಜ್ಯಾ ಸಂಸ್ಕ್ರತೆಚಾ ಅಸಹಾಯಕ್
ಪಣಾ...!
ಆನಿಂ ತುಂ ತ್ಯಾ ಪಿಂಜ್ರ್ಯಾಂತ್ಲ್ಯಾ ಮಾಂಕ್ಡಾ. ಪಳೆಯ್ಲೆಂಯ್ಮೂ ತುಂಚ್
ಮ್ಹನ್ಶಾಕುಳಾಚೊ ಬಾಪುಯ್ ಮ್ಹಣೊನ್ ಹ್ಯಾ ಮನ್ಶಾನ್ ಕಸಿ ರುಜ್ವಾತ್ ದಾಖಯ್ಲಿ.
ತರ್ ಸಾಂಗ್ರೆ ಮ್ಹಾಕಾ ಹಾಂವೆಂ ಆನಿಂ ಕಿತ್ಲಿಂ ವರ್ಸಾಂ ಆಶೆಂಚ್ ಕಾಡುಂಕ್
ಪಡ್ತೆಲಿಂ. ಮನ್ಶಾನ್ ಪರ್ತ್ಯಾಕ್ ಮಾಂಕೊಡ್ ಜಾಂವ್ಕ್ ಆನಿಂ ತುಜ್ಯೆ
ಪರಿಂ ಪಿಂಜ್ರ್ಯಾತ್ ವಿಶೆವಾಕ್ ರಿಗೊಂಕ್?
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
