ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಆಮ್ಚ್ಯಾ ಪೆಂಕ್ಟಾಂತ್ ಭಳ್ ನಾ?!! - ಆಸ್ಟಿನ್ ಡಿ’ಸೋಜ್ ಪ್ರಭು
ಆಮ್ಚ್ಯಾ ಪೆಂಕ್ಟಾಂತ್ ಭಳ್ ನಾ?!!
ಆಯ್ಲೆವಾರ್ ಎಕ್ಲ್ಯಾ ’ನಾಲಾಯಕ್’ ಲೇಖಕಾನ್ ಬರಯ್ಲೆಂ ಕೀ ಥೊಡೆ ಹೆರಾಂಕ್ ಸಂದೇಶ್ ಪಾಟವ್ನ್ ನಾಂವ್ ಜೊಡ್ತಾತ್ ಆನಿಂ ತಸೆಂ ಕೆಲ್ಲ್ಯಾನ್ ತಾಂಕಾಂ ತಾಂಚ್ಯಾ ಜನ್ಮಾ ದಿಸಾ ದಾದೋಶಿ ಸಂದೇಶ್ ಯೆತಾತ್; ಹೊ ಎಕಾ ಥರಾಚೊ ಸಮಾಜೆಂತ್ ಜಯ್ತೆವಂತ್ ಜಾಂವ್ಕ್ ಪಳೆಂವ್ಚೊ ಕೀಳ್ ನಾಟಕಾ ಖೆಳ್ ಮ್ಹಣೊನ್ಂಯ್ ತಾಣೆಂ ವೊಲಾಯ್ಲೆಂ. ಅರೆ ದೆವಾ, ಕೊಣೇಂಯ್ ಅಶೆಂ ಕೆಲ್ಲ್ಯಾಂತ್ ತುಜೆಂ ಕಿತೆಂ ಝಡ್ಟಾ? ತುಜ್ಯಾ ಆಂಗಾರ್ ಕೋಣ್ ಉಡ್ಟಾ? ತರ್ ತುಂ ಕಿತ್ಯಾಕ್ ಏಕ್ ಲೇಖನ್ ಬರವ್ನ್ ಹೆರಾಂಕ್ ಯೆಟ್ಟಾಯ್? ಮಾತ್ಸೊ ಸಮಾಧಾನಿ ಜಾ, ಜರ್ ತುಕಾ ಕಿತೆಂಚ್ ಘಾಯ್ ಜಾಂವ್ಕ್ ನಾ, ತುಂವೆಂ ಕಿತ್ಯಾಕ್ ತುಜ್ಯಾ ಕಪಾಲಾರ್ ಬ್ಯಾಂಡೇಜ್ ಭಾಂದ್ಚಿ?
ಆಮ್ಚ್ಯೆ ಸಮಾಜೆಂತ್ ಭಾರಿಚ್ ಥೊಡ್ಯೊ ಅಂತರ್ಜಾಳಿ ಆಸಾತ್ ಆನಿಂ ಹ್ಯೊ ಅಂತರ್ಜಾಳಿ ಆಮ್ಕಾಂ ಖಬ್ರೊ ತುರ್ಥಾನ್ ಪಾವಯ್ತಾತ್, ಚತ್ರಾಯ್ ಆಸ್ಲ್ಯಾರ್ ಕಳಯ್ತಾತ್, ವಿವಿಧ್ ಮ್ಹಾಹೆತ್-ಮನೋರಂಜನ್ ದಿತಾತ್; ಹೆರ್ ಥೊಡ್ಯಾಂಚೆರ್ ಫಕತ್ ಕೊಂಕ್ಣಿ ಲೇಖನಾಂ, ಕಾಣ್ಯೊಂ, ಕವನಾಂ, ಇತ್ಯಾದಿ ದರಬಸ್ತ್ ಯೆತಾತ್. ಹಾಂವ್ ಹ್ಯಾ ಅಂತರ್ಜಾಳಿಂನಿ ವಾವುರ್ತೆಲ್ಯಾಂಕ್ ನಮಾನ್ ಮ್ಹಣ್ತಾಂ. ಕಿತ್ಯಾ ತಾಣಿಂ ಆಜ್ ಆಮ್ಚಿ ಕೊಂಕ್ಣಿ ಆಮ್ಚ್ಯಾ ಉಸ್ಕ್ಯಾರ್ ಖೆಳಂವ್ಕ್ ಅಧಿಕ್ ಸಹಕಾರ್-ಆದಾರ್ ದಿಲಾ. ಅಸಲ್ಯಾ ವಖ್ತಾ ಆಮಿಂ ಹ್ಯಾ ಅಂತರ್ಜಾಳಿಂಚೆರ್ ಆಮ್ಚೆ ಅಂತರ್ ದಾಖಂವ್ನ್ ಜಾಳ್ ವೊಂಕ್ಚೆಂ ಬಂಧ್ ಕರ್ಯಾಂ. ಕಸಲ್ಯಾಯ್ ಕಾರಣಾಂಕ್ ಲಾಗೊನ್ ಆಮ್ಕಾಂ ಜರ್ ಅಸಲ್ಯಾ ಅಂತರ್ಜಾಳಿಂನಿ ಅವ್ಕಾಸ್ ಮೆಳಾನಾ ತರ್ ಆಮಿಂ ಜಾಣಾಂ ಜಾಂವ್ಚೆಂಕೀ ಹಾಕಾ ಆಮಿಂಚ್ ಕಾರಣ್; ನ್ಹಯ್ ಅಂತರ್ಜಾಳಿ ಮ್ಹಣ್.
ವ್ಹಯ್, ಆಮ್ಚ್ಯಾ ಪೆಂಕ್ಟಾಂತ್ ಭಳ್ ನಾ, ಆಮ್ಕಾಂ ಸೊಸುಂಕ್ ತಾಂಕಾನಾ, ಆಮ್ಚ್ಯೆಯಿತ್ಲ್ಯಾಕ್ ಉಭೊ ರಾಂವ್ಚಿ ಸಕತ್ ನಾ, ಹೆರಾಂನಿ ಕಿತೇಂಯ್ ಕೆಲ್ಯಾರ್ ಪಳೆಂವ್ಕ್ಚ್ ಜಾಯ್ನಾ, ಆಮಿಂ ಪುಸ್ಕಿ ಮಾರ್ತಾನಾ ಕೊಣೇಂಯ್ ಏಟಂ ಬೊಂಬ್ ಫುಟ್ಲೊ ಮ್ಹಳೆಂನಾ ಜಾಲ್ಯಾರ್ ಆಮ್ಕಾಂ ಖರೋಖರ್ ರಾಗ್ ಯೆತಾ, ಕಿತ್ಯಾ ಆಮಿಂ ಚಿಂತ್ಚೆಂ ಆಮಿಂ ಕೆಲ್ಲೆಂಚ್ ವ್ಹಡ್ಲೆಂ ಮ್ಹಣ್! ಹ್ಯಾಚ್ ಕಾರಣಾಕ್ ಲಾಗೊನ್ ಆಮ್ಕಾಂ ಕಿತ್ಲೆಂ ಬರೆಂ ಜೆವ್ಲ್ಯಾರ್ಯೀ ಪಾತಳ್ ಉದ್ಕಾಡೆ ಜಾತಾ! ಆದಿಂ ಮಾಗಾ ಮಂಗ್ಳುರಾಂತ್ ದಾಖ್ತೆರ್ ಮೊತಿ ಅಸಲ್ಯಾ ಪಿಡೆಕ್ ವಕಾತ್ ದಿತಾಲೊ; ತಾಚ್ಯೆಲಾಗಿಂ ಸಭಾರ್ ನಮೂನ್ಯಾಚ್ಯೊ ಗುಳಿಯೊ ಆಸ್ಲ್ಲ್ಯೊ; ತೊ ಆತಾಂ ಮರಣ್ ಪಾವ್ಲಾ, ಆಮ್ಚ್ಯಾ ಪಿಡೆಂಕ್ ಆತಾಂ ವಕಾತ್ಚ್ ನಾ ಜಾಲಾಂ!
ವಾಲಿಂನಿ ದಾಕೊ ಜಾತಾತ್, ವಾಲಿಂನಿ ಮಿರಿಯಾಂ ಜಾತಾತ್, ವಾಲಿಂನಿ ಸಾಂಗೊ ಜಾತಾತ್, ವಾಲಿಂನಿ ಚಿಣೆಂ ಜಾತಾ, ವಾಲಿಂನಿ ಕಳೆ ಜಾತಾತ್, ವಾಲಿಂನಿ ತೆಂಡ್ಲಿಂ ಜಾತಾತ್, ವಾಲಿಂನಿ ಘೊಸಾಳಿಂ ಜಾತಾತ್, ವಾಲಿಂನಿ ಭಾಜಿ ಜಾತಾ, ವಾಲಿಂನಿ ಕಾರಾತಿಂ ಜಾತಾತ್, ವಾಲಿಂನಿ ಪಡ್ವಳಿಂ ಜಾತಾತ್, ವಾಲಿಂನಿ ತೊವ್ಶಿಂ ಜಾತಾತ್, ಅಸಲ್ಯಾ ವಾಲಿಂನಿ ಕಿತೇಂಯ್ ಜಾಂವ್ - ಜಾಂವ್ ಲ್ಹಾನ್ ಗಾತ್ರಾಚೆಂ ತೆಂಡ್ಲೆಂ ವ ಬೃಹತ್ ಗಾತ್ರಾಚೆಂ ಪೊಡ್ವೊಳೆಂ, ಹರ್ಯೆಕಾ ವಾಲಿಕ್ ಜರ್ ಧಾಂಕ್ ವ ಮಾಟೊವ್ ನಾ, ತರ್ ತಿ ವಾಲ್ ಧರ್ಣಿರ್ ಗತ್ ನಾಸ್ಚ್ಯಾಪರಿಂ ಚರೊನ್ಂಚ್ ವೆತಾ ಆನಿಂ ಥೊಡೆ ಪಾವ್ಟಿಂ ಕರ್ಪೊನ್ ಮೊರ್ತಾ!
ಹೆರ್ ಥೊಡ್ಯಾ ವಾಲಿಂನಿ ಬೊಬ್ಳಿಂ ಜಾತಾತ್, ಮೊಗಿಂ ಜಾತಾತ್, ಕಾಂಳ್ಗಾಂ ಜಾತಾತ್, ದೂದ್ಯಾಂ ಜಾತಾತ್, ಚಿಪ್ಟಾಂ ಜಾತಾತ್, ಕುವಾಳೆ ಜಾತಾತ್, ಆನಿಂ ಅಸಲ್ಯಾ ವಾಲಿಂಕ್ ಧಾಂಕ್ ಪಾವಾನಾ ವ ಮಾಟೊವ್ ಘಾಲೊ ತರ್ ತೊ ಬರೊಚ್ ಘಟ್ ಕರಿಜಾಯ್ ಪಡ್ತಾ ತಸೆಂ ಜಾಲ್ಲ್ಯಾನ್ ಹ್ಯೊ ವಾಲಿ ಚರೊನ್ಂಚ್ ವೆತಾತ್ ಆನಿಂ ಆಪ್ಲಿಂ ಬೊಬ್ಳಿಂ, ಕುವಾಳೆ ಧರ್ಣಿರ್ಚ್ ವಾಡೊಂಕ್ ಸೊಡ್ತಾತ್.
ಆಮಿಂ ಸಬಾರ್ ಹ್ಯಾಚ್ ವಾಲಿಂಚ್ಯಾ ಕಾಸ್ತಾಚೆ - ಪೆಂಕ್ಟಾಂತ್ ಭಳ್ಚ್ ನಾಸ್ಚೆ! ಆಮ್ಕಾಂ ಧಾಂಕಾಂಚೆರ್ ವ ಮಾಟ್ವಾರ್ ಚಡೊಂಕ್ ಕಳಾನಾ ಆನಿಂ ಆಮಿಂ ಹೆರಾಂಕ್ ಧುರ್ಸಾತಾಂವ್, ಹಿಣ್ಸಿತಾಂವ್, ಚಿಡಾಯ್ತಾಂವ್, ಹೆಡಾಯ್ತಾಂವ್, ಬೆಂಡ್ತಾಂವ್, ಕೆಂಡ್ತಾಂವ್ ಆನಿಂ ತಾಂಚೆ ಹಾತ್-ಪಾಂಯ್ ಮೊಡುನ್ ಸೊಡ್ತಾಂವ್. ಅಸೆಂ ಕರ್ಚ್ಯಾಂತ್ ಆಮ್ಕಾಂ ಭಾರಿಚ್ ಸಂತೊಸ್; ಆಮಿಂ ಚಿಂತ್ಚೆಂ ಆಮಿಂ ವಾಗ್ ಮಾರ್ಲೊ ಮ್ಹಣ್. ಆಮಿಂ ಬರಯಿಲ್ಲೆಂ-ಸಾಂಗ್ಲ್ಲೆಂ ಪರತ್ ಆನಿಂ ಪರತ್ ಪ್ರತಿಧ್ವನಿತ್ ಕರ್ನ್ ವಾಚುನ್, ಆಯ್ಕೊನ್ ಆಮ್ಕಾಂ ಸರ್ಗಾಕ್ ಪಾವ್ಲ್ಲೊ ಸಂತೊಸ್ ಭೊಗ್ತಾ. ಆಮ್ಚ್ಯಾ ದೊಳ್ಯಾಂತ್ ರಗಾತ್ ನಾ, ಕೂಡಿಂತ್ ಹುರುಪ್ ನಾ, ಮತಿಂತ್ ಸಂತೊಸ್ ನಾ ಆನಿಂ ಕಾಳ್ಚಾಂತ್ ಮೋಗ್-ಮಯ್ಪಾಸಾಚೆಂ ಕಿತೆಂಚ್ ಏಕ್ಚ್ ಏಕ್ ಬೀಂ ನಾ! ಆನಿಂ ಅಸಲ್ಯಾಂಕ್ ಪಾಟಿಂಬೊ ದೀಂವ್ಕ್ ಆಮ್ಚ್ಯಾ ಸಮಾಜೆಂತ್ ಥೊಡೆ ಸಂಪಾದಕ್ಯ್ ಆಸಾತ್. ಸಂಪಾದಕಾಂಚಿ ಆಶಾ ಏಕ್ಚ್ ಮ್ಹಳ್ಯಾರ್ ಅಸಲೆಂ ಧುರ್ಸೊಣೆಂ ತಾಣಿಂ ಪ್ರಕಟ್ ಕೆಲೆಂ ತರ್ ಸಭಾರ್ ವಾಚ್ಪಿ ವಾಚುನ್ ತಾಂಕಾಂ ಶಹಭಾಸ್ ಮ್ಹಣ್ತೆಲೆ ಮ್ಹಣ್. ತಸೆಂ ಮ್ಹಣ್ತಾನಾ ಶೆಣಾಕ್ ಮಾಣ್ಣಿ ಮ್ಹಣ್ ಆಪವ್ನ್ ಧುಂಪಂಯ್ತೆಲ್ಯಾಂಕ್ಯ್ ಆಮ್ಚೆ ಮಧೆಂ ಕಾಂಯ್ ಸುಕಿದಾಡ್ ನಾ, ತೆ ತಸಲಿ ಮಾಣ್ಣಿ ಖಾವ್ನ್ ಶಹಭಾಸ್ ಮ್ಹಣ್ ತಾಂಚೆ ಪೋಟ್ ಭರ್ತಾತ್ ಸಯ್ತ್!
ಮನಿಸ್ ಕಿತ್ಯಾಕ್ ಅಸೊ ತಾತ್ಸಾರಿ ಜಾತಾ ಆನಿಂ ಆಪ್ಲೊ ಮೊಸೊರ್ ಸೊಸುಂಕ್ ಸಕಾನಾಸ್ತಾಂ ತ್ಯಾ ಬೆಬ್ದ್ಯಾನ್ ಘೊಟುನ್ ಸಕತ್ ನಾಸ್ತಾಂ ಆಂಗಾ-ಪಾಂಗಾರ್ ವೊಂಕ್ಲ್ಲ್ಯಾಪರಿಂ ವೊಂಕ್ತಾ ಆನಿಂ ಆಪ್ಣಾಕ್ಚ್ ಘಾಣಯ್ತಾ? ಕಾಮ್ ನಾತ್ಲ್ಲ್ಯಾ ಕೆಲ್ಶ್ಯಾನ್ ಧರ್ಣಿರ್ ಆರ್ಸೊ ದವರ್ನ್ ಆಪ್ಲೆಚ್ ಕುಲೆ ತಾಸ್ಲ್ಲ್ಯಾಪರಿಂ ನ್ಹಯ್ಗಿ ಹಿಂ ಆತರ್ವಣಾಂ ಜಾತಾತ್? ಜೆನ್ನಾಂ ಪರ್ಯಾಂತ್ ಏಕ್ ಮನಿಸ್ ಆಪುಣ್ಂಚ್ ಶಾಣೊ ಮ್ಹಣ್ ಚಿಂತ್ತಾ, ತೆನ್ನಾಂ ಪರ್ಯಾಂತ್ ತೊ ಮನಿಸ್ ಹೆರಾಂಕ್ ಧರ್ಣಿಕ್ ಶೆವ್ಟಾಂವ್ಕ್ ಆಂವ್ಡೆತಾ; ಕಿತ್ಯಾ ತಾಕಾ ಕಳಿತ್ ಆಸಾನಾ ಹೆರಾಂಕ್ ಮರ್ಯಾದ್ ಕಸಿ ದಿಂವ್ಚಿ ಮ್ಹಳ್ಳೆಂ. ದಾಕಾಂ ಘೊಸಾಂಕ್ ಉಡೊನ್ ಉಡೊನ್ ಶೆವ್ಟಿಂ ತ್ಯೊ ದಾಕೊಚ್ ಕೊಡು ಮ್ಹಳ್ಳ್ಯಾ ತ್ಯಾ ಕೋಲ್ಯಾಪರಿಂ ಜಾತಾ ತಾಚಿ ಗತ್! ಭಿರ್ಮತ್ ಆಮ್ಚಿ, ಹೆರಾಂಕ್ ಚಿಡಾವ್ನ್-ಹೆಡಾವ್ನ್ ಸಂತೊಸ್ ಪಾಂವ್ಚಿ!
ಆಮ್ಚೆಂ ಹಗೆಂ, ಮೊಸೊರ್, ಜಿದ್ಧ್, ರಾಗ್ ಕಾಡುಂಕ್ ಆಮಿಂ ಅಸಲ್ಯಾ ಮಾಧ್ಯಮಾಂನಿ ಉಗ್ತ್ಯಾನ್ ಘೊಂಖ್ಚ್ಯಾ ಬದ್ಲಾಕ್ ಹ್ಯೊ ಅಂತರ್ಜಾಳಿ ಚಲವ್ಪ್ಯಾಂಕ್ ಮಾತ್ಸೊ ಆದಾರ್ ದೀವ್ನ್ ಸಹಕಾರ್ ಭಾಸಯ್ಲ್ಯಾರ್ ಕಾಂಯ್ ತರೀ ಆಮ್ಚ್ಯೆ ಸಮಾಜೆಂತ್ ಬರೆಂಪಣ್ ಜಾಯ್ತ್. ನ್ಹಯ್ ತರ್ ಆಮ್ಚ್ಯೊ ಪೆಂಕ್ಟಾಂತ್ ಭಳ್ ನಾಸ್ಚ್ಯೊ ವಾಲಿ ಧರ್ಣ್ ಸೊಡ್ನ್ ಕೇದಾಂತ್ ಚರೊಂಕ್ ವಚೊನ್ ಆಮ್ಚಿಂ ಬೊಬ್ಳಿಂ, ದೂದ್ಯಾಂ ಮೂಂಗ್ಯಾಚೆರ್ಚ್ ಕುಸೊನ್ ವೆತೆಲಿಂ. ಜರ್ ಆಮ್ಚ್ಯಾ ಆಂಗಾರ್ ಖೊರೊಜ್ ಜಾಲ್ಯಾ ತರ್ ಆಮಿಂ ಆಮ್ಚೆಂಚ್ ಆಂಗ್ ಖೊರ್ಪಿಜಾಯ್ ಶಿವಾಯ್ ಪೆಲ್ಯಾಚೆಂ ನ್ಹಯ್, ತಥಾಸ್ತು!
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
