ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
3. ಕಾಣಿ ಜಿಣಿ
8. ತಿಸ್ರೊ ಶಕುನಿ
9. ಸಾಡೊ
10. ಪಾವ್ಸ್ ಆಶೆತಾಂ
11. ಹಾಸ್ ಹಾಸ್
12. ಜಾಲ್ಲೆ ದೀಸ್
ಫ಼ಾಂತ್ಯಾ ಪಾರಾ ತುಂರ್ಬೆತ್ ವ್ಹಾಜ್ಲೆಂ
ಭೊಡ್ವಾಂ ತೊಂಡಾರ್ ಸಂಗೀತ್ ಗಾಜ್ಲೆಂ
ಮಳ್ಬಾ ಮಾಟ್ಯಾಂತ್ ನೆಕೆತ್ರ್ ಸಜ್ಲೆಂ
ಜೆಜು ಜಾಲ್ಲೆ ರಾತಿಂ.
ಪುರ್ವಿತ್ ಪಾದ್ರಿಂಕ್ ಖಬರ್ ನಾತ್ಲಿ
ಗೊರ್ವಾಂ ಬೊಕ್ರ್ಯಾಂಕ್ ವಾರ್ತಾ ವೊತ್ಲಿ
ಕುರ್ಬ್ಯಾಂ ಕಾನಾಂತ್ ಮಾತ್ ಘಾತ್ಲಿ
ಜೆಜು ಜಾಲ್ಲಿ ವಾರ್ತಾ.
ಕುರ್ಬ್ಯಾಂ ಹಾರಿಂ ಗೊಟ್ಯಾಕ್ ಗೆಲ್ಯೊ
ನಮಾನ್ ದಿಂಬಿಯೊ ಬಾಳ್ಕಾಕ್ ಘಾಲ್ಯೊ
ಉಗ್ಡಾಸ್ ಕುರುವೊ ದೊಂಗ್ರಾಕ್ ವೆಲ್ಯೊ
ಬೆಲೆಯಾಚಾ ಗೊವ್ಳ್ಯಾನ್
ಉಪ್ರಾಂತ್ ತೆತ್ತೀಸ್ ದಿವಸ್ ಜಾಲ್ಲೆ
ಜೆಜು ಗೊಟ್ಯಾ ಖಾವ್ಣೆ೦ತ್ ಜಾಲ್ಲೆ
ಉಗ್ಡಾಸಾಂತ್ಯಿ ಮರೊನ್ ಗೆಲೆ
ತ್ಯಾಯಿ ಗೊವ್ಳ್ಯಾಂಚಾ.
ಉಪ್ರಾಂತ್ ಎಕ್ಲೊಯಿ ಆಯ್ಲೊ ನಾ
ಜಾಲ್ಲ್ಯಾ ದಿಸಾಕ್ ಪಾಳ್ಳೊ ನಾ
ಆಂವ್ಡೊ ಲೆಗುನ್ ಗಿಳ್ಳೊ ನಾ
ಕುರ್ಬೆ ತೆ ಕುರ್ಬೆ.
ವಿಸರ್ ಕಸೊ ಪಾಡಾರ್ಯಾಂಕ್?
ಭೊಡ್ವ್ಯಾಂ ಉತರ್ ಆಡಾರ್ಯಾಂಕ್
ಗೆಲ್ನಾಂ ಕಾನಾಂತ್ ವೊಡಾರ್ಯಾಂಕ್
ಮಾಕಾ ಕಾಂಯ್ ಕಳ್ನಾ.
ಸರ್ವೆಸ್ಪರಾನ್ ದುತಾಂ ಕರ್ನಾಂ
ಸಾಂಗ್ಲೆ ಉತರ್ ಕಾನಿಂ ವರ್ನಾ
ಜೆಜು ಮಾಗಿರ್ ಮೊರಾ ಧರ್ನಾ
ಜಾಲ್ಲೊ ದಿಸ್ಚ್ ಕರ್ನಾಂ.
ತಾಂಚೊ ರಾಯ್ ತಾಂಚೊ ರಾಯ್
ಪಯ್ಲ್ಯಾಚ್ ದಿಸಾ ಕಾಬಾರ್ ಕಾಯ್?
ನಾಂತರ್ ಕಿತ್ಯಾಕ್ ಮತಿರ್ ಸಾಯ್
ವಿಸ್ರಾಳ್ ದೆಂವ್ಚಾರಾಚಿ
ಕುರ್ಬೊಯಿ ನಾ ರಾಜಾಯಿ ನಾ
ಜಾಲ್ಲ್ಯಾ ದಿಸಾಂ ಮಜಾಯಿ ನಾ
ಸೊನೆ ಧುಂಪಾ ಇಜಾಯಿ ನಾ
ಪಯ್ಲ್ಯಾ ದಿಸಾ ನಂತರ್.
ತೆತ್ತೀಸ್ ತಾಚೆ ದಿವಸ್ ಜಾಲ್ಲೆ
ನಾಂವ್ ನಾಸ್ತಾಂ ಮಾಟ್ಯಾಕ್ ಗೆಲ್ಲೆ
ತಾಚೆ ಭಕ್ತ್ ಆಯ್ಲೆ ಗೆಲ್ಲೆ
ಮೊರ್ತಾ ಪರ್ಯಾ೦ತ್ ರಾಕ್ಲೆ.
ಜೆಜು ಮಾಗಿರ್ ಖುರ್ಸಾರ್ ಮೆಲೊ
ಮನಿಸ್ ಮಾತ್ಸೊ ಸುಶೆಗ್ ಜಾಲೊ
ಜಾಲ್ಲೊ ದೀಸ್ ಖುಶೇನ್ ಕೆಲೊ
ಕೇಕಿ ಬೀರಿ ಸೊರ್ಯಾನ್.
ಜೆಜುಚ್ಯಾ ಜಲ್ಮಾ ದಿಸಾ ತುಂರ್ಬೆತ್ ವ್ಹಾಜ್ಲೆಂ, ಆಂಜಾಂನಿ ಗಾಯನ್ ಕೆಲೆಂ, ಮಳ್ಬಾರ್ ನೆಕೆತ್ರ್ ಪ್ರಕಾಸ್ಲೆಂ.
ಫಾಂತ್ಯಾ ಪಾರಾ ತುಂರ್ಬೆತ್ ವ್ಹಾಜ್ಲೆ೦
ಭೊಡ್ವಾಂ ತೊಂಡಾರ್ ಸಂಗೀತ್ ಗಾಜ್ಲೆಂ
ಮಳ್ಬಾ ಮಾಟ್ಯಾಂತ್ ನೆಕೆತ್ರ್ ಸಜ್ಲೆಂ
ಜೆಜು ಜಾಲ್ಲೆ ರಾತಿಂ.
ಇತ್ಲೊ ಸಂಭ್ರಮ್ ಸರ್ಗಾರಾಜಾಚೊ ಜಾತಾನಾ ಪುರ್ವಿತಾಂಕ್ ಖಬರ್ ನಾತ್ಲ್ಲಿ. ಆಂಜಾಂನಿ ಜೆಜುಚ್ಯಾ ಜಲ್ಮಾದಿಸಾಚಿ ಖಬರ್ ದಿಲಿ, ದಿಲಿ ತರ್ಯಿ ಕೊಣಾಕ್? ಬೊಕ್ರ್ಯಾಂಕ್ ಚರಯ್ತಲ್ಯಾಂಕ್. ಪುರ್ವಿತಾಂಕ್ ಜೆಜು ಜಾಲ್ಲಿ ಖಬರ್ ಆಂಜಾಂನಿ ದಿಲಿಚ್ ನಾ.
ಪುರ್ವಿತ್ ಪಾದ್ರಿಂಕ್ ಖಬರ್ ನಾತ್ಲಿ
ಗೊರ್ವಾಂ ಬೊಕ್ರ್ಯಾಂಕ್ ವಾರ್ತಾ ವೊತ್ಲಿ
ಕುರ್ಬ್ಯಾಂ ಕಾನಾಂತ್ ಮಾತ್ ಘಾತ್ಲಿ
ಜೆಜು ಜಾಲ್ಲಿ ವಾರ್ತಾ.
ಕುರ್ಬೆ ಹಾರಿಂನಿ ಗೊಟ್ಯಾಕ್ ಗೆಲೆ ಆನಿ ದಿಂಬಿಯೆರ್ ಗಳೊನ್ ತಾಣಿಂ ಬಾಳ್ಕಾಕ್ ನಮಸ್ಕಾರ್ ಕೆಲೊ. ದೇವ್ ಬಾಳ್ಕಾಚ್ಯಾ ಜಲ್ಮಾಚೊ ಉಗ್ಡಾಸ್ ಮಾತ್ ಘುರ್ತ್ ಜಾವ್ನ್ ಘೆವ್ನ್ ತೆ ಪಾಟಿಂ ಗೆಲೆ.
ಕುರ್ಬ್ಯಾಂ ಹಾರಿಂ ಗೊಟ್ಯಾಕ್ ಗೆಲ್ಯೊ
ನಮಾನ್ ದಿಂಬಿಯೊ ಬಾಳ್ಕಾಕ್ ಘಾಲ್ಯೊ
ಉಗ್ಡಾಸ್ ಕುರುವೊ ದೊಂಗ್ರಾಕ್ ವೆಲ್ಯೊ
ಬೆಲೆಯಾಚಾ ಗೊವ್ಳ್ಯಾನ್
ಇತ್ಲೊ ಸಂಭ್ರಮ್ ಜೆಜು ಜಿಯೆಲ್ಯಾ ಉಪ್ರಾಂತ್ಲ್ಯಾ ತೆತ್ತಿಸ್ ವರ್ಸಾಂನಿ ಏಕ್ ಪಾವ್ಟಿಯಿ ಜಾಲೊನಾ. ಜೆಜುಚೊ ಜಲ್ಮ್ ತೆ ಗೊವ್ಳೆಯಿ ವಿಸರ್ಲೆ.
ಉಪ್ರಾಂತ್ ತೆತ್ತಿಸ್ ದಿವಸ್ ಜಾಲ್ಲೆ
ಜೆಜು ಗೊಟ್ಯಾ ಖಾವ್ಣೆ೦ತ್ ಜಾಲ್ಲೆ
ಉಗ್ಡಾಸಾಂತ್ಯಿ ಮರೊನ್ ಗೆಲೆ
ತ್ಯಾಯಿ ಗೊವ್ಳ್ಯಾಂಚಾ.
ಪಯ್ಲ್ಯಾ ಜಲ್ಮಾದಿಸಾ ಉಪ್ರಾಂತ್ ಜೆಜುಚೊ ಜಲ್ಮಾದೀಸ್ ಎಕ್ಲ್ಯಾನ್ಯಿ ಪಾಳ್ಳೊ ನಾ, ತ್ಯಾ ದಿಸಾಚೊ ಸಂಭ್ರಮ್ ಆಶೆವ್ನ್ ಕೊಣೆಂಯಿ ಆಂವ್ಡೊ ಗಿಳ್ಳೊನಾ. ಕಿತ್ಲೆಂ ಮ್ಹಳ್ಯಾರ್ಯಿ ಕುರ್ಬೆ, ಕುರ್ಬೆ ತೆ ಕುರ್ಬೆಚ್.
ಉಪ್ರಾಂತ್ ಎಕ್ಲೊಯಿ ಆಯ್ಲೊ ನಾ
ಜಾಲ್ಲ್ಯಾ ದಿಸಾಕ್ ಪಾಳ್ಳೊ ನಾ
ಆಂವ್ಡೊ ಲೆಗುನ್ ಗಿಳ್ಳೊ ನಾ
ಕುರ್ಬೆ ತೆ ಕುರ್ಬೆ.
ತ್ಯಾ ಅಲವ್ಕಿಕ್ ಸಂಭ್ರಮಾಚಿ ವಿಸರ್ ತರ್ಯಿ ಕಶಿಪಡ್ಲಿ ? ಭೊಡ್ವ್ಯಾಂಚೆ ಉತರ್ಯಿ ಕಶೆಂ ತಾಂಕಾಂ ವಿಸರ್ಲೆಂ? ಹೊ ಏಕ್ ಮಿಸ್ತೆರ್ಸೊ ಜಾತಾ ಆನಿ ಕಾಂಯ್ ಕಳಚ್ ನಾ
ವಿಸರ್ ಕಸೊ ಪಾಡಾರ್ಯಾಂಕ್?
ಭೊಡ್ವ್ಯಾಂ ಉತರ್ ಆಡಾರ್ಯಾಂಕ್
ಗೆಲ್ನಾ ಕಾನಾಂತ್ ವೊಡಾರ್ಯಾಂಕ್
ಮಾಕಾ ಕಾಂಯ್ ಕಳ್ನಾ.
ಸರ್ವೆಸ್ಪರಾಚ್ಯಾ ಭೊಡ್ವ್ಯಾಂನಿ ಖಬರ್ ದಿಲ್ಲಿ ತರ್ಯಿ ಹಾಂಕಾಂ ನಟ್ವಲೆಂ ನಾ. ಜೆಜು ಮೊರಾಪರ್ಯಾಂತ್ ತಾಚೆ ಜಲ್ಮಾದೀಸ್ ಜಾಲೆಚ್ ನಾಂತ್.
ಸರ್ವೆಸ್ಪರಾನ್ ದುತಾಂ ಕರ್ನಾ
ಸಾಂಗ್ಲೆ ಉತರ್ ಕಾನಿಂ ವರ್ನಾ
ಜೆಜು ಮಾಗಿರ್ ಮೊರಾ ಧರ್ನಾ
ಜಾಲ್ಲೊ ದೀಸ್ಚ್ ಕರ್ನಾ.
ರಾಯ್ ಜಲ್ಮಲಾ ಮುಳ್ಳೊ ಸಂದೇಶ್ ಕಳಿತ್ ಆಸ್ಲ್ಲೆಯಿ ವಿಸರ್ಲೆ! ತಾಂಚೊ ರಾಯ್ ಪಯ್ಲ್ಯಾಚ್ ದಿಸಾ ನಾಸ್ ಜಾಲೊ ಕಾಯ್? ಆಸೊಂಕ್ ಪುರೊ ತಿ ದೆಂವ್ಚಾರಾಚಿ ನಾಡ್, ನಾ ತರ್ ಮತಿಂತ್ಲೊ ಉಗ್ಡಾಸ್ ವಿಸರ್ಲೊ ಕಸೊ?
ತಾಂಚೊ ರಾಯ್ ತಾಂಚೊ ರಾಯ್
ಪಯ್ಲ್ಯಾಚ್ ದಿಸಾ ಕಾಬಾರ್ ಕಾಯ್?
ನಾಂತರ್ ಕಿತ್ಯಾಕ್ ಮತಿರ್ ಸಾಯ್
ವಿಸ್ರಾಳ್ ದೆಂವ್ಚಾರಾಚಿ
ಕುರ್ಬೆಯಿ ನಾಂತ್, ರಾಯ್ಯಿ ನಾಂತ್, ಧುಂಪಾಭಾಂಗಾರಾಚಿ ಕಾಣಿಕ್ಯಿ ನಾ. ತೆಂ ಪುರಾ ಎಕಾಚ್ ದಿಸಾನ್ ಸಂಪ್ಲೆಂ. ಮಾಗಿರ್ ಜೆಜು ಮೊರಾಪರ್ಯಾಂತ್ ಸಗ್ಳೆ ವೊಗೆ ರಾವ್ಲೆ.
ಕುರ್ಬೊಯಿ ನಾ ರಾಜಾಯಿ ನಾ
ಜಾಲ್ಲ್ಯಾ ದಿಸಾ೦ ಮಜಾಯಿ ನಾ
ಸೊನೆ ಧು೦ಪಾ ಇಜಾಯಿ ನಾ
ಪಯ್ಲ್ಯಾ ದಿಸಾ ನ೦ತರ್.
ತಾಚೆಂ ಮರಣ್ ಖುರ್ಸಾರ್ ಜಾತಚ್, ಮನಿಸ್ ಜೆಜುಚೊ ಜಲ್ಮಾದೀಸ್ ಆಚರ್ತಾ. ಪುಣ್ ಹೊ ಆಚಾರ್ ಜೆಜು ಜಲ್ಮಲ್ಲ್ಯಾ ಸಂತೊಸಾಚೊಗಿ ಯಾ ತೊ ಮೆಲೊ ಆನಿ ಆಮಿ ಕಶೆಂಯಿ ಜಿಯೆವ್ಯೆತ್ಮ್ಹಣ್ ನಿರಾಳ್ ಜಾಲ್ಲ್ಯಾ ಸಂತೊಸಾಚೊ? ಆಸ್ಯೆತ್ ಹೊ ಆಚಾರ್ ಪೊಕೊಳ್ ಮನ್ಶಾಂಚ್ಯಾ ಬಡಾಯೆಚೊ ಆನಿ ಪೊಟಾರ್ದ್ಪಣಾಚೊ. ದೆಕುನ್ ಜೆಜುಚ್ಯಾ ಜಲ್ಮಾಚೊ ಆಚಾರ್ ಗಡ್ಡ್ ಖಾಣಾಜೆವ್ಣಾನ್ ಆನಿ ಪಿಯೊಣ್ಯಾನ್ ಜಾತಾ.
ಜೆಜು ಮಾಗಿರ್ ಖುರ್ಸಾರ್ ಮೆಲೊ
ಮನಿಸ್ ಮಾತ್ಸೊ ಸುಶೆಗ್ ಜಾಲೊ
ಜಾಲ್ಲೊ ದೀಸ್ ಖುಶೇನ್ ಕೆಲೊ
ಕೇಕಿ ಬೀರಿ ಸೊರ್ಯಾನ್.
ಜೆಜುಚ್ಯಾ ಜಿವಿತಾ ಕಾಳಾರ್ ನಾತ್ಲ್ಲೊ ಸಂಭ್ರಮ್ ತೊ ಮರ್ತಚ್, ತೆಂಯಿ ಮರೊನ್ ಶೆಕ್ಡ್ಯಾಂ ಉಪ್ರಾಂತ್ ಆಚಾರಾಕ್ ಆಯ್ಲೊ. ಹ್ಯಾ ಸಂಭ್ರಮಾನ್ ಮನಿಸ್ ದೆವಾಕ್ ಕಿತ್ಲೊ ಲಾಗಿಂ ಜಾಲೊ? ಕ್ರಿಸ್ತಾಚಿ ಜಿಣಿ ಪಾಟಿಂ ವೆತಾವೆತಾಂ ತಾಚ್ಯಾ ನಾಂವಾನ್ ಮನ್ಶಾನ್ ಆಸಾಕೆಲ್ಲೆ ಆಚಾರ್, ವಿಚಾರ್ ಆನಿ ಉಚಾರ್ ಮಾತ್ರ್ ಸಂಭ್ರಮಾನ್ ವಾಂಚೊನ್ ಉರ್ತಾತ್. ಜಾಲ್ಲೊ ನಾ ಜಾವ್ನ್ ಜಾಲ್ಲೆ ದೀಸ್ ಆನಿ ತ್ಯಾ ದಿಸಾಚೆ ಸಂಭ್ರಮ್ ಮಾತ್ ಆಮ್ಚೆ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications