ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಫ್ತ್ಯಾಚಿ ಕಥಾ: ಫರಾಮಸ್
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹೆರ್ ಕಾಣ್ಯೊ: ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ, ಮ್ಹಜ್ಯೆ ಆವಯ್ ಖಾತಿರ್, ಕಾಳಿಜ್, ನಿರ್ಧಾರ್, ಅಖ್ರೇಚಿ ರಾತ್
ಎಚ್.ಜೆ.ಗೋವಿಯಸ್
“ಮ್ಯಾಕ್ಲಿನ್....., ಫೊನ್ ತುಕಾ......” ಜೈನಿಕಾನ್ ಸಾಕಾಳಿಂ ಫುಡೆಂ ಜಾಗೈತಾನಾ, ಮ್ಯಾಕ್ಲಿನ್ ಎಕಾಚ್ಫರಾ ಉಟೊನ್ ಬಸ್ಲೊ.
“ಕೊ....ಕೊಣಾಚೊ?.....” ದೊಳೆ ಗಷ್ಟುನ್ ತೊ ವಿಚಾರಿಲಾಗ್ಲೊ.
“ಆನಿ ಕೋಣ್ ತುಕಾ ಫೊನ್ ಕರಿತ್ ಹ್ಯಾ ಗಾಂವಾಂತ್......? ತೊಚ್ ತುಜೊ ರಾಯಾನ್ ಮ್ಹಳ್ಳೊ ಮಿತ್ರ್, ಜಾಚೆ ವಿಶೆಂತ್ ಕಾಲ್ ಸಗ್ಳಿ ರಾತ್ ಉಲೈತಾಲೊಯ್. ಆಮಿ ಹಾಂಗಾ ಆಯಿಲ್ಲ್ಯಾಂವ್ ಹನಿಮೂನಾಕ್ ಆನಿ ಪಯ್ಲ್ಯಾ ದಿಸಾಚ್ ತುಕಾ ತುಜಾ ಮಿತ್ರಾನ್ ಮ್ಹಜೆ ಥಾವ್ನ್ ಮಯ್ಲಾ ಪಯ್ಸ್ ದವರ್ಲಾಂ” ಜೈನಿಕ್ ಮೊಗಾಚಾ ಕೊಂಡಾಟ್ಯಾನ್ ಮ್ಯಾಕ್ಲಿನಾಕ್ ದುರ್ಸಾಲೆಂ.
ಮ್ಯಾಕ್ಲಿನ್, ಜೈನಿಕಾಚೆಂ ಉಲೊಣೆಂ ಪರ್ವಾ ಕರಿನಾಸ್ತಾಂ, ತಾಚಾ ಗಾಲಾರ್ ಏಕ್ ಉಮ್ಹೊ ದಾಂಬೂನ್, ಫೊನಾರ್ ಆಯ್ಲೊ. “ಹಾ......ಹಲೊ.....” ಮ್ಯಾಕ್ಲಿಮ್ ಗಾಗೆಲೊ.
“ಹಲೊ..... ಹಲೊ....., ಆನಿಕಿ ನಿದೆಂತ್ ಆಸಾಯ್ ಕಿತೆಂ.....?” ರಾಯನ್ ಮ್ಹಣಾಲೊ ಹನಿಮೂನಾಕ್ ಹಾಂವ್ಯಿ ಮ್ಹಜಿ ಹೊಕಾಲ್ ಸಿಮಿಲನಾಸಂಗಿಂ ಆಯ್ಲಾಂ, ಪುಣ್ ತುಜೆಪರಿಂ ವ್ಹೊರಾಂ ನೋವ್ ಜಾಲ್ಯಾರಿ ನಿದೊನ್ನಾ. ಉಟೊನ್ ನಾಷ್ಟೊ ಕರುನ್ಯಿ ಜಾಲಾ. ಚಲ್ ಊಟ್ ವೆಗ್ಗಿಂ ಆನಿ ಭಾಯ್ರ್ ಸರ್.
“ಖಂಯ್......?”
“ಭಂವೊಂಕ್ಯಾ, ಮ್ಹಾಕಾ ತುಜೆ ಕಡೆನ್ ಮಸ್ತು ಉಲಂವ್ಕ್ ಆಸಾ. ಕಾಲ್ ಆಮ್ಸೊರಾನ್ ಆಸ್ಲ್ಲ್ಯಾನ್ ಚಾನ್ಸ್ ಮೆಳೊಂಕ್ನಾ. ಜೈನಿಕ್ ಆನಿ ಸಿಮಿಲನ್ ಸಾಂಗಾತಾ ಮೆಳೊನ್ ಹನಿಮೂನಾ ವಿಶಿಂ ಎಕಾಮೆಕಾಚೆ ಪಾಂಯ್ ವ್ಹಡ್ತೆಲಿಂ ಆನಿ ಆಮಿ ಮೆಳೊನ್ ಅಕಾಮೆಕಾಚೆ ಹಾಲ್-ಚಾಲ್ ಆನಿ ಕಾಜಾರಾ ಉಪ್ರಾಂತ್ಲಿ ಮಾಜಾ-ಸಜಾ ಇತ್ಯಾರ್ಥ್ ಕರ್ಯಾಂ......”
“ಮ್ಹಾಕಾ ಥೊಡ್ಯಾ ಕಾಮಾನ್ ಭಾಯ್ರ್ ವಚುಂಕ್ ಆಸಾ. ದೆಕುನ್ ತುಮಿ ವಚುನ್ ಯೆಯಾತ್, ಆನ್ಯೆಕ್ ಪಾವ್ಟಿಂ ಪಳಯಾಂ.......” ಮ್ಯಾಕ್ಲಿನ್ ನೀಬ್ ದೀವ್ನ್ ಸಾಂಗಾಲಾಗ್ಲೊ.”
“ತರ್, ಸಾಂಜೆರ್ ‘ಸನ್ ಆಂಡ್ ಮೂನ್’ ಹೊಟೆಲಾಂತ್ ತುಮ್ಕಾಂ ರಾಕ್ತಾಂ. ತುಮಿ ಯೇಂವ್ಕ್ಚ್ ಜಾಯ್....” ಉತ್ರಾಂ ಸಂಗಿಂ ರಾಯಾನಾನ್ ಫೊನ್ ಬಂದ್ ಕೆಲೆಂ.
ಮ್ಹಾಕ್ಲಿನ್ ಫೊನ್ ಆಯ್ಕೊನ್ ಬೆಜಾರಾಯೆನ್ ಘುಂವ್ತಾನಾ, ಜೈನಿಕ್ ವಿಚಾರಿಲಾಗ್ಲೆಂ - “ಕಿತೆಂ ಜಾಲೆಂ ಮೊಗಾ? ತುಂ ಎಕ್ದಮ್ ಥಂಡ್ ಪಡ್ಲೊಯ್.....?”
“ಭಾಯ್ರ್ ಭಂವೊಂಕ್ಯಾ ಮ್ಹಣ್ ಸಕಾಳಿಂ ಫುಡೆಂ ಫೊನ್ ಕರುನ್ ರಾಯಾನ್ ಸಾಂಗ್ತಾಲೊ. ಹಾಂವೆಂ ಯೇಂವ್ಕ್ ಜಾಯ್ನಾ ಮ್ಹಣ್ ನೀಬ್ ದಿಲೆಂ ತರೀ, ಸಾಂಜೆರ್ ‘ಸನ್ ಆಂಡ್ ಮೂನ್’ ಹೊಟೆಲಾಂತ್ ರಾಕ್ತಾಂ ಮ್ಹಣ್ ಫೊನ್ ಬಂಧ್ ಕೆಲೆಂ ತಾಣೆ. ಮ್ಹಾಕಾ ಮನ್ನಾ ತರೀ, ವಚುಂಕ್ ಪಡ್ತೆಲೆಂ......” ಮ್ಯಾಕ್ಲಿನ್ ಖಂತಿನ್ ಸಾಂಗಾಲಾಗ್ಲೊ.
“ವ್ಹಡ್ನಾ,ಮಾ......” ಜೈನಿಕ್ ಮ್ಯಾಕ್ಲಿನಾಕ್ ತುಕ್ಲಾವ್ನ್ ಮ್ಹಣಾಲೆಂ- “ತಾಜ್ ಮಹಾಲ್ ಪಳಂವ್ಚ್ಯಾ ನಿಬಾನ್ ಹನಿಮೂನಾಕ್ ಬೊಂಬೈಥಾವ್ನ್ ತುಂ ಮ್ಹಾಕಾ ಹಾಂಗಾ ಹಾಡುನ್ ಆಯ್ಲಾಯ್......, ಪಯ್ಶ್ಯೆ ಉರಂವ್ಚ್ಯಾ ಆಶೆನ್. ಪಯ್ಲೆಂ ಸಾಂಗ್ಲ್ಲೆಂಯಿ, ತುಕಾ ಹೊಂಗ್ಕೊಂಗ್ ವರ್ತಾಂ....ಸಿಂಗಾಪುರ್ ವರ್ತಾಂ ಮ್ಹಣ್...... ಹೆಂ ಹೊಟೆಲ್ ಸೈತ್ ಸವಯ್ ಸೊಧ್ಲಾಂಯ್......., ತುಜೊ ಮಿತ್ರ್ ಸೈತ್ ತುಜೆ ಪ್ರಾಸ್ ಉಣ್ಯಾ ಮಟ್ಟಾಚೊ, ಆಪ್ಲೆಂ ಹನಿಮೂನ್ ‘ಸನ್ ಆಂಡ್ ಮೂನ್’5 ಸ್ಟಾರ್ ಹೊಟೆಲಾಂತ್ ಕರುನ್ ಆಸಾ. ತಾಣೆ ಆಪಯಿಲ್ಲ್ಯಾ ನಿಬಾನ್ ತರೀ ಥಂಯ್ ವಚುನ್ ಜೇವ್ನ್, ಯಾ.....”
ಮ್ಯಾಕ್ಲಿನ್ ಜಾಪ್ ದೀನಾಸ್ತಾಂ ತುವಾಲೊ ಘೆವ್ನ್ ಬಾತ್ ರುಮಾಕ್ ಗೆಲೊ.
*************
‘ಸನ್ ಆಂಡ್ ಮೂನ್’ ಹೊಟೆಲಾಂತ್ಲ್ಯಾ ‘ಡಾನ್ಸ್ ಆಂಡ್ ಡಾಯ್ನ್’ ಬಾಲ್ರುಮಾಂತ್ ರಾಯಾನಾಚಿ ಹೊಕಾಲ್ ಸಿಮಿಲನ್ ಮ್ಯಾಕ್ಲಿನಾಚಾ ವೆಂಗೆಂತ್ ದಲೊನ್ ಆಸ್ಲ್ಲೆಂ. ತೆಣೆ, ಮ್ಯಾಕ್ಲಿನಾಚಿ ಹೊಕಾಲ್ ಜೈನಿಕ್ ರಾಯಾನಾಸಂಗಿಂ ನಾಚೊನ್ ಆಸ್ಲ್ಲೆಂ.
“ಕಿತೆಂ ಚಿಂತಾಯ್...... ಮ್ಹಾಕಾ ರಾಯಾನಾಸಂಗಿಂ ಹಾಂಗಾಸರ್ ಅಚಾನಕ್ ಪಳವ್ನ್ ತುಜಿಂ ಅಂತರ್ಮಾಳಾಂ ಉಡ್ಲಿಂ.....?” ಸಿಮಿಲನ್ ಮ್ಯಾಕ್ಲಿನಾಚಾ ಕಾನಾಂತ್ ಪುಸ್ಪುಸ್ಲೆಂ.
“ತಶೆಂ ಕಾಂಯ್ನಾ, ಹಾಂವ್ ಜಾಣಾಂ ತುಜೆಂ ಕಾಜಾರ್ ಆದ್ಲ್ಯಾಚ್ ಮಹಿನ್ಯಾಂತ್ ರಾಯಾನಾಸಂಗಿಂ ಜಾಲಾಂ ಮ್ಹಣ್.....” ಮ್ಯಾಕ್ಲಿನ್ ಭಂವ್ತೊಣಿ ದೀಷ್ಟ್ ಘಾಲುನ್ ಸವ್ಕಾಸ್ ಮ್ಹಣಾಲೊ. “ಪುಣ್ ತುಮಿಯಿ ಹನಿಮೂನಾಕ್ ಹ್ಯಾಚ್ ಗಾಂವಾಕ್ ಆಯ್ಲ್ಯಾತ್ ಮ್ಹಳ್ಳೆಂ ಕಾಲ್ ರಾಯಾನ್ ಮೆಳ್ಲ್ಲೆ ತವೊಳ್ ಕಳ್ಲ್ಲೆಂ. ಹಾಂವ್ ತುಜೆ ಮುಖಾರ್ ಪಡ್ಚ್ಯಾ ಪಯ್ಲೆಂ ಹಾಂಗಾಥಾವ್ನ್ ವಚುಂಕ್ ಚಿಂತಾಲೊಂ. ಪುಣ್ ಸಕಾಳಿಂ ಫುಡೆಂ ರಾಯಾನಾನ್ ಮ್ಹಾಕಾ ಹೊಟೆಲಾಕ್ ಫೊನ್ ಕರುನ್ ಆಪಯ್ಲೆಂ.....ಮ್ಹಾಕಾ ಯೇಂವ್ಕ್ ಮನ್ ನಾತ್ಲ್ಲೆಂ.....”
“ತುಂವೆಂ ಮ್ಹಜೆಸಂಗಿಂ ತಶೆಂ ಕಿತ್ಯಾಕ್ ಜಾಂವ್ಕ್ ಸೊಡ್ಲೆಂಯ್ ಮಿಕ್ಕಿ.....?” ಸಿಮಿಲನ್ ಮದೆಂಚ್ ಮ್ಯಾಕ್ಲಿನಾಚ್ಯಾ ದೊಳ್ಯಾಂನಿ ದೊಳೆ ರಿಗವ್ನ್ ಉಮಾಳ್ಯಾಂನಿ ಮ್ಹಣಾಲೆಂ.
“ಜಾಲ್ಲೆಂ ಜಾವ್ನ್ ಗೆಲಾಂ, ಆತಾಂ ಆಮಿ ದೊಗಾಂಯ್ ಕಾಜಾರಿ....., ಪಯ್ಲೆಂಚೆಂ ವಿಸ್ರುಂಚಾಂತ್ಚ್ ಆಮ್ಚೆಂ ಬರೆಂಪಣ್ ಆಸಾ.....”
“ಕಾರಣ್ ನಾಸ್ತಾಂ ತುಂ ಮ್ಹಜೆಥಾವ್ನ್ ಪಯ್ಸ್ ದಾಂವ್ಲ್ಲೊಯ್, ಹಾಂವ್ ತುಕಾ ಆನಿಕಿ ವಿಸ್ರುಂಕ್ನಾ...”
“ಪ್ಲೀಜ್ ಸಿಮಿಲನ್...., ಆತಾಂ ತಶೆಂ ಚಿಂತ್ಚೆಂಯಿ ಪಾತಕ್ ಜಾವ್ನಾಸಾ. ರಾಯಾನ್ ಮ್ಹಜೊ ಬರೊ ಮಿತ್ರ್. ತೊ ತುಕಾ ಮ್ಹಜೆಪ್ರಾಸ್ ಚಡ್ ಮೊಗಾನ್ ಪಳಯ್ತಲೊ.......”
“ಸಿಮಿಲನ್....? ಮ್ಹಜೆಂ ಮೊಗಾನ್ ಆಪಂವ್ಚೆಂ ನಾಂವ್ ಸೈತ್ ತುಂ ವಿಚ್ರಾಲೊಯ್? ಸಿಮಿಮೊಗಾ ಸಿಮಿಮೊಗಾ ಮ್ಹಣ್ ತುಜಿ ಜೀಬ್ ಥಕಾನಾತ್ಲ್ಲಿ....., ಆನಿ ಆತಾಂ.....”
“ತೆಂ ವಿಸ್ರುಂಚೆಂ ಪ್ರಯಾತ್ನ್ ಕರ್ ಸಿಮಿಲನ್, ಆತಾಂ ತುಂ ರಾಯಾನಾಚಿ ಬಾಯ್ಲ್ ಜಾವ್ನಾಸಾಯ್....”
“ಹಾಂವ್ ಪ್ರಯತ್ನ್ ಕರ್ತೆಲಿಂ....., ಪುಣ್ ತ್ಯಾ ಪಯ್ಲೆಂ ತುಂವೆಂ ಮ್ಹಾಕಾ ಸಾಂಗೊಂಕ್ ಜಾಯ್, ಹಾಂವೆಂ ಕಿತೆಂ ಚೂಕ್ ಕೆಲ್ಲಿ? ಜರ್ತರ್ ತುಕಾ ಮ್ಹಜೆ ಕಡೆನ್ ಕಾಜಾರ್ ಜಾಂವ್ಕ್ ನಾಕಾ ಆಸ್ಲ್ಲೆಂ, ತರ್ ತುಂವೆಂ ಮ್ಹಜೊ ತಿತ್ಲೊ ಮೋಗ್ ಕಿತ್ಯಾಕ್ ಕೆಲ್ಲೊಯ್? ತಿತ್ಲ್ಯೊ ಬಾಸಾವ್ಣ್ಯೊ ಕಿತ್ಯಾಕ್ ದಿಲ್ಲ್ಯೊಯ್....? ಆನಿ ತ್ಯಾ ರಾತಿಂ ಮ್ಹಜೆಸಂಗಿಂ ನಿದೊನ್, ಮ್ಹಜೆಂ ನಿಸ್ಕಳ್ಪಣ್ ಕಿತ್ಯಾಕ್ ಚೊರ್ಲ್ಲೆಂಯಿ....?”
“ಹಾಂವ್ ತ್ಯಾ ವಿಶಿಂ ಕಾಂಯ್ ಸಾಂಗೊಂಕ್ ಸಕಾನಾ......” ಎಕಾಚ್ಫರಾ ಮ್ಯಾಕ್ಲಿನ್ ಸಿಮಿಲನಾಕ್ ಸೊಡುನ್ ಹೊಲಾಭಾಯ್ರ್ ಗೆಲೊ.
“ತುಂವೆಂ ಸಾಂಗೊಂಕ್ಚ್ ಪಡ್ತೆಲೆಂ......” ಪಟಾಪಟ್ ಸಿಮಿಲನ್ಯಿ ಭಾಯ್ರ್ ಆಯ್ಲೆಂ ಆನಿ ಮ್ಯಾಕ್ಲಿನಾಚೊ ಹಾತ್ ಧರುನ್ ಭರ್ಲ್ಲ್ಯಾ ತಾಳ್ಯಾನ್ ಮ್ಹಣಾಲೆಂ. “ಹಾಂವ್ ತುಕಾ ಆತಾಂಯ್ ಆಶೆತಾಂ....., ತುಜೊ ಮೋಗ್ ಆತಾಂಯ್ ಕರ್ತಾಂ. ಹ್ಯಾ ಖಾತಿರ್ ತರಿ, ಮ್ಹಜೆರ್ ದಯಾ ಕರುನ್ ಸಾಂಗ್ಕಿ, ತುಂ ಮ್ಹಜೊ ಮೋಗ್ ಕರಿನಾತ್ಲ್ಲೊಯ್ ಮ್ಹಣ್? ತ್ಯಾ ಉಪ್ರಾಂತ್ ಹಾಂವ್ ತುಕಾ ವಿಸ್ರುಂಚೆಂ ಪ್ರಯಾತ್ನ್ಂಚ್ ನ್ಹಯ್, ಬಗಾರ್ ಕೆದ್ನಾಂಯಿ ತುಜೆ ಮುಖಾರ್ ಸೈತ್ ಪಡ್ಚಿನಾ.....”
“ಹಾಂವ್ ತುಜೊ ಮೋಗ್ ಕರಿನಾತ್ಲ್ಲೊಂ.......” ಮ್ಯಾಕ್ಲಿನಾನ್ ಸಿಮಿಲನಾಚೊ ಹಾತ್ ಸೊಡಯ್ಲೊ.
ದುಖಾಂ ಭರ್ಲ್ಲ್ಯಾ ದೊಳ್ಯಾಂನಿ ಘಡಿಬರ್ ಸಿಮಿಲನ್ ಮ್ಯಾಕ್ಲಿನಾಕ್ ಪಳಯ್ಲಾಗ್ಲೆಂ. ಉಪ್ರಾಂತ್ ಜಾಪ್ ಕಾಡಿನಾಸ್ತಾಂ ಭಿತರ್ ವಚುಂಕ್ ಘುಂವ್ಲೆಂ.
ಮುಖಾರ್ ರಾಯಾನ್ ಉಬೊ ಆಸ್ಲ್ಲೊ!
“ತೊ ಫಟಿ ಮಾರ್ತಾ, ತೊ ತುಜೊ ಮೋಗ್ ಆತಾಂಯಿ ಕರ್ತಾ......” ರಾಯಾನ್ ಮುಖಾರ್ ಸರೊನ್ ಮ್ಹಣಾಲೊ. “ಹ್ಯಾ ಸರ್ವ್ ಸಂಗ್ತಿಂಕ್ ಮುಖ್ಯಾ ಕಾರಣ್ ಹಾಂವ್.....”
“ರಾಯಾನ್......” ಮ್ಯಾಕ್ಲಿನ್ ಎಕಾಚ್ಫರಾ ರಾಯಾನಾಕ್ ಆಡಾವ್ನ್ ಮುಖಾರ್ ಆಯ್ಲೊ. “ದೆವಾ ಖಾತಿರ್ ವಗೆಚ್ರಾವ್, ಆಪ್ಲ್ಯಾಚ್ ಹಾತಾ೦ನಿ, ಆಪ್ಲೆಂ ಘರ್ ಝಳಯ್ನಾಕಾ.....”
“ತುಜಿ ಜಿಣಿ ಹಾಂವೆಂ ಹುಲ್ಪಾಯ್ಲ್ಯಾ ಮ್ಯಾಕ್ಲಿನ್......, ಆನಿ ತುಂ ಮ್ಹಜೆಂ ಘರ್ ಝಳ್ಚೆಂ ಪಳಂವ್ಕ್ಯಿ ತಯಾರ್ ನಾಂಯ್.....?”
ಸಿಮಿಲನ್ ಕಾಲುಬುಲೆಂ ಜಾವ್ನ್ ದೊಗ್ಯಿ ಮಿತ್ರಾಂಕ್ ಪಳಯ್ಲಾಗ್ಲೆಂ.
“ಆಯ್ಕ್ ಸಿಮಿಲನ್, ಆದ್ಲ್ಯಾ ವರ್ಸಾ ಆಮಿ ಸರ್ವಾಂಯಿ ಎಕಾ ಕಾಜಾರಾಚಾ ಪಾರ್ಟೆಕ್ ಲೊನಾವ್ಲಾ ಪಾವ್ಲ್ಲ್ಯಾಂವ್, ತುಕಾ ಉಗ್ಡಾಸ್ ಆಸೊಂಕ್ ಪುರೊ. ತೆಂ ಕಾಜಾರ್ ಮ್ಹಜ್ಯಾ ಬಾಪುಲ್ ಭಾವಾಚೆಂ ಜಾಲ್ಲ್ಯಾನ್ ಹಾಂವೆಂ ಮ್ಹಜ್ಯಾ ಮಿತ್ರಾ ಮ್ಯಾಕ್ಲಿನಾಕ್ ವತ್ತಾಯೆನ್ ಆಪಯಿಲ್ಲೆಂ ಆನಿ ತೊ ಆಯಿಲ್ಲೊ. ತೊ ಪಾವ್ತಾನಾ ರಾತ್ ಜಾಲ್ಲಿ ಆನಿ ಹಾಂವ್ ಚಿಕ್ಕೆ ಚಡ್ ಪಿಯೆಲ್ಲೊಂ. ಮ್ಯಾಕ್ಲಿನಾಸಂಗಿಂ ತುಂ ತುಜ್ಯಾ ದಾಕ್ಟುಲ್ಯಾ ಭಯ್ಣಿಕ್ ಹಾಡುನ್ ಆಯಿಲ್ಲೆಂಯ್ ಮ್ಹಳ್ಳೆಂ ತ್ಯಾ ವೆಳಾ ಆಮಾಲಾಚಾ ಬರಾರ್ ಹಾಂವ್ ಸಮ್ಜೊಂಕ್ ಸಕೊಂಕ್ ನಾತ್ಲ್ಲೊಂ. ತ್ಯಾಚ್ ದೀಸ್, ಮ್ಹಜಿ ಇಷ್ಟಾಗಾತ್ ಎಕಾ ಚಲಿಯೆಸಂಗಿಂ ಜಾಲ್ಲಿ, ಜಿ ಪೂನಾ ಥಾವ್ನ್ ಕಾಜಾರಾಕ್ ಆಯಿಲ್ಲಿ......
ಬಾಪ್ಪುಚೊ ಬಂಗ್ಲೊ ಬರೊ ವ್ಹಡ್ ಆಸೊನ್, ಕಾಜಾರಾಕ್ ಆಯಿಲ್ಲ್ಯಾಂಕ್ ರಾತಿಂ ರಾಂವ್ಚಿ ಸವ್ಲತ್ ಆಸ್ಲ್ಲಿ. ಹಾಂವೆಂ ತ್ಯೆ ಚಲಿಯೆಕ್ ಮ್ಹಜಿ ಇಛ್ಛಾ ತಿಳ್ಸಿಲ್ಲಿ ಆನಿ ತಿಣೆ ಖುಶಿ ದಾಖಯಿಲ್ಲಿ. ರಾತಿಂ ವ್ಹೊರ್ ಏಕ್ ಉತಾರ್ತಾನಾ ಆಮಿ ನಿದೊಂಕ್ ಗೆಲ್ಲ್ಯಾಂವ್. ತುಂ ತುಜ್ಯಾ ಭಯ್ಣಿಸಂಗಿಂ ಎಕಾ ಕುಡಾಂತ್ ನಿದೊಂಕ್ ಗೆಲ್ಲೆಂಯ್ ಆನಿ ತಾಚಾ ಕುಶಿಚಾ ಕುಡಾಂತ್ ತಿ ಚಲಿ ನಿದ್ಲ್ಲಿ. ಹಾಂವ್ ಆನಿ ಮ್ಯಾಕ್ಲಿನ್ ಎಕಾ ಕುಡಾಂತ್ ನಿದೊಂಕ್ ಗೆಲ್ಲ್ಯಾಂವ್. ರಾತಿಂ ಹಾಂವ್ ಮ್ಹಾಕ್ಲಿನಾಕ್ ನೀದ್ ಪಡ್ಲ್ಯಾ ಉಪ್ರಾಂತ್ ತ್ಯೆ ಚಲ್ಯೆಚಾ ಕುಡಾಕ್ ಗೆಲ್ಲೊಂ.......
ಕಾಳ್ಕಾಂತ್ಚ್ ಮ್ಹಜಿ ಅಶ್ಯಾ ಬಾಗವ್ನ್ ಹಾಂವ್ ಪಾಟಿಂ ಮ್ಹಜ್ಯಾ ಕುಡಾಕ್ ಯೇವ್ನ್ ನಿದ್ಲ್ಲೊಂ. ದುಸ್ರ್ಯಾ ದಿಸಾ ಸಾಕಾಳಿಂ ತಿ ಚಲಿ ಮ್ಹಾಕಾ ಸಾಂಗಾಲಾಗ್ಲಿ. ಸಗ್ಳಿ ರಾತ್ ತಿ ಮ್ಹಾಕಾ ರಾಕೊನ್ ಆಸ್ಲ್ಲಿ ಆನಿ ಹಾಂವ್ ಕಿತ್ಯಾಕ್ ಯೇಂವ್ಕ್ನಾತ್ಲ್ಲೊಂಗಿ ಮ್ಹಣ್. ತೆಂ ಆಯ್ಕಾಲ್ಲೊಂ ಹಾಂವ್ ಉಡೊನ್ ಪಡ್ಲೊಂ. ತರ್ ಹಾಂವ್ ಕೊಣಾಚಾ ಕುಡಾಕ್ ಪಾವ್ಲ್ಲೊಂ ತೆಂ ಚಿಂತುನ್. ಮ್ಹಾಕಾ ಉಗ್ಡಾಸ್ ಆಯ್ಲೊ, ಹಾಂವ್ ಆನ್ಯೆಕಾ ಕುಡಾಕ್ ಪಾವ್ಲ್ಲೊಂ ಮ್ಹಳ್ಳೆಂ. ಕಿತ್ಯಾಕ್ ತಿ ಎಕ್ಲಿ ನಾತ್ಲ್ಲಿ, ತಿಚೆ ಕುಶಿಕ್ ಲ್ಹಾನ್ ತಿಚಿ ಭಯ್ಣ್ ನಿದೊನ್ ಆಸ್ಲ್ಲಿ. ಪುಣ್ ತ್ಯಾ ವೆಳಾ ಹಾಂವ್ ಆಮಾಲಾಂತ್ ಆಸ್ಲ್ಲ್ಯಾನ್ ಮತಿಕ್ ವರಿನಾಸ್ತಾಂ ಮ್ಹಜೆ ಥಾವ್ನ್ ಚೂಕ್ ಘಡೊನ್ ಜಾಲ್ಲಿ......
ಹಾಂವೆಂ ಕೂಡ್ಲೆ ಮ್ಯಾಕ್ಲಿನಾಕ್ ವಿಚಾರ್ಲೆಂ ತುಜೆವಿಶಿಂ, ತುಮಿ ಎಕಾಮೆಕಾ ಮೊಗಾರ್ಪುಣಿ ನಾಂತ್ಮೂ ಮ್ಹಣ್. ತೊ ಮ್ಹಣಾಲೊ, ತುಮಿ ಫಕತ್ತ್ ಫ್ರೆಂಡ್ಸ್ ಮ್ಹಣ್. ತೆದ್ನಾಂ ಹಾಂವೆಂ ಮ್ಹಜೆ ಥಾವ್ನ್ ಫರಮಾಶೆನ್ ಘಡ್ಲ್ಲಿ ಚೂಕ್ ತಾಕಾ ಸಾಂಗ್ಲಿ. ಆಯ್ಕೊನ್ ಮ್ಯಾಕ್ಲಿನ್ ಮ್ಹಜೆರ್ ಮಸ್ತು ಬೆಜಾರ್ ಜಾಲೊ. ಹಾಂವೆಂ ತಾಚೆಕಡೆನ್ ಮಾಫಿ ಮಾಗೊನ್ ಸಾಂಗ್ಲೆಂ, ಹಾಂವ್ ತಿಚೆ ಕಡೆನ್ ಕಾಜಾರ್ ಜಾತಾಂ ಮ್ಹಣ್. ತಾಣೆ ಜಾಪ್ ದೀಂವ್ಕ್ನಾ ಫಕತ್ತ್ ತೊ ಮಸ್ತು ಚಿಂತೆಸ್ತ್ ಜಾಲ್ಲೊ. ಸಕಾಳಿಂ ತುಕಾ ಹಾಂವೆಂ ಪಳಯ್ತಾನಾ, ಹಾಂವ್ ಆಪ್ರ್ಯಾದ್ಯಾಪರಿಂ ತುಜೆ ಮುಖಾರ್ ಆಸ್ಲ್ಲೊಂ, ಪುಣ್ ತುಂವೆಂ ಆದ್ಲ್ಯಾ ರಾತಿಚೆಂ ಕಾಂಯ್ಚ್ ತುಜ್ಯಾ ತೊಂಡಾರ್ ದಾಖಂವ್ಕ್ ನಾಂಯ್.
ಉಪ್ರಾಂತ್ ಖಬಾರ್ ಮೆಳ್ಳಿ, ಮ್ಯಾಕ್ಲಿನ್ ಕಾಮಾಚಾ ಬಾಬ್ತಿಂ ಮಡ್ರಾಸ್ ಟ್ರಾನ್ಫರ್ ಜಾಲಾ ಮ್ಹಣ್. ಹಾಂವೆಂ ತುಜಿ ಇಷ್ಟಾಗತ್ ಕರುಂಕ್ ಪ್ರಯಾತ್ನ್ ಕೆಲೆಂ. ಪುಣ್ ತುಂವೆಂ ತಿ ಸ್ವೀಕಾರ್ ಕರುಂಕ್ ವರಸ್ ಕಾಡ್ಲೆಂಯ್.
ಹಾಂವ್ ತುಜೆಸಂಗಿಂ ಕಾಜಾರ್ ಜಾತಾಂ ಮ್ಹಣ್ ಮ್ಯಾಕ್ಲಿನಾಕ್ ಹಾಂವೆಂ ತಿಳ್ಸಿಲ್ಲೆಂ, ಪುಣ್ ತೊ ಕಾಜಾರಾಕ್ ಯೇಂವ್ಕ್ನಾ. ಆನಿ ಅಚಾನಕ್ ತಾಕಾ ಹಾಂವೆಂ ಕಾಲ್ ಹ್ಯಾಚ್ ಶೆರಾಂತ್ ಹನಿಮೂನಾಕ್ ಆಯಿಲ್ಲೆಂ ಪಳವ್ನ್ ಹಾಂವ್ ಖುಶಿ ಜಾಲ್ಲೊಂ. ತರೀ ಹಾಂವ್ ತುಮ್ಚೊ ಸಂಬಂಧ್ ನೆಣಾ ಆಸ್ಲ್ಲೊಂ. ಸಿಮಿಲನ್ ತುಕಾ ನಾಚೊಂಕ್ ಉಟೈತಾನಾ ತುಮಿ ಆದ್ಲಿಂ ಫ್ರೆಂಡ್ಸಾಂ ಮ್ಹಳ್ಳೆಂಚ್ ಮ್ಹಜ್ಯಾ ಮತಿಂತ್ ಆಸ್ಲ್ಲೆಂ. ಪುಣ್ ಸಿಮಿಲನ್ ತುಜೆ ಕಡೆನ್ ತಿತ್ಲ್ಯಾ ಲಾಗ್ಸಿಲ್ಯಾನ್ ದಲೊನ್ ಆಸ್ತಾನಾ ಅನಿ ತಾಣೆ ತುಜೆ ಕಡೆನ್ ಮೊಗಾನ್ ಉಲೈತಾನಾ ಹಾಂವೆಂ ನೆಣಾರ್ಯಾಂಪರಿಂ ಕರುನ್ ಮ್ಹಜೆ ಕಾನ್ ತುಮ್ಚೆ ಥಂಯ್ ಲಾಯಿಲ್ಲೆ. ಆನಿ ಸಭಾರ್ ಸಂಗ್ತಿ ಮ್ಹಜ್ಯಾ ಗಮನಾಕ್ ಆಯಿಲ್ಲ್ಯೊ.......”
“ಮ್ಹಾಕಾ ಮಾಫ್ ಕರ್ ಸಿಮಿಲನ್, ತ್ಯಾ ರಾತಿಂ ಬಹುಷಾ ತುಂವೆಂ ಮ್ಹಾಕಾ ತುಜೆಸಂಗಿಂ ತಶೆಂ ಕರುಂಕ್ ಸೊಡ್ಲ್ಲೆಂಯಿ, ತೊ ಮ್ಯಾಕ್ಲಿನ್ಂಚ್ ಮ್ಹಳ್ಳ್ಯಾ ಬಾವನಾನ್ ಮ್ಹಣ್ ತೆಂ ಹಾಂವ್ ಆತಾಂ ಸಮ್ಜಾಲೊಂ. ಹಾಂವೆಂ ಜಾವ್ನ್ಯಿ ತಿ ಖಭಾರ್ ತುಜೆ ಕಡೆನ್ ವಿಚಾರುಂಕ್ನಾ, ವ ತುಂವೆಂ ಜಾಲ್ಯಾರಿ ಮ್ಹಜೆ ಕಡೆನ್ ವಿಚಾರುಂಕ್ನಾಂಯ್. ಇಷ್ಟಾನ್ ಪಾಡ್ಕೆಲ್ಲ್ಯಾ ಚಲಿಯೆಸಂಗಿಂ ಕಾಜಾರ್ ಜಾವ್ನ್ ಮ್ಯಾಕ್ಲಿನ್ ಆಪ್ಲ್ಯಾಚ್ ನದ್ರೆಂತ್ ಪಡೊಂಕ್ ತಯಾರ್ ನಾತ್ಲ್ಲೊ ಜಾಯ್ಜಯ್. ದೆಕುನ್ ತುಕಾ ಸೊಡುನ್ ಪಯ್ಸ್ ವಚುಂಕ್ ತಾಣೆ ಆಪ್ಲೆಂ ಕಾಮ್ ಮಡ್ರಾಸಾಕ್ ವರ್ಗಾವಣ್ ಕರಯಿಲ್ಲೆಂ ಜಾಯ್ಜಯ್. ಆಖ್ರೇಕ್ ಮ್ಹಜೆಂ ಕಾಜಾರ್ ತುಜೆ ಸಂಗಿಂ ಜಾಲ್ಯಾ ಉಪ್ರಾಂತ್ಚ್ ತೊಯಿ ಕಾಜಾರ್ ಜಾಲ್ಲೊ.......
ಜೆಂ ಕಿತೆಂ ಆಮಿ ಕೆಲ್ಲೆಂ ಬರೆಂ ವಾಯ್ಟ್ ಹ್ಯಾಚ್ ಜನ್ಮಾಂತ್ ಭಗೊಂಕ್ ಆನಿ ಜಾಣಾ ಜಾಂವ್ಕ್ ಆಸ್ಲ್ಲ್ಯಾನ್ ಶಿವಾಯ್ ತುಜೊ ಮ್ಯಾಕ್ಲಿನ್ ತುಂವೆಂ ಚಿಂತ್ಲ್ಲ್ಯಾಪರಿಂ ಪಾಡ್ ಆನಿ ಘಾತ್ಕಿ ನ್ಹಯ್ ಮ್ಹಣ್ ದಾಖಂವ್ಕ್ಚ್ ದೆವಾನ್ ಆಮ್ಕಾಂ ಹ್ಯಾ ಶೆರಾಂತ್ ಆಮ್ಚ್ಯಾ ಹನಿಮೂನಾಚಾ ನಿಬಾನ್ ಪರಾತ್ ಮೆಳಾಶೆಂ ಕೆಲ್ಲೆಂ ಕೊಣ್ಣಾ”
ರಾಯಾನಾನ್ ಕಾಂಯಿಂಚ್ ಲಿಪಯ್ನಾಸ್ತಾಂ ತ್ಯಾ ರಾತಿಂ ತಾಚೆಥಾವ್ನ್ ಘಡ್ಲ್ಲಿ ಫರಾಮಸ್ ಸಿಮಿಲನಾಕ್ ಸಾಂಗ್ತಾನಾ ಸಿಮಿಲನ್ ಧ್ವೇಷ್ ಭರ್ಲ್ಲ್ಯಾ ದಿಷ್ಟಿನ್ ರಾಯಾನಾಕ್ ಪಳವ್ನ್, ಏಕ್ ಕರುಣಾಬರಿತ್ ದೀಷ್ಟ್ ಮ್ಯಾಕ್ಲಿನಾಚೆರ್ ಘಾಲುನ್ ಭಿತರ್ ವಚುಂಕ್ ಘುಂವ್ತಾನಾ, ಮುಖಾರ್ ಜೈನಿಕ್ ರಾವೊನ್ ಆಸ್ಲ್ಲೆಂ.....!!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
